Ezequiel

12 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, xtaa náa xa̱bu̱ bi̱ tsénimbu̱u̱n, guáʼdáá idún, mú tsíyejxi̱, guáʼdáá cháʼwúún, mú tsédxawíín, numuu rí ikhiin tsénimbu̱u̱n. 3 Mú ikháán a̱ʼdióo xa̱biya̱, atani̱ ratháá amaaʼ mi̱dxu̱ʼ xóo ejkha̱ mbáa xa̱bu̱ bi̱ na̱jkha̱ kiʼyáa. Mbiʼi gídxúʼ, índo̱ ikhiin kúwá ruyejxi̱. Ayuʼ, agajnáaʼ náa guʼwáaʼ mu mi̱dxu̱ʼ i̱mba̱ níʼkhá índo̱ ikhiin kúwá ruyejxi̱. Mbáa mugíʼ edxu̱ún, maski ajndu ikhiin tsénimbu̱u̱n. 4 Índo̱ gáʼni mbiʼi, índo̱ ikhiin kúwá ruyejxi̱ atríya̱ʼ amaaʼ mu mi̱dxu̱ʼ. Nda̱wa̱á índo̱ gáʼni kína, índo̱ ikhiin kúwá ruyejxi̱, gíʼmaa dí matagajnáaʼ xóo mbáa xa̱bu̱ bi̱ na̱jkha̱ kiʼyáa.

5 Índo̱ ikhiin kúwá ruyejxi̱, atani̱ iñúuʼ náa pared ga̱jma̱a̱ ikhí gátríya̱ʼ amaaʼ. 6 Índo̱ ikhiin kúwá ruyejxi̱ atagrígu amaaʼ náa xpajpaaʼ ga̱jma̱a̱ atríya̱ʼ náa mikína. Atruguáá inaaʼ, mu xátiejxi̱ mbayííʼ, numuu dí xtáá rani̱ ga̱jma̱á nindxa̱a̱ʼ xóo mbá tsinaʼ náa goʼwóo Israel”.

7 Ni̱ni̱ xó má nikuʼmún ma̱ni̱. Dí mbiʼi niríya̱ʼ amuʼ xóo amaʼ dí nayéjkha̱ mbáa índo̱ na̱jkha̱ kiʼyáa. Ga̱jma̱a̱ índo̱ niʼni kína, ni̱ni̱ iñúuʼ pared ga̱jma̱a̱ ñawúnʼ. Ga̱jma̱a̱ índo̱ kína má, niríya̱ʼ amuʼ ga̱jma̱a̱ nigrígu náa xpajpoʼ, ni̱ni̱ índo̱ kúwá ruyejxi̱.

8 Miʼcha̱ nigruígú mbu̱júu̱ ajngóo Jeobá. Niʼthúnʼ: 9 “A̱ʼdióo xa̱biya̱, lá tárajxa̱a̱ʼ goʼwóo Israel, náa kúwá bi̱ tsénimbu̱u̱n, ‹Dí xtaa ratani̱ ráʼ.› 10 Arathún: ‹Rígi̱ dí naʼthí Tátá Jeobá bi̱ itháán mba̱a̱: “Ajngáa rígi̱ dí nijuiʼtá, na̱jkha̱ inuu bi̱ kayá edxu̱u̱ bi̱ xtáa náa Jerusalén ga̱jma̱a̱ mbá xúgíinʼ bi̱ kúwá náa goʼwóo Israel dí rígá náa xuajin”›.

11 Marathu̱u̱n: ‹Ikhúún nindxu̱ʼ mbá tsinaʼ náa ikháanʼla. Xó má ni̱ni̱ ikhúún, xúʼko̱ má gágumiin mangiin. Maʼga kiʼdiin. 12 Bi̱ kayá edxu̱u̱ bi̱ xtáa náa ikhiin magu̱ amuuʼ náa xpajpoo ga̱jma̱a̱ magajnúu náa mikína. Maʼni iñúuʼ xtájtsí ga̱jma̱a̱ ñawúunʼ, ikhí gáríya̱ʼ amuuʼ. Marugoo inuu mu xáyejxi̱ mbayííʼ›. 13 Ikhúún madataʼmáʼ amuʼ náa tsu̱du̱u̱, magúguáa ga̱jma̱a̱ amaʼ dí nagúguíin ga̱jma̱a̱ xujkhúʼ. Ikhú maʼgá ka̱ya̱a̱ náa Babilonia, náa ku̱bu̱únʼ xa̱bu̱ caldeos, mú ikhaa xáʼyoo ga̱jma̱a̱ ikhí má gákháñuu. 14 Ga̱jma̱a̱ mbá xúgíinʼ bi̱ kúwá mbájndi náa ikhaa bi̱ numbayíí ga̱jma̱a̱ soldádiu̱u̱, majuidiríʼiin asndu náá, ga̱jma̱a̱ maríya̱ʼ mbá espada mu maʼga raxkhúún. 15 Ga̱jma̱a̱ ikhiin maguánú mbuyáá dí ikhúún nindxu̱ʼ Jeobá, índo̱ gájuidríʼiin náa majñuuʼ xuajin ga̱jma̱a̱ índo̱ gájuidríʼiin náa majñuuʼ xuajin dí rígá mitsínguánʼ. 16 Mú ma̱ni̱ káwíin mbá nguáthi̱i̱n mu xákháñún ga̱jma̱a̱ espada, ewiʼ ga̱jma̱a̱ nandii mu xúʼko̱ muthi xúgíʼ rí tsaga dí nini̱ náa majñuuʼ xuajin náa dí magún, ga̱jma̱a̱ mbuyáá dí ikhúún nindxu̱ʼ Jeobá”.

