Ezequiel

18 Nigruígú mbu̱júu̱ ajngóo Jeobá. Niʼthúnʼ: 2 “Ndiéjunʼ lá eyoo gáʼthúu̱n proverbio rígi̱ dí ikháanʼla nu̱ta̱ náa ku̱ba̱ʼ ndrígóo Israel: ‹Xabuanii ni̱ʼphu̱ uva miga̱ʼ, mú e̱ji̱n nikháñúu* iñúúnʼ› rá.

3 ‹Xó má ikhúún gajkhun xtáá, eʼthí Tátá Jeobá bi̱ itháán mba̱a̱, ni xúthi ajngáa rígi̱ náa Israel. 4 Gu̱ya̱a̱la, xúgíʼ vida* kaʼyoʼ ikhúún. Xó má vida ndrígóo xa̱bu̱ nikhi̱i̱ ga̱jma̱a̱ vida ndrígóo ada̱ kaʼyoʼ ikhúún. Xa̱bu̱ bi̱ gákudaminaʼ aʼkhá ikhaa buʼko̱ bi̱ makhañúu.

5 Á mu mbáa xa̱bu̱ májáanʼ naʼni dí jmbu ga̱jma̱a̱ dí májánʼ. 6 Tséʼkhu̱ tsigijñaʼ dí najuixnájxi̱ náa inún xándú náa kúbá, tséʼtákáñún xándú xkawi̱i̱nʼ bi̱ kúwá náa goʼwóo Israel, tsékudaminaʼ aʼkhá ga̱jma̱a̱* a̱ʼgiu̱u̱ xa̱bu̱ numbaaʼ ga̱jma̱a̱, ni má tsébóoʼ ga̱jma̱a̱ a̱ʼgu̱ bi̱ nagajtaa eʼdiuu, 7 tséʼni ngínáa nimbáa, naxnáa bi̱ gíʼmaa náa ikhaa dí nixnúu ga̱jma̱a̱ numuu rí nitíʼñuu, tséʼni kúwóoʼ nimbáa, naxnúu ganitsu ndrígóo mi̱khu̱ bi̱ naxkidxu̱u̱ ga̱jma̱a̱ naxnúu dí magúwúunʼ bi̱ nda̱a̱ xtíñuu, 8 tséxnátíʼña mu maruma̱a̱ inuu mu xúʼko̱ magiʼdoo itháan, tséʼni dí ra̱májánʼ, naʼnimbánuu májánʼ numún mbá nájmi̱i̱n xa̱bu̱, 9 naʼni xó má eʼthí náa kiʼtáñajunʼ ndrígóʼ ga̱jma̱a̱ naʼnimbo̱o̱ xtángoo ndrígóʼ mu maʼni má xúʼko̱ dí jmbu. Mbáa xa̱bu̱ bi̱ naʼni xúʼko̱ kaʼnii nindxu̱u̱ májáanʼ, ikhaa maxtáa má xúʼko̱›, eʼthí Tátá Jeobá bi̱ itháán mba̱a̱.

10 ‹Mú, á mu ikhaa gíʼdaa mbáa a̱ʼdióo bi̱ naʼni kúwáʼ ga̱jma̱a̱ nagudíin xa̱bu̱,* o naʼni mbá dí rígi̱ o i̱ʼwáʼ 11 (maski ajndu anu̱u̱* na̱nguá niʼni nimbá dí rígi̱). Na̱ʼkhu̱ tsigijñaʼ dí najuixnájxi̱ náa inún xándú náa kúbá, nakudaminaʼ aʼkhá ga̱jma̱a̱* a̱ʼgiu̱u̱ xa̱bu̱ numbaaʼ ga̱jma̱a̱, 12 naʼni ngínáa bi̱ nda̱a̱ dí gíʼdoo ga̱jma̱a̱ xa̱bu̱ ngínáa, naʼni kúwáʼ, tsértanga̱a̱ dí nixnáá ga̱jma̱a̱ numuu rí nixnátíʼñún dí gíʼdoo, naʼtákáñún xándú bi̱ xkawi̱i̱nʼ ga̱jma̱a̱ naʼni xúgíʼ enii rí tsaga, 13 naxnátíʼña mu mada̱a̱ʼ inuu mu xúʼko̱ magiʼdoo itháan. Ada̱ buʼko̱ ni xáxtáa. Mbaʼyóoʼ dí makhañúu ga̱jma̱a̱ numuu mbá xúgíʼ dí tsaga rí niʼni. Ikhaa má gágiʼdoo aʼkhúun rí makhañúu.*

