NÚMEROS

1 Timbá mbiʼi dí raga̱jma̱ igu̱nʼ, dí maʼni a̱jma̱ tsiguʼ dí nigájnún náa Egipto. Jeobá niʼtámíjná ga̱jma̱a̱ Moisés náa ku̱ba̱ʼ mijxooʼ* ndrígóo Sinaí náa guʼwá xtíin rí nagimbíi̱n, niʼthúu̱n: 2 “Gu̱ni̱i̱ mbá censo náa xúgíinʼ xa̱bu̱ Israel, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún, xúʼko̱ má bi̱ nindxu̱ún anu̱ún, magumaraʼmáʼ mbiʼñún xúgíinʼ xa̱bekha. 3 Ikháán ga̱jma̱a̱ʼ Aarón mataniraʼmáʼ mbiʼñún mámbá nguéjmi̱i̱n xúgíinʼ bi̱ guáʼdáá 20 tsigúúnʼ o itháan, bi̱ ma̱ndoo muñambáá xóo soldado náa Israel.

4 Guʼgua gajmiála mámbáa xa̱biya̱ bi̱ na̱ʼkha̱ náa mámbá xuajin majkhaʼ,* mámbáa dí ikhiin mbayá edxu̱u̱ náa goʼwóo anu̱u̱. 5 Xígi̱ mbiʼñún xa̱bekha bi̱ mumbayala: Náa xuajin chíʼgíiʼ* ndrígóo Rubén nindxu̱u̱ Elizur a̱ʼdióo Sedeur, 6 náa xuajin chíʼgíiʼ ndrígóo Simeón, nindxu̱u̱ Selumiel a̱ʼdióo Zurisadái, 7 náa xuajin chíʼgíiʼ ndrígóo Judá, nindxu̱u̱ Nahsón a̱ʼdióo Aminadab, 8 náa xuajin chíʼgíiʼ ndrígóo Isacar, nindxu̱u̱ Netanel a̱ʼdióo Zuar, 9 náa xuajin chíʼgíiʼ ndrígóo Zabulón, nindxu̱u̱ Eliab a̱ʼdióo Helón, 10 náa xuajin chíʼgíiʼ ndrígóo Efraín, a̱ʼdióo José, nindxu̱u̱ Elisamá a̱ʼdióo Amihud ga̱jma̱a̱ náa xuajin chíʼgíiʼ ndrígóo Manasés, a̱ʼdióo José, nindxu̱u̱ Gamaliel a̱ʼdióo Pedahzur, 11 náa xuajin chíʼgíiʼ ndrígóo Benjamín, nindxu̱u̱ Abidán a̱ʼdióo Guideoní, 12 náa xuajin chíʼgíiʼ ndrígóo Dan, nindxu̱u̱ Ahiézer a̱ʼdióo Amisadái, 13 náa xuajin chíʼgíiʼ ndrígóo Aser, nindxu̱u̱ Paguiel a̱ʼdióo Ocrán, 14 náa xuajin chíʼgíiʼ ndrígóo Gad, nindxu̱u̱ Eliasaf a̱ʼdióo Deuel, 15 náa xuajin chíʼgíiʼ ndrígóo Neftalí, nindxu̱u̱ Ahirá a̱ʼdióo Enán. 16 Bugi̱ nindxu̱ún bi̱ nixtaʼwíin náa xuajin. Ikhiin mbuya̱ edxu̱u̱ náa xuajin majkhaʼ ndrígu̱ún anu̱ún, muyégún edxu̱u̱ náa mámbá 1,000 israelitas”.

17 Ikhú Moisés ga̱jma̱a̱ Aarón nijmiún xa̱bekha bi̱ nixtaʼwíin, bi̱ nitrámáʼ mbiʼñún. 18 Timbá mbiʼi dí raga̱jma̱ igu̱nʼ, nigimbíin mbá xúgíinʼ xa̱bu̱ xuajin mu muniraʼmáʼ mbiʼñún xa̱bekha bi̱ guáʼdáá 20 tsigúúnʼ o itháan. Mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. 19 Moisés niʼni xó má Jeobá niʼthúu̱n maʼni, ikhú ikhaa niʼnirámáʼ mbiʼñún náa ku̱ba̱ʼ mijxooʼ ndrígóo Sinaí.

20 E̱ji̱i̱n Rubén, bi̱ nindxu̱u̱ a̱ʼdá giʼniuu Israel, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún, xa̱bekha bi̱ guáʼdáá 20 tsigúúnʼ o itháan mu muñambáá xóo soldado. 21 Xúgíinʼ bi̱ nigumarámáʼ mbiʼñún náa xuajin chíʼgíiʼ ndrígóo Rubén ninindxu̱ún 46,500.

22 E̱ji̱i̱n Simeón bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin mámbíin xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 23 Xúgíinʼ bi̱ nigumaraʼmáʼ mbiʼñún náa xuajin chíʼgíiʼ ndrígóo Simeón ninindxu̱ún 59,300.

24 E̱ji̱i̱n Gad bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 25 Xúgíinʼ bi̱ nigumaraʼmáʼ mbiʼñún bi̱ naguwáʼ náa xuajin chíʼgíiʼ ndrígóo Gad ninindxu̱ún 45,650.

26 E̱ji̱i̱n Judá bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 27 Xúgíinʼ bi̱ nigumaraʼmáʼ mbiʼñún bi̱ naguwáʼ náa xuajin chíʼgíiʼ ndrígóo Judá ninindxu̱ún 74,600.

28 E̱ji̱i̱n Isacar bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan, bi̱ ma̱ndoo muñambáá náa soldado. 29 Xúgíinʼ bi̱ nigumaraʼmáʼ mbiʼñún bi̱ naguwáʼ náa xuajin chíʼgíiʼ ndrígóo Isacar ninindxu̱ún 54,400.

30 E̱ji̱i̱n Zabulón bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 31 Xúgíinʼ bi̱ nigumaraʼmáʼ mbiʼñún bi̱ naguwáʼ náa xuajin chíʼgíiʼ ndrígóo Zabulón ninindxu̱ún 57,400.

32 E̱ji̱i̱n Efraín bi̱ nindxu̱u̱ a̱ʼdióo José nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 33 Xúgíinʼ bi̱ nigumaraʼmáʼ mbiʼñún bi̱ naguwáʼ náa xuajin chíʼgíiʼ ndrígóo Efraín ninindxu̱ún 40,500.

34 E̱ji̱i̱n Manasés bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 35 Xúgíinʼ bi̱ nigumarámáʼ mbiʼñún bi̱ naguwáʼ náa xuajin chíʼgíiʼ ndrígóo Manasés ninindxu̱ún 32,200.

36 E̱ji̱i̱n Benjamín bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan, bi̱ ma̱ndoo muñambáá náa soldado. 37 Xúgíinʼ bi̱ nigumarámáʼ mbiʼñún bi̱ naguwáʼ náa xuajin chíʼgíiʼ ndrígóo Benjamín ninindxu̱ún 35,400.

38 E̱ji̱i̱n Dan bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 39 Xúgíinʼ bi̱ nigumarámáʼ mbiʼñún bi̱ naguwáʼ náa xuajin chíʼgíiʼ ndrígóo Dan ninindxu̱ún 62,700.

40 E̱ji̱i̱n Aser bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 41 Xúgíinʼ bi̱ nigumarámáʼ mbiʼñún bi̱ naguwáʼ náa xuajin chíʼgíiʼ ndrígóo Aser ninindxu̱ún 41,500.

42 E̱ji̱i̱n Neftalí bi̱ nigumarámáʼ mbiʼñún, mámbáa bi̱ gárigu mbiʼyuu náa bi̱ mbá guʼwíin, xó má bi̱ kúwá náa guʼwún xúʼko̱ má bi̱ nindxu̱ún anu̱ún. Nigixniin xúgíinʼ xa̱bekha bi̱ guáʼdáá 20 tsigúúnʼ o itháan bi̱ ma̱ndoo muñambáá náa soldado. 43 Xúgíinʼ bi̱ nigumarámáʼ mbiʼñún bi̱ naguwáʼ náa xuajin chíʼgíiʼ ndrígóo Neftalí ninindxu̱ún 53,400.

44 Ikhiin bugi̱ bi̱ Moisés ga̱jma̱a̱ Aarón niʼnirámáʼ mbiʼñún náa mbá 12 bi̱ muyégún edxu̱u̱ náa Israel. Mámbáa dí ikhiin muyégún edxu̱u̱ náa goʼwóo anu̱ún. 45 Xúgíinʼ israelitas bi̱ guáʼdáá 20 tsigúúnʼ o itháan, bi̱ ma̱ndoo muñambáá náa soldado bi̱ kúwá náa Israel, bi̱ nigumarámáʼ mbiʼñún xúʼko̱ má bi̱ nindxu̱ún anu̱ún. 46 Xúgíinʼ bi̱ nigumarámáʼ mbiʼñún ninindxu̱ún 603,550.

47 Mú bi̱ nindxu̱ún levitas na̱nguá nigumarámáʼ mbiʼñún gajmiún ikhiin xó má náa xuajin majkhaʼ dí naguwáʼ anu̱ún. 48 Jeobá niʼthúu̱n Moisés: 49 “I̱ndó xuajin chíʼgíiʼ ndrígóo Leví, xágumaraʼmáʼ mbiʼñún ni má xátraxnii gajmiún eʼwíinʼ israelitas. 50 Gíʼmaa matrajkuáa ñawúúnʼ levitas guʼwá xtíin rí nimbánuu, xó má xúgíʼ rí najmaa ikhí ga̱jma̱a̱ xúgíʼ rí kaʼyoo. Ikhiin magún kuñu̱u̱n guʼwá xtíin ga̱jma̱a̱ xúgíʼ rí najmaa ikhí, muñambáá náa guʼwá xtíin ga̱jma̱a̱ magi̱ʼi̱i̱n náa mbájndi rí gíʼ. 51 Mámbá índo̱ gágún kuñu̱u̱n guʼwá xtíin, levitas mbaʼyóoʼ muxkui̱jxi̱i̱ʼ. Ga̱jma̱a̱ índo̱ gáʼyóoʼ mugíʼ guʼwá xtíin, levitas kaʼñún muni̱i̱. Asndu tsáá imba̱a̱ xa̱bu̱ kaníí* bi̱ ga̱ʼkha̱ kanuu, mbaʼyóoʼ makhañúu.

52 Mámbáa israelita gíʼmaa magíʼ guʼwá xtíin ndrígóo náa kaʼyoo magi̱ʼi̱. Mámbáa xa̱biya̱ kaʼyoo maxtáa náa mámbá nguéjmi̱i̱n náa ajtsú xuajin majkhaʼ rí niwiʼtáa. 53 Mú bi̱ nindxu̱ún levitas magi̱ʼi̱i̱n náa mbájndi gíʼ guʼwá xtíin rí nimbánuu, mu xúʼko̱ rí nakiʼnún xáʼkha̱ náa Israel. Bi̱ nindxu̱ún levitas kaʼñún muñewa̱a̱n guʼwá xtíin rí nimbánuu”.

54 Xa̱bu̱ Israel nini̱ xúgíʼ xó má Jeobá niʼtáñajuunʼ Moisés, ninimbaníí xó má ikhaa niʼthí.

2 Ikhú Jeobá niʼthúu̱n Moisés ga̱jma̱a̱ Aarón. Niʼthún: 2 “Bi̱ israelitas gíʼmaa magi̱ʼi̱i̱n náa nikhánún dí niwiʼtáa ajtsú xuajin majkhaʼ,* mámbáa xa̱biya̱ gíʼmaa maxtáa náa níjniúu rí nasngájmaa xóo mbá tsinaʼ náa goʼwóo bi̱ ni̱ndxu̱ún anu̱ún. Gíʼmaa makuwá náa mbájndi gíʼ guʼwá dí nagimbíi̱n, maʼni inún xígií ikhí.

3 I̱ndó bi̱ kúwá xígií náa nagájnuu a̱jkha̱ʼ,* ni̱ndxu̱ún ajtsú xuajin majkhaʼ rí niwiʼtáa bi̱ gíi̱nʼ náa Judá matri̱gi̱i̱n mámbá nguéjmi̱i̱n, bi̱ kayá edxu̱u̱ náa e̱ji̱i̱n Judá nindxu̱u̱ Nahsón a̱ʼdióo Aminadab. 4 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 74,600 xa̱bekha. 5 Náa mbá níjniúu magi̱ʼi̱i̱n bi̱ naguwáʼ náa xuajin chíʼgíiʼ ndrígóo Isacar, bi̱ mbayá edxu̱u̱ náa e̱ji̱i̱n Isacar nindxu̱u̱ Netanel a̱ʼdióo Zuar. 6 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 54,400 xa̱bekha. 7 Náa i̱mba̱ níjniúu gíi̱nʼ bi̱ naguwáʼ náa xuajin chíʼgíiʼ ndrígóo Zabulón, bi̱ mbayá edxu̱u̱ náa e̱ji̱i̱n Zabulón nindxu̱u̱ Eliab a̱ʼdióo Helón. 8 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 57,400 xa̱bekha.

9 Xúgíinʼ soldado bi̱ nigumaraʼmáʼ mbiʼñún bi̱ gíi̱nʼ náa Judá ninindxu̱ún 186,400 xa̱bekha. Ikhiin ni̱ndxu̱ún bi̱ kaʼñúún muxkuijxi̱i̱ ginii guʼwún náa gíi̱nʼ.

10 Náa ajtsú xuajin majkhaʼ rí niwiʼtáa bi̱ gíi̱nʼ náa Rubén matri̱gi̱i̱n mámbá nguéjmi̱i̱n xígií náa sur, bi̱ mbayá edxu̱u̱ náa e̱ji̱i̱n Rubén nindxu̱u̱ Elizur a̱ʼdióo Sedeur. 11 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 46,500 xa̱bekha. 12 Náa mbá níjniúu magi̱ʼi̱i̱n bi̱ naguwáʼ náa xuajin chíʼgíiʼ ndrígóo Simeón, bi̱ mbayá edxu̱u̱ náa e̱ji̱i̱n Simeón nindxu̱u̱ Selumiel a̱ʼdióo Zurisadái. 13 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 59,300 xa̱bekha. 14 Náa i̱mba̱ níjniúu gíi̱nʼ bi̱ naguwáʼ náa xuajin chíʼgíiʼ ndrígóo Gad, bi̱ mbayá edxu̱u̱ náa e̱ji̱i̱n Gad nindxu̱u̱ Eliasaf a̱ʼdióo Reuel. 15 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 45,650 xa̱bekha.

16 Xúgíinʼ bi̱ nigumaraʼmáʼ mbiʼñún bi̱ magún náa soldado bi̱ naguwáʼ náa xuajin chíʼgíiʼ ndrígóo Rubén ninindxu̱ún 151,450 xa̱bekha, ikhiin ni̱ndxu̱ún bi̱ maʼni raga̱jma̱ grupo bi̱ muxkuijxi̱i̱ guʼwún náa gíi̱nʼ.

17 Índo̱ gágún kuñu̱u̱n guʼwá xtíin náa dí nagimbíi̱n, bi̱ levitas magi̱ʼi̱i̱n ta̱pha̱ náa gíi̱nʼ eʼwíinʼ.

Mámbá xóo nigi̱ʼi̱i̱n xúʼko̱ má gátujxu̱n magún, xó má ajtsú xuajin majkhaʼ rí niwiʼtáa dí ikhiin kaʼñúún.

18 Náa ajtsú xuajin majkhaʼ rí niwiʼtáa bi̱ gíi̱nʼ náa Efraín matri̱gi̱i̱n mámbá nguéjmi̱i̱n xígií náa narámaaʼ a̱jkha̱ʼ,* bi̱ mbayá edxu̱u̱ náa e̱ji̱i̱n Efraín nindxu̱u̱ Elisamá a̱ʼdióo Amihud. 19 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 40,500 xa̱bekha. 20 Náa mbá níjniúu magi̱ʼi̱i̱n bi̱ naguwáʼ náa xuajin chíʼgíiʼ ndrígóo Manasés, bi̱ mbayá edxu̱u̱ náa e̱ji̱i̱n Manasés nindxu̱u̱ Gamaliel a̱ʼdióo Pedahzur. 21 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 32,200 xa̱bekha. 22 Náa i̱mba̱ níjniúu gíi̱nʼ bi̱ naguwáʼ náa xuajin chíʼgíiʼ ndrígóo Benjamín, bi̱ mbayá edxu̱u̱ náa e̱ji̱i̱n Benjamín nindxu̱u̱ Abidán a̱ʼdióo Guideoní. 23 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 35,400 xa̱bekha.

24 Bi̱ nigumaraʼmáʼ mbiʼñún bi̱ magún náa soldado bi̱ gíi̱nʼ náa Efraín ninindxu̱ún 108,100 xa̱bekha ga̱jma̱a̱ ikhiin ni̱ndxu̱ún bi̱ maʼni ragajtsú grupo bi̱ muxkuijxi̱i̱ guʼwún náa gíi̱nʼ.

25 Náa ajtsú xuajin majkhaʼ rí niwiʼtáa bi̱ gíi̱nʼ náa Dan matri̱gi̱i̱n mámbá nguéjmi̱i̱n xígií náa norte, bi̱ mbayá edxu̱u̱ náa e̱ji̱i̱n Dan nindxu̱u̱ Ahiézer a̱ʼdióo Amisadái. 26 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 62,700 xa̱bekha. 27 Náa mbá níjniúu magi̱ʼi̱i̱n bi̱ naguwáʼ náa xuajin chíʼgíiʼ ndrígóo Aser, bi̱ mbayá edxu̱u̱ náa e̱ji̱i̱n Aser nindxu̱u̱ Paguiel a̱ʼdióo Ocrán. 28 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 41,500 xa̱bekha. 29 Náa i̱mba̱ níjniúu gíi̱nʼ bi̱ naguwáʼ náa xuajin chíʼgíiʼ ndrígóo Neftalí, bi̱ mbayá edxu̱u̱ náa e̱ji̱i̱n Neftalí nindxu̱u̱ Ahirá a̱ʼdióo Enán. 30 Xúgíinʼ bi̱ nigumaraʼmáʼ mbiʼñún bi̱ magún náa soldado ninindxu̱ún 53,400 xa̱bekha.

31 Xúgíinʼ bi̱ nigumaraʼmáʼ mbiʼñún bi̱ gíi̱nʼ náa Dan ninindxu̱ún 157,600 xa̱bekha. Ikhiin ni̱ndxu̱ún bi̱ muxkuijxi̱i̱ iwáá kayuuʼ guʼwún náa gíi̱nʼ, xó má ajtsú xuajin majkhaʼ rí niwiʼtáa dí ikhiin kaʼñúún”.

32 Bugi̱ ninindxu̱ún xúgíinʼ israelitas bi̱ nigumaraʼmáʼ mbiʼñún xúʼko̱ má bi̱ ni̱ndxu̱ún anu̱ún, mbá xúgíinʼ xa̱bekha bi̱ nigumaraʼmáʼ mbiʼñún náa gíi̱nʼ mu magún náa soldado ninindxu̱ún 603,550. 33 Mú bi̱ ni̱ndxu̱ún levitas, na̱nguá nigumaraʼmáʼ mbiʼñún gajmiún eʼwíinʼ israelitas, xó má Jeobá niʼtáñajuunʼ Moisés maguma. 34 Israelitas nini̱ xúgíʼ xó má Jeobá niʼtáñajuunʼ Moisés. Xúʼko̱ kaʼnii xóo ni̱jkha̱ ragi̱ʼi̱i̱n xó má ajtsú xuajin majkhaʼ rí niwiʼtáa ga̱jma̱a̱ xúʼko̱ kaʼnii xóo nixkuijxi̱i̱ guʼwún náa nigi̱ʼi̱i̱n, xó má bi̱ kúwá náa guʼwún xúʼko̱ má bi̱ nindxu̱ún anu̱ún.

3 Bugi̱ nindxu̱ún e̱ji̱i̱n Aarón ga̱jma̱a̱ Moisés mbiʼi rí Jeobá niʼtámíjná ga̱jma̱a̱ Moisés náa kúbá Sinaí. 2 Xígi̱ mbiʼñún e̱ji̱i̱n Aarón: Nadab a̱ʼdá giʼnii, Abihú, Eleazar ga̱jma̱a̱ Itamar. 3 Xígi̱ mbiʼñún e̱ji̱i̱n Aarón, ndxajkun bi̱ nixtaʼwíin mu matri̱gi̱i̱n muñambáá xóo ndxajkun. 4 Mú Nadab ga̱jma̱a̱ Abihú nikháñún náa inuu Jeobá índo̱ nixnajxi̱ aguʼ dí rakáʼñún muxnajxi̱ náa inuu Jeobá náa ku̱ba̱ʼ mijxooʼ* ndrígóo Sinaí ga̱jma̱a̱ na̱nguá kuáʼdíin e̱jñu̱ún. Mú Eleazar ga̱jma̱a̱ Itamar ninindxu̱ún má xúʼko̱ ndxajkun gajmiún Aarón bi̱ nindxu̱u̱ anu̱ún.

5 Ikhú Jeobá niʼthúu̱n Moisés: 6 “Atani̱ rí xuajin chíʼgíiʼ* ndrígóo Leví maguwáʼ kanuu ga̱jma̱a̱ muguajún náa inuu ndxajkun Aarón, mu mumbayíí. 7 Gíʼmaa munimbáníí rí kaʼñún muni̱ ga̱jma̱a̱ náa xúgíʼ xuajin náa inuu guʼwá xtíin dí nagimbíi̱n, muni̱ ñajunʼ dí ndayóoʼ maguma náa guʼwá xtíin. 8 Ikhiin kajkuáa ñawúúnʼ xúgíʼ rí najmaa náa guʼwá xtíin ga̱jma̱a̱ munimbáníí ñajunʼ ndrígu̱ún náa israelitas, ma̱ngaa muni̱ ñajunʼ dí ndayóoʼ maguma náa guʼwá xtíin. 9 Mbaʼyóoʼ maraxnaxíin levitas náa inuu Aarón ga̱jma̱a̱ náa e̱ji̱i̱n. Ikhiin nijuixnájxi̱i̱n ga̱jma̱a̱ nixtaʼwíin náa majñu̱únʼ israelitas mu mumbayíí ikhaa. 10 Mbaʼyóoʼ matraʼwi̱i̱ Aarón gajmíi̱n e̱ji̱i̱n mu mani̱ndxu̱ún ndxajkun, asndu tsáá imba̱a̱ xa̱bu̱ kaníí* bi̱ ga̱ʼkha̱ kanuu ikhí, mbaʼyóoʼ makhañúu”.

11 Jeobá ma̱ngaa niʼthúu̱n Moisés: 12 “¡Atayáá! Ikhúún maraʼwi̱i̱n levitas náa majñu̱únʼ israelitas, ki xóo xúgíinʼ e̱jín giʼnuu náa israelitas. Bi̱ levitas mani̱ndxu̱ún ndrígióʼ ikhúún. 13 Numuu dí xúgíinʼ e̱jín giʼnuu nindxúu̱n ndrígióʼ ikhúún, mbiʼi rí nigúdíin e̱jín giʼnuu bi̱ kúwá náa ku̱ba̱ʼ ndrígóo Egipto, xúgíinʼ e̱jín giʼnuu náa Israel, niraʼwi̱i̱n* mu mani̱ndxu̱ún ndrígióʼ xó má xa̱bekha ga̱jma̱a̱ xujkhúʼ. Mu mani̱ndxu̱ún ndrígióʼ. Ikhúún ni̱ndxu̱ʼ Jeobá”.

14 Jeobá nitanga̱a̱ niʼtamíjna ga̱jma̱a̱ Moisés náa ku̱ba̱ʼ mijxooʼ ndrígóo Sinaí ga̱jma̱a̱ niʼthúu̱n: 15 “Ataniraʼmáʼ mbiʼñún e̱ji̱i̱n Leví xó má bi̱ nindxu̱ún anu̱ún ga̱jma̱a̱ náa mbámbá guʼwíin. Mbaʼyóoʼ mataniraʼmáʼ mbiʼñún xúgíinʼ jiámá majkhiinʼ bi̱ guáʼdáá mbá giu̱únʼ o itháan”. 16 Moisés niʼnirámáʼ mbiʼñún xó má Jeobá niʼthúu̱n, ikha jngóo niʼni xó má niʼtáñajuunʼ. 17 Xígi̱ mbiʼñún e̱ji̱i̱n Leví: Guersón, Cohat ga̱jma̱a̱ Merarí.

18 Xígi̱ mbiʼñún e̱ji̱i̱n Guersón ga̱jma̱a̱ xó má bi̱ kúwá náa guʼwún: Libní ga̱jma̱a̱ Simeí.

19 E̱ji̱i̱n Cohat xó má bi̱ kúwá náa guʼwún nindxu̱u̱ Amram, Izhar, Hebrón ga̱jma̱a̱ Uziel.

20 E̱ji̱i̱n Merarí xó má bi̱ kúwá náa guʼwún nindxu̱u̱ Mahlí ga̱jma̱a̱ Musí.

Bugi̱ nindxu̱ún bi̱ niguwáʼ náa levitas xó má bi̱ kúwá náa guʼwún xúʼko̱ má bi̱ nindxu̱ún anu̱ún.

21 Náa Guersón niguwáʼ bi̱ nigumbiʼñún libnitas ga̱jma̱a̱ bi̱ nigumbiʼñún simeítas. Bugi̱ nindxu̱ún bi̱ nigumbiʼñún guersonitas. 22 Xúgíinʼ jiámá majkhiinʼ bi̱ guáʼdáá mbá giu̱únʼ o itháan, ninindxu̱ún 7,500 bi̱ nigumarámáʼ mbiʼñún. 23 Bi̱ kúwá náa guʼwún guersonitas nigi̱ʼi̱i̱n náa kidxuuʼ guʼwá xtíin, xígií náa narámaaʼ a̱jkha̱ʼ.* 24 Bi̱ kayá edxu̱u̱ náa guersonitas nindxu̱u̱ Eliasaf a̱ʼdióo Lael. 25 Ñajunʼ dí kajkuáa ñawúúnʼ muni̱ e̱ji̱i̱n Guersón nindxu̱u̱ dí muñewa̱a̱n guʼwá xtíin rí nagimbíi̱n, ma̱ngaa muñewa̱a̱n rí kúgoo ga̱jma̱a̱, xó má awúu̱n ga̱jma̱a̱ rexa̱a̱ cortina dí frájkha náa riejuun guʼwá xtíin dí nagimbíi̱n, 26 cortina di frájkha náa rexo̱o̱, ga̱jma̱a̱ cortina dí narugoo riejuun rexo̱o̱ guʼwá xtíin, náa nakarámáʼ tsigijñaʼ, ma̱ngaa ñuñuu ga̱jma̱a̱ xúgíʼ rí najmaa mu maguma ñajunʼ ikhí.

27 Náa Cohat niguwáʼ bi̱ nigumbiʼñún amramitas ga̱jma̱a̱ bi̱ nigumbiʼñún izharitas, mangiin bi̱ nigumbiʼñún hebronitas ga̱jma̱a̱ uzielitas. Bugi̱ nindxúu̱n bi̱ nigumbiʼñún cohatitas. 28 Xúgíinʼ jiámá majkhiinʼ bi̱ guáʼdáá mbá giu̱únʼ o itháan, ninindxu̱ún 8,600 ikhiin kaʼñún muñewa̱a̱n náa rí mikaʼwu. 29 Bi̱ kúwá náa goʼwóo Cohat nigi̱ʼi̱ xígií náa níjniúu guʼwá xtíin, xígií náa sur. 30 Bi̱ kayá edxu̱u̱ náa cohatitas nindxu̱u̱ Elizafán a̱ʼdióo Uziel xó má bi̱ kúwá náa guʼwún xúʼko̱ má bi̱ nindxu̱ún anu̱ún. 31 Ñajunʼ dí kaʼñún muni̱ nindxu̱u̱ rí muñewa̱a̱n Arca,* mesa, candelabro ga̱jma̱a̱ náa nakarámáʼ tsigijñaʼ, xó má xúgíʼ rí najmaa náa mikaʼwu, ma̱ngaa cortina dí frájkha ta̱pha̱ ga̱jma̱a̱ xúgíʼ rí najmaa mu maguma ñajunʼ dí rígá ikhí.

32 Bi̱ phú kayá edxu̱u̱ náa levitas nindxu̱u̱ Eleazar a̱ʼdióo ndxajkun Aarón, ikhaa ndaʼyoo xóo eni̱ bi̱ nuñajunʼ náa rí kaʼwu.

33 Náa Merarí niguwáʼ bi̱ nigumbiʼñún mahlitas ga̱jma̱a̱ bi̱ nigumbiʼñún musitas. Bugi̱ nindxúu̱n bi̱ niguwáʼ náa Merarí. 34 Xúgíinʼ jiámá majkhiinʼ bi̱ guáʼdáá mbá giu̱únʼ o itháan, ninindxu̱ún 6,200 bi̱ nigumarámáʼ mbiʼñún. 35 Bi̱ kayá edxu̱u̱ náa Merarí nindxu̱u̱ Zuriel a̱ʼdióo Abihail xó má bi̱ nindxu̱ún anu̱ún. Ikhiin gíi̱nʼ náa níjniúu guʼwá xtíin, xígií náa norte. 36 E̱ji̱i̱n Merarí guáʼdáá ñajunʼ dí muñewa̱a̱n armazón* ndrígóo guʼwá xtíin ma̱ngaa ixi̱ mbi̱jua̱, columna, cuadro náa najuáwánʼ rajkúu ga̱jma̱a̱ xúgíʼ rí najmaa mu maguma ñajunʼ dí rígá ikhí. 37 Xó má columna dí kuájun náa mbájndi rexo̱o̱ ga̱jma̱a̱ cuadro náa najuáwánʼ rajkúu, estaca ga̱jma̱a̱ ñuñuu.

38 Náa inuu guʼwá xtíin, xígií náa nagájnuu a̱jkha̱ʼ, náa inuu guʼwá xtíin rí nagimbíi̱n, náa gíʼ guʼwá xtíin ndrígóo Moisés ga̱jma̱a̱ Aarón mangiin e̱ji̱i̱n. Ikhiin kaʼñún muñewa̱a̱n náa rí mikaʼwu, kaʼñún muni̱ rígi̱ ga̱jma̱a̱ numún israelitas. Asndu tsáá imba̱a̱ xa̱bu̱ kaníí* bi̱ ga̱ʼkha̱ kanuu ikhí, mbaʼyóoʼ makhañúu.

39 Xúgíinʼ jiámá majkhiinʼ bi̱ nindxu̱ún levitas bi̱ guáʼdáá mbá giu̱únʼ o itháan ninindxu̱ún 22,000 bi̱ Moisés ga̱jma̱a̱ Aarón nidra̱ma̱ʼ mbiʼñún xó má Jeobá niʼtáñajúúnʼ muni̱ ga̱jma̱a̱ xó má bi̱ kúwá náa guʼwún.

40 Jeobá niʼthúu̱n Moisés: “Ataniraʼmáʼ mbiʼñún xúgíinʼ e̱jín giʼnuu bi̱ nindxúu̱n jiámá náa Israel bi̱ guáʼdáá mbá giu̱únʼ o itháan, atraxnii ga̱jma̱a̱ ataniraʼmáʼ mbiʼñún. 41 Gíʼmaa matraʼwi̱i̱n levitas mu mani̱ndxu̱ún ndrígióʼ, ikhúún nindxu̱ʼ Jeobá, ki xóo xúgíinʼ e̱jín giʼnuu israelitas. Ga̱jma̱a̱ atraʼwíin xujkhú kraʼdiin ndrígu̱ún levitas ki xóo xúgíinʼ xujkhú kraʼdiin bi̱ nagumiin giʼnuu náa israelitas”. 42 Ikhú Moisés niʼnirámáʼ mbiʼñún xúgíinʼ e̱jín giʼnuu israelitas, xó má Jeobá niʼtáñajuunʼ maʼni. 43 Xúgíinʼ jiámá majkhiinʼ bi̱ giʼnuu bi̱ guáʼdáá mbá giu̱únʼ o itháan, bi̱ nigumarámáʼ mbiʼñún ninindxu̱ún 22,273.

44 Jeobá niʼtamíjna má xúʼko̱ ga̱jma̱a̱ Moisés. Ga̱jma̱a̱ niʼthúu̱n: 45 “Atraʼwíin e̱jñu̱ún levitas ki xóo xúgíinʼ e̱jín giʼniún israelitas ga̱jma̱a̱ atraʼwíin xujkhú kraʼdiin ndrígu̱ún levitas ki xóo xujkhú kraʼdiin ndrígu̱ún ikhiin. Levitas gíʼmaa mani̱ndxu̱ún ndrígióʼ. Ikhúún nindxu̱ʼ Jeobá. 46 Xóo numuu bi̱ majuiʼtsiwíin bi̱ mbá 273 e̱jín giʼniún israelitas bi̱ itháan mbaʼin ki xóo levitas, 47 mámbáa dí ikhaa gíʼmaa mani̱ndxu̱u̱ numuu mbá witsu siclo* ndrígóo plata, gíʼmaa ma’ni ki̱wu̱n xó má rí najmaa náa dí mikaʼwu. Mbá siclo nindxu̱u̱ mbá 12 gramo.* 48 Gíʼmaa maraxna̱a̱ mbújkha̱a̱ Aarón gajmíi̱n e̱ji̱i̱n xó má minumuu bi̱ maʼtsiwíin bi̱ itháan mbaʼin ki xóo ikhiin”. 49 Moisés nigruigú rí xóo numuu bi̱ niʼtsiwíin bi̱ itháan mbaʼin ki xóo levitas. 50 Nigruigú mbújkha̱a̱ ga̱jma̱a̱ numún e̱jín giʼniún israelitas: Nindxu̱u̱ 1,365 siclo, xó má ki̱wu̱n rí najmaa náa dí kaʼwu. 51 Ikhú Moisés nixnúu mbújkha̱a̱ Aarón gajmíi̱n e̱ji̱i̱n dí majuiʼtsiwíin, e̱jín giʼniún israelitas xó má Jeobá niʼthúu̱n, niʼni xó má Jeobá niʼtáñajuunʼ maʼni Moisés.

4 Ikhú Jeobá niʼthúu̱n Moisés ga̱jma̱a̱ Aarón: 2 “Gu̱nila mbá censo náa e̱ji̱i̱n Cohat bi̱ kúwá náa majñu̱únʼ e̱ji̱i̱n Leví, xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún, 3 xúgíinʼ bi̱ guáʼdáá 30 asndu 50 tsigúúnʼ bi̱ nikhánún ñajunʼ muni̱ náa guʼwá xtíin rí nagimbíi̱n.

4 Rígi̱ nindxu̱u̱ ñajunʼ dí nuni̱ e̱ji̱i̱n Cohat náa guʼwá xtíin dí nagimbíi̱n. Nindxu̱u̱ mbá ñajunʼ mikaʼwu wéñuuʼ. 5 Índo̱ gúxkuijxi̱i̱ guʼwún náa gíi̱nʼ, Aarón gajmíi̱n e̱ji̱i̱n matu̱ʼu̱u̱n, muxruigúu cortina dí frájkha ta̱pha̱ muruguáá ga̱jma̱a̱ arca dí nimbánuu.* 6 Náa tsu̱du̱u̱ muxtra̱ma̱ʼ xtún foca ma̱ngaa muxtra̱ma̱ʼ mbá xtíin azul ga̱jma̱a̱ muxudajngaa ixi̱ mu magún kuñu̱u̱n ga̱jma̱a̱.

7 Ma̱ngaa muxtra̱ma̱ʼ mbá xtíin azul náa mesa dí trámáʼ pan dí najuixnájxi̱, náa tsu̱du̱u̱ mudra̱ma̱ʼ xúbá, copas, xua̱a̱ ga̱jma̱a̱ rayaʼ náa ga̱jnu̱ʼ vino dí majuixnájxi̱ xóo tsigijñaʼ dí magadirámuuʼ, ma̱ngaa pan dí najuixnájxi̱ mámbá mbiʼi gíʼmaa matrámáʼ ikhí. 8 Náa tsu̱du̱u̱ xúgíʼ rígi̱ muxtra̱ma̱ʼ mbá xtíin maña xngeʼdi, muruguáá mesa ga̱jma̱a̱ xtún foca ma̱ngaa muxudajngaa ixi̱ mu magún kuñu̱u̱n ga̱jma̱a̱. 9 Nda̱wa̱á muruguáá candelabro rí nambiʼi ga̱jma̱a̱ mbá xtíin azul, xó má lámpara ndrígóo, pinza* ndrígóo ma̱ngaa daan náa nagiwa̱nʼ chámbuʼ, xúʼko̱ má xúgíʼ rí najmaa náa najnu̱ʼ aceite rí najmaa mu mambiʼi ga̱jma̱a̱. 10 Candelabro mumbraʼáá xtún foca, ma̱ngaa muxudajngaa mbá ixi̱ mu magún kuñu̱u̱n ga̱jma̱a̱. 11 Náa rí nakarámáʼ dí ndataun dí niguma ga̱jma̱a̱ mbawíí oro, muxtra̱ma̱ʼ mbá xtíin azul náa tsu̱du̱u̱ ma̱ngaa mumbraʼáá xtún foca ga̱jma̱a̱ muxudajngaa ixi̱ mu ma̱ndoo magún kuñu̱u̱n ga̱jma̱a̱. 12 Nda̱wa̱á mugimbóo xúgíʼ dí najmún xúgíʼ mbiʼi mu muni̱ ñajunʼ náa dí mikaʼwu mudra̱ma̱ʼ náa tsu̱du̱u̱ mbá xtíin azul, tsu̱du̱u̱ muxtra̱ma̱ʼ xtún foca nda̱wa̱á muxudajngaa mbá ixi̱ mu magún kuñu̱u̱n ga̱jma̱a̱.

13 Mbaʼyóoʼ muriya̱a̱ʼ idiʼ* náa nakarámáʼ tsigijñaʼ ga̱jma̱a̱ ikhí muxtra̱ma̱ʼ mbá xtíin dí niguma ga̱jma̱a̱ mugu̱ rí miʼñuu. 14 Xúgíʼ rí najmaa náa nakarámáʼ tsigijñaʼ mbaʼyóoʼ mudra̱ma̱ʼ ikhí, xóo daan náa nagiwa̱nʼ chámbuʼ, tenedores, pala ga̱jma̱a̱ xua̱a̱, xúgíʼ dí najmaa ikhí. Náa tsu̱du̱u̱ mbaʼyóoʼ muxtra̱ma̱ʼ xtún foca ma̱ngaa muxudajngaa ixi̱ mu magún kuñu̱u̱n ga̱jma̱a̱.

15 Índo̱ gúxkuijxi̱i̱ guʼwún náa gíi̱nʼ, Aarón gajmíi̱n e̱ji̱i̱n mambúu̱n rurajxi̱i̱ xúgíʼ dí najmaa náa rí mikaʼwu ga̱jma̱a̱ muruguáá. Ikhú matu̱ʼu̱u̱n e̱ji̱i̱n Cohat mu magún kudúún, mú ragíʼmaa muxkajma dí nindxu̱u̱ mikaʼwu, á mu nuni̱, makhañún. Rígi̱ nindxu̱u̱ ñajunʼ dí guáʼdáá e̱ji̱i̱n Cohat náa guʼwá xtíin dí nagimbíi̱n.

