Ezequiel

38 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, ataxmína̱ʼ ga̱jma̱a̱ʼ Gog bi̱ xtáa náa ku̱ba̱ʼ ndrígóo Magog, bi̱ phú kayá edxu̱u̱* náa Mesec ga̱jma̱a̱ náa Tubal, ma̱ngaa aratáríya̱ʼ dí magíʼnuu Gog. 3 Maratha̱a̱n: ‹Rígi̱ dí naʼthí Tátá Jeobá bi̱ itháán mba̱a̱: “Gi̱i̱ xtáá mu maxmína̱ʼ ga̱jma̱á nindxa̱a̱ʼ Gog, bi̱ kayá edxu̱u̱ náa Mesec ga̱jma̱a̱ náa Tubal. 4 Ma̱ni̱ rí matangañi̱ín, magídáʼ ajua̱nʼ náa itsu̱ rawaanʼ, maríña̱a̱nʼ gajmiáanʼ mbá xúgíinʼ soldádiaaʼ, wáyú ga̱jma̱a̱ bi̱ nudrúwíin wáyú, mbá xúgíinʼ ikhiin kugíʼ xtíin dí mitsaanʼ,* ra̱ʼkhá tháán mbaʼin soldado kuda escudo rí mba̱ʼu̱ ga̱jma̱a̱ dí ma̱jkha̱ʼ, xúgíinʼ ikhiin kuda espada. 5 Ikhí kúwá mangiin xa̱bu̱ Persia, Etiopía ga̱jma̱a̱ Put, mbá xúgíinʼ ikhiin kuda escudo dí majkhaʼ ga̱jma̱a̱ casco, 6 Gómer gajmíi̱n mbá xúgíinʼ soldádiu̱u̱, mangiin bi̱ kúwá náa goʼwóo Togarmá ga̱jma̱a̱ bi̱ kúwá náa itháan mitsínguánʼ xígií náa norte, mbá xúgíinʼ ikhiin gajmiún soldádiu̱ún. Xúʼko̱, ra̱ʼkhá tháán mbaʼin xa̱bu̱ xuajin kúwá ga̱jma̱á nindxa̱a̱ʼ.

7 Gakuwáanʼla xawii, gu̱ni̱ ratamijnála, ikháán gajmiáanʼ mbá xúgíinʼ soldádiaaʼ, ikháán gánindxa̱a̱ʼ bi̱ maʼtáñajúúnʼ.

8 Índo̱ gájngoo mba̱yu̱u̱ʼ mbiʼi, mandxa̱ʼwa̱a̱ mi̱dxa̱ʼ. Náa iwáá tsiguʼ, ikháán mata̱ʼa̱a̱ʼ náa ku̱bo̱o̱ʼ mbá xuajin dí niguma májáanʼ dí nákha ginii niguma gámbáa ga̱jma̱a̱ espada, nitangiín dí ni̱jkha̱ kiʼdiin náa i̱ʼwáʼ xuajin, niguwáánʼ náa kúbá dí rígá náa Israel dí niguanáa mba̱yu̱u̱ʼ. Xa̱bu̱ bi̱ kúwá náa ku̱ba̱ʼ rígi̱ ni̱ʼkha̱a̱ kiʼdiin náa majñu̱únʼ xa̱bu̱ bi̱ kúwá náa i̱ʼwáʼ xuajin, mbá xúgíinʼ ikhiin nánguá kúwá ga̱jma̱a̱ gamíi. 9 Mi̱dxa̱ʼ náa ikhiin xóo mbá giñámbiʼ ga̱jma̱a̱ xóo mbá du̱u̱n dí narugoo ku̱ba̱ʼ, ikháán gajmiáanʼ mbá xúgíinʼ soldádiaaʼ ga̱jma̱a̱ mbaʼin xa̱bu̱ xuajin bi̱ naguwáʼ ga̱jma̱á nindxa̱a̱ʼ”›.

10 Rígi̱ dí naʼthí Tátá Jeobá bi̱ itháán mba̱a̱: ‹Mbiʼi rúʼko̱ ma̱ʼkha̱ náa a̱jkia̱a̱nʼ dí matani̱ ga̱jma̱a̱ matríya̱ʼ mbá awan dí ra̱májánʼ. 11 Marata̱: “Mato̱ʼo̱ʼ náa ku̱bo̱o̱ʼ xuajin náa nda̱a̱ dí nañewu̱u̱n. Ma̱ʼkhá gáxmína̱ʼ gajmíʼ bi̱ na̱nguá kúwá ga̱jma̱a̱ gamíi, bi̱ tséʼni mamiñún nimbá, mbá xúgíinʼ bi̱ kúwá náa xuajin rí nda̱a̱ dí eñawu̱u̱n, náa nda̱a̱ xtájtsí, náa nda̱a̱ xkrugua ni má ixi̱ dí jngútáʼa náa xkrugua”. 12 Mu magúwíi ga̱jma̱a̱ maʼgáaʼ ka̱gu̱ʼ dí gáwanáa, ma̱ngaa mu maxmína̱ʼ gajmíʼ xa̱bu̱ bi̱ kúwá náa xuajin dí nákha ginii niguanáa, mbá xuajin náa nigimbiín bi̱ ni̱jkha̱ kiʼdiin náa majñu̱únʼ i̱ʼwáʼ xuajin, xuajin rúʼko̱ xtáa ragujxi̱i̱ mbújkha̱a̱ ga̱jma̱a̱ rí gíʼdoo numuu, dí rígá náa tapo̱o̱ ku̱ba̱ʼ.

