LEVÍTICO

1 Jeobá nindxaʼwóo Moisés niʼtámíjná ga̱jma̱a̱ ikhaa asndu náa awúún guʼwá xtíin. Niʼthúu̱n: 2 “Aratamíjná gajmiáanʼ israelitas* ga̱jma̱a̱ arathún: ‹Á mu mbáa rí ikhiin maxnájxi̱i̱ mbáa xujkhúʼ kraʼdaa xóo tsigijñaʼ gamajkhu náa inuu Jeobá, xujkhúʼ buʼko̱ mbaʼyóoʼ mani̱ndxu̱u̱ mbáa xedi̱ o mugu̱.

3 Á mu mbáa maxnájxi̱i̱ xedi̱ xóo tsigijñaʼ dí mikarámáʼ, xujkhúʼ buʼko̱ mbaʼyóoʼ mani̱ndxu̱u̱ mbáa a̱ʼdá xédí bi̱ itháan májáanʼ. Náa a̱jkiu̱u̱n gagájnuu maxnájxi̱i̱ náa inuu Jeobá náa riejuun guʼwá xtíin rí nagimbíi̱n. 4 Mbaʼyóoʼ matámáʼ ñawúunʼ náa edxu̱u̱ tsigijñaʼ dí mikarámáʼ, mu xúʼko̱ Dios magruigú tsigijñaʼ ndrígóo ga̱jma̱a̱ maʼni jngudi̱i̱ aʼkhúun.

5 Ikhú mbaʼyóoʼ makhañúu a̱ʼdá xédí náa inuu Jeobá. E̱ji̱i̱n Aarón bi̱ ni̱ndxu̱ún ndxajkun, muxnajxi̱ eʼdi, muxtijyááʼ náa mbájndi níjniúu dí nakarámáʼ tsigijñaʼ, dí gíʼ náa riejuun guʼwá xtíin rí nagimbíi̱n. 6 Tsigijñaʼ dí mikarámáʼ mbaʼyóoʼ maxtiʼíí xtóo ga̱jma̱a̱ muturi̱ga̱a̱. 7 E̱ji̱i̱n Aarón bi̱ ni̱ndxu̱ún ndxajkun, mbaʼyóoʼ mugrigu aguʼ náa nakarámáʼ tsigijñaʼ ma̱ngaa mudra̱ma̱ʼ ixi̱ ikhí. 8 E̱ji̱i̱n Aarón, bi̱ ni̱ndxu̱ún ndxajkun, mudra̱ma̱ʼ xuyuuʼ tsigijñaʼ xúʼko̱ má edxu̱u̱ ga̱jma̱a̱ sébúu náa tsu̱du̱u̱ ixi̱ dí grígu rakha náa inuu dí nakarámáʼ tsigijñaʼ. 9 Chámbóo ga̱jma̱a̱ xtiyuu majuiʼñáa, ndxajkun mbaʼyóoʼ markúní xúgíʼ rígi̱ náa nakarámáʼ tsigijñaʼ. Numuu rí nindxu̱u̱ mbá tsigijñaʼ dí nakarámáʼ, mbá dí najuixnáxi̱ náa aguʼ rí mitsaanʼ* ndataun* eʼyoo Jeobá.

10 Á mu mbáa maxnájxi̱i̱ mugu̱ o tsujthuunʼ xóo tsigijñaʼ dí nakarámáʼ, mbaʼyóoʼ mani̱ndxu̱u̱ mbáa xujkhú i̱ya̱ bi̱ niwájxi̱i̱ má, bi̱ itháan májáanʼ. 11 Mbaʼyóoʼ muxiyáa náa inuu Jeobá náa níjniúu dí nakarámáʼ tsigijñaʼ xígií norte. E̱ji̱i̱n Aarón, bi̱ ni̱ndxu̱ún ndxajkun, mbaʼyóoʼ muxtijyááʼ ga̱jma̱a̱ eʼdiuu mbá xúgíʼ níjñiúu náa nakarámáʼ tsigijñaʼ. 12 Ikhaa marujturi̱ga̱a̱ ga̱jma̱a̱ ndxajkun magruaʼmáʼ mbá eniʼ xúʼko̱ má magrigu edxu̱u̱ ga̱jma̱a̱ sébúu náa tsu̱du̱u̱ ixi̱ dí grígu rakha náa inuu dí nakarámáʼ tsigijñaʼ. 13 Ikhaa maʼjñáa chámbóo ga̱jma̱a̱ xtiyuu, ndxajkun mbaʼyóoʼ maxnájxi̱ xúgíʼ rígi̱, markúní náa inuu dí nakarámáʼ tsigijñaʼ. Nindxu̱u̱ mbá tsigijñaʼ rí nakha, rí najuixnáxi̱ náa aguʼ rí mitsaanʼ ndataun eʼyoo Jeobá.

14 Mú, á mu mbáa maxnájxi̱i̱n ñu̱ʼu̱ xóo tsigijñaʼ dí mikarámáʼ náa inuu Jeobá, mbaʼyóoʼ mani̱ndxu̱ún gúgu̱ o e̱jín paloma. 15 Ndxajkun mbaʼyóoʼ maxnájxi̱ mámbáa ñu̱ʼu̱ náa nakarámáʼ tsigijñaʼ, marujtu aphuu ga̱jma̱a̱ xngáñuuʼ ma̱ngaa maʼni rí maʼni gúniúu náa inuu dí nakarámáʼ tsigijñaʼ. Mú maniñuuʼ rí eʼdiuu magadíí náa níjniúu dí nakarámáʼ tsigijñaʼ. 16 Ikhaa mbaʼyóoʼ marígú xtagaʼwuun xúʼko̱ má gáʼni ga̱jma̱a̱ xniuuʼ, mada̱ʼ náa mbá níjniúu dí nakarámáʼ tsigijñaʼ, xígií náa nagájnuu a̱jkha̱ʼ* náa najuiʼdáʼ idiʼ. 17 Ikhaa mbaʼyóoʼ maxpíʼtaa ta̱pha̱ náa tima mbá nájma̱ xpíjpiúu, mú xáʼyóoʼ marujtu ngayii. Ikhú ndxajkun mbaʼyóoʼ matámáʼ náa tsu̱du̱u̱ ixi̱ dí nakha maʼni gúniúu nindxu̱u̱ mbá tsigijñaʼ dí nakarámáʼ dí najuixnájxi̱ náa aguʼ rí mitsaanʼ ndataun eʼyoo Jeobá.

2 Á mu mbáa naxnájxi̱ tsigijñaʼ rí tsígáʼ náa inuu Jeobá, gíʼmaa mani̱ndxu̱u̱ harina dí itháan májánʼ. Ikhaa gíʼmaa maxtrámuuʼ aceite ga̱jma̱a̱ magrígu olíbano náa tsu̱du̱u̱. 2 Nda̱wa̱á maʼga kiʼyá náa e̱ji̱i̱n Aarón, bi̱ nindxu̱ún ndxajkun, ga̱jma̱a̱ ndxajkun mbaʼyóoʼ maríya̱ʼ mbá ñawúunʼ harina dí itháan májánʼ ma̱ngaa aceite ga̱jma̱a̱ olíbano, matsikhá mu maʼni gúniúu náa nakarámáʼ tsigijñaʼ, xóo tsigijñaʼ rí najuixnájxi̱. Mani̱ndxu̱u̱ mbá tsigijñaʼ dí najuixnájxi̱ náa aguʼ dí mitsaanʼ* ndataun eʼyoo Jeobá. 3 Rí gáguanúu náa tsigijñaʼ rí tsígáʼ mani̱ndxu̱u̱ ndrígóo Aarón gajmíi̱n e̱ji̱i̱n. Nindxu̱u̱ rí mikaʼwu wéñuuʼ, numuu rí nindxu̱u̱ mbá tsigijñaʼ gamajkuu rí nijuixnájxi̱ dí mi̱kha náa inuu Jeobá.

4 Á mu naraxnájxi̱ mbá tsigijñaʼ rí tsígáʼ dí nigu̱ʼ náa horno mbaʼyóoʼ maguma ga̱jma̱a̱ harina dí itháan májánʼ. Manindxu̱u̱ pan dijndi dí ragíʼdoo levadura dí kagu̱u̱ aceite o galleta rí mbawiʼ dí ragíʼdoo levadura dí kagu̱u̱ aceite.

5 Á mu tsigijñaʼ rí tsígáʼ dí maraxnájxi̱ nigu̱ʼ náa e̱jui̱i̱, mbaʼyóoʼ maʼni harina dí itháan májánʼ dí ragíʼdoo levadura ga̱jma̱a̱ magandáwo̱o̱ aceite. 6 Mbaʼyóoʼ maxtujkhu ga̱jma̱a̱ maxídírámuuʼ aceite náa tsu̱du̱u̱. Numuu rí nindxu̱u̱ tsigijñaʼ rí tsígáʼ.

7 Á mu tsigijñaʼ rí tsígáʼ dí maraxna̱jxí niguma májáánʼ náa mbá sartén, mbaʼyóo’ mani̱ndxu̱u̱ harina dí itháan májánʼ ga̱jma̱a̱ aceite. 8 Mbaʼyóoʼ mi̱dxu̱ʼ jcháaʼ náa inuu Jeobá tsigijñaʼ rí tsígáʼ dí ki̱ʼni̱ ga̱jma̱a̱ xúgíʼ rígi̱ ga̱jma̱a̱ maraxnájxi̱ rígi̱ náa inuu ndxajkun, mu maʼga kayóo náa nakarámáʼ tsigijñaʼ. 9 Ndxajkun maríya̱ʼ mbá chíʼgíiʼ* tsigijñaʼ rí tsígáʼ mu magrígú náa nakarámáʼ tsigijñaʼ mu maʼni gúniúu mu xúʼko̱ Dios magru̱igú tsigijñaʼ. Mani̱ndxu̱u̱ mbá tsigijñaʼ dí mi̱kha náa aguʼ dí mitsaanʼ ndataun eʼyoo Jeobá. 10 Dí gáguanúu náa tsigijñaʼ rí tsígáʼ kaʼyoo Aarón gajmíi̱n e̱ji̱i̱n, nindxu̱u̱ rí mikaʼwu wéñuuʼ numuu rí nindxu̱u̱ mbá tsigijñaʼ gamajkhu rí nijuixnájxi̱ mi̱kha náa inuu Jeobá.

11 Xáʼyóoʼ majuixnájxi̱ náa inuu Jeobá tsigijñaʼ rí tsígáʼ dí gíʼdoo levadura, numuu rí xándoo magrígu maʼni gúní mbá xúwáʼ dí nikájxi̱i̱ ni má dí gíʼdoo jyááʼ, xóo mbá tsigijñaʼ gamajkhu dí mi̱kha náa inuu Jeobá.

12 Mu ma̱ndoo maraxnajxí náa inuu Jeobá, índo̱ gáraxnajxí dí nirígá ginii xóo tsigijñaʼ, mú xájuixnájxi̱ náa nakarámáʼ tsigijñaʼ xóo mbá rí mitsaanʼ ndataun.

13 Xúgíʼ tsigijñaʼ rí tsígáʼ dí maraxnajxí matagíʼdááʼ idú. Xátatsiʼñááʼ rí nimbá tsigijñaʼ rí tsígáʼ mbaʼyóoʼ idú dí maʼni marmáʼáan a̱jkia̱a̱nʼ dí nimbánaaʼ ga̱jma̱a̱ Dios ndrígáaʼ. Mámbá índo̱ gáraxnajxí tsigijñaʼ, maraxnajxí idú ma̱ngaa.

14 Á mu naraxnajxí tsigijñaʼ rí tsígáʼ náa inuu Jeobá rí nijma̱a̱ ginii, mbaʼyóoʼ mani̱ndxu̱u̱ tsígáʼ nuxi̱ʼ rí nigu̱ʼ náa aguʼ, xóo tsígáʼ nuxi̱ʼ rí nijui̱ʼnu̱. Mani̱ndxu̱u̱ tsigijñaʼ rí tsígáʼ dí nijma̱a̱ ginii náa nitadu. 15 Mbaʼyóoʼ mataxidirámááʼ aceite náa ikhaa ga̱jma̱a̱ mataxidirámááʼ olíbano náa tsu̱du̱u̱. Numuu rí nindxu̱u̱ mbá tsigijñaʼ rí tsígáʼ. 16 Ndxajkun maríya̱ʼ mbá chíʼgíiʼ tsigijñaʼ rí nijuixnájxi̱ mu magri̱gu maʼni gúniúu, xóo muʼthá mbá nguéjma̱ tsígáʼ rí nijui̱ʼnu̱ ga̱jma̱a̱ aceite ma̱ngaa olíbano. Mani̱ndxu̱u̱ mbá tsigijñaʼ gamajkhu dí mi̱kha náa inuu Jeobá.

3 Á mu mbáa gáxnájxíi xedi̱ xóo tsigijñaʼ dí tsímáá,* gíʼmaa maxnájxíi náa inuu Jeobá, mbáa xujkhúʼ bi̱ májáanʼ. 2 Ikhaa matámáʼ ñawúunʼ náa edxu̱u̱ tsigijñaʼ rí naxnájxi̱, xujkhúʼ bugi̱ mbaʼyóoʼ makhañúu náa riejuun guʼwá xtíin rí nagimbíi̱n. E̱ji̱i̱n Aarón, bi̱ ni̱ndxu̱ún ndxajkun, muxtijyááʼ ga̱jma̱a̱ eʼdi náa xúgíʼ níjniúu dí nakarámáʼ tsigijñaʼ. 3 Ikhaa maxnájxi̱ mbá chíʼgíiʼ* tsigijñaʼ dí tsímáá xóo mbá tsigijñaʼ gamajkhu rí najuixnáxi̱ mu mi̱kha náa inuu Jeobá. Maxnájxi̱ sébú dí rígá náa chámbá ga̱jma̱a̱ xúgíʼ sébú rí kagu̱u̱ ikhí, 4 xúʼko̱ má nájma̱ riñón ga̱jma̱a̱ sébú dí gíʼdoo ikhí. Mbóó gúrawíi nájma̱ riñón ga̱jma̱a̱ sébú rí gíʼdoo náa xkígoo. 5 Ikhú e̱ji̱i̱n Aarón nitsi̱kha̱ xúgíʼ rígi̱ mu maʼni gúniúu náa nakarámáʼ tsigijñaʼ, náa tsu̱du̱u̱ tsigijñaʼ rí xtáa rakha náa aguʼ. Nindxu̱u̱ mbá tsigijñaʼ gamajkhu rí najuixnáxi̱ mu mikha náa inuu Jeobá rí mitsaanʼ* ndataun eʼyoo ikhaa.

6 Á mu mbáa gáxnájxíi mbáa mugu̱ náa inuu Jeobá xóo tsigijñaʼ dí tsímáá, gíʼmaa mani̱ndxu̱u̱ mbáa xujkhúʼ bi̱ májáanʼ, mbáa xujkhú i̱ya̱ o xujkhú eʼgú. 7 Á mu maxnájxíi mbáa mugu̱ bi̱ niwájxi̱i̱ má, mbaʼyóoʼ maxnájxíi náa inuu Jeobá. 8 Ikhaa matámáʼ ñawúunʼ náa edxu̱u̱ tsigijñaʼ rí naxnájxi̱, xujkhúʼ bugi̱ mbaʼyóoʼ makhañúu náa inuu guʼwá xtíin rí nagimbíi̱n. E̱ji̱i̱n Aarón muxtijyááʼ ga̱jma̱a̱ eʼdi náa xúgíʼ níjniúu dí nakarámáʼ tsigijñaʼ. 9 Ikhaa maxnájxi̱ sébúu tsigijñaʼ dí tsímáá xóo mbá tsigijñaʼ gamajkhu rí najuixnáxi̱ mu mikha náa inuu Jeobá. Marujturígú tsiyúuʼ rí gíʼdoo sébúu náa kuʼmuu itsu tsaguuʼ, sébú dí rígá náa chámbá ga̱jma̱a̱ xúgíʼ sébú rí kagu̱u̱ ikhí, 10 xúʼko̱ má nájma̱ riñón ga̱jma̱a̱ sébú dí gíʼdoo ikhí. Mbóó gúrawíi riñón ga̱jma̱a̱ sébú rí gíʼdoo náa xkígoo. 11 Ndxajkun magruaʼmáʼ xúgíʼ rígi̱ náa nakarámáʼ tsigijñaʼ mu maʼni gúniúu. Nindxu̱u̱ ganitsu,* mbá tsigijñaʼ gamajkhu rí najuixnájxi̱ mu mi̱kha náa inuu Jeobá.

12 Á mu mbáa gaxnájxíi tsu̱jtuunʼ, mbaʼyóoʼ maxnájxíi náa inuu Jeobá. 13 Ikhaa matámáʼ ñawúunʼ náa edxu̱u̱ tsigijñaʼ rí naxnájxi̱, xujkhú’ bugi̱ mbaʼyóoʼ makhañúu náa inuu guʼwá xtíin rí nagimbíi̱n. E̱ji̱i̱n Aarón muxtijyááʼ ga̱jma̱a̱ eʼdi náa xúgíʼ níjniúu dí nakarámáʼ tsigijñaʼ. 14 Rí maxnájxi̱ ikhaa xóo mbá tsigijñaʼ gamajkhu rí najuixnáxi̱ mu mi̱kha náa inuu Jeobá nindxu̱u̱ sébú dí rígá náa chámbá ga̱jma̱a̱ xúgíʼ sébú rí kagu̱u̱ ikhí, 15 xúʼko̱ má nájma̱ riñón ga̱jma̱a̱ sébú dí gíʼdoo ikhí. Mbóó gúrawíi riñón ga̱jma̱a̱ sébú rí gíʼdoo náa xkígoo. 16 Ndxajkun magruaʼmaʼ xúgíʼ rígi̱ náa nakarámáʼ tsigijñaʼ mu maʼni gúniúu. Nindxu̱u̱ ganitsu, mbá tsigijñaʼ rí najuixnájxi̱ mu mi̱kha rí mitsaanʼ ndataun. Xúgíʼ sébú kaʼyoo Jeobá.

17 Rígi̱ nindxu̱u̱ mbá kiʼtáñajunʼ rí mbajyúuʼ asndu kámuu náa bi̱ gáguwáʼ rakúwá nda̱wa̱á asndu náá má gákúwíin: Ragíʼmaa mu̱phu̱ sébú ni má eʼdi›”.

4 Jeobá niʼthúu̱n xóó Moisés: 2 “Arathún israelitas: ‹Á mu mbáa tséʼni kiejuunʼ mbá aʼkhá, naʼni mbá dí Jeobá niʼthí dí xáguma, rígi̱ gíʼmaa maguma:

3 Á mu mbáa ndxajkun bi̱ niwaxtíyáaʼ nakudaminaʼ mbá aʼkhá ga̱jma̱a̱ naʼni dí xa̱bu̱ xuajin maguaʼdáá aʼkhúún, ikhaa mbaʼyóoʼ maxnájxi̱i̱ mbáa a̱ʼdá xédí májáanʼ náa inuu Jeobá xóo tsigijñaʼ ga̱jma̱a̱ numuu aʼkhá dí nikudaminaʼ. 4 Ikhaa maʼga kayáa a̱ʼdá xédí náa inuu Jeobá náa riejuun guʼwá xtíin rí nagimbíi̱n, matámáʼ ñawúunʼ náa edxu̱u̱ xedi̱ ga̱jma̱a̱ maxíyáa náa inuu Jeobá. 5 Ikhú ndxajkun bi̱ niwixtíyáaʼ mato̱ʼo̱o̱ kayóo mbá chíʼgíiʼ* eʼdiuu xedi̱ náa awúu̱n guʼwá xtíin rí nagimbíi̱n. 6 Ndxajkun marma̱jan a̱ʼdióo ñawúunʼ ga̱jma̱a̱ eʼdi, nda̱wa̱á maxtíjyooʼ mbá juwan nuthu ga̱jma̱a̱ eʼdi náa inuu Jeobá náa níjniúu cortina dí frájkha náa dí nindxu̱u̱ mikaʼwu. 7 Ndxajkun ma̱ngaa maxtajmuu mbá chíʼgíiʼ eʼdi náa chi̱jyu̱u̱ʼ dí nakarámáʼ dí ndataun, dí gíʼ náa inuu Jeobá náa awúu̱n guʼwá xtíin dí nagimbíi̱n. Eʼdiuu xedi̱ rí xóó gáguanúu magadíriga̱ náa rajkhúu dí nakarámáʼ tsigijñaʼ, dí gíʼ náa inuu guʼwá xtíin rí nigimbíin.

8 Nda̱wa̱á mariya̱ʼ sébúu xedi̱ bi̱ nijuixnájxi̱i̱ ga̱jma̱a̱ numuu aʼkhá, xóo sébú dí gíʼdoo náa chámbóo ga̱jma̱a̱ xúgíʼ sébú dí kagu̱u̱ ikhí, 9 xúʼko̱ má mbá nájma̱ riñón ga̱jma̱a̱ sébú dí gíʼdoo ikhí. Mbóó gaguwíi riñón ga̱jma̱a̱ sébú dí gíʼdoo náa xkígóo. 10 Magajnúu ikháá má sébú xóo rí nagájnuu náa xedi̱ bi̱ nijuixnájxi̱i̱ náa tsigijñaʼ dí tsímáá.* Ndxajkun mbaʼyóoʼ magruaʼmá xúgíʼ rígi̱ náa nakarámáʼ tsigijñaʼ mu maʼni gúniúu.

11 Mú xtóo xedi̱, xuyuuʼ, edxu̱u̱, xtiyuu, chámbóo ga̱jma̱a̱ ambóo, 12 xóo muʼthá, xúgíiʼ xedi̱, ikhaa mbaʼyóoʼ maʼga kagu̱u̱ náa rexo̱o̱ dí gíi̱nʼ, náa mbaaʼ mikaʼwu náa rí nagadíí idiʼ. Matsiká xúgíʼ rígi̱. Náa nagadíí idiʼ ikhí gáʼyóoʼ mi̱kha.

13 Á mu xúgíinʼ xa̱bu̱ Israel naguáʼdáá aʼkhúún ga̱jma̱a̱ numuu mbá aʼkhá dí nixudami̱jna̱ rí ikhiin na̱nguá nini̱ kiejuunʼ, ga̱jma̱a̱ bi̱ nagimbíi̱n na̱nguá ndiyáá dí ikhiin nini mbá dí Jeobá niʼthí xáguma, 14 mú naguánú nduyáá dí nixudamíjna̱ mbá aʼkhá, bi̱ nagimbíi̱n mbaʼyóoʼ muxnajxi̱i̱ mbáa a̱ʼdá xédí ga̱jma̱a̱ numuu aʼkhá dí nixudamíjna̱, mbaʼyóoʼ magún kuya̱a̱ náa inuu guʼwá xtíin rí nagimbíi̱n. 15 Bi̱ kuya̱ edxu̱u̱ náa xuajin, mbaʼyóoʼ muta̱ma̱ʼ ñawúúnʼ náa edxu̱u̱ xedi̱ náa inuu Jeobá, nda̱wa̱á makhañúu xedi̱ náa inuu Jeobá.

16 Ikhú ndxajkun mato̱ʼo̱o̱ kayóo mbá chíʼgíiʼ eʼdiuu xedi̱ náa awúu̱n guʼwá xtíin rí nagimbíi̱n. 17 Ndxajkun marma̱jan a̱ʼdióo ñawúunʼ ga̱jma̱a̱ eʼdi, nda̱wa̱á maxtíjyooʼ mbá juwan nuthu ga̱jma̱a̱ eʼdi náa inuu Jeobá náa níjniúu cortina. 18 Nda̱wa̱á ndxajkun maxtajmuu mbá chíʼgíiʼ eʼdi náa chi̱jyu̱u̱ʼ dí nakarámáʼ dí ndataun, dí gíʼ náa inuu Jeobá náa awúu̱n guʼwá xtíin dí nagimbíi̱n. Eʼdiuu xedi̱ rí xóó gáguanúu magadíri̱ga̱ náa rajkhúu dí nakarámáʼ tsigijñaʼ, dí gíʼ náa inuu guʼwá xtíin rí nagimbíi̱n. 19 Maguwíi xúgíʼ sébúu xedi̱ ga̱jma̱a̱ magruaʼmá náa nakarámáʼ tsigijñaʼ mu maʼni gúniúu. 20 Maʼni ikháá kayuuʼ xó má nagumaa xedi̱ bi̱ nijuixnájxi̱i̱ ga̱jma̱a̱ numuu aʼkhá. Xúʼko̱ gíʼmaa maʼni. Ndxajkun maʼni kaʼwi̱i̱ aʼkhúún xa̱bu̱ xuajin ga̱jma̱a̱ Dios maʼni mba̱a̱ a̱jkiu̱u̱n kaʼñún. 21 Ikhaa maʼga kayáa xedi̱ náa rexo̱o̱ dí gíi̱nʼ mu matsikháa xó má nitsikháa timbáa xedi̱. Nindxu̱u̱ mbá tsigijñaʼ rí nijuixnájxi̱ mu majngudi̱i̱ aʼkhúún bi̱ nagimbíi̱n.

22 Á mu mbáa bi̱ kayá edxu̱u̱ náa xuajin nakudaminaʼ mbá aʼkhá, mú tséʼni kiejuunʼ ga̱jma̱a̱ nagiʼdoo aʼkhúun numuu rí niʼni mbá rí Jeobá Dios niʼthí dí xáguma, 23 o á mu na̱jka̱nú ndaʼyoo rí nikudaminaʼ mbá aʼkhá numuu rí táʼnimbo̱o̱ mbá kiʼtáñajunʼ, ikhú mbaʼyóoʼ maʼga kayáa mbáa a̱ʼdá tsújtuunʼ májáanʼ xóo tsigijñaʼ. 24 Matámáʼ ñawúunʼ náa edxu̱u̱ a̱ʼdá tsújtuunʼ ga̱jma̱a̱ maxíyáa náa nakháñún xujkhúʼ bi̱ najuixnájxi̱i̱n xóo tsigijñaʼ gamajkhu dí nakarámáʼ náa inuu Jeobá. Nindxu̱u̱ mbá tsigijñaʼ dí najuixnájxi̱ ga̱jma̱a̱ numuu aʼkhá. 25 Ndxajkun mbaʼyóoʼ maríya̱ʼ ga̱jma̱a̱ a̱ʼdióo ñawúunʼ mbá chíʼgíiʼ eʼdiuu tsigijñaʼ dí najuixnájxi̱ ga̱jma̱a̱ numuu aʼkhá mu maxtájmuu náa chi̱jyu̱u̱ʼ dí nakarámáʼ tsigijñaʼ, eʼdi dí xóó gáguanúu maxídiri̱ga̱ náa rajkhúu dí nakarámáʼ tsigijñaʼ. 26 Ma̱ngaa magruaʼmáʼ xúgíʼ sébú náa nakarámáʼ tsigijñaʼ mu maʼni gúniúu, xó má niʼni ga̱jma̱a̱ sébú ndrígóo tsigijñaʼ dí tsímáá. Ndxajkun maʼni kaʼwi̱i̱ aʼkhúun xa̱bu̱ ga̱jma̱a̱ Dios maʼni mba̱a̱ a̱jkiu̱u̱n kaʼyoo.

27 Á mu mbáa xa̱bu̱ bi̱ xtáa náa xuajin* nakudaminaʼ mbá aʼkhá, mú tséʼni kiejuunʼ, nagiʼdoo aʼkhúun numuu dí niʼni mbá dí Jeobá niʼthí dí xáguma 28 o á mu na̱jkha̱nú ndaʼyoo dí nikudaminaʼ mbá aʼkhá, ikhú mbaʼyóoʼ maʼga kayáa mbáa a̱ʼdá tsújtuunʼ e̱ʼgú bi̱ májáanʼ xóo tsigijñaʼ ga̱jma̱a̱ numuu aʼkhá dí nikudaminaʼ. 29 Matámáʼ ñawúunʼ náa edxu̱u̱ tsigijñaʼ dí majuixnájxi̱ ga̱jma̱a̱ numuu aʼkhá, ma̱ngaa maxíyáa ikhí má náa nakháñún xujkhúʼ bi̱ najuixnájxi̱i̱n xóo tsigijñaʼ dí nakarámáʼ. 30 Ndxajkun maríya̱ʼ mbá chíʼgíiʼ eʼdi ga̱jma̱a̱ a̱ʼdióo ñawúunʼ mu maxtájmuu náa chi̱jyu̱u̱ʼ náa nakarámáʼ tsigijñaʼ, eʼdi dí xóó gáguanúu maxídiri̱ga̱ náa rajkhúu dí nakarámáʼ tsigijñaʼ. 31 Maguwíi xúgíʼ sébú dí gíʼdoo tsigijñaʼ rígi̱, xó má nagájnuu sébúu tsigijñaʼ dí tsímáá. Ndxajkun magruaʼmáʼ náa inuu dí nakarámáʼ tsigijñaʼ mu maʼni gúniúu mbá rí mitsaanʼ* ndataun eʼyoo Jeobá. Ndxajkun maʼni kaʼwi̱i̱ aʼkhúun ikhaa mu xúʼko̱ Dios maʼni mba̱a̱ a̱jkiu̱u̱n kaʼyoo.

32 Mú, á mu ikhaa naxnájxi̱ xóo tsigijñaʼ ga̱jma̱a̱ numuu aʼkhá, mbáa a̱ʼdá múgú, mbaʼyóoʼ mani̱ndxu̱u̱ mbáa mugu̱ e̱ʼgú bi̱ májáanʼ. 33 Matámáʼ ñawúunʼ náa edxu̱u̱ tsigijñaʼ dí najuixnájxi̱ ga̱jma̱a̱ numuu aʼkhá, maxíyáa xóo tsigijñaʼ ga̱jma̱a̱ numuu aʼkhá náa nakháñún xujkhúʼ bi̱ majmiin xóo tsigijñaʼ dí nakarámáʼ. 34 Ndxajkun mbaʼyóoʼ maríya̱ʼ ga̱jma̱a̱ a̱ʼdióo ñawúunʼ mbá chíʼgíiʼ eʼdiuu tsigijñaʼ dí najuixnájxi̱ ga̱jma̱a̱ numuu aʼkhá mu maxtájmuu náa chi̱jyu̱u̱ʼ dí nakarámáʼ tsigijñaʼ, eʼdi dí xóó gáguanúu maxídiri̱ga̱ náa rajkhúu dí nakarámáʼ tsigijñaʼ. 35 Maguwíi xúgíʼ sébúu xó má niguwíi sébúu mugu̱ bi̱ nijuixnájxi̱i̱ náa tsigijñaʼ dí tsímáá. Ndxajkun mbaʼyóoʼ magruaʼmáʼ náa nakarámáʼ tsigijñaʼ mu maʼni gúniúu, náa tsu̱du̱u̱ tsigijñaʼ dí nakha náa inuu Jeobá. Ndxajkun maʼni kaʼwi̱i̱ aʼkhá dí xa̱bu̱ nikudaminaʼ, ga̱jma̱a̱ Dios maʼni mba̱a̱ a̱jkiu̱u̱n kaʼyoo.

5 Á mu mbáa najuatsaʼwáá mu maʼthí rí ndiʼyoo o niʼdxaun mbá dí ra̱májánʼ ga̱jma̱a̱ ikhaa tsíyoo gaʼthí, nakudaminaʼ mbá aʼkhá ga̱jma̱a̱ kaʼyoo maʼni numa̱a̱ aʼkhúun.

2 Á mu mbáa xa̱bu̱ nagugua mbá rí mitsaga, tséʼniuu á mu xuyuuʼ mbáa xujkhú xáná bi̱ tsagaa bi̱ nikháñuu, xuyuuʼ mbáa xujkhú kraʼdaa bi̱ tsagaa bi̱ nikháñuu o xuyuuʼ mbáa xujkhú’ tsagaa bi̱ nagún mbá jnduʼ náa tsu̱du̱u̱ ku̱ba̱ʼ, xa̱bu̱ bugi̱ nanindxu̱u̱ mitsagaa ma̱ngaa nagiʼdoo aʼkhúun, maski ajndu ikhaa tséʼyoo. 3 Á mu mbáa asndu na̱nguá nikumu̱u̱ xóo nigugua rí mitsaga dí ma̱ndoo maʼni tsagaminaʼ ga̱jma̱a̱, nda̱wa̱á na̱jkha̱núu ndaʼyoo, ikhú na̱jkha̱nú nagiʼdoo aʼkhúun.

4 Á mu mbáa, mbá nacha̱á naxná ajngóo, tséʼniuu á mu májánʼ o ra̱májánʼ, mu nda̱wa̱á na̱jkha̱nú ndaʼyoo dí mbá nacha̱á niraʼwíí dí maʼni, xa̱bu̱ buʼko̱ nagiʼdoo aʼkhúun.*

5 Á mu mbáa nagiʼdoo aʼkhúun ga̱jma̱a̱ numuu rígi̱, ikhaa mbaʼyóoʼ maʼthí náa rí nikiéʼkhun. 6 Ma̱ngaa maʼga̱ kayóo mbá tsigijñaʼ náa inuu Jeobá ga̱jma̱a̱ numuu rí nikiéʼkúun, xóo muʼthá, maʼga̱ kayáa mbáa mugu̱ e̱ʼgú o tsu̱jtuunʼ e̱ʼgú xóo tsigijñaʼ ga̱jma̱a̱ numuu aʼkhá. Nda̱wa̱á ndxajkun maʼni kaʼwi̱i̱ aʼkhúun.

7 Á mu na̱nguá gíʼdoo mu maxnájxi̱i̱ mbáa mugu̱, mbaʼyóoʼ maʼga̱ kagui̱i̱n a̱jmi̱i̱n gúgu̱ o a̱jmi̱i̱n e̱jín paloma náa inuu Jeobá xóo tsigijñaʼ ga̱jma̱a̱ numuu rí nikiéʼkúun, mbáa ñu̱ʼu̱ maxnájxi̱i̱ ga̱jma̱a̱ numuu aʼkhá ga̱jma̱a̱ imba̱a̱ maxnájxi̱i̱ xóo tsigijñaʼ dí nakarámáʼ. 8 Mbaʼyóoʼ maʼga kagui̱i̱n ñu̱ʼu̱ náa ndxajkun, bi̱ maxnájxi̱ ginii nindxu̱u̱ ga̱jma̱a̱ numuu aʼkhá. Ikhaa marujtu aphuu ga̱jma̱a̱ xngáñúuʼ mú xáʼyóoʼ marígú edxu̱u̱. 9 Ga̱jma̱a̱ maxtíjyóoʼ náa níjniúu dí nakarámáʼ tsigijñaʼ ga̱jma̱a̱ mbá chíʼgíiʼ* eʼdiuu tsigijñaʼ dí najuixnájxi̱ ga̱jma̱a̱ numuu aʼkhá, mú eʼdi rí gáguanúu maxídiri̱ga̱ náa rajkhúu dí nakarámáʼ tsigijñaʼ. Nindxu̱u̱ mbá tsigijñaʼ rí najuixnájxi̱ ga̱jma̱a̱ numuu aʼkhá. 10 Ikhaa maxnájxi̱i̱ imba̱a̱ ñu̱ʼu̱ xóo tsigijñaʼ dí nakarámáʼ, maguma ikháá má xóo má kaʼyoo maguma. Ndxajkun maʼni kaʼwi̱i̱ aʼkhúun dí nikudaminaʼ ga̱jma̱a̱ Dios maʼni mba̱a̱ a̱jkiu̱u̱n kaʼyoo.

11 Á mu ikhaa na̱nguá gíʼdoo, maxníin a̱jmi̱i̱n gúgu̱ o a̱jmi̱i̱n e̱jín paloma, ma̱ndoo maʼga̱ kagu̱u̱ mbá kilo* harina dí itháan májánʼ xóo tsigijñaʼ ga̱jma̱a̱ numuu aʼkhá rí nikudaminaʼ. Xáʼyóoʼ mataxtrámaʼ aceite ni má olíbano, numuu rí nindxu̱u̱ tsigijñaʼ rí majuixnájxi̱ ga̱jma̱a̱ numuu aʼkhá. 12 Ikhaa mbaʼyóoʼ maʼga̱ kayóo tsigijñaʼ náa ndxajkun ga̱jma̱a̱ ndxajkun maríya̱ʼ mbá ñawúunʼ harina dí itháan májánʼ mu magrigu náa nakarámáʼ tsigijñaʼ, mu maʼni gúniúu náa tsu̱du̱u̱ tsigijñaʼ rí najuixnájxi̱ dí nakha náa inuu Jeobá, mu xúʼko̱ ikhaa mamajkhuu xúgíʼ tsigijñaʼ. Nindxu̱u̱ mbá tsigijñaʼ dí najuixnájxi̱ ga̱jma̱a̱ numuu aʼkhá. 13 Ndxajkun maʼni kaʼwi̱i̱ aʼkhá dí ikhaa nikudaminaʼ, asndu káʼníí má aʼkhá rí nikudaminaʼ, ikhaa maguma mba̱a̱ a̱jkiu̱ún kuyáá. Dí gáguanúu náa tsigijñaʼ mani̱ndxu̱u̱ ndrígóo ndxajkun xóo má naguma ga̱jma̱a̱ tsigijñaʼ dí tsígáʼ›”.

