Isaías

39 Nákha mbiʼi rúʼko̱, rey ndrígóo Babilonia bi̱ mbiʼyuu Merodac-Baladán a̱ʼdióo Baladán, nikuʼma i̱yi̱i̱ʼ ga̱jma̱a̱ mbá regalo náa inuu Ezequías numuu rí niʼdxawuun dí Ezequías niʼniuu nandii ga̱jma̱a̱ dí ni̱ʼni̱i̱ má a̱jkiu̱u̱n. 2 Ezequías nigruiguíin májánʼ* bi̱ niguwáʼ kuñu̱u̱n ajngáa, ga̱jma̱a̱ nisngájmúún mbá xúgíʼ rí gíʼdoo numuu dí rígá náa guʼwá:* Xóo plata, oro, aceite rí ndataun ga̱jma̱a̱ i̱ʼwáʼ aceite rí numuu ga̱jma̱a̱ ajua̱nʼ rí naxmínaʼ ga̱jma̱a̱, ma̱ngaa mbá xúgíʼ dí rígá náa cuarto náa kajti rí gíʼdoo numuu. Tárígá nimbá rí Ezequías tásngájmún dí rígá náa goʼwóo ga̱jma̱a̱ náa mbá xúgíʼ rí naʼtáñajunʼ.

3 Nda̱wa̱á, profeta* Isaías nito̱ʼo̱o̱ náa xtáa rey Ezequías ga̱jma̱a̱ nirajxu̱u̱: “Dí nithaanʼ xa̱bu̱ buʼko̱ rá. Ga̱jma̱a̱ náá eguwáʼ xá.” Ezequías niriʼñuu: “Naguwáʼ náa mbá xuajin mitsínguánʼ, náa Babilonia”. 4 Ikhú nirajxu̱u̱: “Ndiéjunʼ ndiyáá náa guʼwáaʼ xá.” Ezequías niriʼñuu: “Ndiyáá mbá xúgíʼ dí rígá náa goʼwóʼ, tárígá nimbá rí gíʼdoo numuu rí gúʼdoo rí túyáá”.

5 Isaías niʼthúu̱n Ezequías: “Atadxawíín dí naʼthí Jeobá bi̱ naʼtáñajúúnʼ ángeles: 6 ‹¡Natayáá ráʼ! Nartumuu mbiʼi dí xúgíʼ dí rígá náa guʼwáaʼ ga̱jma̱a̱ xúgíʼ dí wajin xiʼñáaʼ nirajxi̱i̱ asndu rí mbiʼi xúgi̱ maʼga kiʼda náa Babilonia, ni xáguanúu nimbá, eʼthí Jeobá. 7 Ga̱jma̱a̱ tikhuiin ejña̱a̱nʼ bi̱ ikháán maraʼdiin magún kudiin ga̱jma̱a̱ ikhí mani̱ndxu̱ún bi̱ makuwá ruñajunʼ náa naʼtáñajunʼ rey ndrígóo Babilonia›”.

8 Índo̱ Ezequías niʼdxuun rúʼko̱, ikhú niʼthúu̱n Isaías: “Ajngáa rí Jeobá niʼthí nindxu̱u̱ májánʼ”. Ga̱jma̱a̱ niʼthí xóó: “Numuu dí marigá tsímáá ga̱jma̱a̱ nda̱a̱ gamíi mbiʼi rí ikhúún gáxtáá”.