Ezequiel
37 Nirígá tsiaki̱i̱ ndrígóo Jeobá* náa ikhúún, ga̱jma̱a̱ xi̱ʼ* ndrígóo Jeobá ni̱jkha̱ kañún ga̱jma̱a̱ nitsiajún náa xkua̱ náa kajtííʼ itsu̱. 2 Ikhaa niʼni dí manújngoʼ náa kajti itsu̱, ndi̱yo̱o̱ dí ra̱ʼkhá tháán mbaʼa itsu̱ kajti náa xkua̱ ga̱jma̱a̱ nijndooʼ. 3 Ikhaa nirajxu̱ʼ: “A̱ʼdióo xa̱biya̱, lá ma̱ndoo matangi̱ín makuwá bi̱ i̱tsu̱ún rígi̱ ráʼ.” Ikhúún niriʼñuu: “Tátá Jeobá bi̱ itháán mba̱a̱, ikháán nindxa̱a̱ʼ bi̱ ndaʼyoo”. 4 Ikha jngóo niʼthúnʼ: “Aratáríya̱ʼ ga̱jma̱a̱ numuu itsu̱ rígi̱ ga̱jma̱a̱ arathún: ‹Itsu̱ nijndooʼ, gu̱dxawíín ajngóo Jeobá:
5 Rígi̱ dí Tátá Jeobá bi̱ itháán mba̱a̱ naʼthúún itsu̱: “Ma̱ni̱ dí marigá xi̱ʼ náa ikháanʼla mu ma̱ndoo makuwáanʼ mbu̱júu̱. 6 Ma̱ni̱ dí muguaʼdáá nijtála ga̱jma̱a̱ muguaʼdáá xuyala, ma̱ngaa ma̱ni̱ dí marigá xi̱ʼ náa ikháanʼla mu ma̱ndoo makuwáanʼ mbu̱júu̱, ga̱jma̱a̱ ikháanʼla muʼgua̱nú mbu̱ya̱a̱ dí ikhúún nindxu̱ʼ Jeobá”›”.
7 Ikhú nitáríya̱ʼ xó má nijuiʼthúnʼ ma̱ni̱. Índo̱ nitáríya̱ʼ nigíʼdu̱u̱ niwáán, niwáán xóo eruwamínáʼ itsu̱ ga̱jma̱a̱ mámbá itsu̱ nigíʼdúu niruwamínáaʼ. 8 Nda̱wa̱á ndi̱yo̱o̱ dí náa itsu̱ gíʼdoo níjtúu ga̱jma̱a̱ xuyuuʼ. Mú xóó nda̱a̱ xi̱ʼ náa ikhiin.
9 Nda̱wa̱á ikhaa niʼthúnʼ: “Aratáríya̱ʼ ga̱jma̱a̱ numuu giñánʼ. A̱ʼdióo xa̱biya̱, aratáríya̱ʼ ga̱jma̱a̱ aratháán giñánʼ: ‹Rígi̱ dí naʼthí Tátá Jeobá bi̱ itháán mba̱a̱: “Ikháán giñánʼ,* ayi̱ náa mbá nájkhu̱ níjniúu numbaaʼ* ga̱jma̱a̱ atandijmáá giñánʼ náa xa̱bu̱ bugi̱ bi̱ niradíin, mu xúʼko̱ ma̱ndoo makuwá mbu̱júu̱”›”.
10 Ikha jngóo nitáríya̱ʼ xó má ikhaa niʼthúnʼ ma̱ni̱, ikhú xi̱ʼ nirígá náa ikhiin ga̱jma̱a̱ nigíʼdi̱i̱ nikúwá mbu̱júu̱, niguájun, ra̱ʼkhá tháán mbaʼin soldado.
11 Nda̱wa̱á ikhaa niʼthúnʼ: “A̱ʼdióo xa̱biya̱, itsu̱ rígi̱ nindxu̱u̱ i̱tsu̱ún mbá xúgíinʼ bi̱ kúwá náa goʼwóo Israel. Atayáá ikhiin jngruigu̱u̱n ruthi: ‹Nijndooʼ i̱tsu̱xu, nándáa rí guáʼti̱i̱nxu. Niradiáanʼxu mbá kayuuʼ›. 12 Ikha jngóo aratáríya̱ʼ ga̱jma̱a̱ arathún: ‹Rígi̱ dí naʼthí Tátá Jeobá bi̱ itháán mba̱a̱: “Xa̱bu̱ xuajñunʼ, mambáʼtoo iñá wajñala ga̱jma̱a̱ magúwáanʼla náa iñáʼ rúʼko̱, maʼkháaʼ kaguáanʼ náa ku̱ba̱ʼ ndrígóo Israel. 13 Xa̱bu̱ xuajñunʼ muʼgua̱nú mbu̱ya̱a̱ dí ikhúún nindxu̱ʼ Jeobá índo̱ gámbáʼtáaʼ iñá wajñala ga̱jma̱a̱ magúwáanʼla ikhí”›. 14 ‹Ma̱ni̱ dí marigá xi̱ʼ ndrígóʼ náa ikháanʼla mu xúʼko̱ makuwáanʼ mbu̱júu̱, ma̱ni̱ dí makuwáanʼla náa kubala. Ga̱jma̱a̱ muʼgua̱nú mbu̱ya̱a̱ dí ikhúún, Jeobá, ni̱tha̱ rígi̱ ga̱jma̱a̱ ni̱ni̱›, eʼthí Jeobá”.