13 Saba* ga̱jma̱a̱ Dedán, mangiin bi̱ nugujua̱ náa Tarsis ga̱jma̱a̱ mbá xúgíinʼ soldádiu̱u̱* muthaanʼ: “Lá matani̱ gámbáa ku̱ba̱ʼ mu matrawíi ga̱jma̱a̱ mida̱a̱ dí gáwanáa ráʼ. Lá nitagímbíin soldádiaaʼ mu midxu̱u̱ʼ xtaaʼ plata, oro, ga̱jma̱a̱ mbújkha̱a̱ mu mida̱a̱ mbaʼa dí gáwanáa ráʼ.”›

14 Ikha jngóo, a̱ʼdióo xa̱biya̱, aratáríya̱ʼ ga̱jma̱a̱ aratháán Gog: ‹Rígi̱ dí naʼthí Tátá Jeobá bi̱ itháán mba̱a̱: “Mbiʼi rúʼko̱, índo̱ náa xuajñunʼ Israel nándáa gamíi, lá xáta̱ya̱a̱ ráʼ. 15 Mi̱dxa̱ʼ asndu náa xtaa, asndu náa rí itháan mitsínguánʼ xígií náa norte, mi̱dxa̱ʼ gajmiáanʼ mbaʼin xa̱bu̱ xuajin, xúgíinʼ ikhiin kudrúwíin wáyú, mbaʼin xa̱bu̱, xúʼko̱, ra̱ʼkhá tháán mbaʼin soldado. 16 Xóo du̱u̱n dí narugoo xuajin, ikháán mi̱dxa̱ʼ gátaxmíjná gajmiáanʼ xa̱bu̱ xuajñunʼ Israel. Índo̱ gártumuu mbiʼi ma̱ʼkhá ka̱ña̱a̱n náa ku̱bo̱ʼ, mu xúʼko̱ xa̱bu̱ xuajin muniʼniún índo̱ gájmiuʼ ikháán mu ma̱ni̱ kaʼwumina̱a̱ʼ náa inún ikhiin, ikháán, Gog”›.

17 Rígi̱ dí naʼthí Tátá Jeobá bi̱ itháán mba̱a̱: ‹Lá raʼkháa ikháán má nindxa̱a̱ʼ bi̱ ni̱tha̱ ga̱jma̱a̱ numuu nákha wajyúuʼ náa majñu̱únʼ profeta* bi̱ nikúwá náa Israel bi̱ ninindxu̱ún xa̱bi̱ʼ ráʼ. Mba̱yu̱u̱ʼ tsiguʼ nitaríya̱ʼ dí ikhúún maniʼñáaʼ mi̱dxa̱ʼ mu mataxmína̱ʼ gajmiáanʼ›.

18 ‹Mbiʼi rúʼko̱, mbiʼi dí Gog gáto̱ʼo̱o̱ náa ku̱ba̱ʼ dí rígá náa Israel, makásnga̱ñu̱ʼ wéñuuʼ, eʼthí Tátá Jeobá bi̱ itháán mba̱a̱. 19 Ma̱ta̱ numuu dí ra̱ʼkhá tháán ekásnga̱ñu̱ʼ, asndu nakha rí nakásngañu̱ʼ, ga̱jma̱a̱ maʼxma gakhi̱i̱ náa ku̱ba̱ʼ Israel. 20 Ga̱jma̱a̱ numuʼ maguíʼiin e̱gi̱ʼ bi̱ kúwá náa lamáa,* ñu̱ʼu̱ bi̱ jngruigu̱u̱n rijma̱a̱, xujkhú xáná, xúgíinʼ xujkhúʼ bi̱ nuxmajtamijná ga̱jma̱a̱ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ. Majngudiri̱ga̱a̱ kúbá, majnguti̱ga̱a̱ tsíñu ga̱jma̱a̱ mbá xúgíʼ xtájtsí mangajxi̱i̱›.

21 ‹Makuʼmá mbá espada náa Gog, náa mbá xúgíʼ kúbá ndrígóʼ, eʼthí Tátá Jeobá bi̱ itháán mba̱a̱. Muxmijná kaníkiin ga̱jma̱a̱ espada. 22 Ma̱ni̱ dí mamínuuʼ ga̱jma̱a̱ nandii, ma̱ngaa rí magadíí eʼdi. Ma̱ni̱ dí maxnúu ruʼwambiʼ, majngutígú eʼtsí, aguʼ ga̱jma̱a̱ azufre* náa ikhaa, ma̱ngaa náa soldádiu̱u̱ ga̱jma̱a̱ náa mbaʼa xuajin dí numbayíí. 23 Phú gajkhun dí masngajmá nguáthá mbu̱u̱n, dí nindxu̱ʼ kaʼwún, ma̱ni̱ rí mbuyáá mbá xúgíinʼ xa̱bu̱ xuajin, ikhiin maguánú mbuyáá dí ikhúún nindxu̱ʼ Jeobá›.