14 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 15 “Á mu mbáa tséʼnimbo̱o̱ kaʼyoo Dios mú tséʼni kiejuunʼ numuu rí tséjmuu májánʼ dí nijuixnáxi̱ náa inuu Jeobá, ikhaa mbaʼyóoʼ maʼga kayáa mbáa mugu̱ e̱jmba̱a̱ bi̱ májáanʼ náa inuu Jeobá xóo tsigijñaʼ ga̱jma̱a̱ numuu rí nikiéʼkúun. Ndxajkun maʼthí nguáthá gaʼni numuu mugu̱ ga̱jma̱a̱ mbújkha̱a̱ plata gíʼmaa maʼni ki̱wu̱n xóo má rí najmaa náa rí mikaʼwu. 16 Ikhaa mbaʼyóoʼ maʼni numuu aʼkhá dí nikudaminaʼ numuu rí tájmuu májánʼ rí nijuixnáxi̱ mu majmaa náa rí mikaʼwu mú mbaʼyóoʼ magrígúu 20 por ciento itháan. Maxnúu xúgíʼ ndxajkun mu xúʼko̱ ndxajkun maʼni kaʼwi̱i̱ aʼkhúun ga̱jma̱a̱ maxniúu mugu̱ e̱jmba̱a̱ xóo tsigijñaʼ ga̱jma̱a̱ numuu rí nikiéʼkúun, mu xúʼko̱ Dios maʼni mba̱a̱ a̱jkiu̱u̱n kaʼyoo.

17 Á mu mbáa nakudaminaʼ aʼkhá ga̱jma̱a̱ naʼni mbá rí Jeobá naʼthí rí xáguma, maski ajndu tséʼyoo, ikhaa magiʼdoo aʼkhúun ga̱jma̱a̱ maʼni núma̱a̱ dí raʼkhí niʼni. 18 Gíʼmaa maʼga kayáa náa ndxajkun mbáa mugu̱ e̱jmba̱a̱ bi̱ májáanʼ, ndxajkun gíʼmaa mbaʼyoo nguáthá numuu gíʼmaa maʼni. Ikhú ndxajkun maʼni kaʼwi̱i̱ aʼkhúun numuu rí niʼni mbá rí na̱nguá nindoo ga̱jma̱a̱ táʼyoo xóo niʼni ga̱jma̱a̱ ikhaa maguma mba̱a̱ a̱jkiu̱ún kuyáá. 19 Nindxu̱u̱ tsigijñaʼ ga̱jma̱a̱ numuu rí nikiéʼkúun. Numuu rí nikudaminaʼ aʼkhá náa Jeobá”.

6 Jeobá niʼthúu̱n Moisés: 2 “Á mu mbáa nakudaminaʼ aʼkhá ga̱jma̱a̱ tsiwi̱ji̱ jmbu náa Jeobá numuu rí niʼni nduwaaʼ ndxájuu, índo̱ naʼni kúwóoʼ rí nixnájxu̱u̱ mañewu̱u̱n, 3 o á mu nixka̱ma̱a̱ mbá rí nindáti̱ga̱, mú naʼthí rí na̱nguá ndiyáa ga̱jma̱a̱ naxná ajngóo rí gajkhun nindxu̱u̱ náa nduwaʼ rí xtáa raʼni, rígi̱ dí gíʼmaa maguma: 4 Á mu naʼni mbá aʼkhá xóo rígi̱ ga̱jma̱a̱ nagiʼdoo aʼkhúun, gíʼmaa maxnájxi̱i̱ dí niʼni kúwáʼ, dí nirígú káyúuʼ ndxájuu rí nixnájxu̱u̱ mañewu̱u̱n, mbá rí nindáti̱ga̱ rí ikhaa nixkamaa, 5 o asndu káʼnii ma rí ikhaa nikánáán ga̱jma̱a̱ nduwaʼ rí niʼni, mbaʼyóoʼ maxnájxi̱i̱ xúgíʼ ga̱jma̱a̱ magrígúu 20 por ciento itháan. Maxnájxi̱i̱ bi̱ ndrígóo índo̱ guxkamaa rí ikhaa gíʼdoo aʼkhúun. 6 Gíʼmaa maxnájxi̱ mbá tsigijñaʼ ga̱jma̱a̱ numuu rí nikiéʼkúun náa inuu Jeobá. Ga̱jma̱a̱ numuu aʼkhúun, maʼga kayáa náa ndxajkun mbáa mugu̱ e̱jmba̱a̱ bi̱ májáanʼ bi̱ numuu xó má gáʼthí ikhaa, xúʼko̱ numuu gíʼmaa maʼni tsigijñaʼ rí maxnájxi̱ ga̱jma̱a̱ rí nikiéʼkúun. 7 Ndxajkun maʼni kaʼwu̱u̱ aʼkhúun náa inuu Jeobá, ga̱jma̱a̱ magumaa mba̱a̱ a̱jkiu̱ún kuyáá asndu xú kaʼníí má rí ikhaa nikiéʼkhun”.

8 Jeobá niʼtámíjná ma xúʼko̱ ga̱jma̱a̱ Moisés. Niʼthúu̱n: 9 “Araxnáá kiʼtáñajunʼ rígi̱ Aarón gajmíi̱n e̱ji̱i̱n, arathún: ‹Rígi̱ nindxu̱u̱ xtángoo ndrígóo tsigijñaʼ dí nakarámáʼ. Tsigijñaʼ rígi̱ mbaʼyóoʼ mi̱kha má xúʼko̱ náa aguʼ rí grígu náa nakarámáʼ tsigijñaʼ kañiiʼ mbruʼun asndu miʼcha̱ rí imbo̱o̱ néjtsuu, aguʼ rígi̱ ragíʼmaa majuiʼyúuʼ náa nakarámáʼ tsigijñaʼ. 10 Ndxajkun magíiʼ xtíñuu rí niguma ga̱jma̱a̱ lino rí májánʼ, marugoo xuyuuʼ ga̱jma̱a̱ jma̱wu̱n rí chíʼgíiʼ* rí niguma ga̱jma̱a̱ lino. Nda̱wa̱á maríya̱a̱ʼ idiuuʼ tsigijñaʼ rí nikarámáʼ náa najuixnáxi̱ tsigijñaʼ ma̱ngaa magíʼ náa mbá níjniúu dí nakarámáʼ tsigijñaʼ. 11 Ikhú maríya̱a̱ʼ xtíñuu ga̱jma̱a̱ magíiʼ imbo̱o̱, maʼga kayóo eʼdi náa mbaaʼ dí mikaʼwu náa rexo̱o̱ rí giáa̱nʼ. 12 Mbaʼyóoʼ mi̱kha má xúʼko̱ aguʼ náa nakarámáʼ tsigijñaʼ. Xáʼyóoʼ majuiʼyúuʼ. Mámbá miʼcha̱, ndxajkun mbaʼyóoʼ magruiʼyáʼ má xúʼko̱ ixi̱ ikhí ga̱jma̱a̱ magrígu tsigijñaʼ rí mikarámáʼ ma̱ngaa sébúu tsigijñaʼ dí tsímáá* mu maʼni gúniúu. 13 Aguʼ mbaʼyóoʼ mi̱kha má xúʼko̱ náa nakarámáʼ tsigijñaʼ. Xáʼyóoʼ majuiʼyúuʼ.

14 Rígi̱ nindxu̱u̱ xtángoo ndrígóo tsigijñaʼ rí tsígáʼ. Ikháanʼla, e̱ji̱i̱n Aarón, kaʼyála muxnajxí náa inuu Jeobá náa tsu̱du̱u̱ dí nakarámáʼ tsigijñaʼ. 15 Mbáa rí ikhaa mbaʼyóoʼ maríya̱ʼ mbá ñawúunʼ harina dí itháan májánʼ ndrígóo tsigijñaʼ rí tsígáʼ ga̱jma̱a̱ aceite ma̱ngaa olíbano dí grígu náa tsu̱du̱u̱ tsigijñaʼ rí tsígáʼ, magrígu mi̱kha náa nakarámáʼ tsigijñaʼ mu maʼni gúniúu, mbá tsigijñaʼ rí mitsaanʼ* ndataun eʼyoo Jeobá mu xúʼko̱ ikhaa mamajkhuu xúgíʼ tsigijñaʼ. 16 Aarón gajmíi̱n e̱ji̱i̱n mu̱phu̱ rí niguanúu náa tsigijñaʼ rí nijuixnájxi̱. Mu̱phu̱ xóo pan dí ragíʼdoo levadura náa rí mikaʼwu. Muphiʼtsu náa rexo̱o̱ guʼwá xtíin rí nagimbíi̱n. 17 Xáʼyóoʼ mataxuʼmbúʼ nimbá ga̱jma̱a̱ rí gíʼdoo levadura. Maxnu̱u̱n ikhiin rí kaʼñúún náa tsigijñaʼ ndrígóʼ rí nakarámáʼ. Nindxu̱u̱ mikaʼwu wéñuuʼ, xó má tsigijñaʼ rí najuixnájxi̱ ga̱jma̱a̱ numuu aʼkhá ma̱ngaa tsigijñaʼ rí najuixnájxi̱ índo̱ mbáa nakiéʼkúun. 18 Mu̱phu̱ xúgíinʼ e̱ji̱i̱n Aarón bi̱ ni̱ndxu̱ún xa̱bekha. Ikhiin kaʼñúún mu̱phu̱ tsigijñaʼ rí najuixnáxi̱ mikarámáʼ náa inuu Jeobá náa xúgíinʼ bi̱ gáguwáʼ rakuwa nda̱wa̱á. Asndu tsáá bi̱ gáxkajma tsigijñaʼ maʼga̱nú mani̱ndxu̱u̱ mikaʼwii›”.

19 Jeobá nitanga̱a̱ niʼtámíjná ga̱jma̱a̱ Moisés, niʼthúu̱n: 20 “Rígi̱ nindxu̱u̱ tsigijñaʼ rí maxnájxi̱ Aarón gajmíi̱n e̱ji̱i̱n náa inuu Jeobá mbiʼi rí ikhaa maxtiyáaʼ: Maxnájxi̱ mbá kilo* harina dí itháan májánʼ xóo tsigijñaʼ ndrígóo tsígáʼ, mbá ta̱pha̱ gáxnájxi̱ miʼcha̱ ga̱jma̱a̱ mbá ta̱pha̱ gaxnájxi̱ wakhíʼ. 21 Matani̱ májáánʼ ga̱jma̱a̱ aceite ma̱ngaa matrígu náa inuu ejui̱i̱. Matandáwáa’ májánʼ aceite ga̱jma̱a̱ mi̱dxu̱ʼ jcháa’ maraxnajxí ma̱ngaa matrujku rí nigu̱ʼ rígi̱, mani̱ndxu̱u̱ mbá tsigijñaʼ rí tsígáʼ xó mbá tsigijñaʼ rí mitsaan’ ndataun eʼyoo Jeobá. 22 Ndxajkun bi̱ nixtiyáaʼ náa e̱ji̱i̱n Aarón bi̱ mariʼkuriya̱a̱ʼ ikhaa maxnájxi̱ tsigijñaʼ rígi̱. Nindxu̱u̱ mbá kiʼtáñajunʼ rí mbajyúuʼ asndu kámuu: Xúgíʼ tsigijñaʼ mbaʼyóoʼ magri̱gu maʼni gúniúu náa inuu Jeobá. 23 Xúgíʼ tsigijñaʼ rí tsígáʼ dí najuixnáxi̱ ga̱jma̱a̱ numuu mbáa ndxajkun gíʼmaa majuixnáxi̱ xúgíʼ. Xáʼyóoʼ mu̱phu̱”.

24 Jeobá nitanga̱a̱ niʼtámíjná ga̱jma̱a̱ Moisés ma̱ngaa niʼthúu̱n: 25 “Aratháán Aarón gajmíi̱n e̱ji̱i̱n: ‹Rígi̱ nindxu̱u̱ xtángoo ndrígóo tsigijñaʼ rí najuixnáxi̱ ga̱jma̱a̱ numuu aʼkhá. Xujkhú’ bi̱ majuixnáxi̱i̱ ga̱jma̱a̱ numuu aʼkhá mbaʼyóoʼ makhañúu náa inuu Jeobá náa má nuradíin bi̱ najuixnájxi̱i̱n xóo tsigijñaʼ dí mikarámáʼ. Numuu rí nindxu̱u̱ mikaʼwu wéñuuʼ. 26 Ndxajkun bi̱ gáxnájxi̱ ma̱ndoo mi̱khu̱ mbá chíʼgíiʼ tsigijñaʼ rí nixnájxi̱ ga̱jma̱a̱ numuu aʼkhá. Mi̱khu̱ náa rí nindxu̱u̱ mikaʼwu, náa rexo̱o̱ guʼwá xtíin rí nagimbíi̱n.

27 Asndu tsáá bi̱ gáxkajma tsigijñaʼ rígi̱ mani̱ndxu̱u̱ mikaʼwii, á mu mbáa nagu̱u̱ eʼdiuu tsigijñaʼ xtíñuu, mbaʼyóoʼ majñarígu̱u̱ náa nigu eʼdi náa rí nindxu̱u̱ mikaʼwu. 28 Á mu xuwiʼ ni̱ʼga̱ ga̱jma̱a̱ mbá daan ku̱ba̱ʼ mbaʼyóoʼ mawiʼtá, á mu ni̱ʼga̱ ga̱jma̱a̱ mbá daan ajua̱nʼ* mbaʼyóoʼ miʼtáa ga̱jma̱a̱ maga̱ʼwu̱u̱.

29 Mu̱phu̱ xúgíinʼ xa̱bekha bi̱ ni̱ndxu̱ún ndxajkun. Numuu rí nindxu̱u̱ mikaʼwu wéñuuʼ. 30 Mú, ragíʼmaa mu̱phu̱ nimbá tsigijñaʼ rí najuixnáxi̱ ga̱jma̱a̱ numuu aʼkhá á mu eʼdiuu na̱jkha̱ kiʼyá náa awúu̱n guʼwá xtíin rí nagimbíi̱n náa rí nindxu̱u̱ mikaʼwu mú majngudi̱i̱ ga̱jma̱a̱ aʼkhá. Mbaʼyóoʼ mi̱kha.

7 Rígi̱ nindxu̱u̱ xtángoo ndrígóo tsigijñaʼ dí majuixnájxi̱ índo̱ mbáa nakiéʼkúun. Nindxu̱u̱ mbá rí mikaʼwu wéñuuʼ. 2 Mbaʼyóoʼ muxiyáa xujkhúʼ bi̱ muxnajxi̱i̱ xóo tsigijñaʼ ga̱jma̱a̱ numuu rí mbáa nikiéʼkúun náa nakháñun xujkhúʼ bi̱ najuixnájxi̱i̱n xóo tsigijñaʼ dí nakarámáʼ, eʼdi mbaʼyóoʼ muxtijyáá náa mbájndi nakarámáʼ tsigijñaʼ. 3 Ikhaa maxnájxi̱ xúgíʼ sébú, xóo tsiyuuʼ dí gíʼdoo sébú ma̱ngaa dí gíʼdoo náa chámbóo. 4 Mbá nájma̱ riñón ga̱jma̱a̱ sébú dí gíʼdoo ikhí. Mbóó gaguwíi riñón ga̱jma̱a̱ sébú dí gíʼdoo náa xkígoo. 5 Ndxajkun masngutámáʼ xúgíʼ rígi̱ náa nakarámáʼ tsigijñaʼ mu maʼni gúniúu xóo mbá tsigijñaʼ gamajkhu dí nakha náa inuu Jeobá. Nindxu̱u̱ mbá tsigijñaʼ ga̱jma̱a̱ numuu rí mbáa nikiéʼkúun. 6 Mu̱phu̱ xúgíinʼ ndxajkun bi̱ ni̱ndxu̱ún xa̱bekha. Mbaʼyóoʼ mu̱phu̱ náa rí mikaʼwu. Nindxu̱u̱ mbá dí mikaʼwu wéñuuʼ. 7 Ikháá má xtángoo rí mbaʼyóoʼ maguma mbáníí índo̱ najuixnájxi̱ tsigijñaʼ ga̱jma̱a̱ numuu aʼkhá ga̱jma̱a̱ tsigijñaʼ índo̱ mbáa nakiéʼkúun. Xuyuuʼ xujkhúʼ bi̱ majuixnájxi̱i̱ xóo tsigijñaʼ ma̱ndoo maguanúu ga̱jma̱a̱ ndxajkun bi̱ maʼni kaʼwi̱i̱ aʼkhá.

8 Índo̱ ndxajkun gáxnájxi̱ tsigijñaʼ dí nakarámáʼ ga̱jma̱a̱ numuu mbáa, maguanúu ga̱jma̱a̱ xtóo tsigijñaʼ rí nijuixnájxi̱.

9 Xúgíʼ tsigijñaʼ dí nagu̱ʼ náa horno o náa mbá sartén o náa ejui̱i̱ ma̱ndoo maguanúu ga̱jma̱a̱ ndxajkun bi̱ naxnájxi̱. Maʼni ndrígóo ikhaa. 10 Mú xúgíʼ tsigijñaʼ dí tsígáʼ rí kanda̱wo̱o̱ʼ aceite o dí mijxooʼ mbaʼyóoʼ makánún xúgíinʼ e̱ji̱i̱n Aarón, ikháá mba̱a̱ gáʼyóoʼ makánún xúgíinʼ.

11 Rígi̱ nindxu̱u̱ xtángoo ndrígóo tsigijñaʼ dí tsímáá* á mu mbáa naxnájxi̱ náa inuu Jeobá. 12 Á mu naxnájxi̱ tsigijñaʼ rígi̱ numuu rí nandoo maxnáa númaaʼ, mbaʼyóoʼ maxnájxi̱ mbóó ga̱jma̱a̱ pan dijndi dí ragíʼdoo levadura rí niguma ga̱jma̱a̱ aceite, galleta mba̱wi̱ʼ dí ragíʼdoo levadura dí kagu̱u̱ aceite, ma̱ngaa pan dijndi dí niguma ga̱jma̱a̱ harina dí itháan májánʼ, dí kanda̱wo̱o̱ʼ májánʼ dí karma̱jan ga̱jma̱a̱ aceite. 13 Mbóó gáxjnájxi̱ tsigijñaʼ ndrígóo ga̱jma̱a̱ pan dijndi dí gíʼdoo levadura ma̱ngaa tsigijñaʼ dí maxnáa númaaʼ ma̱ngaa tsigijñaʼ dí tsímáá. 14 Náa tsigijñaʼ rígi̱, mbaʼyóoʼ maxnájxi̱ mixtiʼkhu enii pan náa inuu Jeobá xóo mbá dí nindxu̱u̱ mitsúʼkháan. Rígi̱ mani̱ndxu̱u̱ ndrígóo ndxajkun bi̱ maxtíjyaʼ ga̱jma̱a̱ eʼdiuu tsigijñaʼ dí tsímáá. 15 Xuyuuʼ xujkhúʼ bi̱ majuixnájxi̱i̱ xóo tsigijñaʼ dí maxnáa núma̱aʼ ma̱ngaa tsigijñaʼ dí tsímáá, mbaʼyóoʼ mu̱phu̱ ikháá má mbiʼi rí gájuixnájxi̱. Ikhaa xáʼyóoʼ mayéjxi̱i̱ nimbá asndu imbo̱o̱ néjtsu̱u̱.

16 Á mu tsigijñaʼ rí nixnájxi̱ nindxu̱u̱ ga̱jma̱a̱ numuu rí nikudaminaʼ maʼni o numuu rí nigájnuu náa a̱jkiu̱u̱n maxnájxi̱, mbaʼyóoʼ mu̱phu̱ ikháá má mbiʼi rí gajuixnájxi̱, ma̱ngaa ma̱ndoo mu̱phu̱ i̱mba̱ néjtsu̱u̱ rí gápidúúnʼ. 17 Mú índo̱ gáʼni ajtsú mbiʼi mbaʼyóoʼ mi̱kha xuyuuʼ tsigijñaʼ dí gáguanúu. 18 Mú, á mu mbáa gíkhu mbá chíʼgíiʼ* xuyuuʼ tsigijñaʼ dí tsímáá rí nijuixnájxi̱ índo̱ gáʼni ajtsú mbiʼi, xáxtrigú tsigijñaʼ ndrígóo bi̱ nixnájxi̱. Tsigijñaʼ nda̱a̱ rí gáñambáá. Nindxu̱u̱ mbá dí mixkawiʼ ga̱jma̱a̱ xa̱bu̱ bi̱ gíʼkhu mbaʼyóoʼ maʼni núma̱a̱ aʼkhúun. 19 Á mu xuwiʼ gánujngoo rayóo mbá dí mitsaga, xáʼyóoʼ mu̱phu̱. Mbaʼyóoʼ mi̱kha. Xúgíinʼ bi̱ mikaʼwiin ma̱ndoo mu̱phu̱ xuwiʼ dí mikaʼwu.

20 Asndu tsáa xa̱bu̱ bi̱ tsagaa náa iduu Dios ga̱jma̱a̱ na̱ʼkhu̱ xuyuuʼ tsigijñaʼ dí tsímáá dí nindxu̱u̱ ndrígóo Jeobá, mbaʼyóoʼ makhañúu náa xuajñuu. 21 Á mu mbáa nagugua mbá rí mitsaga o mbá rí mixkawiʼ, ga̱jma̱a̱ na̱ʼkhu̱ mbá chíʼgíiʼ tsigijñaʼ dí tsímáá rí nindxu̱u̱ ndrígóo Jeobá, mbaʼyóoʼ makhañúu náa xuajñuu›”.

22 Jeobá niʼtámíjná má xúʼko̱ ga̱jma̱a̱ Moisés. Niʼthúu̱n: 23 “Arathún israelitas: ‹Xúphu̱ sébúu mbáa xedi̱ ni má sébúu mbáa mugu̱ ni má tsu̱jtuunʼ. 24 Sébúu mbáa xujkhúʼ bi̱ nijui̱ʼya̱a̱ nikháñúu o sébúu mbáa xujkhúʼ bi̱ nixíyáa i̱mba̱a̱ xujkhúʼ ma̱ndoo majmala, mú xándoo muphula. 25 Asndu tsáa bi̱ gíkhu̱ sébúu xujkhúʼ rí kaʼyoo mixnájxi̱ xóo tsigijñaʼ gamajkhu rí mi̱kha náa inuu Jeobá, mbaʼyóoʼ makhañúu náa xuajñuu.

26 Asndu náá má rí gákuwáanʼla, xáʼyóoʼ muphula eʼdiuu ñu̱ʼu̱ ni má eʼdiuu nimbáa xujkhúʼ. 27 Asndu tsáa bi̱ gíkhu eʼdi mbaʼyóoʼ makhañúu náa xuajñuu›”.

28 Jeobá niʼtámíjná má xúʼko̱ ga̱jma̱a̱ Moisés: 29 “Arathún israelitas: ‹Asndu tsáa bi̱ gáxnájxi̱ mbá tsigijñaʼ dí tsímáá náa inuu Jeobá, maʼga kayóo mbá chíʼgíiʼ tsigijñaʼ ndrígóo náa inuu Jeobá. 30 Náa ñawúunʼ mbayá gáʼga sébúu xujkhúʼ ga̱jma̱a̱ xuwiʼ tso̱jxto̱o̱ xóo mbá tsigijñaʼ gamajkhu rí mi̱kha náa inuu Jeobá. Maʼbajngaa gi̱i̱ ñuʼún xó mbá tsigijñaʼ rí naʼmbajgaa náa inuu Jeobá. 31 Ndxajkun magruaʼmáʼ sébú náa nakarámáʼ tsigijñaʼ mu maʼni gúní, mú xuwiʼ tso̱xto̱o̱ xujkhúʼ makánáá Aarón gajmíi̱n e̱ji̱i̱n.

32 Ikháanʼla mbaʼyóoʼ muxna̱a̱ ndxajkun rajkhúu mújúunʼ xujkhúʼ bi̱ nixnajxíi xóo tsigijñaʼ dí tsímáá, makánáá ikhaa xóo mbá rí mitsúʼkháan. 33 A̱ʼdióo Aarón bi̱ gáxnájxi eʼdiuu tsigijñaʼ dí tsímáá ga̱jma̱a̱ sébúu, ikhaa makánáá rajkhúu mújúunʼ xujkhúʼ xóo mbá rí kaʼyoo ikhaa. 34 Numuu rí ikhúún maguanúʼ ga̱jma̱a̱ xuwiʼ tso̱xto̱o̱ tsigijñaʼ rí nubajngaa ga̱jma̱a̱ rajkhúu mújúunʼ tsigijñaʼ dí tsímáá rí nindxu̱u̱ mitsúʼkháan dí muxnajxi̱ bi̱ israelitas, rígi̱ na̱xnu̱u̱ ndxajkun Aarón gajmíi̱n e̱ji̱i̱n ma̱ngaa rígi̱ mani̱ndxu̱u̱ mbá xtángoo dí maguma mbáníí asndu kámuu náa israelitas.

35 Rígi̱ nindxu̱u̱ dí makánúún ndxajkun dí magajnúu náa tsigijñaʼ gamajkhu dí mikarámáʼ náa inuu Jeobá, dí niguma wájííʼ makánáá Aarón gajmíi̱n e̱ji̱i̱n nákhá mbiʼi rí nijuixnájxi̱i̱n mani̱ndxu̱ún ndxajkiuun Jeobá. 36 Jeobá niʼtáñajunʼ dí rígi̱ makánúún ikhiin nákhá mbiʼi dí ikhaa niraʼwíin rí muxna israelitas. Kiʼtáñajunʼ rígi̱ mbaʼyóoʼ maguma mbáníí asndu kámuu náa xúgíinʼ e̱jñu̱ún bi̱ maguwáʼ rakúwá›”.

37 Rígi̱ nindxu̱u̱ xtángoo ndrígóo tsigijñaʼ dí nakarámáʼ, tsigijñaʼ dí tsígáʼ, tsigijñaʼ ga̱jma̱a̱ numuu aʼkhá, tsigijñaʼ ga̱jma̱a̱ numuu índo̱ mbáa nakiéʼkúun, tsigijñaʼ rí majuixnájxi̱ índo̱ muda̱ ñajunʼ ndxajkun ga̱jma̱a̱ tsigijñaʼ dí tsímáá, 38 xó má Jeobá niʼtáñajuunʼ Moisés náa kúbá Sinaí, mbiʼi rí niʼthúún israelitas rí muxnajxi̱ tsigijñaʼ gamajkhu ndrígún náa inuu Jeobá náa ku̱ba̱ʼ mijxooʼ* ndrígóo Sinaí.

8 Jeobá niʼtáminaʼ má xúʼko̱ ga̱jma̱a̱ Moisés, niʼthúu̱n: 2 “Ayuʼ ga̱jma̱a̱ʼ Aarón mangiin e̱ji̱i̱n, ayá xtíñuu, ayá aceite rí maxtaʼwíin ga̱jma̱a̱,* xedi̱ bi̱ mixnájxi̱i̱ xóo tsigijñaʼ ga̱jma̱a̱ numuu aʼkhá, a̱jmi̱i̱n mugu̱ ga̱jma̱a̱ mbá canasta náa kajti pan dí ragiʼdoo levadura, 3 arathún xúgíinʼ xa̱bu̱ xuajin dí magimbíin náa riejuun guʼwá xtíin”.

4 Ikha jngóo Moisés niʼni xóo Jeobá niʼthúu̱n, xa̱bu̱ xuajin nigimbíin náa riejuun guʼwá xtíin. 5 Nda̱wa̱á Moisés niʼthún xa̱bu̱ xuajin: “Rígi̱ niʼtáñajunlú Jeobá muʼni”. 6 Ikha jngóo Moisés niʼni dí ma̱ʼkha̱ mijngii Aarón gajmíi̱n e̱ji̱i̱n ga̱jma̱a̱ nitsuwíin. 7 Nda̱wa̱á nixnúu Aarón magíʼ xtíin rí mbi̱jua̱ ma̱ngaa nirajkuáa xtíin smídúu, xúʼko̱ má nixnúu magíiʼ xtíin mbi̱jua̱ rí nda̱a̱ ñawúunʼ ma̱ngaa efod niruʼwáti̱ga̱ ga̱jma̱a̱ xtíin rí kijñaraʼáá mu xúʼko̱ magiʼma jxa̱ʼ. 8 Nda̱wa̱á nigíʼma xtíin rí kaʼyoo magiʼma náa tsoxto̱o̱ ndxajkun, ikhí nigíʼma Urim ga̱jma̱a̱ Tumim.* 9 Ikhú nigrígu xtíin kiejuunʼ náa edxu̱u̱ ma̱ngaa náa inuu xtíin nigíʼma mbá diadema* rí naxpíbiʼ dí niguma ga̱jma̱a̱ mbawíí oro, xó má Jeobá niʼtáñajuunʼ maʼni Moisés.

10 Nda̱wa̱á Moisés niraʼwíí guʼwá xtíin ga̱jma̱a̱ xúgíʼ dí rígá ikhí, nijmuu aceite rí naxtaʼwíin ga̱jma̱a̱, ma̱ngaa niʼni rí mani̱ndxu̱u̱ mitsúʼkháan. 11 Nda̱wa̱á niraʼwíí náa nakarámáʼ tsigijñaʼ, nixtíjyóoʼ mbá juwan nuthu ga̱jma̱a̱ mbá chíʼgíiʼ* aceite, xúʼko̱ má náa najnu̱ʼ iyaʼ ma̱ngaa náa grígu mú maʼni mitsúʼkháan. 12 Nda̱wa̱á kayuuʼ nisngátrámúuʼ aceite dí naxtaʼwíin ga̱jma̱a̱ náa edxu̱u̱ Aarón, mu xúʼko̱ maʼga̱nú mani̱ndxu̱u̱ mbáa bi̱ kaʼyoo Dios.

13 Ikhú Moisés niʼni rí Aarón gajmíi̱nʼ e̱ji̱i̱n maguwáʼ kanuu, nixnúún maguʼwúúnʼ xtíin rí mbi̱jua̱, niroʼóo ga̱jma̱a̱ xtíin smídún, ma̱ngaa nigruaʼmáʼ xtíin náa edxu̱ún, xó má Jeobá niʼtáñajuunʼ maʼni Moisés.

14 Ikhú niʼthún dí magún kuya̱a̱ mbáa xedi̱ mu majuixnájxi̱i̱ xóo tsigijñaʼ ga̱jma̱a̱ numuu aʼkhá, Aarón gajmíi̱n e̱ji̱i̱n nita̱ma̱ʼ ñawúúnʼ náa edxu̱u̱ xedi̱ bi̱ majuixnájxi̱i̱ xóo tsigijñaʼ ga̱jma̱a̱ numuu aʼkhá. 15 Moisés nixíyáa xujkhúʼ ga̱jma̱a̱ náa a̱ʼdióo ñawúunʼ nixtájmuu mbá chíʼgíiʼ eʼdi náa chi̱jyu̱u̱ʼ dí nakarámáʼ tsigijñaʼ ga̱jma̱a̱ niʼni kaʼwi̱i̱ ikhí. Eʼdi rí xóó niguanúu nixídiri̱ga̱ náa rajkhúu dí nakarámáʼ tsigijñaʼ mu maguma kaʼwi̱i̱, mu xúʼko̱ ma̱ndoo maguma kaʼwi̱i̱ aʼkhá ikhí. 16 Nda̱wa̱á niguwíi sébú dí rígá náa chámbóo ma̱ngaa sébú dí gíʼdoo náa xkígóo, mbá nájma̱ riñón ga̱jma̱a̱ sébú dí rígá ikhí, Moisés nisngutámáʼ náa nakarámáʼ tsigijñaʼ mu maʼni gúniúu. 17 Ikhú niʼni rí xúgíiʼ xedi̱, xtóo, xuyuuʼ ga̱jma̱a̱ ambóo, mi̱kha náa rexo̱o̱ rí gíi̱nʼ, xó má Jeobá niʼtáñajuunʼ maʼni Moisés.

18 Nda̱wa̱á niʼni rí maguwáʼ kuya̱a̱ mugu̱ e̱jmba̱a̱ bi̱ majuixnájxi̱ xóo tsigijñaʼ dí nakarámáʼ, Aarón gajmíi̱n e̱ji̱i̱n nita̱ma̱ʼ ñawúúnʼ náa edxu̱u̱ mugu̱. 19 Ikhú Moisés nixíyáa xujkhúʼ ga̱jma̱a̱ nixtíjyooʼ ga̱jma̱a̱ eʼdiuu náa xúgíʼ níjniúu dí nakarámáʼ tsigijñaʼ. 20 Ikhaa nirujkuii mugu̱ e̱jmba̱a̱ ga̱jma̱a̱ Moisés nigrígu edxu̱u̱ mugu̱, xíʼtóo xuyuuʼ ga̱jma̱a̱ sébúu mu maʼni gúniúu. 21 Ikhaa niʼjñá chámbá, xtiyuu ga̱jma̱a̱ Moisés nitámáaʼ mugu̱ e̱jmba̱a̱ náa nakarámáʼ tsigijñaʼ mu maʼni gúniúu. Nindxu̱u̱ mbá tsigijñaʼ dí nakarámáʼ rí mitsaanʼ* ndataun. Mbá tsigijñaʼ gamajkhu dí mi̱kha náa inuu Jeobá xó ma Jeobá niʼtáñajuunʼ maʼni Moisés.

22 Nda̱wa̱á Moisés niʼni rí magún kuya̱a̱ bi̱ maʼni raga̱jmi̱i̱n mugu̱ e̱jmba̱a̱, mugu̱ bi̱ majuixnájxi̱i̱ náa muda ñajunʼ ndxajkun, Aarón gajmíi̱n e̱ji̱i̱n nita̱ma̱ʼ ñawúúnʼ náa edxu̱u̱ mugu̱. 23 Moisés nixíyáa xujkhúʼ ga̱jma̱a̱ nixtájmuu mbá chíʼgíiʼ eʼdi náa riʼyu̱u̱ chaʼwuun mújúunʼ Aarón, ma̱ngaa náa a̱ʼdióo ñawúunʼ mújúunʼ rí mba̱a̱, xúʼko̱ má a̱ʼdióo rajkhúu mújúunʼ rí mba̱a̱. 24 Nda̱wa̱á Moisés niʼthún e̱ji̱i̱n Aarón dí maguwáʼ kanuu ga̱jma̱a̱ nixtájmuu mbá chíʼgíiʼ eʼdi náa riʼyu̱u̱ cháʼwun mújúnʼ rí mba̱a̱ xúʼko̱ má náa a̱ʼdióo ñawún mújúnʼ rí mba̱a̱ ga̱jma̱a̱ náa a̱ʼdióo rajkhú mújúnʼ rí mba̱a̱. Moisés nixtíjyóʼ ga̱jma̱a̱ eʼdi rí xóó niguanúu náa mbá xúgíʼ níjniúu dí nakarámáʼ tsigijñaʼ.

25 Ikhú ndiyá sébú, tsiyúuʼ dí gíʼdoo sébú, xúgíʼ sébú dí gíʼdoo náa chámbóo, sébú dí gíʼdoo náa xkígóo ga̱jma̱a̱ náa mbá nájma̱ riñón ma̱ngaa sébú dí rígá ikhí ga̱jma̱a̱ rajkhú mújúunʼ xujkhúʼ. 26 Niguwíi náa canasta náa kajti pan dí ragíʼdoo levadura dí frígu náa inuu Jeobá, mbá pan dijndi dí ragíʼdoo levadura, mbá pan dijndi dí niguma ga̱jma̱a̱ aceite ma̱ngaa mbá galleta dí mbawiʼ. Nda̱wa̱á nigruaʼmáʼ náa katrámáʼ sébú ga̱jma̱a̱ náa grígu rajkhúu mújúunʼ xujkhúʼ. 27 Nda̱wa̱á nigruaʼmáʼ xúgíʼ rígi̱ náa ñawúunʼ Aarón gajmíi̱n e̱ji̱i̱n, ikhú nigíʼdu̱u̱ niʼbajngaa gi̱i̱ ñuʼún xóo mbá tsigijñaʼ rí nubajngaa náa inuu Jeobá. 28 Moisés nigruigú náa ñawúunʼ ga̱jma̱a̱ nigruaʼmáʼ náa nakarámáʼ tsigijñaʼ mu maʼni gúniúu náa tsu̱du̱u̱ tsigijñaʼ dí nakarámáʼ. Nindxu̱u̱ mbá tsigijñaʼ rí majuixnájxi̱ náa muda ñajunʼ ndxajkun, rí mitsaanʼ ndataun. Nindxu̱u̱ mbá tsigijñaʼ gamajkhu dí nakarámáʼ náa inuu Jeobá.

29 Nda̱wa̱á Moisés ndiyá xuwiʼ tso̱xto̱o̱ mugu̱ ga̱jma̱a̱ niʼbajngaa gi̱i̱ ñuʼún xóo tsigijñaʼ rí nubajngaa náa inuu Jeobá. Mbá chíʼgíiʼ xuyuuʼ mugu̱ rígi̱ rí nijuixnájxi̱ náa nida ñajunʼ ndxajkun, nikhánáá Moisés, xó má Jeobá niʼtáñajuunʼ Moisés maʼni.