16 Eleazar a̱ʼdióo ndxajkun Aarón kajkuáa ñawúunʼ mbaʼyoo aceite rí najmaa náa mambiʼi, rí ndataun dí mi̱kha, tsigijñaʼ rí tsígáʼ, xúʼko̱ má aceite rí naxtaʼwíin ga̱jma̱a̱.* Ikhaa kaʼyoo mbaʼyoo xúgíʼ guʼwá xtíin ga̱jma̱a̱ xúgíʼ dí rígá ikhí, xúʼko̱ má náa rí mikaʼwu ga̱jma̱a̱ dí najmaa ikhí”.

17 Jeobá niʼtámíjná má xúʼko̱ ga̱jma̱a̱ Moisés ma̱ngaa Aarón. Niʼthúún: 18 “Xúniʼñáánʼ dí mambáa xuajin chíʼgíiʼ* ndrígu̱ún cohatitas náa majñu̱únʼ levitas. 19 Rígi̱ dí gíʼmaa mu̱nila ga̱jma̱a̱ numún ikhiin, mu xákháñún ga̱jma̱a̱ numuu rí nuxuʼmamijná náa rí nindxu̱u̱ mikaʼwu. Aarón gajmíi̱n e̱ji̱i̱n muxnún mámbíin rí ikhiin ñajunʼ dí muni̱ ga̱jma̱a̱ rí magún kudúún. 20 Ikhiin xándoo matu̱ʼu̱u̱n ni má mbuyáá nimbá chíʼgíiʼ* rí mikaʼwu, numuu rí á mu nuni̱ makhañún”.

21 Ikhú Jeobá niʼthúu̱n Moisés: 22 “Mbaʼyóoʼ matani̱ mbá censo náa xúgíinʼ e̱ji̱i̱n Guersón xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 23 Mbaʼyóoʼ mataniraʼmáʼ mbiʼñún xúgíinʼ bi̱ guáʼdáá 30 asndu 50 tsigúúnʼ ga̱jma̱a̱ bi̱ muñajunʼ náa guʼwá xtíin dí nagimbíi̱n. 24 Rígi̱ rí kaʼñúún muñewa̱a̱n xa̱bu̱ guersonitas ga̱jma̱a̱ rí magún kudúún: 25 Magún kudúún xtíin rí niguma ga̱jma̱a̱ guʼwá xtíin, rí nagúgoo ga̱jma̱a̱, xó má guʼwá xtíin dí nagimbíi̱n ma̱ngaa xtún foca rí nagúgoo ga̱jma̱a̱ náa tsu̱du̱u̱, cortina rí frájkha náa riejuun guʼwá xtíin dí nagimbíi̱n, 26 cortina dí rígá náa rexo̱o̱, xó má cortina rí frájkha náa riejuun rexo̱o̱ dí narugoo mbájndi guʼwá xtíin ga̱jma̱a̱ náa nakarámáʼ tsigijñaʼ, ñuñuu xúgíʼ rí najmaa ikhí ga̱jma̱a̱ xúgíʼ rí najmaa náa ñajunʼ rígi̱. Rígi̱ dí kaʼñúún muni̱. 27 Aarón gajmíi̱n e̱ji̱i̱n gíʼmaa mbuyáá xúgíʼ ñajunʼ rí nuni̱ guersonitas ga̱jma̱a̱ rí magún kudúún. Ikháanʼla muxnu̱u̱n xúgíʼ rí magún kudúún: Rígi̱ rí gíʼmaa muni̱ ikhiin. 28 Rígi̱ nindxu̱u̱ ñajunʼ rí gíʼmaa muni̱ xa̱bu̱ guersonitas náa guʼwá xtíin dí nagimbíi̱n. Gíʼmaa munimbaníí ñajunʼ rí kaʼñúún, bi̱ maxnún ikha nindxu̱u̱ Itamar a̱ʼdióo ndxajkun Aarón.

29 Muniraʼmáʼ mbiʼñún e̱ji̱i̱n Merarí xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 30 Mataniraʼmáʼ mbiʼñún bi̱ guáʼdáá 30 asndu 50 tsigúúnʼ, xúgíinʼ bi̱ muñajunʼ náa guʼwá xtíin dí nagimbíi̱n. 31 Rí kaʼñúún muni̱ náa ñajunʼ ndrígu̱ún náa guʼwá xtíin dí nagimbíi̱n rí magún kudúún rígi̱: Armazón* rí najmaa náa guʼwá xtíin, ixi̱ mbi̱jua̱, columnas ga̱jma̱a̱ cuadro náa najuáwánʼ rajkúu, 32 xó má columnas rí wájun náa rexo̱o̱ ga̱jma̱a̱ cuadro náa najuáwánʼ rajkúu, estaca ga̱jma̱a̱ ñuñuu mbóó gágún kudúún xúgíʼ rígi̱ ga̱jma̱a̱ xúgíʼ rígi̱ kaʼyoo náa ñajunʼ ndrígu̱ún. Ikháanʼla gíʼmaa muxnu̱u̱n magún kudúún dí kaʼñún xó má mbiʼñún mámbá rí ikhiin. 33 Xígi̱ kaʼnii nindxu̱u̱ ñajunʼ rí muni̱ e̱ji̱i̱n Merarí náa guʼwá xtíin dí nagimbíi̱n, bi̱ maxnún ikha nindxu̱u̱ Itamar a̱ʼdióo ndxajkun Aarón”.

34 Moisés ga̱jma̱a̱ Aarón gajmiún bi̱ kuya̱ edxu̱u̱ náa xuajin niniraʼmáʼ mbiʼñún e̱ji̱i̱n cohatitas xó má bi̱ kúwá náa guʼwún, xúʼko̱ má bi̱ ni̱ndxu̱ún anu̱ún. 35 Xúgíinʼ bi̱ guáʼdáá 30 asndu 50 tsigúúnʼ bi̱ muñajunʼ náa guʼwá xtíin dí nagimbíi̱n. 36 Mbá xúgíinʼ xa̱bekha bi̱ nigumaraʼmáʼ mbiʼñún ninindxu̱ún 2,750 xó má bi̱ kúwá náa guʼwún. 37 Xúgíinʼ bugi̱ bi̱ nigumaraʼmáʼ mbiʼñún xóo bi̱ kúwá náa guʼwún cohatitas, xúgíinʼ bi̱ nuñajunʼ náa guʼwá xtíin dí nagimbíi̱n. Moisés ga̱jma̱a̱ Aarón niniraʼmáʼ mbiʼñún xó má Jeobá niʼtáñajuunʼ Moisés.

38 E̱ji̱i̱n Guersón nigumaraʼmáʼ mbiʼñún xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 39 Xúgíinʼ bi̱ guáʼdáá 30 asndu 50 tsigúúnʼ bi̱ muñajunʼ náa guʼwá xtíin dí nagimbíi̱n. 40 Xúgíinʼ xa̱bekha bi̱ nigumaraʼmáʼ mbiʼñún ninindxu̱ún 2,630 xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 41 Bugi̱ ni̱ndxu̱ún bi̱ nigumaraʼmáʼ mbiʼñún bi̱ kúwá náa e̱ji̱i̱n Guersón, xúgíinʼ bi̱ nuñajunʼ náa guʼwá xtíin dí nagimbíi̱n. Moisés ga̱jma̱a̱ Aarón nixuʼma dí magumaraʼmáʼ mbiʼñún xó má niʼtáñajunʼ maguma Jeobá.

42 E̱ji̱i̱n Merarí nigumaraʼmáʼ mbiʼñún xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 43 Xúgíinʼ bi̱ guáʼdáá 30 asndu 50 tsigúúnʼ bi̱ muñajunʼ náa guʼwá xtíin dí nagimbíi̱n. 44 Xúgíinʼ xa̱bekha bi̱ nigumaraʼmáʼ mbiʼñún ninindxu̱ún 3,200 xó má bi̱ kúwá náa guʼwún. 45 Bugi̱ nindxúu̱n bi̱ nigumaraʼmáʼ mbiʼñún bi̱ kúwá náa e̱ji̱i̱n Merarí, bi̱ Moisés ga̱jma̱a̱ Aarón niniraʼmáʼ mbiʼñún xó má Jeobá niʼtáñajuunʼ Moisés.

46 Moisés ga̱jma̱a̱ Aarón ma̱ngaa bi̱ kuya̱ edxu̱u̱ náa Israel niniraʼmáʼ xúgíinʼ mbiʼñún levitas bugi̱, xó má bi̱ kúwá náa guʼwún xúʼko̱ má bi̱ ni̱ndxu̱ún anu̱ún. 47 Ikhiin guáʼdáá 30 asndu 50 tsigúúnʼ ga̱jma̱a̱ xúgíinʼ nijuixnún dí muñajunʼ ga̱jma̱a̱ dí magún kudúún dí rígá náa guʼwá xtíin dí nagimbíi̱n. 48 Xúgíinʼ xa̱bekha bi̱ nigumaraʼmáʼ mbiʼñún ninindxu̱ún 8,580. 49 Ikhiin nigumarámáʼ mbiʼñún xó má Jeobá niʼtáñajuunʼ Moisés, mámbáa xó má ñajunʼ rí nijuixnáá ga̱jma̱a̱ rí maʼga kagu̱u̱ nigumaraʼmáʼ mbiʼñún xó má Jeobá niʼtáñajuunʼ Moisés.

5 Jeobá nitanga̱a̱ niʼtámíjná ga̱jma̱a̱ Moisés niʼthúu̱n: 2 “Aratáñajúúnʼ israelitas rí muxkawíin náa gíi̱nʼ xúgíinʼ xa̱bu̱ bi̱ guáʼdáá lepra,* ga̱jma̱a̱ xúgíinʼ xa̱bekha bi̱ na̱ʼkha̱ iyooʼ tsáʼkhún numuu dí guáʼdáá mbá nandii, asndu tsáá bi̱ gáxkajmaa mbáa bi̱ niʼni tsagaminaʼ ga̱jma̱a̱ numuu mbáa bi̱ nikháñúu. 3 Xó má xa̱biya̱ o a̱ʼgu̱, gíʼmaa rí murawíin rexa̱a̱. Gíʼmaa murawíin rexa̱a̱ náa gíi̱nʼ mu xúʼko̱ xúni̱ tsagáá ikhí, numuu rí náa majñu̱únʼ ikhiin xtáá ikhúún”. 4 Xúʼko̱ má nini̱ israelitas nirawíin rexa̱a̱ xa̱bu̱ bi̱ tsagiin náa gíi̱nʼ. Xó má Jeobá niʼtáñajuunʼ Moisés, xúʼko̱ má nini̱ israelitas.

5 Jeobá niʼthúu̱n Moisés: 6 “Arathún israelitas: ‹Á mu mbáa xa̱biya̱ o mbáa a̱ʼgu̱ nakudaminaʼ mbá aʼkhá rí naguʼwún nuni̱ xúgíinʼ xa̱bu̱ ga̱jma̱a̱ tséwi̱ji̱ jmbu náa Jeobá, xa̱bu̱ buʼko̱ gíʼdoo aʼkhúun. 7 Gíʼmaa maʼthí aʼkhá rí nikudaminaʼ, ma̱ngaa maʼni numa̱a̱ xó má mba̱a̱ aʼkhá rí niʼni ga̱jma̱a̱ magrígúu 20 por ciento itháan. Mu maxnáa bi̱ niʼniuu dí raʼkhí. 8 Á mu nikháñúu xa̱bu̱ bi̱ magruigúu rí miʼni numala, ikhaa ragíʼdaa mbáa bi̱ kaʼyoo mijngii, gíʼmaa mixnáá Jeobá ga̱jma̱a̱ rígi̱ mixnáá ndxajkun, xó má mugu̱ e̱jmba̱a̱ bi̱ maʼga kiʼyáa náa inuu ndxajkun mu maxnájxi̱i̱ náa inuu Dios mu xúʼko̱ maguma mba̱a̱ a̱jkiu̱ún kuyáá bi̱ nikiéʼkúun.

9 Xúgíʼ rí muxnajxi̱ israelitas rí nindxu̱u̱ kaʼwu náa inuu ndxajkun, gíʼmaa mani̱ndxu̱u̱ ndrígóo ikhaa. 10 Ndxajkun gíʼmaa maguanúu ga̱jma̱a̱ xúgíʼ rí gúxnajxi̱ xa̱bu̱ rí nindxu̱u̱ kaʼwu asndu ndiéjunʼ má rí gúxna gíʼmaa mani̱ndxu̱u̱ ndrígóo ikhaa›”.

11 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 12 “Aratamíjná gajmiáanʼ israelitas ga̱jma̱a̱ arathún: ‹Rígi̱ dí gíʼmaa maguma á mu a̱ʼgiu̱u̱ mbáa xa̱bu̱ naʼni nduwaaʼ, 13 índo̱ nabóoʼ ga̱jma̱a̱ i̱mba̱a̱ xa̱bu̱, mú ajmbio̱o̱* na̱nguá eʼyoo ga̱jma̱a̱ naʼni ngo̱ʼo̱o̱, ikhaa niʼni tsagaminaʼ má ga̱jma̱a̱ nimbáa ndawa̱a̱ tsáa eʼyoo índo̱ nixtáa raʼni aʼkhá. 14 Á mu xa̱biya̱ naxíyúu ga̱jma̱a̱ natsu̱mu̱u̱ rí a̱ʼgiu̱u̱ niʼni nduwaaʼ tséʼniuu á mu niʼni tsagaminaʼ o na̱nguá, 15 ikhaa gíʼmaa maʼga kayáa a̱ʼgiu̱u̱ náa inuu ndxajkun, mbóó gáxnájxi̱ ga̱jma̱a̱ mbá kilo* e̱jndo̱o̱ʼ harina ndrígóo cebada. Ikhaa xáʼyóoʼ mandáwóoʼ aceite náa tsigijñaʼ rí maxnájxi̱ ni má xágrígu olíbano náa tsu̱du̱u̱, numuu rí nindxu̱u̱ mbá tsigijñaʼ rí tsígáʼ ga̱jma̱a̱ numuu rí naxíyúu, mbá tsigijñaʼ rí tsígáʼ naʼni rí marmáʼáan a̱jkiu̱u̱n rí nikiéʼkhun.

16 Ndxajkun maʼni rí a̱ʼgu̱ maʼga kanuu ga̱jma̱a̱ maxnáximinaʼ náa inuu Jeobá. 17 Ndxajkun maʼni majnííʼ náa mbá daan ku̱ba̱ʼ iyaʼ rí kaʼwu. Ga̱jma̱a̱ nda̱wa̱á mayéjxi̱ mbá chíʼgíiʼ* yujndaʼ dí rígá náa guʼwá xtíin marajkuáa náa awúu̱n iyaʼ. 18 Ga̱jma̱a̱ ndxajkun maʼni rí a̱ʼgu̱ maxnájximinaʼ náa inuu Jeobá ga̱jma̱a̱ a̱ʼgu̱ marajkúu xtátsiu̱u̱n, ma̱ngaa magrígu náa ñawúunʼ tsigijñaʼ rí tsígáʼ rí najmaa ma’ni marmáʼáan a̱jkiu̱u̱n, xóo muʼthá, tsigijñaʼ rí tsígáʼ dí nandoo gáʼthúu̱n rí naxíyúu, ma̱ngaa ndxajkun mbayá iyaʼ náa ñawúunʼ rí nindxu̱u̱ miʼkhu̱u̱n dí naʼni majuiʼthá tsríguíi.

19 Ikhú ndxajkun maʼni rí a̱ʼgu̱ maxná ajngóo índo̱ gáʼthúu̱n: “Á mu na̱nguá nitabáaʼ ga̱jma̱a̱ʼ imba̱a̱ xa̱bu̱ nákha kaʼníí xóó xtáa ajmbia̱a̱ʼ* ga̱jma̱a̱ na̱nguá xtaʼdáá aʼkháanʼ nda̱a̱ dí gáʼniáaʼ iyaʼ miʼkhu̱u̱n rígi̱ rí naʼni majuiʼthá tsríguíin. 20 Á mu nitani̱ tsagaminaʼ rí nitani̱ nduwaaʼ índo̱ kaʼníí xóó xtaa ga̱jma̱a̱ʼ ajmbia̱a̱ʼ ga̱jma̱a̱ nitabáaʼ ga̱jma̱a̱ʼ imba̱a̱ xa̱bu̱...”. 21 Ikhú ndxajkun ma’ni rí a̱ʼgu̱ maxná ajngóo rí maʼni majuiʼthá tsríguíi, ndxajkun gíʼmaa maʼthúu̱n a̱ʼgu̱: “Jeobá gáʼni rí ikháán mani̱ndxa̱a̱ʼ mbá xkri̱da náa eʼwíinʼ xa̱bu̱ índo̱ guxna ajngún rí maʼni majuiʼthá tsríguíin, Jeobá gáʼni rí mujuan awáanʼ mbáa asndu ní xáraʼdiin e̱ji̱n. 22 Iyaʼ rígi̱ maʼni rí majuiʼthá tsríguíín ma̱jnu̱ʼ náa chámbáaʼ ga̱jma̱a̱ mujuan awáanʼ mbáa asndu ní xáraʼdiin e̱ji̱n”. Ga̱jma̱a̱ a̱ʼgu̱ gíʼmaa mariʼña “¡Xúʼko̱ gaʼni! ¡Xúʼko̱ gaʼni!”.*

23 Nda̱wa̱á ndxajkun maʼnirámáʼ rí najuiʼthá tsrígú náa libro ga̱jma̱a̱ maguajtuun nakumáánʼ náa iyaʼ mu majngudi̱i̱. 24 Ikhú, ikhaa maʼni rí a̱ʼgu̱ maga̱a̱n iyaʼ miʼkhu̱u̱n rígi̱ ga̱jma̱a̱ iyaʼ rígi̱ maʼni rí mikhu awúu̱n. 25 Ndxajkun marígú náa ñawúunʼ a̱ʼgu̱ tsigijñaʼ rí tsígáʼ dí najuixnájxi̱ ga̱jma̱a̱ numuu rí naxíyúu, maʼbajngaa gi̱i̱ ñuʼún náa inuu Jeobá ga̱jma̱a̱ ikhaa maʼga kayóo mijngii náa nakarámáʼ tsigijñaʼ. 26 Ndxajkun maríya̱ʼ mbá ñawúunʼ tsigijñaʼ rí tsígáʼ xóo tsigijñaʼ dí najuixnájxi̱ ga̱jma̱a̱ marígú náa nakarámáʼ tsigijñaʼ mu maʼni gúniúu, nda̱wa̱á maʼni rí a̱ʼgu̱ maga̱a̱n iyaʼ rígi̱. 27 Índo̱ ikhaa gáʼni rí maga̱a̱n iyaʼ, á mu a̱ʼgu̱ niʼni tsagaminaʼ ga̱jma̱a̱ niʼni nduwaaʼ ajmbio̱o̱, ikhú iyaʼ rí naʼni majuiʼthá tsríguíi maʼni rí mi̱khu̱ awúu̱n ga̱jma̱a̱ mujuaan mbáa asndu xágiʼdiin e̱ji̱i̱n, ga̱jma̱a̱ a̱ʼgu̱ mani̱ndxu̱u̱ mbá xkri̱da bi̱ nijuiʼtá tsríguíi náa eʼwíinʼ xa̱bu̱. 28 Á mu a̱ʼgu̱ na̱nguá niʼni tsagaminaʼ ga̱jma̱a̱ nindxu̱u̱ kaʼwii, ikhaa xáguma gínáa, ajmbio̱o̱ maʼni rí maguewáan ada̱ ga̱jma̱a̱ magiʼdiin mbaʼin e̱ji̱i̱n.

29 Rígi̱ nindxu̱u̱ xtángoo ga̱jma̱a̱ numuu rí xóo naxíñu̱u̱n, á mu mbáa a̱ʼgu̱ naʼni tsagaminaʼ ga̱jma̱a̱ naʼni nduwaaʼ ajmbio̱o̱ índo̱ kaʼníí xtáa ga̱jma̱a̱, 30 o á mu xa̱biya̱ naxíyúu ga̱jma̱a̱ natsu̱mu̱u̱ rí a̱ʼgiu̱u̱ naʼni nduwaaʼ. Ikhaa gíʼmaa maʼga kayáa a̱ʼgiu̱u̱ náa inuu Jeobá ga̱jma̱a̱ ndxajkun gíʼmaa maʼni xúgíʼ xó má eʼthí náa xtángoo rígi̱. 31 Xa̱biya̱ xágiʼdoo aʼkhúun, mú a̱ʼgu̱ gíʼmaa maʼni numa̱a̱ aʼkhúun›”.

6 Jeobá niʼtámíjná má xúʼko̱ ga̱jma̱a̱ Moisés ma̱ngaa Aarón, niʼthúún: 2 “Aratamíjná gajmiáanʼ israelitas, arathún: ‹Á mu mbáa xa̱biya̱ o a̱ʼgu̱ nakudaminaʼ maxtáa xóo nazareo* náa Jeobá, 3 ragíʼmaa maga̱a̱n vino ni má i̱ʼwáʼ iyaʼ najnga̱a̱. Ni má xándoo maga̱a̱n vino rí miʼkhu̱u̱n ni má i̱ʼwáʼ iyaʼ najnga̱a̱. Ragíʼmaa maga̱a̱n iyooʼ uva ni má mi̱khu̱ uva dí xáwíí maxaʼ ni má dí nijndooʼ. 4 Náa xúgíʼ mbiʼi dí gánindxu̱u̱ xóo nazareo, ragíʼmaa mi̱khu̱ nimbá dí nagájnuu náa uva, ni má uva maxaʼ, ni má xtóo.

5 Náa xúgíʼ mbiʼi rí nikudaminaʼ mani̱ndxu̱u̱ xóo nazareo, ragíʼmaa ma̱ʼda̱ edxu̱u̱. Gíʼmaa manidxu̱u̱ mikaʼwii ga̱jma̱a̱ maniñuuʼ mbaʼya xtátsu̱u̱n edxu̱u̱ asndu índo̱ gárámuuʼ mbiʼi dí nixnáximinaʼ náa Jeobá. 6 Ragíʼmaa maʼga kanuu náa mbáa xa̱bu̱ bi̱ nikháñúu índo̱ xtáa raʼnimbánuu rí nixnáximinaʼ náa inuu Jeobá. 7 Maski ajndu anu̱u̱ o ru̱dúu̱* o a̱ngui̱i̱n nikháñúún, mú ikhaa ragíʼmaa maʼni tsagaminaʼ, numuu dí náa edxu̱u̱ rígá tsinaʼ dí nixnáximinaʼ náa Dios ndrígóo mu mani̱ndxu̱u̱ nazareo.

8 Náa xúgíʼ mbiʼi dí gánindxu̱u̱ nazareo, ikhaa nindxu̱u̱ mikaʼwii náa inuu Jeobá. 9 Á mu mbáa nakháñúu mbá nacha̱ náa nijniúu ga̱jma̱a̱ naʼni tsagoo xtátsu̱u̱n edxu̱u̱ dí nandoo gáʼthúu̱n rí xtáa raʼnimbánuu dí nixnáximinaʼ náa Dios, ikhaa gíʼmaa ma̱ʼda̱ edxu̱u̱ índo̱ gájuiʼthá dí niguma kaʼwi̱i̱. Gíʼmaa ma̱ʼda̱ edxu̱u̱ índo̱ gáʼni juwan mbiʼi. 10 Índo̱ gáʼni migiñuʼ mbiʼi gíʼmaa maʼga̱ kagui̱i̱n náa ndxajkun a̱jmi̱i̱n gúgu̱ o a̱jmi̱i̱n e̱jín paloma náa riejuun guʼwá xtíin dí nagimbíi̱n. 11 Ndxajkun maxnájxi̱i̱ mbáa ñu̱ʼu̱ xóo tsigijñaʼ ga̱jma̱a̱ numuu aʼkhá ga̱jma̱a̱ i̱mba̱a̱ maxnájxi̱i̱ xóo tsigijñaʼ dí nakarámáʼ, maʼni kaʼwi̱i̱ aʼkhúun náa inuu Dios ga̱jma̱a̱ numuu dí niguguaa mbáa bi̱ nikháñúu. Nda̱wa̱á ikhaa mbaʼyóoʼ maʼni kaʼwi̱i̱ edxu̱u̱ mbiʼi má rúʼko̱. 12 Gíʼmaa maxnáximinaʼ mbu̱júu̱ náa Jeobá mu xúʼko̱ magi̱ʼdu̱u̱ mbiʼi dí mani̱ndxu̱u̱ xóo mbáa nazareo, ikhaa gíʼmaa maʼga kayáa mbáa mugu̱ bi̱ gíʼdoo mbá tsiguuʼ mu maxnájxi̱i̱ xóo tsigijñaʼ ga̱jma̱a̱ numuu rí nikiéʼkúun. Mú xúgíʼ mbiʼi rí ninújngoo xágixnuu, numuu rí niguma tsagáá rí nixnáximinaʼ dí mani̱ndxu̱u̱ nazareo.

13 Rígi̱ nindxu̱u̱ xtángoo ga̱jma̱a̱ numuu mbáa nazareo. Índo̱ gárámuuʼ mbiʼi dí nindxu̱u̱ xóo mbáa nazareo, gíʼmaa maʼga kiʼyáa náa riejuun guʼwá xtíin dí nagimbíi̱n. 14 Ikhí gíʼmaa maxnájxi̱ tsigijñaʼ ndrígóo náa inuu Jeobá: Mbáa mugu̱ májáanʼ bi̱ gíʼdoo mbá tsiguuʼ xóo mbá tsigijñaʼ rí mikarámáʼ, mbáa mugu̱ e̱ʼgú bi̱ májáanʼ bi̱ gíʼdoo mbá tsiguuʼ mu maxnájxi̱i̱ xóo tsigijñaʼ ga̱jma̱a̱ numuu aʼkhá ga̱jma̱a̱ i̱mba̱a̱ mugu̱ e̱jmba̱a̱ bi̱ májáanʼ maxnájxi̱i̱ xóo tsigijñaʼ dí tsímáá,* 15 mbá canasta pan nijndi dí niguma ga̱jma̱a̱ harina dí itháan májánʼ dí kagu̱u̱ aceite o galleta rí mbawiʼ dí ragíʼdoo levadura dí kagu̱u̱ aceite xó má rí kaʼyoo majuixnájxi̱, xó má tsigijñaʼ rí tsígáʼ ma̱ngaa tsigijñaʼ dí nagadirámuuʼ. 16 Ndxajkun maxnájxi̱ xúgíʼ rígi̱ náa inuu Jeobá, maxnájxi̱ tsigijñaʼ ga̱jma̱a̱ numuu aʼkhá ma̱ngaa tsigijñaʼ dí nakarámáʼ. 17 Ndxajkun maxnájxi̱i̱ mugu̱ e̱jmba̱a̱ náa inuu Jeobá xóo tsigijñaʼ dí tsímáá ga̱jma̱a̱ mbóó gáxnájxi̱i̱ ga̱jma̱a̱ mbá canasta pan nijndi dí ragíʼdoo levadura ma̱ngaa maxnájxi̱ tsigijñaʼ rí kaʼyoo, tsigijñaʼ rí tsígáʼ ga̱jma̱a̱ tsigijñaʼ dí nagadirámuuʼ.

18 Ikhú bi̱ nindxu̱u̱ nazareo gíʼmaa ma̱ʼda̱ edxu̱u̱ náa riejuun guʼwá xtíin dí nagimbíi̱n ga̱jma̱a̱ mbayá xtátsiu̱u̱n dí niniñuuʼ mbaʼya índo̱ ninindxu̱u̱ nazareo ga̱jma̱a̱ magrigu mi̱kha náa grígu rakha tsigijñaʼ dí tsímáá. 19 Ndxajkun mbayá xuwiʼ xpajpoo mugu̱ rí ni̱ʼga̱, mbá pan nújndú dí ragíʼdoo levadura dí kajti náa canasta ga̱jma̱a̱ mbá galleta rí mbawiʼ dí ragíʼdoo levadura, gíʼmaa magrígú náa ñawúunʼ bi̱ nindxu̱u̱ nazareo nda̱wa̱á rí niʼda̱ edxu̱u̱ rí nindxu̱u̱ xóo tsinaʼ dí nindxu̱u̱ nazareo. 20 Ndxajkun gíʼmaa maʼbajngaa gi̱i̱ ñuʼún xóo mbá tsigijñaʼ rí nubajngaa náa inuu Jeobá. Numuu rí nindxu̱u̱ mbá rí mikaʼwu náa ndxajkun, xó má xuwiʼ tso̱xto̱o̱ rí nubajngaa ga̱jma̱a̱ rajkhúu xujkhúʼ rí nuxnajxi̱. Nda̱wa̱á rí ninindxu̱u̱ nazareo ma̱ndoo maga̱a̱n vino.

21 Rígi̱ nindxu̱u̱ xtángoo ga̱jma̱a̱ numuu rí nikudaminaʼ maʼni mbáa nazareo: Á mu ikhaa nikudaminaʼ maxnájxi̱ mbá tsigijñaʼ gamajkhu náa inuu Jeobá dí kaʼyoo maxnájxi̱, numuu dí nindxu̱u̱ mbáa nazareo ma̱ngaa ma̱ndoo maxnájxi̱ i̱ʼwáʼ tsigijñaʼ dí xóo maʼngo̱o̱ maxná, gíʼmaa maʼnimbánuu rí nikudaminaʼ maʼni náa xtángoo ga̱jma̱a̱ numuu mbáa nazareo›”.

22 Ikhú Jeobá niʼthúu̱n Moisés: 23 “Aratháán Aarón gajmíi̱n e̱ji̱i̱n: ‹Xígi̱ kaʼnii gúni̱ tsajkurámíinʼ xa̱bu̱ xuajin Israel. Arathún:

24 “Jeobá gáʼni tsajkurámáánʼ ga̱jma̱a̱ mañe̱wa̱nʼ.

25 Aguʼ dí naxpíbínʼ náa inuu Jeobá mambiʼi náa ikháán ga̱jma̱a̱ masngájmaaʼ rí májánʼ a̱jkiu̱u̱n kaʼyaaʼ.

26 Jeobá gásngájmaaʼ dí májánʼ a̱jkiu̱u̱n náa ikháán ga̱jma̱a̱ maxnáa’ dí tsímáá”›.

27 Ikhiin gíʼmaa muthi mbiʼyuʼ náa xa̱bu̱ Israel mu xúʼko̱ ikhúún maʼni tsajkurámíinʼ”.

7 Mbiʼi rí Moisés niguámbóo nigíʼ guʼwá xtíin, ikhaa niraʼwíí ga̱jma̱a̱ niʼni kaʼwi̱i̱ xúgíʼ dí rígá ikhí, náa nakarámáʼ tsigijñaʼ ga̱jma̱a̱ xúgíʼ rí najmaa ikhí. Nda̱wa̱á rí ikhaa niraʼwíí ga̱jma̱a̱ niʼni kaʼwi̱i̱ xúgíʼ rígi̱, 2 bi̱ kuya̱ edxu̱u̱ náa Israel xúʼko̱ má bi̱ kuya̱ edxu̱u̱ náa bi̱ ni̱ndxu̱ún anu̱ún nixnajxi̱ tsigijñaʼ. Bi̱ kuya̱ edxu̱u̱ bugi̱ bi̱ naguwáʼ náa mámbá xuajin majkhaʼ ndiyáá rí kiʼniraʼmáʼ. 3 Nigún kudúún tsigijñaʼ gamajkhu náa inuu Jeobá: Mbá majun carretas rí kúgumaʼá ga̱jma̱a̱ mbá 12 xedi̱, mbá carreta náa majmi̱i̱n bi̱ kuya̱ edxu̱u̱ ga̱jma̱a̱ mbáa xedi̱ náa mámbáa bi̱ kayá edxu̱u̱, ikhiin nixnajxi̱i̱n náa inuu guʼwá xtíin. 4 Jeobá niʼthúu̱n Moisés: 5 “Atrígú xúgíʼ rígi̱, numuu rí mbaʼyóoʼ majmaa náa ñajunʼ rí naguma náa awúu̱n guʼwá xtíin. Mbaʼyóoʼ mataxuíʼtháa rígi̱ náa bi̱ ni̱ndxu̱ún levitas, araxnáá mámbáa rí mbaʼyóoʼ maʼnimbánuu ga̱jma̱a̱ ñajunʼ ndrígóo”.

6 Ikha jngóo Moisés nigruigú carretas ga̱jma̱a̱ xedi̱, ma̱ngaa nikuíʼtíin náa bi̱ ni̱ndxu̱ún levitas. 7 Nixnúún a̱jma̱ carreta ga̱jma̱a̱ a̱jkhui̱i̱n xedi̱ e̱ji̱i̱n Guersón, xó má rí mbaʼñúu̱nʼ mu munimbaníí ga̱jma̱a̱ ñajunʼ ndrígu̱ún, 8 ma̱ngaa nixnúún a̱jkhu̱ carreta ga̱jma̱a̱ mbá migiñiiʼ xedi̱ e̱ji̱i̱n Merarí, xó má rí mbaʼñúu̱nʼ mu munimbaníí ga̱jma̱a̱ ñajunʼ ndrígu̱ún, bi̱ maxnún ikha nindxu̱u̱ Itamar a̱ʼdióo ndxajkun Aarón. 9 Mú nda̱a̱ rí nixnúún bi̱ ni̱ndxu̱ún e̱ji̱i̱n Cohat numuu rí ñajunʼ ndrígu̱ún nindxu̱u̱ rí muñajunʼ náa rí nindxu̱u̱ mikaʼwu. Ikhiin nagún kudúún ga̱jma̱a̱ xpajphún xúgíʼ rí nindxu̱u̱ mikaʼwu.

10 Bi̱ kuya̱ edxu̱u̱ nixnajxi̱ tsigijñaʼ rí majmaa náa maguma ga̱jma̱a̱ ndxo̱o̱ náa nakarámáʼ tsigijñaʼ mbiʼi rí ikhaa nixtaʼwíi. Índo̱ bi̱ kuya̱ edxu̱u̱ nixnajxi̱ tsigijñaʼ náa inuu dí nakarámáʼ tsigijñaʼ, 11 Jeobá niʼthúu̱n Moisés: “Mámbá mbiʼi, mámbáa bi̱ kayá edxu̱u̱ maxnájxi̱ tsigijñaʼ mu maguma ga̱jma̱a̱ ndxo̱o̱ náa nakarámáʼ tsigijñaʼ”.

12 Bi̱ nixnájxi̱ tsigijñaʼ náa timbá mbiʼi nindxu̱u̱ Nahsón a̱ʼdióo Aminadab, bi̱ na̱ʼkha̱ náa xuajin chíʼgíiʼ* ndrígóo Judá. 13 Rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos* ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 14 mbá copa rí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 15 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 16 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 17 rí nijuixnáxi̱ xóo tsigijñaʼ dí tsímáá,* a̱jmi̱i̱n xedi̱, witsiin mugu̱ e̱jmba̱a̱, witsiin chivátu* ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Nahsón a̱ʼdióo Aminadab.

18 Rí maʼni a̱jma̱ mbiʼi nixnájxi̱ tsigijñaʼ ndrígóo Netanel a̱ʼdióo Zuar, bi̱ kayá edxu̱u̱ náa xuajin chíʼgíiʼ ndrígóo Isacar. 19 Rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 20 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 21 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 22 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 23 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Netanel a̱ʼdióo Zuar.

24 Rí maʼni ajtsú mbiʼi bi̱ kayá edxu̱u̱ náa e̱ji̱i̱n Zabulón, nindxu̱u̱ Eliab a̱ʼdióo Helón, 25 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 26 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 27 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 28 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 29 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Eliab a̱ʼdióo Helón.

30 Rí maʼni a̱jkhu̱ mbiʼi, bi̱ kayá edxu̱u̱ náa e̱ji̱i̱n Rubén, nindxu̱u̱ Elizur a̱ʼdióo Sedeur, 31 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 32 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 33 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 34 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 35 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Elizur a̱ʼdióo Sedeur.

36 Rí maʼni witsu mbiʼi bi̱ kayá edxu̱u̱ náa e̱ji̱i̱n Simeón, nindxu̱u̱ Selumiel a̱ʼdióo Zurisadái, 37 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 38 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 39 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 40 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 41 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Selumiel a̱ʼdióo Zurisadái.

42 Rí maʼni majun mbiʼi, bi̱ kayá edxu̱u̱ náa e̱ji̱i̱n Gad, nindxu̱u̱ Eliasaf a̱ʼdióo Deuel, 43 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 44 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 45 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 46 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 47 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Eliasaf a̱ʼdióo Deuel.

48 Rí maʼni juwan mbiʼi, bi̱ kayá edxu̱u̱ náa e̱ji̱i̱n Efraín, nindxu̱u̱ Elisamá a̱ʼdióo Amihud, 49 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 50 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 51 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 52 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 53 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Elisamá a̱ʼdióo Amihud.

54 Rí maʼni migiñuʼ mbiʼi, bi̱ kayá edxu̱u̱ náa e̱ji̱i̱n Manasés, nindxu̱u̱ Gamaliel a̱ʼdióo Pedahzur, 55 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 56 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 57 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 58 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 59 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Gamaliel a̱ʼdióo Pedahzur.

60 Índo̱ niʼni mijna gu̱wa̱ʼ mbiʼi, bi̱ kayá edxu̱u̱ náa e̱ji̱i̱n Benjamín, nindxu̱u̱ Abidán a̱ʼdióo Guideoní, 61 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 62 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 63 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 64 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 65 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Abidán a̱ʼdióo Guideoní.

66 Rí maʼni gu̱wa̱ʼ mbiʼi, bi̱ kayá edxu̱u̱ náa e̱ji̱i̱n Dan, nindxu̱u̱ Ahiézer a̱ʼdióo Amisadái, 67 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 68 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 69 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 70 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 71 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Ahiézer a̱ʼdióo Amisadái.

72 Rí maʼni 11 mbiʼi, bi̱ kayá edxu̱u̱ náa e̱ji̱i̱n Aser, nindxu̱u̱ Paguiel a̱ʼdióo Ocrán, 73 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 74 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 75 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 76 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 77 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Paguiel a̱ʼdióo Ocrán.

78 Rí maʼni 12 mbiʼi, bi̱ kayá edxu̱u̱ náa e̱ji̱i̱n Neftalí, nindxu̱u̱ Ahirá a̱ʼdióo Enán, 79 rígi̱ nindxu̱u̱ rí nixnájxi̱: Mbá xúbá dí plata rí mikiwu̱n nindxu̱u̱ 130 siclos ga̱jma̱a̱ mbá xua̱a̱ dí plata rí mikiwu̱n nindxu̱u̱ 70 siclos, ki̱wu̱n xó má rí najmaa náa dí mikaʼwu, nájma̱ rígi̱ kajtíí harina dí itháan májánʼ dí kanda̱wo̱o̱ʼ ga̱jma̱a̱ aceite xó má tsigijñaʼ rí tsígáʼ, 80 mbá copa dí niguma ga̱jma̱a̱ mbawíí oro rí mikiwu̱n gu̱wa̱ʼ siclos ga̱jma̱a̱ kajtíí rí ndataun, 81 mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbáa a̱ʼdá múgú bi̱ gíʼdoo mbá tsiguuʼ mu mixnájxi̱i̱n xóo tsigijñaʼ rí mikarámáʼ, 82 mbáa a̱ʼdá tsújtúunʼ mu mixnájxi̱i̱ xóo tsigijñaʼ ga̱jma̱a̱ numuu aʼkhá, 83 rí nijuixnáxi̱ xóo tsigijñaʼ dí tsímáá, a̱jmi̱i̱n xedi̱, witsiin mugu̱ e̱jmba̱a̱, witsiin chivátu ga̱jma̱a̱ witsiin e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ rí nixnájxi̱ Ahirá a̱ʼdióo Enán.

