Ezequiel
39 A̱ʼdióo xa̱biya̱, aratáríya̱ʼ rígi̱ dí magíʼnuu Gog: ‹Rígi̱ dí naʼthí Tátá Jeobá bi̱ itháán mba̱a̱: “Xtáá mu maxmína̱ʼ ga̱jma̱á nindxa̱a̱ʼ Gog, bi̱ kayá edxu̱u̱* náa Mesec ga̱jma̱a̱ náa Tubal. 2 Ma̱ni̱ rí matangañi̱ín, maxna̱a̱ʼ ikha ga̱jma̱a̱ ma̱ni̱ rí matatsimaaʼ náa rí itháán mitsínguánʼ xígií náa norte ga̱jma̱a̱ maʼkháaʼ ka̱ña̱a̱n náa kúbá dí rígá náa Israel. 3 Mbá nacha̱ gárígú káyáaʼ xkamídá dí jchá náa ñawún xti̱ya̱a̱ʼ ga̱jma̱a̱ ma̱ni̱ dí majngutígú flecha dí xta náa ñawún májáanʼ. 4 Makhañáaʼ náa kúbá dí rígá náa Israel, makhañáaʼ ikháán gajmiáanʼ mbá xúgíinʼ soldádiaaʼ, ga̱jma̱a̱ mbá xúgíinʼ xa̱bu̱ xuajin bi̱ kúwá ga̱jma̱á nindxa̱a̱ʼ. Maxniu̱u̱n mu̱pha̱a̱ʼ mbá xúgíinʼ enii xujkhú xnaʼ bi̱ naʼphu̱ xuwiʼ ga̱jma̱a̱ xujkhú xáná”›.
5 ‹Makhañáaʼ náa xaná, numuu dí ikhúún ni̱tha̱›, eʼthí Tátá Jeobá bi̱ itháán mba̱a̱.
6 ‹Ma̱kuʼmá aguʼ náa Magog ma̱ngaa náa xa̱bu̱ bi̱ kúwá náa islas* náa nda̱a̱ gamíi, maguánú mbuyáá dí ikhúún nindxu̱ʼ Jeobá. 7 Ma̱ni̱ rí mbiʼyuʼ dí kaʼwu majmaʼnuuʼ náa majñu̱u̱ʼ xuajñunʼ Israel ga̱jma̱a̱ xániʼñúuʼ dí maguma gachíí mbu̱júu̱, xa̱bu̱ xuajin maguánú mbuyáá dí ikhúún nindxu̱ʼ Jeobá, bi̱ Kaʼwii náa Israel›.
8 ‹Xúʼko̱, na̱ʼkha̱ má mijngii ga̱jma̱a̱ mambanúu. Rígi̱ nindxu̱u̱ mbiʼi dí ikhúún ni̱tha̱, eʼthí Tátá Jeobá bi̱ itháán mba̱a̱. 9 Xa̱bu̱ bi̱ kúwá náa xuajin dí rígá náa Israel magajnún ga̱jma̱a̱ mugíʼ aguʼ ga̱jma̱a̱ ajua̱nʼ: Escudo rí mba̱ʼu̱ ga̱jma̱a̱ dí majkhaʼ,* xkamídá, flechas, ixi̱ dí nuxmijná ga̱jma̱a̱,* ma̱ngaa kudú.* Majmúún mu mugíʼ aguʼ mbá juwan tsiguʼ. 10 Ni xáʼyóoʼ mbuyáʼ ixi̱ náa xaná ni má náa xaxi̱, numuu dí majmúún ajua̱nʼ mu mugíʼ aguʼ›.
‹Murawí káñún rí guáʼdáá, nándáa rí gáguanún ga̱jma̱a̱ xó má ikhiin niniu̱u̱n›, eʼthí Tátá Jeobá bi̱ itháán mba̱a̱.