30 Ga̱jma̱a̱ mbá chíʼgíiʼ aceite rí naxtaʼwíin ga̱jma̱a̱ ma̱ngaa mbá chíʼgíiʼ eʼdi dí grígu náa nakarámáʼ tsigijñaʼ, Moisés nixtíjyáaʼ Aarón ga̱jma̱a̱ xtíñúu, xúʼko̱ má nixtíjíinʼ e̱ji̱i̱n ga̱jma̱a̱ xtíñún. Xúʼko̱ niʼni kaʼwi̱i̱ Aarón ga̱jma̱a̱ xtíñúu xó má e̱ji̱i̱n ga̱jma̱a̱ xtíñún ikhiin.

31 Ikhú Moisés niʼthúunʼ Aarón gajmíi̱n e̱ji̱i̱n: “Gujíilaʼ xuwiʼ náa riejuun guʼwá xtíin rí nagimbíi̱n. Ikhí mbaʼyóoʼ muphula pan dí kajti náa canasta rí nijmaa náa nida ñajunʼ ndxajkun, xóo má nijuiʼtañajunʼ: ‹Aarón gajmíi̱nʼ e̱ji̱i̱n mu̱phu̱›. 32 Xuwiʼ ga̱jma̱a̱ pan rí gáguanúu gíʼmaa mi̱kha. 33 Xáʼyóoʼ marájñala náa riejuun guʼwá xtíin rí nagimbíi̱n mbá juwan mbiʼi, asndu índo̱ gárámuuʼ mbiʼi rí ni̱dala ñajunʼ xóo ndxajkun, numuu rí mbaʼyóoʼ manújngoo mbá juwan mbiʼi mu matrigáanʼla xóo ndxajkun. 34 Jeobá niʼthí maguma rí niʼnilú xúgi̱ mu maguma kaʼwi̱i̱ aʼkhála. 35 Ikháanʼ maguanála náa riejuun guʼwá xtíin rí nagimbíi̱n mbiʼíí mbruʼun asndu índo̱ gárámuuʼ mbá juwan mbiʼi, mbaʼyóoʼ munimbáníí dí kaʼyala náa Jeobá, mu xúʼko̱ xákháñala, numuu rí xúʼko̱ nijuiʼtáñajunʼ maguma”.

36 Aarón gajmíi̱n e̱ji̱i̱n nini̱ xúgíʼ xó má Jeobá niʼtáñajuunʼ Moisés maguma.

9 Índo̱ niʼni migiñuʼ mbiʼi, Moisés nindxaʼwóo Aarón gajmíi̱n e̱ji̱i̱n ma̱ngaa bi̱ kuya̱ edxu̱u̱ náa Israel. 2 Ikhú niʼthúu̱n Aarón: “Ayáa mbáa a̱ʼdá xédí bi̱ májáanʼ mu maraxnaxíi xóo tsigijñaʼ ga̱jma̱a̱ numuu aʼkhá ma̱ngaa mbáa mugu̱ e̱jmba̱a̱ xóo tsigijñaʼ dí mikarámáʼ, araxnájxi̱ náa inuu Jeobá. 3 Mú bi̱ israelitas marathu̱u̱n: ‹Guraʼwi̱i̱ mbáa chivátu* xóo tsigijñaʼ ga̱jma̱a̱ numuu aʼkhá, mbáa a̱ʼdá xédí ga̱jma̱a̱ mbáa mugu̱, gíʼmaa mani̱ndxu̱ún míjíinʼ* ga̱jma̱a̱ maguaʼdáá mbá tsigúúnʼ. Majuixnájxi̱i̱n xóo tsigijñaʼ dí nakarámáʼ, 4 ma̱ngaa muxnajxíi náa inuu Jeobá mbáa xedi̱ ga̱jma̱a̱ mbáa mugu̱ e̱jmba̱a̱ xóo tsigijñaʼ dí tsímáá,* xúʼko̱ má tsigijñaʼ dí tsígáʼ dí kanda̱wo̱o̱ʼ aceite, numuu rí xúgi̱ makujmaa Jeobá náa ikháanʼla›”.

5 Ikha jngóo nigún kudúún xúgíʼ rígi̱ náa riejuun guʼwá xtíin dí nagimbíi̱n xó má Moisés niʼtáñajunʼ. Nda̱wa̱á xúgíinʼ xa̱bu̱ xuajin nixuʼmamijná ga̱jma̱a̱ niguájun náa inuu Jeobá. 6 Moisés niʼthún: “Rígi̱ dí Jeobá niʼtáñajunʼ mu̱nila mu mbu̱ya̱a̱ aguʼ dí naxpíbínʼ ndrígóo Jeobá”. 7 Ikhú Moisés niʼthúu̱n Aarón: “Ayuʼ kanuu náa nakarámáʼ tsigijñaʼ ga̱jma̱a̱ araxnájxi̱ tsigijñaʼ ga̱jma̱a̱ numuu aʼkhá ma̱ngaa tsigijñaʼ ndrígáaʼ dí mikarámáʼ, atani̱ kaʼwi̱i̱ aʼkháanʼ ga̱jma̱a̱ aʼkhúún bi̱ kúwá náa guʼwáaʼ, ma̱ngaa araxnájxi̱ tsigijñaʼ ndrígu̱ún xa̱bu̱ xuajin, atani̱ kaʼwi̱i̱ aʼkhúún ikhiin xó má Jeobá niʼtáñajunʼ”.

8 Nacha̱ má Aarón nijkha náa nakarámáʼ tsigijñaʼ, nixíyáa a̱ʼdá xédí bi̱ majuixnájxi̱i̱ xóo tsigijñaʼ ga̱jma̱a̱ numuu aʼkhá. 9 Ikhú e̱ji̱i̱n Aarón niguwáʼ kuñu̱u̱n eʼdi, ikhaa nirmajan a̱ʼdióo ñawúunʼ ga̱jma̱a̱ eʼdi nda̱wa̱á nixtájmuu náa chi̱jyu̱u̱ʼ dí nakarámáʼ tsigijñaʼ. Nda̱wa̱á nixídiri̱ga̱ eʼdi dí xóó niguanúu náa rajkhúu dí nakarámáʼ tsigijñaʼ. 10 Nigrígu sébú náa nakarámáʼ tsigijñaʼ mu maʼni gúní, xúʼko̱ má riñón ga̱jma̱a̱ sébú dí gíʼdoo náa xkígoo xujkhúʼ bi̱ nijuixnájxi̱i̱ xóo tsigijñaʼ ga̱jma̱a̱ numuu aʼkhá, xó má Jeobá niʼtáñajuunʼ Moisés. 11 Xuyuuʼ ga̱jma̱a̱ xtóo nitsikhá náa rexo̱o̱ dí gíi̱nʼ.

12 Nda̱wa̱á Aarón nixíyáa xujkhúʼ bi̱ maxnájxi̱i̱ xóo tsigijñaʼ dí nakarámáʼ. E̱ji̱i̱n nixnáá eʼdi ga̱jma̱a̱ ikhaa nixtíjyooʼ náa mbájndi níjniúu dí nakarámáʼ tsigijñaʼ. 13 Ikhiin nixnáá xíʼtoo tsigijñaʼ dí nakarámáʼ ma̱ngaa edxu̱u̱, ikhaa nisngutámáʼ náa nakarámáʼ tsigijñaʼ mu maʼni gúní. 14 Ma̱ngaa niʼjñáa chámbóo ga̱jma̱a̱ xtiyuu, nisngútámáʼ náa tsu̱du̱u̱ tsigijñaʼ dí nakarámáʼ mu maʼni gúní.

15 Nda̱wa̱á nixnájxi̱ tsigijñaʼ ga̱jma̱a̱ numún xa̱bu̱ xuajin, nigujtuwiin chivátu, nixíyáa ga̱jma̱a̱ nixnájxi̱i̱ xóo tsigijñaʼ ga̱jma̱a̱ numuu aʼkhúún xa̱bu̱ xuajin, niʼni ikháá xó má niʼni ga̱jma̱a̱ bi̱ timbáa. 16 Ma̱ngaa nixnájxi̱ tsigijñaʼ dí nakarámáʼ, niʼni ikháá kayúʼ xó má naguma.

17 Nda̱wa̱á nixnájxi̱ tsigijñaʼ rí tsígáʼ, mbá ñawúunʼ niríyaʼ tsigijñaʼ rígi̱, nigrígu mu maʼni gúniúu náa tsu̱du̱u̱ tsigijñaʼ dí nijuixnájxi̱ nákhá miʼcha̱.

18 Nda̱wa̱á Aarón nixnájxi̱ tsigijñaʼ ga̱jma̱a̱ numún xa̱bu̱ xuajin, nixíyáa xedi̱ ga̱jma̱a̱ mugu̱ e̱jmba̱a̱ bi̱ majuixnájxi̱i̱n xóo tsigijñaʼ dí tsímáá. Ikhú e̱ji̱i̱n nixnáá eʼdi ga̱jma̱a̱ ikhaa nixtíjyooʼ náa mbájndi níjniúu dí nakarámáʼ tsigijñaʼ. 19 Sébúu xedi̱ ga̱jma̱a̱ tsiyúuʼ mugu̱ e̱jmba̱a̱ dí gíʼdoo sébú xúʼko̱ má sébú dí rígá awúu̱n, riñón ma̱ngaa sébú dí gíʼdoo náa xkígoo, 20 ikhiin nisnguta̱ma̱ʼ xúgíʼ sébú náa xuwiʼ tsu̱xtu̱ún xujkhúʼ, nda̱wa̱á ikhaa nigruaʼmáʼ sébú mu maʼni gúní náa nakarámáʼ tsigijñaʼ. 21 Mú xuwiʼ tsu̱xtu̱ún ga̱jma̱a̱ rajkhú mújúúnʼ xujkhúʼ, Aarón niʼbajngaa gi̱i̱ ñuʼún xóo tsigijñaʼ rí nubajngaa náa inuu Jeobá, xó má niʼtáñajuunʼ Moisés maguma.

22 Nda̱wa̱á dí nixnájxi̱ tsigijñaʼ ga̱jma̱a̱ numuu aʼkhá, tsigijñaʼ dí nakarámáʼ ga̱jma̱a̱ tsigijñaʼ dí tsímáá, Aarón nikujxi̱ ñawúunʼ náa kúwá xa̱bu̱ ga̱jma̱a̱ niʼni tsajkurámíinʼ, ikhú nigajta̱a̱. 23 Nda̱wa̱á kayuuʼ, Moisés ga̱jma̱a̱ Aarón nitu̱ʼu̱u̱n náa guʼwá xtíin rí nagimbíi̱n, índo̱ nigájni̱ín nini̱ tsajkurámíinʼ xa̱bu̱ xuajin.

Ikhú, aguʼ dí naxpíbínʼ ndrígóo Jeobá ndiyáá xúgíinʼ xa̱bu̱ xuajin, 24 nda̱wa̱á mbá aguʼ nigájnuu náa Jeobá nitsikhá tsigijñaʼ ga̱jma̱a̱ sébú dí katrámáʼ náa nakarámáʼ tsigijñaʼ. Índo̱ xúgíinʼ xa̱bu̱ xuajin ndiyáá rígi̱, nigíʼdi̱i̱ nindxa̱ʼwa̱ numuu rí niʼniún tsiánguá ikhú nismbati̱gu̱u̱n asndu mbayííʼ.

10 Nadab ga̱jma̱a̱ Abihú e̱ji̱i̱n Aarón nirajtuun mbá daan náa nagiwa̱nʼ chámbuʼ, nigiwa̱nʼ aguʼ, náa tsu̱du̱u̱ nigiwa̱nʼ dí ndataun nigíʼdi̱i̱ nixnajxi̱ náa inuu Jeobá aguʼ dí rakáʼñúún muxnajxi̱ ga̱jma̱a̱ rí ikhaa na̱nguá niʼtáñajúúnʼ muxnajxi̱. 2 Ikhú nigájnuu aguʼ náa inuu Jeobá ga̱jma̱a̱ nitsikhíin, ikhiin nikháñúún náa inuu Jeobá. 3 Moisés niʼthúu̱n Aarón: “Rígi̱ rí niʼthí Jeobá: ‹Náa xúgíinʼ bi̱ kúwá mijngii náa ikhúún garmáʼáan a̱jkiu̱ún dí ikhúún nindxu̱ʼ mikaʼwún, ma̱ngaa ma̱ni̱ rí mbuyamajkhuʼ xúgíinʼ xa̱bu̱ xuajin›”. Aarón niguanúu wíí.

4 Ikhú Moisés nindxaʼóo Misael ga̱jma̱a̱ Elzafán, e̱ji̱i̱n Uziel bi̱ nindxu̱u̱ a̱muu Aarón ga̱jma̱a̱ niʼthún: “Aguwaʼ gi̱i̱. Gurawíin a̱ngia̱la náa nindxu̱u̱ mikaʼwu ga̱jma̱a̱ guʼgua kudiin náa rexo̱o̱ rí kuwáanʼla”. 5 Ikha jngóo, ikhiin nigún kudiin bi̱ nikháñúún náa rexo̱o̱ rí gíi̱nʼ asndu kaʼníí kugíʼ xtíñún mbi̱jua̱ xó má Moisés niʼthúún muni̱.

6 Nda̱wa̱á Moisés niʼthúu̱n Aarón gajmíi̱nʼ eʼwíinʼ e̱ji̱i̱n, Eleazar ga̱jma̱a̱ Itamar: “Xúniʼñáánʼ maʼni xákhá e̱dxa̱la ni má xuxkuʼtu xtíñálá ga̱jma̱a̱ numún bi̱ nikháñúún mu xúʼko̱ xákáñála ga̱jma̱a̱ Dios xákiʼnáa kaʼñúún xa̱bu̱ xuajin. Xúgíinʼ a̱ngia̱la bi̱ kúwá náa Israel mumbi̱ya̱ʼ ga̱jma̱a̱ numún bi̱ Jeobá nitsikhíin. 7 Xúni̱ tsíngumijnálá náa riejuun guʼwá xtíin rí nagimbíi̱n. Mu xúʼko̱ xákáñála, numuu dí aceite ndrígóo Jeobá dí naxtaʼwíin ga̱jma̱a̱ rígá náa ikháanʼla”. Xúʼko̱ ma nini̱, xó má niʼthún Moisés.

8 Nda̱wa̱á Jeobá niʼthúu̱n Aarón: 9 “Ni má ikháán ni má ejña̱a̱nʼ, ragíʼmaa mu̱wa̱a̱n vino ni má i̱ʼwáʼ iyaʼ najnga̱a̱ índo̱ gátaʼala náa guʼwá xtíin dí nagimbíi̱n, mu xúʼko̱ xákáñála. Rígi̱ nindxu̱u̱ mbá kiʼtáñajunʼ dí marigá asndu kámuu náa xúgíinʼ bi̱ gáguwáʼ rakúwá nda̱wa̱á. 10 Xúʼko̱ ma̱ndoo mbuyáá rí mitsúʼkháan ga̱jma̱a̱ rí na̱nguá ma̱ngaa rí mikaʼwu ga̱jma̱a̱ dí tsaga, 11 arasngúún israelitas xúgíʼ kiʼtáñajunʼ dí Jeobá nixnúu Moisés”.

12 Ikhú Moisés niʼthúu̱n Aarón gajmíi̱n e̱ji̱i̱n bi̱ xóó naguanún Eleazar ga̱jma̱a̱ Itamar: “Gu̱ya̱ tsigijñaʼ dí tsígáʼ rí nijuixnájxi̱ mi̱kha náa inuu Jeobá, gu̱pula xóo pan dí ragíʼdoo levadura náa mijngii dí nakarámáʼ tsigijñaʼ, numuu rí nindxu̱u̱ rí mikaʼwu wéñuuʼ. 13 Gíʼmaa mu̱pula náa rí mikaʼwu, numuu dí rígi̱ nindxu̱u̱ ndrígáaʼ ikháán ga̱jma̱a̱ ndrígu̱ún ejña̱a̱nʼ náa tsigijñaʼ gamajkhu rí nijuixnájxi̱ mu mi̱kha náa inuu Jeobá, xó ma nijuiʼtáñajunʼ marigá. 14 Ma̱ngaa muphula xuwiʼ tsoxto̱o̱ xujkhúʼ ga̱jma̱a̱ rajkúu dí nijuixnájxi̱ xóo tsigijñaʼ dí nubajngaa rí nindxu̱u̱ mitsúʼkháan, mbaʼyóoʼ muphula náa rí mikaʼwu, ikháán gajmiáanʼ jiámiáaʼ ga̱jma̱a̱ waʼxiaaʼ numuu dí rígi̱ nindxu̱u̱ dí kaʼyaaʼ ikháán gajmiáanʼ ejña̱a̱nʼ rí magajnúu náa tsigijñaʼ dí tsímáá* dí muxnajxi̱ israelitas. 15 Mu̱ʼgua̱a̱ʼ kudala rajkhúu xujkhúʼ rí nindxu̱u̱ mitsúʼkháan ga̱jma̱a̱ itsu̱ tsoxto̱o̱ rí nijuixnájxi̱ xóo tsigijñaʼ rí nubajngaa ma̱ngaa sébúu tsigijñaʼ rí nijuixnájxi̱ mu mikarámáʼ, mu xúʼko̱ mubajngaa gi̱i̱ ñuʼún tsigijñaʼ rígi̱ náa inuu Jeobá ga̱jma̱a̱ rígi̱ mani̱ndxu̱u̱ ndrígáaʼ ikháán gajmiáanʼ ejña̱a̱nʼ asndu kámuu, xó má Jeobá niʼtáñajunʼ”.

16 Moisés mbájndi nijngruigo̱o̱ ndiyáaʼ chivátu* bi̱ nijuixnájxi̱i̱ xóo tsigijñaʼ ga̱jma̱a̱ numuu aʼkhá nda̱wa̱á ndiʼyoo rí niguámbá nikhaa. Ikhú nikiʼnáa kaʼyoo Eleazar ga̱jma̱a̱ Itamar e̱ji̱i̱n Aarón bi̱ xóó naguanún, niʼthún: 17 “Náá numuu dí túphula tsigijñaʼ rí nijuixnájxi̱ ga̱jma̱a̱ numuu aʼkhá náa dí nindxu̱u̱ mikaʼwu rá. Lá tséya̱a̱ dí nindxu̱u̱ mikaʼwu wéñuuʼ ráʼ. Lá raʼkháa ikháanʼ nijuixnála, mu xúʼko̱ murígúu aʼkhúún xa̱bu̱ xuajin ga̱jma̱a̱ muni̱ kaʼwi̱i̱ aʼkhúún náa inuu Jeobá ráʼ. 18 ¡Gu̱ya̱a̱! Eʼdiuu tsigijñaʼ nánguá ni̱jkha̱ kiʼyá náa rí mikaʼwu. Ndiyóoʼ muphula tsigijñaʼ rígi̱ náa mikaʼwu xó má nijuiʼtáñájunʼ”. 19 Aarón niʼthúu̱n Moisés: “Atayáá, mbiʼi rígi̱ nixnajxi̱ tsigijñaʼ ga̱jma̱a̱ numuu aʼkhá ga̱jma̱a̱ tsigijñaʼ gamajkhu dí mi̱kha náa inuu Jeobá, mú ikhúún ni̱ʼkha̱ edxu̱ʼ ma̱ni̱ xúgíʼ rígi̱. Á mu ikhúún nikhu tsigijñaʼ dí nijuixnájxi̱ ga̱jma̱a̱ numuu aʼkhá, lá manigu̱u̱ʼ Jeobá ráʼ.” 20 Índo̱ Moisés niʼdxuun rígi̱, ikhú ndiʼyoo rí májánʼ ma nindxu̱u̱.

11 Ikhú Jeobá niʼthúu̱n Moisés ga̱jma̱a̱ Aarón: 2 “Guthu̱u̱nla israelitas: ‹Xujkhúʼ bugi̱ bi̱ kúwá náa tsu̱du̱u̱ ku̱ba̱ʼ bi̱ ma̱ndoo muphúnla: 3 Xúgíinʼ xujkhúʼ bi̱ guáʼdáá tsújún rí nawiʼtáa ta̱pha̱ ga̱jma̱a̱ nunu̱u̱ índo̱ nuphiʼtsu, buʼko̱ bi̱ ma̱ndoo muphúnla.

4 Bugi̱ nindxu̱ún xujkhúʼ bi̱ xándoo muphúnla, maski má nunu̱u̱ o guáʼdáá tsújúún dí niwiʼtáa. Xándoo muphíla camello, ikhaa naʼnu̱u̱ dí na̱ʼkhu̱ mú na̱nguá wiʼtáa mbá kayuuʼ tsójóo. Nindxu̱u̱ mitsagaa náa ikháanʼla. 5 Xúʼko̱ má damán,* maski má naʼnu̱u̱ mú na̱nguá gíʼdoo tsójóo dí nawiʼtáa. Nindxu̱u̱ mitsagaa náa ikháanʼla. 6 Xúʼko̱ má wajin búrru,* maski má ikhaa naʼnu̱u̱ mú na̱nguá gíʼdoo tsójóo dí nawiʼtáa. Mitsagaa nindxu̱u̱ náa ikháanʼla. 7 Xúʼko̱ má a̱ga, gíʼdoo tsójóo dí nawiʼtáa mú na̱nguá eʼnu̱u̱. Nindxu̱u̱ mitsagaa náa ikháanʼla. 8 Xáʼyóoʼ muphula xuñúnʼ ni má murugui̱i̱n á mu nikháñún. Nindxu̱ún mitsagiin náa ikháanʼla.

9 Rígi̱ dí ma̱ndoo muphula dí rígá náa iyaʼ, xúgíinʼ xujkhúʼ bi̱ guáʼdáá xpíjpiúún ga̱jma̱a̱ xtáxúwún, tséʼniuu á mu kúwá náa lamáa* o náa mañu. 10 Mú xujkhúʼ bi̱ na̱nguá guáʼdáá xpíjpiúún ni má xtáxúwún, tséʼniuu á mu nindxu̱ún xujkhúʼ bi̱ nagún mbá jnduʼ o eʼwíinʼ xujkhúʼ bi̱ kúwá ikhí. Tséʼniuu á mu kúwá náa lamáa o náa mañu, nindxu̱ún mitsagiin náa ikháanʼla. 11 Xúʼko̱, mbaʼyóoʼ mbuya̱a̱ rí nindxu̱ún mitsagiin. Xáʼyóoʼ muphula nditháan xuñúnʼ gíʼmaa mawi̱yala gáʼni á mu ndu̱ñu̱u̱n dí kuíji̱i̱n nikháñún. 12 Xúgíinʼ xujkhúʼ bi̱ kúwá náa iyaʼ bi̱ na̱nguá guaʼdáá xpíjpiúún ni má xtáxúwún gíʼmaa rí mawiyala̱ gáʼni.

13 Xujkhú xnaʼ bugi̱ bi̱ mbaʼyóoʼ mawi̱yala ku̱ñu̱u̱n. Xáʼyóoʼ muphúnla, numuu rí nindxu̱ún mitsagiin: Bi̱yú, bi̱yú bi̱ naʼkhu̱u̱n e̱gi̱ʼ, ndxáʼan skuniiʼ, 14 ni má milano real, ni má i̱mba̱ enii milano skunii, 15 ni má yu̱wa̱ʼ, 16 ni má avestruz, ni má xpuʼphúnʼ, ni má gaviota, ni má nimbá enii bi̱yú ñu̱ʼu̱, 17 ni má xmédá, ni má pato iyaʼ, ni má tágulúu, 18 ni má cisne, ni má pelícano, ni má ndxáʼan, 19 ni má cigüeña, ni má nimbá enii garza, ni má abubilla* ni má xtíʼkhú.* 20 Xúgíinʼ xujkhúʼ xnaʼ bi̱ nagún mbá jnduʼ náa tsu̱du̱u̱ ku̱ba̱ʼ ga̱jma̱a̱ bi̱ nagún ga̱jma̱a̱ a̱jkhu̱ rajkhúún, gíʼmaa mani̱ndxu̱ún mitsagiin náa ikháanʼla.

21 Xujkhúʼ bi̱ guáʼdáá xniúúnʼ bi̱ nagún mbá jnduʼ náa tsu̱du̱u̱ ku̱ba̱ʼ ga̱jma̱a̱ numbañimijna̱ bi̱ guáʼdáá a̱jkhu̱ rajkhún, i̱ndó ma̱ndoo muphúnla bi̱ guáʼdáá a̱jma̱ rajkúún itháán mbi̱jua̱ ki xóo i̱ʼwáʼ mu magadíjxi̱i̱n ga̱jma̱a̱. 22 Bugi̱ bi̱ ma̱ndoo muphúnla: Mixtiʼkhu enii tsíʼbu* mba̱ʼu̱u̱n, ma̱ngaa xúgíinʼ enii tsíʼbu ga̱jma̱a̱ exngi. 23 Asndu xkáʼníí má xujkhúʼ bi̱ guáʼdáá xniúnʼ bi̱ nagún mbá jnduʼ náa tsu̱du̱u̱ ku̱ba̱ʼ ga̱jma̱a̱ bi̱ guáʼdáá a̱jkhu̱ rajkúún, nindxu̱ún mitsagiin náa ikháanʼla. 24 Á mu naphúnla, manindxala mitsagáanʼ. Asndu tsáa bi̱ gáguguiin á mu nikháñún mani̱ndxu̱u̱ mitsagaa asndu índo̱ gáʼkhíʼ. 25 Asndu tsáa bi̱ gáyejxi̱i̱ xuyuuʼ xujkhúʼ bugi̱ á mu nikháñuu, mbaʼyóoʼ maʼjñáa xtíñúun, mani̱ndxu̱u̱ mitsagaa asndu índo̱ gáʼkhíʼ.

26 Asndu xkáʼníí má xujkhúʼ bi̱ na̱nguá gíʼdoo tsójóo dí nawiʼtáa ni má na̱nguá eʼnu̱u̱ dí na̱ʼkhu̱ nindxu̱u̱ mitsagaa náa ikháanʼla. Asndu tsáa bi̱ gáguguiin manidxu̱u̱ mitsagaa. 27 Náa xujkhúʼ bi̱ nagún ga̱jma̱a̱ a̱jkhu̱ rajkúún, xúgíinʼ bi̱ nduya bi̱ nagún ga̱jma̱a̱ xngáñún nindxu̱ún mitsagiin náa ikháanʼla. Asndu tsáa bi̱ gáguguiin á mu nikháñún mani̱ndxu̱u̱ mitsagaa asndu índo̱ gáʼkhíʼ. 28 Bi̱ gágui̱i̱ xujkhúʼ bugi̱ bi̱ nikháñuu, mbaʼyóoʼ maʼjñáa xtíñuu ga̱jma̱a̱ maʼni mitsagaa asndu índo̱ gáʼkhíʼ. Nindxu̱ún mitsagiin náa ikháanʼla.

29 Xujkhúʼ bi̱ nagún mbóó jnduʼ náa tsu̱du̱u̱ ku̱ba̱ʼ, bugi̱ ni̱ndxu̱ún mitsagiin náa ikháanʼla: Xóo rata topo, tsijní, xúgíinʼ enii lagarto, 30 geco, lagarto mba̱a̱, salamandra iyaʼ, chíjndu ga̱jma̱a̱ camaleón.* 31 Xujkhúʼ bugi̱ bi̱ nagún mbá jnduʼ náa tsu̱du̱u̱ ku̱ba̱ʼ ni̱ndxu̱ún mitsagiin náa ikháanʼla. Asndu tsáá bi̱ gáguguiin índo̱ nikháñúún mani̱ndxu̱u̱ mitsagaa asndu índo̱ gáʼkhíʼ.

32 Asndu náa má gájpatrámáaʼ índo̱ nakháñuu ikhí mani̱ndxu̱u̱ mitsaga, tséʼniuu má á mu dí najmún dí niguma ga̱jma̱a̱ ixi̱, mbá xtíin, mbá dí niguma ga̱jma̱a̱ xtá, mbá xíʼtoo xtíin mi̱du̱. Asndu ndiéjunʼ ma dí najmún nángi eʼni, mbaʼyóoʼ muxuma̱ʼ náa iyaʼ mani̱ndxu̱u̱ mitsaga asndu índo̱ gáʼkhíʼ mú nda̱wa̱á maʼni kaʼwi̱i̱. 33 Á mu najnguíʼíin náa daan ku̱ba̱ʼ, mbaʼyóoʼ majmigu̱u̱, asndu ndiéjunʼ ma dí kajti ikhí maʼni mitsaga. 34 Asndu ndiéjunʼ ma ganitsu rí gágúu iyaʼ dí kájnu̱ʼ náa daan rúʼko̱ mani̱ndxu̱u̱ mitsaga, asndu ndiéjunʼ ma dí iyooʼ dí gájnu̱ʼ náa daan rúʼko̱ mani̱ndxu̱u̱ mitsaga. 35 Asndu náá má gájpatrámáaʼ xujkhúʼ bugi̱ bi̱ nikháñúu mani̱ndxu̱u̱ mitsaga. Tséʼniuu á mu náa horno o náa grígu aguʼ, mbaʼyóoʼ majmíjgu̱u̱. Mani̱ndxu̱u̱ mitsaga, ikháanʼla gíʼmaa mbu̱ya̱a̱ rí nindxu̱u̱ mitsaga. 36 I̱ndó iduu iyaʼ ga̱jma̱a̱ náa naxtagijxi̱i̱ iyaʼ mani̱ndxu̱u̱ mikaʼwu, mú asndu tsáá bi̱ gáguguaa xujkhúʼ bi̱ nikháñúu bugi̱ mani̱ndxu̱u̱ mitsagaa. 37 Á mu xujkhúʼ bugi̱ bi̱ nikháñúu gájpatrámáaʼ náa tsígáʼ rí majuiʼdu, tsígáʼ xáʼni tsagoo. 38 Mú, á mu nuxíñánʼla iyaʼ náa tsígáʼ ga̱jma̱a̱ mbá xuíʼtóo xuyuuʼ xujkhúʼ bi̱ nikháñuu bugi̱ najpátuáʼán ikhí, tsígáʼ mani̱ndxu̱u̱ mitsaga náa ikháanʼla.

39 Mú, á mu nakháñuu mbáa xujkhúʼ bi̱ ikháanʼ ma̱ndoo muphíla asndu tsáá bi̱ gágugua xuyuuʼ maʼni mitsagaa asndu índo̱ gáʼkhíʼ. 40 Asndu tsáá bi̱ gíkhu xuyuuʼ xujkhúʼ bi̱ nikháñuu, mbaʼyóoʼ maʼjñáa xtíñuu ga̱jma̱a̱ maʼni tsagaa asndu índo̱ gáʼkhíʼ. Asndu tsáá bi̱ gáʼga kayáa mbaʼyóoʼ maʼjñáa xtíñuu ga̱jma̱a̱ mani̱ndxu̱u̱ mitsagaa asndu índo̱ gáʼkhíʼ. 41 Xúgíinʼ xujkhúʼ bi̱ nagún mbóo jnduʼ náa tsu̱du̱u̱ ku̱ba̱ʼ ni̱ndxu̱ún mitsagiin, xáʼyóoʼ muphúnlá. 42 Xáʼyóoʼ muphúnla nimbáa xujkhú’ bi̱ nuxmajtamijná,* nimbáa xujkhú’ bi̱ nagún ga̱jma̱a̱ a̱jkhu̱ rajkhúún, nimbáa xujkhú’ bi̱ nagún mbá jnduʼ náa tsu̱du̱u̱ ku̱ba̱ʼ, ni ma bi̱ guáʼdáá mbaʼa rajkhúún, numuu rí ni̱ndxu̱ún mitsagiin. 43 Xuniʼñááʼ rí maʼni mitsagáanʼla ga̱jma̱a̱ numún xujkhúʼ bi̱ nagún mbá jnduʼ náa tsu̱du̱u̱ ku̱ba̱ʼ, xúni̱ gachímíjnála ni ma xúniʼñááʼ rí maʼni mitsagáanʼ ga̱jma̱a̱ numún ikhiin. 44 Numuu rí ikhúún nindxu̱ʼ Jeobá Dios ndrígala, ikháanʼ ndayóoʼ muni kaʼwu mijnáaʼla mu maʼni mikaʼwáanʼ numuu rí ikhúún nindxu̱ʼ mikaʼwún. Ikháanʼla xáʼyóoʼ mu̱ni̱ tsagamijná ga̱jma̱a̱ numuu mbáa xujkhúʼ bi̱ nagún mbá jnduʼ náa tsu̱du̱u̱ ku̱ba̱ʼ ga̱jma̱a̱ bi̱ numbayi̱míjna̱ ikhí. 45 Numuu rí ikhúún nindxu̱ʼ Jeobá, bi̱ nigúwáanʼla náa ku̱ba̱ʼ ndrígóo Egipto mu mani̱ndxu̱ʼ Dios ndrígala, ikháanʼ gíʼmaa mani̱ndxa̱la kaʼwáanʼ numuu rí ikhúún nindxu̱ʼ mikaʼwún.

46 Rígi̱ nindxu̱u̱ xtángoo ga̱jma̱a̱ numún xujkhúʼ bi̱ nagún rijma̱a̱, xúgíinʼ xujkhúʼ bi̱ nduya bi̱ kúwá náa iyaʼ ga̱jma̱a̱ numún xujkhúʼ bi̱ nagún mbá jnduʼ náa tsu̱du̱u̱ ku̱ba̱ʼ, 47 mu xúʼko̱ ma̱ndoo mbu̱ya̱a̱ tsíin nindxu̱ún mikaʼwiin ga̱jma̱a̱ bi̱ mitsagiin, ma̱ngaa xujkhúʼ bi̱ ma̱ndoo mu̱phún ga̱jma̱a̱ bi̱ na̱nguá›”.

12 Jeobá niʼthúu̱n Moisés: 2 “Arathún israelitas: ‹Á mu mbáa a̱ʼgu̱ naguewáan ada̱* nagiʼdaa mbáa dxámá maʼni mitsagaa mbá juwan mbiʼi ikháá má xó mbiʼi índo̱ nagajtaa eʼdiuu. 3 Índo̱ gáʼni migiñuʼ mbiʼi muthu xtóo xuyuuʼ tsáʼkhúun ada̱. 4 Ikhaa maxtáa raʼni kaʼwumina̱a̱ʼ mbá 33 mbiʼi ga̱jma̱a̱ numuu rí nigadíí eʼdiuu. Xáʼyóoʼ maxkajma nimbá rí mikaʼwu ni má xáto̱ʼo̱o̱ náa rí mikaʼwu asndu índo̱ gárámuuʼ mbiʼi dí naʼni kaʼwumina̱a̱ʼ.

5 Á mu nagiʼdaa mbáa dxáʼgú, maʼni mitsagaa mbá 14 mbiʼi, ikháá ma xóo índo̱ nagajtaa eʼdiuu. Ikhaa maʼni kaʼwumina̱a̱ʼ mbá 66 mbiʼi ga̱jma̱a̱ numuu rí nigadíí eʼdiuu. 6 Índo̱ gárámuuʼ mbiʼi rí maʼni kaʼwumina̱a̱ʼ numuu rí nigiʼdaa dxámá o dxáʼgú, ikhaa maʼga kayáa náa ndxajkun náa riejuun’ guʼwá xtíin náa nagimbíi̱n, mbáa mugu̱ bi̱ gíʼdoo mbá tsiguuʼ mu maxnájxíi xóo tsigijñaʼ dí nakarámáʼ, mbáa paloma o mbáa gúgu̱ xóo tsigijñaʼ ga̱jma̱a̱ numuu aʼkhá. 7 Ndxajkun maxnájxi̱ xúgíʼ náa inuu Jeobá mu maguma kaʼwi̱i̱ aʼkhúun, ikhaa maguma kaʼwi̱i̱ dí nigadíí eʼdiuu. Rígi̱ nindxu̱u̱ xtángoo ndrígóo mbáa a̱ʼgu̱ índo̱ nagiʼdaa mbáa dxámá o dxáʼgú. 8 Á mu a̱ʼgu̱ na̱nguá gíʼdoo mu maxnájxíi mbáa mugu̱, ikhú ma̱ndoo maʼga̱ kagui̱i̱n a̱jmi̱i̱n gúgu̱ o a̱jmi̱i̱n e̱jín paloma, mbáa maxnájxíi xóo tsigijñaʼ dí nakarámáʼ ga̱jma̱a̱ imba̱a̱ xóo tsigijñaʼ ga̱jma̱a̱ numuu aʼkhá, ndxajkun maʼni kaʼwi̱i̱ aʼkhúun ga̱jma̱a̱ ikhaa maguma kaʼwi̱i̱›”.