84 Rígi̱ nindxu̱u̱ tsigijñaʼ dí nixnajxi̱ bi̱ kuya̱ edxu̱u̱ náa Israel mu maguma ga̱jma̱a̱ ndxo̱o̱ náa nakarámáʼ tsigijñaʼ índo̱ ikhaa nixtaʼwíi: 12 xúbá dí niguma ga̱jma̱a̱ mbawíí plata, mbá 12 xua̱a̱ dí niguma ga̱jma̱a̱ mbawíí plata ga̱jma̱a̱ mbá 12 copas dí niguma ga̱jma̱a̱ mbawíí oro, 85 (mámbá xúbá dí niguma ga̱jma̱a̱ mbawíí plata rí miki̱wu̱n nindxu̱u̱ 130 siclos ga̱jma̱a̱ mámbá xua̱a̱ rí miki̱wu̱n nindxu̱u̱ 70 siclos, xúʼko̱ má náa xúgíʼ rí niguma ga̱jma̱a̱ plata rí miki̱wu̱n ninindxu̱u̱ 2,400 siclos, ki̱wu̱n xó má rí najmaa náa dí mikaʼwu, 86 náa mámbá dí 12 copas dí niguma ga̱jma̱a̱ mbawíí oro, kajtíí dí ndataun rí miki̱wu̱n ninindxu̱u̱ gu̱wa̱ʼ siclos, ki̱wu̱n xó má rí najmaa náa dí mikaʼwu, ikha jngóo xúgíʼ copa dí niguma ga̱jma̱a̱ mbawíí oro rí miki̱wu̱n ninindxu̱u̱ 120 siclos). 87 Mbá xúgíinʼ xujkhúʼ bi̱ nijuixnájxi̱i̱n xóo tsigijñaʼ dí mikarámáʼ ninindxu̱ún mbá 12 xedi̱, mbá 12 mugu̱ e̱jmba̱a̱ ga̱jma̱a̱ mbá 12 e̱jín múgú bi̱ guáʼdáá mbá tsigúúnʼ, mbóó nijuixnájxi̱ ga̱jma̱a̱ tsigijñaʼ dí tsígáʼ, bi̱ nijuixnájxi̱i̱n xóo tsigijñaʼ ga̱jma̱a̱ numuu aʼkhá ninindxu̱ún mbá 12 e̱jín tsújtúunʼ. 88 Mbá xúgíinʼ xujkhúʼ bi̱ nijuixnájxi̱i̱n xóo tsigijñaʼ dí tsímáá ninindxu̱ún 24 xedi̱, 60 mugu̱ e̱jmba̱a̱, 60 chivátu ga̱jma̱a̱ mbá 60 e̱jín múgú bi̱ mbá tsigúúnʼ. Rígi̱ ninindxu̱u̱ tsigijñaʼ dí nijuixnájxi̱ mu maguma ga̱jma̱a̱ ndxo̱o̱ náa nakarámáʼ tsigijñaʼ nda̱wa̱á dí ikhaa nixtaʼwíi.

89 Mámbá rí índo̱ Moisés nato̱ʼo̱o̱ náa guʼwá xtíin dí nagimbíi̱n mu maʼtámíjná ga̱jma̱a̱ Dios, naʼdxawuun mbá aʼwá dí naʼtámíjná ga̱jma̱a̱ ikhaa náa tsu̱du̱u̱ dí nagúguáa̱ ga̱jma̱a̱ arca dí nimbánuu* náa trámiinʼ a̱jmi̱i̱n querubines, Dios naʼtámíjná ga̱jma̱a̱ ikhaa.

8 Jeobá niʼtámíjná ga̱jma̱a̱ Moisés, niʼthúu̱n: 2 “Aratámíjná ga̱jma̱a̱ʼ Aarón ga̱jma̱a̱ aratháán: ‹Índo̱ gátaskamáá lámpara, mbá juwan lámpara mbaʼyóoʼ mambiʼiti̱ga̱ náa inuu candelabro›”. 3 Xúʼko̱ kayuuʼ niʼni Aarón: Niskámáa lámpara náa inuu candelabro, xó má Jeobá niʼtáñajuunʼ maʼni Moisés. 4 Xígi̱ xóo niguma candelabro: Dí mbawíí oro, nijmaa martillo mu maguma ga̱jma̱a̱, náa ixu̱u̱ rí ta̱pha̱ asndu náa natuáʼán riʼyu̱u̱ nijmaa martillo mu maguma ga̱jma̱a̱. Candelabro rígi̱ niguma xó má niwasngájmáá* Moisés niʼni Jeobá.

5 Jeobá nitanga̱a̱ niʼtámíjná ga̱jma̱a̱ Moisés, niʼthúu̱n: 6 “Atraʼwíin levitas bi̱ kúwá náa majñu̱únʼ israelitas ga̱jma̱a̱ atani̱ kaʼwi̱ín. 7 Xígi̱ xóo gíʼmaa matani̱ kaʼwi̱ín, mataxtíjíinʼ ga̱jma̱a̱ iyaʼ dí naʼni kaʼwi̱i̱ aʼkhá, ikhiin mbaʼyóoʼ muda̱ xtátsiu̱ún náa xúgíʼ xuñúúnʼ ga̱jma̱a̱ navaja, mujñáa xtíñún ga̱jma̱a̱ muni̱ kaʼwumijnáa. 8 Ikhiin gíʼmaa magún kuya̱a̱ mbáa a̱ʼdá xédí ga̱jma̱a̱ tsigijñaʼ dí tsígáʼ rí nindxu̱u̱ harina dí itháan májánʼ dí kanda̱wo̱o̱ʼ aceite, ga̱jma̱a̱ ikháán mi̱dxu̱ʼ jcháa mbáa a̱ʼdá xédí mu maraxnaxíi xóo tsigijñaʼ ga̱jma̱a̱ numuu aʼkhá. 9 Mbaʼyóoʼ mi̱dxu̱ʼ xtiin levitas náa inuu guʼwá xtíin dí nagimbíi̱n ga̱jma̱a̱ matagímbíin xúgíinʼ xa̱bu̱ xuajin Israel. 10 Índo̱ gídxúʼ xtiin levitas náa inuu Jeobá, israelitas mbaʼyóoʼ muta̱ma̱ʼ ñawúúnʼ náa levitas. 11 Aarón maxnájxi̱i̱n levitas náa inuu Jeobá xóo tsigijñaʼ dí naʼbajngaa ga̱jma̱a̱ numún israelitas, ikhiin muni̱ ñajuunʼ Jeobá.

12 Ikhú levitas muta̱ma̱ʼ ñawúúnʼ náa edxu̱ún xedi̱. Nda̱wa̱á maraxnaxíi mbáa xóo tsigijñaʼ ga̱jma̱a̱ numuu aʼkhá ga̱jma̱a̱ imba̱a̱ xóo tsigijñaʼ dí nakarámáʼ náa inuu Jeobá mu matani̱ kaʼwi̱ín levitas. 13 Matani̱ rí levitas magún náa inuu Aarón gajmíi̱n e̱ji̱i̱n ga̱jma̱a̱ maraxnaxíin xóo tsigijñaʼ dí naʼbajngaa náa inuu Jeobá. 14 Mbaʼyóoʼ matraʼwi̱i̱n levitas náa majñu̱únʼ israelitas, levitas mani̱ndxu̱ún ndrígióʼ ikhúún. 15 Nda̱wa̱á levitas matu̱ʼu̱u̱n náa guʼwá xtíin dí nagimbíi̱n mu muni̱ ñajuunʼ. Xígi̱ xóo gíʼmaa matani̱ kaʼwi̱ín ga̱jma̱a̱ maraxnaxíin xóo tsigijñaʼ dí naʼbajngaa. 16 Numuu dí ikhiin nijuixnájxi̱i̱n náa ikhúún ga̱jma̱a̱ nijuaxtaʼwíin náa majñu̱únʼ israelitas. Maraʼwi̱i̱n mu mani̱ndxu̱ún ndrígióʼ ikhúún, ki xóo xúgíinʼ e̱jín giʼniún israelitas. 17 Numuu dí xúgíinʼ e̱jín giʼniún israelitas nindxu̱ún ndrígióʼ ikhúún, xó má xa̱bekha ga̱jma̱a̱ xujkhúʼ ni̱ni̱ kaʼwi̱ín mu mani̱ndxu̱ún ndrígióʼ ikhúún. Mbiʼi rí nigúdíin xúgíinʼ e̱jín giʼniún bi̱ kúwá náa ku̱ba̱ʼ ndrígóo Egipto. 18 Maraʼwi̱i̱n levitas ki xóo xúgíinʼ e̱jín giʼniún israelitas. 19 Náa majñu̱únʼ israelitas, levitas majuixnájxi̱i̱n mu mumbayíí Aarón gajmíi̱n e̱ji̱i̱n, mu muñajunʼ náa guʼwá xtíin dí nagimbíi̱n ga̱jma̱a̱ numuu israelitas ga̱jma̱a̱ muni̱ kaʼwi̱ín israelitas, mu xúʼko̱ xarigá nimbá gamiéjunʼ náa majñu̱únʼ israelitas numuu dí xa̱bu̱ xuajin Israel nigún kanuu náa rí nindxu̱u̱ mikaʼwu”.

20 Rígi̱ rí niʼni Moisés ga̱jma̱a̱ Aarón ma̱ngaa xúgíinʼ xa̱bu̱ xuajin Israel gajmiún levitas. Xó má xúgíʼ dí Jeobá niʼtáñajuunʼ Moisés maʼni gajmíi̱n levitas, xúʼko̱ nini̱ israelitas gajmiún ikhiin. 21 Xígi̱ kaʼnii nini̱ kaʼwumijnáa levitas ga̱jma̱a̱ nijñáa xtíñún. Nda̱wa̱á Aarón nixnájxi̱i̱n xóo tsigijñaʼ dí naʼbajngaa náa inuu Jeobá. Ikhú Aarón niʼni kaʼwi̱i̱ aʼkhúún mu maguma kaʼwi̱ín. 22 Nda̱wa̱á levitas nitu̱ʼu̱u̱n muñajunʼ náa guʼwá xtíin dí nagimbíi̱n náa inuu Aarón gajmíi̱n e̱ji̱i̱n. Xó má Jeobá niʼtáñajuunʼ Moisés muni̱ levitas, xúʼko̱ má nini̱ gajmiún.

23 Jeobá niʼtámíjná mbu̱júu̱ ga̱jma̱a̱ Moisés, niʼthúu̱n: 24 “Rígi̱ kaʼñún muni̱ i̱ndó levitas: Xa̱bekha bi̱ guáʼdáá 25 tsigúúnʼ o itháan, magún náa grupo bi̱ nuñajunʼ náa guʼwá xtíin dí nagimbíi̱n, 25 índo̱ gáguáʼdáá 50 tsigúúnʼ mugajnáán náa grupo dí nuñajunʼ ga̱jma̱a̱ ni xátangi̱ín muñajunʼ ikhí. 26 Ma̱ndoo mumbañún a̱ngiu̱ún bi̱ guáʼdáá ñajunʼ náa guʼwá xtíin dí nagimbíi̱n, mú ni xándoo muñajunʼ ikhí. Rígi̱ rí gíʼmaa matani̱ gajmiáanʼ levitas ga̱jma̱a̱ ñajunʼ ndrígu̱ún”.

9 Timbá igu̱nʼ rí ma’ni a̱jma̱ tsiguʼ rí ikhiin nigájnún náa ku̱ba̱ʼ ndrígóo Egipto, Jeobá niʼtámíjná ga̱jma̱a̱ Moisés náa ku̱ba̱ʼ mijxooʼ* ndrígóo Sinaí, niʼthúu̱n: 2 “Israelitas gíʼmaa muni̱ májáánʼ tsigijñaʼ rí majuixnájxi̱ náa Pascua náa mbiʼi rí kaʼyoo. 3 Gíʼmaa muni̱ májáánʼ náa mbiʼi rí kaʼyoo, índo̱ gáʼni 14 ñajuunʼ gu̱nʼ rígi̱, índo̱ gáʼni wakíʼ.* Gíʼmaa muni̱ májáánʼ xó má eʼthí náa xúgíʼ kiʼtáñajunʼ, maguma ikháá má xóo kaʼyoo maguma”.

4 Ikha jngóo Moisés niʼthún israelitas rí muni̱ májáánʼ tsigijñaʼ rí majuixnájxi̱ náa Pascua. 5 Ikhú ikhiin nini̱ májáánʼ tsigijñaʼ rí majuixnájxi̱ náa Pascua náa timbá igu̱nʼ náa mbiʼi 14 ñajuunʼ gu̱nʼ, índo̱ gáʼni wakíʼ,* náa ku̱ba̱ʼ mijxooʼ ndrígóo Sinaí. Xó má Jeobá niʼtáñajuunʼ Moisés xúʼko̱ nini̱ israelitas.

6 Mú mbaʼin xa̱bekha nigumaa tsagiin ga̱jma̱a̱ numuu rí nirugua̱a̱ mbáa bi̱ nikháñuu, ikha jngóo na̱nguá xóo muni̱ májáánʼ tsigijñaʼ rí majuixnájxi̱ náa Pascua mbiʼi rúʼko̱. Ikhú nigún náa inuu Moisés ga̱jma̱a̱ Aarón mbiʼi má rúʼko̱. 7 Ikhiin nithi: “Niguma tsagáanʼxu ga̱jma̱a̱ numuu rí nirugua̱a̱xu̱ mbáa bi̱ nikháñuu. Ndiéjunʼ gándoo munixu̱ʼ rá. Nanduxuʼ rí muxnajxí tsigijñaʼ gamajkhu náa inuu Jeobá náa mbiʼi rí kaʼyoo gajmiúxu eʼwíinʼ israelitas”. 8 Moisés niriʼñúún: “Guguaʼthi̱i̱n má a̱ʼkhu̱ niʼchala, guniʼñúʼ madxawun ndiéjunʼ gáʼthí Jeobá ga̱jma̱a̱ numala”.

9 Ikhú Jeobá niʼthúu̱n Moisés: 10 “Arathún israelitas: ‹Á mu mbáa rí ikháanʼla o bi̱ gáguwáʼ nda̱wa̱á naguma tsagaa ga̱jma̱a̱ numuu rí naguguaa mbáa bi̱ nikháñuu o nigájnuu nijkha mitsínguánʼ, gíʼmaa maʼni mújúunʼ tsigijñaʼ gamajkhu dí majuixnájxi̱ náa Pascua ndrígóo Jeobá. 11 Ikhiin gíʼmaa muni̱ májáánʼ índo̱ gáʼni a̱jma̱ igu̱nʼ, mbiʼi 14, índo̱ gáʼni wakíʼ.* Mbiʼi má rúʼko̱ gíʼmaa mu̱phu̱ xuyuuʼ mugu̱ ga̱jma̱a̱ pan dí ragíʼdoo levadura ga̱jma̱a̱ ya̱ʼu̱ dí miʼkhu̱u̱n. 12 Ragíʼmaa muniña̱a̱ʼ asndu imbo̱o̱ néjtsuu, ni má xáʼyóoʼ majmigaʼ itsu̱u̱ mugu̱. Gíʼmaa muni̱ májáánʼ xó má eʼthí náa xúgíʼ kiʼtáñajunʼ ga̱jma̱a̱ numuu Pascua. 13 Á mu mbáa bi̱ mikaʼwii o na̱nguá ni̱jkha̱ mitsínguánʼ ga̱jma̱a̱ na̱nguá niʼni mújúunʼ tsigijñaʼ gamajkhu rí majuixnájxi̱ náa Pascua, mbaʼyóoʼ makhañúu náa xuajñuu, numuu rí na̱nguá nixnájxi̱ tsigijñaʼ gamajkhu náa Jeobá mbiʼi rí kaʼyoo. Xa̱bu̱ buʼko̱ maʼni numa̱a̱ aʼkhúun.

14 Á mu mbáa xa̱bu̱ na̱ʼkha̱á bi̱ xtáa náa ikháanʼla, ikhaa gíʼmaa maʼni mújúunʼ tsigijñaʼ gamajkuu dí majuixnájxi̱ náa Pascua ndrígóo Jeobá. Gíʼmaa maʼni mújúunʼ xó má eʼthí náa kiʼtáñajunʼ ga̱jma̱a̱ numuu Pascua, maguma ikháá xó má kaʼyoo maguma. Gíʼmaa marigá mbóo kiʼtáñajunʼ náa ikháanʼla, xó má náa xa̱bu̱ na̱ʼkha̱á ga̱jma̱a̱ bi̱ xtáa náa xuajin›”.

15 Mbiʼi rí nigi̱ʼi̱ guʼwá xtíin, du̱u̱n nigíʼdu̱u̱ nirugoo guʼwá xtíin, xóo muʼtá guʼwá xtíin dí nimbánuu rí mbruʼun nawi̱ji̱ mbá aguʼ náa tsu̱du̱u̱ guʼwá xtíin rí nimbánuu asndu i̱mba̱ néjtsuu. 16 Narígá má xúʼko̱ rígi̱: Du̱u̱n narugoo náa tsu̱du̱u̱ guʼwá xtíin rí mbiʼi, mú dí mbruʼun nawi̱ji̱ mbá aguʼ. 17 Índo̱ du̱u̱n natu̱xu̱u̱ náa tsu̱du̱u̱ guʼwá xtíin, ikhú mbá nacha̱ natuxu̱u̱n mu magún, índo̱ du̱u̱n na̱jkha̱nú nawi̱ji̱, ikhí má giʼi̱i̱n israelitas. 18 Xó má Jeobá eʼtáñajúúnʼ israelitas rí magún xúʼko̱ má Jeobá eʼtáñajúúnʼ dí magi̱ʼi̱i̱n. Índo̱ du̱u̱n nawanúu̱ náa tsu̱du̱u̱ guʼwá xtíin, ikhiin nagi̱ʼi̱i̱n má ikhí. 19 Índo̱ du̱u̱n naguanúu mba̱yu̱u̱ʼ mbiʼi náa tsu̱du̱u̱ guʼwá xtíin, israelitas nunimbu̱u̱n kuyáá Jeobá ga̱jma̱a̱ tsétujxu̱u̱n magún. 20 Nguáná du̱u̱n naguanúu mba̱yu̱u̱ʼ mbiʼi náa tsu̱du̱u̱ guʼwá xtíin. Xó má Jeobá eʼtáñajúúnʼ dí maguanún náa gíi̱nʼ, xúʼko̱ má Jeobá eʼthúún rí magún. 21 Nguáná du̱u̱n naguanúu i̱ndó dí mbruʼun asndu imbo̱o̱ néjtsuu, índo̱ du̱u̱n natu̱xu̱u̱ rí miʼcha̱, ikhiin natuxu̱u̱n nagún. Tséʼniuu má mbiʼi o mbruʼun, índo̱ du̱u̱n natu̱xu̱u̱, ikhiin natuxu̱u̱n nagún. 22 Índo̱ du̱u̱n naguanúu náa tsu̱du̱u̱ guʼwá xtíin, a̱jma̱ mbiʼi, mbá gu̱nʼ o itháan, bi̱ israelita naguanún náa gíi̱nʼ ga̱jma̱a̱ tsétujxu̱u̱n magún. Mú, á mu du̱u̱n natu̱xu̱u̱, ikhiin natuxu̱u̱n magún. 23 Xó má Jeobá eʼtáñajúúnʼ rí maguanún náa gíi̱nʼ, xúʼko̱ má Jeobá eʼtáñajúúnʼ dí matujxu̱u̱n magún. Nunimbu̱ún kiʼtáñajunʼ ndrígóo Jeobá xó má Jeobá niʼtáñajuunʼ maʼni Moisés.

10 Ikhú Jeobá niʼthúu̱n Moisés: 2 “Gajmaaʼ martillo mu matani̱ a̱jma̱ trompeta dí plata mu matagímbíin ga̱jma̱a̱ xa̱bu̱ xuajin ma̱ngaa índo̱ gáʼyóoʼ muxkui̱jxi̱i̱ʼ guʼwún náa gíi̱nʼ. 3 Índo̱ gáwán a̱jma̱ trompeta, xúgíinʼ xa̱bu̱ Israel magimbíin ga̱jma̱á nindxa̱a̱ʼ náa riejuun guʼwá xtíin dí nagimbíi̱n. 4 Á mu káaʼ mbóó trompeta ewán, i̱ndó magimbíin ga̱jma̱á nindxa̱a̱ʼ bi̱ nuxna ikha, xóo muʼthá bi̱ kuya̱ edxu̱u̱ náa mbá mil xa̱bu̱ Israel.

5 Índo̱ nángi eʼni ewáán trompeta mú tséjyúuʼ mba̱yu̱u̱ʼ, bi̱ gíi̱nʼ xígií náa nagájnuu a̱jkha̱ʼ* mbaʼyóoʼ matujxu̱u̱n magún. 6 Índo̱ nángi eʼni ewáán trompeta mú tséjyúuʼ mba̱yu̱u̱ʼ dí maʼni ragajma nuthu, bi̱ gíi̱nʼ xígií náa sur gíʼmaa matujxu̱u̱n magún. Xígi̱ gíʼmaa mawán trompeta mámbá índo̱ gátujxu̱u̱n magún.

7 Mu ma̱ndoo mugímbiin xa̱bu̱ xuajin gíʼmaa mudi̱i̱ trompeta, mú xáwáán nángi eʼni. 8 E̱ji̱i̱n Aarón bi̱ nindxúu̱n ndxajkun, gíʼmaa mudi̱i̱ trompeta, rígi̱ nindxu̱u̱ mbá kiʼtáñajunʼ dí maguma mbáníí asndu kámuu náa ikháanʼla náa xúgíinʼ bi̱ maguwáʼ rakúwá nda̱wa̱á.

9 Índo̱ gáʼyóoʼ magún náa mbá guerra mu muxmijná gajmiún xa̱bu̱ sia̱nʼ, gíʼmaa mu̱ni̱ rí mawáán trompeta dí nachu̱u̱n magún náa guerra, Jeobá Dios ndrígala marmáʼáan a̱jkiu̱u̱n kaʼyala ga̱jma̱a̱ maʼni káwáanʼ náa xa̱bu̱ sia̱nʼ ndrígala.

10 Gíʼmaa mudi̱i̱ trompeta índo̱ kúwá gagi, índo̱ nuni̱ ndxa̱a̱ ga̱jma̱a̱ índo̱ nagi̱ʼdu̱u̱ gu̱nʼ, ma̱ngaa índo̱ nuxnajxi̱ tsigijñaʼ dí nakarámáʼ, ma̱ngaa tsigijñaʼ dí tsímáá,* rígi̱ nindxu̱u̱ mbá dí maʼni marmáʼáan a̱jkia̱la ikháanʼ náa inuu Dios ndrígala. Ikhúún nindxu̱ʼ Jeobá Dios ndrígala”.

11 Dí maʼni a̱jma̱ tsiguʼ, dí a̱jma̱ igu̱nʼ, mbiʼi 20 ñajuunʼ gu̱nʼ, du̱u̱n nitu̱jxu̱u̱ náa tsu̱du̱u̱ guʼwá xtíin dí nimbánuu. 12 Ikhú israelitas nigíʼdi̱i̱ nigájnún náa ku̱ba̱ʼ mijxooʼ* ndrígóo Sinaí xóo awan rí kaʼyoo magajnún, ga̱jma̱a̱ du̱u̱n niwi̱ji̱ náa ku̱ba̱ʼ mijxooʼ ndrígóo Parán. 13 Rígi̱ nindxu̱u̱ timbá miʼtsú rí nigájnún xó má Jeobá niʼtáñajuunʼ maʼni Moisés.

14 Bi̱ nigájnún ginii nindxu̱ún bi̱ naguwáʼ náa ajtsú xuajin majkhaʼ* dí niwiʼtáa, mámbá nguéjmi̱i̱n bi̱ gíi̱nʼ náa e̱ji̱i̱n Judá ga̱jma̱a̱ Nahsón a̱ʼdióo Aminadab bi̱ kayá edxu̱u̱ náa grupo rúʼko̱. 15 Netanel a̱ʼdióo Zuar bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Isacar. 16 Eliab a̱ʼdióo Helón bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Zabulón.

17 Índo̱ nixkui̱jxi̱i̱ʼ guʼwá xtíin, nigájnún e̱ji̱i̱n Guersón ga̱jma̱a̱ e̱ji̱i̱n Merarí, bi̱ nagún kuñu̱u̱n guʼwá xtíin.

18 Nda̱wa̱á nigájnún bi̱ naguwáʼ náa ajtsú xuajin majkhaʼ dí niwiʼtáa, mámbá nguéjmi̱i̱n bi̱ gíi̱nʼ náa Rubén ga̱jma̱a̱ náa Elizur a̱ʼdióo Sedeur bi̱ kayá edxu̱u̱ náa grupo rúʼko̱. 19 Selumiel a̱ʼdióo Zurisadái bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Simeón. 20 Eliasaf a̱ʼdióo Deuel bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Gad.

21 Nda̱wa̱á xa̱bu̱ cohatitas bi̱ nagún kudúún rí najmaa náa rí mikaʼwu. Guʼwá xtíin gíʼmaa magi̱ʼi̱ xawii índo̱ xóó tséguáʼnú ikhiin.

22 Nda̱wa̱á nigájnún bi̱ naguwáʼ náa ajtsú xuajin majkhaʼ dí niwiʼtáa, mámbá nguéjmi̱i̱n bi̱ gíi̱nʼ náa e̱ji̱i̱n Efraín ga̱jma̱a̱ Elisamá a̱ʼdióo Amihud bi̱ kayá edxu̱u̱ náa grupo rúʼko̱. 23 Gamaliel a̱ʼdióo Pedahzur bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Manasés. 24 Abidán a̱ʼdióo Guideoní bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Benjamín.

25 Nda̱wa̱á nigájnún, bi̱ naguwáʼ náa ajtsú xuajin majkhaʼ dí niwiʼtáa, mámbá nguéjmi̱i̱n bi̱ gíi̱nʼ náa e̱ji̱i̱n Dan, bi̱ gíi̱nʼ kidxuuʼ náa gíi̱nʼ ga̱jma̱a̱ Ahiézer a̱ʼdióo Amisadái bi̱ kayá edxu̱u̱ náa grupo rúʼko̱. 26 Paguiel a̱ʼdióo Ocrán bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Aser. 27 Ahirá a̱ʼdióo Enán bi̱ kayá edxu̱u̱ náa grupo náa xuajin chíʼgíiʼ ndrígu̱ún e̱ji̱i̱n Neftalí. 28 Xígi̱ kaʼnii nindxu̱u̱ awan xóo nigájnún israelitas, ga̱jma̱a̱ xóo mámbá nguéjmi̱i̱n natuxu̱u̱n magún.

29 Ikhú Moisés niʼthúu̱n Hobab a̱ʼdióo Reuel* bi̱ nindxu̱u̱ madianita, jmégiu̱u̱ Moisés: “Kuwáanʼ ragájnuxu mu mu̱ʼguáxu náa ku̱ba̱ʼ rí Jeobá niʼthí, ‹Ikhúún maxnala ikháanʼ›. Ayi̱ mu̱ʼgua̱ ga̱jma̱a̱ muñewa̱a̱nxu má, numuu dí Jeobá nikudaminaʼ maxnún mbá rí májánʼ xa̱bu̱ Israel”. 30 Ikhaa niriʼñuu: “Xáʼgá. Matanga̱án náa xuajñunʼ náa kúwá bi̱ ka̱ñu̱u̱n”. 31 Ikhaa niʼthúu̱n: “Mbá péñu,* xátatsiʼñúxu numuu rí ikháán natayáá náá gándoo gútrigáanʼxu náa ku̱ba̱ʼ mijxooʼ ga̱jma̱a̱ ma̱ndoo maraxnuxu ikha. 32 Á mu na̱dxu̱ʼ ga̱jma̱a̱ nindxu̱xu̱, xúgíʼ rí Jeobá gásngájma rí májánʼ wéñuuʼ a̱jkiu̱u̱n náa ikháanʼxu̱, xúʼko̱ má gúsngajmáxu náa ikháán”.

33 Ikhú ikhiin nigíʼdi̱i̱ nigún náa kúbá ndrígóo Jeobá, nigún ajtsú mbiʼi ga̱jma̱a̱ arca* dí nimbánuu ndrígóo Jeobá na̱jkha̱ ginii náa ikhiin, índo̱ ikhiin kúwá ragún ajtsú mbiʼi mu mbuyáʼ náa matri̱gi̱i̱n mbuya̱a̱ jxu̱ún. 34 Índo̱ ikhiin nagájnún náa gíi̱nʼ, du̱u̱n ndrígóo Jeobá rígá náa ikhiin rí mbiʼi.

35 Mámbá índo̱ nagún kuñu̱u̱n Arca, Moisés naʼthí: “Mbá péñu, Jeobá atujxa̱a̱ʼ, atani̱ rí majuadríʼíin xa̱bu̱ sia̱nʼ ndrígáaʼ ga̱jma̱a̱ bi̱ nawiñu̱u̱nʼ kuya̱a̱ magáñún náa ikháán”. 36 Índo̱ naguajún, ikhaa naʼthí: “Jeobá, atanga̱án náa bi̱ ra̱ʼkhá tháan mbaʼin náa Israel”.

11 Xa̱bu̱ xuajin nigíʼdi̱i̱ nixieʼkhá náa inuu Jeobá. Índo̱ Jeobá niʼdxawun, nikásngañu̱u̱ʼ, ikhú nigajtaa agiuuʼ Jeobá nigíʼdúu nitsikhíin tikhuun bi̱ kúwá rexa̱a̱ náa gíi̱nʼ. 2 Índo̱ xa̱bu̱ xuajin nitakáñíí Moisés rí mambáñún, ikhaa niʼtákáñuu Jeobá, ikhú nijuíyuuʼ aguʼ. 3 Náa ku̱ba̱ʼ rúʼko̱ nixna mbiʼíí Taberá,* numuu rí aguʼ ndrígóo Jeobá nikamuu náa majñu̱únʼ ikhiin.

4 Xa̱bu̱ naguwaáʼ bi̱ kúwá náa majñu̱únʼ ikhiin nindúún muguáʼdáá ganitsu rí májánʼ mu mu̱phu̱. Xúʼko̱ má israelitas mangiin nigi̱ʼdi̱i̱ nimbi̱ya̱ʼ ga̱jma̱a̱ nithi: “Tsáa gáxnuxu xuwiʼ muphúxu rá. 5 ¡Asndu tsétsiinxuʼ e̱gi̱ʼ muphúnxu náa Egipto, naphúxu̱ xúʼkhi̱ín, pepino, sandía, mágá ga̱jma̱a̱ áxu! 6 Mú nánguá guáʼdááxu tsiaki̱i̱. I̱ndó rí ndu̱ya̱a̱xu nindxu̱u̱ maná rígi̱”.

7 Maná rígi̱ nindxu̱u̱ xóo tsígooʼ cilantro ga̱jma̱a̱ nindxu̱u̱ xóo wájyooʼ ixi̱.* 8 Xa̱bu̱ xuajin nurajxi̱i̱ ga̱jma̱a̱ nunu̱ náa molino rí ñawúunʼ o nuñangáá náa xúbá rajkúu. Nda̱wa̱á nduji̱i̱ náa daan o nuni̱ pan dijndi, miʼtsí xóo galleta rí ndataun ga̱jma̱a̱ dí kanda̱wo̱o̱ʼ aceite. 9 Índo̱ xuajya’ nagajta̱a̱ rí mbruʼun náa gíi̱nʼ, ma̱ngaa maná na̱gri̱gú náa tsu̱du̱u̱.

10 Moisés niʼdxawuun rí xa̱bu̱ xuajin numbi̱ya̱ʼ gajmiún bi̱ kúwíin náa guʼwún, mámbáa xa̱bu̱ náa riejuun guʼwá xtíin ndrígu̱ún. Jeobá nikiʼnáa wéñuuʼ, xó má Moisés ma̱ngaa tánigu̱u̱ʼ mbá kayuuʼ. 11 Ikhú Moisés niʼthúu̱n Jeobá: “Náá numuu rí natani̱ gínáa xa̱bia̱a̱ʼ rá. Ndiéjunʼ lá ni̱ni̱ jngóo rí na̱nguá eʼni a̱jkia̱a̱nʼ xtayoʼ* ga̱jma̱a̱ rí natatsudúún maʼgá kagui̱i̱n xúgíinʼ xa̱bu̱ xuajin bugi̱ rá. 12 Lá ikhúún nindxu̱ʼ rudún xa̱bu̱ xuajin bugi̱ ráʼ. Lá ikhúún ni̱ni̱i̱ xáʼ. Mu xúʼko̱ marathu̱nʼ ‹ayuʼ xtiin náa tsoxtaaʼ xóo eʼni mbáa xa̱bu̱ bi̱ nagui̱i̱ mbáa ada̱ náa tso̱xto̱o̱› ga̱jma̱a̱ rí ikhúún maʼgá kagui̱i̱n náa ku̱ba̱ʼ dí niratá maraxnu̱u̱n wajin xiʼñúúnʼ xáʼ. 13 Náá gakánúʼ xuwiʼ maxnu̱u̱n mu̱phu̱ xa̱bu̱ xuajin bugi̱ rá. Numuu rí numbi̱ya̱ʼ náa inuʼ ga̱jma̱a̱ nuthi ‹¡Araxnúxu xuwiʼ muphúxuʼ!›. 14 Xáʼngo̱ʼ gáñe̱wu̱u̱nʼ xúgíinʼ xa̱bu̱ xuajin bugi̱. Ra̱ʼkhá tháán gakhi̱i̱ rí mbáwún. 15 Á mu rí xúʼko̱ má gátaniuʼ, mbá péñu,* ataxíñu̱u̱n má xúgi̱. Á mú rí naʼni a̱jkia̱a̱nʼ xta̱yo̱ʼ, ni xátani̱ rí mba̱yo̱o̱ dí ra̱májánʼ”.

16 Jeobá niriʼñuu Moisés: “Atagímbíin mbá 70 xa̱bekha bi̱ kuya̱ edxu̱u̱ náa Israel, xa̱bekha bi̱ ikháán gátraʼwi̱i̱n xóo* bi̱ kuya̱ edxu̱u̱ ga̱jma̱a̱ bi̱ guáʼdáá mbá ñajunʼ náa xuajin, ayuʼ xtiin náa guʼwá xtíin rí nagimbíi̱n ga̱jma̱a̱ maguanún ikhí ga̱jma̱á nindxa̱a̱ʼ. 17 Ikhúún magájtáa ikhí mu muʼtamíjná, maríya kaʼyaaʼ mbá chíʼgíiʼ* espíritu dí rígá náa ikháán mu maxnu̱u̱ ikhiin, ga̱jma̱a̱ ikhiin mumbayáaʼ náa ñajunʼ dí muñewu̱u̱n xa̱bu̱ xuajin mu xúʼko̱ xátani̱ mbáwíín. 18 Gíʼmaa marathu̱u̱n xa̱bu̱ xuajin: ‹Rí gájtsíí muni̱ kaʼwumijnáa, numuu rí mu̱phu̱la xuwiʼ, Jeobá niʼdxawun rí numbi̱ya̱ʼ ga̱jma̱a̱ nuta: “Tsáa gáxnulú xuwiʼ mu̱ʼphu̱ rá. Kuwáánʼlú májánʼ náa Egipto”. Xúgi̱ rí Jeobá maxnála xuwiʼ mu̱phu̱la. 19 Mu̱phu̱la xuwiʼ raʼkháa mbá mbiʼíí ni a̱jma̱ ni witsu ni gu̱wa̱ʼ ni ma 20 mbiʼi, 20 mani̱ndxu̱u̱ mbá igu̱nʼ kañiiʼ, xuwiʼ magajnáa asndu náa rakála ga̱jma̱a̱ mawi̱yala gáʼni, numuu rí ikháanʼla túnimbala ku̱ya̱a̱ Jeobá bi̱ xtáa náa majñala, ga̱jma̱a̱ nimbi̱ya̱ʼ náa inuu ikhaa índo̱ nitha̱: “Náá numuu rí nigájnulú náa Egipto rá.”›”

21 Ikhú Moisés niʼthí: “Xtáá náa majñu̱nʼ xuajin náa kúwá mbá 600,000 xa̱bekha bi̱ wájun, ¡ga̱jma̱a̱ ikháán mínaaʼ naratá ‹Maxnu̱u̱n xuwiʼ mu̱phu̱ náa mbá igu̱nʼ kañiiʼ›! 22 Lá makuwá mbaʼin xedi̱ ga̱jma̱a̱ mugu̱ mu magúdíin, mu maxnu̱u̱n xuwiʼ mu̱phu̱ xúgíinʼ xa̱bu̱ bugi̱ ráʼ. Á mu nagúwíin xúgíinʼ e̱gi̱ʼ bi̱ kajchún náa lamáa,* xúgíinʼ xa̱bu̱ bugi̱ xágiʼmún rí mu̱phu̱”.

23 Ikhú Jeobá niʼthúu̱n Moisés: “Lá xáʼngo̱o̱ gáʼni̱ Jeobá rígi̱ ku̱ma̱a̱ʼ ráʼ. Araʼti̱i̱n ma̱ta̱ya̱a̱ á mu marigá rí natha̱a̱nʼ o na̱nguá”.

24 Ikha jngóo Moisés nigájnuu ga̱jma̱a̱ niʼthún xa̱bu̱ xuajin ajngáa rí niʼthí Jeobá. Ma̱ngaa nigímbíin mbá 70 xa̱bekha bi̱ kúwá náa majñu̱únʼ bi̱ kuya̱ edxu̱u̱ náa xuajin ga̱jma̱a̱ nitsuajuun náa mbájndi guʼwá xtíin. 25 Ikhú Jeobá nigajtaa náa mbá du̱u̱n niʼtámíjná ga̱jma̱a̱ ikhaa, niríya kaʼyuuʼ mbá chíʼgíiʼ espíritu dí rígá náa ikhaa ga̱jma̱a̱ nixnúún náa bi̱ mbá 70 bi̱ kuya̱ edxu̱u̱, ma̱ngaa índo̱ nirígá espíritu náa ikhiin nigi̱ʼdi̱i̱ nini̱ xóo profetas,* mú i̱ndó má mbiʼi rúʼko̱ nirígá xúʼko̱ kaʼnii.