11 ‹Mbiʼi rúʼko̱, maxnu̱u̱ Gog mbá mbaaʼ náa majui̱ʼdi̱i̱ dí rígá náa Israel, náa mata* dí nagún ga̱jma̱a̱ xígií náa nagájnuu a̱jkha̱ʼ* náa lamáa,* ga̱jma̱a̱ náa mbaaʼ rúʼko̱ magugóo mu xánújngún xa̱bu̱. Ikhí gúdíi Gog gajmíi̱n mbá xúgíinʼ soldádiu̱u̱ ga̱jma̱a̱ muxna mbiʼíí mata Hamon-Gog.* 12 Bi̱ kúwá náa goʼwóo Israel mbajñúúnʼ mbá juwan igu̱nʼ mu mudi̱ín mu xúʼko̱ muni̱ kaʼwi̱i̱ ku̱ba̱ʼ. 13 Xúgíinʼ xa̱bu̱ xuajin muruguambáá mu majuiʼdi̱ín, rígi̱ maʼni dí marmáʼáan a̱jkiu̱ún kuñún mbiʼi dí gáguma mbu̱u̱n›, eʼthí Tátá Jeobá bi̱ itháán mba̱a̱.
14 ‹Mu ma̱ndoo muni̱ kaʼwi̱i̱ xuajin, matri̱gi̱i̱n mbá nguáthi̱i̱n xa̱bekha bi̱ magún má xúʼko̱ ga̱jma̱a̱ mudu̱u̱ xuñúúnʼ bi̱ nikháñún bi̱ niguanún xóó náa tsu̱du̱u̱ ku̱ba̱ʼ. Mbuñiínʼ má xúʼko̱ mbá juwan igu̱nʼ. 15 Índo̱ bi̱ gágún náa xuajin rúʼko̱ gúyáá i̱tsu̱ún xa̱bu̱, mugiʼma tsinaʼ náa níjniúu. Ikhú bi̱ nitri̱gi̱i̱n mu mudi̱ín magúun kudiin náa mata Hamon-Gog ga̱jma̱a̱ ikhí gúdíi̱n. 16 Ikhí ma̱ngaa marigá mbá xuajin dí mbiʼyuu Hamoná.* Ga̱jma̱a̱ ikhiin mbaʼyóoʼ dí muni̱ kaʼwi̱i̱ ku̱ba̱ʼ›.
17 Mú ikháán, a̱ʼdióo xa̱biya̱, rígi̱ dí naʼtháanʼ Tátá Jeobá bi̱ itháán mba̱a̱: ‹Arathún mbá xúgíinʼ enii ñu̱ʼu̱ ga̱jma̱a̱ xúgíinʼ xujkhú xáná: “Gagimbáanʼla ga̱jma̱a̱ aguwaʼ. Gagimbáanʼla náa mbájndi tsigijñaʼ ndrígóʼ, dí ni̱ni̱ mújúunʼ mu muphula, mbá tsigijñaʼ mba̱a̱ dí ni̱ni̱ mújúunʼ náa kúbá dí rígá náa Israel. Mu̱phu xuwiʼ ga̱jma̱a̱ muwa̱a̱n eʼdi. 18 Muphula xuñúúnʼ xa̱bu̱ bi̱ xkujiinʼ ga̱jma̱a̱ muwa̱a̱n eʼdiún bi̱ kuya̱ edxu̱u̱ bi̱ kúwá náa tsu̱du̱u̱ ku̱ba̱ʼ, mu̱phún mugu̱ e̱jmba̱a̱, mugu̱, tsu̱jtuunʼ ga̱jma̱a̱ xedi̱, mbá xúgíinʼ xujkhúʼ bi̱ kúwá náa Basán. 19 Tsigijñaʼ dí xtáá rani̱ mújúunʼ mu muphula, mu̱phu xtanga asndu mawi̱yala ga̱jma̱a̱ muwa̱a̱n eʼdi asndu majngáanʼla”›.
20 ‹Náa mésoʼ, mu̱phu xuñúúnʼ wáyú, bi̱ nagún kudúún carro dí nuxmijná ga̱jma̱a̱, bi̱ guáʼdáá tsiaki̱i̱ ga̱jma̱a̱ mbá xúgíinʼ soldado›, eʼthí Tátá Jeobá bi̱ itháán mba̱a̱.