13 Jeobá niʼthúu̱n má xúʼko̱ Moisés ga̱jma̱a̱ Aarón. Niʼthún: 2 “Á mu náa xuyuuʼ mbáa xa̱bu̱ naʼjuan ga̱jma̱a̱ nakájxi̱i̱ xtáxúoo o na̱ʼkha̱ xndú maña̱ʼ rí ma̱ndoo mani̱ndxu̱u̱ nandii lepra* náa xuyuuʼ, mbaʼyóoʼ magún kuya̱a̱ náa inuu ndxajkun Aarón o náa e̱ji̱i̱n bi̱ nindxu̱ún ndxajkun. 3 Ndxajkun mbaʼyóoʼ mangujma xuyuuʼ náa gíʼdoo nandii. Á mu xtátsúun dí rígá ikhí niʼni miʼxá ga̱jma̱a̱ nandii nijngúun itháan mi̱jnu̱ʼ náa xuyuuʼ, nindxu̱u̱ nandii lepra. Índo̱ ndxajkun gáʼyoo rígi̱. Ikhú maʼthí rí nindxu̱u̱ mitsagaa. 4 Á mu náa xuwiʼ rí gíʼdoo nandii niʼni miʼxá mú na̱nguá nijngúun itháan mi̱jnu̱ʼ ki xóo xuwiʼ ni má táʼni miʼxá xtátsiu̱u̱n dí rígá ikhí, ndxajkun mbaʼyóoʼ maríya̱a̱ʼ wájííʼ bi̱ naʼñuu nandii mbá juwan mbiʼi. 5 Índo̱ gáʼni juwan mbiʼi, ndxajkun mbaʼyoo mbu̱júu̱. Á mu ndaʼyoo rí nandii na̱jkha̱ raʼni̱i̱ má ga̱jma̱a̱ nánguá ni̱jkha̱roʼoo itháan náa xuyuuʼ, ndxajkun maríya̱a̱ʼ wájííʼ mbu̱júu̱ i̱mbá juwan mbiʼi.

6 Índo̱ gáʼni juwan mbiʼi ndxajkun mbaʼyoo mbu̱júu̱. Á mu nandii nindáti̱ga̱a̱ ga̱jma̱a̱ na̱nguá ni̱jkha̱roʼoo itháan náa xuyuuʼ, ndxajkun maʼthí rí nindxu̱u̱ mikaʼwii. I̱ndó nindxu̱u̱ mbá xndú náa ni̱ʼkha̱ yaʼskha. Ikhú xa̱bu̱ maʼjñáa xtíñuu ga̱jma̱a̱ manidxu̱u̱ kaʼwi̱i̱. 7 Á mu nda̱wa̱á rí ndxajkun niʼthí rí nindxu̱u̱ mikaʼwii nikujma̱a̱ mbu̱júu̱ nandii rígi̱ náa xuyuuʼ ga̱jma̱a̱ ni̱jkha̱roʼoo itháan, ikhaa mbaʼyóoʼ mata̱nga̱a̱ mbu̱júu̱ náa ndxajkun. 8 Ndxajkun mangujma mbu̱júu̱. Á mu nandii rígi̱ ni̱jkha̱roʼoo náa xuyuuʼ, ikhú ndxajkun maʼthí rí nindxu̱u̱ mitsagaa. Numuu rí nindxu̱u̱ lepra.

9 Á mu mbáa xa̱biya̱ gágiʼdoo lepra, mbaʼyóoʼ magún kuya̱a̱ náa inuu ndxajkun, 10 ndxajkun mangujma. Á mu náa niʼjuan xuwiʼ niʼni miʼxá ga̱jma̱a̱ xtátsúun dí rígá ikhí niʼni miʼxá ga̱jma̱a̱ nikájthu náa niʼjuan, 11 gíʼdoo lepra rí mbiiʼ náa xuyuuʼ, ndxajkun maʼthí rí nindxu̱u̱ mitsagaa. Xáʼyóoʼ má maríya̱a̱ʼ wájííʼ, numuu rí nindxu̱u̱ mitsagaa. 12 Á mu lepra ni̱jkha̱roʼoo náa xúgíʼ xuyuuʼ ga̱jma̱a̱ nandii rígi̱ gíʼdoo xa̱bu̱ náa rajkhúu asndu náa edxu̱u̱, náa mbríga̱a̱ rí ndxajkun naʼngo̱o̱ ndaʼyoo. 13 Ndxajkun mangujma ga̱jma̱a̱ á mu ndaʼyoo dí lepra gíʼdoo náa xúgíʼ xuyuuʼ, ikhú maʼthí rí nindxu̱u̱ kaʼwi̱i̱ bi̱ gíʼdoo nandii.* Numuu rí xúgíʼ xuyuuʼ niʼni miʼxá, ikhaa nindxu̱u̱ kaʼwi̱i̱. 14 Mú, á mu natanga̱a̱ nakájthu náa gíʼdoo nandii, ikhaa mani̱ndxu̱u̱ mitsagaa. 15 Índo̱ ndxajkuun gáʼyoo rí nikájthu náa gíʼdoo nandii, maʼthí rí nindxu̱u̱ mitsagaa. Náa rí nakájthu nindxu̱u̱ mitsaga. Nindxu̱u̱ lepra. 16 Mú, á mu náa gíʼdoo nandii rí nikájthu naʼni̱i̱ miʼxá mbu̱júu̱, ikhaa mbaʼyóoʼ maʼga̱ náa inuu ndxajkun, 17 ndxajkun mangujma. Á mu náa gíʼdoo nandii niʼni miʼxá, ndxajkun maʼthí rí mikaʼwii bi̱ gíʼdoo nandii. Ikhaa niguma kaʼwi̱i̱.

18 Á mu na̱ʼkha̱ ska náa xuyuuʼ mbáa ga̱jma̱a̱ naʼni̱i̱ a̱jkiu̱u̱n, 19 mu náa nikájxii̱ ska naʼjuan ga̱jma̱a̱ naʼni miʼxá o nakájxi̱i̱ mbá xndú maña̱ʼ miʼxá, ikhú mbaʼyóoʼ maʼga̱ náa inuu ndxajkun. 20 Ndxajkun mangujma. Á mu ndaʼyoo rí nandii nijngúun itháan mi̱jnu̱ʼ náa xuwiʼ ga̱jma̱a̱ xtátsúun dí rígá ikhí niʼni miʼxá, ndxajkun maʼthí rí nindxu̱u̱ mitsagaa. Nindxu̱u̱ nandii lepra dí niku̱mu̱u̱ náa nikájxi̱i̱ ska. 21 Á mu índo̱ ndxajkun gángujmaa ndaʼyoo rí nda̱a̱ mbá xtátsúun miʼxá ikhí, ni má nandii nánguá nijngúun mi̱jnu̱ʼ náa xuwiʼ ga̱jma̱a̱ nakujmaa dí na̱jkha̱ raʼni̱i̱ má, ikhú ndxajkun maríya̱a̱ʼ wájííʼ mbá juwan mbiʼi. 22 Á mu ni̱jkha̱roʼoo náa xúgíʼ xuyuuʼ, nindxu̱u̱ mbá nandii. Ikhú ndxajkuun maʼthí rí nindxu̱u̱ mitsagaa. 23 Á mu xndú maña̱ʼ rí nikájxi̱i̱ nánguá má eʼni mba̱a̱, i̱ndó niʼjuan numuu rí ikhí nikájxi̱i̱ ska, ndxajkuun maʼthí rí nindxu̱u̱ mikaʼwii.

24 Á mu mbáa nikhaa ga̱jma̱a̱ ikhí naʼni maña̱ʼ o miʼxá, 25 ikhú ndxajkun mangujma. Á mu xtátsúun dí rígá ikhí niʼni miʼxá ga̱jma̱a̱ nijngúun itháan mi̱jnu̱ʼ náa xuwiʼ, nindxu̱u̱ lepra dí nikumu̱u̱ náa nikha, ndxajkun maʼthí rí nindxu̱u̱ mitsagaa. Numuu rí nindxu̱u̱ nandii lepra. 26 Mú, á mu ndxajkun ningujmaa ga̱jma̱a̱ ndaʼyoo rí nda̱a̱ má xtátsúun dí miʼxá náa niʼni maña̱ʼ, ni má na̱nguá kujmaa rí nijngúun itháan mi̱jnu̱ʼ náa xuwiʼ ma̱ngaa nakujmaa dí na̱jkha̱ raʼni̱i̱ má, ndxajkun maríya̱a̱ʼ wájííʼ mbá juwan mbiʼi. 27 Índo̱ gáʼni juwan mbiʼi, ndxajkun mangujma. Á mu ni̱jkha̱roʼoo rígi̱ náa xúgíʼ xuyuuʼ, ndxajkun maʼthí rí nindxu̱u̱ mitsagaa. Numuu rí nindxu̱u̱ nandii lepra. 28 Mú, á mu náa niʼni maña̱ʼ nánguá má niʼni mba̱a̱ na̱nguá má ni̱jkha̱roʼoo náa xúgíʼ xuyuuʼ ga̱jma̱a̱ nakujmaa dí na̱jkha̱ raʼni̱i̱ má, i̱ndó niʼjuan ga̱jma̱a̱ numuu dí nikha, ndxajkun maʼthí rí nindxu̱u̱ mikaʼwii, i̱ndó niʼjuan náa nikha.

29 Á mu mbáa xa̱biya̱ o mbáa a̱ʼgu̱ nagiʼdoo nandii náa xtóo edxu̱u̱ o náa chítuuʼ, 30 ikhú ndxajkun mangujma náa gíʼdoo nandii. Á mu nakujmaa rí nijngúun itháan mi̱jnu̱ʼ náa xtóo xuyuuʼ edxu̱u̱ ga̱jma̱a̱ xtátsiu̱u̱n niʼni mojmo̱ʼ ma̱ngaa najko̱o̱, ndxajkun maʼthí rí nindxu̱u̱ mitsagaa xa̱bu̱. Nindxu̱u̱ mbá nandii náa xtóo xuyuuʼ edxu̱u̱ o náa chítuuʼ. Nindxu̱u̱ lepra rí ni̱ʼkha̱ náa edxu̱u̱ o náa chítuuʼ. 31 Á mu ndxajkun ndaʼyoo rí nandii na̱nguá má nijngúun mi̱jnu̱ʼ náa xuwiʼ ga̱jma̱a̱ nda̱a̱ má xtátsúun skuniʼ ikhí, ndxajkun maríya̱a̱ʼ wájííʼ bi̱ naʼñuuʼ nandii mbá juwan mbiʼi. 32 Índo̱ gáʼni juwan mbiʼi ndxajkun mangujma náa gíʼdoo nandii á mu ikhí nánguá ni̱jkha̱roʼoo ga̱jma̱a̱ nda̱a̱ xtátsúun mojmoʼ ma̱ngaa nakujmaa rí na̱nguá má nijngúun mi̱jnu̱ʼ náa xuwiʼ, 33 xa̱bu̱ mbaʼyóoʼ maʼda̱ edxu̱u̱ mú xáʼyóoʼ maʼda̱ náa gíʼdoo nandii, ndxajkun maríya̱a̱ʼ wájííʼ bi̱ naʼñuu nandii mbá juwan mbiʼi.

34 Índo̱ gáʼni juwan mbiʼi ndxajkun mangujma mbu̱júu̱ náa gíʼdoo nandii. Á mu nandii rí gíʼdoo náa xtóo xuyuuʼ edxu̱u̱ o náa chituuʼ nánguá má ni̱jkha̱roʼoo náa xúgíʼ xuyuuʼ ga̱jma̱a̱ nánguá má nijngúun mi̱jnu̱ʼ náa xuyuuʼ, ndxajkun maʼthí rí nindxu̱u̱ mikaʼwii, ikhaa mbaʼyóoʼ maʼjñáa xtíñuu ga̱jma̱a̱ maʼni kaʼwi̱i̱. 35 Mú á mu nandii nitanga̱a̱ ni̱jkha̱roʼoo itháan náa xuyuuʼ nda̱wa̱á rí nigumaa kaʼwii, 36 ndxajkun mangujmaa. Á mu nandii ni̱jkha̱roʼoo náa xuyuuʼ, ndxajkun ni xáʼyóoʼ mbaʼyoo á mu xtátsiu̱u̱n niʼni mojmoʼ xa̱bu̱ buʼko̱: Nindxu̱u̱ mitsagaa. 37 Á mu ndaʼyoo rí nandii nánguá má ni̱jkha̱roʼoo ga̱jma̱a̱ nakráʼáan xtátsúun skuniʼ ikhí, nandii niʼni̱i̱ má. Ikhaa nindxu̱u̱ mikaʼwii ga̱jma̱a̱ ndxajkun maʼthí rí nindxu̱u̱ mikaʼwii.

38 Á mu mbáa xa̱biya̱ o mbáa a̱ʼgu̱ na̱ʼkha̱ xndú dí miʼxá náa xuyuuʼ, 39 ndxajkun mangujma. Á mu xndú rí ni̱ʼkha̱ náa xuwiʼ nindxu̱u̱ miʼxájtíiʼ, i̱ndó nindxu̱u̱ mbá xndú dí nikráʼáan náa xuyuuʼ. Xa̱bu̱ buʼko̱ nindxu̱u̱ mikaʼwii.

40 Á mu mbáa xa̱biya̱ na̱jkha̱ xtátsiu̱u̱n edxu̱u̱ ga̱jma̱a̱ naʼni tsaʼtsa, nindxu̱u̱ mikaʼwii. 41 Á mu na̱jkha̱ xtátsiu̱u̱n náa tsu̱du̱u̱ xkídooʼ ga̱jma̱a̱ naʼni tsaʼtsa, xa̱bu̱ buʼko̱ nindxu̱u̱ kaʼwii. 42 Á mu nakráʼáan xndú miʼxá maña̱ʼ náa ni̱jkha̱ xtátsiu̱u̱n, nindxu̱u̱ lepra dí xtáa raku̱mu̱u̱ náa xtóo xuyuuʼ edxu̱u̱. 43 Ndxajkun mbaʼyoo. Á mu niʼjuan náa nikráʼáan xndú miʼxá maña̱ʼ náa nuʼwu̱u̱n o náa tsu̱du̱u̱ xkídooʼ ga̱jma̱a̱ nakujmaa dí nindxu̱u̱ lepra, 44 nindxu̱u̱ mbáa bi̱ gíʼdoo lepra. Nindxu̱u̱ mitsagaa, ndxajkun maʼthí rí nindxu̱u̱ mitsagaa numuu rí gíʼdoo nandii náa edxu̱u̱. 45 Bi̱ gíʼdoo nandii lepra mbaʼyóoʼ maʼga̱ ga̱jma̱a̱ xtíñuu dí nithu ma̱ngaa mbá xákha edxu̱u̱. Ma̱ngaa gíʼmaa marugoo rawuunʼ ga̱jma̱a̱ mbá xtíin, maʼthí mixígu: ‹¡Mitsagún, mitsagún!›. 46 Mani̱ndxu̱u̱ mitsagaa xúgíʼ mbiʼi dí gagíʼdoo nandii. Numuu rí nindxu̱u̱ mitsagaa mbaʼyóoʼ máxtáa mitsínguánʼ. Náa rexo̱o̱ rí giáa̱nʼla.

47 Á mu nandii lepra nakujmaa náa mbá xtíin, tséʼniuu á mu niguma ga̱jma̱a̱ mugu̱ o dí lino, 48 tséʼniuu á mu náa gúmá dí kijñaraʼa náa xtíin o gúmá ndrígóo lino o ndrígóo mugu̱ o náa mbá xtá o asndu xkáʼnii má rí niguma ga̱jma̱a̱ xtá, 49 ga̱jma̱a̱ mancha dí maxaʼ mojmoʼ o maña̱ʼ, ndrígóo nandii dí nakujmaa náa mbá xtíin, náa mbá xtá, náa gúmá, o asndu ndiéjunʼ dí niguma ga̱jma̱a̱ xtá rí gíʼdoo lepra ndayóoʼ dí musngajmáá ndxajkun. 50 Ndxajkun mbaʼyóoʼ mangujma náa gíʼdoo nandii ga̱jma̱a̱ maríya̱ʼ wájííʼ dí gíʼdoo nandii mbá juwan mbiʼi. 51 Índo̱ gáʼni juwan mbiʼi, ndxajkun mbaʼyóoʼ mangujma náa gíʼdoo nandii. Á mu ndaʼyoo dí na̱jkha̱roʼoo náa xtíin, o náa gúmá, o náa xtá tséʼniuu asndu xu káʼnii dí niguma ga̱jma̱a̱ xtá, nandii nindxu̱u̱ lepra mbiiʼ. Nindxu̱u̱ mitsaga. 52 Ikhaa matsikáa xtíin, gúmá dí kijñaraʼa náa mbá xtíin o gúmá ndrígóo mugu̱ o dí lino, o asndu xkáʼnii má rí niguma ga̱jma̱a̱ xtá náa nikujmaa nandii. Mbaʼyóoʼ mi̱kha. Numuu dí nikujmaa nandii lepra dí mbiiʼ.

53 Á mu ndxajkun ndaʼyoo dí mancha dí nikujmaa na̱nguá má ni̱jkha̱roʼoo náa xtíin náa gúmá dí kijñaraʼa o imba̱ dí niguma ga̱jma̱a̱ xtá. 54 Ndxajkun maʼtáñájuunʼ dí majuiʼjñaan náa rí nikujmaa nandii ga̱jma̱a̱ maʼni wájíʼ mbá juwan mbiʼi mu xájmaa. 55 Nda̱wa̱á rí nijuiʼjñáan májánʼ, ndxajkun mbaʼyoo náa rí nichúu. Á mu náa nichúu ikháá má ga̱jma̱a̱ nánguá ni̱jkha̱roʼoo náa xtíin, rúʼko̱ mitsaga. Mbaʼyóoʼ mi̱kha numuu rí ni̱ʼga̱ tséʼniuu má awúu̱n o mbájnii.

56 Á mu ndxajkun ndaʼyoo náa nichúu ga̱jma̱a̱ ndaʼyoo rí na̱jkha̱ randáti̱ga̱a̱ má nda̱wa̱á dí nijuiʼjñáan májánʼ, ikhú maxkuʼturiya̱ʼ xtíin rí nichúu, tséʼniuu má rí nindxu̱u̱ xtá o gúmá dí kijñaraʼa. 57 Á mu na̱jkha̱ ragiʼi rachúu náa i̱mba̱ níʼkhóo xtíin, náa gúmá rí kijñaraʼa, o i̱mba̱ rí niguma ga̱jma̱a̱ xtá, na̱jkha̱roʼoo itháan. Mbaʼyóoʼ mi̱kha. 58 Á mu mancha nindáti̱ga̱a̱ má náa xtíin, náa gúmá dí kijñaraʼa o asndu xkáʼnii má rí niguma ga̱jma̱a̱ xtá nda̱wa̱á rí nijuiʼjñáan, ikhú mbaʼyóoʼ marajñáa mbu̱júu̱ mu maguma kaʼwi̱i̱.

59 Rígi̱ nindxu̱u̱ xtángoo ndrígóo nandii lepra á mu naku̱mu̱u̱ náa mbá xtíin dí niguma ga̱jma̱a̱ mugu̱ o dí lino o gúmá dí kijñaraʼa o asndu xkáʼnii má rí niguma ga̱jma̱a̱ xtá, mu xúʼko̱ majuiʼyáá á mu nindxu̱u̱ kaʼwu o tsaga”.

14 Jeobá niʼthúu̱n má xúʼko̱ Moisés: 2 “Rígi̱ nindxu̱u̱ xtángoo rí majui̱ʼni̱i̱ bi̱ gíʼdoo lepra* mbiʼi rí gájuiʼthá dí niguma kaʼwi̱i̱. Índo̱ gáʼga kiʼyáa náa inuu ndxajkun. 3 Ndxajkun magajnúu gáyajmaa náa rexo̱o̱ rí gíi̱nʼ. Mu mbaʼyoo á mu bi̱ gíʼdoo lepra niʼni̱i̱ má a̱jkiu̱u̱n, 4 ndxajkun maʼtáñajunʼ dí maʼga̱ kagui̱i̱n a̱jmi̱i̱n ñu̱ʼu̱ bi̱ kaʼwiin bi̱ nduya, ixi̱ cedro, gúmá maña̱ʼ xngeʼdi, hisopo* mu maguma kaʼwi̱i̱. 5 Ndxajkun maʼtáñajunʼ dí muxiyáa mbáa ñu̱ʼu̱ náa mbá daan ku̱ba̱ʼ dí ka̱jnu̱ʼ* iyaʼ mata. 6 Mbóó gíʼmaa mbuya̱a̱ ñu̱ʼu̱ bi̱ xóó ndaʼya ga̱jma̱a̱ ixi̱ cedro, gúmá maña̱ʼ xngeʼdi, hisopo ma̱ngaa mbaʼyóoʼ murmajan náa eʼdiuu ñu̱ʼu̱ bi̱ nixiyáa náa ka̱jnu̱ʼ iyaʼ mata. 7 Ndxajkun mbaʼyóoʼ maxtíjyaaʼ ga̱jma̱a̱ eʼdi mbá juwan nuthu bi̱ xtáa raʼni kaʼwumina̱a̱ʼ ga̱jma̱a̱ numuu lepra ma̱ngaa maʼthí rí niguma kaʼwi̱i̱, ikhú maniñuuʼ maʼga̱a̱ xanáá ñu̱ʼu̱ bi̱ ndaʼya.

8 Bi̱ xtáa raʼni kaʼwumina̱a̱ʼ ga̱jma̱a̱ numuu lepra mbaʼyóoʼ maʼjñáa xtíñuu ma̱ngaa maʼda̱ xúgíʼ xtátsiu̱u̱n ga̱jma̱a̱ muwan mu maguma kaʼwi̱i̱. Nda̱wa̱á ma̱ndoo mata̱ʼa̱a̱ʼ náa gíi̱nʼ, mú xándoo mata̱ʼa̱a̱ʼ náa guʼwá xtíin ndrígóo mbá juwan mbiʼi. 9 Índo̱ gárámuu’ juwan mbiʼi, maʼda̱ edxu̱u̱, stawuunʼ ga̱jma̱a̱ xtátsúun iduu. Nda̱wa̱á rí niʼda̱ xúgíʼ xtátsiu̱u̱n, maʼjñáa xtíñuu ga̱jma̱a̱ muwan mu maʼni kaʼwi̱i̱.

10 Índo̱ gáʼni migiñuʼ mbiʼi maʼga̱ kagui̱i̱n a̱jmi̱i̱n mugu̱ bi̱ míjíinʼ,* ma̱ngaa mbáa mugu̱ e̱ʼgú bi̱ mbá tsiguuʼ ga̱jma̱a̱ ajtsú kilo* tikhu harina dí itháan májánʼ rí kandawóoʼ aceite xóo tsigijñaʼ rí tsígáʼ ga̱jma̱a̱ mbá taza* aceite. 11 Ndxajkun bi̱ gáʼthí rí mikaʼwii xa̱bu̱ buʼko̱, mbaʼyóoʼ maʼga̱ kayáa ga̱jma̱a̱ tsigijñaʼ ndrígóo náa inuu Jeobá náa riejuun guʼwá xtíin dí nagimbíi̱n. 12 Ndxajkun mbaʼyóoʼ maxnájxi̱i̱ mbáa mugu̱ bi̱ májáanʼ xóo tsigijñaʼ ga̱jma̱a̱ numuu rí mbáa nikiéʼkúun ma̱ngaa mbá taza aceite, maʼbajngaa gi̱i̱ ñuʼún xóo tsigijñaʼ dí naʼbajngaa náa inuu Jeobá. 13 Nda̱wa̱á maxíyáa mugu̱ bugi̱ náa nakháñún xujkhúʼ bi̱ najuixnájxi̱i̱n xóo tsigijñaʼ ga̱jma̱a̱ numuu aʼkhá ma̱ngaa tsigijñaʼ dí nakarámáʼ, náa rí mikaʼwu, numuu dí tsigijñaʼ ga̱jma̱a̱ numuu rí mbáa nikiéʼkúun kaʼyoo ndxajkun, xó má tsigijñaʼ rí nuxnajxi̱ ga̱jma̱a̱ numuu aʼkhá. Nindxu̱u̱ mikaʼwu wéñuuʼ.

14 Nda̱wa̱á ndxajkun maxtájmuu mbá chíʼgíiʼ* eʼdiuu tsigijñaʼ ga̱jma̱a̱ numuu rí mbáa nikiéʼkúun náa riʼyu̱u̱ cháʼwuun mújúunʼ bi̱ naguma kaʼwi̱i̱, xúʼko̱ má náa a̱ʼdióo ñawún mújúunʼ dí mba̱a̱ ga̱jma̱a̱ náa a̱ʼdióo rajkhúu mújúunʼ dí mba̱a̱. 15 Ndxajkun maxídirámuuʼ náa ñawún xti̱yu̱u̱ʼ mbá chíʼgíiʼ aceite dí kajni̱ʼ náa taza. 16 Nda̱wa̱á ndxajkun marmajan ga̱jma̱a̱ a̱ʼdióo ñawúnʼ mújúunʼ ga̱jma̱a̱ aceite dí grígu náa ñawúnʼ xti̱yu̱u̱ʼ ga̱jma̱a̱ a̱ʼdióo ñawúunʼ maxtíjyooʼ mbá juwan nuthu ga̱jma̱a̱ aceite náa inuu Jeobá. 17 Ndxajkun mbayá mbá chíʼgíiʼ aceite dí grígu náa ñawúunʼ mu maxtájmuu náa riʼyu̱u̱ cháʼwuun mújúunʼ bi̱ naguma kaʼwi̱i̱, xúʼko̱ má a̱ʼdióo ñawún mújúunʼ dí mba̱a̱ ga̱jma̱a̱ a̱ʼdióo rajkhúu mújúunʼ dí mba̱a̱, náa tsu̱du̱u̱ eʼdiuu tsigijñaʼ ga̱jma̱a̱ numuu rí mbáa nikiéʼkúun. 18 Ndxajkun maxtrámuuʼ aceite dí xóó kagu̱u̱ náa ñawúunʼ náa edxu̱u̱ bi̱ naguma kaʼwi̱i̱, ndxajkun maʼni kaʼwi̱i̱ aʼkhúun ndrígóo xa̱bu̱ bugi̱ náa inuu Jeobá.

19 Ndxajkun maxnájxi̱ tsigijñaʼ ga̱jma̱a̱ numuu aʼkhá ma̱ngaa maʼni kaʼwi̱i̱ aʼkhúun bi̱ xtáa raʼni kaʼwumina̱a̱ʼ, nda̱wa̱á maxíyáa xujkhúʼ bi̱ majuixnájxi̱i̱ xóo tsigijñaʼ dí nakarámáʼ. 20 Ndxajkun maxnájxi̱ tsigijñaʼ dí nakarámáʼ ga̱jma̱a̱ tsigijñaʼ rí tsígáʼ náa inuu dí nakarámáʼ tsigijñaʼ. Ndxajkun maʼni kaʼwi̱i̱ aʼkhúun xa̱bu̱ bugi̱ ga̱jma̱a̱ ikhaa maguma kaʼwi̱i̱.

21 Á mu ikhaa na̱nguá gíʼdoo dí maʼga kayóo, ikhú maʼga̱ kayáa mbáa mugu̱ xóo tsigijñaʼ ga̱jma̱a̱ numuu rí mbáa nikiéʼkúun mu mixnájxi̱ xóo tsigijñaʼ dí naʼbajngaa mu xúʼko̱ maguma kaʼwi̱i̱ aʼkhúun, xó má mbá kilo* harina dí itháan májánʼ dí kandawóoʼ aceite xóo tsigijñaʼ rí tsígáʼ ma̱ngaa mbá taza aceite, 22 a̱jmi̱i̱n gúgu̱ o a̱jmi̱i̱n e̱jín paloma xó má rí maʼngo̱o̱ maxná. Mbáa ñu̱ʼu̱ maxnájxíi xóo tsigijñaʼ ga̱jma̱a̱ numuu aʼkhá ga̱jma̱a̱ imba̱a̱ maxnájxíi xóo tsigijñaʼ dí nakarámáʼ. 23 Índo̱ gáʼni migiñuʼ mbiʼi, ikhaa maʼga̱ kagu̱u̱ xúgíʼ náa ndxajkun náa riejuun guʼwá xtíin dí nagimbíi̱n náa inuu Jeobá, mu majuiʼthá rí niguma kaʼwi̱i̱.

24 Ndxajkun magutuwiin mugu̱ mu maxnájxi̱ xóo tsigijñaʼ ga̱jma̱a̱ numuu rí mbáa nikiéʼkúun ga̱jma̱a̱ aceite dí kajni̱ʼ náa taza, maʼbajngaa gi̱i̱ ñuʼún xóo tsigijñaʼ dí naʼbajngaa náa inuu Jeobá. 25 Maxíyáa mugu̱ bi̱ maxnájxíi xóo tsigijñaʼ ga̱jma̱a̱ numuu rí mbáa nikiéʼkúun. Ndxajkun maxtájmuu mbá chíʼgíiʼ eʼdiuu tsigijñaʼ dí nijuixnájxi̱ ga̱jma̱a̱ numuu aʼkhúun náa riʼyu̱u̱ cháʼwuun mújúunʼ bi̱ xtáa raʼni kaʼwumina̱a̱ʼ ma̱ngaa náa a̱ʼdióo ñawún mújúunʼ dí mba̱a̱ ga̱jma̱a̱ náa a̱ʼdióo rajkhúu mújúunʼ dí mba̱a̱. 26 Ndxajkun maxidirámuu mbá chíʼgíiʼ aceite náa ñawún xti̱yu̱u̱ʼ, 27 ikhú ga̱jma̱a̱ a̱ʼdióo ñawún mújúunʼ maxtíjyóoʼ mbá juwan nuthu náa inuu Jeobá ga̱jma̱a̱ aceite dí grígu náa ñawún xti̱yu̱u̱ʼ. 28 Ndxajkun maxtájmuu mbá chíʼgíiʼ aceite dí grígu náa ñawúunʼ náa riʼyu̱u̱ cháʼwuun mújúunʼ bi̱ xtáa raʼni kaʼwumina̱a̱ʼ ma̱ngaa a̱ʼdióo ñawún mújúunʼ dí mba̱a̱ ga̱jma̱a̱ náa a̱ʼdióo rajkhúu mújúunʼ dí mba̱a̱, ikhí má náa nixtájmuu eʼdi rí nijuixnájxi̱ ga̱jma̱a̱ numuu rí mbáa nikiéʼkúun. 29 Nda̱wa̱á ndxajkun maxtrámuuʼ aceite dí kagu̱u̱ náa ñawúunʼ náa edxu̱u̱ bi̱ xtáa raʼni kaʼwumina̱a̱ʼ, mu xúʼko̱ maguma kaʼwi̱i̱ aʼkhúun náa inuu Jeobá.

30 Ikhaa maxnájxi̱i̱ mbáa gúgu̱ o mbáa a̱ʼdá paloma xó má rí maʼngo̱o̱ maxnájxi̱, 31 asndu xkáʼnii má a̱jmi̱i̱n ñu̱ʼu̱ bi̱ maʼngo̱o̱ makhániúu, mu maxnájxi̱ xóo tsigijñaʼ ga̱jma̱a̱ numuu aʼkhúun. Ga̱jma̱a̱ imba̱a̱ ñu̱ʼu̱ maxnájxi̱ xóo tsigijñaʼ dí nakarámáʼ, mbóó gáraxnajxíin ga̱jma̱a̱ tsigijñaʼ rí tsígáʼ. Ndxajkun maʼni kaʼwi̱i̱ aʼkhúun bi̱ xtáa raʼni kaʼwumina̱a̱ʼ náa inuu Jeobá.

32 Rígi̱ nindxu̱u̱ xtángoo dí maguma mbáníí ga̱jma̱a̱ numuu xa̱bu̱ bi̱ naguma kaʼwi̱i̱ ga̱jma̱a̱ numuu lepra, á mu nda̱a̱ rí gíʼdoo maxná”.

33 Nda̱wa̱á Jeobá niʼthúu̱n Moisés ga̱jma̱a̱ Aarón: 34 “Índo̱ gáta̱ʼa̱la náa ku̱ba̱ʼ ndrígóo Canaán dí ikhúún maxnala mu maʼni ndrígala, ikhúún ma̱ni̱ dí marigá nandii lepra náa tikhu guʼwá dí rígá náa ku̱ba̱la, 35 ikhú bi̱ goʼwóo maʼga̱ náa ndxajkun ga̱jma̱a̱ maʼthúu̱n: ‹Náa goʼwóʼ nikujmaa mbá mancha›. 36 Ndxajkun maʼtáñajunʼ dí murawíi xúgíʼ dí kajti náa guʼwá nákha ikhaa xóó tséjkha̱ gáyejma mancha, mu xúʼko̱ xáguma tsagáá dí rígá náa guʼwá. Nda̱wa̱á ndxajkun mato̱ʼo̱o̱ gáyejma guʼwá. 37 Mangujma mancha ga̱jma̱a̱ mbaʼyoo á mu pared gíʼdoo iñúuʼ maxaʼ mojmoʼ o maña̱ʼ, á mu nikujmaa rí nijngúun itháan mi̱jnu̱ʼ náa pared, 38 ndxajkun magajnáa náa riejuun guʼwá ga̱jma̱a̱ maʼthí rí guʼwá rúʼko̱ ni xájmaa mbá juwan mbiʼi.

39 Índo̱ gárámuuʼ juwan mbiʼi ndxajkun matanga̱a̱ gáyajma guʼwá. Á mu mancha ni̱jkha̱roʼoo náa xúgíʼ pared, 40 ndxajkun maʼtáñajunʼ rí murawíi itsí dí niguma tsagáá ga̱jma̱a̱ muda̱ʼ náa rawuunʼ xuajin náa nagadíí dí mitsaga. 41 Nda̱wa̱á maʼthí rí mutháá náa awúu̱n guʼwá, e̱jndo̱o̱ʼ yeso dí gágájnáa ikhí mbaʼyóoʼ miʼda̱ʼ náa rawuunʼ xuajin numuu dí niguma tsagáá. 42 Mudra̱ʼa̱a̱ i̱ʼwáʼ itsí náa tra̱ʼa̱ itsí dí nirawíi ga̱jma̱a̱ muxpa̱di̱ʼ mbu̱júu̱ náa pared.

43 Á mu nda̱wa̱á dí nirawíi itsí, nitháá ga̱jma̱a̱ nixpa̱di̱ʼ nitanga̱a̱ nikujmaa mancha mbu̱júu̱, 44 ikhú ndxajkun maʼga̱ gáyajma mbu̱júu̱ guʼwá. Á mu mancha ni̱jkha̱roʼoo itháan náa guʼwá, nindxu̱u̱ lepra dí mbiiʼ. Mitsaga guʼwá. 45 Ndxajkun maʼtáñajunʼ dí muni jngudi̱i̱ guʼwá, itsí, ixi̱, xúgíʼ yeso ma̱ngaa xúgíʼ dí nixpa̱di̱ʼ ga̱jma̱a̱, magún kudúún náa rawuunʼ xuajin náa rí mitsaga. 46 Asndu tsáa bi̱ gáto̱ʼo̱o̱ mbó mbiʼi náa guʼwá rúʼko̱ mani̱ndxu̱u̱ mitsagaa asndu índo̱ gáʼkhíʼ, 47 asndu tsáa bi̱ gígu náa guʼwá rúʼko̱ mbaʼyóoʼ maʼjñáa xtíñuu ga̱jma̱a̱ asndu tsáa bi̱ gakuiʼtsu náa guʼwá rúʼko̱ mbaʼyóoʼ maʼjñáa xtíñuu.

48 Á mu ndxajkun ni̱jkha̱ ga̱jma̱a̱ ndiʼyoo dí mancha na̱nguá ni̱jkha̱roʼoo náa guʼwá nda̱wa̱á rí nixpa̱di̱ʼ, ndxajkun maʼthí rí guʼwá nindxu̱u̱ mikaʼwu numuu dí mancha nindáti̱ga̱a̱. 49 Mu maʼni kaʼwi̱i̱ guʼwá, maʼga̱ kagui̱i̱n a̱jmi̱i̱n ñu̱ʼu̱, ixi̱ cedro, gúmá maña̱ʼ xngeʼdi ga̱jma̱a̱ hisopo. 50 Mbaʼyóoʼ maxíyáa mbáa ñu̱ʼu̱ náa mbá daan dí ku̱ba̱ʼ náa ka̱jnu̱ʼ iyaʼ mata. 51 Nda̱wa̱á mbayá ixi̱ cedro, hisopo, gúmá maña̱ʼ xngeʼdi ga̱jma̱a̱ ñu̱ʼu̱ bi̱ ndaʼya ga̱jma̱a̱ marmijiin ga̱jma̱a̱ eʼdiuu ñu̱ʼu̱ bi̱ nikháñun náa daan dí ka̱jnu̱ʼ iya mata ma̱ngaa mbaʼyóoʼ maxtíjyóoʼ mbá juwan nuthu ga̱jma̱a̱ eʼdi náa guʼwá. 52 Maʼni kaʼwi̱i̱ guʼwá ga̱jma̱a̱ eʼdiuu ñu̱ʼu̱, iya mata, ñu̱ʼu̱ bi̱ ndaʼya, ixi̱ cedro, hisopo ga̱jma̱a̱ gúmá maña̱ʼ xngeʼdi. 53 Nda̱wa̱á maniñuuʼ maʼga̱a̱ ñu̱ʼu̱ bi̱ ndaʼya náa rawuunʼ xuajin, náa xanáá. Ikhaa maʼni kaʼwi̱i̱ guʼwá mu manidxu̱u̱ kaʼwu.