26 A̱jmi̱i̱n xa̱bekha niguanún náa gíi̱nʼ, bi̱ nigumbiʼñún Eldad ga̱jma̱a̱ Medad. Espíritu nirígá náa ikhiin numuu rí mbiʼñún kiʼniraʼmáʼ má, mú na̱nguá nigún náa guʼwá xtíin. Ikha jngóo nigi̱ʼdi̱i̱ nini̱ xóo profetas náa gíi̱nʼ. 27 Mbáa dxámá nigáyúu ni̱jkha̱ gáʼthúu̱n Moisés: “¡Eldad ga̱jma̱a̱ Medad kúwíin runi̱ xóo profetas náa gíi̱nʼ!”. 28 Ikhú Josué a̱ʼdióo Nun, bi̱ asndu nákha ndxáma̱á nimbáyúu Moisés, niriʼña̱a̱ ga̱jma̱a̱ niʼthí: “¡Tátioʼ Moisés, atrikún xi!”. 29 Moisés niʼthúu̱n: “Naxíyáa’ xtáyoʼ ráʼ. ¡Ikhúún nandoʼ rí xúgíinʼ bi̱ kúwá náa xuajñuu Jeobá mani̱ndxu̱ún xóo profetas ga̱jma̱a̱ espíritu ndrígóo Jeobá marigá náa ikhiin!”. 30 Nda̱wa̱á Moisés nitanga̱a̱ náa gíi̱nʼ gajmíi̱n bi̱ kuya̱ edxu̱u̱ náa Israel.

31 Ikhú Jeobá ni’ni rí maxnúu mbá giñán’ gakhi̱i̱, nigíʼdu̱u̱ ni̱jkha̱ kagui̱i̱n ñu̱ʼu̱ rami̱xti̱* xígií náa lamáa ga̱jma̱a̱ niʼni rí majngutíguíin náa mbájndi dí gíi̱nʼ, ikhiin niruguáá mbá metro* rí mitsídánʼ náa ku̱ba̱ʼ, asndu xóo mbá kamba̱a̱ rí mi̱dxu̱ʼ mbá mbiʼi náa mbá níʼkhóo, ga̱jma̱a̱ xúʼko̱ má náa i̱mba̱ níʼkhóo xóo kamba̱a̱ dí mi̱dxu̱ʼ mbá mbiʼi náa xúgíʼ mbájndi dí gíi̱nʼ. 32 Ikha jngóo xa̱bu̱ xuajin nirajxi̱i̱n ñu̱ʼu̱ rami̱xti̱ mbá mbiʼi ga̱jma̱a̱ mbá mbruʼun ma̱ngaa kañiiʼ mbiʼi rí i̱mba̱ néjtsuu. Mámbáa xa̱bu̱ nigu̱jxi̱i̱n xó má rí maʼngo̱o̱ mikhu̱u̱n náa rí mbá gu̱wa̱ʼ awan mba̱ʼu̱.* Ga̱jma̱a̱ nigi̱ʼdi̱i̱ nijngri̱guíin náa mbájndi dí gíi̱nʼ. 33 Mú kaʼníí tra̱ʼa xuwiʼ náa iñúúnʼ, xóó tséʼphu rajngún, índo̱ Jeobá nikiʼnáa kaʼñúún xa̱bu̱ xuajin, Jeobá nigudíin mbaʼin xa̱bu̱ xuajin.

34 Ikha jngóo náa ku̱ba̱ʼ rúʼko̱ nixna mbiʼíí Quibrot-Hataavá,* numuu rí ikhí nidi̱ín xa̱bu̱ bi̱ ninda̱ʼa̱ ganitsu dí májánʼ mu̱phu̱. 35 Ikhú xa̱bu̱ xuajin nigájnún náa Quibrot-Hataavá mu magún xígií náa Hazerot, ikhí niguanún náa Hazerot.

12 Míriam ga̱jma̱a̱ Aarón nigíʼdi̱i̱ nithi dí raʼkhí ga̱jma̱a̱ numuu Moisés ma̱ngaa a̱ʼgiu̱u̱ bi̱ ndiyáa bi̱ nindxu̱u̱ cusita, numuu ikhaa ndiyáa mbáa a̱ʼgú cusita. 2 Ikhiin nithi: “Lá i̱ndó Moisés niʼtámíjná ga̱jma̱a̱ Jeobá ráʼ. Lá na̱nguá niʼtámíjná ga̱jma̱a̱ nindxu̱lú mangáánʼ xá’. Jeobá xtáa raʼdxawúún rí nuthi”. 3 Moisés nindxu̱u̱ mbáa xa̱bu̱ bi̱ itháan guabaaʼ bi̱ nixtáa náa majñu̱únʼ xúgíinʼ xa̱bekha bi̱ nikúwá náa tsu̱du̱u̱ ku̱ba̱ʼ.

4 Mbá nacha̱, Jeobá niʼthúu̱n Moisés, Aarón ga̱jma̱a̱ Míriam: “Aʼguala mbá nájtsáanʼ náa guʼwá xtíin dí nagimbíi̱n”. Ikha jngóo mbá nájtsíin má nigún. 5 Nda̱wa̱á Jeobá nigajtaa náa du̱u̱n dí niwi̱ji̱ náa riejuun guʼwá xtíin ga̱jma̱a̱ nindxaʼóo Aarón ma̱ngaa Míriam. Nájmi̱i̱n nigún kanuu. 6 Ikhú ikhaa niʼthí: “Mbá péñu,* gudxawíín ajngóʼ. Á mu xtáa mbáa profeta ndrígóo Jeobá náa majñala, ikhúún masngajmúu mu mbaʼyoo tsáa nindxu̱ʼ, ga̱jma̱a̱ matamínáʼ ga̱jmu̱ʼ náa mbá xnuʼndaa. 7 ¡Mú tséni̱ xúʼko̱ ga̱jmu̱ʼ xa̱bi̱ʼ Moisés! Ikhaa nirajkuáa ñawúunʼ mu mañewu̱u̱n e̱ji̱nʼ, israelitas.* 8 Ikhúún na̱thu̱u̱n mbájmbu ikhaa, asndu ndiéjunʼ má dí eyoʼ mathu̱u̱n, nasngajmúu ndiéjunʼ nindxu̱u̱, Jeobá nasngájmaminaʼ náa ikhaa. Náa numuu rí támíñala dí mutha dí raʼkhí ga̱jma̱a̱ numuu xa̱bi̱ʼ Moisés rá.”

9 Ikha jngóo Jeobá nikiʼnáa kaʼñún. 10 Du̱u̱n nitsíngu̱u̱nʼ náa guʼwá xtíin... ga̱jma̱a̱ niʼni dí Míriam magiʼdoo lepra* rí nindxu̱u̱ xóo mixídiiʼ. Índo̱ Aarón nitangayii náa wíji̱ Míriam ndiʼyoo dí gíʼdoo lepra. 11 Mbá nacha̱, Aarón niʼthúu̱n Moisés: “¡Tátioʼ natakáñaaʼ mbá péñu! ¡Xátani̱ gínáanʼxu̱ ga̱jma̱a̱ numuu aʼkhá rígi̱! Ninindxu̱xuʼ xóo mbáa skágunʼ dí nini̱xu rígi̱. 12 ¡Mbá péñu xátatsiʼñááʼ dí ikhaa mani̱ndxu̱u̱ xóo mbáa ada̱ bi̱ nikháñúu má nigumaa bi̱ mbá xíʼtáa niʼgaa!”. 13 Ikhú Moisés nigíʼdu̱u̱ niʼtákáñuu Jeobá: “¡Mbá péñu, Dios, atani̱ tanáá!”.

14 Jeobá niriʼñuu Moisés: “Á mu anu̱u̱ niʼkhu̱ ndújtáaʼ náa inuu. Lá xáguma májti̱i̱ʼ mbá juwan mbiʼi xáʼ. Gaxtáa wájíʼ mbá juwan mbiʼi náa giáa̱nʼ ga̱jma̱a̱ nda̱wa̱á ma̱ndoo mata̱ʼa̱a̱ mbu̱júu̱”. 15 Ikha jngóo Míriam nixtáa wájíʼ mbá juwan mbiʼi náa gíi̱nʼ ga̱jma̱a̱ xa̱bu̱ xuajin na̱nguá nixkui̱jxi̱i̱ʼ guʼwún náa gíi̱nʼ asndu índo̱ Míriam nita̱ʼa̱a̱. 16 Nda̱wa̱á xa̱bu̱ xuajin nigájnún náa Hazerot ga̱jma̱a̱ nigún gúgi̱ʼi̱i̱n náa ku̱ba̱ʼ mijxooʼ ndrígóo Parán.

13 Ikhú Jeobá niʼtámíjná ga̱jma̱a̱ Moisés niʼthúu̱n: 2 “Ataxúʼmiin xa̱bekha mu magún gúyama náa ku̱ba̱ʼ ndrígóo Canaán, náa ku̱ba̱ʼ rí ikhúún maxnu̱u̱n israelitas. Ataxúʼmaa mámbáa xa̱biya̱ bi̱ na̱ʼkha̱ náa xuajin majkhaʼ, bi̱ kayá edxu̱u̱ náa mámbá xuajin rúʼko̱”.

3 Ikha jngóo Moisés nikungui̱i̱nʼ asndu náa ku̱ba̱ʼ mijxooʼ* ndrígóo Parán xó má Jeobá niʼtáñajuunʼ. Xúgíinʼ xa̱bu̱ bugi̱ ni̱ndxu̱ún bi̱ kuya̱ edxu̱u̱ náa israelitas. 4 Xígi̱ mbiʼñún bi̱ naguwáʼ náa xuajin chíʼgíiʼ* ndrígóo Rubén, nindxu̱u̱ Samúa a̱ʼdióo Zacur, 5 náa xuajin chíʼgíiʼ ndrígóo Simeón, nindxu̱u̱ Safat a̱ʼdióo Horí, 6 náa xuajin chíʼgíiʼ ndrígóo Judá, nindxu̱u̱ Caleb a̱ʼdióo Jefuné, 7 náa xuajin chíʼgíiʼ ndrígóo Isacar, nindxu̱u̱ Igal a̱ʼdióo José, 8 náa xuajin chíʼgíiʼ ndrígóo Efraín, nindxu̱u̱ Hosea a̱ʼdióo Nun, 9 náa xuajin chíʼgíiʼ ndrígóo Benjamín, nindxu̱u̱ Paltí a̱ʼdióo Rafú, 10 náa xuajin chíʼgíiʼ ndrígóo Zabulón, nindxu̱u̱ Gadiel a̱ʼdióo Sodí, 11 náa xuajin chíʼgíiʼ ndrígóo José, xó muʼthá xuajin chíʼgíiʼ ndrígóo Manasés, nindxu̱u̱ Gaddí a̱ʼdióo Susí, 12 náa xuajin chíʼgíiʼ ndrígóo Dan, nindxu̱u̱ Amiel a̱ʼdióo Guemalí, 13 náa xuajin chíʼgíiʼ ndrígóo Aser, nindxu̱u̱ Setur a̱ʼdióo Miguel, 14 náa xuajin chíʼgíiʼ ndrígóo Neftalí, nindxu̱u̱ Nahbí a̱ʼdióo Vofsí, 15 ga̱jma̱a̱ náa xuajin chíʼgíiʼ ndrígóo Gad, nindxu̱u̱ Gueuel a̱ʼdióo Makí. 16 Xígi̱ kaʼnii mbiʼñún xa̱bu̱ bi̱ Moisés nikuʼmiin magún gúyama náa ku̱ba̱ʼ ndrígóo Canaán. Ga̱jma̱a̱ Hosea a̱ʼdióo Nun, bi̱ Moisés nixná mbiʼyuu Josué.*

17 Índo̱ Moisés nikungui̱i̱nʼ mu magún gúyama ku̱ba̱ʼ ndrígóo Canaán, niʼthún: “Gatsimala náa Négueb ga̱jma̱a̱ nda̱wa̱á matsimala náa kúbá. 18 Gu̱ya̱a̱ xú kaʼnii nindxu̱u̱ ku̱ba̱ʼ ga̱jma̱a̱ xa̱bu̱ bi̱ kúwá ikhí á mu xkujiinʼ o na̱nguá, ma̱ngaa á mu mbaʼin o nguéjmi̱i̱n, 19 á mu ku̱ba̱ʼ nindxu̱u̱ májánʼ o na̱nguá, ma̱ngaa á mu xuajin rúʼko̱ kambaʼta o gíʼdoo xtájtsí ndrígóo. 20 Gu̱ya̱a̱ á mu ku̱ba̱ʼ rúʼko̱ nindxu̱u̱ májánʼ o na̱nguá, ga̱jma̱a̱ gu̱ya̱a̱ á mu rígá ixi̱ o na̱nguá. Xámiñalaʼ ma̱ndoo maguwáaʼ kudala rí najmaa náa ku̱ba̱ʼ rúʼko̱”. Numuu rí ikhú nagi̱ʼdu̱u̱ naʼgo̱o̱ uva.

21 Ikhú ikhiin nitsimún gúyama ku̱ba̱ʼ rúʼko̱ asndu náa ku̱ba̱ʼ mijxooʼ ndrígóo Zin asndu xígií náa Rehob, mijngii náa Lebó-Hamat.* 22 Índo̱ nitsimún náa Négueb, niguánú náa Hebrón, náa xtáa Ahimán, Sesái ga̱jma̱a̱ Talmái, bi̱ ni̱ndxu̱ún anaquim. Hebrón ni̱jkha̱nú nigi̱ʼi̱ ginii mbá juwan tsiguʼ ki xóo Zoan dí nirígá náa Egipto. 23 Índo̱ niguánú náa mata* ndrígóo Escol, ikhí nirujturígú mbá juáyúu uva, rí asndu a̱jmi̱i̱n xa̱bu̱ ndiyóoʼ muda̱ ga̱jma̱a̱ mbá ixi̱ mbaʼ, ma̱ngaa nidégún tikhuu granadas ga̱jma̱a̱ higos. 24 Náa ku̱ba̱ʼ rúʼko̱ nixna mbiʼíí mata ndrígóo Escol,* numuu rí ikhí israelitas nirujturígú mbá juáyúu uva.

25 Índo̱ niʼni 40 mbiʼi nitagi̱ín bi̱ nigún gúyama ku̱ba̱ʼ rúʼko̱. 26 Ikha jngóo nigún náa Moisés, náa Aarón ga̱jma̱a̱ náa xúgíinʼ xa̱bu̱ xuajin Israel náa ku̱ba̱ʼ mijxooʼ ndrígóo Parán, xígií náa Cadés. Nithúún xúgíinʼ xa̱bu̱ xuajin ga̱jma̱a̱ nisngájmúún rí najma̱a̱ náa ku̱ba̱ʼ rúʼko̱. 27 Rígi̱ rí nitháán Moisés: “Nitu̱ʼu̱xu náa ku̱ba̱ʼ rí ikháán nitaxúʼmanxu, náa ku̱ba̱ʼ rúʼko̱ rígá wéñuuʼ yáʼdú ga̱jma̱a̱ jyááʼ, rígi̱ nindxu̱u̱ rí najma̱a̱ ikhí. 28 Xa̱bu̱ bi̱ kúwá náa ku̱ba̱ʼ rúʼko̱ ni̱ndxu̱ún xkujiinʼ, xuajin rúʼko̱ nindxu̱u̱ mba̱ʼu̱. Kúgumaʼá ga̱jma̱a̱ xtájtsí, ma̱ngaa ndi̱ñu̱u̱nxu bi̱ ni̱ndxu̱ún anaquim. 29 Xa̱bu̱ amalequitas kúwá náa ku̱ba̱ʼ ndrígóo Négueb, hititas, jebuseos ga̱jma̱a̱ amorreos kúwá náa kúbá, bi̱ ni̱ndxu̱ún cananeos kúwá náa mijngii lamáa* ga̱jma̱a̱ náa rawuunʼ Jordán”.

30 Ikhú Caleb nigíʼ maʼni rí maʼni̱i̱ a̱jkiu̱ún xa̱bu̱ bi̱ kúwá náa inuu Moisés niʼthún: “Gutsimulú mbá nacha̱ ga̱jma̱a̱ gu̱ya̱a̱ rí makánulú ku̱ba̱ʼ rúʼko̱, numuu rí nduʼyáá gajkhun rí maʼngulú muríya kaʼñúún”. 31 Mú xa̱bu̱ bi̱ ni̱jkha̱ gajmíi̱n nithi: “Xándoo gútsimulú gúxmijná gajmiúlú xa̱bu̱ buʼko̱, numuu rí itháan xkujiinʼ ki xóo ikháánʼlú”. 32 Ikhiin nithúún má xúʼko̱ israelitas mbá dí ra̱májánʼ ga̱jma̱a̱ numuu ku̱ba̱ʼ náa nigún gúyama. Nithi: “Ku̱ba̱ʼ náa ni̱jkuá gúyamaxu nindxu̱u̱ mbá ku̱ba̱ʼ rí nimbáa xa̱bu̱ tsíkríya̱a̱ʼ, náa xúgíinʼ xa̱bu̱ bi̱ ndi̱ñu̱u̱nxu ni̱ndxu̱ún xa̱bu̱ mbijui̱i̱n. 33 Ikhí ndi̱ñu̱u̱nxu nefilim, e̱ji̱i̱n Anac, bi̱ naguwáʼ náa nefilim, ndi̱ya̱a̱xu̱ rí asndu xóo tsíʼbu* nindxu̱xu̱ náa ikhiin, ga̱jma̱a̱ xúʼko̱ má ndiyuxu̱ mangiin”.

14 Ikhú xa̱bu̱ xuajin nithi gakhi̱i̱ ga̱jma̱a̱ nindxa̱ʼwa̱ má xúʼko̱, ma̱ngaa nimbi̱ya̱ʼ kañiiʼ mbruʼun. 2 Xúgíinʼ israelitas nigíʼdi̱i̱ nixieʼkhá náa Moisés ga̱jma̱a̱ náa Aarón, xúgíinʼ xa̱bu̱ xuajin nigíʼdi̱i̱ nithi dí raʼkhí ga̱jma̱a̱ numún ikhiin. Nithi: “¡Májánʼ á mu nikháñulú náa ku̱ba̱ʼ ndrígóo Egipto! ¡Itháan májánʼ á mu nikháñulú náá ku̱ba̱ʼ mijxooʼ* rígi̱! 3 Náá numuu ni̱ʼkha̱ kaguáanʼ Jeobá náa ku̱ba̱ʼ rígi̱ rá. Mu makhañúlúʼ ráʼ. Mu xúʼko̱ xa̱bu̱ sia̱nʼ magún kudiin gu̱ʼyu̱lú ga̱jma̱a̱ e̱jñu̱lúʼ. Lá raʼkháa itháan májánʼ rí mutanga̱ánʼ náa Egipto rá’.” 4 Nutamijná kaníkiin: “¡Guʼyáaʼ mbáa bi̱ mbayá edxu̱u̱ ga̱jma̱a̱ gutanga̱ánʼ náa Egipto!”.

5 Ikhú Moisés ga̱jma̱a̱ Aarón nismbati̱gu̱u̱n asndu mbayííʼ náa inún xúgíinʼ israelitas bi̱ nigimbíin ikhí. 6 Josué a̱ʼdióo Nun ga̱jma̱a̱ Caleb a̱ʼdióo Jefuné, bi̱ kúwá náa majñu̱únʼ bi̱ nigún gúyama ku̱ba̱ʼ, nixkuʼtu xtíñún, 7 nithúún xúgíinʼ xa̱bu̱ Israel: “Ku̱ba̱ʼ dí ni̱jkuáxu gúyama nindxu̱u̱ mbá ku̱ba̱ʼ dí ra̱ʼkhá tháan májánʼ. 8 Á mu Jeobá nadxuu kaʼyulú, ikhaa maʼga kaguáánʼ náa ku̱ba̱ʼ rúʼko̱ ga̱jma̱a̱ maxnúlú mbá ku̱ba̱ʼ náa dí rígá wéñuuʼ yáʼdú ga̱jma̱a̱ jyááʼ. 9 Xánindxala mbáa bi̱ tséʼnimbo̱o̱ náa Jeobá ga̱jma̱a̱ xámiñalaʼ kuñu̱u̱n xa̱bu̱ numbaaʼ, numuu dí ikháanʼ muni̱ gámbíin.* Ndawa̱a̱ tsáa mambáñún, mú Jeobá xtáa ga̱jma̱a̱ nindxu̱lú ikháánʼ. Xámiñalaʼ kuñu̱u̱n”.

10 Xúgíinʼ xa̱bu̱ xuajin nuthi rí muxnún ga̱jma̱a̱ itsí. Mú aguʼ dí naxpíbínʼ ndrígóo Jeobá nikujmaa náa tsu̱du̱u̱ guʼwá xtíin dí nagimbíi̱n náa inún xúgíinʼ xa̱bu̱ Israel.

11 Ikhú Jeobá niʼthúu̱n Moisés: “Ni̱ni̱ má mbaʼa milagro náa inún xa̱bu̱ xuajin bugi̱, nguáná gúgíʼdi̱i̱ mbuyamajkhuʼ xá. Ga̱jma̱a̱ nguáná gáguáʼdáá fe náa ikhúún xá. 12 Ma̱ni̱ ngíníi ga̱jma̱a̱ mbá nandii mbiiʼ, ma̱ngaa ma̱ni̱ gámbíin ga̱jma̱a̱ ma̱ni̱ dí ejña̱a̱nʼ ikháán maʼni itháan mbaʼin”.

13 Moisés niʼthúu̱n Jeobá: “Dí gúthi xa̱bu̱ egipcios índo̱ gúdxawíín, dí ikháán nitani̱ rígi̱, numuu dí náa majñu̱únʼ ikhiin nitrawíin xa̱bu̱ xuajin bugi̱ ga̱jma̱a̱ tsiaki̱i̱ ndrígáaʼ, 14 ga̱jma̱a̱ muthún xa̱bu̱ bi̱ kúwá náa ku̱ba̱ʼ rúʼko̱. Mangiin nidxawíín dí ikháán, Jeobá, xtaa náa majñu̱únʼ xuajin rígi̱ ga̱jma̱a̱ ikháán mínaaʼ nitasngájmaminaʼ náa ikhiin. Ikháán nindxa̱a̱ʼ Jeobá ga̱jma̱a̱ du̱u̱n ndrígáaʼ rígi̱, ga̱jma̱a̱ ikháán nadxuʼ ginii náa inún ikhiin, náa mbá du̱u̱n dí nawi̱ji̱ dí mbiʼi ga̱jma̱a̱ mbá aguʼ dí nawi̱ji̱ dí mbruʼun. 15 Á mu káaʼ mbá miʼtsú* gáradíin xa̱bu̱ xuajin bugi̱, xa̱bu̱ bi̱ nidxawíín ga̱jma̱a̱ numaaʼ muthi rígi̱: 16 ‹Jeobá táʼngo̱o̱ gáʼga kagui̱i̱n xa̱bu̱ xuajin bugi̱ náa ku̱ba̱ʼ dí niʼthí maxnún, ikha jngóo nigudíin náa ku̱ba̱ʼ mijxooʼ›. 17 Mbá péñu,* Jeobá atasngájma tsiaki̱i̱ ndrígáaʼ dí mba̱a̱, xó má ikháán niratá: 18 ‹Jeobá tsékiʼnáa nacha̱ ga̱jma̱a̱ gíʼdoo ngajua rí tsétumuu,* ma̱ngaa bi̱ naʼni mba̱a̱ a̱jkiu̱u̱n kaʼñún bi̱ nakiéʼkúún, mú tséniñuuʼ xúʼkhi̱ín mbáa bi̱ gíʼdoo aʼkhúun, naʼni rí mumíniiʼ e̱ji̱n ga̱jma̱a̱ numuu aʼkhúún anu̱ún, xó má e̱jín xíñúúnʼ ga̱jma̱a̱ e̱jín xíñegún›. 19 Atani̱ mba̱a̱ a̱jkia̱a̱nʼ xtayáá aʼkhá ndrígu̱ún xa̱bu̱ xuajin bugi̱ ga̱jma̱a̱ ngajua rí tsétumuu, xó má nitani̱ mba̱a̱ a̱jkia̱a̱nʼ xtayáá xuajin rígi̱, índo̱ kúwá náa Egipto asndu mbiʼi xúgi̱”.

20 Ikhú Jeobá niʼthí: “Ma̱ni̱ mba̱a̱ a̱jkiu̱nʼ xó má ikháán nitando̱ʼo̱ʼ. 21 Xó má ikhúún xtáá, xúgíʼ ku̱ba̱ʼ marigá aguʼ dí naxpíbínʼ ndrígóo Jeobá. 22 Nimbáa xa̱bu̱ bi̱ ndiʼyoo agiuʼ dí naxpíbínʼ ga̱jma̱a̱ milagros dí ni̱ni̱ náa Egipto, ma̱ngaa náa ku̱ba̱ʼ mijxooʼ, maski ajndu xúʼko̱ nindri̱ga̱ má xúʼko̱ tsáʼkhá náa inuʼ náa mbá gu̱wa̱ʼ nuthu ga̱jma̱a̱ na̱nguá edxawíín aʼwóʼ, 23 xúyáá ku̱ba̱ʼ dí nikuʼdáminaʼ maxnu̱u̱n anu̱ún. Na̱nguá, nimbáa dí ikhiin bi̱ tséʼyamajkhuʼ. 24 Mú xa̱bi̱ʼ Caleb bi̱ nisngájma dí nindxu̱u̱ mixtiʼkuii ga̱jma̱a̱ bi̱ niʼnimbo̱o̱ ga̱jma̱a̱ xúgíʼ a̱jkiu̱u̱n, ikhúún maʼgá ka̱ya̱a̱ náa ku̱ba̱ʼ rí ni̱jkha̱ gáyama ga̱jma̱a̱ bi̱ gáguwáʼ náa ikhaa mani̱ndxu̱u̱ mbañúúnʼ. 25 Numuu dí amalequitas gajmiún cananeos kúwíin náa mata* rúʼko̱, ikha jngóo gájtsíí gagutangáánʼ mu muʼguala náa ku̱ba̱ʼ mijxooʼ náa kamba̱a̱ rí na̱jkha̱ xígií náa lamáa Maña̱ʼ”.*

26 Nda̱wa̱á Jeobá niʼthúu̱n Moisés ma̱ngaa Aarón: 27 “Asndu nguáná gúniña̱a̱nʼ ruxieʼkhá náa ikhúún xa̱bu̱ xkawi̱i̱nʼ bugi̱ rá. Nidxawuun rí israelitas nuthi ga̱jma̱a̱ numuʼ. 28 Arathún: ‹¡Xó má ikhúún xtáá ndaya, eʼthí Jeobá, mañu̱u̱n xó má ikhúún nidxawúún! 29 Náa ku̱ba̱ʼ mijxooʼ maguanúu xúñún índo̱ gákháñún, xúʼko̱ xúgíinʼ bi̱ guáʼdáá 20 tsigúúnʼ o itháan bi̱ nigumarámáʼ mbiʼñún xúgíinʼ bi̱ nixieʼkhá náa ikhúún. 30 Nimbáa dí ikháanʼ xáta̱ʼa̱a̱ náa ku̱ba̱ʼ rí ni̱tha̱* maxnála mu makuwáanʼ, i̱ndó Caleb a̱ʼdióo Jefuné ga̱jma̱a̱ Josué a̱ʼdióo Nun makuwá ikhí.

31 Ga̱jma̱a̱ e̱jña̱la bi̱ ikháanʼ nitala dí maʼga kiʼdiin, maʼgá kagui̱i̱n náa ku̱ba̱ʼ dí ikháanʼ nini̱ gaʼduunʼ ga̱jma̱a̱ ikhiin muniʼnuuʼ. 32 Mú xuyala ikháán maguanúu náa ku̱ba̱ʼ mijxooʼ rígi̱. 33 E̱jña̱la mani̱ndxu̱ún baxtúu náa mbá 40 tsiguʼ ga̱jma̱a̱ ikhiin mbaʼyóoʼ muni̱ numa̱a̱ rí ikháanʼ nikiéʼkala asndu índo̱ gákáñúu bi̱ iwáá náa ikháanʼla. 34 Xó má mbiʼi rí niyama ku̱ba̱ʼ nindxu̱u̱ 40 mbiʼi, mbá mbiʼi nindxu̱u̱ mbá tsiguʼ. Ikha jngóo muni̱ numa̱a̱ rí nikiéʼkala mbá 40 tsiguʼ. Xúʼko̱ mbuya̱a̱ ndiéjunʼ eyoo gáʼthúu̱n dí muni̱ gaʼduunʼ náa ikhúún.

35 Ikhúún, Jeobá, nitha̱ má. Rígi̱ rí ma̱ni̱ gajmíʼ xa̱bu̱ xkawi̱i̱nʼ bugi̱, nigimbíin mu xúnimbu̱ún náa ikhúún náa ku̱ba̱ʼ mijxooʼ rígi̱ maʼga̱nú mambíin ga̱jma̱a̱ makhañún. 36 Xa̱bekha bi̱ Moisés nikunguinʼ mu muyama ku̱ba̱ʼ nini̱ rí xa̱bu̱ xuajin muxieʼkhá náa ikhaa, índo̱ niguwa̱a̱nʼ gútala dí raʼkhí ga̱jma̱a̱ numuu ku̱ba̱ʼ, 37 xúʼko̱, xa̱bekha bi̱ nithi dí raʼkhí ga̱jma̱a̱ numuu ku̱ba̱ʼ, maguma ngíníi ga̱jma̱a̱ makhañún náa inuu Jeobá. 38 I̱ndó bi̱ makuwá, bi̱ nigún gúyama ku̱ba̱ʼ nindxu̱u̱ Josué a̱ʼdióo Nun ga̱jma̱a̱ Caleb a̱ʼdióo Jefuné›”.

39 Índo̱ Moisés niʼthún ajngáa rígi̱ xúgíinʼ israelitas, xa̱bu̱ xuajin nikúwá ngíná. 40 Ma̱ngaa niguájxu̱u̱n miʼcha̱ ga̱jma̱a̱ nigíʼ matsimún náa kúbá. Nithi: “Kúwáanʼxu xawii matsimuxu náa niʼthí Jeobá, numuu dí nixuʼdámíjna̱xu̱ aʼkhá”. 41 Mú Moisés niʼthí: “Náá numuu rí tsénimbala dí niʼthí Jeobá rá. Xágájnuu májánʼ rí mu̱nila. 42 Xátsimala numuu dí Jeobá na̱nguá xtáa ga̱jma̱a̱ nindxa̱la, mu xúʼko̱ xákáñala gúni̱ xa̱bu̱ sia̱nʼ ndrígala. 43 Numuu dí xa̱bu̱ amalequitas ga̱jma̱a̱ cananeos kúwá ikhí mu muxmíjná gajmiála, muradiáanʼla ga̱jma̱a̱ espada. Numuu dí ikháanʼ niniʼñáánʼ Jeobá, Jeobá xáxtáa ga̱jma̱a̱ nindxa̱la”.

44 Maski ajndu xúʼko̱ ikhiin nitsimún náa kúbá, mú arca* dí nimbánuu ndrígóo Jeobá ga̱jma̱a̱ Moisés niguanúu náa gíi̱nʼ. 45 Ikhú amalequitas ga̱jma̱a̱ cananeos bi̱ kúwá náa kúbá rúʼko̱ niguájtaa mu muxmíjná gajmiún, mú israelitas nijuadríʼiin asndu náa Hormá.

15 Jeobá nitanga̱a̱ niʼtámíjná ga̱jma̱a̱ Moisés ga̱jma̱a̱ niʼthúu̱n: 2 “Aratamíjná gajmiáanʼ israelitas, arathún: ‹Índo̱ gáta̱ʼa̱la náa ku̱ba̱ʼ rí ikhúún maxna̱la mu makuwáanʼ, 3 ga̱jma̱a̱ maxnajxí mbá tsigijñaʼ mu mikarámáʼ náa inuu Jeobá, tséʼniuu á mu mbáa xedi̱ o mbáa mugu̱, tséʼniuu á mu nindxu̱u̱ mbá tsigijñaʼ rí mikarámáʼ o mbá tsigijñaʼ ga̱jma̱a̱ numuu dí mbáa rígá rí nikudaminaʼ maʼnimbánuu o mbá tsigijñaʼ rí ni̱ʼkha̱ a̱jkiu̱u̱n ikháá maxná, o rí najuixnájxi̱ náa ndxa̱a̱ dí nagumariya̱a̱ʼ, mbá rí najuixnájxi̱ rí mitsaanʼ* ndataun eʼyoo Jeobá, 4 bi̱ gáxnájxi̱ tsigijñaʼ ndrígóo ma̱ngaa maxnájxi̱ náa Jeobá mbá tsigijñaʼ rí tsígáʼ rí nindxu̱u̱ mbá kilo* harina dí itháan májánʼ ga̱jma̱a̱ mandáwóoʼ mbá litro* aceite. 5 Ma̱ngaa mbaʼyóoʼ maxnájxi̱ mbá litro* vino xóo tsigijñaʼ dí magadirámuuʼ mbóó ga̱jma̱a̱ tsigijñaʼ dí mikarámáʼ o tsigijñaʼ ndrígóo mámbáa a̱ʼdá múgú. 6 Á mu nindxu̱u̱ mbáa mugu̱ e̱jmba̱a̱, mbaʼyóoʼ mixnájxi̱ mbá tsigijñaʼ rí tsígáʼ rí nindxu̱u̱ a̱jma̱ kilo* harina dí itháan májánʼ ga̱jma̱a̱ ma̱nda̱wo̱o̱ʼ itháan dí mbá litro* aceite. 7 Ma̱ngaa mbaʼyóoʼ mixnájxi̱ itháan dí mbá litro* vino xóo mbá tsigijñaʼ dí magadirámuuʼ rí mitsaanʼ ndataun eʼyoo Jeobá.

8 Á mu naraxnájxi̱i̱ Jeobá xedi̱ xóo tsigijñaʼ dí mikarámáʼ o xóo mbá tsigijñaʼ numuu dí matani̱ mbáníí rí nitaxúdaminaʼ matani̱ o xóo mbá tsigijñaʼ dí tsímáá,* 9 índo̱ gátaxnajxíi xedi̱ ma̱ngaa mbaʼyóoʼ mataxnajxí tsigijñaʼ rí tsígáʼ rí mani̱ndxu̱u̱ ajtsú kilo tikhu* harina dí itháan májánʼ ga̱jma̱a̱ matandáwáaʼ rí itháán maʼni a̱jma̱ litro* aceite. 10 Ma̱ngaa mbaʼyóoʼ mataxnajxí itháán dí maʼni a̱jma̱ litro vino xóo tsigijñaʼ dí magadirámuuʼ, xóo mbá tsigijñaʼ dí mikarámáʼ mbá rí mitsaanʼ ndataun eʼyoo Jeobá. 11 Xúʼko̱ gíʼmaa maguma ga̱jma̱a̱ mámbáa xedi̱, mámbáa mugu̱ e̱jmba̱a̱, mámbáa a̱ʼdá múgú o mámbáa chivátu.* 12 Tséʼniuu má nguáthi̱i̱n xujkhúʼ gájuixnájxi̱i̱n, rúʼko̱ dí gíʼmaa mixnajxí ga̱jma̱a̱ numuu mámbáa dí ikhiin. 13 Xúʼko̱ gíʼmaa muxnajxi̱ xúgíinʼ bi̱ nindxu̱ún israelita mbá tsigijñaʼ dí mikarámáʼ dí mitsaanʼ ndataun eʼyoo Jeobá.

14 Á mu mbáa xa̱bu̱ na̱ʼkha̱á bi̱ xtáa náa ikháanʼla o mbáa bi̱ mba̱yu̱u̱ʼ má xtáa ga̱jma̱á nindxa̱la na̱jkha̱ gáxnájxi̱ mbá tsigijñaʼ dí nakarámáʼ dí mitsaanʼ ndataun eʼyoo Jeobá, mbaʼyóoʼ maʼni ikháá xó má ikháanʼla. 15 Ikháanʼ bi̱ nindxa̱la israelitas ga̱jma̱a̱ xa̱bu̱ na̱ʼkha̱á bi̱ xtáa ga̱jma̱á nindxa̱la, ikháá má kiʼtáñajunʼ dí mbaʼyóoʼ munimbánííla. Nindxu̱u̱ mbá kiʼtáñajunʼ dí mbaʼyóoʼ maguma mbáníí asndu kámuu xúʼko̱ má náa e̱jña̱la bi̱ maguwáʼ rakúwá nda̱wa̱á. Xa̱bu̱ bi̱ na̱ʼkha̱á mbaʼyóoʼ maʼni ikháá xó má ikháanʼla náa inuu Jeobá. 16 Mbaʼyóoʼ marigá mbóó xtángoo ga̱jma̱a̱ mbóó má dí munimbánííla ikháanʼ ga̱jma̱a̱ xa̱bu̱ na̱ʼkha̱á bi̱ xtáa ga̱jma̱á nindxa̱la›”.

17 Ikhú Jeobá niʼthúu̱n Moisés: 18 “Aratamíjná gajmiáanʼ israelitas ga̱jma̱a̱ arathún: ‹Índo̱ gátaʼala náa ku̱ba̱ʼ dí na̱jkhá kaguáanʼla, 19 ga̱jma̱a̱ índo̱ gúphu̱ ganitsu* dí gájmaa náa ku̱ba̱ʼ rúʼko̱, mbaʼyóoʼ muxna̱a̱ nguéjma̱ Jeobá. 20 Mbaʼyóoʼ maraxnaxí mbá tsigijñaʼ ndrígóo pan nijndi dí niguma ga̱jma̱a̱ timbá harina dí nigájna̱a̱ dí kaʼníí gíʼdoo xtíxúu. Mbaʼyóoʼ maraxnaxí xó má naraxnájxi̱ tsígáʼ dí nagájnáa índo̱ natrujtsi̱. 21 Mbaʼyóoʼ mu̱xna̱a̱la Jeobá timbá harina dí nagájna̱a̱ dí kaʼníí gíʼdoo xtíxúu, mbaʼyóoʼ muxnajxi̱ xúgíinʼ e̱ji̱n bi̱ maguwáʼ rakúwá nda̱wa̱á.

22 Á mu ikháanʼ nuni̱la mbá dí raʼkhí ga̱jma̱a̱ tsénimbala xúgíʼ kiʼtáñajunʼ dí Jeobá nixnúu Moisés, 23 xúgíʼ dí Jeobá niʼtáñajunʼ munila náa Moisés, asndu nákhá mbiʼi dí Jeobá niʼtáñajunʼ ga̱jma̱a̱ asndu mbiʼi dí maguwáʼ rakúwá e̱jña̱la nda̱wa̱á, 24 á mu nirígá mbá dí raʼkhí ga̱jma̱a̱ xa̱bu̱ xuajin túyáá, ikhú xúgíinʼ xa̱bu̱ xuajin mbaʼyóoʼ muxnajxi̱i̱ mbáa a̱ʼdá xédí xóo mbá tsigijñaʼ dí mikarámáʼ dí mitsaanʼ ndataun eʼyoo Jeobá, mbóó má gáʼyóoʼ mixnájxi̱ ga̱jma̱a̱ tsigijñaʼ rí tsígáʼ ma̱ngaa tsigijñaʼ dí magadírámúunʼ xó má rí kaʼyoo mixnájxi̱, ma̱ngaa mixnájxi̱i̱ mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá. 25 Ndxajkun maʼni kaʼwi̱i̱ aʼkhúún xúgíinʼ xa̱bu̱ xuajin Israel ga̱jma̱a̱ Jeobá maʼni mba̱a̱ a̱jkiu̱u̱n kaʼyoo aʼkhúún, numuu rí nijngawi̱i̱n ga̱jma̱a̱ nigún kuñu̱u̱n náa inuu Jeobá mbá tsigijñaʼ ga̱jma̱a̱ numuu aʼkhúún. 26 Xúgíinʼ xa̱bu̱ xuajin Israel ma̱ngaa xa̱bu̱ bi̱ na̱ʼkha̱á, Dios maʼni mba̱a̱ a̱jkiu̱u̱n kaʼñún, numuu rí xúgíinʼ xa̱bu̱ niguáʼdáá aʼkhúún.

