Ezequiel

8 Rí maʼni majun tsiguʼ dí majun igu̱nʼ, dí maʼni witsu mbiʼi dí gu̱nʼ rúʼko̱, índo̱ gúnʼ náa goʼwóʼ ga̱jma̱a̱ bi̱ kuya̱ edxu̱u̱ náa Judá tri̱gi̱i̱n náa inuʼ, ikhí ñawúunʼ Tátá Jeobá bi̱ itháán mba̱a̱ nigutuwúún. 2 Índo̱ xtáá rayejxi̱, ndi̱yo̱o̱ mbá dí xóo aguʼ kaʼnii. Náa agoo dí xóo nakujmaa smídúu rígá aguʼ ga̱jma̱a̱ náa tsu̱du̱u̱ smídúu rígá mbá dí xóo naxpíbínʼ, xóo ajua̱nʼ xngiyaʼ* kaʼnii. 3 Ikhaa nikrui̱ya̱ʼ náa ikhúún dí xóo ñawúunʼ kaʼnii ga̱jma̱a̱ niguajtuun tásiúnʼ ga̱jma̱a̱ mbá tsiaki̱i̱ dí kaʼwu* ni̱jkha̱ kañún náa tapo̱o̱ ku̱ba̱ʼ ga̱jma̱a̱ mekhu, ni̱jkha̱ kañún asndu náa Jerusalén náa rí Dios niʼni dí mawasngájmuʼ,* náa riejuun xkrugua dí awúún dí rígá xígií náa norte, náa wíji̱ xándú bi̱ naʼni dí maxiʼñúun. 4 Ga̱jma̱a̱ ikhí rígá agiuuʼ Dios ndrígóo Israel dí naxpíbínʼ, nindxu̱u̱ ikháá má xóo dí niwasngájmuʼ náa xkua̱.

5 Nda̱wa̱á ikhaa niʼthúnʼ: “A̱ʼdióo xa̱biya̱, mbá péñu* atiejxi̱ xígií náa norte”. Ikha jngóo niyejxi̱ xígií náa norte ga̱jma̱a̱ ikhí náa riejuun xkrugua dí rígá xígií náa norte náa nuxnajxi̱ tsigijñaʼ, ikhí wíji̱ xándú bi̱ naʼni rí maxiʼñúun. 6 Ga̱jma̱a̱ niʼthí xóó: “A̱ʼdióo xa̱biya̱, lá natayáá rí xkawiʼ ga̱jma̱a̱ rí tsaga dí naʼni goʼwóo Israel ikhí, dí naʼni matsíngúnʼ náa goʼwóʼ ráʼ. Mú, ma̱ta̱ya̱a̱ rí itháán xkawiʼ ki xóo rígi̱”.

7 Nda̱wa̱á ni̱jkha̱ kañún náa riejuun rexo̱o̱ guʼwá, índo̱ niyejxi̱ ndi̱yo̱o̱ mbá iñúuʼ pared. 8 Ikhaa niʼthúnʼ: “A̱ʼdióo xa̱biya̱, mbá péñu, atani̱ iñúuʼ pared”. Ikha jngóo ni̱ni̱ iñúuʼ ga̱jma̱a̱ ndi̱yo̱o̱ mbá xkrugua. 9 Ga̱jma̱a̱ ikhaa niʼthúnʼ: “Ata̱ʼa̱a̱ʼ ga̱jma̱a̱ atayáá xúgíʼ dí ra̱májánʼ ma̱ngaa rí tsaga dí kúwá runi̱ ikhí”. 10 Ikha jngóo nito̱ʼo̱ʼ ga̱jma̱a̱ niyejxi̱ ma̱ngaa ndi̱yo̱o̱ xúgíʼ enii xtiʼkúún xujkhúʼ bi̱ nuxmajtamijná* ga̱jma̱a̱ xujkhúʼ bi̱ mitsagiin, ma̱ngaa xúgíinʼ enii xándú bi̱ xkawi̱i̱nʼ bi̱ kúwíin náa goʼwóo Israel, náa mbá xúgíʼ pared kiʼniwíin. 11 Náa inún ikhiin wájun mbá 70 bi̱ kuya̱ edxu̱u̱ bi̱ kúwá náa goʼwóo Israel, náa majñu̱únʼ ikhiin wíji̱ Jaazanías a̱ʼdióo Safán. Mámbáa kayá náa nakarámáʼ rí ndataun ga̱jma̱a̱ gúniúu rí ndataun natsimuu. 12 Ga̱jma̱a̱ ikhaa niʼthúnʼ: “A̱ʼdióo xa̱biya̱, lá natayáá dí kúwá runi̱ bi̱ kuya̱ edxu̱u̱ bi̱ kúwá náa goʼwóo Israel náa mikína rí mámbáa dí ikhiin kúwíin náa cuarto dí awúún náa guáʼdiin xándiu̱ún ráʼ. Numuu dí kúwá ruthi, ‹Jeobá tséʼyulú. Jeobá niniñuuʼ xuajin rígi̱›”.

13 Ikhú niʼthúnʼ: “Ma̱ta̱ya̱a̱ dí kúwá runi̱ dí itháán mitsaga ki xóo rígi̱”. 14 Ikha jngóo ni̱jkha̱ kañún náa riejuun xkrugua dí rígá xígií náa norte náa goʼwóo Jeobá, ga̱jma̱a̱ ikhí ndi̱yo̱o̱ dí tri̱gi̱i̱n tikhuun gu̱ʼu̱ numbi̱ya̱ʼ ga̱jma̱a̱ numuu dios Tamuz.

15 Ikhú ikhaa niʼthúnʼ: “A̱ʼdióo xa̱biya̱, lá natayáá rígi̱ ráʼ. Ma̱ta̱ya̱a̱ rí itháán mitsaga ki xóo rígi̱”. 16 Nda̱wa̱á ni̱jkha̱ kañún náa rexo̱o̱ guʼwá rí itháán awúún náa goʼwóo Jeobá. Ikhí náa riejuun goʼwóo Jeobá, majñu̱u̱ʼ pórtico* ga̱jma̱a̱ náa nuxnajxi̱ tsigijñaʼ kúwá rusmbati̱gu̱u̱n mbá 25 xa̱bekha bi̱ nuni̱ tsu̱du̱ún xígií náa goʼwóo Jeobá ga̱jma̱a̱ nuni̱ inún náa nagájnuu a̱jkha̱ʼ,* kúwá rusmbati̱gu̱u̱n náa inuu a̱jkha̱ʼ.

17 Ikhaa niʼthúnʼ: “A̱ʼdióo xa̱biya̱, lá nda̱a̱ dí káʼníí eyáá bi̱ kúwá náa goʼwóo Judá, dí kúwá runi̱ dí tsaga rígi̱, kúwá runi̱ majthíí dí ra̱májánʼ náa tsu̱du̱u̱ ku̱ba̱ʼ ga̱jma̱a̱ nuni̱ má xúʼko̱ dí makiʼnún ráʼ. Rí xúgi̱ kúwá runingajma xkuíyá* náa rakóʼ. 18 Ikha jngóo makásnga̱ñu̱ʼ. Xáxmiéjúnʼ gúni̱ ni má xágáwíinʼ a̱jkiu̱nʼ ka̱ñu̱u̱n. Maski ajndu mundxa̱ʼwa̱ gakhi̱i̱ náa cháʼwunʼ mu xádxawún”.