54 Rígi̱ nindxu̱u̱ xtángoo índo̱ naku̱mu̱u̱ asndu xkáʼnii má lepra, nandii náa xtóo edxu̱u̱ o náa chítuuʼ, 55 lepra rí naku̱mu̱u̱ náa xtíin o náa guʼwá, 56 índo̱ naʼjuan, ska ga̱jma̱a̱ índo̱ nikráʼáan xndú maña̱ʼ, 57 mu xúʼko̱ majuiʼyáá á mu nindxu̱u̱ kaʼwu o tsagaa. Rígi̱ nindxu̱u̱ xtángoo ga̱jma̱a̱ numuu lepra”.

15 Jeobá niʼtámíjná ma xúʼko̱ ga̱jma̱a̱ Moisés ma̱ngaa Aarón, niʼthúún: 2 “Gutamíjná gajmiála israelitas ga̱jma̱a̱ guthu̱u̱n: ‹Á mu mbáa xa̱biya̱ na̱ʼkha̱ jyo̱o̱ʼ náa tsáʼkhúun numuu dí gíʼdoo mbá nandii, ikhaa rúʼko̱ naʼni dí mani̱ndxu̱u̱ tsagaa. 3 Ikhaa nindxu̱u̱ mitsagaa ga̱jma̱a̱ numuu rí na̱ʼkha̱ jyo̱o̱ʼ tsáʼkhúun, tséʼniuu á mu na̱ʼkha̱ ma xúʼko̱ o tsíyoo gámíjxuuʼ ga̱jma̱a̱ numuu nandii rígi̱, ikhaa mani̱ndxu̱u̱ mitsagaa ma xúʼko̱.

4 Asndu káʼnii ma xiawoo náa gábóoʼ bi̱ na̱ʼkha̱ jyo̱o̱ʼ tsáʼkhúun mani̱ndxu̱u̱ mitsaga, xúʼko̱ ma mani̱ndxu̱u̱ mitsaga asndu náa ma gági̱ʼi̱. 5 Asndu tsáá xa̱bíi̱ bi̱ gáxkajma náa xiawoo rúʼko̱, mbaʼyóoʼ maʼjñáa xtíñuu ga̱jma̱a̱ mu̱wan, mani̱ndxu̱u̱ mitsagaa asndu índo̱ gáʼkhíʼ. 6 Asndu tsáá bi̱ gági̱ʼi̱ náa nigi̱ʼi̱ bi̱ na̱ʼkha̱ jyo̱o̱ʼ tsáʼkhúun mbaʼyóoʼ maʼjñáa xtíñuu ga̱jma̱a̱ mu̱wan, mani̱ndxu̱u̱ mitsagaa asndu gáʼkhíʼ. 7 Asndu tsáá ma bi̱ gáxkajmaa bi̱ na̱ʼkha̱ jyooʼ tsáʼkhúun mbaʼyóoʼ maʼjñáa xtíñuu ga̱jma̱a̱ mu̱wan ga̱jma̱a̱ maʼni mitsagaa asndu gáʼkhíʼ. 8 Á mu bi̱ na̱ʼkha̱ jyooʼ tsáʼkhúun gíkhu ndujtáaʼ mbáa bi̱ kaʼwii, xa̱bu̱ buʼko̱ mbaʼyóoʼ maʼjñáa xtíñuu ga̱jma̱a̱ mu̱wan, maʼni mitsagaa asndu gáʼkhíʼ. 9 Asndu káʼnii ma xíliu̱ún xujkhúʼ náa gágrigu bi̱ na̱ʼkha̱ jyo̱o̱ʼ tsáʼkhúun maʼni mitsaga. 10 Asndu tsáá bi̱ gáxkajma náa nigrigu xa̱bu̱ bi̱ gíʼdoo nandii maʼni mitsagaa asndu gáʼkhíʼ ga̱jma̱a̱ asndu tsáa bi̱ gáʼgá kagu̱u̱ rúʼko̱ mbaʼyóoʼ maʼjñáa xtíñuu, mu̱wan, maʼni mitsagaa asndu gáʼkhíʼ. 11 Á mu xa̱bu̱ bi̱ na̱ʼkha̱ jyo̱o̱ʼ tsáʼkhúun na̱nguá niʼjñáa ñawúunʼ nixkajmaa mbáa, xa̱bu̱ buʼko̱ mbaʼyóoʼ maʼjñáa xtíñuu mu̱wan, ga̱jma̱a̱ maʼni mitsagaa asndu gáʼkhíʼ. 12 Á mu xa̱bu̱ buʼko̱ gáxkajma daan ku̱ba̱ʼ, daan rúʼko̱ mbaʼyóoʼ majmigu̱u̱, á mu nindxu̱u̱ dí ixi̱ mbaʼyóoʼ majuiʼñáa.

13 Á mu niwi̱ji̱i̱ dí na̱ʼkha̱ jyo̱o̱ʼ tsáʼkhúun xa̱bu̱ bugi̱ ga̱jma̱a̱ naʼni̱i̱ a̱jkiu̱u̱n mbaʼyóoʼ manújngoo mbá juwan mbiʼi mú maguma kaʼwi̱i̱, ikhaa maʼjñáa xtíñuu muwan ga̱jma̱a̱ iyaʼ mata* ga̱jma̱a̱ maʼni kaʼwi̱i̱. 14 Índo̱ gaʼni migiñuʼ mbiʼi maʼga̱ kagui̱i̱n a̱jmi̱i̱n gúgu̱ o a̱jmi̱i̱n e̱jín paloma maxnájxi̱n náa inuu Jeobá náa riejun guʼwá xtíin rí nagimbíi̱n ga̱jma̱a̱ maxniúu ndxajkun. 15 Ndxajkun maxnájxi̱i̱n ñu̱ʼu̱, mbáa gaxnájxi̱i̱ xóo tsigijñaʼ ga̱jma̱a̱ numuu aʼkhá, imba̱a̱ xóo tsigijñaʼ dí nakarámáʼ. Ndxajkun maʼni kaʼwi̱i̱ aʼkhúun náa inuu Jeobá. Ga̱jma̱a̱ numuu dí na̱ʼkha̱ jyooʼ tsaʼkhúnʼ.

16 Á mu mbáa xa̱biya̱ na̱ʼkha̱ iyaʼ tsígoʼ, mbaʼyóoʼ muwan ga̱jma̱a̱ maʼni mitsagaa asndu gáʼkhíʼ. 17 Mbaʼyóoʼ maʼjñáa asndu xkáʼnii ma xtíin o asndu káʼnii ma dí niguma ga̱jma̱a̱ xtá, náa nigu iyaʼ tsígoʼ mani̱ndxu̱u̱ mitsaga asndu gáʼkhíʼ.

18 Índo̱ mbáa xa̱biya̱ gábóoʼ ga̱jma̱a̱ a̱ʼgu̱ ma̱ngaa nagadíí iyaʼ tsígoʼ mbá najmiin mbaʼyóoʼ muna ma̱ngaa mani̱ndxu̱ún mitsagiin asndu gáʼkhíʼ.

19 Á mu mbáa a̱ʼgu̱ nagajtaa eʼdiuu, mani̱ndxu̱u̱ mitsagaa mbá juwan mbiʼi. Asndu tsáá bi̱ gáxkajmaa mani̱ndxu̱u̱ mitsaga asndu gáʼkhíʼ. 20 Mani̱ndxu̱u̱ mitsaga asndu náá má gábóoʼ mbiʼi rí nagajtaa eʼdiuu, xúʼko̱ ma asndu náá ma rí gági̱ʼi̱ mani̱ndxu̱u̱ mitsaga. 21 Asndu tsáá bi̱ gágugua xiawuu a̱ʼgu̱ mbaʼyóoʼ maʼjñáa xtíñuu, muwan ga̱jma̱a̱ maʼni mitsagaa asndu gáʼkhíʼ. 22 Asndu tsáá bi̱ gáxkajma náa ikhaa gági̱ʼi̱, mbaʼyóoʼ maʼjñáa xtíñuu, mu̱wan ga̱jma̱a̱ maʼni mitsagaa asndu gáʼkhíʼ. 23 Á mu mbáa gáxkrámáʼ náa xia̱wuu o asndu náá ma gági̱ʼi̱ a̱ʼgu̱ buʼko̱, maʼni mitsagaa asndu gáʼkhíʼ. 24 Á mu mbáa xa̱biya̱ gábóoʼ ga̱jma̱a̱ a̱ʼgu̱ ga̱jma̱a̱ nagui̱i̱ eʼdiuu, xa̱bu̱ buʼko̱ mani̱ndxu̱u̱ mitsagaa mbá juwan mbiʼi, asndu káʼnii ma xiawoo náá gábóoʼ mani̱ndxu̱u̱ mitsaga.

25 Á mu mbáa a̱ʼgu̱ nagajtaa mba̱yu̱u̱ʼ mbiʼi eʼdiuu ga̱jma̱a̱ raʼkháa mbiʼi rí kaʼyoo magajtaa o á mu rí ndajyúuʼ itháan mba̱yu̱u̱ʼ ki xóo ma awáán rí kaʼyoo magajtaa eʼdiuu, mani̱ndxu̱u̱ mitsagaa xúgíʼ mbiʼi rí gágajtaa eʼdiuu xó má índo̱ naʼniuu nandiu̱u̱. 26 Asndu káʼnii ma xiawoo náá gábóoʼ mbiʼi rí nagajtaa eʼdiuu mani̱ndxu̱u̱ mitsaga xó ma xiawoo náa naʼgu índo̱ nagajtaa eʼdiuu asndu káʼnii ma náa gági̱ʼi̱ mani̱ndxu̱u̱ mitsaga xó má narígá índo̱ naʼniuu nandiu̱u̱. 27 Asndu tsáá bi̱ gágugua rí niguma tsagáá ma̱ngaa maʼni tsagaa, mbaʼyóoʼ maʼjñáa xtíñuu, mu̱wan ga̱jma̱a̱ maʼni mitsagaa asndu gáʼkhíʼ.

28 Mú, índo̱ gáwi̱ji̱i̱ ragajtaa eʼdiuu, ikhaa manújngoo mbá juwan mbiʼi nda̱wa̱á maʼni kaʼwi̱i̱. 29 Índo̱ gaʼni migiñuʼ mbiʼi maʼga̱ kagui̱i̱n a̱jmi̱i̱n gúgu̱ o a̱jmi̱i̱n e̱jín paloma náa inuu ndxajkun náa riejuun guʼwá xtíin dí nagimbíi̱n. 30 Ndxajkun maxnáxi̱i̱ mbáa ñu̱ʼu̱ xóo tsigijñaʼ ga̱jma̱a̱ numuu aʼkhá, imba̱a̱ maxnáxi̱i̱ xóo tsigijñaʼ dí nakarámáʼ. Ma̱ngaa ndxajkun maʼni kaʼwi̱i̱ aʼkhúún ikhaa náa inuu Jeobá ga̱jma̱a̱ numuu rí nigajtaa eʼdiuu.

31 Ikha jngóo ikháanʼla mbaʼyóoʼ mumbáñún israelitas mu maʼni mikaʼwiin á mu ikhiin naʼni tsagiin, guʼwá xtíin ndrígóʼ dí rígá náa majñu̱únʼ ikhiin maʼni tsaga ma̱ngaa, mbaʼyóoʼ makhañún ga̱jma̱a̱ numuu rígi̱.

32 Rígi̱ nindxu̱u̱ xtángoo rí mbaʼyóoʼ maguma mbáníí á mu mbáa xa̱biya̱ na̱ʼkha̱ jyo̱o̱ʼ tsáʼkhúun o naguma tsagaa ga̱jma̱a̱ numuu rí na̱ʼkha̱ iyaʼ tsígoʼ, 33 xúʼko̱ má gáguma mbáníí ga̱jma̱a̱ numuu mbáa a̱ʼgu̱ bi̱ naʼni mitsagaa índo̱ nagajtaa eʼdiuu, asndu tsáa ma xa̱biya̱ bi̱ na̱ʼkha̱ jyo̱o̱ʼ tsáʼkhúun o a̱ʼgu̱ bi̱ nagajtaa má xúʼko̱ eʼdiuu ma̱ngaa xa̱biya̱ bi̱ gábóoʼ ga̱jma̱a̱ mbáa a̱ʼgu̱ bi̱ nagajtaa eʼdiuu›”.

16 Jeobá niʼtamíjna ga̱jma̱a̱ Moisés nda̱wa̱á rí nikháñún a̱jmi̱i̱n e̱ji̱i̱n Aarón bi̱ nixuʼmamijná mijngii náa inuu Jeobá. 2 Jeobá niʼthúu̱n Moisés: “Aratháán ndxájuaaʼ Aarón rí xáto̱ʼo̱o̱ asndu nguáná má e̱yo̱o̱ ikhaa náa rí mikaʼwu, náa kidxuuʼ cortina, náa inuu rí kúgoo ga̱jma̱a̱ Arca* mu xúʼko̱ xákhañuu, numuu rí ikhúún masngajmáminaʼ náa mbá du̱u̱n náa tsu̱du̱u̱ rí kúgoo ga̱jma̱a̱ arca.

3 Rígi̱ rí gíʼmaa mayéʼga̱ Aarón índo̱ gáto̱ʼo̱o̱ náa rí mikaʼwu: Mbáa xedi̱ mu maxnájxi̱ xóo tsigijñaʼ ga̱jma̱a̱ numuu aʼkhá ma̱ngaa mbáa mugu̱ e̱jmba̱a̱ xóo tsigijñaʼ dí mikarámáʼ. 4 Gíʼmaa magíiʼ xtíin mbi̱jua̱ rí niguma ga̱jma̱a̱ lino dí nindxu̱u̱ mitsúʼkháan, marugoo xuyuuʼ ga̱jma̱a̱ jma̱wu̱n rí chíʼgíiʼ* dí niguma ga̱jma̱a̱ lino, maroʼóo smídúu ga̱jma̱a̱ xtíin dí niguma ga̱jma̱a̱ lino xúʼko̱ má magri̱gu náa edxu̱u̱ xtíin rí kiejuunʼ dí niguma ga̱jma̱a̱ lino. Xtíin rígi̱ nindxu̱u̱ mitsúʼkháan. Mu ma̱ndoo magíiʼ ikhaa, mbaʼyóoʼ muwan nda̱wa̱á magíiʼ.

5 Xa̱bu̱ xuajin Israel gíʼmaa muxnáá a̱jmi̱i̱n e̱jín tsújtuunʼ mu maxnájxi̱ xóo tsigijñaʼ ga̱jma̱a̱ numuu aʼkhá ga̱jma̱a̱ mbáa mugu̱ e̱jmba̱a̱ xóo tsigijñaʼ dí nakarámáʼ.

6 Aarón gíʼmaa maxnájxíi xedi̱ xóo tsigijñaʼ ga̱jma̱a̱ numuu aʼkhúún ga̱jma̱a̱ maʼni kaʼwi̱i̱ aʼkhúun ikhaa gajmíi̱n bi̱ kúwá náa goʼwóo.

7 Ikhú maguajthuun a̱jmi̱i̱n e̱jín tsújtuunʼ mu maʼga̱ kagui̱i̱n náa inuu Jeobá náa riejuun guʼwá xtíin dí nagimbíi̱n. 8 Aarón maríya̱ʼ suerte* náa nájmi̱i̱n e̱jín tsújtuunʼ: Mbáa maxnájxíi náa inuu Jeobá ga̱jma̱a̱ imba̱a̱ maxnájxíi náa Azazel.* 9 Aarón maxnájxi̱ a̱ʼdá tsújtuunʼ náa inuu Jeobá bi̱ nigájnuu náa suerte xóo tsigijñaʼ ga̱jma̱a̱ numuu aʼkhá. 10 A̱ʼdá tsújtuunʼ bi̱ nigájnuu náa suerte bi̱ maxnájxi̱ náa inuu Azazel gíʼmaa maʼga̱ kiʼyáa ndaʼya náa inuu Jeobá, mu náa inuu ikhaa maguma kaʼwi̱i̱ aʼkhá, mu xúʼko̱ ma̱ndoo muxuʼmaa maʼga̱ náa ku̱ba̱ʼ mijxooʼ* mu majuixnájxi̱ náa Azazel.

11 Aarón maxnájxíi xedi̱ xóo tsigijñaʼ ga̱jma̱a̱ numuu aʼkhúun ga̱jma̱a̱ maʼni kaʼwi̱i̱ aʼkhúún gajmíi̱nʼ bi̱ kúwá náa goʼwóo. Nda̱wa̱á maxíyáa xedi̱ bi̱ maxnájxíi xóo tsigijñaʼ ga̱jma̱a̱ numuu aʼkhúun.

12 Nda̱wa̱á mbayá daan náa nagiwa̱nʼ chámbuʼ dí trámáʼ náa inuu dí nakarámáʼ tsigijñaʼ náa inuu Jeobá ga̱jma̱a̱ maguwíi a̱jma̱ ñawúunʼ e̱jndo̱o̱ʼ rí ndataun, ikhú mato̱ʼo̱o̱ kayóo náa awúu̱n dí frájkha cortina. 13 Ma̱ngaa marajkuáa rí ndataun náa aguʼ dí grígu náa inuu Jeobá ga̱jma̱a̱ gúniúu dí ndataun marugoo rí nagúgua̱a̱ ga̱jma̱a̱ Arca dí nimbánuu, mu xúʼko̱ ikhaa xákhañuu.

14 Maxtíjyóoʼ ga̱jma̱a̱ a̱ʼdióo ñawúunʼ mbá chíʼgíiʼ eʼdiuu xedi̱ náa inuu rí nagúgua̱a̱ ga̱jma̱a̱ arca mbá juwan nuthu xígií náa nagájnuu a̱jkha̱ʼ.*

15 Nda̱wa̱á maxíyáa a̱ʼdá tsújtuunʼ bi̱ maxnájxi̱ xóo tsigijñaʼ ga̱jma̱a̱ numuu aʼkhúún xa̱bu̱ xuajin. Mato̱ʼo̱o̱ kayóo eʼdiuu náa awúu̱n náa frájkha cortina, maʼni ikháá xóo má niʼni ga̱jma̱a̱ eʼdiuu xedi̱. Maxtíjyáaʼ náa rí nagúgua̱a̱ ga̱jma̱a̱ arca ma̱ngaa náa inuu.

16 Ikhaa mbaʼyóoʼ maʼni kaʼwi̱i̱ náa rí mikaʼwu dí rígá náa e̱ji̱n Israel bi̱ nindxu̱ún mitsagiin ga̱jma̱a̱ numuu rí nikiéʼkhún ma̱ngaa ga̱jma̱a̱ numuu aʼkhá rí nixudami̱jna̱. Ikháá má gíʼmaa maʼni ga̱jma̱a̱ guʼwá xtíin rí nagimbíi̱n dí rígá náa e̱ji̱n Israel bi̱ nindxu̱ún mitsagiin.

17 Xáʼyóoʼ maxtáa nimbáa xa̱bu̱ índo̱ gáto̱ʼo̱o̱ náa awúu̱n guʼwá xtíin dí nagimbíi̱n mu maʼni kaʼwi̱i̱ aʼkhá náa rí nindxu̱u̱ mikaʼwu asndu índo̱ gágajnáa. Ikhaa maʼni kaʼwi̱i̱ aʼkhúun ma̱ngaa bi̱ kúwá náa goʼwóo xó má xúgíinʼ bi̱ nagímbíin náa Israel.

18 Ikhaa magajnáa mu maʼga̱ náa nakarámáʼ tsigijñaʼ rí gíʼ náa inuu Jeobá mu maʼni kaʼwi̱i̱ aʼkhúun ma̱ngaa mbayá mbá chíʼgíiʼ eʼdiuu xedi̱ ga̱jma̱a̱ mbá chíʼgíiʼ eʼdiuu a̱ʼdá tsújtuunʼ mu maxtajmuu náa xúgíʼ chijyúuʼ náa nakarámáʼ tsigijñaʼ. 19 Ga̱jma̱a̱ a̱ʼdióo ñawúunʼ maxtíjyóoʼ eʼdi mbá juwan nuthu náa nakarámáʼ tsigijñaʼ mu maʼni kaʼwi̱i̱ xúgíʼ rí mitsaga dí nini̱ bi̱ israelitas mu xúʼko̱ manidxu̱u̱ mitsúʼkháan.

20 Índo̱ gámbóo raʼni kaʼwi̱i̱ náa rí mikaʼwu náa guʼwá xtíin ma̱ngaa náa nakarámáʼ tsigijñaʼ ikhú maxnájxi̱ a̱ʼdá tsújtuunʼ bi̱ ndaʼya. 21 Aarón matámáʼ mbá nájma̱ ñawúunʼ náa edxu̱u̱ a̱ʼdá tsújtuunʼ bi̱ ndaʼya ga̱jma̱a̱ maʼthí xúgíʼ dí raʼkhí nini̱ bi̱ israelitas, xúgíʼ rí nikiéʼkhún ga̱jma̱a̱ xúgíʼ aʼkhá rí nixudami̱jna̱ ga̱jma̱a̱ asndu xóo magruaʼmáʼ náa edxu̱u̱ a̱ʼdá tsújtuunʼ, ikhú makuʼmaa maʼga̱a̱ náa ku̱ba̱ʼ mijxooʼ ga̱jma̱a̱ mbáa xa̱bu̱ bi̱ kaxtiyáaʼ maʼni rígi̱. 22 A̱ʼdá tsújtuunʼ magu̱ xúgíʼ aʼkhúún ikhiin ga̱jma̱a̱ maʼga̱a̱ kagu̱ náa ku̱ba̱ʼ mijxooʼ ga̱jma̱a̱ ikhaa makuguaanʼ a̱ʼdá tsújtuunʼ náa ku̱ba̱ʼ mijxooʼ.

23 Ikhú Aarón mato̱ʼo̱o̱ náa awúu̱n guʼwá xtíin rí nagimbíi̱n, maríya̱a̱ʼ xtíin lino dí nigíiʼ índo̱ nito̱ʼo̱o̱ náa rí mikaʼwu ga̱jma̱a̱ maniñuuʼ ikhí. 24 Mbaʼyóoʼ muwan náa rí mikaʼwu ga̱jma̱a̱ magíiʼ xtíñuu. Nda̱wa̱á magajnáa mu maxnájxi̱ tsigijñaʼ ndrígóo rí mikarámáʼ ga̱jma̱a̱ tsigijñaʼ dí mikarámáʼ ndrígún xa̱bu̱ xuajin ma̱ngaa maʼni kaʼwi̱i̱ aʼkhúun xóo má aʼkhúún xa̱bu̱ xuajin. 25 Magruaʼmáʼ sébúu tsigijñaʼ rí nijuixnájxi̱ ga̱jma̱a̱ numuu aʼkhá náa nakarámáʼ tsigijñaʼ mu maʼni gúniúu.

26 Xa̱biya̱ bi̱ nikuʼmaa a̱ʼdá tsújtuunʼ bi̱ majuixnájxíi náa Azazel gíʼmaa maʼjñáa xtíñuu ga̱jma̱a̱ muwan, nda̱wa̱á ma̱ndoo mata̱ʼa̱a̱ʼ náa gíi̱nʼ.

27 Xedi̱ bi̱ nijuixnájxíi ga̱jma̱a̱ numuu aʼkhá ga̱jma̱a̱ a̱ʼdá tsújtuunʼ bi̱ nijuixnájxíi ga̱jma̱a̱ numuu aʼkhá, eʼdiún rí ni̱jkha̱ kiʼyá náa awúu̱n rí mikaʼwu mu maguma kaʼwi̱i̱ ga̱jma̱a̱ aʼkhá ma̱ngaa maʼga̱ kiʼyá náa rexo̱o̱ rí gíi̱nʼ mú mi̱kha xtóo, xuyuuʼ ga̱jma̱a̱ ambóo. 28 Xa̱bu̱ bi̱ matsikháa xúgíʼ rígi̱ gíʼmaa maʼjñáa xtíñuu ga̱jma̱a̱ muwan nda̱wa̱á ma̱ndoo mata̱ʼa̱a̱ʼ náa gíi̱nʼ.

29 Rígi̱ nindxu̱u̱ mbá kiʼtáñajuunʼ rí mbajyúuʼ asndu kámuu náa ikháanʼla: Índo̱ gáyáa gu̱wa̱ʼ mbiʼi dí maʼni juwan igu̱nʼ gíʼmaa muni̱ guabamijná,* xáʼyóoʼ muni̱ nimbá ñajunʼ, ní má ikháanʼla ni má xa̱bu̱ bi̱ na̱ʼkha̱á bi̱ xtáa náa majñala. 30 Mbiʼi rúʼko̱ majmangudi̱i̱ aʼkhála mu miʼtá rí mikaʼwáanʼ. Majngudi̱i̱ xúgíʼ aʼkhála náa inuu Jeobá. 31 Sábado nindxu̱u̱ mbóo mbiʼi dí mbu̱ya̱xa̱la gíʼmaa musngajmá dí kúwáanʼ ngíná ga̱jma̱a̱ numuu aʼkhá ndrígala. Rígi̱ nindxu̱u̱ mbá kiʼtáñajuunʼ dí mbajyúuʼ asndu kámuu.

32 Ndxajkun bi̱ nixtiyáaʼ bi̱ nigiʼi xóo bi̱ mayejgaa edxu̱u̱ maxnájxi̱ tsigijñaʼ dí majngudi̱i̱ ga̱jma̱a̱ aʼkhá ma̱ngaa magíiʼ xtíin rí niguma ga̱jma̱a̱ lino xtíin rí nindxu̱u̱ kiejuunʼ. 33 Ikhaa maʼni rí mani̱ndxu̱u̱ mikaʼwu náa rí phú mikaʼwu, guʼwá xtíin rí nagimbíi̱n, náa nakarámáʼ tsigijñaʼ ga̱jma̱a̱ maʼni kaʼwiin xúgíinʼ ndxajkun ma̱ngaa xúgíinʼ xa̱bu̱ bi̱ nagimbíi̱n. 34 Rígi̱ nindxu̱u̱ mbá kiʼtáñajuunʼ dí mbajyúuʼ asndu kámuu náa ikháanʼla rí maguma kaʼwiin israelitas mbá miʼtsú rí mbá tsiguʼ ga̱jma̱a̱ xúgíʼ aʼkhá rí nuni̱”.

Ikhaa niʼni xóo má Jeobá niʼtañajuunʼ Moisés.

17 Jeobá niʼthúu̱n má xúʼko̱ Moisés: 2 “Aratháán Aarón gajmíi̱n e̱ji̱i̱n ma̱ngaa xúgíinʼ israelitas. Arathún: ‹Rígi̱ dí Jeobá niʼtáñajunʼ maguma:

3 “Á mu mbáa xa̱bu̱ bi̱ xtáa náa xuajin Israel naxíyáa mbáa xedi̱, mbáa mugu̱ o mbáa tsujthu̱nʼ tséʼniuu má awúu̱n o rexo̱o̱ náa giáanʼla, 4 ga̱jma̱a̱ tséjkha̱ kayáa náa riejuun guʼwá xtíin rí nagimbíi̱n mu maxnáxi̱i̱ xóo tsigijñaʼ gamajkhu náa inuu Jeobá náa inuu guʼwá xtíin ndrígóo Jeobá, xa̱bu̱ buʼko̱ magiʼdoo aʼkhúun dí nixidíí eʼdi. Ga̱jma̱a̱ xa̱bu̱ bi̱ naxidíí eʼdi mbaʼyóoʼ makhañúu náa xuajñuu. 5 Mú, bi̱ israelitas xúradíin xujkiún xanáá, mbaʼyóoʼ maguwáʼ kuduun náa inuu Jeobá, náa riejuun guʼwá xtíin dí nagimbíi̱n náa inuu ndxajkun. Ikhiin mbaʼyóoʼ muxnájxi̱ xóo tsigijñaʼ dí tsímáá* náa inuu Jeobá. 6 Ndxajkun maxtíjyooʼ ga̱jma̱a̱ eʼdi náa nakarámáʼ tsigijñaʼ náa inuu Jeobá dí gíʼ náa riejuun guʼwá xtíin dí nagimbíi̱n, ma̱ngaa masngutámáʼ sébú mu maʼni gúni xóo mbá tsigijñaʼ rí mitsaanʼ* ndataun eʼyoo Jeobá. 7 Mu xúʼko̱ ikhiin xúxnajxi̱ itháan tsigijñaʼ náa inún xa̱bu̱ wéñiiʼ* bi̱ kaʼniún xóo tsujthu̱nʼ bi̱ ikhiin kúwá ruyamajkhún.* Rígi̱ nindxu̱u̱ mbá kiʼtáñajunʼ rí maguma mbáníí asndu kámuu náa ikháanʼla náa xúgíinʼ bi̱ maguwáʼ rakúwá nda̱wa̱á”›.

8 Ma̱ngaa mbaʼyóoʼ marathu̱u̱n: ‹Asndu tsáa xa̱bíi bi̱ xtáa náa xuajin Israel o mbáa xa̱bu̱ na̱ʼkha̱á bi̱ xtáa náa majñala ikháanʼ ga̱jma̱a̱ naxnájxi̱ mbá tsigijñaʼ dí nakarámáʼ o i̱mba̱ tsigijñaʼ, 9 ga̱jma̱a̱ tséjkha̱ kayóo náa riejun guʼwá xtíin rí nagimbíi̱n mu maxnájxíi náa inuu Jeobá, xa̱bu̱ buʼko̱ mbaʼyóoʼ makhañúu náa xuajñuu.

10 Á mu mbáa xa̱bu̱ bi̱ xtáa náa xuajin Israel o imba̱a̱ xa̱bu̱ na̱ʼkha̱á bi̱ xtáa náa ikháanʼla na̱ʼkhu̱ asndu káʼnii má eʼdi, ikhúún ni xáʼndoo gáyóo bi̱ na̱ʼkhu̱ eʼdi ga̱jma̱a̱ maxíyáa náa xuajñuu. 11 Numuu rí eʼdi dí rígá náa xuwiʼ naʼni rí ma̱ndoo maxtáa mbáa ga̱jma̱a̱ ikhúún nigruámá’ náa nakarámáʼ tsigijñaʼ mu maʼni ndrígala ikháanʼ mu maʼni jngudi̱i̱ aʼkhála numuu rí eʼdi naʼngo̱o̱ naʼni jngudi̱i̱ aʼkhá ga̱jma̱a̱ numuu vida* dí rígá ikhí. 12 Ikha jngóo ni̱thu̱u̱n israelitas: “Nimbáa rí ikháanʼ xáʼyóoʼ mikhu eʼdi ga̱jma̱a̱ nimbáa xa̱bu̱ na̱ʼkha̱á bi̱ xtáa náa ikháanʼla xáʼyóoʼ mikhu eʼdi”.

13 Á mu mbáa israelita o mbáa xa̱bu̱ na̱ʼkha̱á bi̱ xtáa náa ikháanʼla naxíyáa mbáa xujkhú xáná o mbáa ñu̱ʼu̱ bi̱ ma̱ndoo mikhu̱u̱, ikhaa mbaʼyóoʼ maxidíí eʼdiuu ga̱jma̱a̱ marúguáa ga̱jma̱a̱ ku̱ba̱ʼ. 14 Asndu tsáá má mbáa bi̱ ndaʼya, vida ndrígóo rígá náa eʼdi. Ikha jngóo ni̱thu̱u̱n israelitas: “Xáʼyóoʼ muphula nimbá enii eʼdi numuu rí vida ndrígóo mbáa bi̱ ndaʼya rígá náa eʼdiuu. Bi̱ gíkhu mbaʼyóoʼ makhañúu”. 15 Á mu mbáa, tséʼniuu á mu bi̱ xtáa náa xuajin o mbáa xa̱bu̱ na̱ʼkha̱á, naʼkhu̱u̱ mbáa xujkhúʼ bi̱ nixka̱ma̱a̱ xanáá bi̱ niʼkhu̱u̱ mbáa xujkhú xáná, ikhaa mbaʼyóoʼ maʼjñáa xtíñuu muwan ga̱jma̱a̱ maʼni mitsagaa asndu gáʼkhíʼ. Nda̱wa̱á maʼni kaʼwi̱i̱. 16 Mú, á mu tséʼjñaa xtíñuu ni má tsewan mbaʼyóoʼ maʼni numa̱a̱ aʼkhúun›”.

18 Jeobá niʼtámíjná má xúʼko̱ ga̱jma̱a̱ Moisés ga̱jma̱a̱ niʼthúu̱n: 2 “Arathún israelitas: ‹Ikhúún ni̱ndxu̱ʼ Jeobá Dios ndrígu̱ún. 3 Xúni̱ xó má eni̱ xa̱bu̱ bi̱ kúwá náa Egipto, náa nikuwáanʼla. Ni má xúni̱ xó má eni̱ xa̱bu̱ bi̱ kúwá náa Canaán, náa na̱jkhá kaguáanʼ makuwáanʼla. Xáʼyóoʼ mu̱ni̱ xó má eguʼwún muni̱ ikhiin. 4 Gunimbáníí má xúʼko̱ xtángoo ndrígóʼ ga̱jma̱a̱ gajngruigala xó má naʼthí náa kiʼtáñajunʼ ndrígóʼ. Ikhúún nindxu̱ʼ Jeobá Dios ndrígala. 5 Mbaʼyóoʼ munimbáníí kiʼtáñajunʼ ndrígóʼ ga̱jma̱a̱ xtángoo ndrígóʼ. Xa̱bu̱ bi̱ gáʼnimbánuu maxtáa má xúʼko̱. Ikhúún nindxu̱ʼ Jeobá.

6 Nimbáa dí ikháanʼ xáʼyóoʼ mabóoʼ ga̱jma̱a̱ bi̱ kaʼyoo mijngii. Ikhúún ni̱ndxu̱ʼ Jeobá. 7 Xátaba̱a̱ʼ ga̱jma̱a̱ʼ ana̱a̱ʼ ni ma ru̱dáaʼ.* Numuu rí ikhaa nindxu̱u̱ ru̱dáaʼ, xáʼyóoʼ mata̱ba̱a̱ʼ ga̱jma̱a̱ ikhaa.

8 Xátaba̱a̱ʼ ga̱jma̱a̱ʼ a̱ʼgiu̱u̱ ana̱a̱ʼ. Numuu dí rúʼko̱ gáʼni dí magajnúu gamajkuu ana̱a̱ʼ.

9 Xátaba̱a̱ʼ ga̱jma̱a̱ʼ giʼtia̱a̱ʼ ni má ndxájuaaʼ, tséʼniuu á mu nindxu̱u̱ wáxióo ana̱a̱ʼ o ru̱dáaʼ, tséʼniuu á mu mbóó guʼwá niraxtaa ga̱jma̱a̱ʼ o na̱nguá.

10 Xátaba̱a̱ʼ ga̱jma̱a̱ʼ wáxióo a̱ʼdiáaʼ o wáxióo wáxiaaʼ, numuu dí rúʼko̱ gáʼni rí magajnúu gamajkuaaʼ.

11 Xátaba̱a̱ʼ ga̱jma̱a̱ʼ wáxióo a̱ʼgiu̱u̱ ana̱a̱ʼ. Numuu dí nindxu̱u̱ ndxájuaaʼ, wáxióo ana̱a̱ʼ.

12 Xátaba̱a̱ʼ ga̱jma̱a̱ʼ giʼtio̱o̱ o ndxájuu ana̱a̱ʼ numuu dí ikhaa mbóó eʼdiuu ga̱jma̱a̱ ana̱a̱ʼ.

13 Xátaba̱a̱ʼ ga̱jma̱a̱ʼ giʼtio̱o̱ o ndxájuu ru̱dáaʼ, numuu dí ikhaa mbóó eʼdiuu ga̱jma̱a̱ ru̱dáaʼ.

14 Xátaba̱a̱ʼ ga̱jma̱a̱ʼ a̱ʼgiu̱u̱ giʼtio̱o̱ o ndxájuu ana̱a̱ʼ mu xúʼko̱ xátríyaʼ gamajkuu. Numuu dí ikhaa nindxu̱u̱ ni̱ñáa̱ʼ.*

15 Xátaba̱a̱ʼ ga̱jma̱a̱ʼ guʼgiáanʼ. Numuu dí ikhaa nindxu̱u̱ a̱ʼgiu̱u̱ a̱ʼdiáaʼ, xátaba̱a̱ʼ ga̱jma̱a̱ʼ ikhaa.

16 Xátaba̱a̱ʼ ga̱jma̱a̱ʼ a̱ʼgiu̱u̱ ndxájuaaʼ o giʼtia̱a̱ʼ, numuu dí rúʼko̱ gáʼni dí magajnúu gamajkuu.

17 Xátaba̱a̱ʼ ga̱jma̱a̱ʼ mbáa a̱ʼgu̱ ga̱jma̱a̱ wáxióo, ni má e̱jín xiñíínʼ.* Ikhiin ni̱ndxu̱ún bi̱ mijngii kaʼñúún. Nindxu̱u̱ rí mixkawiʼ wéñuuʼ.