27 Á mu mbáa najngawa̱a̱n ga̱jma̱a̱ naʼni mbá dí raʼkhí, mbaʼyóoʼ maxnájxi̱i̱ mbáa a̱ʼdá tsújtuunʼ bi̱ mbá tsiguuʼ xóo tsigijñaʼ ga̱jma̱a̱ numuu aʼkhá. 28 Ndxajkun maʼni kaʼwi̱i̱ aʼkhúun xa̱bu̱ bi̱ nijnga̱wa̱a̱n ga̱jma̱a̱ táʼni kiejuunʼ mbá aʼkhá náa inuu Jeobá. Ndxajkun maʼni kaʼwi̱i̱ aʼkhúun ga̱jma̱a̱ xa̱bu̱ maguma mba̱a̱ a̱jkiu̱ún kuyáá. 29 Xó má xa̱bu̱ israelita ga̱jma̱a̱ xa̱bu̱ na̱ʼkha̱á bi̱ xtáa náa ikháanʼla mbaʼyóoʼ marigá ikháá má xtángoo dí maguma mbáníí á mu mbáa nakudaminaʼ mbá aʼkhá mú tséʼni kiejuunʼ.

30 Á mu mbáa naʼni kiejuunʼ mbá aʼkhá, tséʼniuu á mu nindxu̱u̱ israelitas o mbáa xa̱bu̱ na̱ʼkha̱á, xa̱bu̱ buʼko̱ xtáa raʼni gawúunʼ Jeobá, mbaʼyóoʼ makhañúu náa xuajñuu. 31 Numuu rí táʼyamajkuu ajngóo Jeobá ga̱jma̱a̱ táʼnimbo̱o̱ kiʼtáñajunʼ ndrígóo, xa̱bu̱ buʼko̱ mbaʼyóoʼ makhañúu tsiaki̱i̱. Ikhaa má kaʼyoo maʼni numa̱a̱ aʼkhúun›”.

32 Índo̱ israelitas kúwá náa ku̱ba̱ʼ mijxooʼ, nixkamaa mbáa xa̱bu̱ bi̱ nagujxi̱i̱ ixi̱ rí mbiʼi sábado. 33 Bi̱ nixkamaa rí nagujxi̱i̱ ixi̱ nigún kuya̱a̱ náa inuu Moisés, Aarón ga̱jma̱a̱ náa inún xúgíinʼ xa̱bu̱ xuajin. 34 Ikhú niruguaraʼaa numuu rí xóó tséjuiʼyáá xú kaʼnii gambánuu numuu.

35 Jeobá niʼthúu̱n Moisés: “Xa̱bu̱ mbaʼyóoʼ makhañúu tsiaki̱i̱. Xúgíinʼ xa̱bu̱ xuajin mbaʼyóoʼ muxnáá ga̱jma̱a̱ itsí náa rawuunʼ dí giáanʼla”. 36 Ikha jngóo xúgíinʼ xa̱bu̱ xuajin niriya̱a̱ʼ náa rexo̱o̱ dí gíi̱nʼ nixnáá ga̱jma̱a̱ itsí asndu nixiyáa, xó má Jeobá niʼtáñajuunʼ Moisés.

37 Jeobá ma̱ngaa niʼthúu̱n rígi̱ Moisés: 38 “Aratámíjná gajmiáanʼ israelitas, arathún: ‹Mbaʼyóoʼ mu̱ni̱ yojoo náa rawuunʼ gajniúu xtíñala xúʼko̱ má xúgíinʼ e̱jña̱la bi̱ maguwáʼ rakúwá nda̱wa̱á ma̱ngaa mbaʼyóoʼ mugíʼma mbá cuerda azul itháan rijma̱a̱ náa jngrígú yojoo xtíñala. 39 Mbaʼyóoʼ maguaʼdáá yojoo xtíñala, mu xúʼko̱ índo̱ gúya̱a̱, marmáʼáan a̱jkia̱la gáʼni xúgíʼ kiʼtáñajunʼ ndrígóo Jeobá ga̱jma̱a̱ munimbánííla. Xúniʼñáánʼ dí a̱jkia̱la maxná ikhala ni má rí ndaʼyoo idala, numuu dí rúʼko̱ maʼga kaguáanʼ mugujuamíjna̱ náa inún eʼwíinʼ dioses. 40 Rúʼko̱ gámbáyála marmáʼáan a̱jkia̱la, mu munimbáníí xúgíʼ kiʼtáñajunʼ ga̱jma̱a̱ xúʼko̱ maʼni kaʼwáanʼ náa inuu Dios ndrígala. 41 Ikhúún nindxu̱ʼ Jeobá Dios ndrígala, bi̱ niguwáa̱nʼ náa ku̱ba̱ʼ ndrígóo Egipto mu mani̱ndxu̱ʼ Dios ndrígala. Ikhúún ni̱ndxu̱ʼ Jeobá Dios ndrígala›”.

16 Ikhú Coré, a̱ʼdióo Izhar, a̱ʼdióo Cohat, a̱ʼdióo Leví, niruwamínáʼ náa Datán ga̱jma̱a̱ Abiram, e̱ji̱i̱n Eliab, ma̱ngaa On a̱ʼdióo Pélez, bi̱ na̱ʼkha̱ náa e̱ji̱i̱n Rubén. 2 Ikhiin nixujximíjna̱ náa inuu Moisés gajmiún mbá 250 israelitas bi̱ kuya̱ edxu̱u̱ náa xuajin, bi̱ nixtaʼwíin náa rí nagimbíi̱n, xa̱bu̱ bi̱ guáʼdáá numún. 3 Ikha jngóo nigimbíin gajmiún Moisés ga̱jma̱a̱ Aarón, nithúún: “¡Nánguá eʼngo̱o̱ a̱jkiu̱xu̱ eni̱la! Xúgíinʼ xa̱bu̱ xuajin ni̱ndxu̱ún mikaʼwun, xúgíinʼ ikhiin, Jeobá xtáa náa majñu̱únʼ ikhiin. Náá numuu rí ikháanʼla nandala manújngurámala náa xuajñuu Jeobá rá.”

4 Índo̱ Moisés niʼdxawuun rígi̱, mbá nacha̱ nismbáti̱go̱o̱ asndu mbayííʼ. 5 Ikhú niʼthúu̱n Coré gajmíi̱n bi̱ numbayíí: “Miʼcha̱, Jeobá masngájma tsáa bi̱ kaʼyoo ikhaa, tsáa nindxu̱u̱ kaʼwii ga̱jma̱a̱ tsáa bi̱ ma̱ndoo maʼga kanuu náa ikhaa. Xa̱bu̱ bi̱ ikhaa gáraʼwíi, ikhaa buʼko̱ bi̱ maʼga kanuu náa ikhaa. 6 Rígi̱ rí gíʼmaa mu̱nila: Coré gajmíi̱n xúgíinʼ bi̱ numbayíí, gudala daan náa nagiwa̱nʼ chámbuʼ, 7 gugiwánʼla aguʼ ga̱jma̱a̱ rí ndataun guxnajxí náa inuu Jeobá miʼcha̱ gájtsíí, xa̱bu̱ bi̱ Jeobá gáraʼwíi ikhaa nindxu̱u̱ kaʼwii. ¡Mbaʼ nújngo̱ó eni̱la e̱ji̱i̱n Leví!”.

8 Moisés niʼthúu̱n Coré: “Mbá péñu,* gudxawíínla e̱ji̱i̱n Leví. 9 Dios ndrígóo Israel niraʼwáanla náa majñu̱únʼ xa̱bu̱ xuajin ga̱jma̱a̱ rí muʼgua kanuu náa ikhaa ga̱jma̱a̱ ikhaa niniñala rí muñajunʼ náa guʼwá xtíin ndrígóo Jeobá, ma̱ngaa rí makuwáanʼ rumbáñún xa̱bu̱ xuajin, 10 ga̱jma̱a̱ rí ikhaa niniña̱a̱nʼ maraxtaa mijngii náa ikhaa gajmiáanʼ xúgíinʼ a̱ngia̱a̱nʼ, bi̱ ni̱ndxu̱ún e̱ji̱i̱n Leví. Lá ragíʼdoo numuu rígi̱ eya̱a̱la ráʼ. Dí asndu ma̱ngaa nandala rí mani̱ndxa̱la ndxajkun ráʼ. 11 Ikha jngóo ikháán ga̱jma̱a̱ xúgíinʼ bi̱ numbayáaʼ kúwáanʼ ranújgurámala náa inuu Jeobá. Ma̱ngaa, tsáá lá nindxu̱u̱ Aarón dí muxiéʼkala náa inuu ikhaa xá.”

12 Nda̱wa̱á, Moisés nindxa̱ʼóo Datán ga̱jma̱a̱ Abiram, e̱ji̱i̱n Eliab, mú ikhiin nithi: “¡Xúʼguáxu̱! 13 Nda̱a̱ dí káʼnii tayáá rí nitrawáanʼxu náa mbá ku̱ba̱ʼ dí rígá wéñuuʼ yáʼdú ga̱jma̱a̱ jyááʼ mu matradiáanʼxu náa ku̱ba̱ʼ mijxooʼ ráʼ. Rí xúgi̱ nandaaʼ maratañájunxu xóo mbáa xa̱bu̱ ñajunʼ ráʼ. 14 Ragájkhun rí ni̱dxa̱ʼ xtáanxu náa mbá ku̱ba̱ʼ dí rígá wéñuuʼ yáʼdú ga̱jma̱a̱ jyááʼ, ni má xóó táraxnuxu̱ʼ nimbá mbaaʼ náa rí kiʼdu uva rí maʼni mbayuxu. Lá marawíi idún xa̱bu̱ buʼko̱ rá.* ¡Xúʼguáxu̱!”.

15 Ikha jngóo Moisés nikiʼnáa wéñuuʼ ga̱jma̱a̱ niʼthúu̱n Jeobá: “Xádrígu tsigijñaʼ ndrígu̱ún rí nindxu̱u̱ tsígáʼ. Tárigu káʼñúún nimbáa búrriu̱ún ni ma nda̱a̱ rí niniu̱u̱n nimbáa”.

16 Ikhú Moisés niʼthúu̱n Coré: “Miʼcha̱ gájtsíí gáraxnaxíminaʼ gajmiáanʼ xúgíinʼ bi̱ numbayáaʼ náa inuu Jeobá, ikháán ga̱jma̱a̱ ikhiin ma̱ngaa Aarón. 17 Mámbáa mayéʼga daan dí nagiwa̱nʼ chámbuʼ, magíwánʼ rí ndataun, ga̱jma̱a̱ maxnájxi̱ daan dí nagiwa̱nʼ chámbuʼ náa inuu Jeobá: Rí mbá xúgíʼ daan dí nagiwa̱nʼ chámbuʼ manidxu̱u̱ 250, ikháán ga̱jma̱a̱ Aarón mudéʼgua daan dí nagiwa̱nʼ chámbuʼ”. 18 Ikha jngóo mámbáa kayá ni̱jkha̱ daan dí nagiwa̱nʼ chámbuʼ, nigíwanʼ aguʼ ga̱jma̱a̱ rí ndataun, xúgíinʼ niguájun náa riejuun guʼwá xtíin rí nagimbíi̱n gajmiún Moisés ma̱ngaa Aarón. 19 Índo̱ Coré nigímbíin xúgíinʼ bi̱ numbayíí mu muxujximíjna̱ náa riejuun guʼwá xtíin rí nagimbíi̱n, aguʼ rí naxpíbínʼ ndrígóo Jeobá nikujmaa náa xúgíinʼ xa̱bu̱ xuajin.

20 Jeobá niʼthúu̱n Moisés ga̱jma̱a̱ Aarón: 21 “Gurkuajimíjná náa xa̱bu̱ bugi̱ mu ma̱ndoo ma̱ni̱ gámbíin má xúgi̱”. 22 Índo̱ nidxawíín rígi̱, ikhiin nismbati̱gu̱u̱n asndu mbayííʼ ga̱jma̱a̱ nithi: “Dios ndrígúxu̱, Dios bi̱ naxnún xi̱ʼ xúgíinʼ xa̱bu̱,* lá nakiʼnán xtañún xúgíinʼ xa̱bu̱ xuajin ga̱jma̱a̱ numuu aʼkhá rí nikudaminaʼ mbáwíí xa̱bu̱ ráʼ”.

23 Ikhú Jeobá niʼthúu̱n Moisés: 24 “Arathún xa̱bu̱ xuajin: ‹¡Gutsínguala náa guʼwá xtíin ndrígóo Coré, Datán ga̱jma̱a̱ Abiram!›”.

25 Moisés nitu̱jxu̱u̱ gajmíi̱n bi̱ kuya̱ edxu̱u̱ náa Israel, ni̱jkha̱ gajmíi̱n náa xtáa Datán ga̱jma̱a̱ Abiram. 26 Ikhaa niʼthún xa̱bu̱ xuajin: “Mbá péñu gutsínguala náa guʼwá xtíin ndrígu̱ún xa̱bu̱ xkawiinʼ bugi̱, xúrugua̱ nimbá rí guáʼdáá mu xúʼko̱ xákáñala ga̱jma̱a̱ numuu aʼkhúún”. 27 Ikhiin mbá nacha̱ nini̱ tsíngumijná náa guʼwá xtíin ndrígóo Coré, Datán ga̱jma̱a̱ Abiram. Ikhú Datán ga̱jma̱a̱ Abiram nigájnún gáwájun náa riejuun guʼwá xtíin ndrígu̱ún gajmiún guʼñún mangiin e̱jñu̱ún.

28 Ikhú Moisés niʼthí: “Xúʼko̱ mbu̱ya̱a̱ xúgiáanʼla rí Jeobá nikungu̱u̱nʼ mu ma̱ni̱ xúgíʼ rígi̱, raʼkháa rí nagájnuu náa a̱jkiu̱nʼ ikhúún: 29 Á mu xa̱bu̱ bugi̱ nakháñún xó má nakháñún xúgíinʼ xa̱bu̱ ga̱jma̱a̱ numíniiʼ xó ma xúgíinʼ xa̱bu̱, Jeobá na̱nguá nikungu̱u̱nʼ, 30 á mu Jeobá na’ni mbá rí gamíi náa ikhiin, ku̱ba̱ʼ nambáʼtoo rawuunʼ ga̱jma̱a̱ na̱ʼkhu̱ rajgiúúnʼ, ikhiin asndu nduya gájngún náa Iñá wajinʼ* ga̱jma̱a̱ xúgíʼ rí guáʼdáá, ikhú ikháanʼla mbu̱ya̱a̱ gajkhun rí xa̱bu̱ bugi̱ ninújngurámúúnʼ náa inuu Jeobá”.

31 Índo̱ niguámbóo niʼthí, ku̱ba̱ʼ nimbaʼtoo náa wájun ikhiin. 32 Ku̱ba̱ʼ nimbáʼtoo rawuunʼ ga̱jma̱a̱ ni̱ʼkhu̱ rajgiúúnʼ ikhiin ga̱jma̱a̱ xúgíinʼ bi̱ kúwá náa guʼwún, ma̱ngaa xúgíinʼ bi̱ kaʼñúún Coré xó ma xúgíʼ rí guáʼdáá. 33 Ikhiin ga̱jma̱a̱ xúgíʼ rí kaʼñúún nduya nijngún náa Iñá wajinʼ ga̱jma̱a̱ ku̱ba̱ʼ niruguamiʼiin, xúʼko̱ niguámbíin náa majñu̱únʼ xa̱bu̱ xuajin. 34 Xúgíinʼ israelitas bi̱ wájun mbájndi nigáñún índo̱ nidxawíín nindxa̱ʼwa̱ ga̱jma̱a̱ nithi: “¡Namíñuxuʼ rí mangáanʼxu mikhu rajngiuxuʼ ku̱ba̱ʼ!”. 35 Ikhú nigajtaa mbá aguʼ náa Jeobá ga̱jma̱a̱ nitsikíin mbá 250 xa̱bekha bi̱ nuxnajxi̱ dí ndataun.

36 Nda̱wa̱á Jeobá niʼthúu̱n Moisés: 37 “Aratháán Eleazar a̱ʼdióo ndxajkun Aarón rí maguwíi náa awúu̱n aguʼ daan dí nagiwa̱nʼ chámbuʼ, numuu rí nindxu̱u̱ kaʼwu. Ma̱ngaa aratháán rí mada̱ʼ tsínguáʼ chámbuʼ rígi̱. 38 Daan dí nagiwa̱nʼ chámbuʼ ndrígu̱ún xa̱bu̱ bi̱ nikháñún numuu rí nixudami̱jna̱ aʼkhá, ni̱jkha̱nú ninindxu̱u̱ kaʼwu numuu rí ikhiin nixnajxi̱ náa inuu Jeobá, ikha jngóo gíʼmaa murujtsi̱i̱ mu maʼni̱i̱ mbá ajua̱nʼ mbawiʼ mu muxtajmáá náa nakarámáʼ tsigijñaʼ. Mu xúʼko̱ mani̱ndxu̱u̱ mbá tsinaʼ náa israelitas”. 39 Ikhú ndxajkun Eleazar niguwíi daan dí nagiwa̱nʼ chámbuʼ rí niguma ga̱jma̱a̱ cobre dí nixnajxi̱ bi̱ nikhiin ga̱jma̱a̱ nirujtsi̱i̱ mu maʼni̱i̱ mbá ajua̱nʼ mbawiʼ mu maxtájmuu náa nakarámáʼ tsigijñaʼ, 40 xó má Jeobá niʼthúu̱n Moisés. Rígi̱ naʼni marmáʼáan a̱jkiu̱ún israelitas rí asndu tsáa i̱mba̱a̱ xa̱bu̱ kaníí* xándoo maʼga kanuu mu matsikhá rí ndataun náa inuu Jeobá ga̱jma̱a̱ nimbáa xándoo mani̱ndxu̱u̱ xóo Coré ni má xóo bi̱ numbayíí.

41 I̱mba̱ néjtsuu, xúgíinʼ xa̱bu̱ xuajin Israel nigíʼdi̱i̱ nixieʼkhá náa Moisés ga̱jma̱a̱ náa Aarón. Nithúún: “Ikháanʼla niradíinla xa̱bu̱ xuajñuu Jeobá”. 42 Índo̱ xa̱bu̱ xuajin nigimbíin mu muxujximíjna̱ náa inuu Moisés ga̱jma̱a̱ náa Aarón, nitangiín xígií náa guʼwá xtíin dí nagimbíi̱n, ndiyáá rí du̱u̱n narugurámuuʼ ga̱jma̱a̱ aguʼ rí naxpíbínʼ ndrígóo Jeobá nigíʼdu̱u̱ nikujmaa.

43 Moisés ga̱jma̱a̱ Aarón nixuʼmamijná náa guʼwá xtíin dí nagimbíi̱n, 44 ga̱jma̱a̱ Jeobá niʼthúu̱n Moisés: 45 “Gunitsíngumíjnála ikháanʼ ajmáanʼ náa xa̱bu̱ xuajin bugi̱ mu ma̱ndoo ma̱ni̱ gámbíin má xúgi̱”. Ikhú ikhiin nismbati̱gu̱u̱n asndu mbayííʼ. 46 Ikhú Moisés niʼthúu̱n Aarón: “Ayá mbá daan rí nagiwa̱nʼ chámbuʼ, atagíwánʼ aguʼ dí grígu náa nakarámáʼ tsigijñaʼ, atagíwánʼ dí ndataun ga̱jma̱a̱ atagáyáaʼ mu matani̱ kaʼwi̱i̱n xúgíinʼ xa̱bu̱ xuajin, numuu rí Jeobá nikiʼnáa kaʼñún ¡Gamiéjunʼ rígi̱ nigíʼdu̱u̱ má!”. 47 Mbá nacha̱ Aarón niʼni xó má niʼthúu̱n Moisés ga̱jma̱a̱ nito̱ʼo̱o̱ ragáyúu náa majñu̱únʼ xa̱bu̱, ¡mú gamiéjunʼ rígi̱ nigi̱ʼdu̱u̱ má náa xuajin! Ikha jngóo nigíwánʼ rí ndataun náa daan rí nigíwánʼ chámbuʼ ga̱jma̱a̱ nigíʼdúu niʼni kaʼwi̱i̱n xa̱bu̱ xuajin. 48 Niwi̱ji̱ náa níjñún bi̱ nikháñún ga̱jma̱a̱ bi̱ nduya. Ikhú niwi̱ji̱i̱ gamiéjunʼ rígi̱. 49 Bi̱ nikháñún náa gamiéjunʼ rígi̱ ninindxu̱ún 14,700, mú tágixnii bi̱ nikháñún ga̱jma̱a̱ numuu Coré. 50 Índo̱ Aarón nitanga̱a̱ náa xtáa Moisés náa riejuun guʼwá xtíin dí nagimbíi̱n, gamiéjunʼ rígi̱ niwi̱ji̱i̱ má.

17 Ikhú Jeobá niʼthúu̱n Moisés: 2 “Arathún israelitas mámbáa xa̱biya̱ bi̱ kayá edxu̱u̱ náa xuajin majkhaʼ,* bi̱ kayá edxu̱u̱ náa goʼwóo anu̱ún, mudiéwáʼ ragótiu̱ún, dí mbá xúgíʼ nindxu̱u̱ 12. Ataniraʼmáʼ mbiʼñún náa ragótiu̱ún. 3 Ataniraʼmáʼ mbiʼyuu Aarón náa ragóti dí ni̱ʼkha̱ náa xuajin chíʼgíiʼ ndrígóo Leví, numuu dí mbóó ragóti rígá náa mámbáa bi̱ kayá edxu̱u̱ náa goʼwóo anu̱ún. 4 Atatsíñááʼ ragóti náa guʼwá xtíin rí nagimbíi̱n náa inuu arca dí nimbánuu,* náa nasngajmáminaʼ tsejtsíí náa ikháanʼla. 5 Ragótiu̱u̱ xa̱bu̱ bi̱ ikhúún gáraʼwi̱i̱ mamijdi̱ riʼyu̱u̱ ga̱jma̱a̱ ma̱ni̱ dí israelitas muniña̱a̱nʼ ruxieʼkhá náa ikhúún ma̱ngaa náa ikháanʼla”.

6 Ikha jngóo Moisés niʼtáminaʼ gajmíi̱n israelitas ga̱jma̱a̱ xúgíinʼ bi̱ kuya̱ edxu̱u̱ nixnáá ragóti ndrígu̱ún, mámbá ragótiu̱ún náa mámbáa bi̱ kayá edxu̱u̱ náa goʼwóo anu̱ún, dí mbá xúgíʼ nindxu̱u̱ 12 ma̱ngaa ni̱ʼkha̱ ragótiu̱u̱ Aarón. 7 Ikhú Moisés niniñuuʼ xúgíʼ ragóti náa inuu Jeobá náa guʼwá xtíin rí nimbánuu.

8 I̱mba̱ néjtsuu, Moisés nito̱ʼo̱o̱ náa guʼwá xtíin rí nimbánuu ga̱jma̱a̱ ndiʼyoo dí ragóti ndrígóo Aarón, bi̱ na̱ʼkha̱ náa xuajin chíʼgíiʼ ndrígóo Leví nijmi̱di̱ riʼyu̱u̱ ga̱jma̱a̱ ni̱ʼkha̱ almendra dí niʼgo̱o̱ má. 9 Ikhú Moisés niguwíi xúgíʼ ragóti náa inuu Jeobá ga̱jma̱a̱ nisngájmún xúgíinʼ xa̱bu̱ xuajin Israel. Ikhiin ndiyáá ga̱jma̱a̱ mámbáa niyéjkha̱a̱ ndrígóo.

10 Nda̱wa̱á dí rúʼko̱, Jeobá niʼthúu̱n Moisés: “Atanga̱án cháaʼ ragótiu̱u̱ Aarón náa inuu arca dí nimbánuu mu mixtagijxi̱i̱ xóo tsinaʼ mu mbuyáá e̱jñu̱ún xa̱bu̱ bi̱ tsénimbu̱u̱n bugi̱, mu xúʼko̱ muniña̱a̱nʼ ruxieʼkhá náa ikhúún ga̱jma̱a̱ mu xúʼko̱ xákháñún”. 11 Mbá nacha̱ Moisés niʼni xó má Jeobá niʼthúu̱n maʼni. Niʼni xó má niʼthúu̱n ikhaa.

12 Ikhú israelitas nitháán Moisés: “¡Makañúxu rá! ¡Xúgi̱ rí makañúxu rá! ¡Xúgiánʼ makañúlú rá! 13 ¡Asndu tsáa bi̱ gáʼkha̱ kanuu náa guʼwá xtíin ndrígóo Jeobá makhañúu! Náa numuu dí xúʼko̱ gákáñúlú rá.”

18 Jeobá niʼthúu̱n Aarón: “Ikháán gajmiáanʼ e̱jña̱a̱ʼ ma̱ngaa bi̱ kúwá náa goʼwóo ana̱a̱ʼ mu̱ni̱ numa̱a̱ asndu káʼníí má dí raʼkhí gárígá náa rí mitsúʼkháan, ikháán gajmiáanʼ e̱jña̱a̱ʼ mu̱ni̱ numa̱a̱ á mu nakiéʼkala náa ñajunʼ dí guáʼdáá xóo ndxajkun. 2 Ma̱ngaa arathún a̱ngia̱a̱nʼ bi̱ naguwáʼ náa xuajin chíʼgíiʼ* ndrígóo Leví, náa na̱ʼkha̱ ana̱a̱ʼ,* mu makuwá ga̱jma̱á nindxa̱a̱ʼ mumbayáaʼ xúʼko̱ má mumbañún e̱jña̱a̱ʼ náa inuu guʼwá xtíin rí nimbánuu. 3 Ikhiin kaʼñún rí munimbáníí ñajunʼ dí guáʼdáá náa ikháán ga̱jma̱a̱ náa xúgíʼ guʼwá xtíin. Mú xándoo magún kanuu náa rígá dí najmaa náa dí mikaʼwu ni má náa nakarámáʼ tsigijñaʼ, mu xúʼko̱ xákáñála ikháanʼ ni má ikhiin. 4 Ikhiin maguwáʼ náa ikháán ga̱jma̱a̱ munimbáníí ñajunʼ dí guáʼdáá muni̱ náa guʼwá xtíin ga̱jma̱a̱ xúgíʼ dí kaʼyoo muni̱ ikhí, nimbáa xa̱bu̱ kaníí* xándoo ma̱ʼkha̱ kanuu náa ikháanʼla. 5 Ikháanʼ gíʼmaa munimbáníí ñajunʼ dí guáʼdáá náa rí mikaʼwu ga̱jma̱a̱ náa nakarámáʼ tsigijñaʼ, mu xúʼko̱ Dios xákiʼnáa kaʼñún xa̱bu̱ xuajin Israel. 6 Ikhúún mínu̱u̱ʼ niraʼwi̱i̱n levitas bi̱ nindxu̱ún a̱ngia̱la náa majñu̱únʼ israelitas, mu maxnia̱la ikháanʼ. Ikhiin nijuixnájxi̱i̱n náa Jeobá mu muni̱ ñajunʼ náa guʼwá xtíin rí nagimbíi̱n. 7 Ikháán gajmiáanʼ e̱jña̱a̱ʼ mani̱ndxa̱la ndxajkun ga̱jma̱a̱ mu̱ni̱ ñajunʼ náa nakarámáʼ tsigijñaʼ ga̱jma̱a̱ dí narígá náa kidxuuʼ cortina, ikháanʼ kaʼyala mu̱ni̱ ñajunʼ rúʼko̱. Ikháanʼ ni̱xna̱la ñajunʼ xóo ndxajkun. Asndu tsáá i̱mba̱a̱ xa̱bu̱ kaníí* bi̱ gáʼkha̱ kanuu, mbaʼyóoʼ makhañúu”.

8 Jeobá niʼthúu̱n Aarón: “Ikhúún mínu̱u̱ʼ niʼgíínʼ mu matrígú dí nuxna dí kaʼyoʼ ikhúún. Ni̱xna̱a̱ʼ ikháán ga̱jma̱a̱ e̱jña̱a̱ʼ asndu kámuu mbá chíʼgíiʼ rí naguwáʼ kudúún israelitas dí nindxu̱u̱ kaʼwu. 9 Tsigijñaʼ mikaʼwu dí mikarámáʼ, mani̱ndxu̱u̱ ndrígáaʼ ikháán xúgíʼ dí gájuixnájxi̱, xóo tsigijñaʼ rí tsígáʼ, tsigijñaʼ ga̱jma̱a̱ numuu aʼkhá ga̱jma̱a̱ tsigijñaʼ dí nakiéʼkúún dí maguwáʼ kudúún náa ikhúún. Nindxu̱u̱ mbá rí mikaʼwu wéñuuʼ náa ikháán ga̱jma̱a̱ náa e̱jña̱a̱ʼ. 10 Mbaʼyóoʼ muphula náa rí mikaʼwu. Mu̱phu̱ xúgíinʼ bi̱ nindxu̱ún xa̱bekha. Mani̱ndxu̱u̱ mbá rí kaʼwu náa ikháán. 11 Ma̱ngaa kaʼyaaʼ rí naguwáʼ kudúún israelitas mu muxna, xúgíʼ tsigijñaʼ rí nubajngaa. Ni̱xna̱a̱ʼ ikháán ma̱ngaa ni̱xnu̱u̱ jiámiáaʼ ga̱jma̱a̱ waʼxiaaʼ mbá rí kaʼyala makánála ikháanʼ asndu kámuu. Xúgíinʼ xa̱bu̱ bi̱ nindxu̱ún kaʼwiin bi̱ kúwá náa guʼwáaʼ ma̱ndoo mu̱phu̱.

12 Aceite rí itháan májánʼ, vino rí nuxi̱ʼ ga̱jma̱a̱ xúgíʼ dí nijma̱a̱ ginii kayuuʼ náa nijuiʼdu dí ikhiin muxnáá Jeobá, naxna̱a̱ maʼni ndrígáaʼ ikháán. 13 Timbá dí najma̱a̱ ginii kayuuʼ náa ku̱bu̱únʼ, rí ikhiin magún kudúún náa Jeobá, mani̱ndxu̱u̱ ndrígáaʼ ikháán. Xúgíinʼ xa̱bu̱ bi̱ kúwá náa guʼwáaʼ bi̱ nindxu̱ún kaʼwiin ma̱ndoo mu̱phu̱.

14 Xúgíʼ rí nijuixnájxi̱i̱ Dios* náa Israel manidxu̱u̱ ndrígáaʼ ikháán.

15 Xúgíinʼ e̱jín giʼnii bi̱ ikhiin gúxnajxi̱i̱n náa Jeobá, tséʼniuu á mu nindxu̱ún xa̱bu̱ o xujkhúʼ, mani̱ndxu̱ún ndrígiáaʼ. Mú matatsiʼñáánʼ rí mutsiwíin e̱jín gíʼniún xa̱bu̱, ma̱ngaa e̱jñu̱ún xujkhúʼ bi̱ nagumiin ginii bi̱ nindxu̱ún mitsagiin. 16 Matatsiʼñáánʼ rí mutsiwíin índo̱ gáguáʼdáá a̱jma̱ igiu̱únʼ o itháán, xóo minumún gíʼmaa maʼni mbá witsu siclos* ndrígóo plata, xó má numuu rí najmaa náa dí kaʼwu. Rí nindxu̱u̱ 12 gramo.* 17 Mú xáʼyóoʼ matatsiʼñáánʼ dí mutsiwíin e̱jñu̱ún xedi̱ bi̱ nagumiin ginii, mugu̱ ga̱jma̱a̱ tsu̱jtuunʼ. Ikhiin nindxu̱ún kaʼwiin. Eʼdiún mbaʼyóoʼ mataxtíjyááʼ náa nakarámáʼ tsigijñaʼ ga̱jma̱a̱ sébu̱ún mbaʼyóoʼ matadrámáʼ maʼni gúní náa nakarámáʼ tsigijñaʼ xóo mbá tsigijñaʼ rí mi̱kha dí mitsaanʼ* ndataun eʼyoo Jeobá. 18 Xuyuuʼ maguanáaʼ ga̱jma̱a̱. Xúʼko̱ má xuwi tso̱xto̱o̱ rí nijmaa náa tsigijñaʼ rí nubajngaa ma̱ngaa rajkhú mújúunʼ, mani̱ndxu̱u̱ ndrígáaʼ ikháán. 19 Xúgíʼ rí kaʼwu dí bi̱ israelitas gúxnáá Jeobá, naxna̱a̱ʼ ikháán gajmiáanʼ jiámiáaʼ ma̱ngaa waʼxiaaʼ xóo mbá rí kaʼyala ikháanʼ asndu kámuu. Nindxu̱u̱ mbá dí nambánuu rí mbajyúuʼ asndu kámuu* náa Jeobá, náa ikháán ga̱jma̱a̱ náa e̱jña̱a̱ʼ”.

20 Jeobá niʼthúu̱n má xúʼko̱ Aarón: “Nimbá xátandrígúu náa ku̱bu̱únʼ ikhiin, nimbá chíʼgíiʼ ku̱ba̱ʼ mu maʼni mbayaaʼ náa majñu̱únʼ ikhiin. Ikhúún nindxu̱ʼ bi̱ kaʼyaaʼ ga̱jma̱a̱ dí matandrígúu náa majñu̱únʼ israelitas.

21 Na̱xnu̱u̱ e̱ji̱i̱n Leví mbá nguéjma̱* xúgíʼ dí rígá náa Israel ga̱jma̱a̱ numuu ñajunʼ dí nuni̱ náa guʼwá xtíin rí nagimbíi̱n. 22 Xa̱bu̱ xuajin Israel ní xándoo maguwáʼ kanuu náa guʼwá xtíin rí nagimbíi̱n. Á mu naguwáʼ, makiéʼkhún ga̱jma̱a̱ makhañún. 23 Bi̱ levitas mbaʼyóoʼ muni̱ ñajunʼ náa guʼwá xtíin, ikhiin má gúni̱ numaaʼ á mu rígá mbá dí raʼkhí gúni̱. Rígi̱ nindxu̱u̱ mbá kiʼtáñajunʼ dí mbajyúuʼ asndu kámuu náa xúgíinʼ e̱jñu̱ún bi̱ maguwáʼ rakúwá nda̱wa̱á, ikhiin nda̱a̱ rí kaʼñún mudrigúu náa majñu̱únʼ israelitas. 24 Numuu dí levitas ni̱xnu̱u̱ mbá nguéjma̱ rí xa̱bu̱ Israel gúxnáá Jeobá mu maʼni ndrígu̱ún ikhiin. Ikha jngóo ni̱thu̱u̱n: ‹Ikhiin nda̱a̱ dí gúndrigúu náa majñu̱únʼ israelitas›”.

25 Ikhú Jeobá niʼthúu̱n Moisés: 26 “Gíʼmaa marathu̱u̱n bi̱ levitas: ‹Ikháanʼ mundrígúla mbá nguéjma̱ dí gúxna bi̱ israelitas, ikhaa rúʼko̱ nindxu̱u̱ dí na̱xna̱la ikháanʼ, náa mbá nguéjma̱ dí gúxnala mbaʼyóoʼ murawíila mbá nguéjma̱ mu mu̱xna̱a̱la Jeobá xó mbá dí kaʼyoo ikhaa. 27 Rúʼko̱ gánindxu̱u̱ dí ikháanʼ gúxnala, mani̱ndxu̱u̱ asndu xóo tsígáʼ dí najuixná índo̱ naxtujtsi̱i̱ o xúgíʼ vino rí nagájnaa índo̱ nuxujmbi̱i̱ uva o aceite. 28 Mu xúʼko̱ ikháanʼla ma̱ngaa muxna̱a̱ Jeobá rí kaʼyoo magruigú náa mbá nguéjma̱ rí gúxnala bi̱ israelitas, mu̱xna̱a̱la ndxajkun Aarón dí kaʼyoo makánáán Jeobá. 29 Asndu ndiéjúúnʼ má dí gúxna̱a̱ Jeobá, mbaʼyóoʼ mani̱ndxu̱u̱ dí itháan májánʼ dí gúxnala náa rí kaʼwu›.

30 Ma̱ngaa mbaʼyóoʼ marathu̱u̱n: ‹Índo̱ ikháanʼ gúxnala regalo dí itháan májánʼ, rí gápídu̱únʼ mani̱ndxu̱u̱ ndrígala ikháanʼ bi̱ nindxa̱la levitas, mani̱ndxu̱u̱ asndu xóo tsígáʼ rí nagájnáa índo̱ naxtujtsi̱i̱ o vino rí nagájnaa índo̱ nuxujmbi̱i̱ uva o aceite. 31 Ikháanʼla ga̱jma̱a̱ bi̱ kúwá náa guʼwála ma̱ndoo mu̱phu̱ asndu náá, numuu dí rúʼko̱ nindxu̱u̱ dí nudaʼla ga̱jma̱a̱ numuu ñajunʼ dí nuni̱la náa guʼwá xtíin. 32 Á mu nuxnala regalo dí itháan májánʼ, xúkiéʼkala. Xúni̱ tsagáá rí mikaʼwu dí nuxna israelitas, á mu nuni̱la, makañála›”.

19 Jeobá nitanga̱a̱ niʼtámíjná ga̱jma̱a̱ Moisés ma̱ngaa Aarón. Niʼthúún: 2 “Rígi̱ nindxu̱u̱ xtángoo rí niʼthí Jeobá: ‹Arathún israelitas rí maguwáʼ kuya̱a̱ mbáa xedi̱ maña̱a̱ʼ, bi̱ májáanʼ, bi̱ nda̱a̱ rí gíʼdoo ga̱jma̱a̱ bi̱ nditháan tágu yugo. 3 Gíʼmaa muxnáá ndxajkun Eleazar ga̱jma̱a̱ ikhaa maríya̱a̱ʼ náa giáa̱nʼla mu muxíyáa náa inuu ikhaa. 4 Ikhú ndxajkun Eleazar marma̱jan a̱ʼdióo ñawúunʼ ga̱jma̱a̱ mbá chíʼgíiʼ* eʼdi ga̱jma̱a̱ maxtíjyooʼ mbá juwan nuthu xígií náa gíʼ riejuun guʼwá xtíin dí nagimbíi̱n. 5 Xedi̱ mbaʼyóoʼ mikhaa náa inuu ikhaa. Mbaʼyóoʼ mi̱kha xtóo, xuyuuʼ ga̱jma̱a̱ eʼdiuu ma̱ngaa ambóo. 6 Ndxajkun mbayá ixi̱ cedro, hisopo,* gúmá maña xngeʼdi, ga̱jma̱a̱ masnguáʼán mi̱kha náa xtáa rakhaa xedi̱. 7 Ikhú ndxajkun maʼjñáa xtíñuu ga̱jma̱a̱ muwan, nda̱wa̱á ma̱ndoo mata̱ʼa̱a̱ náa gíi̱nʼ, mú ndxajkun mani̱ndxu̱u̱ mitsagaa asndu gáʼkhíʼ.