14 Mú, á mu mbáa ada̱ ndaʼyoo mbá xúgíʼ aʼkhá dí nakudaminaʼ anu̱u̱, maski ajndu ikhaa ndaʼyoo mú tséʼni xóo eʼni anu̱u̱. 15 Tséʼkhu̱ tsigijñaʼ dí najuixnájxi̱ náa inún xándú náa kúbá, tséʼtákáñún xándú xkawi̱i̱nʼ bi̱ kúwá náa goʼwóo Israel, tsékudaminaʼ aʼkhá ga̱jma̱a̱ a̱ʼgiu̱u̱ xa̱bu̱ numbaaʼ ga̱jma̱a̱, 16 tséʼni ngínáa nimbáa, tséguanúu ga̱jma̱a̱ dí nixnáá mu maxnátíʼña dí gíʼdoo, tséʼni kúwáʼ nimbá, naxnúu ganitsu ndrígóo mi̱khu̱ bi̱ naxkidxu̱u̱ ga̱jma̱a̱ naxnúu dí magúwúunʼ bi̱ nda̱a̱ xtíñuu, 17 tséʼni dí mamínuuʼ xa̱bu̱ ngínáa, tséxnátíʼña mu maruma̱a̱ inuu mu xúʼko̱ magiʼdoo itháan, naʼnimbánuu xtángoo ndrígóʼ ga̱jma̱a̱ naʼni xó má eʼthí náa kiʼtáñajunʼ ndrígóʼ. Mbáa xa̱bu̱ bi̱ naʼni xúʼko̱ kaʼnii, xákháñúu ga̱jma̱a̱ numuu aʼkhúun anu̱u̱. Ikhaa maxtáa má xúʼko̱. 18 Mú, numuu rí anu̱u̱ niʼni nduwaʼ, niʼni kúwóoʼ ndxájuu ga̱jma̱a̱ niʼni dí ra̱májánʼ náa majñu̱únʼ xa̱bu̱ xuajin, ikhaa makhañúu ga̱jma̱a̱ numuu aʼkhúun.

19 Mú ikháanʼla mu̱tha̱: “Náá numuu dí tséʼni numa̱a̱ ada̱ aʼkhá dí nikudaminaʼ anu̱u̱ rá.” Numuu dí ada̱ niʼni dí májánʼ ga̱jma̱a̱ dí jmbu, niʼnimbánuu ga̱jma̱a̱ niʼnimbo̱o̱ kiʼtáñajunʼ ndrígóʼ, ikha jngóo ikhaa maxtáa má xúʼko̱. 20 Xa̱bu̱* bi̱ gákudaminaʼ aʼkhá ikhaa buʼko̱ bi̱ makhañúu. Ada̱ xáʼyóoʼ maʼni numa̱a̱ aʼkhúun anu̱u̱, ni má xa̱bu̱ nikhi̱i̱ xáʼyóoʼ maʼni numa̱a̱ aʼkhúun a̱ʼdióo. Dí májánʼ naʼni mbáa xa̱bu̱ jmbii mbiʼyáá i̱ndó dí naʼni ikhaa, xúʼko̱ má dí ra̱májánʼ dí naʼni mbáa xa̱bu̱ ra̱májáanʼ mbiʼyáá i̱ndó dí naʼni ikhaa.

21 Á mu mbáa xa̱bu̱ ra̱májáanʼ naniñuuʼ raʼni mbá xúgíʼ aʼkhá dí nikudaminaʼ, naʼnimbo̱o̱ kiʼtáñajunʼ ndrígóʼ, naʼni rí jmbu ga̱jma̱a̱ dí májánʼ, ikhaa maxtáa má xúʼko̱. Xákháñúu. 22 Ni xármáʼáan a̱jkiu̱nʼ gáʼni nimbá aʼkhá rí nikudaminaʼ. Maxtáa má xúʼko̱ numuu rí naʼni dí májánʼ›.