18 Xáyáa giʼtio̱o̱ o ndxájuu a̱ʼgia̱a̱ʼ, mu maʼni imba̱a̱ a̱ʼgia̱a̱ʼ, xátaba̱a̱ʼ ga̱jma̱a̱ʼ ikhaa nákha xóó xtáa a̱ʼgia̱a̱ʼ.

19 Xátaba̱a̱ʼ ga̱jma̱a̱ʼ mbáa a̱ʼgu̱ índo̱ nagajtaa eʼdiuu, numuu rí nindxu̱u̱ mitsagaa.

20 Xátaba̱a̱ʼ ga̱jma̱a̱ʼ a̱ʼgiu̱u̱ xa̱bu̱ bi̱ xtáa mijngii náa xtáa numuu dí rúʼko̱ gáʼni rí maʼni mitsagáán.

21 Xátatsiʼñááʼ rí nimbáa a̱ʼdiáaʼ mixnájxi̱i̱ náa Mólek. Xátani tsagáá mbiʼyuu Dios ndrígáaʼ dí matani̱ xúʼko̱ kaʼnii. Ikhúún nindxu̱ʼ Jeobá.

22 Xátaba̱a̱ʼ ga̱jma̱a̱ʼ mbáa xa̱biya̱ xó má natani̱ ga̱jma̱a̱ʼ mbáa a̱ʼgu̱. Rúʼko̱ nindxu̱u̱ mbá rí mixkawiʼ wéñuuʼ.

23 Nimbáa xa̱biya̱ ragíʼmaa mabóoʼ ga̱jma̱a̱ mbáa xujkhúʼ, numuu dí rúʼko̱ maʼni mitsagaa. Nimbáa a̱ʼgu̱ xáʼyóoʼ mawiji̱ inuu mbáa xujkhúʼ mu mabóoʼ ga̱jma̱a̱. Nanújngurámuuʼ rí Dios niniñuuʼ marigá.

24 Xúni̱ tsagamijná ga̱jma̱a̱ nimbá dí rígi̱, xúgíʼ rígi̱ nini̱ tsagamijná ga̱jma̱a̱ xa̱bu̱ bi̱ maxkawíin náa inala. 25 Ga̱jma̱a̱ numuu rí ku̱ba̱ʼ niguma tsagáá, ikha jngóo ma̱ni̱ rí mamínuuʼ ga̱jma̱a̱ numuu aʼkhúun ga̱jma̱a̱ xa̱bu̱ bi̱ kúwá náa ku̱ba̱ʼ maxkawíin náa ku̱bu̱únʼ. 26 Ikháanʼ gíʼmaa munimbala kiʼtáñajunʼ ga̱jma̱a̱ xtángoo ndrígóʼ ma̱ngaa xúni̱ nimbá rí nindxu̱u̱ mitsaga, xóo xa̱bu̱ bi̱ xtáa náa xuajñuu o bi̱ na̱ʼkha̱á bi̱ xtáa náa ikháanʼla. 27 Xúgíʼ rí mitsaga rígi̱ ni̱ni̱ xa̱bu̱ bi̱ nikúwíin náa ku̱ba̱ʼ rúʼko̱, nákha ikháanʼ xóó tsíkuwáanʼla, ikha jngóo ku̱ba̱ʼ niʼni mitsaga. 28 Mu xúʼko̱ ku̱ba̱ʼ xáxkawáanʼ ikháanʼla ga̱jma̱a̱ numuu rí niguma tsagáá xó má nixkawíin xa̱bu̱ bi̱ kúwá ikhí nákha ikháanʼ xóó tsíguwaʼla. 29 Á mu mbáa naʼni rí mitsaga rígi̱ xúgíinʼ bi̱ nuni̱ mbaʼyóoʼ makhañún náa xuajñún. 30 Ikháanʼ gíʼmaa munimbaníí rí nimbánulú, ikha jngóo ikháanʼ xáʼyóoʼ muni̱ rí nini bi̱ nikúwá ginii nákha ikháanʼ xóó tsíguwaʼla, mu xúʼko̱ xáʼni mitsagáanʼla. Ikhúún nindxu̱ʼ Jeobá Dios ndrígala›”.

19 Jeobá niʼtámíjná mbu̱júu̱ ga̱jma̱a̱ Moisés. Niʼthúu̱n: 2 “Aratamíjná gajmiáanʼ xúgíinʼ xa̱bu̱ xuajin Israel arathún: ‹Gíʼmaa rí manindxala mikaʼwáanʼ, numuu rí ikhúún Jeobá Dios ndrígala, ni̱ndxu̱ʼ mikaʼwún.

3 Mámbáa rí ikháanʼla gíʼmaa mbaʼyamajkuu ru̱dúu̱ ga̱jma̱a̱ anu̱u̱* ma̱ngaa sábado ndrígóʼ. Ikhúún ni̱ndxu̱ʼ Jeobá Dios ndrígala. 4 Xáʼgua̱ kidxúúnʼ dioses bi̱ raguáʼdáá numún ní ma xúni̱i̱ dioses ga̱jma̱a̱ ajua̱nʼ. Ikhúún ni̱ndxu̱ʼ Jeobá Dios ndrígala.

5 Á mu naraxnájxi̱ mbá tsigijñaʼ dí tsímáá* náa inuu Jeobá araxnájxi̱ xóo rí ikhaa ma̱ndoo magruigú. 6 Tsigijñaʼ rí garaxnájxi̱i̱ mbaʼyóoʼ miʼtsu mbiʼi rí naraxnájxi̱ ga̱jma̱a̱ i̱mba̱ néjtsuu, mú rí gáguanúu mbaʼyóoʼ mi̱kha índo̱ gaʼni ajtsú mbiʼi. 7 Á mu natsu tsigijñaʼ dí niguanúu rí maʼni ajtsú mbiʼi, mani̱ndxu̱u̱ xkawiʼ. Ní xáxtrigu. 8 Bi̱ gíkhu maʼni numa̱a̱ ga̱jma̱a̱ numuu aʼkhúun, numuu rí niʼni tsagoo mbá rí mikaʼwu dí kaʼyoo Jeobá, xa̱bu̱ buʼko̱ mbaʼyóoʼ makhañúu náa xuajñuu.

9 Índo̱ gárajxi̱i̱ rí nitadu náa mbayaaʼ, xárajxi̱i̱ rí niguanúu náa rawuunʼ mbayaaʼ ni má xárajxi̱i̱ rí niguanáa. 10 Xátagimbo̱o̱ rí naguanúu náa uva ndrígáaʼ ni má xárajxi̱i̱ rí nijngutígúu náa uva ndrígáaʼ. Atatsíñááʼ mugimbóó bi̱ gíníi ga̱jma̱a̱ xa̱bu̱ bi̱ naguwaáʼ. Ikhúún nindxu̱ʼ Jeobá Dios ndrígala.

11 Xúni̱ kuʼwáʼ, xúni̱ nduwamijnála ni má xúni̱ míjnala dí ra̱májánʼ. 12 Xájmala mbiʼyuʼ índo̱ muxná ajngála mu muni̱ nduwaʼ, á mu xúʼko̱ e̱ni̱ muni̱ tsagaa mbiʼyuu Dios ndrígala. Ikhúún ni̱ndxu̱ʼ Jeobá. 13 Xátani nduwaaʼ xa̱bu̱ numba ga̱jma̱a̱ʼ, xátani kuʼwáaʼ. Xáguanáʼ ga̱jma̱a̱ mbújkha̱a̱ rí kaʼyoo madaaʼ mbáa bi̱ nañejunʼ asndu imbo̱o̱ néjtsuu.

14 Xárata tsríguíi mbáa bi̱ tséʼdxuun ga̱jma̱a̱ xátaʼgíʼ mbá tsáʼkhá rí majngrádaaʼ bi̱ tsíkruigo̱o̱, gamiñáaʼ xtayáá Dios ndrígáʼ. Ikhúún ni̱ndxu̱ʼ Jeobá.

15 Atani̱ xó ma kaʼyoo índo̱ matanimbáníí mbá xkujndu. Xágáwíinʼ a̱jkia̱a̱nʼ xtayáá mbáa xa̱bu̱ ga̱jma̱a̱ numuu rí migínáa ni má xátani̱i̱ rí májánʼ mbáa bi̱ gíʼdoo. Guniu̱u̱n xó má kaʼyoo xa̱bu̱ numba gajmiála.

16 Xájngruiga̱a̱ ratani̱ xtujtaa náa xuajñanʼ. Xátani nimbá rí gamíi maʼni makhañúu* ndxájuaaʼ. Ikhúún ni̱ndxu̱ʼ Jeobá.

17 Xáwiya̱a̱’ xtayáá ndxájuaaʼ náa awúun a̱jkia̱a̱nʼ. Ataxpríguíí xa̱bu̱ numba ga̱jma̱a̱ʼ, mu xúʼko̱ xáraʼdáá aʼkhánʼ mangáán ga̱jma̱a̱ numuu aʼkhá rí ikhaa gákudaminaʼ.

18 Xátanga̱án mataniu̱u̱n ikháán xó má ninia̱a̱ʼ xa̱bu̱ xuajñaanʼ ni má xátiejxíi sia̱nʼ xtañún, gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán. Ikhúún nindxu̱ʼ Jeobá.

19 Gunimbala kiʼtáñajunʼ ndrígóʼ: Xúruwi̱i̱n a̱jmi̱i̱n xujkhúʼ kraʼdiin bi̱ mixtiʼkhu enii, xúdula a̱jma̱ enii tsígáʼ náa mbayala, ni ma xúʼgíiʼ xtíin dí niguma ga̱jma̱a̱ a̱jma̱ enii gúmá rí kanda̱wo̱o̱ʼ.

20 Á mu mbáa xa̱biya̱ nabóoʼ ga̱jma̱a̱ mbáa a̱ʼgu̱ bi̱ nindxu̱u̱ a̱ʼgú ñumbáá ga̱jma̱a̱ kaʼyoo mbayáa i̱mba̱a̱ xa̱bu̱ mú xóó tsejuitsiriya̱a̱ ni ma xóó tséniñaaʼ maʼga̱a̱, mbá najmiin mundri̱gú castigo. Mú xáʼyóoʼ makhañún, numuu rí ikhaa kaʼnii nindxu̱u̱ a̱ʼgú ñumbáá. 21 Xa̱biya̱ gíʼmaa maʼga kayóo mbá tsigijñaʼ ga̱jma̱a̱ numuu rí nikiéʼkúun náa inuu Jeobá náa riejun guʼwá xtíin rí nagimbíi̱n: Mbáa mugu̱ e̱jmba̱a̱ xóo tsigijñaʼ ga̱jma̱a̱ numuu aʼkhúun. 22 Mugu̱ e̱jmba̱a̱ bi̱ maxnáxi̱i̱ xóo tsigijñaʼ ga̱jma̱a̱ numuu rí nikiéʼkúun, ndxajkun maʼni kaʼwi̱i̱ náa inuu Jeobá ga̱jma̱a̱ numuu aʼkhá rí nikudaminaʼ, ikhaa maguma mba̱a̱ a̱jkiu̱ún kuyáá ga̱jma̱a̱ numuu aʼkhá rí niʼni.

23 Índo̱ gáta̱ʼa̱la náa ku̱ba̱ʼ, gudu̱u̱ ixi̱ rí naxná xndúu, gíʼmaa mbu̱ya̱a̱ rí xndúu ixi̱ rúʼko̱, nindxu̱u̱ mitsaga. Mbá ajtsú tsiguʼ gúni tsíngumijnálá ikhí. Xándoo muphula. 24 Índo̱ gaʼni a̱jkhu̱ tsiguʼ xúgíʼ xndúu ixi̱ mani̱ndxu̱u̱ mikaʼwu ga̱jma̱a̱ marigá gagi náa inuu Jeobá. 25 Índo̱ gáʼni witsu tsiguʼ ikhú ma̱ndoo mu̱phu̱ xndúu ixi̱ rúʼko̱, mu xúʼko̱ maxná itháan xndúu. Ikhúún ni̱ndxu̱ʼ Jeobá Dios ndrígala.

26 Xúphula nimbá rí gíʼdoo eʼdi.

Xúrajxi̱ numala ni ma xúni̱ magia.

27 Xudati̱gú níjniúu xtásúun edxa̱la ni ma xúda inuu stawanla.

28 Xúrujtu mijnála ga̱jma̱a̱ numuu mbáa bi̱ nikháñuu ni xúni̱ tatuaje náa xuyala. Ikhúún ni̱ndxu̱ʼ Jeobá.

29 Xátani rí wáxiaaʼ magujuamínáʼ mu xagájnuu gamajkuu, ma̱ngaa mu xáʼni tsagoo náa ku̱ba̱ʼ rí kuwáanʼla ga̱jma̱a̱ numún bi̱ nagujuamíjna.

30 Guyamajkuíí sábado ndrígóʼ guyamajkuíí ga̱jma̱a̱ xúgíʼ a̱jkia̱la náa rí mikaʼwu. Ikhúún ni̱ndxu̱ʼ Jeobá.

31 Xágún gúñún bi̱ nurajxu̱u̱n wajinʼ ni ma xúrajxu̱u̱n bi̱ nuni̱ xawan numuu rí ga̱jma̱a̱ numún ikhiin mani̱ndxu̱ún mitsagiin. Ikhúún ni̱ndxu̱ʼ Jeobá Dios ndrígala.

32 Atayamajkún bi̱ guáʼdáá xngiʼxúún ga̱jma̱a̱ xúgíinʼ bi̱ ni̱ndxu̱ún xabuanii, gamiñáaʼ xtayáá Dios ndrígáaʼ. Ikhúún ni̱ndxu̱ʼ Jeobá.

33 Á mu mbáa xa̱bu̱ na̱ʼkha̱á xtáa ga̱jma̱á nindxa̱la náa ku̱ba̱ʼ ndrígala, xúni̱ gínáa. 34 Gu̱ya̱a̱ mbáa xa̱bu̱ bi̱ na̱ʼkha̱á náa ikháanʼla xó má ikhí xuajñuu gaʼndala ku̱ya̱a̱ xó má eyalá kuyamijná, numuu rí mangáanʼla nini̱ndxa̱la xa̱bu̱ bi̱ naguwa̱áʼ náa ku̱ba̱ʼ ndrígóo Egipto. Ikhúún ni̱ndxu̱ʼ Jeobá Dios ndrígala.

35 Xúninduwaʼ índo̱ nugiewan nguáthá mbaʼ, rí ki̱wu̱n o rí iyoʼ. 36 Á mu najmala balanza dí nagiéwan rí ki̱wu̱n, dí nagiéwan rí nijndoo ga̱jma̱a̱ rí iyoʼ gíʼmaa mugiéwan májánʼ. Ikhúún ni̱ndxu̱ʼ Jeobá Dios ndrígala, bi̱ niguwáanʼla náa ku̱ba̱ʼ ndrígóo Egipto. 37 Gunimbala xúgíʼ kiʼtáñajunʼ ga̱jma̱a̱ xtángoo ndrígóʼ, gunimbánii má xúʼko̱. Ikhúún ni̱ndxu̱ʼ Jeobá›”.

20 Jeobá niʼthúu̱n má xúʼko̱ Moisés: 2 “Mbaʼyóoʼ marathu̱u̱n israelitas: ‹Asndu tsáá xa̱bu̱ bi̱ xtáa náa Israel o mbáa xa̱bu̱ na̱ʼkha̱á bi̱ xtáa náa Israel naxnájxi̱i̱n e̱ji̱i̱n náa Mólek mbaʼyóoʼ makhañúu. Xa̱bu̱ xuajin muxnáá ga̱jma̱a̱ itsí asndu makhañúu. 3 Ikhúún ni xáʼndoʼ gáyóo xa̱bu̱ buʼko̱ maxíyáa náa xuajñuu, numuu rí nixnájxi̱i̱n e̱ji̱i̱n náa Mólek, niʼni tsagoo náa rí mikaʼwu ga̱jma̱a̱ niʼni tsagoo mbiʼyuʼ dí mikaʼwu. 4 Á mu xa̱bu̱ xuajin nuni̱ kiejunʼ rí asndu xóo tséyáá rí naʼni xa̱bu̱ buʼko̱ bi̱ naxnájxi̱i̱n e̱ji̱i̱n náa Mólek ga̱jma̱a̱ tséxíyáa, 5 ikhúún mínuun xáʼndoʼ gáyóo xa̱bu̱ buʼko̱ gajmíi̱n bi̱ kúwá náa goʼwóo. Maxíyáa náa xuajñuu ga̱jma̱a̱ bi̱ mbóó eyamajkuíí* Mólek.

6 Ga̱jma̱a̱ numún xa̱bu̱ bi̱ nagún gúñún bi̱ nurajxu̱u̱n wajinʼ ga̱jma̱a̱ xa̱bu̱ xawan ma̱ngaa tséguájun jmbu náa ikhúún,* xa̱bu̱ buʼko̱ xáʼndoʼ gáñu̱u̱n ga̱jma̱a̱ magúdíin náa xuajñúún.

7 Ikháanʼ ndayóo muni̱ kaʼwumijnála mu maʼni kaʼwáanʼ. Numuu rí ikhúún ni̱ndxu̱ʼ Jeobá Dios ndrígala. 8 Gíʼmaa rí munimbala kiʼtáñajunʼ ndrígóʼ ga̱jma̱a̱ munimbánila. Ikhúún ni̱ndxu̱ʼ Jeobá, bi̱ xtáa raʼni káʼwáanʼla.

9 Á mu mbáa xa̱bu̱ naʼtásríguíi anu̱u̱ o ru̱dúu̱, mbaʼyóoʼ makhañúu* tsiaki̱i̱. Ikhaa má gíʼdoo aʼkhúun dí makhañúu numuu rí niʼtásríguíi anu̱u̱ o ru̱dúu̱.*

10 Á mu mbáa xa̱bu̱ nabóoʼ ga̱jma̱a̱ a̱ʼgiu̱u̱ imba̱a̱ xa̱bu̱, á mu nakudaminaʼ aʼkhá ga̱jma̱a̱ a̱ʼgiu̱u̱ xa̱bu̱ numbaaʼ ga̱jma̱a̱, mbaʼyóoʼ makhañúu tsiaki̱i̱. Mbaʼyóoʼ makhañúu xa̱biya̱ xúʼko̱ má a̱ʼgu̱ bi̱ nikudaminaʼ aʼkhá. 11 Á mu mbáa xa̱bu̱ nabóoʼ ga̱jma̱a̱ a̱ʼgiu̱u̱ anu̱u̱, niríyaʼ gamajkuu anu̱u̱. Mbá najmiin mbaʼyóoʼ makhañún. Ikhiin má guáʼdáá aʼkhúún dí makhañún. 12 Á mu mbáa xa̱bu̱ nabóoʼ ga̱jma̱a̱ guʼgiúunʼ mbaʼyóoʼ makhañún tsiaki̱i̱, ni̱ni̱ mbá rí Dios tániñuʼ marigá, ikhiin má guáʼdáá aʼkhúún rí makhañún.

13 Á mu mbáa xa̱bu̱ nabóoʼ ga̱jma̱a̱ imba̱a̱ xa̱biya̱ xóo má gáʼni ga̱jma̱a̱ mbáa a̱ʼgu̱, mbá najmiin ni̱ni̱ mbá rí xkawiʼ kayúʼ. Mbaʼyóoʼ makhañún tsiaki̱i̱. Ikhiin má guáʼdáá aʼkhúún dí makhañún.

14 Á mu mbáa xa̱bu̱ nabóoʼ ga̱jma̱a̱ mbáa a̱ʼgu̱ ma̱ngaa ru̱dúu̱ a̱ʼgu̱, nindxu̱u̱ mbá rí xkawiʼ kayuuʼ. Mbaʼyóoʼ mikhaa ikhaa gajmíi̱n gu̱ʼu̱, mu xúʼko̱ xátanga̱a̱ marigá dí xkawiʼ náa ikháanʼla.

15 Á mu mbáa xa̱bu̱ nabóoʼ ga̱jma̱a̱ mbáa xujkhúʼ, mbaʼyóoʼ muxíyáala ma̱ngaa ikháanʼla mbaʼyóoʼ muxíyáalá xujkhúʼ. 16 Á mu mbáa a̱ʼgu̱ na̱jkha̱ náa inuu xujkhúʼ mu mabóoʼ ga̱jma̱a̱, mbaʼyóoʼ muxíyáala a̱ʼgu̱ xúʼko̱ má xujkhúʼ ma̱ngaa. Mbaʼyóoʼ makhañún tsiaki̱i̱. Ikhiin má guáʼdáá aʼkhúún rí makhañún.

17 Á mu mbáa xa̱bu̱ ndayáa giʼtio̱o̱ o ndxájuu, tséʼniuu má wáxióo* anu̱u̱ o wáxióo ru̱dúu̱ ga̱jma̱a̱ nabóoʼ ga̱jma̱a̱ rúʼko̱ nindxu̱u̱ mbá rí mixkawiʼ. Mbaʼyóoʼ makhañún náa inún xúgíinʼ xa̱bu̱ xuajin. Ikhaa niríyaʼ gamajkuu giʼtio̱o̱ o ndxájuu. Ikhaa mbaʼyóoʼ maʼni numa̱a̱ aʼkhúun.

18 Á mu mbáa xa̱bu̱ nabóoʼ ga̱jma̱a̱ mbáa a̱ʼgu̱ índo̱ nagajtaa eʼdiuu, mbá najmiin na̱nguá niguaʼdáá gamajkhún dí nagajtaa eʼdiuu. Mbaʼyóoʼ makhañún náa xuajñún.

19 Xátaba̱a̱ʼ ga̱jma̱a̱ʼ giʼtio̱o̱ ndxájuu ru̱dáaʼ ní má giʼtio̱o̱ ndxájuu ana̱a̱ʼ, numuu dí rúʼko̱ gáʼni dí magajnúu gamajkuu mbáa bi̱ xtayáá. Mbá najmiin mbaʼyóoʼ muni numa̱a̱ aʼkhúún. 20 Xa̱bu̱ bi̱ gábóoʼ ga̱jma̱a̱ a̱ʼgiu̱u̱ a̱muu, naríyaʼ gamajkuu a̱muu, mbá najmiin mbaʼyóoʼ muni̱ numa̱a̱ aʼkhúún. Xáguáʼdiin e̱ji̱n makhañún. 21 Á mu mbáa xa̱bu̱ ndayáa a̱ʼgiu̱u̱ ndxájuu o giʼtio̱o̱ rúʼko̱ nindxu̱u̱ mitsaga.* Niríyaʼ gamajkuu ndxájuu o giʼtio̱o̱. Xáguáʼdiin e̱ji̱i̱n.

22 Gunimbalá xúgíʼ kiʼtáñajunʼ ndrígóʼ ga̱jma̱a̱ xúgíʼ xtángoo ndrígóʼ gunimbaníla má xúʼko̱, mu xúʼko̱ náa ku̱ba̱ʼ rí na̱jkha̱ kaguáanʼ makuwáanʼla xaxkawáanʼla. 23 Xákuwáanʼla xóo kúwá xa̱bu̱ numbaaʼ bi̱ maxkawíin náa inala, numuu dí ikhiin nini xúgíʼ rígi̱ ga̱jma̱a̱ nawiyuʼ eni̱. 24 Ikhaa rúʼko̱ numuu rí ni̱tala: “Ikháanʼ maguanála ga̱jma̱a̱ ku̱bu̱únʼ xa̱bu̱ buʼko̱, ikhúún maxna̱la mu maʼni mbayala, náa mbá ku̱ba̱ʼ dí rígá wéñuuʼ yáʼdú ga̱jma̱a̱ jyááʼ. Ikhúún ni̱ndxu̱ʼ Jeobá Dios ndrígala, bi̱ nirkuájñaaʼla náa i̱ʼwáʼ xuajin”. 25 Ikháanʼ ndayóoʼ mbu̱ya̱a̱ xóo mixtiʼkhu nindxu̱u̱ mbáa xujkhúʼ kaʼwii ga̱jma̱a̱ mbáa xujkhúʼ tsagaa, mbáa ñu̱ʼu̱ kaʼwii ga̱jma̱a̱ mbáa bi̱ mitsagaa. Xúni̱ tsagamijnála ga̱jma̱a̱ numuu mbáa xujkhúʼ, mbáa ñu̱ʼu̱ o imba̱a̱ xujkhúʼ bi̱ naxmájtaminaʼ bi̱ ikhúún niraʼwíin mu ikháanʼ mbu̱ya̱a̱la dí ni̱ndxu̱ún mitsagiin. 26 Ikháanʼ ndayóoʼ maʼni mikaʼwáanʼla. Numuu rí ikhúún, Jeobá, ni̱ndxu̱ʼ mikaʼwun. Xtáá rarkuajñála náa i̱ʼwáʼ xuajin mu mani̱ndxa̱la xuajñunʼ.

27 Tséʼniuu á mu xa̱biya̱ o a̱ʼgu̱ bi̱ narajxu̱u̱n wajinʼ o nindxu̱u̱ xa̱bu̱ xawan, mbaʼyóoʼ makhañún. Xa̱bu̱ xuajin mbaʼyóoʼ muxnún ga̱jma̱a̱ itsí asndu makhañún, ikhiin má guáʼdáá aʼkhúún rí makhañún›”.

21 Jeobá niʼthúu̱n Moisés: “Arathún e̱ji̱i̱n Aarón bi̱ ni̱ndxu̱ún ndxajkun: ‹Nimbáa ndxajkun xáʼyóoʼ maʼni tsagaminaʼ ga̱jma̱a̱ numuu mbáa bi̱ nikháñu náa xuajñuu. 2 Mú ma̱ndoo maʼni ga̱jma̱a̱ numún bi̱ mijngii kaʼñúún, xóo ru̱dúu̱, anu̱u̱,* ndxámiuu, wáxióo,* ndxájuu o giʼtio̱o̱, 3 xúʼko̱ má ma̱ndoo maʼni tsagaminaʼ ga̱jma̱a̱ numuu giʼtio̱o̱ o ndxájuu bi̱ nindxu̱u̱ dxáʼgú bi̱ xtáa mijngii ga̱jma̱a̱ á mu dxáʼgú buʼko̱ xóó tséyaa o xóó tsébóʼ ga̱jma̱a̱ xa̱bu̱. 4 Xáʼyóoʼ maʼni tsagaminaʼ ga̱jma̱a̱ numuu mbáa a̱ʼgiu̱u̱ xa̱bu̱ bi̱ xtáa náa xuajñuu. 5 Ikhiin xáʼyóoʼ muda̱ edxu̱ún ni ma náa níjniúu stawúúnʼ ni ma xáʼyóoʼ murujtumijná. 6 Gíʼmaa mani̱ndxu̱ún kaʼwiin náa Dios ga̱jma̱a̱ ragíʼmaa muni tsagáá mbiʼyuu Dios, numuu rí ikhiin ni̱ndxu̱ún bi̱ nuxnajxi̱ tsigijñaʼ gamajkhu dí nakha náa inuu Jeobá ga̱jma̱a̱ nuxnajxi̱ ganitsu náa inuu Dios. Mbaʼyóoʼ mani̱ndxu̱ún mikaʼwiin. 7 Xáʼyóoʼ mbu̱ya̱a̱ mbáa a̱ʼgu̱ bi̱ nagujuamíná’ ni ma a̱ʼgu̱ bi̱ nibóo̱ʼ má ga̱jma̱a̱ xa̱bu̱, ni ma a̱ʼgu̱ bi̱ niniñaa ajmbio̱o̱, numuu rí ndxajkun nindxu̱u̱ mikaʼwii náa Dios. 8 Gíʼmaa matani kaʼwii numuu dí ikhaa naxnáxi̱ ganitsu náa Dios. Ikhaa mbaʼyóoʼ maʼni kaʼwii náa ikháanʼ numuu rí ikhúún, Jeobá bi̱ xtáa raʼni kaʼwáanʼla, ni̱ndxu̱ʼ mikaʼwúnʼ.

9 Á mu mbáa wáxióo ndxajkun xtáa raʼni tsagamina’ numuu rí nagujuamíná’, ikhaa xtáa raʼni tsagaa anu̱u̱. Mbaʼyóoʼ mutsikha̱a̱.

10 Ndxajkun bi̱ phú kayá edxu̱u̱ bi̱ nijuixtiʼyáaʼ náa a̱ngui̱i̱n, bi̱ nisngátrámáʼ aceite rí maxtaʼwíin ga̱jma̱a̱ náa edxu̱u̱, ma̱ngaa bi̱ kaʼyoo magíiʼ xtíin ndrígu̱ún ndxajkun, xáʼyóoʼ maʼni xákhá edxu̱u̱ ni ma xáxkuʼtu xtíñuu. 11 Xáʼyóoʼ maʼga kanuu náa mbáa xa̱bu̱ bi̱ nikháñu. Ni xáʼyóoʼ maʼni tsagamina’ ga̱jma̱a̱ numuu anu̱u̱ o ru̱dúu̱. 12 Xáʼyóoʼ magajnúu náa rí mikaʼwu ni ma xáʼyóoʼ maʼni tsagoo náa goʼwóo Dios, numuu rí tsinaʼ rí mitsuʼkháan ma̱ngaa aceite rí naxtaʼwíin ga̱jma̱a̱ ndrígóo Dios rígá náa ikhaa. Ikhúún ni̱ndxu̱ʼ Jeobá.

13 Ikhaa gíʼmaa mbayáa mbáa a̱ʼgu̱ bi̱ xóó tsébóoʼ ga̱jma̱a̱ nimbáa xa̱bu̱. 14 Xáʼyóoʼ mbayáa mbáa a̱ʼgú xuáʼa̱ ni ma mbáa a̱ʼgu̱ bi̱ niniñanʼ ajmbio̱o̱ o nibóoʼ má ga̱jma̱a̱ xa̱bu̱ ni má bi̱ nigujuamínáʼ, mbaʼyóoʼ mbayáa mbáa a̱ʼgu̱ bi̱ xóó tsébóoʼ ga̱jma̱a̱ xa̱bu̱ bi̱ xtáa náa xuajñuu. 15 Xáʼyóoʼ maʼni tsagiin e̱ji̱i̱n náa inún xa̱bu̱ xuajin numuu dí ikhúún ni̱ndxu̱ʼ Jeobá bi̱ xtáa raʼni káʼwáanʼla›”.

16 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 17 “Aratháán Aarón: ‹Nimbáa a̱ʼdióo, bi̱ gáguwaʼ nda̱wa̱á, bi̱ gíʼdoo mbá nandii xándoo maxnáxi̱ ganitsu náa inuu Dios. 18 Xándoo maʼga kanuu náa nimbáa xa̱bu̱ bi̱ gíʼdoo nandii: Mbáa xa̱bu̱ bi̱ tsíkruigo̱o̱ o gúʼxíiʼ, bi̱ mixngaa inuu o gíʼdoo mbá ñawúunʼ o rajkúu rí itháan mbaʼ, 19 mbáa xa̱bu̱ bi̱ nijmigaʼ ñawúunʼ o rajkúu, 20 mbáa bi̱ ni̱ʼkha̱ ndi̱jtsu̱u̱ o mbáa bi̱ chímbayi̱i̱ʼ, o mbáa bi̱ gíʼdoo nandii náa iduu, mbáa bi̱ nikájxi̱i̱ xndú maña̱ʼ, gíʼdoo nandii náa xtóo xuyuuʼ* o gíʼdoo nandii náa tsáʼkhúun. 21 Nimbáa a̱ʼdióo ndxajkun Aarón bi̱ gíʼdoo mbá nandii xándoo maxnáxi̱ tsigijñaʼ gamajkhu dí nakha náa inuu Jeobá. Numuu dí gíʼdoo nandii, xándoo maxnáxi̱ ganitsu náa inuu Dios. 22 Ma̱ndoo mikhu ganitsu rí mitsúʼkháan rí nijuixnáxi̱ náa Dios, xúʼko̱ má xúgíʼ rí mikaʼwu. 23 Mú xándoo maʼga mijngii náa frájkha cortina ni ma náa nakarámáʼ tsigijñaʼ, numuu dí gíʼdoo mbá nandii. Xátriyaʼ majkuíí náa rí mikaʼwu, numuu dí ikhúún ni̱ndxu̱ʼ Jeobá, bi̱ xtáa raʼni káʼwáanʼla›”.

24 Ikha jngóo Moisés nitamijná ga̱jma̱a̱ Aarón mangiin e̱ji̱i̱n ga̱jma̱a̱ xúgíinʼ israelitas.

22 Jeobá niʼtámíjná mbu̱júu̱ ga̱jma̱a̱ Moisés. Niʼthúu̱n: 2 “Aratháán Aarón gajmíi̱n e̱ji̱i̱n dí tsumáá wéñuuʼ gúni ga̱jma̱a̱ tsigijñaʼ dí kaʼwu rí nuxnajxi̱ israelitas ma̱ngaa dí xúni̱ gachíí mbiʼyuʼ rí mitsúʼkháan ga̱jma̱a̱ numuu dí ikhiin nuxnajxi̱ náa inuʼ. Ikhúún ni̱ndxu̱ʼ Jeobá. 3 Arathún: ‹Xúgíinʼ e̱jña̱la bi̱ gáguwáʼ nda̱wa̱á, asndu tsáá dí a̱ʼdiála bi̱ nindxu̱u̱ mitsagaa, gáʼkha̱ kanuu náa tsigijñaʼ mikaʼwu rí bi̱ israelitas nuxnajxi̱ náa inuu Jeobá, xa̱bu̱ buʼko̱ mbaʼyóoʼ makhañúu náa inuʼ. Ikhúún ni̱ndxu̱ʼ Jeobá. 4 Nimbáa rí a̱ʼdióo Aarón bi̱ gíʼdoo nandii lepra* o bi̱ na̱ʼkha̱ jyooʼ tsáʼkhúun xándoo mi̱khu̱ rí kaʼwu rí najuixnájxi̱, asndu índo̱ gáʼnii kaʼwii. Ni má xándoo mi̱khu̱ xa̱bu̱ bi̱ gáxkajmaa mbáa bi̱ niʼni tsagaminaʼ ga̱jma̱a̱ numuu mbáa bi̱ nikháñúu, ni má xa̱bu̱ bi̱ gáʼkha̱ iyaʼ tsígooʼ, 5 ni má mbáa xa̱bu̱ bi̱ gáxkajmaa mbáa xujkhúʼ tsagaa bi̱ nagún mbá jnduʼ náa tsu̱du̱u̱ ku̱ba̱ʼ o gáguguaa mbáa xa̱bu̱ bi̱ niʼni mitsagaa ga̱jma̱a̱ i̱mba̱ numuu bi̱ ma̱ndoo maʼni tsagaa ma̱ngaa. 6 Bi̱ gágugua rígi̱ maʼni mitsagaa asndu índo̱ gáʼkhíʼ ga̱jma̱a̱ xándoo mi̱khu̱ nimbá rí mikaʼwu asndu índo̱ gúwan. 7 Nda̱wa̱á índo̱ garámaaʼ a̱jkha̱ʼ, maʼni kaʼwi̱i̱ ga̱jma̱a̱ ma̱ndoo mi̱khu̱ rí mikaʼwu numuu rí ni̱ndxu̱u̱ ganitsu ndrígóo. 8 Ni má xándoo mi̱khu̱u̱ mbáa xujkhúʼ bi̱ ndiya̱á bi̱ nixíyáa mbáa xujkhú xáná, numuu dí rúʼko̱ gáʼni dí mani̱ndxu̱u̱ mitsagaa. Ikhúún nindxu̱ʼ Jeobá.

9 Ikhiin ndayóó’ munimbaníí rí kaʼñúún náa ikhúún, mu xúʼko̱ xákiéʼkhúún ga̱jma̱a̱ numuu rígi̱, ma̱ngaa mu xúʼko̱ xákháñún numuu rí nini̱ gachíí rí mikaʼwu. Ikhúún ni̱ndxu̱ʼ Jeobá, bi̱ xtáa raʼni kaʼwáanʼla.

10 Nimbáa xa̱bu̱ bi̱ na̱nguá xtáa náa goʼwóo ndxajkun* xándoo mi̱khu̱ rí mikaʼwu. Ni má mbáa xa̱bu̱ na̱ʼkha̱á bi̱ nawi̱ji̱ náa goʼwóo ndxajkun, ni má mbáa xa̱bu̱ bi̱ nañejunʼ bi̱ nadaaʼ mbújkha̱a̱ xándoo mi̱khu̱ mbá rí mikaʼwu. 11 Mú, á mu ndxajkun naʼtsi̱i̱ mbáa ga̱jma̱a̱ mbújkho̱o̱, xa̱bu̱ buʼko̱ ma̱ndoo mi̱khu̱. Xúʼko̱ má ñumbáá bi̱ nagumiin náa goʼwóo ma̱ndoo mu̱phu̱ ganitsu ndrígóo. 12 Á mu wáxióo ndxajkun ndayáa mbáa bi̱ na̱nguá nindxu̱u̱ ndxajkun, ikhaa xándoo mi̱khu̱ ganitsu mikaʼwu rí najuixnájxi̱. 13 Á mu wáxióo ndxajkun naʼni̱i̱ a̱ʼgú xuáʼa̱ o naniña̱a̱nʼ ajmbio̱o̱, na̱nguá gíʼdiin e̱ji̱i̱n ga̱jma̱a̱ natanga̱a̱ náa goʼwóo anu̱u̱, xó má nákha nindxu̱u̱ dxáʼgú, ikhaa ma̱ndoo mi̱khu̱ ganitsu ndrígóo anu̱u̱. Mú nimbáa xa̱bu̱ bi̱ na̱nguá xtáa náa goʼwóo ndxajkun* xándoo mi̱khu̱.