17 Nigruígú mbu̱júu̱ ajngóo Jeobá. Niʼthúnʼ: 18 “A̱ʼdióo xa̱biya̱, asndu naguáʼáán rí namíñáaʼ gíʼtsu ganitsu ndrígáaʼ, ma̱ngaa agi̱i̱n iyaaʼ ga̱jma̱a̱ gamíi ma̱ngaa rí naxmiéjuanʼ. 19 Arathún xa̱bu̱ xuajin: ‹Rígi̱ dí Tátá Jeobá bi̱ itháán mba̱a̱ naʼthúún xa̱bu̱ Jerusalén bi̱ kúwá náa ku̱ba̱ʼ Israel: “Muphula ganitsu ga̱jma̱a̱ gamíi, ma̱ngaa muwan iyala asndu naguáʼáanʼla, numuu rí kubala maguanáa ga̱jma̱a̱ numuu xúgíʼ ra̱májánʼ dí nuni̱ bi̱ kúwá ikhí. 20 Xuajin náa kúwá xa̱bu̱ maguma gámbáa ga̱jma̱a̱ ku̱ba̱ʼ maguanáa, ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Jeobá”›”.

21 Nigruígú mbu̱júu̱ ajngóo Jeobá. Niʼthúnʼ: 22 “A̱ʼdióo xa̱biya̱, ndiéjunʼ nindxu̱u̱ proverbio dí ikháanʼ nu̱tala náa Israel, dí naʼthí: ‹Nanújngoo mbiʼi ga̱jma̱a̱ xúgíʼ dí wasngájma* tsémbánuu rá.› 23 Ikha jngóo arathún: ‹Rígi̱ dí naʼthí Tátá Jeobá bi̱ itháán mba̱a̱: “Ma̱ni̱ gámbóʼ ajngáa rúʼko̱, ni xájmúún xóo mbá proverbio xa̱bu̱ Israel”›. Mú arathún: ‹Na̱ʼkha̱ má mijngii mbiʼi, ga̱jma̱a̱ xúgíʼ rí niwasngájma mambanúu›. 24 Numuu rí nánguá marigá dí wasngájma rí minduwaʼ, ni má xájuiʼthá rí minduwaʼ dí marigá nda̱wa̱á náa goʼwóo Israel. 25 ‹“Numuu dí ikhúún Jeobá, ma̱ta̱. Asndu xú káʼnii má dí ikhúún gátha, xájyúuʼ má mambanúu. Ikháanʼla bi̱ tsénimbala, índo̱ ikháanʼla kuwáanʼ, ma̱ta̱ ga̱jma̱a̱ manimbánuu”, eʼthí Tátá Jeobá bi̱ itháán mba̱a̱›”.

26 Nigruígú mbu̱júu̱ ajngóo Jeobá. Niʼthúnʼ: 27 “A̱ʼdióo xa̱biya̱, rígi̱ dí jngruigu̱u̱n ruthi xa̱bu̱ xuajin Israel: ‹Dí ikhaa nasngájma, nindxu̱u̱ dí nákhíí tígo̱o̱ marigá ga̱jma̱a̱ dí naʼtáríya̱ʼ nindxu̱u̱ dí marigá itháán nda̱wa̱á›. 28 Ikha jngóo arathún: ‹Rígi̱ dí naʼthí Tátá Jeobá bi̱ itháán mba̱a̱: “‹Xúgíʼ dí ikhúún na̱tha̱ xájyúuʼ mambanúu, asndu ndiéjunʼ má dí ikhúún na̱tha̱ mambanúu›, eʼthí Tátá Jeobá bi̱ itháán mba̱a̱”›”.