23 ‹Lá nadxuʼ índo̱ nakháñuu mbáa xa̱bu̱ ra̱májáanʼ ráʼ. Lá tsíyóʼ dí maniñuuʼ kambo̱o̱ ga̱jma̱a̱ maxtáa má xúʼko̱ xáʼ.› Eʼthí Tátá Jeobá bi̱ itháán mba̱a̱.

24 ‹Mú, á mu mbáa xa̱bu̱ májáanʼ naniñuuʼ raʼni dí májánʼ ga̱jma̱a̱ naʼni dí ra̱májánʼ, á mu naʼni xúgíʼ dí xkawiʼ dí naʼni mbáa xa̱bu̱ ra̱májáanʼ, lá xóó maxtáa xáʼ. Dí májánʼ rí naʼni nimbáa xármáʼáan a̱jkiu̱u̱n. Makhañúu ga̱jma̱a̱ numuu rí táwi̱ji̱ jmbu ga̱jma̱a̱ numuu aʼkhá rí nikudaminaʼ.

25 Mú ikháanʼla mu̱tha̱: “Ra̱májánʼ kambo̱o̱ Jeobá”. ¡Mbá péñu,* atadxawíín goʼwóo Israel! Lá kambo̱ʼ ikhúún ra̱májánʼ ráʼ. Lá raʼkháa kambala ikháanʼ nindxu̱u̱ ra̱májánʼ ráʼ.

26 Á mu mbáa xa̱bu̱ májáanʼ naniñuuʼ raʼni dí májánʼ ga̱jma̱a̱ naʼni dí ra̱májánʼ, ga̱jma̱a̱ ikhaa nakháñuu ga̱jma̱a̱ numuu rúʼko̱, makhañúu ga̱jma̱a̱ numuu dí ra̱májánʼ dí niʼni.

27 Á mu mbáa xa̱bu̱ ra̱májáanʼ naniñuuʼ raʼni dí ra̱májánʼ dí niʼni, nagíʼdu̱u̱ naʼni dí májánʼ ga̱jma̱a̱ dí nindxu̱u̱ jmbu, ikhaa maxtáa má xúʼko̱. 28 Á mu na̱jkha̱nú ndaʼyoo mbá xúgíʼ aʼkhá dí nikudaminaʼ ga̱jma̱a̱ naniñuuʼ raʼni, ikhaa maxtáa má xúʼko̱. Xákháñúu.

29 Mú goʼwóo Israel maʼthí: “Ra̱májánʼ kambo̱o̱ Jeobá”. Goʼwóo Israel, lá kambo̱ʼ ikhúún ra̱májánʼ ráʼ. Lá raʼkháa kambala ikháanʼ nindxu̱u̱ ra̱májánʼ ráʼ.›

30 ‹Manimbánuu numuu mámbáa xó má naʼni, ikháanʼla bi̱ kuwáanʼ náa goʼwóo Israel, eʼthí Tátá Jeobá bi̱ itháán mba̱a̱. Guniʼñááʼ, xúʼko̱, guniʼñááʼ mbá xúgíʼ aʼkhá dí nuni̱la mu xúʼko̱ xánindxu̱u̱ mbá dí maʼni majngrádáanʼla ga̱jma̱a̱ maʼni dí muguaʼdáá aʼkhála. 31 Guniʼñááʼ ru̱ni̱ mbá xúgíʼ aʼkhá dí nixuʼdámíjná, guguaʼdáá* mbá a̱jkia̱la nuxi̱ʼ ga̱jma̱a̱ guri̱ʼkhu̱u̱ xóo endxaʼwamíjna̱. Náá numuu dí gíʼmaa makhañála, ikháanʼ bi̱ kuwáanʼla náa goʼwóo Israel rá.›

32 ‹Tsédxuʼ índo̱ mbáa nakháñuu. Ikha jngóo gagutangáanʼla náa ikhúún ga̱jma̱a̱ xúʼko̱ makuwáanʼla›”. Eʼthí Tátá Jeobá bi̱ itháán mba̱a̱.