14 Á mu mbáa xa̱bu̱ táʼyoo xóo ni̱ʼkhu̱ ganitsu kaʼwu rígi̱, ikhaa mbaʼyóoʼ martanga̱a̱ náa ndxajkun tsigijñaʼ kaʼwu rígi̱ ga̱jma̱a̱ magrígu̱u̱ i̱mbá 20 por ciento itháan. 15 Ikha jngóo ndxajkun xáʼyóoʼ muni̱ gachíí tsigijñaʼ kaʼwu dí bi̱ israelitas naguwáʼ kudúún náa inuu Jeobá, 16 mu xúʼko̱ ndxajkun xúni̱ rí xa̱bu̱ muguaʼdáá aʼkhúún dí mu̱phu̱ rí nindxu̱u̱ kaʼwu ga̱jma̱a̱ rúʼko̱ gáʼni rí mumíniiʼ, ikhúún ni̱ndxu̱ʼ Jeobá, bi̱ xtáa raʼni káʼwáanʼla›”.

17 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 18 “Aratháán Aarón gajmíi̱n e̱ji̱i̱n ma̱ngaa xúgíinʼ israelitas arathún: ‹Índo̱ mbáa israelita o mbáa xa̱bu̱ na̱ʼkha̱á bi̱ xtáa náa Israel gáxnájxi̱ mbá tsigijñaʼ dí mikarámáʼ náa inuu Jeobá mu xúʼko̱ maʼnimbánuu rí nikudaminaʼ maʼni o maxnájxi̱i̱ numuu rí xúʼko̱ ni̱ʼkha̱ a̱jkiu̱u̱n ikhaa, 19 ikhaa mbaʼyóoʼ maxnájxi̱i̱ mbáa xedi̱ májáanʼ, mbáa mugu̱ o mbáa chivátu* mu xúʼko̱ maxtriguíi. 20 Xáraxnaxí nimbá dí na̱nguá májánʼ numuu dí rúʼko̱ xájmaa mu maxtriguiin.

21 Á mu mbáa xa̱bu̱ nandoo maxnájxi̱ mbá tsigijñaʼ dí tsímáá* náa inuu Jeobá mu xúʼko̱ manimbánuu rí nikudaminaʼ maʼni o numuu rí ikhaa ni̱ʼkha̱ a̱jkiu̱u̱n maxnájxi̱, ndayóoʼ mani̱ndxu̱u̱ mbáa xujkhúʼ bi̱ tséʼniuu nandii mbáa xedi̱ o mbáa mugu̱ i̱ya̱, mu xúʼko̱ maxtriguíi. Xujkhúʼ ndayóoʼ mani̱ndxu̱u̱ májáanʼ. 22 Xáʼyóoʼ mixnájxi̱i̱ nimbáa xujkhúʼ bi̱ tsíkruigo̱o̱ bi̱ nijmigaaʼ, nithii, bi̱ kagu̱ xndú,* kagu̱ ska o gíʼdoo nandii náa xtóo. Xáʼyóoʼ mixnájxi̱ nimbá dí rígi̱ náa inuu Jeobá, ni má náa nakarámáʼ tsigijñaʼ ndrígóo Jeobá. 23 Ma̱ndoo maraxnajxíi mbáa xedi̱ o mbáa mugu̱ bi̱ gíʼdoo mbá rajkúu itháan mbaʼ o itháan chíʼmbaʼ, xóo mbá tsigijñaʼ dí nagájnuu náa a̱jkia̱a̱nʼ ikháán maraxnajxí, mú xándoo maxtrigú á mu naraxnájxi̱ xóo mbá tsigijñaʼ ga̱jma̱a̱ numuu rí nitaxúdaminaʼ matani̱. 24 Xáraxnajxíi náa Jeobá mbáa xujkhúʼ bi̱ na̱nguá májánʼ xndúu, bi̱ nixtujtsi, nirawíi o niturígú. Xáʼyóoʼ maraxnajxíi xujkhúʼ buʼko̱ náa ku̱ba̱ʼ ndrígáaʼ. 25 Xúndríguíi mbáa xujkhúʼ bi̱ xúʼko̱ kaʼnii bi̱ maxniála mbáa xa̱bu̱ na̱ʼkha̱á mu muxnajxí xóo tsigijñaʼ náa Dios, numuu rí xujkhúʼ buʼko̱ nichíin ga̱jma̱a̱ guáʼdáá nandii. Xáxtriguíin mu maguma rí májánʼ ga̱jma̱a̱ numala›”.

26 Jeobá niʼtámíjná mbu̱júu̱ ga̱jma̱a̱ Moisés, niʼthúu̱n: 27 “Índo̱ gáxtáa mbáa a̱ʼdá xédí, a̱ʼdá múgú o mbáa a̱ʼdá tsújthúunʼ, maguanúu ga̱jma̱a̱ ru̱dúu̱ mbá juwan mbiʼi, mú índo̱ gáʼni migiñuʼ mbiʼi, ma̱ndoo maxtriguíi xóo tsigijñaʼ, mbá tsigijñaʼ gamajkhu rí mi̱kha náa inuu Jeobá. 28 Xúxíyáa ikháá má mbiʼi mbáa xedi̱ ga̱jma̱a̱ a̱ʼdióo, o mugu̱ ga̱jma̱a̱ a̱ʼdióo.

29 Á mu nuxnájxi̱ mbá tsigijñaʼ gamajkhu náa inuu Jeobá mu muxna̱a̱la núma̱aʼ, guxnajxíla xóo ikhaa ma̱ndoo magruigú. 30 Mbaʼyóoʼ muphula ikháá má mbiʼi rúʼko̱, xúniʼñánʼla nimbá índo̱ gáʼni i̱mba̱ néjtsuu. Ikhúún ni̱ndxu̱ʼ Jeobá.

31 Ndayóoʼ dí munimbala kiʼtáñajunʼ ndrígóʼ ga̱jma̱a̱ munimbánila. Ikhúún ni̱ndxu̱ʼ Jeobá. 32 Xúni̱ gachííla mbiʼyuʼ rí mikaʼwu, ikhúún ma̱ni̱ kaʼwumina̱a̱ʼ náa majñu̱únʼ israelitas. Ikhúún ni̱ndxu̱ʼ Jeobá bi̱ xtáa raʼni káʼwáanʼla. 33 Bi̱ nigúwáanʼla náa ku̱ba̱ʼ ndrígóo Egipto mu mani̱ndxu̱ʼ Dios ndrígala. Ikhúún ni̱ndxu̱ʼ Jeobá”.

23 Jeobá niʼtámíjná ga̱jma̱a̱ Moisés, niʼthúu̱n: 2 “Aratamijná gajmiáanʼ israelitas ga̱jma̱a̱ arathún: ‹Ndxa̱a̱ rí mbaʼyóoʼ mu̱ni̱ ri̱ya̱a̱ʼla náa inuu Jeobá mbaʼyóoʼ mani̱ndxu̱u̱ mbá mbiʼi mitsúʼkháan rí magimbáanʼla mu mbuyamajkuííla Dios. Mbiʼi rígi̱ nindxu̱u̱ dí mu̱ni̱ ri̱ya̱a̱ʼla ndxa̱a̱:

3 Ma̱ndoo muñajuunʼla mbá majun mbiʼi, mú índo̱ gáʼni juwan mbiʼi nindxu̱u̱ mbá sábado rí mbaʼyóoʼ mbu̱ya̱a̱ jxa̱la, mbá mbiʼi rí mbaʼyóoʼ mbuyamajkuííla Dios. Xáʼyóoʼ mu̱nila nimbá enii ñajunʼ. Nindxu̱u̱ mbá sábado náa Jeobá, tséʼniuu má náá kuwáanʼla.

4 Rígi̱ nindxu̱u̱ ndxa̱a̱ rí mbaʼyóoʼ mu̱ni̱ ri̱ya̱a̱ʼla náa inuu Jeobá, mbiʼi rí mitsúʼkháan dí ikháanʼla magimbáanʼla mu mbuyamajkuíí Dios mbiʼi rí kaʼyoo mu̱ni̱ ri̱ya̱a̱ʼla. 5 Índo̱ gáʼni timbá gu̱nʼ, wakíʼ rí maʼni 14 ñajunʼ gu̱nʼ mu̱ni̱ ri̱ya̱a̱ʼla Pascua náa inuu Jeobá.

6 Mbiʼi 15 ñajunʼ gu̱nʼ rúʼko̱ mbaʼyóoʼ mu̱ni̱ ri̱ya̱a̱ʼla Ndxo̱o̱ Pan dí ragíʼdoo Levadura* náa inuu Jeobá. Mbaʼyóoʼ muphula pan dí ragíʼdoo levadura mbá juwan mbiʼi. 7 Índo̱ gáʼni timbá mbiʼi mbaʼyóoʼ magímbáanʼla mu mbuyamajkuíí Dios. Xáʼyóoʼ maguma nimbá enii ñajunʼ. 8 Rí maguma, muxnajxíla mbá tsigijñaʼ gamajkhu rí mikarámáʼ náa inuu Jeobá mbá juwan mbiʼi. Índo̱ gáʼni juwan mbiʼi mbu̱júu̱ magimbáanʼla mu mbuyamajkuíí Dios. Xáʼyóoʼ maguma nimbá enii ñajunʼ›”.

9 Jeobá niʼtámíjná má xúʼko̱ ga̱jma̱a̱ Moisés: 10 “Aratamíjná gajmiáanʼ israelitas, arathún: ‹Índo̱ gáta̱ʼa̱la náa ku̱ba̱ʼ rí ikhúún maxnala ga̱jma̱a̱ índo̱ gúgímbo̱o̱ rí nidula mbaʼyóoʼ muʼgua kuyalaʼ mbá xtájxu̱u̱ʼ rí nijma̱a̱ ginii kayuuʼ náa ni̱du náa inuu ndxajkun. 11 Ikhaa maʼbajngaa xtájxu̱u̱ʼ rígi̱ gi̱i̱ ñuʼún náa inuu Jeobá mu xúʼko̱ maxtrigú. Ndxajkun maʼni rígi̱ índo̱ gájngoo mbiʼi sábado. 12 Mbiʼi rí gúbajngaa xtájxu̱u̱ʼ rí nijuiʼdu, ikháanʼla mbaʼyóoʼ muxnajxíi̱ mbáa mugu̱, bi̱ májáanʼ, bi̱ gíʼdoo mbá tsiguuʼ xóo mbá tsigijñaʼ gamajkhu rí mikarámáʼ náa inuu Jeobá. 13 Tsigijñaʼ rí tsígáʼ rí muxnajxí mani̱ndxu̱u̱ a̱jma̱ kilo* harina dí itháan májánʼ dí kanda̱wo̱o̱ʼ ga̱jma̱a̱ aceite, mbá tsigijñaʼ gamajkhu rí mi̱kha náa inuu Jeobá rí mitsaanʼ* ndataun eʼyoo ikhaa. Tsigijñaʼ dí magadírámuuʼ mani̱ndxu̱u̱ mbá litro* vino. 14 Xúphula pan ni má tsígáʼ rí nigu̱ʼ ni má tsígáʼ rí nuxi̱ʼ asndu índo̱ gárámuuʼ mbiʼi rúʼko̱, asndu índo̱ gúʼgua ku̱ya̱la tsigijñaʼ gamajkhu náa inuu Dios. Rígi̱ nindxu̱u̱ mbá kiʼtáñajunʼ rí mambanúu asndu kámuu náa xúgíinʼ bi̱ gáguwáʼ rakúwá nda̱wa̱á, tséʼniuu má náá gákuwáanʼla.

15 Nda̱wa̱á rí gájngoo mbiʼi sábado, mbaʼyóoʼ muraxnuu dí manújngoo mbá juwan xmáná, mugíʼdi̱i̱ muraxnuula mbiʼi rí gúʼgua kuyala xtájxu̱u̱ʼ rí ni̱dula xóo tsigijñaʼ rí mubajngaa, mbaʼyóoʼ manújngoo mbá juwan xmáná kañiʼ. 16 Muraxnuula rí manújngoo 50 mbiʼi, asndu mbiʼi nda̱wa̱á dí gárámuuʼ mbá juwan sábado, ikhú mbaʼyóoʼ muxnajxíla xóo tsigijñaʼ rí tsígáʼ nuxi̱ʼ náa inuu Jeobá. 17 Asndu náá má kuwáanʼla mbaʼyóoʼ maguwáʼ kudala a̱jma̱ pan xóo tsigijñaʼ rí mubajngaa. Rígi̱ mbaʼyóoʼ maguma májáánʼ ga̱jma̱a̱ a̱jma̱ kilo harina dí itháan májánʼ ma̱ngaa mi̱gu̱ʼ ga̱jma̱a̱ levadura. Dí najma̱a̱ ginii kayuuʼ nindxu̱u̱ ndrígóo Jeobá. 18 Índo̱ gáguwaʼ kudala pan mbaʼyóoʼ muxnaxíin mbá juwiin mugu̱ míjíinʼ* bi̱ mbá tsigúnʼ, mbáa xedi̱ ga̱jma̱a̱ a̱jmi̱i̱n mugu̱. Majmaa xóo tsigijñaʼ gamajkhu dí mikarámáʼ náa inuu Jeobá mbóó ga̱jma̱a̱ tsigijñaʼ rí tsígáʼ ma̱ngaa tsigijñaʼ dí magadirámuuʼ, nindxu̱u̱ mbá tsigijñaʼ gamajkhu rí mi̱kha rí mitsaanʼ ndataun eʼyoo Jeobá. 19 Ma̱ngaa mbaʼyóoʼ muxnajxíi mbáa a̱ʼdá tsújthun’ xóo tsigijñaʼ ga̱jma̱a̱ numuu aʼkhá ma̱ngaa a̱jmi̱i̱n mugu̱ bi̱ mbá tsiguúnʼ xóo mbá tsigijñaʼ dí tsímáá.* 20 Ndxajkun maʼbajngaa gi̱i̱ ñuʼún xuñúnʼ a̱jmi̱i̱n mugu̱, xúʼko̱ má pan dí nijuixnájxi̱ xóo tsigijñaʼ rí nijma̱a̱ ginii kayuuʼ dí maʼbajngaa náa inuu Jeobá. Mbaʼyóoʼ mani̱ndxu̱u̱ mbá rí mikaʼwu náa inuu Jeobá, mbá rí kaʼyoo ndxajkun. 21 Ikháá má mbiʼi rígi̱ magimbáanʼla mu mbuyamajkuíí Dios. Xáʼyóoʼ maguma nimbá enii ñajunʼ. Rígi̱ nindxu̱u̱ mbá kiʼtáñajunʼ rí magumambáníí asndu kámuu náa xúgíinʼ bi̱ gáguwáʼ rakúwá nda̱wa̱á tséʼniuu má náa gákuwáanʼla.

22 Índo̱ gúra̱jxi̱i̱ dí ni̱dula náa mbayala, xáʼyóoʼ murajxi̱i̱ xúgíʼ dí rígá náa rawuunʼ mbayala ni má xurajxi̱i̱ rí niguanáa. Mbaʼyóoʼ muniʼñááʼ dí murajxi̱i̱ xa̱bu̱ ngíníi ga̱jma̱a̱ xa̱bu̱ naguwaáʼ náa ikháanʼla. Ikhúún ni̱ndxu̱ʼ Jeobá Dios ndrígala›”.

23 Jeobá niʼthúu̱n má xúʼko̱ Moisés: 24 “Arathún israelitas: ‹Timbá mbiʼi rí gáʼni juwan igu̱nʼ, mbaʼyóoʼ mbu̱ya̱a̱ jxa̱la, mbá mbiʼi dí mawán trompeta. Mu marmáʼáan a̱jkia̱la dí nindxu̱u̱ mbá mbiʼi rí magimbáanʼla mu mbuyamajkuíí Dios. 25 Xáʼyóoʼ mu̱ni̱la nimbá enii ñajunʼ. Ga̱jma̱a̱ mbaʼyóoʼ muxnajxíla mbá tsigijñaʼ gamajkhu dí mikarámáʼ náa inuu Jeobá›”.

26 Jeobá ma̱ngaa niʼthúu̱n Moisés: 27 “Mú índo̱ gáyáa gu̱wa̱ʼ mbiʼi rí juwan igu̱nʼ mani̱ndxu̱u̱ mbóoʼ mbiʼi rí majngudi̱i̱ aʼkhá, mbaʼyóoʼ magimbáanʼla mu mbuyamajkuíí Dios, ma̱ngaa mu̱ni̱ wabamijnála* ga̱jma̱a̱ muxnajxí mbá tsigijñaʼ gamajkhu dí mi̱kha náa inuu Jeobá. 28 Xáʼyóoʼ muñejunʼla mbiʼi kiejunʼ rígi̱, numuu rí mani̱ndxu̱u̱ mbá mbiʼi rí majngudi̱i̱ aʼkhála náa inuu Jeobá Dios ndrígala. 29 Asndu tsáá bi̱ tséʼni guabaminaʼ mbaʼyóoʼ makhañúu náa xuajñuu. 30 Ikhúún ma̱ni̱ gámbíin náa xuajñún xúgíinʼ bi̱ gúni̱ asndu káʼníí má ñajunʼ mbiʼi rígi̱. 31 Xúnila nimbá enii ñajunʼ. Rígi̱ nindxu̱u̱ mbá kiʼtáñajunʼ, mbaʼyóoʼ magumambáníí asndu kámuu náa xúgíinʼ bi̱ gáguwáʼ rakúwá nda̱wa̱á, tséʼñuu má náá gákuwáanʼla. 32 Nindxu̱u̱ mbá sábado náa rí mbaʼyóoʼ mbuya̱a̱ jxa̱la, ikháanʼ mbaʼyóoʼ mu̱ni̱ wabamijnála mbiʼi mijna gu̱wa̱ʼ ñajunʼ gu̱nʼ. Mbaʼyóoʼ muniriya̱a̱ʼla sábado. Wakíʼ índo̱ narámaaʼ a̱jkha̱ʼ asndu índo̱ gáramaaʼ a̱jkha̱ʼ dí imbo̱o̱ mbiʼi”.

33 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 34 “Arathún israelitas: ‹Índo̱ gáʼni 15 ñajunʼ rí juwan igu̱nʼ magi̱ʼdu̱u̱ Ndxo̱o̱ guʼwá xtúguá* náa Jeobá, mbajyúuʼ mbá juwan mbiʼi. 35 Timbá mbiʼi mbaʼyóoʼ magimbáanʼla mu mbuyamajkuíí Dios, xáʼyóoʼ mu̱nila nimbá ñajunʼ. 36 Mbá juwan mbiʼi mbaʼyóoʼ muxnajxíla tsigijñaʼ gamajkhu dí mi̱kha náa inuu Jeobá. Índo̱ gáʼni migiñuʼ mbiʼi mbaʼyóoʼ magimbáanʼla mu mbuyamajkuíí Dios. Ga̱jma̱a̱ muxnajxí tsigijñaʼ gamajkhu dí mi̱kha náa inuu Jeobá, mani̱ndxu̱u̱ mbá mbiʼi kiejunʼ rí magimbáanʼla. Xáʼyóoʼ mu̱nila nimbá enii ñajunʼ.

37 Rígi̱ nindxu̱u̱ ndxa̱a̱ rí mbaʼyóoʼ mu̱ni̱ riya̱a̱la náa inuu Jeobá mbiʼi rí ikháanʼla magimbáanʼla mu mbuyamajkuíí Dios, mu muxnajxíla tsigijñaʼ gamajkhu dí mi̱kha náa inuu Jeobá, tsigijñaʼ dí mikarámáʼ, tsigijñaʼ rí tsígáʼ ga̱jma̱a̱ tsigijñaʼ dí magadírámuuʼ, xó má kaʼyoo maguma mámbá mbiʼi. 38 Tsigijñaʼ rígi̱ mbaʼyóoʼ muxnajxíla náa inuu Jeobá, wájííʼ rí nuxnajxíila rí mbiʼi sábado ga̱jma̱a̱ i̱ʼwáʼ rí nuxna̱a̱la, xúʼko̱ má tsigijñaʼ ga̱jma̱a̱ numuu rí nixuʼdámíjná munila. Ma̱ngaa tsigijñaʼ rí nuxnajxí náa inuu Jeobá numuu rí xúʼko̱ na̱ʼkha̱ a̱jkia̱la ikháanʼ. 39 Índo̱ gáʼni 15 ñajunʼ rí juwan igu̱nʼ, índo̱ gámbála rurajxi̱i̱ dí ni̱dula, mbaʼyóoʼ muniriya̱a̱ʼ mbá ndxa̱a̱ náa Jeobá mbá juwan mbiʼi. Timbá mbiʼi mbaʼyóoʼ mbu̱ya̱a̱ jxa̱la, xúʼko̱ má índo̱ gárámuuʼ rí migiñuʼ mbiʼi, mbaʼyóoʼ mbu̱ya̱a̱ jxa̱la. 40 Timbá mbiʼi murajxi̱i̱ xndúu ixi̱ rí mitsaanʼ, inúu palmera ga̱jma̱a̱ ñawúunʼ ixi̱ maxaʼ, ma̱ngaa ixi̱ dí rígá náa mata̱a̱.* Makuwáanʼla gagi náa inuu Jeobá Dios ndrígala, mbá juwan mbiʼi. 41 Ndxa̱a̱ rígi̱ muniriya̱a̱ʼla náa inuu Jeobá, mbá juwan mbiʼi rí mbá tsiguʼ. Mbaʼyóoʼ muniriya̱a̱ʼla índo̱ gáʼni juwan igu̱nʼ. Kiʼtáñajunʼ rígi̱ magumambáníí asndu kámuu, náa xúgíinʼ bi̱ gáguwáʼ rakúwá nda̱wa̱á. 42 Ikháanʼ mbaʼyóoʼ makuwáanʼla náa guʼwá xtúguá mbá juwan mbiʼi, xúgíinʼ bi̱ ni̱ndxu̱ún xa̱bu̱ Israel mbaʼyóoʼ makuwá náa guʼwá xtúguá. 43 Mu xúgíinʼ bi̱ gáguwáʼ rakúwá nda̱wa̱á mbuyáá rí ikhúún ni̱ni̱ rí bi̱ israelitas makuwá náa guʼwá xtúguá índo̱ nigúwíin náa ku̱ba̱ʼ ndrígóo Egipto. Ikhúún ni̱ndxu̱ʼ Jeobá Dios ndrígala›”.

44 Moisés niʼthúún israelitas ndxa̱a̱ rí ndayóoʼ muni̱ri̱ya̱a̱ʼ náa Jeobá.

24 Jeobá nitanga̱a̱ niʼtámíjná ga̱jma̱a̱ Moisés, ma̱ngaa niʼthúu̱n: 2 “Arathún israelitas rí maguwáʼ kudúún aceite dí mbawíí oliva mu mambiʼi, mu xúʼko̱ lámpara nditháan xájuíyuuʼ. 3 Xúgíʼ mbruʼun Aarón gíʼmaa maskámaa lámpara, dí frúwan náa i̱mba̱ níjniúu cortina náa kraʼa arca* dí nimbánuu, mambiʼi má xúʼko̱ náa inuu Jeobá wakíʼ asndu miʼcha̱. Rígi̱ nindxu̱u̱ mbá kiʼtáñajunʼ rí mbaʼyóoʼ munimbáníí má xúʼko̱ náa xúgíinʼ bi̱ gáguwáʼ rakúwá nda̱wa̱á. 4 Ikhaa gíʼmaa magiʼdoo xawii lámpara dí trámáʼ náa candelabro dí ki̱ʼni̱ ga̱jma̱a̱ mbawíí oro náa inuu Jeobá.

5 Mbi̱ya̱ harina dí itháan májánʼ mu matani̱ mbá 12 pan rí dijndi dí mataxuʼmbúʼ náa horno ga̱jma̱a̱ majmaa a̱jma̱ kilo* mu matani̱ mámbá pan. 6 A̱jma̱ ru̱tsu̱u̱ gátarngujxi̱ pan dijndi, majun gáʼni náa mámbá ru̱tsu̱u̱ náa tsu̱du̱u̱ mesa rí niguma ga̱jma̱a̱ mbawíí oro dí wíji̱ náa inuu Jeobá. 7 Gíʼmaa mataxtrámaʼ olíbano náa tsu̱du̱u̱ dí mámbá ru̱tsu̱u̱, ikháán matatsika olíbano mu xúʼko̱ ikhaa marmáʼáan a̱jkiu̱u̱n kaʼyoo pan, mani̱ndxu̱u̱ xóo tsigijñaʼ rí najuixnájxi̱ dí mi̱kha náa inuu Jeobá. 8 Xúgíʼ sábado, mbaʼyóoʼ mátarngujxi̱ pan náa inuu Jeobá. Rígi̱ nindxu̱u̱ dí nimbánuu gajmíi̱nʼ israelitas asndu kámuu. 9 Mani̱ndxu̱u̱ ndrígóo Aarón gajmíi̱n e̱ji̱i̱n, ikhiin mu̱phu̱ náa rí mikaʼwu numuu rí nindxu̱u̱ mikaʼwu wéñuuʼ náa ikhaa, tsigijñaʼ gamajkhu dí nakarámáʼ náa inuu Jeobá. Rígi̱ nindxu̱u̱ kiʼtáñajunʼ dí mbajyúuʼ asndu kámuu”.

10 Náa majñu̱únʼ israelitas xtáa mbáa a̱ʼdióo a̱ʼgú israelita ga̱jma̱a̱ anu̱u̱ nindxu̱u̱ xa̱bu̱ egipcio, dxámá bugi̱ nigi̱ʼdu̱u̱ ga̱jma̱a̱ i̱mba̱a̱ israelita náa gíi̱nʼ. 11 A̱ʼdióo a̱ʼgú israelita nigíʼdu̱u̱ niʼthá wéñuuʼ Mbiʼyuu* ga̱jma̱a̱ niʼtátsríguíi. Ikha jngóo nigún kuya̱a̱ náa xtáa Moisés. Ru̱dúu̱ mbiʼyuu Selomit, wáxióo Dibrí, bi̱ na̱ʼkha̱ náa xuajin chíʼgíiʼ ndrígóo Dan. 12 Ikhaa maxtuguáraʼaa asndu índo̱ majuiʼyáá dí gaʼthí Jeobá ga̱jma̱a̱ numuu.

13 Jeobá niʼthúu̱n Moisés: 14 “Atríyáaʼ náa rexo̱o̱ rí giáa̱nʼ bi̱ niʼthá wéñuuʼ mbiʼyuʼ ga̱jma̱a̱ xúgíinʼ bi̱ nidxawíín gíʼmaa muta̱ma̱ʼ ñawúúnʼ náa edxu̱u̱ ikhaa ga̱jma̱a̱ nda̱wa̱á xúgíinʼ xa̱bu̱ xuajin muxnáá ga̱jma̱a̱ itsí. 15 Gíʼmaa marathu̱u̱n israelitas: ‹Á mu mbáa xa̱bu̱ niʼthá wéñuuʼ Dios ndrígóo, ikhaa maʼni numa̱a̱ aʼkhúun. 16 Bi̱ naʼthá wéñuuʼ mbiʼyuu Jeobá gíʼmaa makhañúu. Xúgíinʼ xa̱bu̱ xuajin gíʼmaa muxnáá ga̱jma̱a̱ itsí tséʼniuu á mu nindxu̱u̱ xa̱bu̱ bi̱ na̱ʼkha̱á o xa̱bu̱ bi̱ xtáa má ikhí, ikhaa gíʼmaa makhañúu numuu rí niʼthá wéñuuʼ mbiʼyuu ikhaa.

17 Á mu xa̱bu̱ naxíyáa ndxájuu gíʼmaa makhañúu. 18 Asndu tsáa bi̱ gáʼni gawúunʼ o gaxíyáa xujkhúʼ karaʼdaa mbaʼyóoʼ maʼni numa̱a̱, mu xúʼko̱ maxtiʼkuriya̱a̱ʼ ga̱jma̱a̱ i̱mba̱a̱ xujkhúʼ. 19 Á mu mbáa xa̱bu̱ niʼni gawúunʼ xa̱bu̱ numbaaʼ ga̱jma̱a̱ʼ, ikhú gíʼmaa miʼni̱i̱ xó má ikhaa niʼniuu. 20 Á mu nixpígáaʼ* mbaʼyóoʼ muxpígáaʼ ma̱ngaa, á mu niríyaʼ iduu mbaʼyóoʼ magajnúu iduu ma̱ngaa, á mu niríyaʼ iñuuʼ mbaʼyóoʼ magajnúu iñuuʼ ma̱ngaa, gíʼmaa maguma gawíínʼ xóo má ikhaa niʼniuu. 21 Bi̱ gáʼnii gawúunʼ o gáxíyáa mbáa xujkhúʼ mbaʼyóoʼ maʼni numa̱a̱, á mu mbáa naʼni gawúunʼ o gáxíyáa mbáa xa̱bu̱ mbaʼyóoʼ makhañúu.

22 Gíʼmaa majmaaʼ ikháá má xtángoo náa xa̱bu̱ bi̱ na̱ʼkha̱á xóo má xa̱bu̱ bi̱ xtáa má ikhí, numuu dí ikhúún nindxu̱ʼ Jeobá Dios ndrígala›”.

23 Ikhú Moisés niʼtáminaʼ gajmíi̱nʼ israelitas ga̱jma̱a̱ ikhiin niríyáaʼ náa rexo̱o̱ dí gíi̱nʼ bi̱ niʼthá wéñuuʼ mbiʼyuu Dios, nixnáá ga̱jma̱a̱ itsí. Xúʼko̱ israelitas nini̱ xó má Jeobá niʼtáñajuunʼ Moisés.

25 Jeobá nitanga̱a̱ niʼtámíjná ga̱jma̱a̱ Moisés náa kúbá Sinaí, niʼthúu̱n: 2 “Arathún israelita: ‹Índo̱ gátu̱ʼu̱u̱n náa ku̱ba̱ʼ dí ikhúún maxnu̱u̱n. Ikhiin mbaʼyóoʼ muniña̱a̱ʼ ku̱ba̱ʼ rí mbayáa jxu̱u̱ʼ xóo mbá sábado náa Jeobá. 3 Mbá majun tsiguʼ gíʼmaa matadu náa mbayaaʼ ga̱jma̱a̱ matrujturígúu ñawúunʼ ixi̱ uva, ma̱ngaa matrajxi̱i̱ rí nitadu. 4 Índo̱ gáʼni juwan tsiguʼ, gíʼmaa mani̱ndxu̱u̱ xóo mbá sábado rí mbayáa jxu̱u̱ʼ ku̱ba̱ʼ. Mani̱ndxu̱u̱ mbá sábado náa Jeobá, ragíʼmaa matadu náa mbayaaʼ, ni má matrujturígúu ñawúunʼ ixi̱ uva. 5 Ragíʼmaa matrajxi̱i̱ rí nijma̱a̱ náa tsígáʼ rí nijngutígúu índo̱ nirajxi̱i̱ rí nitadu. Ni má ragíʼmaa matandrígúu uva rí nijma̱a̱ náa ñawúunʼ dí tátrujturígúu. Gíʼmaa marigá mbá tsiguʼ rí mbayáa jxu̱u̱ʼ ku̱ba̱ʼ. 6 Ikháanʼ ma̱ndoo mu̱phu̱ ganitsu rí najma̱a̱ náa ku̱ba̱ʼ índo̱ ndayáa jxu̱u̱ʼ xóo mbiʼi sábado. Ikháán ga̱jma̱a̱ʼ ñumbáá ndrígia̱a̱ʼ bi̱ nañajunʼ mu madaaʼ ga̱jma̱a̱ bi̱ na̱ʼkha̱á bi̱ xtaa gajmiáanʼ ma̱ndoo mu̱phu̱. 7 Xujkhúʼ kraʼdiin ga̱jma̱a̱ xujkhú xáná bi̱ kúwá náa mbayaaʼ, mangiin ma̱ndoo mu̱phu̱. Xúgíʼ rí najma̱a̱ náa ku̱ba̱ʼ ma̱ndoo mu̱phu̱.

8 Matraxnuu mbá juwan tsiguʼ sábado, juwan nuthu rí juwan tsiguʼ, rí mbá xúgíʼ mbiʼi sábado rí juwan tsiguʼ mani̱ndxu̱u̱ mbá 49 tsiguʼ. 9 Ikhú mundiyííʼ gakhi̱i̱ chi̱ji̱ʼ índo̱ gáʼni juwan igu̱nʼ, náa gu̱wa̱ʼ mbiʼi ñajunʼ gu̱nʼ, mbiʼi rí majngudi̱i̱ aʼkhá. Ikháanʼla gíʼmaa mu̱ni̱ rí mawán gakhi̱i̱ aʼwóo chi̱ji̱ʼ náa xúgíʼ xuajin. 10 Gíʼmaa rí mu̱ni̱ kaʼwi̱i̱ tsiguʼ 50 ga̱jma̱a̱ majuiʼthá rí maguma káwíin* xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ. Mani̱ndxu̱u̱ mbá tsiguʼ rí maguma káwáanʼla,* ga̱jma̱a̱ mámbáa rí ikháanʼla mbayáa mbayuuʼ, ga̱jma̱a̱ mámbáa rí ikháanʼla ma̱ndoo maʼga̱a̱ goʼwóo gáʼñúún bi̱ kúwíin náa goʼwóo. 11 Náa tsiguʼ 50 mani̱ndxu̱u̱ mbá tsiguʼ rí maguma káwáanʼla. Ragíʼmaa mu̱dula ni ma murajxi̱i̱la rí nijma̱a̱ náa tsígáʼ rí nijngutígúu, ni má ragíʼmaa mundrígúu uva rí nijma̱a̱ náa ñawúunʼ rí túrujtu rígúula. 12 Numuu rí nindxu̱u̱ mbá tsiguʼ rí maguma káwáanʼla, gíʼmaa mani̱ndxu̱u̱ mikaʼwu náa ikháanʼla. I̱ndó gíʼmaa mu̱phu̱ rí nijma̱a̱ náa rí nikráʼáan ikháá náa tsu̱du̱u̱ ku̱ba̱ʼ.

13 Náa tsiguʼ rí maguma káwáanʼla rígi̱, mámbáa dí ikháanʼ matanga̱a̱ mbayáa mbayuuʼ. 14 Á mu nugujua̱ o nutsi̱i̱ náa inuu xa̱bu̱ numbaaʼ gajmiála, xúninduwamijnála. 15 Á mu mbáa rígá rí na̱ʼtsi̱ náa inuu ndxájuu, mbaʼyóoʼ maʼni numuu xó má tsiguʼ rí nijngoo índo̱ niguma káwíin, xúʼko̱ má bi̱ nagujua̱ ma̱ngaa, mbaʼyóoʼ mbaʼyoo nguáthá tsiguʼ xóo eguanúu rí magijxi̱i̱ rí nijuiʼdu. 16 Á mu naguanúu mba̱yu̱u̱ʼ tsiguʼ, ikhaa ma̱ndoo makujxi̱i̱ numuu rí nagujua̱, mú, á mu nánguá mba̱yu̱u̱ʼ tsiguʼ eguanúu, ikhaa mbaʼyóoʼ makruígúu numuu rí magujua̱. Dí xtáa ragujua̱ nindxu̱u̱ rí nguáthá mba̱yu̱u̱ʼ magijxi̱i̱ xóó rí najuiʼdu. 17 Nimbáa rí ikháanʼ xáʼyóoʼ maʼni gínáa xa̱bu̱ numbaaʼ ga̱jma̱a̱, gíʼmaa mamiñúu kaʼyoo Dios ndrígóo. Numuu rí ikhúún ni̱ndxu̱ʼ Jeobá Dios ndrígala. 18 Á mu nunimbaníí kiʼtáñajunʼ ndrígóʼ ga̱jma̱a̱ nunimbala xtángoo ndrígóʼ, makuwáanʼ tsímáá náa ku̱ba̱ʼ. 19 Náa ku̱ba̱ʼ ma̱jma̱a̱ ganitsu, ikháanʼ muphula asndu magiʼmala ga̱jma̱a̱ makuwáanʼ tsímáá ikhí.

20 Á mu ikháanʼ nurajxi̱míjna̱la: “Ndiéjunʼ gúʼpulú índo̱ gáʼni juwan tsiguʼ á mu xándoo muʼdu ni má xándoo murajxi̱i̱lu dí nuʼdu rá.” 21 Gu̱ya̱a̱ gajkhun dí ikhúún ma̱ni̱ tsajkurámáanʼla índo̱ gáʼni majun tsiguʼ. Ku̱ba̱ʼ ma̱jma̱a̱ ganitsu rí mbajyúuʼ ajtsú tsiguʼ. 22 Índo̱ gáʼni migiñuʼ tsiguʼ, ikháanʼ mudula, ga̱jma̱a̱ muphula má xúʼko̱ ganitsu wayuu asndu índo̱ gáʼni mijna gu̱wa̱ʼ tsiguʼ. Muphula má xúʼko̱ rí wayuu asndu índo̱ ikháanʼ gúrajxi̱i̱ rí nidula.

