Raga̱jma̱ libro ndrígóo Crónicas

10 Rehoboam ni̱jkha̱ náa Siquem, numuu dí xúgíinʼ xa̱bu̱ Israel niguwáʼ náa Siquem mu mugíiʼ rey. 2 Índo̱ Jeroboán a̱ʼdióo Nebat niʼdxawun rígi̱, mbá nacha̱ ni̱ʼkha̱a̱ náa Egipto (ikhaa kaʼníí xtáa náa Egipto, numuu dí nigáyúu niʼni rey Salomón). 3 Ikhú nixuʼmiin magún gúyáaʼ, Jeroboán gajmíi̱n mbá xúgíinʼ xa̱bu̱ Israel, nigún gúyáá Rehoboam ga̱jma̱a̱ nitháán: 4 “Ana̱a̱ʼ* niʼni rí yugo ndrígúxu̱ maʼni gújkhúʼ, mú, á mu ikháán natani̱ rí maʼni wabaʼ ñajunʼ ga̱jma̱a̱ dí maʼni wipi yugo rí nixnúxu̱ mudá ana̱a̱ʼ, ikháanʼxu̱ mu̱ni̱ ñajuaanʼ”.

5 Ikhaa niriʼñúún: “Gutangáanʼla gúyoʼ índo̱ gáʼni ajtsú mbiʼi”. Ikhú xa̱bu̱ nigúun. 6 Rey Rehoboam nirajxu̱u̱n bi̱ kuya̱ edxu̱u̱* bi̱ nini̱ ñajuunʼ Salomón bi̱ nindxu̱u̱ anu̱u̱ nákhá kaʼníí xtáa ndaʼya, nirajxu̱u̱n: “Ndiéjunʼ etu̱nʼla rí mathu̱u̱n xa̱bu̱ xuajin bugi̱ rá.” 7 Ikhiin niriʼñáán: “Á mu nataniu̱u̱n dí májánʼ xa̱bu̱ xuajin bugi̱, natani̱ dí nanigu̱u̱nʼ ga̱jma̱a̱ natriʼñún májánʼ, ikhiin mani̱ndxu̱ún má xúʼko̱ xa̱bia̱a̱ʼ”.

8 Mú ikhaa táʼdxawun consejo rí nixnáá bi̱ kuya̱ edxu̱u̱, ga̱jma̱a̱ nirajxu̱u̱n bi̱ itháan jiámá bi̱ ndija̱a̱ gajmíi̱n, ga̱jma̱a̱ dí xúgi̱ ikhiin numbayíí. 9 Nirajxu̱u̱n: “Ndiéjunʼ gutu̱nʼla ikháanʼ. Xa̱bu̱ bugi̱ nithunʼ: ‹Atani̱ rí maʼni wipi wáa yugo rí nixnúxu̱ mudá ana̱a̱ʼ›. Ndiéjunʼ gúriʼñún xá.” 10 Jiámá bi̱ mbóó ndija̱a̱ gajmíi̱n nitháán: “Xa̱bu̱ buʼko̱ bi̱ nithaanʼ: ‹Ana̱a̱ʼ niʼni ki̱wu̱n yókiuxu, atani̱ wipi wáa ikháán›, gíʼmaa dí marathu̱u̱n: ‹A̱ʼdióo ñawúnʼ dí chíʼgíiʼ* maʼni itháan mi̱du̱ ki xóo tsaguuʼ* anu̱ʼ. 11 Anu̱ʼ nixnála mu̱da yugo dí ki̱wu̱n, mú ikhúún ma̱xnala mu̱da rí itháan ki̱wu̱n. Anu̱ʼ wáá má nixpájtiáanʼla, mú ikhúún maxpajtiáanʼla itháan gakhi̱i̱›”.*

12 Jeroboán gajmíi̱n xúgíinʼ eʼwíinʼ nitangiín gúyáá Rehoboam índo̱ niʼni ajtsú mbiʼi, xó má índo̱ rey niʼthún “Gutangáanʼla gúyoʼ índo̱ gáʼni ajtsú mbiʼi”. 13 Mú rey niriʼñúún ga̱jma̱a̱ mijkoo xa̱bu̱, xúʼko̱ kaʼnii niʼni dí rey Rehoboam ninújngurámuuʼ consejo rí nixnáá bi̱ kuya̱ edxu̱u̱. 14 Niʼnimbo̱o̱ consejo rí nixnáá jiámá, niʼthún: “Ikhúún ma̱xnala mu̱da rí ki̱wu̱n, rí itháan ki̱wu̱n. Anu̱ʼ wáá má nixpájtiáanʼla, mú ikhúún maxpajtiáanʼla itháan gakhi̱i̱”. 15 Ikha jngóo rey na̱nguá niʼdxawuun rí nithi xa̱bu̱ xuajin, numuu rí Dios bi̱ gajkhun niʼni rí xúʼko̱ má gárígá. Mu xúʼko̱ mambanúu ajngóo Jeobá dí Ahíya xa̱bu̱ silonita niʼthúu̱n Jeroboán a̱ʼdióo Nebat.

16 Índo̱ xúgíinʼ xa̱bu̱ Israel ndiyáá dí rey na̱nguá nindoo gáʼdxawún, xa̱bu̱ xuajin nitháán rey: “Ikháanʼxu̱ nda̱a̱ dí kaʼyuxu̱ náa David, túndrígúuxu nimbá náa a̱ʼdióo Jesé. ¡Ikha jngóo xa̱bu̱ Israel, mámbáa gáʼga̱a̱ ga̱jma̱a̱ dios ndrígóo! Ga̱jma̱a̱ dí xúgi̱, ikháán David, aratáñajunʼ náa guʼwáaʼ rá”. Ikhú mbá xúgíinʼ xa̱bu̱ Israel nitangiín náa guʼwún.*

17 Mú Rehoboam niʼtáñajúúnʼ má xúʼko̱ israelitas bi̱ nikúwá náa xuajin dí rígá náa Judá.

18 Ikhú rey Rehoboam nikuʼmaa Hadoram bi̱ naʼtáñajúúnʼ bi̱ nuñajunʼ gakhi̱i̱ mu maʼga gáʼñúún, mú mbá xúgíinʼ israelitas nixiyáa ga̱jma̱a̱ itsí. Rey Rehoboam niʼngo̱o̱ nitsima̱a̱ náa cárriu̱u̱ mu magáyúu maʼga Jerusalén. 19 Israelitas nixujximíjna̱ náa inún bi̱ kúwíin náa goʼwóo David asndu rí mbiʼi xúgi̱.