15 Nigruígú mbu̱júu̱ ajngóo Jeobá. Niʼthúnʼ: 16 “Ikháán, a̱ʼdióo xa̱biya̱, arajtun mbá ixi̱ ga̱jma̱a̱ ataniraʼmáʼ ikhí: ‹Ga̱jma̱a̱ numuu Judá ma̱ngaa ga̱jma̱a̱ numún xa̱bu̱ xuajin Israel bi̱ xtáa gajmíi̱n ikhaa›. Nda̱wa̱á arajtun i̱mba̱ ixi̱ ga̱jma̱a̱ ataniraʼmáʼ ikhí: ‹Ga̱jma̱a̱ numuu José, rí nandoo gáʼthúu̱n ixu̱u̱ Efraín, ma̱ngaa ga̱jma̱a̱ numún mbá xúgíinʼ bi̱ kúwá náa goʼwóo Israel bi̱ xtáa gajmíi̱n ikhaa›. 17 Atru̱wa̱a̱ mbá nájma̱ ixi̱, mu xúʼko̱ marajtun ga̱jma̱a̱ mbóó ñawáanʼ. 18 Índo̱ xa̱bu̱ xuajñanʼ gúrajxa̱a̱ʼ* ‹Lá xáratuxu̱ʼ ndiéjunʼ eyoo gáʼthúu̱n dí xtaa ratani̱ ráʼ.› 19 Ikháán gíʼmaa matriʼñún ‹Rígi̱ dí naʼthí Tátá Jeobá bi̱ itháán mba̱a̱: “Maguajtúun ixi̱ dí nandoo gáʼthúu̱n José, Efraín ga̱jma̱a̱ xuajin majkhaʼ* dí rígá náa Israel bi̱ numbayíí ikhaa, maru̱wa̱a̱ ga̱jma̱a̱ ixu̱u̱ Judá. Maru̱wa̱a̱ mbá nájma̱ ixi̱ rígi̱, mu xúʼko̱ maguajtúun ga̱jma̱a̱ mbóó ñawúnʼ”›. 20 Ixi̱ dí nitaniraʼmáʼ gíʼmaa dí mida náa ñawáanʼ mu ikhiin mbuyáá.
21 Ikhú arathún: ‹Rígi̱ dí naʼthí Tátá Jeobá bi̱ itháán mba̱a̱: “Magúwíinʼ xa̱bu̱ xuajin Israel náa majñu̱únʼ xa̱bu̱ xuajin náa nigún, magímbíin bi̱ nigún asndu náá ga̱jma̱a̱ maʼkháaʼ kagui̱i̱n náa ku̱bu̱únʼ. 22 Ma̱ni̱ dí mani̱ndxu̱ún mbóó xuajin náa ku̱ba̱ʼ rúʼko̱, náa kúbá dí rígá náa Israel, ga̱jma̱a̱ i̱mba̱wíí rey gáʼtáñajúúnʼ mbá xúgíinʼ, nánguá marigá a̱jma̱ xuajin ni má xútañajúúnʼ a̱jmi̱i̱n xa̱bu̱ ñajunʼ. 23 Ni xúni̱ gachímíjná gajmiún xándú bi̱ xkawi̱i̱nʼ ni má xúni̱ dí xkawiʼ ga̱jma̱a̱ aʼkhá. Ma̱ni̱ káwíin náa dí ra̱májánʼ náa dí niʼni muxudamíjna̱ aʼkhá ga̱jma̱a̱ ma̱ni̱ kaʼwi̱ín. Ikhiin mani̱ndxu̱ún xuajñunʼ ga̱jma̱a̱ ikhúún mani̱ndxu̱ʼ Dios ndrígu̱ún.
24 Xa̱bi̱ʼ David mani̱ndxu̱u̱ rey ndrígu̱ún ga̱jma̱a̱ mbá xúgíinʼ muguáʼdaa mbáwíí baxtúu. Munimbaníí xtángoo ndrígóʼ ga̱jma̱a̱ munimbu̱ún mbá xúgíʼ dí naʼthí náa kiʼtáñajunʼ ndrígóʼ. 25 Makuwíin náa ku̱ba̱ʼ rí ni̱xnu̱u̱ xa̱bi̱ʼ Jacob, náa nikúwíin wajin xiʼñúúnʼ. Makuwíin ikhí asndu kámuu, makuwíin ikhiin gajmiún e̱jñu̱ún mangiin bi̱ gáguwáʼ náa e̱jñu̱ún, ga̱jma̱a̱ xa̱bi̱ʼ David mani̱ndxu̱u̱ bi̱ mbayá edxu̱u̱* náa ikhiin asndu kámuu.
26 Mambanúʼ gajmíʼ dí makuwá tsímáá, dí gámbánúʼ gajmíʼ mbajyúuʼ asndu kámuu. Ma̱ni̱ dí makuwíin ga̱jma̱a̱ maʼni mbaʼin. Ma̱ngaa ma̱ni̱ dí goʼwóʼ marigá náa majñu̱únʼ ikhiin asndu kámuu. 27 Goʼwóʼ marigá náa majñu̱únʼ ikhiin, ikhúún mani̱ndxu̱ʼ Dios ndrígu̱ún ga̱jma̱a̱ ikhiin mani̱ndxu̱ún xuajñunʼ. 28 Ga̱jma̱a̱ índo̱ goʼwóʼ gárígá náa majñu̱únʼ ikhiin asndu kámuu, ikhú xa̱bu̱ xuajin maguánú mbuyáá dí ikhúún, Jeobá, na̱ni̱ kaʼwi̱ín xa̱bu̱ Israel”›”.