23 Ku̱ba̱ʼ xáʼyóoʼ magujuala mbá kayuuʼ, numuu rí ku̱ba̱ʼ nindxu̱u̱ ndrígóʼ ikhúún, ikhúún kaʼyoʼ. Ikháanʼ nindxa̱la i̱ndó xa̱bu̱ bi̱ naguwaáʼ. Xa̱bu̱ bi̱ nanújngún ikhí. 24 Xúgíʼ ku̱ba̱ʼ rí kaʼyala, ma̱ndoo mutangáanʼ mutsiri̱ya̱a̱ʼ.

25 Á mu mbáa xa̱bu̱ numbaaʼ ga̱jma̱a̱ʼ, naʼni gínáa, ga̱jma̱a̱ ndayóoʼ magu̱jua̱ mbá chíʼgíiʼ* mbayuuʼ. Mbáa bi̱ kaʼyoo matsiri̱ya̱a̱ʼ mbaaʼ nindxu̱u̱ bi̱ mijngii kaʼyoo, mbaʼyóoʼ ma̱ʼkha̱ ga̱jma̱a̱ maʼtsi̱i̱ mbu̱júu̱ dí ndxájuu nigujua̱a̱. 26 Á mu mbáa na̱nguá gíʼdaa bi̱ ma̱ʼtsi̱ri̱ya̱a̱ʼ, mú ikhaa na̱jkha̱nú nagiʼdoo, ga̱jma̱a̱ rí maʼngo̱o̱ matsiriya̱a̱ʼ mbayuuʼ. 27 Ikhaa gíʼmaa mbaʼyoo nguáthá xóó numuu mbaaʼ xó má tsiguʼ rí nijngoo asndu nákháá mbiʼi rí nigujua̱, ga̱jma̱a̱ xúʼko̱ numuu mbaʼyóoʼ maxnáa xa̱bu̱ bi̱ nitsi̱i̱ mu xúʼko̱ ikhaa ma̱ndoo mbayáa ku̱bo̱o̱ʼ.

28 Mú, á mu ikhaa na̱nguá gíʼdoo xóo maʼtsi̱ríya̱a̱ʼ mbayuuʼ, bi̱ ni̱ʼtsi̱i̱, mbaʼyóoʼ maguanúu ga̱jma̱a̱ mbaaʼ asndu índo̱ gáʼganú tsiguʼ rí maguma káwíin. Ikhú xa̱bu̱ bi̱ mbayuuʼ ma̱ndoo matanga̱a̱ mbayáa ku̱bo̱o̱ʼ náa tsiguʼ rúʼko̱.

29 Á mu mbáa xa̱bu̱ nagujua̱a̱ goʼwóo dí rígá náa xuajin dí gíʼdoo xtájtsí, ikhaa ma̱ndoo ma̱ʼtsi̱ríya̱a̱ʼ goʼwóo náa awúu̱n rí mbá tsiguʼ. Náa awúu̱n rí mbá tsiguʼ xóó ma̱ndoo ma̱ʼtsi̱ríya̱a̱ʼ goʼwóo. 30 Á mu guʼwá dí rígá náa xuajin rí gíʼdoo xtájtsí tséjuiʼtsiriya̱a̱ʼ náa awúu̱n rí mbá tsiguʼ. Bi̱ gáʼtsi̱i̱, maʼga̱nú mani̱ndxu̱u̱ ndrígóo mbá kayuuʼ, náa xúgíinʼ e̱ji̱i̱n bi̱ gáguwáʼ rakúwá nda̱wa̱á. Xándoo martanga̱a̱ índo̱ gáʼga̱nú tsiguʼ rí makáwíin. 31 Á mu guʼwá rígi̱ rígá náa mbá xuajin rí na̱nguá gíʼdoo xtájtsí ma̱ndoo mani̱ndxu̱u̱ xó má mbaaʼ, ma̱ndoo ma̱ʼtsi̱ríya̱a̱ʼ ga̱jma̱a̱ mata̱nga̱a̱ mbayáa índo̱ gáʼga̱nú tsiguʼ rí maguma káwíin.

32 Mú guʼwún levitas dí rígá náa xuajñún, ikhiin ma̱ndoo mutsiri̱ya̱a̱ʼ má xúʼko̱ guʼwún. 33 Á mu mbañúnʼ levitas na̱nguá ejuiʼtsiri̱ya̱a̱ʼ, ga̱jma̱a̱ guʼwún dí rígá náa xuajñún ma̱ndoo matanga̱a̱ muda̱a̱ índo̱ gáʼga̱nú tsiguʼ rí maguma káwíin. Numuu dí guʼwá dí guáʼdáá náa xuajñún levitas i̱ndó rúʼko̱ dí guáʼdáá ikhiin náa majñu̱únʼ israelitas. 34 Ma̱ngaa mbaaʼ dí rígá ra̱jxa̱, dí rígá náa mbájndi xuajñún, xándoo maxtujua̱a̱. Numuu dí rúʼko̱ kaʼñún ikhiin asndu kámuu.

35 Á mu mbáa xa̱bu̱ bi̱ xtaa mijngii ga̱jma̱a̱ʼ naʼni gínáa ga̱jma̱a̱ nánguá eʼngo̱o̱ magiʼdoo rí ndayóoʼ, mbaʼyóoʼ matambáyíí, xó má gátani̱ ga̱jma̱a̱ʼ mbáa xa̱bu̱ na̱ʼkha̱á o mbáa xa̱bu̱ bi̱ nanújngo̱ó, mu xúʼko̱ ma̱ndoo maxtáa xóó. 36 Xátrumaa inuu, xátaʼyáʼ maraʼdáá ga̱jma̱a̱ numuu, mbaʼyóoʼ mamiñáanʼ xtayáá Dios ndrígáaʼ, mu xúʼko̱ ndxájuaaʼ maxtáa xóó. 37 Xáraxnatíʼñáán mbújkha̱a̱ mu matrumaa inuu, xáraxna̱a̱ ganitsu ndrígáaʼ mu mataʼyáʼ mbújkha̱a̱. 38 Ikhúún nindxu̱ʼ Jeobá Dios ndrígala, bi̱ niguwáanʼ náa ku̱ba̱ʼ ndrígóo Egipto, mu maxna̱la ku̱ba̱ʼ ndrígóo Canaán, mu mani̱ndxu̱ʼ Dios ndrígala.

39 Á mu mbáa xa̱bu̱ bi̱ xtaa mijngii ga̱jma̱a̱ʼ naʼni gínáa ga̱jma̱a̱ nagujuamínáʼ náa ikháán. Xáʼyóoʼ matatsudaa mañajunʼ gakhi̱i̱ wéñuuʼ. 40 Mbaʼyóoʼ matani̱i̱ xóo mbáa ñumbáá bi̱ nadaaʼ, xóo mbáa xa̱bu̱ bi̱ nanújngo̱ó, mañajunʼ ga̱jma̱á nindxa̱a̱ʼ asndu índo̱ gáʼga̱nú tsiguʼ rí maguma kríya̱a̱ʼ. 41 Ikhú ikhaa maniñaaʼ, ikhaa gajmíi̱n e̱ji̱i̱n matanga̱a̱ náa kúwá bi̱ goʼwóo, ikhaa mbayáa̱ mbayuuʼ rí kaʼñún wajin xiʼñúuʼ. 42 Numuu rí ikhiin nindxu̱ún ñumbáá ndrígóʼ, bi̱ nigúwíin náa ku̱ba̱ʼ ndrígóo Egipto, ikhiin xándoo maxtujui̱i̱n xóo xa̱bu̱ ñumbáá. 43 Xátani̱ gíníi, gamiñáaʼ xtayáá Dios ndrígáaʼ. 44 Xa̱bu̱ o gu̱ʼu̱ ñumbáá, ma̱ndoo maguwa̱ʼ kudiinla náa xuajin dí rígá mbájndi dí kuwáanʼla, ikhí ma̱ndoo mutsi̱i̱nla ñumbáá. 45 Ma̱ngaa ma̱ndoo mutsi̱i̱nla xóo ñumbáá e̱jñu̱ún xa̱bu̱ bi̱ niguwáʼ gákúwá náa ikháanʼ, xúʼko̱ má bi̱ kúwá náa guʼwún bi̱ nigumiin náa mbayala, ikhiin mani̱ndxu̱ún bi̱ kaʼyala ikháanʼ. 46 Ma̱ndoo matatsiʼñún náa ñawúúnʼ e̱jña̱a̱ʼ nda̱wa̱á rí ikháán, mundriguíin xóo mbá rí kaʼñún ikhiin. Ma̱ndoo majmiaaʼ xóo bi̱ muni̱ ñajunʼ, mú xáʼyóoʼ matani̱ gíníi a̱ngia̱a̱nʼ bi̱ nindxu̱ún israelitas.

47 Á mu mbáa xa̱bu̱ bi̱ na̱ʼkha̱á o mbáa xa̱bu̱ bi̱ nanújngo̱ó bi̱ xtáa náa ikháanʼla na̱jkha̱nú nagiʼdoo wéñuuʼ, mú ndxájuaaʼ na̱jkha̱nú naʼni migínáa rí ndayóoʼ magujuamínáʼ náa inuu xa̱bu̱ na̱ʼkha̱á o xa̱bu̱ bi̱ nanújngo̱ó bi̱ xtáa náa ikháanʼla, o nagujuamínáʼ náa inuu mbáa bi̱ kaʼyoo xa̱bu̱ na̱ʼkha̱á. 48 Ikhaa ma̱ndoo maʼtsiríyamínáʼ nda̱wa̱á rí nigujuamínáʼ, mbáa ndxájuu ma̱ndoo ma̱ʼtsi̱ríya̱a̱ʼ mbu̱júu̱. 49 Ma̱ngaa ma̱ndoo maʼtsi̱i̱ a̱muu, a̱ʼdióo a̱muu, o asndu tsáa má bi̱ kaʼyoo bi̱ xtáa náa goʼwóo, ma̱ndoo maʼtsi̱i̱ mbu̱júu̱.

Ma̱ngaa ikhaa mínaaʼ ma̱ndoo maʼtsiríyamínáʼ á mu na̱jkha̱nú nagiʼdoo. 50 Ikhaa mbaʼyóoʼ maríya̱a̱ʼ cuenta ga̱jma̱a̱ bi̱ ni̱ʼtsi̱i̱ nguáthá tsiguʼ ninújngoo asndu mbiʼi rí nigujuamínáʼ ga̱jma̱a̱ tsiguʼ rí xóó naguanúu asndu mbiʼi rí maguma kríyaaʼ. Rí xóo maʼni numuu nindxu̱u̱ xóo tsiguʼ rí xóó naguanúu. Mbiʼi rí mañajunʼ mani̱ndxu̱u̱ ikháá má numuu xó má mbújkha̱a̱ rí nadaaʼ mbáa ñumbáá. 51 Á mu naguanúu mba̱yu̱u̱ʼ tsiguʼ ikhaa mbaʼyóoʼ maʼni numuu náa maʼtsiríyamínáʼ xó má tsiguʼ rí naguanúu. 52 Mú, á mu nánguá má mba̱yu̱u̱ʼ tsiguʼ guanúu asndu maʼga̱nú tsiguʼ rí maguma kríya̱a̱ʼ. Ikhaa mbaʼyóoʼ maríya̱a̱ʼ cuenta, mbaʼyoo nguáthá numuu xóó gáʼni rí maʼtsiríyamínáʼ ga̱jma̱a̱ tsiguʼ rí xóó naguanúu mu xúʼko̱ maʼni numuu. 53 Ikhaa mbaʼyóoʼ mañajunʼ inuu bi̱ ni̱ʼtsi̱i̱ xóo mbáa ñumbáá bi̱ nadaaʼ mámbá tsiguʼ. Ikháán mbaʼyóoʼ ma̱ta̱ya̱a̱ á mu tséguma gínáa. 54 Á mu ikhaa tséʼngo̱o̱ gáʼtsi̱ríyamínáʼ ga̱jma̱a̱ numuu rígi̱, ikhaa gajmíi̱n e̱ji̱i̱n maguma káwíin asndu gáʼganú tsiguʼ rí maguma káwíin.

55 Numuu rí bi̱ israelitas ni̱ndxu̱ún ñumbáá ndrígóʼ, ikhiin kaʼyoʼ ikhúún, numuu rí nigúwíin náa ku̱ba̱ʼ ndrígóo Egipto, ikhúún ni̱ndxu̱ʼ Jeobá Dios ndrígu̱ún.

26 Xúni̱i̱ nimbáa dios bi̱ nda̱a̱ dí ejmaa, ni má xúni̱i̱ xándú, ni má poste rí mitsúʼkháan,* ni má xútsiji̱ mbá itsí rí gíʼdoo xtiʼkhuu náa ku̱ba̱la mu musmbati̱gala ikhí, numuu dí ikhúún nindxu̱ʼ Jeobá Dios ndrígala. 2 Gíʼmaa mbuyamajkuíí sábado ga̱jma̱a̱ goʼwóʼ dí mikaʼwu. Ikhúún nindxu̱ʼ Jeobá.

3 Á mu nakuwáanʼ xó má eʼthí náa kiʼtáñajunʼ ndrígóʼ ga̱jma̱a̱ nu̱nimbala xtángoo ndrígóʼ, 4 ikhúún ma̱ni̱ rí maxnúu ruʼwa mbiʼi rí kaʼyoo ga̱jma̱a̱ ma̱ni̱ rí ku̱ba̱ʼ majmaa ganitsu ga̱jma̱a̱ ixi̱ dí rígá xanáá maxnáa xndúu. 5 Mbiʼi dí gúrujtsi̱la tsígáʼ mbajyúuʼ asndu índo̱ gúndrígulá uva, xúʼko̱ má índo̱ gúndrígulá uva mbajyúuʼ asndu índo̱ gúdula tsígáʼ. Mu̱phu̱la pan asndu magiʼmala ga̱jma̱a̱ makuwáanʼ tsímáá náa tsu̱du̱u̱ ku̱ba̱ʼ. 6 Ikhúún ma̱ni̱ rí marigá dí tsímáá náa xuajin ga̱jma̱a̱ ikháanʼla munuʼla ga̱jma̱a̱ nimbáa xáʼni miñalaʼ. Ma̱ni̱ rí xujkhú xáná mandáti̱gi̱i̱n náa xuajin, nimbáa xa̱bu̱ sia̱nʼ xáto̱ʼo̱o̱ gáʼni gámbáa náa xuajñala. 7 Ikháanʼ muʼguala ruxkúún xa̱bu̱ sia̱nʼ ndrígala, muradíinla ga̱jma̱a̱ espada. 8 Witsáanʼla dí ikháanʼ muʼgua ruxkúún 100 dí ikhiin, mbá 100 dí ikháanʼ muʼguala ruxkúún mbá 10,000 dí ikhiin, muradíinla ga̱jma̱a̱ espada xa̱bu̱ sia̱nʼ ndrígala.

9 Ikhúún masngajmá dí nandoʼ ka̱ya̱la ga̱jma̱a̱ ma̱ni̱ dí muguaʼdiin mbaʼin e̱jña̱la, manimbánuu rí nikuʼdáminaʼ ma̱ni̱ náa ikháanʼla. 10 Índo̱ kaʼníí kuwáanʼ ru̱phu̱la ganitsu rí wayuu mbaʼyóoʼ murawíila mu mudríyaaʼla rí nuxi̱ʼ. 11 Ikhúún maʼgíʼ guʼwá xtíin ndrígóʼ náa majñala ga̱jma̱a̱ xáwiyu̱ʼ ka̱ya̱la. 12 Ikhúún maxtáá náa majñala ga̱jma̱a̱ mani̱ndxu̱ʼ Dios ndrígala ga̱jma̱a̱ ikháanʼla mani̱ndxa̱la xa̱bu̱ xuajñunʼ. 13 Ikhúún nindxu̱ʼ Jeobá Dios ndrígala, bi̱ niguwáanʼ náa ku̱ba̱ʼ ndrígóo Egipto mu muniñaaʼ ranindxala ñumbáá, nixmígaʼ yugo ndrígala ga̱jma̱a̱ nini̱ dí majngruigala xóo xa̱bu̱ bi̱ na̱nguá nindxu̱ún ñumbáá.

14 Á mu ikháanʼ na̱nguá edxawíín ga̱jma̱a̱ na̱nguá enimbala kiʼtáñajunʼ rígi̱, 15 á mu tsíyala gúyaa kiʼtáñajunʼ ndrígóʼ ga̱jma̱a̱ nawi̱ya̱la eʼni xtángoo ndrígóʼ ga̱jma̱a̱ tsíyala gunimbaníí kiʼtáñajunʼ rígi̱ ma̱ngaa tsénimbáníí rí nimbánulú, 16 ikhúún ma̱niala rígi̱, ma̱ni̱ rí mumíniiʼ ga̱jma̱a̱ mbaʼa gamiéjunʼ, nda̱ta̱ʼa̱ xíngíʼ, ga̱jma̱a̱ mijkha, ma̱ni̱ rí xákruigala ga̱jma̱a̱ mañu mañúú gáʼga rakáñála. Kááʼ mudúla, numuu rí xa̱bu̱ sia̱nʼ gúphu̱. 17 Ikhúún makásngañuʼ ka̱ya̱la ga̱jma̱a̱ xáʼngala gúni gajmiála xa̱bu̱ sia̱nʼ ndrígala. Bi̱ nawiñunʼ kuyala maxumbarígáanʼ ga̱jma̱a̱ ikháanʼ mugayála índo̱ ndawa̱a̱ nimbáa tsáa ejkha̱ raxkala.

18 Á mu maski ajndu xúʼko̱ tsedxawunʼla, mbaʼyóoʼ ma̱ni̱ gínáanʼ mbá juwan nuthu itháan ga̱jma̱a̱ numuu aʼkhála. 19 Makumígu̱u̱ dí gujkhuʼ a̱jkia̱la ga̱jma̱a̱ ma̱ni̱ rí mekhu mani̱ndxu̱u̱ xóo ajua̱nʼ ga̱jma̱a̱ ku̱ba̱ʼ mani̱ndxu̱u̱ xóo cobre. 20 Xágiʼdoo numuu ñajunʼ rí gúni̱ xaxna ganitsu ni má ixi̱ rí rígá xanáá xaxna xndúu.

21 Á mu nuni̱la ma xúʼko̱ xóo xa̱bu̱ sia̱nʼ ndrígóʼ ga̱jma̱a̱ na̱nguá edxawunʼ, ikhú mbaʼyóoʼ ma̱ni̱ gínáanʼ mbá juwan nuthu itháan ga̱jma̱a̱ numuu aʼkhá ndrígala. 22 Makuʼnguíinʼ xujkhú xáná mu muni̱ gámbíin e̱jña̱la, muphu̱u̱n xujkiála ga̱jma̱a̱ maguanála kááʼ nguéjmáanʼ ga̱jma̱a̱ náa ka̱mba̱la nímba̱a̱ xa̱bu̱ xájngruigo̱o̱.

23 Maski ajndu na̱ni̱ xúgíʼ rígi̱, á mu na̱nguá eniʼñámíjná dí maxpríguala nu̱ni̱ má xúʼko̱ xóo xa̱bu̱ sia̱nʼ ndrígóʼ, 24 ikhúún mangúún ni xáʼndoʼ gáyala ga̱jma̱a̱ ma̱ni̱ gínáanʼ mbá juwan nuthu ga̱jma̱a̱ numuu aʼkhá ndrígala. 25 Ma̱ni̱ rí xa̱bu̱ sia̱nʼ ndrígala muradiáanʼla ga̱jma̱a̱ espada numuu dí túnimbaníí rí nimbánulú. Á mu ikháanʼ numbayúmijnála náa xuajñala, makuʼnguánʼ nandii ga̱jma̱a̱ ikháanʼ majuixnaxáanʼla náa xa̱bu̱ sia̱nʼ. 26 Índo̱ ikhúún gani gámbóʼ ganitsu ndrígala, gu̱wi̱i̱nʼ gu̱ʼu̱ muxumbuʼ pan náa ikháá ma horno ga̱jma̱a̱ mugiewan mu muxnala mbá chíʼgíiʼ.* Ikháanʼla muphu mú xágiʼmala.

27 Maski ajndu xúʼko̱ na̱nguá edxawúúnʼla, nuni̱ má xúʼko̱ xóo xa̱bu̱ sia̱nʼ ndrígóʼ, 28 ikhúún makásngañuʼ itháan ka̱ya̱la ga̱jma̱a̱ ma̱ni̱ gínáanʼ mbá juwan nuthu ga̱jma̱a̱ numuu aʼkhá ndrígala. 29 Rí asndu muphula xuñúnʼ jiámiála ga̱jma̱a̱ waʼxiála. 30 Ma̱ni̱ gámbáa náa nduyamajkhún xándiala,* makumígu̱u̱ náa nutsikarámáʼ dí ndataun ga̱jma̱a̱ marngujxi̱i̱n wajñala náa tsu̱du̱ún xándiala bi̱ xkawi̱i̱nʼ,* matsíngunʼ náa ikháanʼla, mawi̱yu̱ʼ gúnila. 31 Ma̱ni̱ gámbáa xuajñaanʼ ga̱jma̱a̱ náa guʼwá dí mikaʼwu, nánguá máyayuʼ itháan jxu̱u̱ʼ tsigijñaʼ ndrígala dí ndataun. 32 Ikhúún ma̱ni̱ rí xuajñala maguanáa, xa̱bu̱ sia̱nʼ ndrígala makuwá náa xuajñala, ikhiin muyejxi ga̱jma̱a̱ mamiñún. 33 Ikhúún maxidíráʼáanʼ náa xuajin dí rígá, ma̱ni̱ dí xa̱bu̱ sia̱nʼ magún ruxkala ga̱jma̱a̱ espada, ku̱ba̱ʼ ndrígala maguanáa ga̱jma̱a̱ xuajñala maguma gámbáa.

34 Índo̱ ikháán gáraxtaa náa ku̱bu̱únʼ xa̱bu̱ sia̱nʼ ndrígáaʼ, ku̱ba̱ʼ mbayáa jxu̱u̱ʼ numuu dí nákha ginii táyáa jxu̱u̱ʼ. Ikha jngóo mbiʼi rúʼko̱ mbaʼyóoʼ mbayáa jxu̱u̱ʼ. 35 Mbayáa jxu̱u̱ʼ xúgíʼ mbiʼi rí maguanáa, numuu dí ikháanʼ túniʼñánʼ dí mbayáa jxu̱u̱ʼ índo̱ ikháanʼla nikuwáanʼla ikhí.

36 Bi̱ xóó gákáwíín ma̱ni̱ rí mamiñún náa ku̱ba̱ʼ ndrígu̱ún xa̱bu̱ sia̱nʼ. Aʼwóo mbá iná dí naʼbajngaa giñánʼ maʼni dí magañún. Magañún xó má nagáyúu mbáa índo̱ nagún ruxkáá muxiyáa ga̱jma̱a̱ espada, majnguti̱gi̱i̱n maski ajndu nimbáa na̱nguá e̱jkha̱ raxkúún. 37 Kaníkiin gúrmajngumijna̱ xó má eʼni mbáa bi̱ nagáyúu índo̱ nagún ruxkáá muxnáá ga̱jma̱a̱ espada, maski ajndu ndawa̱a̱ tsáa e̱jkha̱ raxkúún. Xáʼngu̱u̱n gúni̱ gajmiún xa̱bu̱ sia̱nʼ ndrígu̱ún. 38 Makhañún náa i̱ʼwáʼ xuajin, náa ku̱bu̱únʼ xa̱bu̱ sia̱nʼ ndrígu̱ún gákañún. 39 Bi̱ gáguanúu náa ikháanʼla migíin náa ku̱bu̱únʼ xa̱bu̱ sia̱nʼ ndrígala ga̱jma̱a̱ numuu aʼkhúún. Xúʼko̱, migíin ga̱jma̱a̱ numuu aʼkhúún anu̱ún. 40 Ikhú mu̱tha̱ dí nikiéʼkala* ga̱jma̱a̱ rí nikiéʼkhún ana̱la dí táguajun jmbu, muʼguanúla mu̱tha̱ dí nixudamijná aʼkhá náa ikhúún. 41 Ikhúún mangúún makásngañunʼ gúni̱, maʼgá kagui̱i̱n náa ku̱bu̱únʼ xa̱bu̱ sia̱nʼ ndrígu̱ún.

Mbáa ikhú gáʼni rí a̱jkiu̱ún maʼni guabaʼ ga̱jma̱a̱ muxruigúmíjnáá ga̱jma̱a̱ muni̱ numa̱a̱ aʼkhúún. 42 Ikhúún marmáʼáan a̱jkiu̱nʼ dí nimbánuʼ ga̱jmu̱ʼ Jacob, Isaac ga̱jma̱a̱ Abrahán, ma̱ngaa marmáʼáan a̱jkiu̱nʼ gáʼni ku̱ba̱ʼ. 43 Índo̱ ku̱ba̱ʼ gáguanáa maxtáa rayáa jxu̱u̱ʼ nimbáa xáxtáa ikhí ga̱jma̱a̱ ikhiin makuwá runi̱ numa̱a̱ aʼkhúún dí túnimbu̱ún xtángoo ndrígóʼ ga̱jma̱a̱ táʼndún gúyáá kiʼtáñajunʼ ndrígóʼ. 44 Maski ajndu marigá xúgíʼ rígi̱, índo̱ ikhiin kúwá náa ku̱bu̱únʼ xa̱bu̱ sia̱nʼ ndrígu̱ún, ikhúún xániʼñúúnʼ mbá kayuuʼ ni má xáwi̱yu̱ʼ ka̱ñu̱u̱n dí asndu maʼndoʼ manigámbíin mbá kayuuʼ, numuu dí rúʼko̱ gáʼni dí xánimbánuu rí nimbánúʼ gajmíʼ, numuu dí ikhúún nindxu̱ʼ Jeobá Dios ndrígu̱ún. 45 Mu ikhiin makuwá májánʼ, marmáʼáan a̱jkiu̱nʼ dí nimbánúʼ gajmíʼ wajin xiʼñúúnʼ, bi̱ nigúwíin náa ku̱ba̱ʼ ndrígóo Egipto náa inún xúgíinʼ xa̱bu̱ xuajin mu mani̱ndxu̱ʼ Dios ndrígu̱ún, ikhúún nindxu̱ʼ Jeobá›”.

46 Rígi̱ nindxu̱u̱ ikha, kiʼtáñajunʼ, xtángoo dí Jeobá nixnúu náa kúbá Sinaí Moisés mu maxnúún israelitas.

27 Jeobá nitanga̱a̱ niʼtámíjná ga̱jma̱a̱ Moisés, niʼthúu̱n: 2 “Aratámíjná gajmiáanʼ israelitas ga̱jma̱a̱ arathún: ‹Á mu mbáa naʼthí rí maʼni numa̱a̱ náa Jeobá xóo numuu mbáa xa̱bu̱ mu maʼnimbánuu mbá rí nakudaminaʼ maʼni, 3 rí numuu mbáa xa̱bu̱ bi̱ gíʼdoo 20 asndu 60 tsiguuʼ nindxu̱u̱ 50 siclos* ndrígóo plata, gíʼmaa ma’ni ki̱wu̱n xó má rí najmaa náa dí mikaʼwu. 4 Á mu nindxu̱u̱ mbáa a̱ʼgu̱ gíʼmaa maʼni numuu 30 siclos. 5 Á mu mbáa xa̱bu̱ bi̱ gíʼdoo witsu asndu 20 tsiguuʼ, numuu ndrígóo gíʼmaa mani̱ndxu̱u̱ 20 siclos á mu nindxu̱u̱ mbáa a̱ʼgu̱ gíʼmaa mani̱ndxu̱u̱ gu̱wa̱ʼ siclos. 6 Á mu mbáa dxámá chíʼgíiʼ* gíʼdoo mbá giu̱nʼ asndu witsu tsiguuʼ, numuu ndrígóo gíʼmaa mani̱ndxu̱u̱ witsu siclos ndrígóo plata á mu nindxu̱u̱ mbáa dxáʼgú chíʼgíiʼ gíʼmaa mani̱ndxu̱u̱ ajtsú siclos ndrígóo plata.

7 Mbáa xa̱biya̱ bi̱ gíʼdoo 60 tsiguuʼ o itháan, numuu gíʼmaa mani̱ndxu̱u̱ 15 siclos, á mu nindxu̱u̱ mbáa a̱ʼgu̱ gu̱wa̱ʼ siclos. 8 Á mu mbáa xa̱bu̱ bi̱ phú gajkhun migínáa ragíʼdoo maʼni numuu xó má phú kaʼyoo, xa̱bu̱ bugi̱ gíʼmaa maʼga gáʼyoo ndxajkun ga̱jma̱a̱ ikhaa maʼthúu̱n nguáthá gíʼmaa maʼni numa. Ndxajkun gíʼmaa maʼthí nguáthá gíʼmaa maʼni numa náa rí ikhaa nikudaminaʼ maʼni.

9 Á mu náa rí nikudaminaʼ maʼni ma̱ndoo maxnájxi̱i̱ mbáa xujkhúʼ náa inuu Jeobá, asndu guaʼyaa má rí gáxnúu Jeobá maʼga̱nú mani̱ndxu̱u̱ mikaʼwu. 10 Xándoo maxtiʼkhuu mbá rí májánʼ ga̱jma̱a̱ dí ra̱májánʼ ni má dí ra̱májánʼ ga̱jma̱a̱ rí májánʼ. Á mu naxtiʼkuríya̱a̱ mbáa xujkhúʼ ga̱jma̱a̱ imba̱a̱, xó má xujkhúʼ bi̱ naxtiʼkuríya̱a̱ ga̱jma̱a̱, gíʼmaa mani̱ndxu̱ún mikaʼwiin. 11 Á mu nindxu̱u̱ mbáa xujkhúʼ bi̱ tsagaa bi̱ xándoo mixnájxi̱i̱ xóo tsigijñaʼ gamajkhu náa inuu Jeobá, ikhú xujkhúʼ buʼko̱ maʼga kiʼyáa náa inuu ndxajkun mu majmiuu. 12 Ndxajkun gíʼmaa maʼthí nguáthá numuu á mu májáanʼ o ra̱májáanʼ. Maʼni numuu xó má gáʼthi ndxajkun. 13 Á mu bi̱ nakudaminaʼ nandoo maʼtsiríyáaʼla xujkhúʼ mbu̱júu̱, ikhaa gíʼmaa magrígúu 20 por ciento itháan.

14 Á mu mbáa xa̱bu̱ naxnájxi̱ goʼwóo náa Jeobá xóo mbá rí mikaʼwu, ikhú ndxajkun gíʼmaa maʼthí nguáthá numuu á mu májánʼ o ra̱májánʼ. Gíʼmaa ma’ni numuu, xó má gáʼthi ndxajkun. 15 Á mu bi̱ nixnájxi̱ goʼwóo nandoo maʼtsiríyáaʼla mbu̱júu̱, gíʼmaa magrígúu 20 por ciento itháan, xúʼko̱ mbayáa goʼwóo.

16 Á mu mbáa naxnájxi̱ mbayuuʼ náa Jeobá, gíʼmaa maʼni numuu xó má minumuu tsígáʼ rí ndayóoʼ mu miʼdu: Mámbá homer* tsígáʼ ndrígóo cebada gíʼmaa mani̱ndxu̱u̱ 50 siclos ndrígóo plata. 17 Á mu nuxnajxi̱ mbayala xóo mbá rí nindxu̱u̱ mikaʼwu náa tsiguʼ rí maguma káwáanʼla,* xáxtiʼkhuu xóo numuu. 18 Á mu nuxnajxi̱ mbayala xóo mbá rí nindxu̱u̱ mikaʼwu nda̱wa̱á dí niguma káwáanʼla, ndxajkun gíʼmaa maʼthí nguáthá gíʼmaa maʼni numuu náa tsiguʼ rí xóo naguanúu asndu imbo̱o̱ tsiguʼ dí maguma káwáanʼla ga̱jma̱a̱ rí xóo numuu ni xáʼni xóo phú kaʼyoo. 19 Á mu bi̱ nixnájxi̱ mbayuuʼ xóo mbá rí mikaʼwu nandoo maʼtsiríyáaʼla, gíʼmaa magrígu̱u̱ 20 por ciento itháan xóo numuu, ga̱jma̱a̱ ku̱ba̱ʼ maʼni mbayuuʼ. 20 Índo̱ á mu ikhaa nánguá eʼtsi̱ríya̱a̱ʼ mbayuuʼ ga̱jma̱a̱ naʼtsi̱i̱ imba̱a̱ xa̱bu̱, ni xándoo maʼtsiríyáaʼ mbu̱júu̱. 21 Índo̱ mbaaʼ gaguma kríyaa náa mbiʼi dí maguma káwíin, mani̱ndxu̱u̱ mbá rí mikaʼwu náa inuu Jeobá, numuu dí nijuixnájxi̱ náa ikhaa. Ga̱jma̱a̱ mani̱ndxu̱u̱ mbañúúnʼ ndxajkun.

22 Á mu mbáa naxnájxi̱ náa Jeobá mbá mbaaʼ rí niʼtsi̱i̱ ga̱jma̱a̱ dí ra̱ʼkháa mbayuuʼ, 23 ndxajkun maʼthúu̱n nguáthá numuu náa tsiguʼ rí xóó naguanúu asndu índo̱ gáʼga̱nú tsiguʼ rí maguma káwíin, mbiʼi má rúʼko̱ ndxajkun maʼthúu̱n nguáthá numuu. Nindxu̱u̱ mbá rí mikaʼwu náa Jeobá. 24 Índo̱ gáʼga̱nú tsiguʼ dí maguma káwáanʼla, maxnáala mbayuuʼ xa̱bu̱ bi̱ náa niʼtsi̱i̱, xa̱bu̱ bi̱ phú kaʼyoo mbaa’.

25 Rí xóo minumuu gíʼmaa ma’ni ki̱wu̱n xó má rí najmaa náa dí mikaʼwu. Mbá siclo nindxu̱u̱ mbá 12 gramo.*

26 Nimbáa xándoo maxnájxi̱i̱ mbáa xujkhúʼ giʼnii, numuu rí bi̱ nagumaa giʼnii kaʼyoo Jeobá. Tséʼniuu á mu xedi̱ o mugu̱ kaʼyoo Jeobá. 27 Á mu mbáa xujkhúʼ nindxu̱u̱ mitsagaa ga̱jma̱a̱ ikhaa naʼtsi̱ríya̱a̱ʼ xó má minumuu, gíʼmaa magrígu̱u̱ 20 por ciento itháan. Á mu na̱nguá eʼtsi̱ríya̱a̱ʼ mbaʼyóoʼ maxtagujua̱a̱ xó má kaʼyoo.

28 Xándoo maxtangujua̱a̱ ni má maʼtsi̱ríya̱a̱ʼ mbu̱júu̱ mbá rí nixnájxi̱ mbáa náa Jeobá dí ikhaa gíʼdoo, tséʼñuu á mu xa̱bu̱ o mbáa xujkhúʼ o mbayuuʼ. Xúgíʼ rígi̱ nindxu̱u̱ mitsúʼkháan náa Jeobá. 29 Xáʼyóoʼ majuiʼtsi̱ríyáaʼ nimbáa bi̱ nijuixnájxi̱i̱ mu maguma gámbáa. Mbaʼyóoʼ makhañúu tsiaki̱i̱.

30 Náa mámbá gu̱wa̱ʼ ru̱tsu̱u̱ rí najmaaʼ náa ku̱ba̱ʼ o xndú ixi̱, mbá ru̱tsu̱u̱ kaʼyoo Jeobá. Nindxu̱u̱ mbá rí mikaʼwu náa Jeobá. 31 Á mu mbáa nandoo maʼtsi̱i̱ náa rí mbá gu̱wa̱ʼ ru̱tsu̱u̱ rí nixnáa, mbaʼyoo magrígu̱u̱ 20 por ciento itháan. 32 Náa mámbá gu̱wi̱i̱nʼ xedi̱ o mugu̱ bi̱ gánújngún náa agoo ixu̱u̱ baxtúu, bi̱ maʼni gu̱wi̱i̱nʼ magajnúu mu maʼni ndrígio̱o̱ Jeobá. 33 Xándoo mangujmaa xujkhúʼ á mu nindxu̱u̱ májáanʼ o ra̱májáanʼ, ni má xándoo maxtiʼkuriya̱a̱ʼ. Á mu mbáa nandoo mariʼkuriya̱a̱ʼ xó má xujkhúʼ bi̱ naxtiʼkuriya̱a̱ʼ ga̱jma̱a̱ imba̱a̱ xujkhúʼ mani̱ndxu̱ún mikaʼwiin. Xándoo mitsiʼríya̱a̱ʼ mbu̱júu̱›”.

34 Rígi̱ nindxu̱u̱ kiʼtáñajunʼ rí Jeobá nixnúu Moisés mu munimbaníí israelitas náa kúbá Sinaí.