Raga̱jma̱ libro ndrígóo Crónicas

11 Índo̱ Rehoboam ni̱jkha̱nú náa Jerusalén, mbá nacha̱ nigímbíin mbá xúgíinʼ bi̱ kúwá náa goʼwóo Judá, ga̱jma̱a̱ bi̱ naguwáʼ náa xuajin chíʼgíiʼ* ndrígóo Benjamín, mbá 180,000 soldado bi̱ kaxtaʼwíin, mu muxmijná gajmiún bi̱ kúwá náa goʼwóo Israel. Ga̱jma̱a̱ murtanga̱a̱ rí maʼtáñajunʼ Rehoboam. 2 Ikhú Semaya, xa̱bi̱i̱ Dios bi̱ gajkhun, nigruigú ajngóo Jeobá rígi̱: 3 “Aratháán Rehoboam a̱ʼdióo Salomón, rey ndrígóo Judá, ga̱jma̱a̱ mbá xúgíinʼ israelitas bi̱ kúwá náa Judá, ga̱jma̱a̱ náa Benjamín: 4 ‹Rígi̱ dí naʼthí Jeobá: “Xátsimala gúxmíjná gajmiála a̱ngia̱la. Mámbáa gátanga̱a̱ goʼwóo, numuu rí ikhúún ni̱ni̱ dí xígi̱ gárígá”›”. Ikha jngóo ikhiin ninimbu̱u̱n dí niʼthí Jeobá ga̱jma̱a̱ nitangiín náa guʼwún, na̱nguá nigún gúxmijná gajmiún Jeroboán.

5 Rehoboam nixtáa náa Jerusalén ga̱jma̱a̱ niʼni xuajin dí kúgumaʼá náa Judá. 6 Niʼni májáanʼ xuajin Belén, Etam, Tecoa, 7 Bet-Zur, Socó, Adulam, 8 Gat, Maresá, Zif, 9 Adoraim, Lakís, Azecá, 10 Zorá, Ayalón ga̱jma̱a̱ Hebrón. Xuajin rígi̱ dí nirígá náa Judá ga̱jma̱a̱ náa Benjamín niguma májáanʼ. 11 Ma̱ngaa niʼni májáanʼ xuajin dí kúgumaʼá. Nigruigi̱i̱n bi̱ nutañajúúnʼ soldado, ga̱jma̱a̱ niʼni rí náa xuajin marigá ganitsu, aceite ga̱jma̱a̱ vino. 12 Náa mbá xúgíʼ xuajin rúʼko̱ nixnún escudo dí mba̱ʼu̱ ga̱jma̱a̱ kudú,* niruguamaʼáan xúgíʼ xuajin. Xa̱bu̱ Judá ga̱jma̱a̱ xa̱bu̱ Benjamín nigún kidxuuʼ.

13 Ndxajkun ga̱jma̱a̱ levitas bi̱ kúwá náa mbá xúgíʼ Israel niniña̱a̱nʼ mbañúúnʼ ga̱jma̱a̱ nigún kidxuuʼ Rehoboam. 14 Levitas niniña̱a̱nʼ mbaaʼ náa rígá ra̱jxa̱ ga̱jma̱a̱ xúgíʼ dí guáʼdáá, niguwáʼ náa Judá ga̱jma̱a̱ náa Jerusalén, numuu dí Jeroboán gajmíi̱n e̱ji̱i̱n nindrigú káñún’ ñajunʼ dí guáʼdáá dí nindxu̱ún ndxajkun náa Jeobá. 15 Jeroboán nigruigi̱i̱n ndxajkun ndrígio̱o̱ náa rí mitsídánʼ, mu muni̱ ñajúúnʼ xa̱bu̱ wéñiiʼ* bi̱ xóo kaʼniún tsujthu̱nʼ ga̱jma̱a̱ e̱jín xédí bi̱ ikhaa niʼnii. 16 Bi̱ naguwáʼ náa xuajin majkhaʼ dí rígá náa Israel bi̱ ga̱jma̱a̱ xúgíʼ a̱jkiu̱ún nduyáaʼ Jeobá, Dios ndrígóo Israel, nigún kidxúúnʼ ndxajkun ga̱jma̱a̱ levitas náa Jerusalén mu muxnajxi̱ tsigijñaʼ gamajkhu náa inuu Jeobá, Dios ndrígu̱ún wajin xiʼñúúnʼ. 17 Mbá ajtsú tsiguʼ nimbayíí rí naʼtáñajunʼ Judá ga̱jma̱a̱ nimbayíí Rehoboam a̱ʼdióo Salomón, numuu dí nikúwá runi̱ mbá ajtsú tsiguʼ xó má niʼni David ga̱jma̱a̱ Salomón.

18 Ikhú Rehoboam ndiyáa Mahalat, wáxióo* Jerimot, a̱ʼdióo David ga̱jma̱a̱ Abihail, wáxióo Eliab, a̱ʼdióo Jesé. 19 Índo̱ ninújngoo mbiʼi, Rehoboam nigiʼdiin ga̱jma̱a̱ Mahalat e̱ji̱n bugi̱: Jeús, Semarías ga̱jma̱a̱ Zaham. 20 Nda̱wa̱á ndiyáa Maacá, a̱ʼdá xíñíiʼ Absalón. Índo̱ ninújngoo mbiʼi nigiʼdaa ga̱jma̱a̱ Abías, Atái, Zizá ga̱jma̱a̱ Selomit. 21 Rehoboam nindoo kaʼyoo itháan Maacá, a̱ʼdá xíñíiʼ Absalón, ki xóo mbá xúgíinʼ eʼwíinʼ gu̱ʼwi̱i̱ ga̱jma̱a̱ gu̱ʼú ñawiin,* numuu dí ikhaa nigiʼdiin mbá 18 gu̱ʼwi̱i̱ ga̱jma̱a̱ mbá 60 gu̱ʼú ñawiin, nigiʼdiin mbá 28 e̱ji̱i̱n jiámá ga̱jma̱a̱ 60 wa̱ʼxa̱ʼ.* 22 Rehoboam nigíiʼ a̱ʼdióo bi̱ mbiʼyuu Abías bi̱ nigiʼdaa ga̱jma̱a̱ Maacá xóo bi̱ kayá edxu̱u̱ ga̱jma̱a̱ mu maʼtáñajúúnʼ a̱ngui̱i̱n, numuu dí nindxa̱ʼwáminaʼ magíiʼ rey. 23 Nindxaʼóo májánʼ edxu̱u̱ dí maʼni ga̱jma̱a̱ nikuʼmiin magún tikhuun e̱ji̱i̱n náa mbá xúgíʼ mbaaʼ dí rígá náa Judá ga̱jma̱a̱ náa Benjamín, náa mbá xúgíʼ xuajin dí kúgumaʼá. Ma̱ngaa nixnún mbaʼa dí muda gágún ga̱jma̱a̱ ndiñíinʼ mbaʼin guʼñu̱ún.