Ezequiel

11 Mbá tsiaki̱i̱ dí kaʼwu* nikujxu̱u̱n ga̱jma̱a̱ ni̱jkha̱ kañún náa xkrugoo goʼwóo Jeobá dí naguanúu xígií náa nagájnuu a̱jkha̱ʼ.* Ikhí, náa riejuun xkrugua ndi̱ñu̱u̱n mbá 25 xa̱bekha, ikhí xtáa Jaazanías a̱ʼdióo Azur ga̱jma̱a̱ Pelatías a̱ʼdióo Benaya, príncipes bi̱ kúwá náa xuajin. 2 Ikhú ikhaa* niʼthúnʼ: “A̱ʼdióo xa̱biya̱, bugi̱ nindxu̱ún xa̱bekha bi̱ nuri̱ya̱ʼ awan mu maguma dí ra̱májánʼ ga̱jma̱a̱ nuxna consejo dí ra̱májánʼ náa xuajin rígi̱. 3 Jngruigu̱u̱n ruthi: ‹Lá raʼkháa mbiʼi dí maguma guʼwá kuwáánʼlú ráʼ. Xuajin* nindxu̱u̱ daan* ga̱jma̱a̱ ikháánʼ nindxu̱lú xuwiʼ›.

4 Ikha jngóo aratáríya̱ʼ dí maguáʼníí. Aratáríya̱ʼ a̱ʼdióo xa̱biya̱”.

5 Ikhú tsiaki̱i̱ ndrígóo Jeobá nirígá náa ikhúún, ga̱jma̱a̱ ikhaa niʼthúnʼ: “Marata̱: ‹Rígi̱ dí naʼthí Jeobá: “Goʼwóo Israel, gajkhun rí ni̱tala, ga̱jma̱a̱ nda̱yo̱o̱ ndiéjunʼ rí endxa̱ʼwa̱míjnala. 6 Ni̱nila rí makhañún mbaʼin xa̱bu̱ náa xuajin rígi̱, ni̱ni̱ majthíinʼ wajinʼ náa kamba̱a̱”›”. 7 “Ikha jngóo, rígi̱ dí naʼthí Tátá Jeobá bi̱ itháán mba̱a̱: ‹Wajinʼ bi̱ ikháanʼ nixidiríʼiin náa mbá xúgíʼ xuajin nindxu̱ún xuwiʼ, ga̱jma̱a̱ xuajin nindxu̱u̱ daan. Mú ikháanʼ, murawáanʼla ikhí›”.

8 “‹Nimíñála eʼni espada, ga̱jma̱a̱ espada makuʼmá náa ikháanʼla, eʼthí Tátá Jeobá bi̱ itháán mba̱a̱. 9 Magúwáanʼla ikhí, maxnajxiáanʼla náa ñawúúnʼ xa̱bu̱ bi̱ naguwaáʼ ga̱jma̱a̱ ma̱ni̱ rí mumíniiʼla. 10 Makhañála ga̱jma̱a̱ espada. Náa ndawaa ndrígóo Israel gánimbanúu numala, ga̱jma̱a̱ maʼguanúla mbu̱ya̱a̱ dí ikhúún nindxu̱ʼ Jeobá. 11 Xuajin xánindxu̱u̱ dañala ga̱jma̱a̱ ikháanʼ xánindxala xuwiʼ dí kajti awúu̱n. Náa ndawaa ndrígóo Israel gáni̱mbánúu numala, 12 ga̱jma̱a̱ maʼguanúla mbu̱ya̱a̱ dí ikhúún nindxu̱ʼ Jeobá. Numuu dí tájngrui̱ga̱la xó má eʼthí kiʼtáñajunʼ ndrígóʼ, ga̱jma̱a̱ túnimbaníí dí na̱tha̱ maguma, ikháanʼ ni̱nila xó má eʼthí xtángoo ndrígu̱ún xa̱bu̱ xuajin bi̱ kúwá náa mbájndi nikuwáanʼla›”.

13 Índo̱ niguámboʼ nitaríya̱ʼ, nikháñuu Pelatías a̱ʼdióo Benaya, ga̱jma̱a̱ ikhúún nismbatígo̱ʼ mbayííʼ ma̱ngaa nindxa̱ʼwa̱ ga̱jma̱a̱ xúgíʼ tsiaki̱i̱ ndrígóʼ: “¡Ay, Tátá Jeobá bi̱ itháán mba̱a̱! Lá matani̱ gámbíin mbá xúgíinʼ bi̱ naguanún xóó náa Israel ráʼ.”