8 Bi̱ nitsikháa xedi̱ mbaʼyóoʼ maʼjñáa xtíñuu ga̱jma̱a̱ muwan, mani̱ndxu̱u̱ mitsagaa asndu gáʼkhíʼ.

9 I̱mba̱a̱ xa̱bu̱ bi̱ mikaʼwii maguxi̱i̱ idiuuʼ xedi̱ ga̱jma̱a̱ magíʼ náa mbá mbaaʼ rí mikaʼwu ga̱jma̱a̱ xa̱bu̱ xuajin Israel muyejxi̱i̱ muni̱ májáánʼ ga̱jma̱a̱ iyaʼ dí majmaaʼ náa muni̱ kaʼwumijnáa. Nindxu̱u̱ mbá tsigijñaʼ ga̱jma̱a̱ numuu aʼkhá. 10 Xa̱bu̱ bi̱ gágujxi̱i̱ idiuuʼ xedi̱ gíʼmaa maʼjñáa xtíñuu ga̱jma̱a̱ muwan, mani̱ndxu̱u̱ mitsagaa asndu gáʼkhíʼ.

Rígi̱ nindxu̱u̱ mbá kiʼtáñajunʼ rí mbajyúuʼ asndu kámuu náa israelitas, ma̱ngaa náa xa̱bu̱ na̱ʼkha̱á bi̱ xtáa náa ikháanʼla. 11 Asndu tsáa bi̱ gáguguaa mbáa bi̱ nikháñuu, mani̱ndxu̱u̱ mitsagaa mbá juwan mbiʼi. 12 Ikhaa mbaʼyóoʼ maʼni kaʼwumina̱a̱ʼ ga̱jma̱a̱ iyaʼ índo̱ gáʼni ajtsú mbiʼi ga̱jma̱a̱ índo̱ gárámuuʼ juwan mbiʼi maʼni kaʼwi̱i̱. Á mu tséʼni kaʼwumina̱a̱ʼ dí ajtsú mbiʼi, xáguma kaʼwi̱i̱ índo̱ gáʼni juwan mbiʼi. 13 Asndu tsáa bi̱ gáguguaa mbáa bi̱ nikháñuu ga̱jma̱a̱ tséʼni kaʼwumina̱a̱ʼ xtáa raʼni tsagoo guʼwá xtíin ndrígóo Jeobá ga̱jma̱a̱ makhañúu náa Israel. Mani̱ndxu̱u̱ mitsagaa má xúʼko̱, numuu dí na̱nguá nixtijyááʼ ga̱jma̱a̱ iyaʼ rí nuni̱ kaʼwumijnáa ga̱jma̱a̱. Náa ikhaa rígá má xúʼko̱ dí mitsaga.

14 Rígi̱ nindxu̱u̱ xtángoo dí gíʼmaa maguma índo̱ mbáa xa̱bu̱ nakháñuu náa awúu̱n guʼwá xtíin: Asndu tsáa bi̱ gáto̱ʼo̱o̱ náa awúu̱n guʼwá xtíin o bi̱ kraʼaa má náa awúu̱n guʼwá xtíin, mani̱ndxu̱u̱ mitsagaa mbá juwan mbiʼi. 15 Xúgíʼ rí najmaaʼ dí kambaʼtoo rí na̱nguá kúgoo xa̱ʼ mani̱ndxu̱u̱ mitsaga. 16 Asndu tsáa bi̱ xtáa xanáá naguguaa mbáa bi̱ nikháñuu ga̱jma̱a̱ espada, itsu̱u̱ xa̱bu̱ o náa nidíi̱ mbáa xa̱bu̱, mani̱ndxu̱u̱ mitsagaa mbá juwan mbiʼi. 17 Mbaʼyóoʼ muríyaʼ mbá chíʼgíiʼ idiuuʼ tsigijñaʼ ga̱jma̱a̱ numuu aʼkhá dí nikha mu mu̱ni̱ kaʼwi̱i̱ ga̱jma̱a̱ xa̱bu̱ bi̱ mitsagaa, gugíwánʼla náa mbá rayaʼ, nda̱wa̱á muxíñaʼla iya mata. 18 Ikhú xa̱bu̱ bi̱ mikaʼwii náa inuu Dios mbayá hisopo ga̱jma̱a̱ marmajan náa iyaʼ, ma̱ngaa maxtíjyooʼ náa guʼwá xtíin ga̱jma̱a̱ xúgíʼ dí najmaaʼ ikhí ma̱ngaa xa̱bu̱ bi̱ kúwá ikhí. Ma̱ngaa maxtíjyáaʼ xa̱bu̱ bi̱ niguguaa bi̱ nikháñuu o itsu̱u̱ wajinʼ o náa nijuaʼdi̱i̱. 19 Xa̱bu̱ bi̱ mikaʼwii maxtíjyáaʼ ga̱jma̱a̱ iyaʼ bi̱ mitsagaa, índo̱ gáʼni ajtsú mbiʼi ga̱jma̱a̱ índo̱ gáʼni juwan mbiʼi, maʼni kaʼwi̱i̱ aʼkhúun índo̱ gáʼni juwan mbiʼi. Nda̱wa̱á bi̱ mitsagaa gíʼmaa maʼjñáa xtíñuu ga̱jma̱a̱ muwan, maʼni mikaʼwii índo̱ gáʼkhíʼ.

20 Á mu xa̱bu̱ bi̱ mitsagaa ga̱jma̱a̱ tséʼni kaʼwumina̱a̱ʼ, xa̱bu̱ buʼko̱ mbaʼyóoʼ makhañúu náa Israel, numuu dí niʼni tsagoo náa guʼwá xtíin rí mitsúʼkháan ndrígóo Jeobá. Nindxu̱u̱ mitsagaa numuu dí na̱nguá nixtijyaaʼ ga̱jma̱a̱ iyaʼ dí maʼni kaʼwi̱i̱.

21 Rígi̱ nindxu̱u̱ mbá kiʼtáñajunʼ rí mbajyúuʼ asndu kámuu náa ikhiin: Bi̱ gáxtíjyaaʼ ga̱jma̱a̱ iyaʼ dí naguma kaʼwi̱ín, mbaʼyóoʼ maʼjñáa xtíñuu, bi̱ gágugua iyaʼ dí naguma kaʼwi̱ín ga̱jma̱a̱ mani̱ndxu̱u̱ mitsagaa asndu gáʼkhíʼ. 22 Asndu ndiéjunʼ má dí gáxkajma xa̱bu̱ bi̱ mitsagaa mani̱ndxu̱u̱ mitsaga ga̱jma̱a̱ xa̱bu̱ bi̱ gáguguaa mani̱ndxu̱u̱ mitsagaa asndu gáʼkhíʼ›”.

20 Índo̱ niʼni timbá igu̱nʼ, xúgíinʼ xa̱bu̱ xuajin Israel niguánú náa ku̱ba̱ʼ mijxooʼ* ndrígóo Zin, xa̱bu̱ xuajin niguanún náa Cadés. Ikhí nikháñúu ga̱jma̱a̱ nijuiʼdi̱i̱ Míriam.

2 Ikhí nda̱a̱ iyaʼ muwa̱a̱n xa̱bu̱ xuajin ga̱jma̱a̱ ikhiin nigimbíin mu muxujximíjna̱ náa Moisés ga̱jma̱a̱ Aarón. 3 Xa̱bu̱ xuajin nigiʼdu̱u̱n gajmiún Moisés ga̱jma̱a̱ nitháán: “¡Itháan májánʼ gáʼni á mu nikáñuxu índo̱ nikháñún a̱ngiu̱xu̱ náa inuu Jeobá jnu rá! 4 Náá numuu rí niguwaʼ kudiin xa̱bu̱ xuajñuu Jeobá náa ku̱ba̱ʼ mijxooʼ rígi̱ rá. Mu ikháanʼ ga̱jma̱a̱ xujkiúxu̱ makañúxu gi̱i̱ ráʼ. 5 Náá numuu rí nirawáanʼxu náa Egipto, mu maguwaʼ kudáanʼxu̱ náa mbaaʼ xkawiʼ rígi̱ ráʼ. Gi̱i̱ rakáʼnii matadu, ni má nda̱a̱ higos ni má uva ni má granadas ni má nda̱a̱ iyaʼ muwánxu̱”. 6 Ikhú Moisés ga̱jma̱a̱ Aarón nitsíngúunʼ náa xa̱bu̱ xuajin, nigún náa riejuun guʼwá xtíin ga̱jma̱a̱ nismbati̱gu̱u̱n asndu mbayííʼ, ikhú agiuuʼ Jeobá dí naxpíbínʼ nigíʼdu̱u̱ nikujmaa náa ikhiin.

7 Ikhú Jeobá niʼthúu̱n Moisés: 8 “Ayá ragóti, ikháán ga̱jma̱a̱ʼ ndxájuaaʼ Aarón mbaʼyóoʼ mugímbiin xa̱bu̱ xuajin. Náa inún ikhiin gáratha̱a̱n itsí mu magajnúu iyaʼ, náa itsí gátríya̱ʼ iyaʼ mu maraxnu̱u̱n muwa̱a̱n xa̱bu̱ xuajin ga̱jma̱a̱ xu̱jkiu̱ún”.

9 Ikha jngóo Moisés niguajtuun ragóti náa inuu Jeobá, xó má ikhaa niʼtáñajuunʼ. 10 Ikhú Moisés ga̱jma̱a̱ Aarón nigimbíin xa̱bu̱ xuajin náa inuu itsí, Moisés niʼthúún: “¡Gudxawíín ikháanʼ bi̱ nuxiéʼkhá má xúʼko̱! Lá nandala dí ikháanʼxu̱ muríyaʼ iyaʼ náa itsí rígi̱ ráʼ.” 11 Ikhú nikujxi̱ ñawúunʼ rijma̱a̱ ga̱jma̱a̱ nixnúu a̱jma̱ nuthu itsí ga̱jma̱a̱ ragótiuu, ikhú nigíʼdu̱u̱ nigájnuu mba̱ji̱nʼ iyaʼ, xa̱bu̱ xuajin ga̱jma̱a̱ xu̱jkiu̱ún nigíʼdi̱i̱ niʼwa̱a̱n.

12 Nda̱wa̱á Jeobá niʼthúu̱n Moisés ga̱jma̱a̱ Aarón: “Numuu rí ikháanʼ na̱nguá nisngajmá fe náa ikhúún ga̱jma̱a̱ túxnu̱ʼ gamajkhu índo̱ nisngajmá rí nindxu̱ʼ mikaʼwún náa inún xa̱bu̱ xuajin Israel, ikháanʼ xáʼgua kudiin xa̱bu̱ xuajin bugi̱ náa ku̱ba̱ʼ rí ikhúún maxnu̱u̱”. 13 Rígi̱ nindxu̱u̱ iyaʼ ndrígóo Meribá,* náa israelitas nigiʼdu̱u̱n gajmiún Jeobá, mbiʼi rúʼko̱ ikhaa niʼni mba̱a̱ mbiʼyuu náa majñu̱únʼ ikhiin.

14 Nda̱wa̱á Moisés nikuʼmiin xa̱bu̱ bi̱ nigájnún náa Cadés mu magún kuñu̱u̱n ajngáa náa rey ndrígóo Edom mu muthán: “Rígi̱ dí nuthi a̱ngia̱a̱nʼ israelitas: ‹Ikháán má natayáá májánʼ xúgíʼ gaʼkhu dí ninújnguxu. 15 Anu̱xu̱* niguájtaan náa Egipto, nikúwáanʼxu náa Egipto mba̱yu̱u̱ʼ tsiguʼ, xa̱bu̱ egipcios nini̱ gínáanʼxu̱ xúʼko̱ má nini̱ ngíníi anu̱xu̱. 16 Nda̱wa̱á nitakáñííxu Jeobá rí mambáyuxuʼ, ikhaa nidxawunxu̱ ga̱jma̱a̱ nikuʼmaa mbáa ángel ndrígióo bi̱ niguwáanʼxu̱ náa Egipto. Dí xúgi̱ kuwáanʼxu̱ náa Cadés, mbá xuajin dí gíʼ náa ndawaa ndrígáaʼ. 17 Mbá péñu,* atatsíñáánʼ manújnguxu̱ náa ku̱ba̱a̱ʼ. Xánujnguxu̱ náa kiʼdu uva ni má xúwánxu̱ iyaʼ rí ka̱jnu̱ʼ náa nimbá puzu. Mbájmbu má gúʼguáxu̱ náa kambo̱o̱ rey asndu magujñáanʼxu̱ náa mbayaaʼ, xágajnuriyu̱xu̱ náa ñawún mújúnxu̱ ni má náa ñawún xti̱yu̱xu̱›”.

18 Mú Edom niʼthúu̱n: “Xándoo manújngaaʼ náa mbayuʼ. Á mu nanújngaaʼ maʼgá gáraʼnaaʼ ga̱jma̱a̱ espada”. 19 Israelitas nitháán: “I̱ndó muʼguáxu̱ náa kamba̱a̱ a̱pha̱, á mu ikháanʼxu̱ o xujkiúxu̱ gúwáan iyaaʼ, mu̱ni̱ numááxu̱ má. I̱ndó nanduxuʼ manújnguxu̱”. 20 Mú ikhaa niʼthúún: “Xánújngala gi̱i̱”. Ikhú Edom nigájnuu gáraʼnún gajmíi̱n mbaʼin xa̱bu̱ ga̱jma̱a̱ soldado bi̱ guáʼdáá tsiaki̱i̱. 21 Xúʼko̱ niʼni dí Edom tániñuuʼ manújngún xa̱bu̱ Israel náa mbayuuʼ. Ikha jngóo Israel nirájñu̱u̱nʼ náa ikhaa.

22 Xúgíinʼ israelitas nigájnún náa Cadés, niguánú náa kúbá Hor. 23 Ikhú Jeobá niʼthúu̱n Moisés ga̱jma̱a̱ Aarón náa kúbá Hor, náa kri̱ga̱ ndawaa ndrígóo Edom: 24 “Aarón maʼga̱a̱ gáyáa jxu̱u̱ʼ gajmíi̱n xa̱bu̱ xuajñuu.* Ikhaa xáto̱ʼo̱o̱ náa ku̱ba̱ʼ rí maxnu̱u̱n israelitas, numuu rí ajmáanʼ ikháanʼla túnimbala kiʼtáñajunʼ rí nixnala ga̱jma̱a̱ numuu iyaʼ ndrígóo Meribá. 25 Atatsimaaʼ náa kúbá Hor ga̱jma̱a̱ Aarón ma̱ngaa Eleazar bi̱ nindxu̱u̱ a̱ʼdióo. 26 Atríyáaʼ xtíñuu Aarón, atagíiʼ Eleazar bi̱ nindxu̱u̱ a̱ʼdióo, Aarón makhañúu ikhí”.

27 Ikha jngóo Moisés niʼni xó má Jeobá niʼtáñajuunʼ. Ikhiin nitsimún náa kúbá Hor náa inún xa̱bu̱ xuajin. 28 Ikhú Moisés niríyaaʼ xtíñuu Aarón ga̱jma̱a̱ nigúwáanʼ Eleazar bi̱ nindxu̱u̱ a̱ʼdióo. Nda̱wa̱á Aarón nikháñúu ikhí, náa inuu kúbá. Moisés ga̱jma̱a̱ Eleazar niguájtaán náa kúbá. 29 Índo̱ xúgíinʼ xa̱bu̱ xuajin ndiyáá dí Aarón nikháñúu, ikhú xúgíinʼ bi̱ kúwá náa goʼwóo Israel nimbi̱ya̱ʼ ga̱jma̱a̱ numuu Aarón mbá 30 mbiʼi.

21 Índo̱ rey cananeo ndrígóo Arad, bi̱ xtáa náa Négueb, niʼdxawun dí Israel ni̱jkha̱ xígií náa kamba̱a̱ dí na̱jkha̱ náa Atarim, ni̱jkha̱ gáxnúún xa̱bu̱ Israel ga̱jma̱a̱ ni̱jkha̱ kagui̱i̱n tikhuun dí ikhiin. 2 Ikhú Israel nikudaminaʼ maʼni náa inuu Jeobá, niʼthúu̱n: “Á mu naraxnájxi̱i̱n náa ñawúnʼ xa̱bu̱ xuajin bugi̱, ikhúún gajkhun dí ma̱ni̱ gámbíin mbá kayuuʼ”. 3 Jeobá niʼdxawun dí niʼthí Israel, ikha jngóo niʼni dí maʼngu̱u̱n muradíin, Israel niʼni gámbíin ikhiin ga̱jma̱a̱ xuajñún. Ikha jngóo Hormá* nixna mbiʼíí mbaaʼ rúʼko̱.

4 Nigájnún náa kúbá Hor ga̱jma̱a̱ nigún náa kamba̱a̱ dí na̱jkha̱ náa lamáa Maña̱ʼ* mu murtua̱ʼa̱ ku̱ba̱ʼ ndrígóo Edom. Mú xa̱bu̱ xuajin niʼni néʼngu̱u̱n numuu rí nagún má xúʼko̱. 5 Xa̱bu̱ xuajin nanújngurámúúnʼ má xúʼko̱ náa inuu Dios ga̱jma̱a̱ náa Moisés. Nuthi: “Náá numuu dí nirawáanʼxu̱ náa Egipto rá. Mu makañúxu náa ku̱ba̱ʼ mijxooʼ* rígi̱ ráʼ. Nda̱a̱ ganitsu ni má iyaʼ, ga̱jma̱a̱ nawi̱yuxu má eʼni ganitsu xkawiʼ rígi̱”. 6 Ikhú Jeobá nikuʼmiin a̱bu̱nʼ mbiiʼ náa xa̱bu̱ xuajin, a̱bu̱nʼ naʼphu̱u̱n xa̱bu̱ ga̱jma̱a̱ mbaʼin israelitas nikháñún.

7 Ikhú xa̱bu̱ xuajin nigún náa xtáa Moisés ga̱jma̱a̱ nitháán: “Nikiéʼkuxuʼ índo̱ mbaʼ ni̱tááxu̱ ga̱jma̱a̱ numuu Jeobá ma̱ngaa ga̱jma̱a̱ numaaʼ ikháán. Atanda̱ʼa̱a̱ Jeobá dí maʼni gámbíin a̱bu̱nʼ”. Moisés ninda̱ʼa̱ ga̱jma̱a̱ numún xa̱bu̱ xuajin. 8 Jeobá niʼthúu̱n Moisés: “Atani̱ mbá xtiʼkhuu a̱bu̱nʼ mbiiʼ ga̱jma̱a̱ atambráʼáa náa mbá ixi̱. Xa̱bu̱ bi̱ gíkhúu̱ a̱bu̱nʼ mbaʼyóoʼ mayejxu̱u̱ mu xúʼko̱ xákháñúu”. 9 Mbá nacha̱ má Moisés niʼnii mbáa a̱bu̱nʼ ga̱jma̱a̱ cobre, nimbráʼáa náa mbá ixi̱. Índo̱ mbáa xa̱bu̱ naʼkhu̱u̱ a̱bu̱nʼ, ikhaa nayejxu̱u̱ a̱bu̱nʼ bi̱ nigumaa ga̱jma̱a̱ cobre, ikhú naʼni̱i̱ a̱jkiu̱u̱n.

10 Nda̱wa̱á dí nirígá rígi̱, bi̱ israelitas nigún i̱mba̱ níʼkhá ga̱jma̱a̱ nigi̱ʼi̱i̱n náa Obot. 11 Nda̱wa̱á nigájnún náa Obot nigún gúgi̱ʼi̱i̱n náa Iyé-Abarim, náa ku̱ba̱ʼ mijxooʼ dí naguanúu xígií náa inuu Moab, náa nagájnuu a̱jkha̱ʼ.* 12 Nigájnún ikhí nigún gúgi̱ʼi̱i̱n náa mijngii mata* ndrígóo Zered. 13 Nigájnún ikhí ga̱jma̱a̱ nigún gúgi̱ʼi̱i̱n náa mbayuuʼ Arnón, dí rígá náa ku̱ba̱ʼ mijxooʼ dí na̱jkha̱ gátumuu náa mbañúúnʼ amorreos. Arnón nindxu̱u̱ náa na̱jkha̱ gátumuu mbayuuʼ Moab náa kri̱ga̱ ndawaa ndrígu̱ún amorreos. 14 Ikha jngóo náa Libro dí naʼthí xú kaʼnii Jeobá nixmínaʼ, naʼthí ga̱jma̱a̱ numuu “Vaheb, náa Sufá ga̱jma̱a̱ mata ndrígóo Arnón, 15 ma̱ngaa náa rawuunʼ mata dí nagajtaa asndu náa gíʼ Ar dí rígá náa ndawaa ndrígóo Moab”.

16 Nda̱wa̱á nigún náa Beer. Náa puzu rígi̱ nindxu̱u̱ náa Jeobá niʼthúu̱n Moisés: “Atagímbíin xa̱bu̱ xuajin mu maraxnu̱u̱n iyaʼ”.

17 Mbiʼi rúʼko̱, Israel niʼni ajmúú rígi̱:

“¡Puzu, araxnúʼ iyaʼ! ¡Ikháanʼla gu̱ni̱ ajmúú!

Nda̱wa̱á nigún náa ku̱ba̱ʼ mijxooʼ ndrígóo Mataná, 19 ikhú nigájnún náa Mataná nigún náa Nahaliel, nigájnún náa Nahaliel nigún náa Bamot. 20 Nda̱wa̱á dí Bamot nigún xígií náa mata dí rígá náa mbayuuʼ Moab, náa tsu̱du̱u̱ Pisgá, rí naguanúu xígií náa Jesimón.*

21 Ikhú Israel nikuʼmiin xa̱bu̱ magún kuñu̱u̱n ajngáa náa Sehón, rey ndrígu̱ún amorreos, niʼthúu̱n: 22 “Atatsíñuxu̱ manújnguxu̱ náa ku̱ba̱a̱ʼ. Xágájnuriyu̱xu̱ má náa kamba̱a̱ mu matu̱ʼu̱xu náa mbayaaʼ ni má náa kiʼdu uva. Xúwáanxu̱ iyaʼ dí ka̱jnu̱ʼ náa nimbá puzu. Mbájmbu má gúʼguaxu náa kambo̱o̱ rey asndu magujñáanʼxu̱ náa mbayaaʼ”. 23 Mú Sehón na̱nguá niniñuuʼ dí Israel manújngoo náa mbayuuʼ. Dí niʼni, Sehón nigímbíin xúgíinʼ soldado ndrígóo ga̱jma̱a̱ ni̱jkha̱ gáraʼnuu Israel náa ku̱ba̱ʼ mijxooʼ, ni̱jkha̱nú náa Jáhaz ikhí nigíʼdu̱u̱ nixmínaʼ ga̱jma̱a̱ Israel. 24 Israel niʼngo̱o̱ nixíyáa ga̱jma̱a̱ espada, nigruigú mbayuuʼ náa Arnón asndu náa Jaboc, mijngii náa kúwá ammonitas, numuu rí Jazer gíʼ náa ndawaa ndrígu̱ún ammonitas.

25 Ikhú Israel nigruigú xuajin rígi̱, nigíʼdi̱i̱ nikúwá ikhiin náa xúgíʼ xuajñún amorreos, náa Hesbón ga̱jma̱a̱ náa xúgíʼ xuajin dí rígá mijngii. 26 Numuu dí Hesbón nindxu̱u̱ xuajñuu Sehón, rey ndrígu̱ún amorreos, bi̱ nixmínaʼ ga̱jma̱a̱ rey ndrígóo Moab ma̱ngaa nigruigú káyúuʼ xúgíʼ ku̱bo̱o̱ʼ asndu náa Arnón. 27 Ga̱jma̱a̱ numuu rígi̱, niʼni dí muniraʼmáʼ mbá proverbio náa naʼthí ajngáa gatsíjma:

“Gaguwaʼ náa Hesbón.

Gu̱nila xuajñuu Sehón ga̱jma̱a̱ gawi̱ji̱ jxa̱ʼ rajkhúu.

28 Numuu dí nigájnuu mbá aguʼ náa Hesbón, mbá riʼyu̱u̱ aguʼ náa xuajñuu Sehón.

Nitsikháa xuajin Ar ndrígóo Moab, xúʼko̱, xa̱bu̱ ñajunʼ bi̱ kúwá náa kúbá mitsídánʼ ndrígóo Arnón.

29 ¡Gináálá ikháán Moab! ¡Maguma gámbáanʼ ikháán, xuajñuu Kemós!

Ikhaa naʼni dí jiámíi magajnún ragáñúún ga̱jma̱a̱ waʼxiinʼ maʼga kagui̱i̱n Sehón, rey ndrígu̱ún amorreos.

31 Xa̱bu̱ Israel nigíʼdi̱i̱ nikúwá náa ku̱bu̱únʼ amorreos. 32 Ikhú Moisés nikuʼmiin tikhuun xa̱bu̱ magún gúyama náa xuajin Jazer. Ikhiin nindrigú xuajin dí rígá mijngii ga̱jma̱a̱ nixkawíin amorreos bi̱ kúwá ikhí. 33 Nda̱wa̱á nigutangi̱ín ga̱jma̱a̱ nitsimún náa kamba̱a̱ dí na̱jkha̱ náa Basán. Ikhú Og, rey ndrígóo Basán, nigájnuu gajmíi̱n xúgíinʼ soldado ndrígóo mu maxmína̱ʼ gajmíi̱n náa Edréi. 34 Jeobá niʼthúu̱n Moisés: “Xámíñáaʼ gáʼni, numuu rí maxnajxíi náa ñawáanʼ, ikhaa gajmíi̱n xúgíinʼ soldado ndrígóo xúʼko̱ má mbayuuʼ ma̱ngaa. Matani̱i̱ ikháá má xó má nitani̱i̱ Sehón, rey ndrígu̱ún amorreos, bi̱ nixtáa náa Hesbón”. 35 Nixiyáa ikhaa gajmíi̱n e̱ji̱i̱n, ma̱ngaa xúgíinʼ soldado ndrígóo, nimbáa túniña̱a̱ʼ makríya̱a̱ʼ ma̱ngaa nindrigú mbayuuʼ.

22 Ikhú israelitas nigájnún ga̱jma̱a̱ nigún gúgi̱ʼi̱i̱n náa xkua̱ mijxooʼ* ndrígóo Moab, náa i̱mba̱ ridoo Jordán, inuu Jericó. 2 Balac a̱ʼdióo Zipor ndiʼyoo xúgíʼ dí Israel niʼñúún xa̱bu̱ amorreos. 3 Moab nimíñuu wéñuuʼ ga̱jma̱a̱ numuu xuajin rúʼko̱, numuu rí nindxu̱ún mbaʼin wéñuuʼ. Gajkhun, Moab nimíñuu wéñuuʼ kaʼñún israelitas. 4 Ikha jngóo Moab niʼthún bi̱ kuya̱ edxu̱u̱ náa Madián: “Xa̱bu̱ mbaʼin bugi̱, muni̱ gámbáa xúgíʼ dí rígá náa kuwáánʼlú, xó má mbáa xedi̱ bi̱ naʼni gámbóo xúgíʼ rajxa̱”.

Mbiʼi rúʼko̱ Balac a̱ʼdióo Zipor nindxu̱u̱ rey náa Moab. 5 Ikhaa nikuʼmiin xa̱bu̱ bi̱ magún kuñu̱u̱n ajngáa náa Balaam a̱ʼdióo Beor, bi̱ xtáa náa Petor, náa rawuunʼ mañu,* náa ikhaa xuajñuu. Nindxaʼóo ma̱ʼkha̱, niʼthúu̱n: “¡Natayáá ráʼ! Mbá xuajin dí nigájnuu náa Egipto. Ga̱jma̱a̱ niruguáá xúgíʼ ku̱ba̱ʼ ga̱jma̱a̱ dí xúgi̱ kúwíin náa mijngii mbayuʼ. 6 Ayi̱ gátañuʼ péñu mu marata̱ tsríguíi xuajin rígi̱, numuu dí ikhiin guáʼdáá itháan tsiaki̱i̱ ki xóo ikhúún. Mbáa xúʼko̱ maʼngo̱ʼ ma̱ni̱ gajmíʼ ga̱jma̱a̱ maxkawíin náa xuajin, numuu dí nda̱yo̱o̱ májánʼ dí bi̱ natani̱ tsajkurámaaʼ naguma tsajkurámaaʼ ga̱jma̱a̱ bi̱ naratá tsríguíi najuiʼthá tsríguíi”.

7 Ikha jngóo bi̱ kuya̱ edxu̱u̱ náa Moab ga̱jma̱a̱ bi̱ kuya̱ edxu̱u̱ náa Madián, nigún kudúún mbújkha̱a̱ mu muni̱ numáá rí majuiʼthá tsríguíin* israelitas. Nigún gúyáá Balaam ga̱jma̱a̱ nitháán dí niʼthí Balac. 8 Mú ikhaa niʼthún: “Ganújngala gi̱i̱ mu̱nuʼ mbruʼun rígi̱, ikhúún ma̱ta̱la asndu ndiéjunʼ má dí gáʼthúnʼ Jeobá”. Ikhú príncipes bi̱ kúwá náa Moab niguanún gajmiún Balaam.

9 Ikhú Dios niʼtámíjná ga̱jma̱a̱ Balaam ga̱jma̱a̱ niʼthúu̱n: “Tsíin nindxu̱ún xa̱bu̱ bi̱ xtáa gajmiáanʼ rá.” 10 Balaam niʼthúu̱n Dios bi̱ gajkhun: “Balac a̱ʼdióo Zipor, rey ndrígóo Moab, nikuʼma ajngáa rígi̱ náa naʼthúnʼ: 11 ‹Natayáá ráʼ. Xa̱bu̱ xuajin bi̱ nigájnún náa Egipto nuruguáá xúgíʼ ku̱ba̱ʼ. Ayi̱ gátañuʼ péñu mu marata̱ tsríguíin. Mbáa xúʼko̱ maʼngo̱ʼ ma̱ni̱ gajmíʼ ga̱jma̱a̱ maxkawíin náa xuajin›”. 12 Mú Dios niʼthúu̱n Balaam: “Xádxúʼ gajmiáanʼ. Xárata̱ tsríguíin xa̱bu̱ xuajin, numuu dí ikhiin niguma tsajkurámíinʼ má”.

13 Balaam nitu̱jxu̱u̱ miʼcha̱ ga̱jma̱a̱ niʼthún príncipes ndrígóo Balac: “Guʼgua̱a̱ʼ náa xuajñala, numuu rí Jeobá tséniñuʼ maʼgá ga̱jma̱a̱ nindxa̱la”. 14 Ikhú príncipes bi̱ kúwá náa Moab nigúun ga̱jma̱a̱ nitangiín gútháán Balac: “Balaam na̱nguá nindoo gáʼkha̱ ga̱jma̱a̱ nindxu̱xu̱”.

15 Ikhú, Balac nitanga̱a̱ nikuʼmiin mbu̱júu̱ príncipes, mú rí xúgi̱ itháan mbaʼin ga̱jma̱a̱ guáʼdáá itháan numún ki xóo bi̱ nigún ginii. 16 Ikhiin nigún náa xtáa Balaam ga̱jma̱a̱ nitháán: “Rígi̱ rí niʼthí Balac a̱ʼdióo Zipor: ‹Mbá péñu* xátatsiʼñánʼ rí nimbá marikhaaʼ mu mi̱dxa̱ʼ náa xtáá, 17 numuu rí maxna̱a̱ʼ mbaʼa dí gíʼdoo numuu ga̱jma̱a̱ maxna̱a̱ʼ asndu ndiéjunʼ má dí gátando̱ʼo̱ʼ. Ayi̱ gátañuʼ péñu mu marata̱ tsríguíin xa̱bu̱ xuajin bugi̱›”. 18 Ikhú Balaam niriʼñúún xa̱bi̱i̱ Balac: “Maski ajndu Balac maxnúʼ goʼwóo dí kajtíí plata ga̱jma̱a̱ oro, ikhúún xándoo ma̱ni̱ mbá rí chíʼgíiʼ* ni mbá rí mba̱a̱, á mu Jeobá Dios ndrígóʼ tséʼthúnʼ ma̱ni̱. 19 Mbá péñu ganújngala gi̱i̱ mu̱nuʼ mbruʼun rígi̱, mu xúʼko̱ ikhúún mba̱yo̱o̱ ndiéjunʼ itháan gáʼthúnʼ Jeobá”.

20 Ikhú Dios niʼtámíjná ga̱jma̱a̱ Balaam dí mbruʼun ga̱jma̱a̱ niʼthúu̱n: “Á mu xa̱bekha bugi̱, niguwáʼ gúñáanʼ, ayuʼ gajmiáanʼ. Mú i̱ndó ma̱ndoo marata̱ ajngáa dí ikhúún gátha̱a̱n”. 21 Ikha jngóo Balaam nitujxi̱i̱ miʼcha̱, nigrígu xíliu̱u̱ búrriu̱u̱* mu magriguii maʼga, ikhú ni̱jkha̱ gajmíi̱n príncipes bi̱ kúwá náa Moab.

22 Mú Dios nikiʼnáa numuu dí ikhaa na̱jkha̱, ángel ndrígióo Jeobá niwi̱ji̱ náa kamba̱a̱ mu marikhoo rí xáʼga. Balaam gríguii búrriu̱u̱ ejkha̱, ma̱ngaa na̱jkha̱ gajmíi̱nʼ a̱jmi̱i̱n bi̱ numbayíí. 23 Índo̱ búrru ndiʼyoo ángel ndrígióo Jeobá bi̱ wíji̱ náa kamba̱a̱, kayá mbá espada náa ñawúunʼ, búrru niʼniminaʼ magajnúu náa kamba̱a̱ ga̱jma̱a̱ mato̱ʼo̱o̱ náa xaná. Mú Balaam nigíʼdu̱u̱ nixnúu búrriu̱u̱ mu xúʼko̱ matanga̱a̱ náa kamba̱a̱. 24 Ikhú ángel ndrígióo Jeobá niwi̱ji̱ náa kamba̱a̱ smídú* náa kiʼdu uva, mámbá níjniúu tri̱ga̱ xtájtsí. 25 Índo̱ búrru ndiʼyoo ángel ndrígióo Jeobá, nigíʼdu̱u̱ ni̱jkha̱ asndu náa kuʼmuu xtájtsí ga̱jma̱a̱ nikujmbima rajkhúu Balaam náa xtájtsí, Balaam nigíʼdu̱u̱ nixnúu mbu̱júu̱.

26 Ángel ndrígióo Jeobá ni̱jkha̱ itháan inuu náa kamba̱a̱ rí itháan smídú náa nánguá kaʼnii magajnúriyo̱o̱ʼ. 27 Índo̱ búrru ndiʼyoo ángel ndrígióo Jeobá ikhú nibóoʼ, Balaam grígu má xúʼko̱ tsu̱du̱u̱, ikha jngóo Balaam nikiʼnáa wéñuuʼ ga̱jma̱a̱ nitanga̱a̱ nixnúu búrriu̱u̱ ga̱jma̱a̱ ragótiu̱u̱. 28 Ikhú Jeobá niʼni dí búrru maʼthí* ga̱jma̱a̱ ikhaa niʼthúu̱n Balaam: “Ndiéjunʼ lá niña̱a̱ʼ ikhúún mu maraxnu̱ʼ náa mbá ajtsú nuthu rígi̱ rá.” 29 Balaam niriʼñuu búrru: “Nitani̱ dí mani̱ndxu̱ʼ xó mbáa skágunʼ. ¡Á mu ka̱ya̱ mbá espada maxíña̱a̱n xúgi̱!”. 30 Búrru niʼthúu̱n Balaam: “Lá raʼkháa ikhúún nindxu̱ʼ búrru bi̱ nidruwan má xúʼko̱ xúgíʼ mbiʼi rí niraxtaa asndu mbiʼi xúgi̱ ráʼ. Lá niña̱a̱ʼ xúʼko̱ nákha ginii ráʼ.” Ikhaa niriʼñuu: “¡Na̱nguá!”. 31 Rí xúgi̱ Jeobá nirmbáʼtoo iduu Balaam, ikhú ndiʼyoo ángel ndrígióo Jeobá náa kamba̱a̱ ga̱jma̱a̱ kayá espada náa ñawúunʼ. Mbá nacha̱ nismbáti̱go̱o̱ asndu mbayííʼ.

32 Ikhú ángel ndrígióo Jeobá niʼthúu̱n: “Ndíjkha dí niraxnáá búrria̱a̱ʼ náa mbá ajtsú nuthu rígi̱ rá. Atayáá, ikhúún nigájnuʼ marikhaaʼ náa nadxu̱ʼ, numuu rí náa nadxu̱ʼ, maʼni rí manújngurámáaʼ náa rí ni̱tha̱a̱nʼ. 33 Búrru ndiʼyoo ga̱jma̱a̱ niʼniminaʼ matsíngumínaʼ náa mbá ajtsú nuthu rígi̱. ¡Á mú búrru táʼni rígi̱! Nixíña̱a̱n ga̱jma̱a̱ búrru xáxíyáa”. 34 Balaam niʼthúu̱n ángel ndrígióo Jeobá: “Nikiéʼkhun, na̱nguá ndi̱yo̱o̱ á mú ikháán xtiejún raraʼthunʼ náa kamba̱a̱. Á mu raʼkhí xtáá ra̱ni̱ matangu̱ún”. 35 Ikhú ángel ndrígióo Jeobá niʼthúu̱n Balaam: “Ayuʼ gajmiáanʼ xa̱bu̱ buʼko̱. Mú i̱ndó ma̱ndoo marata̱ ajngáa dí ikhúún gátha̱a̱n”. Ikha jngóo Balaam ni̱jkha̱ gajmíi̱nʼ má xúʼko̱ príncipes ndrígóo Balac.

36 Índo̱ Balac niʼdxawuun dí Balaam ni̱jkha̱nú, mbá nacha̱ ni̱ʼkha̱ gáraʼnuu náa xuajin ndrígóo Moab, dí gíʼ náa rawuunʼ Arnón, náa kri̱ga̱ ndawaa. 37 Balac niʼthúu̱n Balaam: “Lá na̱nguá nindxa̱ʼwa̱a̱ʼ mi̱dxa̱ʼ ráʼ. Náa numuu rí tídxáʼ náa xtáá rá. Lá naku̱ma̱a̱ʼ rí xáʼngo̱ʼ gáxna̱a̱ʼ xúgíʼ rí gíʼdoo numuu ráʼ.” 38 Balaam niʼthúu̱n Balac: “Xtáá má gi̱i̱. Mú tséyóo á mu ma̱ndoo matha̱a̱nʼ rí nandaaʼ. I̱ndó ma̱ndoo ma̱ta̱ ajngáa rí Dios gágídá’ náa rawunʼ”.