21 ‹Masngajmá nguáthá mbu̱u̱n náa majñu̱únʼ xa̱bu̱ xuajin, mbá xúgíinʼ maguánú mbuyáá xóo ni̱ni̱ dí mumíniiʼ ga̱jma̱a̱ mbuyáá xóo nisngajmá tsiaki̱i̱ ndrígóʼ* náa majñu̱únʼ ikhiin. 22 Mbiʼi rúʼko̱, bi̱ kúwá náa goʼwóo Israel maguánú mbuyáá dí ikhúún nindxu̱ʼ Jeobá Dios ndrígu̱ún. 23 Xa̱bu̱ xuajin maguánú mbuyáá dí bi̱ kúwá náa goʼwóo Israel ni̱jkha̱ kiʼdiin ga̱jma̱a̱ numuu dí nikiéʼkhúún, ma̱ngaa ga̱jma̱a̱ numuu dí táguájun jmbu náa ikhúún. Ikha jngóo nirkaʼwu inuʼ náa ikhiin ga̱jma̱a̱ nixnajxíin náa xa̱bu̱ sia̱nʼ ndrígu̱ún, mbá xúgíinʼ ikhiin nikháñún ga̱jma̱a̱ espada. 24 Niniu̱u̱n xígi̱ kaʼnii ga̱jma̱a̱ numuu dí mitsagiin ma̱ngaa ga̱jma̱a̱ aʼkhá dí nixudamíjna̱, nirkaʼwu inuʼ náa ikhiin›.
25 Ikha jngóo, rígi̱ dí naʼthí Tátá Jeobá bi̱ itháán mba̱a̱: ‹Ma̱ni̱ dí bi̱ kúwá náa goʼwóo Jacob bi̱ ni̱jkha̱ kiʼdiin matangi̱ín ga̱jma̱a̱ magáwíinʼ a̱jkiu̱nʼ ka̱ñu̱u̱n mbá xúgíinʼ bi̱ kúwá náa goʼwóo Israel, ma̱ngaa ma̱tambáyúu mbiʼyuʼ dí kaʼwu ga̱jma̱a̱ xúgíʼ tsiaki̱i̱ ndrígóʼ.* 26 Nda̱wa̱á dí gáguma majti̱i̱nʼ ga̱jma̱a̱ numuu mbá xúgíʼ dí ra̱májánʼ dí nini̱ náa ikhúún, ni xákúwá ga̱jma̱a̱ gamíi náa ku̱bu̱únʼ, nimbáa ni xáʼnimíñún. 27 Índo̱ gáʼkháaʼ kagui̱i̱n náa xuajin dí ni̱jkha̱ kiʼdiin, ga̱jma̱a̱ índo̱ gágímbiín bi̱ ni̱jkha̱ kiʼdiin náa ku̱bu̱únʼ xa̱bu̱ sia̱nʼ ndrígu̱ún, ma̱ngaa ma̱ni̱ kaʼwi̱i̱ mbiʼyuʼ náa majñu̱únʼ ikhiin ga̱jma̱a̱ mbá xúgíinʼ xa̱bu̱ xuajin maguánú mbuyáá›.
28 ‹Maguánú mbuyáá dí ikhúún nindxu̱ʼ Jeobá Dios ndrígu̱ún, nda̱wa̱á dí nikuʼmíin magún náa i̱ʼwáʼ xuajin, nda̱wa̱á magímbiín mu maguwáanʼ náa ku̱bu̱únʼ, xániʼñúuʼ nimbáa náa i̱mba̱ xuajin. 29 Ni xátangu̱ún markaʼwu inuʼ náa ikhiin, numuu dí maxidirámuuʼ espíritu ndrígóʼ náa mbá xúgíinʼ bi̱ kúwá náa goʼwóo Israel›, eʼthí Tátá Jeobá bi̱ itháán mba̱a̱”.