14 Nigruígú mbu̱júu̱ ajngóo Jeobá. Niʼthúnʼ: 15 “A̱ʼdióo xa̱biya̱, xa̱bu̱ Jerusalén nithúún a̱ngia̱a̱nʼ, bi̱ kaʼñúún dí mutsiriya̱a̱ʼ, ga̱jma̱a̱ mbá xúgíinʼ bi̱ kúwá náa goʼwóo Israel: ‹Aguanála mitsínguánʼ náa Jeobá. Ikháanʼ ndrígúxu̱ ku̱ba̱ʼ, nixnúxu̱ mu maʼni mbayuxu̱›. 16 Ikha jngóo, marata̱: ‹Rígi̱ dí naʼthí Tátá Jeobá bi̱ itháán mba̱a̱: “Maski ajndu ni̱jkhá kagui̱i̱n mitsínguánʼ, náa majñu̱únʼ xa̱bu̱ xuajin, ga̱jma̱a̱ nixidíriʼiin náa xuajin dí rígá mitsínguánʼ, ikhúún mani̱ndxu̱ʼ náa ikhiin mbá nguáthá mba̱yu̱u̱ʼ xóo mbá guʼwá náa mbuyamajkhuʼ náa xuajin rí nigún”›.

17 Ikha jngóo marata̱: ‹Rígi̱ dí naʼthí Tátá Jeobá bi̱ itháán mba̱a̱: “Ma̱ngaa magímbíin náa majñu̱únʼ xa̱bu̱ xuajin, ga̱jma̱a̱ magímbíin náa majñu̱únʼ xa̱bu̱ xuajin náa nijuadríʼiin ga̱jma̱a̱ maxnu̱u̱n ku̱ba̱ʼ dí rígá náa Israel. 18 Ikhiin matangi̱ín ikhí ga̱jma̱a̱ muni̱ rí mandátíga̱a̱ ikhí xúgíʼ dí xkawiʼ ga̱jma̱a̱ rí tsaga dí nini̱. 19 Ma̱ni̱ rí maʼni̱i̱ imbóó a̱jkiu̱ún ga̱jma̱a̱ magíwánʼ náa ikhiin mbá rí nuxi̱ʼ mbá rí maxkajxi̱i̱n muni̱, maríyaaʼ náa ikhiin a̱jkiu̱ún dí itsí ga̱jma̱a̱ maxni̱ín mbá a̱jkiu̱ún dí xuwiʼ* 20 mu majngrui̱gu̱u̱n xó má eʼthí kiʼtáñajunʼ ndrígóʼ, munimbaníí dí na̱tha̱ maguma ga̱jma̱a̱ munimbu̱u̱n. Ikhú ikhiin mani̱ndxu̱ún xuajñunʼ ga̱jma̱a̱ ikhúún mani̱ndxu̱ʼ Dios ndrígu̱ún”›.

21 ‹“Mú, bi̱ gíwáanʼ má xúʼko̱ a̱jkiu̱ún muni̱ dí xkawiʼ ga̱jma̱a̱ dí tsaga..., ma̱ni̱ rí mumíniiʼ ga̱jma̱a̱ numuu xúgíʼ rí nini̱”, eʼthí Tátá Jeobá bi̱ itháán mba̱a̱›”.

22 Querubines nixujxi̱ xpíjpiúún, náa mijngii wájun rígá dí xóo llanta ajua̱nʼ kaʼnii, ga̱jma̱a̱ náa tsu̱du̱ún rígá agiuuʼ Dios ndrígóo Israel dí naxpíbínʼ. 23 Ikhú aguʼ dí naxpíbínʼ ndrígóo Jeobá nitsimuu náa xuajin ga̱jma̱a̱ niwi̱ji̱ náa inuu kúbá dí rígá xígií náa nagájnuu a̱jkha̱ʼ náa xuajin. 24 Nda̱wa̱á, mbá tsiaki̱i̱ dí kaʼwu nikujxu̱u̱n, náa rí niwasngájmuʼ* ga̱jma̱a̱ tsiaki̱i̱ ndrígóo Dios, ma̱ngaa ni̱jkha̱ kañún náa kúwíin xa̱bu̱ xuajin bi̱ ni̱jkha̱ kiʼdiin, náa Caldea. Nda̱wa̱á, rí niwasngájmuʼ má nákhá ginii, niniñuʼ. 25 Ikhú nigíʼdu̱u̱ ni̱thu̱u̱n xa̱bu̱ xuajin bi̱ ni̱jkha̱ kiʼdiin xúgíʼ dí Jeobá nisngájmuʼ.