39 Ikha jngóo Balaam ni̱jkha̱ ga̱jma̱a̱ Balac, niguánú náa Quiryat-Huzot. 40 Balac nigudíin xedi̱ ga̱jma̱a̱ mugu̱, mbá chíʼgíiʼ nikuʼma náa Balaam ga̱jma̱a̱ náa príncipes bi̱ xtáa gajmíi̱nʼ ikhaa. 41 Miʼcha̱, Balac ni̱jkha̱ gáyáa Balaam ikhú nitsimuu ga̱jma̱a̱ náa Bamot-Baal, ikhí nakujmaa náa gíi̱nʼ xúgíinʼ xa̱bu̱ Israel.

23 Ikhú Balaam niʼthúu̱n Balac: “Atani̱ májáánʼ gi̱i̱ mbá juwan náa mikarámáʼ tsigijñaʼ ga̱jma̱a̱ atani̱ míjíinʼ mbá juwiin xedi̱ ga̱jma̱a̱ mbá juwiin mugu̱ e̱jmba̱a̱”. 2 Balac mbá nacha̱ má niʼni xóo niʼthúu̱n Balaam. Balac ga̱jma̱a̱ Balaam nixnajxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱ náa mámbá dí nakarámáʼ tsigijñaʼ. 3 Nda̱wa̱á, Balaam niʼthúu̱n Balac: “Aguanáaʼ gi̱i̱ náa niraxnáxi̱ tsigijñaʼ ndrígáaʼ ga̱jma̱a̱ ikhúún maʼgáaʼ. Mbáa Jeobá maʼtámíjná ga̱jma̱á nindxu̱ʼ. Asndu ndiéjunʼ má dí gáʼthúnʼ, matha̱a̱nʼ má”. Ikhaa ni̱jkha̱ náa mbá bíjní tsaʼtsaʼ.

4 Ikhú Dios niʼtámíjná ga̱jma̱a̱ Balaam, ga̱jma̱a̱ Balaam niʼthúu̱n: “Nigruíga̱ eniʼ mbá juwan náa mikarámáʼ tsigijñaʼ ga̱jma̱a̱ mbáa xedi̱ ma̱ngaa mbáa mugu̱ e̱jmba̱a̱ nixnajxíi náa mámbá dí ikhaa”. 5 Jeobá nigídáʼ ajngáa rí maʼthí náa rawuunʼ Balaam, niʼthúu̱n: “Atanga̱án náa xtáa Balac, rígi̱ gíʼmaa maratha̱a̱n”. 6 Ikhaa nitanga̱a̱ ga̱jma̱a̱ ndiʼyoo rí Balac gajmíi̱n xúgíinʼ príncipes bi̱ kúwá náa Moab ndri̱gi̱i̱n náa nijuixnájxi̱ tsigijñaʼ dí nakarámáʼ. 7 Ikhú niʼthúu̱n ajngóo Dios rígi̱:

‹Ayi̱ ga̱jma̱a̱ aratátsríguíi Jacob ga̱jma̱a̱ numuʼ.

Xúʼko̱, ayi̱ gáratha̱a̱n dí gágíʼnuu Israel›.

 8 Xú kaʼnii gátatsríguíi ikhúún bi̱ Dios na̱nguá niʼtátsríguíi rá.

Xú kaʼnii gándoo gáthu̱u̱n dí maguáʼníí ikhúún bi̱ Jeobá na̱nguá niʼthúún dí maguáʼníí rá.

11 Ikhú Balac niʼthúu̱n Balaam: “Dí nitani̱ rá. Ni̱ʼkhá ka̱ña̱a̱n mu marata tsríguíin xa̱bu̱ sia̱nʼ ndrígóʼ, i̱ndó rí natani̱ nindxu̱u̱ dí natani̱ tsajkurámíinʼ”. 12 Ikhaa niriʼñuu: “Lá raʼkháa i̱ndó ma̱ta̱ ajngáa dí Jeobá nigídáʼ náa rawunʼ ráʼ.”

13 Balac niʼthúu̱n: “Mbá péñu, ayi̱ ga̱jma̱á nindxu̱ʼ náa i̱mba̱ mbaaʼ náa ma̱ndoo matañu̱u̱n. Xáʼngo̱o̱ gátañu̱u̱n xúgíinʼ, káaʼ mbá nguáthi̱i̱n gátañu̱u̱n. Asndu ikhí gárata tsríguíin ga̱jma̱a̱ numuʼ”. 14 Ikha jngóo ni̱jkha̱ kayáa náa mbayuuʼ Zofim, náa tsu̱du̱u̱ Pisgá, ikhí niʼni mújúunʼ mbá juwan náa mikarámáʼ tsigijñaʼ náa mámbá nixnájxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱. 15 Balaam niʼthúu̱n Balac: “Aguanáaʼ gi̱i̱ náa niraxnáxi̱ tsigijñaʼ ndrígáaʼ, ikhúún maʼgá ñuʼún gátamíjná ga̱jmu̱ʼ”. 16 Jeobá niʼtámíjná ga̱jma̱a̱ Balaam, nigídáʼ ajngáa rígi̱ náa rawuunʼ, niʼthúu̱n: “Atanga̱án náa xtáa Balac ga̱jma̱a̱ aratháán rígi̱”. 17 Ikhaa ni̱jkha̱a̱ náa xtáa Balac ndiʼyoo rí wíji̱ náa nixnájxi̱ tsigijñaʼ ga̱jma̱a̱ ikhí má xtáa gajmíi̱n príncipes bi̱ kúwá náa Moab. Balac nirajxu̱u̱: “Ndiéjunʼ niʼtháanʼ Jeobá rá.” 18 Ikhú niʼthúu̱n ajngóo Dios rígi̱:

“Atujxa̱a̱ʼ Balac ga̱jma̱a̱ atadxawíín.

Atadxawunʼ a̱ʼdióo Zipor.

Índo̱ rígá mbá dí naʼthí maʼni, lá tséʼnimbánuu xáʼ.

Índo̱ ikhaa nakudaminaʼ mbá dí maʼni, lá tséʼnimbánuu xáʼ.

22 Dios xtáa raguwíin náa Egipto.

Ikhiin nduyáá rí ikhaa nindxu̱u̱ xóo chi̱jyu̱u̱ʼ xedi̱ xáná.

Dí xúgi̱ ma̱ndoo majuiʼthá ga̱jma̱a̱ numuu Jacob ma̱ngaa Israel:

‹¡Gu̱ya̱a̱ dí Dios niʼni!›.

25 Ikhú Balac niʼthúu̱n Balaam: “A mu tséjmáán gárata tsríguíin, xátani̱ tsajkurámiinʼ má ma̱ngaa”. 26 Balaam niriʼñuu Balac: “Lá na̱nguá ni̱tha̱a̱nʼ rí ma̱ni̱ xúgíʼ dí Jeobá gáʼthúnʼ ráʼ.”

27 Balac niʼthúu̱n Balaam: “Mbá péñu, atatsíñúnʼ maʼgá ka̱ña̱a̱n i̱mba̱ níʼkhá, mbáa májánʼ má gáʼyoo Dios bi̱ gajkhun dí marata̱ tsríguíin asndu ikhí ga̱jma̱a̱ numuʼ”. 28 Ikha jngóo Balac ni̱jkha̱ kayáa Balaam náa inuu Peor, náa naʼni inuu xígií náa Jesimón.* 29 Ikhú Balaam niʼthúu̱n Balac: “Atani̱ májáánʼ mbá juwan náa mikarámáʼ tsigijñaʼ ga̱jma̱a̱ atani̱ míjíinʼ mbá juwiin xedi̱ ga̱jma̱a̱ mbá juwiin mugu̱ e̱jmba̱a̱”. 30 Ikha jngóo Balac niʼni xó má Balaam niʼthúu̱n, ikha nixnájxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱ náa mámbá rí nakarámáʼ tsigijñaʼ.

24 Índo̱ Balaam ndiʼyoo rí Jeobá nanigu̱u̱ʼ* maʼni tsajkurámiinʼ xa̱bu̱ Israel, ikhaa na̱nguá ni̱jkha̱ gáyáʼ mbaʼyoo itháan dí ra̱májánʼ mugíʼnín xa̱bu̱ Israel, nitanga̱a̱ inuu xígií náa ku̱ba̱ʼ mijxooʼ. 2 Balaam nikujxi̱i̱ edxu̱u̱ ndiʼyoo rí xa̱bu̱ Israel gíi̱nʼ náa mámbá xuajin majkhaʼ. Ikhú espíritu ndrígóo Dios ni̱ʼkha̱ náa ikhaa. 3 Nda̱wa̱á ikhaa niʼthí ajngóo Dios rígi̱:*

10 Ikhú Balac nikiʼnáa kaʼyoo Balaam. Balac asndu naʼdu̱u̱ ñawúunʼ nikásngañu̱u̱ʼ ga̱jma̱a̱ niʼthúu̱n Balaam: “Nindxa̱ʼwa̱a̱ʼ mu marata̱ tsríguíin bi̱ sia̱nʼ gajmíʼ, i̱ndó rí natani̱ nindxu̱u̱ rí natani̱ tsajkurámiinʼ náa ajtsú nuthu rígi̱. 11 Nacha̱ atanga̱án náa guʼwáaʼ. Ikhúún nindoʼ maxna̱a̱ʼ mbaʼa rí gíʼdoo numuu, mú Jeobá nirikoo rí xátadrígú”.

12 Balaam niriʼñuu Balac: “Lá táthúu̱n xa̱bu̱ bi̱ nitaxúʼmiin ráʼ. 13 ‹Maski ajndu Balac maxnúʼ goʼwóo rí kajtíí plata ga̱jma̱a̱ oro, ikhúún xándoo ma̱ni̱ rí májánʼ ni má dí ra̱májánʼ xó má ikhúún eyoʼ á mu raʼkháa Jeobá gáʼtañajunʼ ma̱ni̱›. Lá na̱nguá ni̱tala rí ‹I̱ndó ma̱ta̱ dí Jeobá gáʼthúnʼ ráʼ.› 14 Rí xúgi̱ maʼgáaʼ xuajñunʼ. Mú ginii ayi̱, atatsíñúnʼ ma̱tha̱a̱nʼ rí xuajin rígi̱ maʼniuu xuajñaanʼ nda̱wa̱á”.* 15 Nda̱wa̱á ikhaa niʼthí ajngóo Dios rígi̱:

20 Índo̱ Balaam ndiʼyoo Amalec, niʼthí má xúʼko̱ ajngóo Dios rígi̱:

21 Índo̱ ikhaa ndiʼñún quenitas, niʼthí má xúʼko̱ ajngóo Dios rígi̱:

“Guʼwáaʼ wíji̱ jxa̱ʼ ga̱jma̱a̱ náa xtaa grígu náa inuu xpátsí.

22 Mú mbáa matsikáa Cayín.

Nguáthá lá mba̱yu̱u̱ʼ tígo̱o̱ mu Asiria maʼga kañáán guʼwá ejua̱a̱nʼ rá.”

23 Ga̱jma̱a̱ ikhaa niʼthí má xúʼko̱ ajngóo Dios rígi̱:

“¡Gínáaʼla! Tsáá lá gákríya̱a̱ʼ índo̱ Dios gáʼni rígi̱ rá.

Mú ikhaa ma̱ngaa maguma gámbáa mbá kayuuʼ”.

25 Ikhú Balaam nitu̱jxu̱u̱ ga̱jma̱a̱ ni̱jkha̱a̱ náa xuajñuu. Balac ma̱ngaa niguajthun kambo̱o̱ ni̱jkha̱a̱.

25 Índo̱ xa̱bu̱ Israel kúwá náa Sitim, xa̱bu̱ xuajin nigi̱ʼdi̱i̱ nibúúnʼ xkawiʼ kayuuʼ* gajmiún wa̱ʼxa̱ʼ* bi̱ kúwá náa Moab. 2 Gu̱ʼu̱ nundxa̱ʼwu̱u̱n xa̱bu̱ xuajin índo̱ nuxnajxi̱ tsigijñaʼ náa dios ndrígu̱ún ga̱jma̱a̱ xa̱bu̱ xuajin nigi̱ʼdi̱i̱ nipiʼtsu, ma̱ngaa nismbati̱gu̱u̱n náa inuu dios ndrígu̱ún ikhiin. 3 Xa̱bu̱ Israel nigi̱ʼdi̱i̱ ndiyamajkuíí Baal bi̱ nduyamajkuíí náa Peor, ikhú Jeobá nikiʼnáa kaʼñúún xa̱bu̱ Israel. 4 Jeobá niʼthúu̱n Moisés: “Atru̱gui̱i̱n xúgíinʼ bi̱ kuya̱ edxu̱u̱ náa xa̱bu̱ bugi̱ ga̱jma̱a̱ atajngríguíin náa iduu a̱jkha̱ʼ náa inuu Jeobá, mu xúʼko̱ Jeobá maniñuuʼ rakiʼnáa kaʼñúún xa̱bu̱ Israel”. 5 Ikhú Moisés niʼthún bi̱ nunimbáníí xkujndu náa Israel: “Mámbáa dí ikháanʼla gágudíin xa̱bi̱i̱ bi̱ ndiyamajkuíí Baal bi̱ nduyamajkuíí náa Peor”.

6 Índo̱ xtáa raʼthí, kri̱ga̱ ra̱jkha̱ mbáa israelita ga̱jma̱a̱ mbáa a̱ʼgú madianita najkha̱a̱ kayáa náa kúwá a̱ngui̱i̱n, nirígá rígi̱ náa inuu Moisés ga̱jma̱a̱ náa inún xúgíinʼ xa̱bu̱ xuajin Israel índo̱ ikhiin kúwá rumbi̱ya̱ʼ náa riejuun guʼwá xtíin rí nagimbíi̱n. 7 Índo̱ ndiʼyoo Finehás, a̱ʼdióo Eleazar, a̱ʼdióo ndxajkun Aarón, mbá nacha̱ nitu̱jxu̱u̱ náa majñu̱únʼ xa̱bu̱ xuajin ga̱jma̱a̱ ni̱jkha̱ gáyá mbá kudú.* 8 Nda̱wa̱á nito̱ʼo̱o̱ náa guʼwá xtíin ndrígóo israelita ga̱jma̱a̱ nitsraʼa jngañii mbá nájmi̱i̱n náa tsáʼkhún, xó má israelita ga̱jma̱a̱ a̱ʼgu̱. Núkhú má niwi̱ji̱i̱ nandii rí xtáa ragudíin israelitas. 9 Bi̱ nikháñún ga̱jma̱a̱ nandii ninindxu̱ún 24,000.

10 Ikhú Jeobá niʼthúu̱n Moisés: 11 “Finehás, a̱ʼdióo Eleazar, a̱ʼdióo ndxajkun Aarón, niʼni rí ni xákiʼnún ka̱ñu̱u̱n xa̱bu̱ xuajin Israel, numuu rí ikhaa tániñuuʼ mbuyamajkún eʼwíinʼ dios á mu raʼkháa ikhúún. Ikhaa numuu rúʼko̱ dí táni̱ gámbíin israelitas índo̱ nindoʼ magruígú gamajkhu i̱ndó ikhúún. 12 Aratháán rí nambánuʼ maxtáá ga̱jmu̱ʼ tsímáá. 13 Nambánuʼ ga̱jmu̱ʼ ikhaa gajmíi̱n e̱ji̱i̱n rí mani̱ndxu̱ún ndxajkun asndu kámuu, numuu rí ikhaa tániñuuʼ mbiʼyamajkuíí i̱mba̱a̱ dios á mu raʼkháa Dios ndrígóo, xúʼko̱ niʼni rí majngudi̱i̱ aʼkhúún xa̱bu̱ Israel”.

14 Israelita bi̱ nixiyáa ga̱jma̱a̱ a̱ʼgú madianita, mbiʼyuu Zimrí a̱ʼdióo Salu, mbáa bi̱ kayá edxu̱u̱ náa goʼwóo anu̱ún simeonitas. 15 A̱ʼgú madianita bi̱ nixiyáa, mbiʼyuu Cozbí wáxióo* Zur, ikhaa kayá edxu̱u̱ náa mbá xuajin chíʼgíiʼ* ndrígóo Madián.

16 Nda̱wa̱á, Jeobá niʼthúu̱n Moisés: 17 “Aʼgua gúxmíjná gajmiála madianitas ga̱jma̱a̱ gu̱ni̱ gámbíin, 18 numuu rí ikhiin nini̱ rí maʼga̱nú gamiéjunʼ náa inala índo̱ nini̱ rájáanʼla muxuʼdámíjná aʼkhá náa Peor ga̱jma̱a̱ numuu Cozbí, wáxióo bi̱ kayá edxu̱u̱ náa Madián, bi̱ nixiyáa mbiʼi dí nirígá nandii ga̱jma̱a̱ numuu Peor”.

26 Nda̱wa̱á dí nirígá nandii, Jeobá niʼthúu̱n Moisés ga̱jma̱a̱ Eleazar a̱ʼdióo ndxajkun Aarón: 2 “Gu̱nila mbá censo náa xúgíinʼ xa̱bu̱ xuajin Israel, náa xúgíinʼ bi̱ guáʼdáá 20 tsigúúnʼ o itháan, xó má bi̱ kúwá náa goʼwóo anu̱ún. Guraxniila xúgíinʼ bi̱ ma̱ndoo mani̱ndxu̱ún soldado náa Israel”. 3 Ikha jngóo Moisés ga̱jma̱a̱ ndxajkun Eleazar nithúún xa̱bu̱ xuajin náa xkua̱ mijxooʼ* ndrígóo Moab, náa mijngii Jordán, inuu Jericó. Nithúún: 4 “Gu̱nila mbá censo náa xúgíinʼ bi̱ guáʼdáá 20 tsigúúnʼ o itháan, xó má Jeobá niʼtáñajuunʼ Moisés”.

Bugi̱ ninindxu̱ún e̱ji̱i̱n Israel bi̱ nigájnún náa ku̱ba̱ʼ ndrígóo Egipto. 5 Rubén, a̱ʼdá giʼniuu Israel, bugi̱ ninindxu̱ún e̱ji̱i̱n Rubén: Hanok, náa niguwáʼ bi̱ nigumbiʼñún hanokitas, Palú, náa niguwáʼ bi̱ nigumbiʼñún paluitas, 6 Hezrón, náa niguwáʼ bi̱ nigumbiʼñún hezronitas, Carmí náa niguwáʼ bi̱ nigumbiʼñún carmitas. 7 Buʼko̱ ninindxu̱ún rubenitas, mbá xúgíinʼ bi̱ nigumaraʼmáʼ mbiʼñún ninindxu̱ún mbá 43,730.

8 A̱ʼdióo Palú ninindxu̱u̱ Eliab. 9 E̱ji̱i̱n Eliab ninindxu̱ún Nemuel, Datán ga̱jma̱a̱ Abiram. Datán ga̱jma̱a̱ Abiram bugi̱ ninindxu̱ún bi̱ xa̱bu̱ xuajin niraʼwi̱i̱n bi̱ nixuxi̱míjna̱ náa inuu Moisés ga̱jma̱a̱ Aarón gajmiún xa̱bu̱ bi̱ ndi̱wi̱i̱n gajmiún Coré índo̱ nixuxi̱míjna̱ náa inuu Jeobá.

10 Ikhú ku̱ba̱ʼ nimbáʼtoo rawuunʼ ga̱jma̱a̱ niʼkhu̱ rajngiún. Coré nikháñúu gajmíi̱n bi̱ numbayíí índo̱ nigajtaa mbá aguʼ nitsikiin mbá 250 xa̱bekha. Ikhiin niguánú ninindxu̱ún mbá xkri̱da dí naʼtámúʼún eʼwíinʼ. 11 Mú tákháñún e̱ji̱i̱n Coré.

12 Bugi̱ ninindxu̱ún e̱ji̱i̱n Simeón xó má bi̱ naguwáʼ náa guʼwún: Nemuel, náa niguwáʼ bi̱ nigumbiʼñún nemuelitas, Jamín, náa niguwáʼ bi̱ nigumbiʼñún jaminitas, Jakín, náa niguwáʼ bi̱ nigumbiʼñún jakinitas, 13 Zérah, náa niguwáʼ bi̱ nigumbiʼñún zerahítas, ga̱jma̱a̱ Shaúl, náa niguwáʼ bi̱ nigumbiʼñún shaulitas. 14 Buʼko̱ ninindxu̱ún simeonitas. Nikúwá mbá 22,200.

15 Bugi̱ ninindxu̱ún e̱ji̱i̱n Gad xó má bi̱ naguwáʼ náa guʼwún: Zefón, náa niguwáʼ bi̱ nigumbiʼñún zefonitas, Haguí, náa niguwáʼ bi̱ nigumbiʼñún haguitas, Suní, náa niguwáʼ bi̱ nigumbiʼñún sunitas, 16 Ozní, náa niguwáʼ bi̱ nigumbiʼñún oznitas, Erí, náa niguwáʼ bi̱ nigumbiʼñún eritas, 17 Arod, náa niguwáʼ bi̱ nigumbiʼñún aroditas, ga̱jma̱a̱ Arelí, náa niguwáʼ bi̱ nigumbiʼñún arelitas. 18 Buʼko̱ ninindxu̱ún e̱ji̱i̱n Gad xó má bi̱ naguwáʼ náa guʼwún, mbá xúgíinʼ bi̱ nigumaraʼmáʼ mbiʼñún ninindxu̱ún mbá 40,500.

19 E̱ji̱i̱n Judá ninindxu̱u̱ Er ga̱jma̱a̱ Onán. Mú, Er ga̱jma̱a̱ Onán nikháñún náa ku̱ba̱ʼ ndrígóo Canaán. 20 Bugi̱ ninindxu̱ún e̱ji̱i̱n Judá xó má bi̱ kúwá náa guʼwún: Selá, náa niguwáʼ bi̱ nigumbiʼñún selanitas, Pérez, náa niguwáʼ bi̱ nigumbiʼñún perezitas, ga̱jma̱a̱ Zérah, náa niguwáʼ bi̱ nigumbiʼñún zerahítas. 21 Bugi̱ ninindxu̱ún e̱ji̱i̱n Pérez: Hezrón, náa niguwáʼ bi̱ nigumbiʼñún hezronitas ga̱jma̱a̱ Hamul, náa niguwáʼ bi̱ nigumbiʼñún hamulitas. 22 Buʼko̱ ninindxu̱ún bi̱ naguwáʼ náa goʼwóo Judá, mbá xúgíinʼ bi̱ nigumaraʼmáʼ mbiʼñún ninindxu̱ún mbá 76,500.

23 Bugi̱ ninindxu̱ún e̱ji̱i̱n Isacar xó má bi̱ naguwáʼ náa guʼwún: Tolá, náa niguwáʼ bi̱ nigumbiʼñún tolaítas, Puvá, náa niguwáʼ bi̱ nigumbiʼñún punitas, 24 Jasub, náa niguwáʼ bi̱ nigumbiʼñún jasubitas, ga̱jma̱a̱ Simrón, náa niguwáʼ bi̱ nigumbiʼñún simronitas. 25 Buʼko̱ ninindxu̱ún bi̱ naguwáʼ náa goʼwóo Isacar, mbá xúgíinʼ bi̱ nigumaraʼmáʼ mbiʼñún ninindxu̱ún mbá 64,300.

26 Bugi̱ ninindxu̱ún e̱ji̱i̱n Zabulón xó má bi̱ naguwáʼ náa guʼwún: Séred, náa niguwáʼ bi̱ nigumbiʼñún sereditas, Elón, náa niguwáʼ bi̱ nigumbiʼñún elonitas, ga̱jma̱a̱ Jahleel, náa niguwáʼ bi̱ nigumbiʼñún jahleelitas. 27 Buʼko̱ ninindxu̱ún zabulonitas, mbá xúgíinʼ bi̱ nigumaraʼmáʼ mbiʼñún ninindxu̱ún mbá 60,500.

28 E̱ji̱i̱n José xó má bi̱ naguwáʼ náa goʼwóo ninindxu̱u̱ Manasés ga̱jma̱a̱ Efraín. 29 Bugi̱ ninindxu̱ún e̱ji̱i̱n Manasés: Makir, náa niguwáʼ bi̱ nigumbiʼñún makiritas, Makir ninindxu̱u̱ anu̱u̱* Galaad, náa Galaad niguwáʼ bi̱ nigumbiʼñún galaaditas. 30 Bugi̱ ninindxu̱ún e̱ji̱i̱n Galaad: Yézer, náa niguwáʼ bi̱ nigumbiʼñún yezeritas, Hélec, náa niguwáʼ bi̱ nigumbiʼñún helequitas, 31 Asriel, náa niguwáʼ bi̱ nigumbiʼñún asrielitas, Siquem, náa niguwáʼ bi̱ nigumbiʼñún siquemitas, 32 Semidá, náa niguwáʼ bi̱ nigumbiʼñún semidaítas, ga̱jma̱a̱ Héfer, náa niguwáʼ bi̱ nigumbiʼñún heferitas. 33 Zelofehad a̱ʼdióo Héfer na̱nguá nigiʼdiin jiámá, i̱ndó wa̱ʼxa̱ʼ,* xígi̱ kaʼnii mbiʼñún waʼxeeʼ Zelofehad: Mahlá, Noá, Hoglá, Milcá ga̱jma̱a̱ Tirzá. 34 Buʼko̱ ninindxu̱ún e̱ji̱i̱n Manasés, mbá xúgíinʼ bi̱ nigumaraʼmáʼ mbiʼñún ninindxu̱ún mbá 52,700.

35 Bugi̱ ninindxu̱ún e̱ji̱i̱n Efraín xó má bi̱ naguwáʼ náa guʼwún: Sutélah, náa niguwáʼ bi̱ nigumbiʼñún sutelahítas, Béker, náa niguwáʼ bi̱ nigumbiʼñún bekeritas, ga̱jma̱a̱ Tahán, náa niguwáʼ bi̱ nigumbiʼñún tahanitas. 36 Bugi̱ ninindxu̱ún e̱ji̱i̱n Sutélah: Erán, náa niguwáʼ bi̱ nigumbiʼñún eranitas. 37 Buʼko̱ ninindxu̱ún e̱ji̱i̱n Efraín, mbá xúgíinʼ bi̱ nigumaraʼmáʼ mbiʼñún ninindxu̱ún mbá 32,500. Bugi̱ ninindxu̱ún e̱ji̱i̱n José xó má bi̱ naguwáʼ náa guʼwún.

38 Bugi̱ ninindxu̱ún e̱ji̱i̱n Benjamín xó má bi̱ naguwáʼ náa guʼwún: Bela, náa niguwáʼ bi̱ nigumbiʼñún belaítas, Asbel, náa niguwáʼ bi̱ nigumbiʼñún asbelitas, Ahiram, náa niguwáʼ bi̱ nigumbiʼñún ahiramitas, 39 Sefufam, náa niguwáʼ bi̱ nigumbiʼñún sufamitas, ga̱jma̱a̱ Hufam, náa niguwáʼ bi̱ nigumbiʼñún hufamitas. 40 E̱ji̱i̱n Bela ninindxu̱ún Ard ga̱jma̱a̱ Naamán: Ard, náa niguwáʼ bi̱ nigumbiʼñún arditas ga̱jma̱a̱ Naamán, náa niguwáʼ bi̱ nigumbiʼñún naamitas. 41 Bugi̱ ninindxu̱ún e̱ji̱i̱n Benjamín xó má bi̱ naguwáʼ náa guʼwún, mbá xúgíinʼ bi̱ nigumaraʼmáʼ mbiʼñún ninindxu̱ún mbá 45,600.

42 Bugi̱ ninindxu̱ún e̱ji̱i̱n Dan xó má bi̱ naguwáʼ náa guʼwún: Suham, náa niguwáʼ bi̱ nigumbiʼñún suhamitas. Buʼko̱ ninindxu̱ún e̱ji̱i̱n Dan xó má bi̱ niguwáʼ náa guʼwún. 43 Mbá xúgíinʼ bi̱ nigumaraʼmáʼ mbiʼñún bi̱ nindxu̱ún suhamitas ninindxu̱ún mbá 64,400.

44 Bugi̱ ninindxu̱ún e̱ji̱i̱n Aser xó má bi̱ naguwáʼ náa guʼwún: Imná, náa niguwáʼ bi̱ nigumbiʼñún imnitas, Isví, náa niguwáʼ bi̱ nigumbiʼñún isvitas, ga̱jma̱a̱ Berías, náa niguwáʼ bi̱ nigumbiʼñún beritas, 45 e̱ji̱i̱n Berías, ninindxu̱u̱ Héber, náa niguwáʼ bi̱ nigumbiʼñún heberitas ga̱jma̱a̱ Malkiel, náa niguwáʼ bi̱ nigumbiʼñún malkielitas. 46 Aser nigiʼdaa mbáa wáxá* bi̱ nigumbiʼyuu Sérah. 47 Buʼko̱ ninindxu̱ún e̱ji̱i̱n Aser ga̱jma̱a̱ bi̱ niguwáʼ náa guʼwún, mbá xúgíinʼ bi̱ nigumaraʼmáʼ mbiʼñún ninindxu̱ún mbá 53,400.

48 Bugi̱ ninindxu̱ún e̱ji̱i̱n Neftalí xó má bi̱ naguwáʼ náa guʼwún: Jahzeel, náa niguwáʼ bi̱ nigumbiʼñún jahzeelitas, Guní, náa niguwáʼ bi̱ nigumbiʼñún gunitas, 49 Jézer, náa niguwáʼ bi̱ nigumbiʼñún jezeritas, ga̱jma̱a̱ Silem, náa niguwáʼ bi̱ nigumbiʼñún silemitas. 50 Buʼko̱ ninindxu̱ún e̱ji̱i̱n Neftalí xó má bi̱ naguwáʼ náa guʼwún, mbá xúgíinʼ bi̱ nigumaraʼmáʼ mbiʼñún ninindxu̱ún mbá 45,400.

51 Mbá xúgíinʼ israelitas bi̱ nigumaraʼmáʼ mbiʼñún ninindxu̱ún mbá 601,730.

52 Nda̱wa̱á dí nirígá rígi̱, Jeobá niʼthúu̱n Moisés: 53 “Ku̱ba̱ʼ mbaʼyóoʼ mawiʼtáa muda̱a̱ xó má kiʼniraʼmáʼ mbiʼñún.* 54 Mbaʼyóoʼ maraxnu̱u̱n itháan mba̱a̱ ku̱ba̱ʼ bi̱ itháan mbaʼin, mú matrígúu maʼni itháan chíʼgíiʼ* dí makánún bi̱ itháan nguéjmi̱i̱n. Ku̱ba̱ʼ dí makánún mbaʼyóoʼ mani̱ndxu̱u̱ xó má mbaʼin kiʼniraʼmáʼ mbiʼñún. 55 Mbaʼyóoʼ muri̱ya̱ʼ suerte* mu mbuyáá xóo gáwiʼtáa ku̱ba̱ʼ. Ikhiin muda̱a̱ ku̱ba̱ʼ xó má mbiʼyuu xuajin chíʼgíiʼ* ndrígóo anu̱ún. 56 Xó má gágájnuu náa suerte xúʼko̱ má gáʼyóoʼ mawiʼtáa ku̱ba̱ʼ náa bi̱ mbaʼin, xúʼko̱ má náa bi̱ mbá guéjmi̱i̱n”.

57 Bugi̱ ninindxu̱ún levitas bi̱ nigumaraʼmáʼ mbiʼñún xó má bi̱ naguwáʼ náa guʼwún: Guersón, náa niguwáʼ bi̱ nigumbiʼñún guersonitas, Cohat, náa niguwáʼ bi̱ nigumbiʼñún cohatitas, ga̱jma̱a̱ Merarí, náa niguwáʼ bi̱ nigumbiʼñún meraritas. 58 Bugi̱ ninindxu̱ún levitas: Bi̱ niguwáʼ náa libnitas, bi̱ niguwáʼ náa hebronitas, bi̱ niguwáʼ náa mahlitas, bi̱ niguwáʼ náa musitas ga̱jma̱a̱ bi̱ niguwáʼ náa coreítas.

Cohat ninindxu̱u̱ anu̱u̱ Amram. 59 A̱ʼgiu̱u̱ Amram nigumbiʼyuu Jokébed, a̱ʼdióo Leví bi̱ nigiʼdaa ga̱jma̱a̱ a̱ʼgiu̱u̱ náa Egipto. Jokébed ga̱jma̱a̱ Amram nigiʼdaa Aarón, Moisés ga̱jma̱a̱ Míriam bi̱ nindxu̱u̱ ndxájúún. 60 Aarón ninindxu̱u̱ anu̱u̱ Nadab, Abihú, Eleazar ga̱jma̱a̱ Itamar. 61 Mú Nadab ga̱jma̱a̱ Abihú nikháñún índo̱ nixnajxi̱ aguʼ dí rakáʼñún náa Jeobá.

62 Mbá xúgíinʼ bi̱ nigumaraʼmáʼ mbiʼñún ninindxu̱ún mbá 23,000, mbá xúgíinʼ jiámá bi̱ guáʼdáá mbá igiu̱únʼ o itháan. Ikhiin na̱nguá nigumaraʼmáʼ mbiʼñún mbóó gajmiún eʼwíinʼ israelitas, numuu rí ikhiin nda̱a̱ dí kaʼñún muda̱a̱ náa israelitas.

63 Bugi̱ ninindxu̱ún israelitas bi̱ Moisés ga̱jma̱a̱ ndxajkun Eleazar niniraʼmáʼ mbiʼñún náa censo dí nini̱ náa xkua̱ mijxooʼ ndrígóo Moab, náa mijngii Jordán, inuu Jericó. 64 Mú ikhí nda̱a̱ mbiʼñún bi̱ Moisés ga̱jma̱a̱ ndxajkun Aarón niniraʼmáʼ mbiʼñún náa censo dí niguma náa ku̱ba̱ʼ mijxooʼ ndrígóo Sinaí. 65 Numuu dí Jeobá niʼthí rígi̱ ga̱jma̱a̱ numún ikhiin: “Gajkhun dí makhañún náa ku̱ba̱ʼ mijxooʼ”. Ikha jngóo nimbáa xa̱bu̱ buʼko̱ nánguá niguanúu, i̱ndó Caleb a̱ʼdióo Jefuné ga̱jma̱a̱ Josué a̱ʼdióo Nun.

27 Ikhú nigún kanuu waʼxiinʼ Zelofehad, a̱ʼdióo Héfer, a̱ʼdióo Galaad, a̱ʼdióo Makir, a̱ʼdióo Manasés, bi̱ naguwáʼ náa goʼwóo Manasés a̱ʼdióo José. Mbiʼñún waʼxiinʼ nindxu̱u̱ Mahlá, Noá, Hoglá, Milcá ga̱jma̱a̱ Tirzá. 2 Ikhiin nigún náa inuu Moisés, náa ndxajkun Eleazar, náa bi̱ kuya̱ edxu̱u̱ ga̱jma̱a̱ náa xúgíinʼ xa̱bu̱ xuajin náa riejuun guʼwá xtíin dí nagimbíi̱n ga̱jma̱a̱ nithi: 3 “Anu̱xu̱* nikháñúu náa ku̱ba̱ʼ mijxooʼ,* mú na̱nguá nixtáa gajmíi̱nʼ xa̱bu̱ bi̱ nixujximíjna̱ náa inuu Jeobá, bi̱ nimbayíí Coré. Ikhaa nikháñúu ga̱jma̱a̱ numuu aʼkhúun na̱nguá nigiʼdiin e̱ji̱i̱n jiámá. 4 Náá numuu rí majngudi̱i̱ mbiʼyuu anu̱xu̱ náa bi̱ kaʼñúún i̱ndó ga̱jma̱a̱ numuu dí na̱nguá nigiʼdaa mbáa dxámá rá. Araxnúxu̱ mbá chíʼgíiʼ* mbaaʼ dí kaʼñúún a̱ngui̱i̱n anu̱xu̱”. 5 Ikha jngóo Moisés nirajxu̱u̱ Jeobá ga̱jma̱a̱ numún ikhiin.

6 Ikhú Jeobá niʼthúu̱n rígi̱ Moisés: 7 “Gajkhun rí nuthi waʼxiinʼ Zelofehad. Náa ku̱ba̱ʼ rí kaʼñúún mudrigúu a̱ngui̱i̱n anu̱ún araxnún mbá chíʼgíiʼ dí kaʼyoo magruigúu anu̱ún. 8 Arathún israelitas: ‹Á mu mbáa xa̱biya̱ nakháñuu ga̱jma̱a̱ na̱nguá nigiʼdaa mbáa a̱ʼdióo dxámá, ikháanʼ gíʼmaa muxna̱a̱ wáxióo* rí kaʼyoo magruigúu. 9 Á mu na̱nguá gíʼdiin waʼxiinʼ, dí kaʼyoo magruigúu mbaʼyóoʼ muxnúún a̱ngui̱i̱n. 10 Á mu na̱nguá gíʼdiin a̱ngui̱i̱n mbaʼyóoʼ muxnúún a̱ngui̱i̱n anu̱u̱. 11 Á mu na̱nguá gíʼdiin a̱ngui̱i̱n anu̱u̱, rí kaʼyoo magruigúu mbaʼyóoʼ muxna̱a̱ bi̱ mijngii kaʼyoo, ikhaa gáguanúu ga̱jma̱a̱. Rígi̱ mani̱ndxu̱u̱ xtángoo rí mbaʼyóoʼ maguma mbáníí náa israelitas, xó má Jeobá niʼtáñajuunʼ Moisés›”.

12 Nda̱wa̱á Jeobá niʼthúu̱n Moisés: “Atatsimaaʼ náa kúbá Abarim atayáá ku̱ba̱ʼ rí israelitas maxnu̱u̱n. 13 Índo̱ gámbáaʼ ratayáá, midxu̱u̱ʼ gíyáa jxa̱a̱ʼ gajmiáanʼ xa̱bu̱ xuajñaanʼ,* xó má ndxájuaaʼ Aarón, 14 numuu rí índo̱ xa̱bu̱ xuajin nigi̱ʼdu̱u̱n ga̱jma̱á nindxu̱ʼ náa ku̱ba̱ʼ mijxooʼ ndrígóo Zin, ikháanʼ ninújngaramála kiʼtáñajunʼ rí ni̱xna̱la rí muni̱ mba̱a̱ mbiʼyuʼ. Rígi̱ nindxu̱u̱ iyaʼ Meribá náa Cadés, náa ku̱ba̱ʼ mijxooʼ ndrígóo Zin”.

15 Ikhú Moisés niʼthúu̱n Jeobá: 16 “Jeobá, ikháán nindxa̱a̱ʼ Dios bi̱ naxnún xi̱ʼ xúgíinʼ xa̱bu̱,* atagíiʼ mbáa xa̱bu̱ bi̱ mañewu̱u̱n xa̱bu̱ xuajñaanʼ, 17 bi̱ mayéʼga edxu̱u̱ náa xúgíʼ dí gárígá, bi̱ maxná ikha náa xúgíʼ dí gúni, mu xúʼko̱ xa̱bu̱ xuajñuu Jeobá xáwanúún xóo mugu̱ bi̱ ndawa̱a̱ baxtúu ndrígu̱ún”. 18 Ikha jngóo Jeobá niʼthúu̱n Moisés: “Aratháán Josué a̱ʼdióo Nun, mbáa xa̱bu̱ bi̱ majmaa maʼni* ga̱jma̱a̱ atagrígu ñawáanʼ náa edxu̱u̱. 19 Nda̱wa̱á mi̱dxu̱ʼ jcháa náa ndxajkun Eleazar ga̱jma̱a̱ náa inún xúgíinʼ xa̱bu̱ xuajin, ma̱ngaa mbaʼyóoʼ mataʼgíiʼ mu mayéʼga edxu̱u̱ náa inún ikhiin. 20 Gíʼmaa maraxna̱a̱ chíʼgíiʼ gamajkhu rí xtaʼdáá mu xúʼko̱ xa̱bu̱ xuajin Israel mudxawíín. 21 Ikhaa gíʼmaa maʼga náa inuu ndxajkun Eleazar ga̱jma̱a̱ ikhaa majmuu Urim* mu marajxu̱u̱ Jeobá ndiéjunʼ gáraʼwíí maʼni. Índo̱ ikhiin gajuiʼtáñajúúnʼ, magún kidxuuʼ, ikhaa gajmíi̱n xúgíinʼ israelitas ga̱jma̱a̱ xúgíinʼ xa̱bu̱ xuajin”.

22 Ikha jngóo Moisés niʼni xó má Jeobá niʼtáñajuunʼ. Niʼthúu̱n Josué, ni̱jkha̱ kayáa náa inuu ndxajkun Eleazar náa inún xúgíinʼ xa̱bu̱ xuajin, 23 nitámáʼ ñawúunʼ náa ikhaa ga̱jma̱a̱ nigíiʼ mu mbayá edxu̱u̱, xó má Jeobá niʼtáñajuunʼ Moisés maʼni.

28 Nda̱wa̱á, Jeobá niʼthúu̱n Moisés: 2 “Araxnún kiʼtáñajunʼ rígi̱ israelitas, ga̱jma̱a̱ arathún: ‹Gíʼmaa muxnajxí tsigijñaʼ ga̱jma̱a̱ ganitsu ndrígóʼ. Tsigijñaʼ ndrígóʼ dí nakha dí mitsaanʼ* ndataun eyoo ikhúún gíʼmaa muxnajxí mbiʼi rí kaʼyoo›.

3 Arathún: ‹Rígi̱ nindxu̱u̱ tsigijñaʼ dí mi̱kha rí ikháanʼla muxnajxí náa inuu Jeobá: Mámbá mbiʼi, xóo tsigijñaʼ rí mikarámáʼ, mámbá gájtsi mbaʼyóoʼ muxnajxíi̱n a̱jmi̱i̱n e̱jín múgú bi̱ míjíinʼ bi̱ mbá tsigúúnʼ. 4 Timbáa mugu̱ e̱jmba̱a̱ mbaʼyóoʼ maraxnaxíi miʼcha̱, imba̱a̱ mbaʼyóoʼ maraxnaxíi wakíʼ,* 5 mbóó gáraxnajxí ga̱jma̱a̱ mbá kilo* harina dí itháan májánʼ kanda̱wo̱o̱ʼ mbá litro* aceite ndrígóo oliva xóo tsigijñaʼ rí tsígáʼ. 6 Nindxu̱u̱ mbá tsigijñaʼ dí mikarámáʼ tsétsí mbiʼi, dí nijuiʼthá maguma náa kúbá Sinaí xóo mbá tsigijñaʼ rí mitsaanʼ ndataun, mbá tsigijñaʼ gamajkhu rí mikarámáʼ náa inuu Jeobá, 7 mbóó gáraxnajxí ga̱jma̱a̱ tsigijñaʼ dí nagadirámuuʼ: Mbá litro* aceite náa mámbáa a̱ʼdá múgú. Ataxídirámáʼ iya najnga̱a̱ náa rí mikaʼwu xóo tsigijñaʼ dí nagadirámuuʼ náa Jeobá. 8 Imba̱a̱ a̱ʼdá múgú mbaʼyóoʼ maraxnaxíi wakíʼ.* Mbóó gáraxnajxí ga̱jma̱a̱ tsigijñaʼ rí tsígáʼ, ma̱ngaa tsigijñaʼ dí nagadirámuuʼ ikháá má xóo rí niraxnáxi̱ miʼcha̱ xóo tsigijñaʼ rí mikarámáʼ rí mitsaanʼ ndataun eʼyoo Jeobá.

9 Mbiʼi sábado mixnájxi̱i̱n a̱jmi̱i̱n e̱jín múgú bi̱ míjíinʼ bi̱ mbá tsigúúnʼ, ga̱jma̱a̱ xóo tsigijñaʼ rí tsígáʼ a̱jma̱ kilo* harina dí itháan májánʼ kanda̱wo̱o̱ʼ aceite mbóó gáraxnajxí ga̱jma̱a̱ tsigijñaʼ dí nagadirámuuʼ xó má kaʼyoo. 10 Rígi̱ nindxu̱u̱ tsigijñaʼ rí mixnájxi̱ mu mikarámáʼ rí mbiʼi sábado, ma̱ngaa tsigijñaʼ rí mixnájxi̱ mámbá gájtsi ga̱jma̱a̱ tsigijñaʼ dí nagadirámuuʼ xó má kaʼyoo.

11 Índo̱ gági̱ʼdu̱u̱ mámbá igu̱nʼ muxnajxí xóo tsigijñaʼ gamajkhu rí mikarámáʼ náa inuu Jeobá a̱jmi̱i̱n e̱jín xédí, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ míjíinʼ bi̱ mbá tsigúúnʼ. 12 Ma̱ngaa muxnajxi̱ ajtsú kilo tikhu* harina dí itháan májánʼ kanda̱wo̱o̱ʼ aceite xóo tsigijñaʼ rí tsígáʼ náa mámbáa a̱ʼdá xédí, a̱jma̱ kilo* harina dí itháan májánʼ kanda̱wo̱o̱ʼ aceite xóo tsigijñaʼ rí tsígáʼ náa mámbáa mugu̱ e̱jmba̱a̱, 13 mbá kilo* harina dí itháan májánʼ kanda̱wo̱o̱ʼ aceite xóo tsigijñaʼ rí tsígáʼ náa mámbáa a̱ʼdá múgú. Mani̱ndxu̱u̱ mbá tsigijñaʼ dí mikarámáʼ rí mitsaanʼ ndataun, mbá tsigijñaʼ gamajkhu rí mi̱kha náa inuu Jeobá. 14 Ma̱ngaa mixnájxi̱ tsigijñaʼ dí magadirámuuʼ náa mámbáa a̱ʼdá xédí, mixnájxi̱ itháan dí maʼni a̱jma̱ litro* vino, náa mámbáa mugu̱ e̱jmba̱a̱ mbaʼyóoʼ mixnájxi̱ itháan dí mbá litro* vino, náa mámbáa a̱ʼdá múgú mbaʼyóoʼ mixnájxi̱ mbá litro* vino. Mámbá igu̱nʼ gáʼyóoʼ muxnajxí tsigijñaʼ rígi̱ náa xúgíʼ tsiguʼ. 15 Mixnájxi̱i̱ mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá náa Jeobá, ma̱ngaa mixnájxi̱ tsigijñaʼ dí mikarámáʼ mámbá gájtsi ga̱jma̱a̱ tsigijñaʼ dí magadirámuuʼ xó má kaʼyoo.

16 Índo̱ gáʼni timbá igu̱nʼ, mbiʼi 14 ñajunʼ gu̱nʼ, magumari̱ya̱a̱ʼ Pascua náa inuu Jeobá. 17 Mbiʼi 15 ñajunʼ gu̱nʼ rúʼko̱ marigá mbá ndxa̱a̱. Náa mbá juwan mbiʼi mu̱phu̱ pan dí ragíʼdoo levadura. 18 Índo̱ gáʼni timbá mbiʼi mbaʼyóoʼ magimbáanʼla mu mbuyamajkuíí Dios. Xáʼyóoʼ mu̱nila nimbá enii ñajunʼ. 19 Xóo tsigijñaʼ gamajkhu rí mikarámáʼ náa inuu Jeobá gíʼmaa muxnajxíi̱n a̱jmi̱i̱n e̱jín xédí, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ míjíinʼ bi̱ mbá tsigúúnʼ. 20 Mbóó gáʼyóoʼ muxnajxíi̱n ga̱jma̱a̱ tsigijñaʼ rí tsígáʼ ndrígóo harina dí itháan májánʼ kanda̱wo̱o̱ʼ aceite: Ajtsú kilo tikhu* náa mámbáa a̱ʼdá xédí ga̱jma̱a̱ a̱jma̱ kilo* náa mámbáa mugu̱ e̱jmba̱a̱, 21 xúʼko̱ má mámbá kilo* náa mámbáa bi̱ mbá juwiin e̱jín múgú. 22 Ma̱ngaa muxnajxi̱i̱ mbáa chivátu* xóo tsigijñaʼ ga̱jma̱a̱ numuu aʼkhá mu maguma kaʼwi̱i̱ aʼkhála. 23 Muxnajxíla xúgíʼ rígi̱, xúʼko̱ má tsigijñaʼ rí mikarámáʼ mámbá miʼcha̱ rí kaʼyoo tsigijñaʼ rí majuixnájxi̱ mikarámáʼ mámbá gájtsi. 24 Muxnajxíla xúgíʼ rígi̱ náa mámbá mbiʼi, náa awúu̱n rí mbá juwan mbiʼi, xóo ganitsu, mbá tsigijñaʼ rí mi̱kha rí mitsaanʼ ndataun eʼyoo Jeobá. Ma̱ngaa gíʼmaa muxnajxí tsigijñaʼ rí mikarámáʼ mámbá gájtsi ga̱jma̱a̱ tsigijñaʼ rí magadirámuuʼ xó má kaʼyoo. 25 Índo̱ gaʼni juwan mbiʼi mbaʼyóoʼ magimbáanʼla mu mbuyamajkuíí Dios. Xáʼyóoʼ mu̱nila nimbá enii ñajunʼ.

26 Mbiʼi rí muxnajxí rí nijma̱a̱ ginii náa nidula, índo̱ gúxnajxí mbá tsigijñaʼ rí tsígáʼ nuxi̱ʼ náa Jeobá, índo̱ kuwáanʼla runiri̱ya̱a̱ʼ Ndxo̱o̱ Xmáná, mbaʼyóoʼ magimbáanʼla mu mbuyamajkuíí Dios. Xáʼyóoʼ mu̱nila nimbá enii ñajunʼ. 27 Xóo tsigijñaʼ rí mikarámáʼ rí mitsaanʼ ndataun eʼyoo Jeobá, muxnajxíi̱n a̱jmi̱i̱n e̱jín xédí, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ mbá tsigúúnʼ, 28 mbóó gáraxnajxí ga̱jma̱a̱ tsigijñaʼ rí tsígáʼ ndrígóo harina dí itháan májánʼ kanda̱wo̱o̱ʼ aceite, maraxnaxí ajtsú kilo tikhu* náa mámbáa a̱ʼdá xédí, a̱jma̱ kilo* náa mámbáa mugu̱ e̱jmba̱a̱, 29 ga̱jma̱a̱ mbá kilo* náa mámbáa bi̱ mbá juwiin e̱jín múgú. 30 Xúʼko̱ má mbáa a̱ʼdá tsújtuunʼ mu maguma kaʼwi̱i̱ aʼkhála. 31 Muxnajxíla xúgíʼ rígi̱ xúʼko̱ má tsigijñaʼ rí mikarámáʼ mámbá gájtsi ga̱jma̱a̱ tsigijñaʼ rí tsígáʼ gíʼmaa muxnajxíi̱n xujkhú míjíinʼ ga̱jma̱a̱ tsigijñaʼ rí magadirámuuʼ xó má kaʼyoo.

29 Timbá mbiʼi rí gáʼni juwan igu̱nʼ, mbaʼyóoʼ magimbáanʼla mu mbuyamajkuíí Dios. Xáʼyóoʼ mu̱nila nimbá enii ñajunʼ. Nindxu̱u̱ mbá mbiʼi dí mbaʼyóoʼ mudi̱i̱la trompeta. 2 Muxnajxí tsigijñaʼ dí mikarámáʼ mbá rí mitsaanʼ* ndataun eʼyoo Jeobá, muxnajxíi̱ mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ,* 3 xúʼko̱ má tsigijñaʼ rí tsígáʼ ndrígóo harina dí itháan májánʼ dí kanda̱wo̱o̱ʼ aceite, muxnajxí ajtsú kilo tikhu* ga̱jma̱a̱ numuu a̱ʼdá xédí, a̱jma̱ kilo* ga̱jma̱a̱ numuu mugu̱ e̱jmba̱a̱, 4 ga̱jma̱a̱ mbá kilo* náa mámbáa dí mbá juwiin e̱jín múgú, 5 xúʼko̱ má mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá mu maguma kaʼwi̱i̱ aʼkhála. 6 Muxnajxíla rígi̱, xúʼko̱ má tsigijñaʼ rí najuixnájxi̱ mámbá igu̱nʼ mbóó ga̱jma̱a̱ tsigijñaʼ rí tsígáʼ dí kaʼyoo mixnájxi̱, ma̱ngaa tsigijñaʼ dí najuixnájxi̱ mámbá gájtsi ga̱jma̱a̱ tsigijñaʼ rí tsígáʼ, xúʼko̱ má gáʼyóoʼ mixnájxi̱ tsigijñaʼ dí magadirámuuʼ, gíʼmaa mixnájxi̱ xó má kaʼyoo maguma, mbá tsigijñaʼ rí mi̱kha rí mitsaanʼ ndataun eʼyoo Jeobá.

7 Índo̱ gáyáa gu̱wa̱ʼ mbiʼi dí juwan igu̱nʼ, mbaʼyóoʼ magimbáanʼ mu mbuyamajkuíí Dios, ma̱ngaa mbaʼyóoʼ mu̱ni̱ wabamijná.* Xáʼyóoʼ mu̱ni̱ nimbá enii ñajunʼ. 8 Muxnajxí tsigijñaʼ dí mikarámáʼ mbá rí mitsaanʼ ndataun eʼyoo Jeobá, muxnajxíi̱ mbáa a̱ʼdá xédí, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ. 9 Xúʼko̱ má tsigijñaʼ rí tsígáʼ ndrígóo harina dí itháan májánʼ dí kanda̱wo̱o̱ʼ aceite, muxnajxí ajtsú kilo tikhu* ga̱jma̱a̱ numuu a̱ʼdá xédí, a̱jma̱ kilo* ga̱jma̱a̱ numuu mugu̱ e̱jmba̱a̱, 10 ga̱jma̱a̱ mbá kilo* náa mámbáa dí mbá juwiin e̱jín múgú, 11 ma̱ngaa mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá, xúʼko̱ má tsigijñaʼ rí majuixná mbiʼi rí majngudi̱i̱ aʼkhá, ma̱ngaa tsigijñaʼ dí najuixnájxi̱ mámbá gájtsi xúʼko̱ má tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

12 Mbiʼi 15 rí juwan igu̱nʼ, mbaʼyóoʼ magimbáanʼ mu mbuyamajkuíí Dios. Xáʼyóoʼ mu̱ni̱ nimbá enii ñajunʼ ga̱jma̱a̱ mbaʼyóoʼ mu̱niriya̱a̱ʼ mbá ndxa̱a̱ náa Jeobá mbá juwan mbiʼi. 13 Muxnajxí tsigijñaʼ dí mikarámáʼ mbá rí mitsaanʼ ndataun eʼyoo Jeobá, muxnajxíi̱n mbá 13 e̱jín xédí, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ. 14 Xúʼko̱ má tsigijñaʼ rí tsígáʼ ndrígóo harina dí itháan májánʼ dí kanda̱wo̱o̱ʼ aceite, muxnajxí ajtsú kilo tikhu* ga̱jma̱a̱ numuu mámbáa dí mbá 13 e̱jín xédí, a̱jma̱ kilo* ga̱jma̱a̱ numuu mámbáa dí a̱jmi̱i̱n mugu̱ e̱jmba̱a̱, 15 mbá kilo* ga̱jma̱a̱ numuu mámbáa dí mbá 14 e̱jín múgú, 16 ma̱ngaa mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá, xúʼko̱ má tsigijñaʼ dí najuixnájxi̱ mámbá gájtsi, ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

17 Índo̱ gáʼni a̱jma̱ mbiʼi muxnajxíi̱n mbá 12 e̱jín xédí, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 18 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún e̱jín xédí, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 19 ma̱ngaa mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá, xúʼko̱ má tsigijñaʼ dí najuixnájxi̱ mámbá gájtsi, ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

20 Índo̱ gáʼni ajtsú mbiʼi muxnajxíi̱n 11 xedi̱, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 21 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 22 xúʼko̱ má mbáa chivátu* xóo tsigijñaʼ ga̱jma̱a̱ numuu aʼkhá, ma̱ngaa tsigijñaʼ dí najuixnájxi̱ mámbá gájtsi ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

23 Índo̱ gáʼni a̱jkhu̱ mbiʼi muxnajxíi̱n gu̱wi̱i̱nʼ xedi̱, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 24 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 25 ma̱ngaa mbáa a̱ʼdá tsújtuunʼ xóo tsigijñaʼ ga̱jma̱a̱ numuu aʼkhá, xúʼko̱ má tsigijñaʼ dí najuixnájxi̱ mámbá gájtsi, ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

26 Índo̱ gáʼni witsu mbiʼi muxnajxíi̱n mijna gu̱wi̱i̱nʼ xedi̱, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 27 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 28 xúʼko̱ má mbáa chivátu xóo tsigijñaʼ ga̱jma̱a̱ numuu aʼkhá, ma̱ngaa tsigijñaʼ dí najuixnájxi̱ mámbá gájtsi ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

29 Rí maʼni majun mbiʼi muxnajxíi̱n mbá migiñiiʼ xedi̱, a̱jmi̱i̱n mugu̱ e̱jmba̱a̱ ga̱jma̱a̱ mbá 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 30 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 31 xúʼko̱ má mbáa chivátu xóo tsigijñaʼ ga̱jma̱a̱ numuu aʼkhá, ma̱ngaa tsigijñaʼ dí najuixnájxi̱ mámbá gájtsi ga̱jma̱a̱ tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

32 Rí maʼni juwan mbiʼi muxnajxíi̱n mbá juwiin xedi̱, a̱jmi̱i̱n mugu̱ e̱jmba̱a̱ ga̱jma̱a̱ 14 e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 33 tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú gíʼmaa maʼni xó má nguáthá mbaʼin xó má kaʼyoo maguma, 34 xúʼko̱ má mbáa chivátu xóo tsigijñaʼ ga̱jma̱a̱ numuu aʼkhá, ma̱ngaa tsigijñaʼ dí najuixnájxi̱ mámbá gájtsi ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

35 Rí maʼni migiñuʼ mbiʼi mani̱ndxu̱u̱ mbá mbiʼi kiejuunʼ rí magimbáanʼla mu mbuyamajkuíí Dios. Xáʼyóoʼ mu̱nila nimbá enii ñajunʼ. 36 Muxnajxí tsigijñaʼ dí mikarámáʼ mbá rí mitsaanʼ ndataun eʼyoo Jeobá, muxnajxíi̱ mbáa xedi̱, mbáa mugu̱ e̱jmba̱a̱ ga̱jma̱a̱ mbá juwiin e̱jín múgú bi̱ mbá tsigúúnʼ, xúgíinʼ gíʼmaa mani̱ndxu̱ún míjíinʼ, 37 xúʼko̱ má tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ dí mixnájxi̱ ga̱jma̱a̱ numún xedi̱, mugu̱ e̱jmba̱a̱ ma̱ngaa numún e̱jín múgú, gíʼmaa maʼni xó má nguáthá mbaʼin xó má kaʼyoo maguma, 38 ma̱ngaa mbáa chivátu xóo tsigijñaʼ ga̱jma̱a̱ numuu aʼkhá, ma̱ngaa tsigijñaʼ dí najuixnájxi̱ mámbá gájtsi ma̱ngaa tsigijñaʼ rí tsígáʼ rí kaʼyoo majuixná, mbóó má gáʼyóoʼ majuixná ga̱jma̱a̱ tsigijñaʼ dí magadirámuuʼ.

39 Rígi̱ nindxu̱u̱ tsigijñaʼ dí mbaʼyóoʼ muxnajxí índo̱ gúniri̱ya̱a̱ʼ ndxa̱a̱ náa inuu Jeobá ma̱ngaa tsigijñaʼ ga̱jma̱a̱ numuu rí nixuʼdámíjnála mu̱ni̱, tsigijñaʼ rí na̱ʼkha̱ a̱jkia̱la ikháanʼ muxnajxí, tsigijñaʼ dí mikarámáʼ, tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ, xúʼko̱ má tsigijñaʼ dí tsímáá›”.* 40 Moisés niʼthún israelitas xúgíʼ rí Jeobá niʼtáñajuunʼ.

30 Ikhú Moisés niʼtáminaʼ gajmíi̱n bi̱ kuya̱ edxu̱u̱ náa xuajin majkhaʼ* ndrígóo Israel, niʼthún: “Rígi̱ rí niʼtáñajunʼ Jeobá maguma. 2 Á mu mbáa xa̱biya̱ rígá mbá rí nakudaminaʼ ma’ni náa Jeobá o naxná ajngóo dí marigá tikhuu dí xáʼni ga̱jma̱a̱ naʼthí rí gajkhun ma’nimbánuu, xáʼyóoʼ maʼni nduwaʼ. Mbaʼyóoʼ ma’nimbánuu xúgíʼ rí nikudaminaʼ maʼni.

3 Á mu mbáa a̱ʼgu̱ rígá mbá rí nakudaminaʼ ma’ni náa Jeobá dí nimbánuminaʼ dí rígá tikhuu dí xáʼni, índo̱ kaʼníí dxáʼgú nindxu̱u̱ ga̱jma̱a̱ kaʼníí xtáa náa goʼwóo anu̱u̱,* 4 á mu anu̱u̱ na̱jkha̱nú naʼdxawuun dí nimbánuminaʼ dí rígá tikhuu dí xáʼni dí ikhaa nikudaminaʼ ma’nimbánuu, mú anu̱u̱ tséʼthúu̱n nimbá, xúgíʼ ajngóo rí nixná nagiʼdoo numuu. Ga̱jma̱a̱ xúgíʼ dí ikhaa nixná ajngóo dí marigá tikhuu dí xáʼni, mbaʼyóoʼ magiʼdoo numuu. 5 Á mu anu̱u̱ naʼdxawuun ga̱jma̱a̱ tséniñuuʼ ma’nimbánuu rí nikudaminaʼ maʼni o rí nimbánuminaʼ dí rígá tikhuu dí xáʼni, ikhú ni xágiʼdoo numuu. Jeobá maʼni mba̱a̱ a̱jkiu̱u̱n kaʼyoo numuu rí anu̱u̱ tséniñuuʼ ma’nimbánuu.

6 Á mu ikhaa ninújúnʼ nda̱wa̱á dí rígá rí nikudaminaʼ maʼni o rí mbá nacha̱á niraʼwíí mbá dí ma’nimbánuu. 7 Á mu ajmbio̱o̱* naʼdxawuun mú nda̱a̱ dí eʼthí mbiʼi rí naʼdxawuun, ikhaa mbaʼyóoʼ ma’nimbánuu má xúʼko̱ rí nikudaminaʼ maʼni o rí nimbánuminaʼ dí rígá tikhuu dí xáʼni. 8 Á mu ajmbio̱o̱ tséniñuuʼ ma’nimbánuu índo̱ gáʼdxawun rí nikudaminaʼ maʼni mbá na̱cha̱á, Jeobá maʼni mba̱a̱ a̱jkiu̱u̱n kaʼyoo.

9 Á mu mbáa a̱ʼgú xuáʼa̱ o mbáa a̱ʼgu̱ bi̱ niniña̱a̱nʼ ajmbio̱o̱, rígá mbá rí nakudaminaʼ maʼni, ikhaa katsudaa maʼnimbánuu xúgíʼ rí nikudaminaʼ.

10 Á mu mbáa a̱ʼgu̱ rígá dí nakudaminaʼ maʼni o nimbánuminaʼ dí rígá tikhuu dí xáʼni, índo̱ kaʼníí xtáa náa goʼwóo ajmbio̱o̱, 11 ga̱jma̱a̱ ajmbio̱o̱ naʼdxawuun mú nda̱a̱ dí eʼthí ga̱jma̱a̱ numuu rígi̱, xúgíʼ rí nikudaminaʼ ma’nimbánuu mbaʼyóoʼ maʼnimbánuu tsiaki̱i̱. 12 Á mu mbiʼi rí ajmbio̱o̱ gáʼdxawun ga̱jma̱a̱ tséniñuuʼ ma’nimbánuu rí nikudaminaʼ, nánguá magiʼdoo numuu dí nikudaminaʼ maʼni. Numuu rí ajmbio̱o̱ niʼthúu̱n dí xáʼni, ikhú Jeobá maʼni mba̱a̱ a̱jkiu̱u̱n kaʼyoo. 13 Ajmbio̱o̱ gíʼmaa maraʼwíí á mu xóó maʼnimbánuu rí nikudaminaʼ o dí marigá tikhuu rí xáʼni tséʼniuu má asndu ndiéjunʼ dí nikudaminaʼ. 14 Á mu nanújngoo mbiʼi ga̱jma̱a̱ ajmbio̱o̱ nda̱a̱ dí eʼthí, ikhaa xtáa raniñuuʼ rí ma’nimbánuu dí ikhaa nikudaminaʼ maʼni o dí rígá tikhuu dí xáʼni. Ikhaa niniñuuʼ dí a̱ʼgiu̱u̱ ma’nimbánuu numuu rí nda̱a̱ dí niʼthí índo̱ niʼdxawuun. 15 Á mu ikhaa tséniñuuʼ ma’nimbánuu nda̱wa̱á dí ikhaa niʼdxawuun, ikhaa mbaʼyóoʼ maʼni numa̱a̱ aʼkhúun a̱ʼgiu̱u̱.

16 Rígi̱ nindxu̱u̱ kiʼtáñajunʼ dí Jeobá nixnúu Moisés dí mbaʼyóoʼ maʼni mbáa xa̱biya̱ ga̱jma̱a̱ a̱ʼgiu̱u̱, ma̱ngaa mbáa xa̱bu̱ nikhi̱i̱ ga̱jma̱a̱ wáxióo* á mu kaʼníí xtáa náa goʼwóo”.

31 Ikhú Jeobá niʼthúu̱n Moisés: 2 “Aradíin xa̱bu̱ madianitas mu muni̱ numa̱a̱ ga̱jma̱a̱ numuu rí niniu̱u̱n israelitas. Nda̱wa̱á midxu̱u̱ʼ gíyáa jxa̱a̱ʼ gajmiáanʼ xa̱bu̱ xuajñaanʼ”.*

3 Ikha jngóo Moisés ni̱jkha̱ gáʼñúún xa̱bu̱ xuajin ga̱jma̱a̱ niʼthúún: “Gu̱ni̱ratiin tikhuun xa̱bia̱la mu magún gúxmijná gajmiún xa̱bu̱ Madián mu munimbáníí dí niʼtáñajunʼ Jeobá rí muniu̱u̱n xa̱bu̱ Madián. 4 Soldado bi̱ muxuʼmíin magún, magajnún 1,000 náa mámbá xuajin majkhaʼ* ndrígóo Israel”. 5 Náa xuajin majkhaʼ ndrígóo Israel, nigumaratiin mbá 12,000 xa̱bekha mu magún gúxmijná, 1,000 náa mámbá xuajin majkhaʼ.

6 Ikhú Moisés nikuʼmiin magún gúxmijná, 1,000 nigájnún náa mámbá xuajin majkhaʼ, ni̱jkha̱ ma̱ngaa Finehás a̱ʼdióo Eleazar, ndxajkun bi̱ na̱jkha̱ gajmíi̱n soldado, kagu̱ ni̱jkha̱ rí najmaa náa dí kaʼwu ga̱jma̱a̱ trompeta rí mudi̱i̱ náa muxmijná. 7 Ikhiin nixmijná gajmiún xa̱bu̱ Madián, xó má Jeobá niʼtáñajuunʼ Moisés, niradíin xúgíinʼ xa̱bekha. 8 Raʼkháa i̱ndó bugi̱ niradíin, ma̱ngaa niradíin reyes bi̱ kúwá náa Madián: Eví, Réquem, Zur, Hur ga̱jma̱a̱ Reba, witsiin reyes bi̱ kúwá náa Madián. Ma̱ngaa nixiyáa ga̱jma̱a̱ espada Balaam a̱ʼdióo Beor. 9 Mú, israelitas nigún kudiin e̱ji̱n ga̱jma̱a̱ gu̱ʼu̱ bi̱ kúwá náa Madián. Ma̱ngaa nigún kudiin mugiu̱ún ga̱jma̱a̱ xediu̱ún, ma̱ngaa xúgíʼ rí guáʼdáá. 10 Nitsikha̱a̱ xúgíʼ xuajñún náa nikúwá ga̱jma̱a̱ náa nigi̱ʼi̱i̱n. 11 Nigún kudúún xúgíʼ ga̱jma̱a̱ ra̱ʼkhá tháán mbaʼa dí niguanún ga̱jma̱a̱, kiʼngiinʼ xa̱bu̱ ga̱jma̱a̱ xujkhúʼ. 12 Nda̱wa̱á nigún kudiin xa̱bu̱ ga̱jma̱a̱ xúgíʼ dí nirawíi náa inuu Moisés ga̱jma̱a̱ ndxajkun Eleazar, ma̱ngaa náa inún xúgíinʼ xa̱bu̱ xuajin Israel, náa gíi̱nʼ, náa xkua̱ mijxooʼ ndrígóo Moab, mijngii Jordán, inuu Jericó.

13 Ikhú Moisés ga̱jma̱a̱ ndxajkun Eleazar mangiin mbá xúgíinʼ bi̱ kuya̱ edxu̱u̱ náa xuajin nigájnún guraʼnún náa rexo̱o̱ xuajin. 14 Mú, Moisés ra̱ʼkhá tháán nikiʼnáa kaʼñún bi̱ kuya̱ edxu̱u̱ náa soldado, bi̱ nutañajúúnʼ mbá mil ga̱jma̱a̱ bi̱ nutañajúúnʼ mbá cien, bi̱ nitangi̱i̱n náa nigún gúxmijná. 15 Moisés niʼthúún: “Náá numuu dí túradíinla xúgíinʼ gu̱ʼu̱ bugi̱ rá. 16 ¡Ikháanʼ má ndu̱ya̱a̱! Rí ikhiin ninimbaníí rí niʼthí Balaam, nini̱ rí israelitas makiéʼkhún náa inuu Jeobá índo̱ dí nirígá ga̱jma̱a̱ numuu Peor, ma̱ngaa nini̱ dí xúgíinʼ xa̱bu̱ xuajñuu Jeobá mumíniiʼ ga̱jma̱a̱ nandii. 17 Ikha jngóo mbaʼyóoʼ muradíinla xúgíinʼ jiámá majkhiinʼ ga̱jma̱a̱ xúgíinʼ gu̱ʼu̱ bi̱ nibúúnʼ má gajmiún mbáa xa̱bu̱. 18 Mú xúradíinla wa̱ʼxa̱ʼ* bi̱ xóó tsébúúnʼ gajmiún nimbáa xa̱bu̱. 19 Ikháanʼla mbaʼyóoʼ maguanála náa rexo̱o̱ xuajin mbá juwan mbiʼi. Xúgíinʼ bi̱ nixiyáa mbáa ga̱jma̱a̱ xúgíinʼ bi̱ nixkajmaa mbáa bi̱ nikháñúu mbaʼyóoʼ muni̱ kaʼwumijnáa índo̱ gáʼni ajtsú mbiʼi ga̱jma̱a̱ índo̱ gáʼni juwan mbiʼi, xó má ikháanʼla ga̱jma̱a̱ xa̱bu̱ bi̱ niguwa̱a̱ʼ kudiin. 20 Mbaʼyóoʼ mu̱ni̱ kaʼwi̱i̱ xúgíʼ xtíin, xúgíʼ dí niguma ga̱jma̱a̱ xtá, xúgíʼ dí niguma ga̱jma̱a̱ xtátsiu̱u̱n tsujthu̱nʼ ga̱jma̱a̱ xúgíʼ dí niguma ga̱jma̱a̱ ixi̱”.

21 Ikhú ndxajkun Eleazar niʼthún soldado bi̱ nigún gúxmijná: “Rígi̱ nindxu̱u̱ xtángoo ndrígóo Jeobá dí niʼtáñajuunʼ Moisés: 22 ‹I̱ndó oro, plata, cobre, hierro, estaño ga̱jma̱a̱ plomo, 23 ga̱jma̱a̱ xúgíʼ rí maʼngo̱o̱ mi̱kha, mbaʼyóoʼ mutsi̱kha mu maguma kaʼwi̱i̱. Mú, ma̱ngaa mbaʼyóoʼ mujña̱a̱ ga̱jma̱a̱ iyaʼ dí nuni̱ kaʼwumijnáa ga̱jma̱a̱. Xúgíʼ rí xáʼngo̱o̱ manújngoo náa aguʼ i̱ndó miʼjñáa ga̱jma̱a̱ iyaʼ. 24 Índo̱ gáʼni juwan mbiʼi mbaʼyóoʼ mujña̱a̱ xtíñala ga̱jma̱a̱ maʼni̱i̱ mikaʼwáanʼ. Nda̱wa̱á ma̱ndoo mata̱ʼa̱a̱la náa gíi̱nʼ xa̱bu̱ xuajin›”.

25 Ikhú Jeobá niʼthúu̱n Moisés: 26 “Atani̱ mbá lista xúgíʼ rí niguwáa̱nʼ kudúún, xó má xa̱bu̱ ga̱jma̱a̱ xujkhúʼ. Atani̱ rígi̱ ga̱jma̱a̱ʼ ndxajkun Eleazar, ma̱ngaa xúgíinʼ xa̱bu̱ bi̱ kuya̱ edxu̱u̱ náa xuajin. 27 Atruiʼtha̱a̱ a̱jma̱ níʼkhóo dí niguwáa̱nʼ kudúún, mbá muda̱a̱ soldado bi̱ nigún gúxmijná ga̱jma̱a̱ i̱mba̱ muda̱a̱ xa̱bu̱ xuajin. 28 Náa rí muda̱a̱ soldado bi̱ nigún gúxmijná, ikhí mbaʼyóoʼ magajnúu dí makánáán Jeobá, náa 500 xa̱bu̱ magajnúu mbáwíí, xúʼko̱ má náa xedi̱, náa búrru ga̱jma̱a̱ náa mugu̱. 29 Mbá ta̱pha̱ dí makánún ikhiin mbaʼyóoʼ maraxna̱a̱ ndxajkun Eleazar xóo rí makánáán Jeobá. 30 Náa mbá ta̱pha̱ dí kaʼñún israelitas, mbaʼyóoʼ matríyáaʼ mbáa xa̱bu̱ náa rí mbá 50, xúʼko̱ má náa xedi̱, búrru, mugu̱ ga̱jma̱a̱ náa xúgíinʼ xujkhúʼ bi̱ guáʼdiin, maraxniu̱u̱n bi̱ levitas, bi̱ kaʼñún muni̱ ñajunʼ náa guʼwá xtíin ndrígóo Jeobá”.

31 Ikha jngóo Moisés ga̱jma̱a̱ ndxajkun Eleazar nini̱ ikháá kayuuʼ xó má Jeobá niʼtáñajuunʼ Moisés. 32 Xúgíʼ dí niguwa̱a̱nʼ kudúún bi̱ nigún gúxmijná ninindxu̱u̱ mbá 675,000 mugu̱, 33 mbá 72,000 xedi̱ 34 ga̱jma̱a̱ mbá 61,000 búrru. 35 Gu̱ʼu̱ bi̱ xóó tsébúúnʼ gajmiún nimbáa xa̱bu̱ ninindxu̱ún mbá 32,000 dí mbá xúgíinʼ. 36 Mbá ta̱pha̱ dí nida̱a̱ bi̱ nigún gúxmijná ninindxu̱ún mbá 337,500 mugu̱. 37 Mugu̱ bi̱ nikánián Jeobá ninindxu̱ún mbá 675 dí mbá xúgíinʼ. 38 Ga̱jma̱a̱ mbá 36,000 xedi̱, bi̱ nikánián Jeobá ninindxu̱ún mbá 72 xedi̱. 39 Ma̱ngaa mbá 30,500 búrru, bi̱ nikánián Jeobá ninindxu̱ún mbá 61 búrru. 40 Xúʼko̱ má mbá 16,000 xa̱bu̱, bi̱ nikánián Jeobá ninindxu̱ún mbá 32 xa̱bu̱. 41 Ikhú Moisés nixnúu ndxajkun Eleazar dí kaʼyoo makánáán Jeobá, xó má Jeobá niʼtáñajuunʼ Moisés.

42 Náa i̱mbá ta̱pha̱ dí kaʼñún bi̱ israelitas, rí Moisés niruiʼta̱a̱ náa dí kaʼñún xa̱bu̱ bi̱ nigún guxmijná, 43 mugu̱ bi̱ nikánián ninindxu̱ún mbá 337,500 dí mbá xúgíinʼ, 44 xúʼko̱ má mbá 36,000 xedi̱, 45 xúʼko̱ má mbá 30,500 búrru, 46 ga̱jma̱a̱ xa̱bu̱ ninindxu̱ún mbá 16,000 dí mbá xúgíinʼ. 47 Ikhú Moisés niríyáaʼ náa rí kaʼñún israelitas mbáa xa̱bu̱ náa rí 50, xúʼko̱ má mbáa xujkhúʼ náa rí 50, nixniún levitas bi̱ nuni̱ ñajunʼ náa guʼwá xtíin ndrígóo Jeobá, xó má Jeobá niʼtáñajuunʼ Moisés.

48 Ikhú xa̱bu̱ bi̱ kuya̱ edxu̱u̱ náa mbaʼin soldado nigún náa Moisés xúʼko̱ má bi̱ nutañajúúnʼ mbá mil soldado ga̱jma̱a̱ xa̱bu̱ bi̱ nutañajúúnʼ mbá cien, 49 nitháán Moisés: “Niráxníinxu xa̱bu̱ bi̱ nutañajunxu̱ bi̱ nigún gúxmijná ndi̱ya̱a̱xu̱ dí kájxi̱i̱n má niguwáánʼ. 50 Ikha jngóo atatsíñuxu̱ muxnajxíxu̱ náa Jeobá xóo tsigijñaʼ dí nixkamaa mámbáa dí ikháanʼxu̱, xóo dí niguma ga̱jma̱a̱ oro, xábí dí natra̱ʼa̱ rajkhúún, xábí dí natra̱ʼa̱ ñawúnʼ, anillo dí nuxnáá ga̱jma̱a̱ sello, xábí cháʼwún ga̱jma̱a̱ iʼwáʼ xábí, mu xúʼko̱ maguma kaʼwáanʼxu̱ náa inuu Jeobá”.

51 Ikha jngóo Moisés ga̱jma̱a̱ ndxajkun Eleazar nindrigú oro ga̱jma̱a̱ xúgíʼ xábí dí nixna. 52 Xúgíʼ oro dí nigún kudúún xa̱bu̱ bi̱ nutañajúúnʼ mbá mil soldado ga̱jma̱a̱ bi̱ nutañajúúnʼ mbá cien soldado dí muxnáá Jeobá ni̱jkha̱nú niʼni mbá 16,750 siclos.* 53 Mámbáa soldado rígá dí ni̱ʼkha̱a̱ kagu̱u̱. 54 Moisés ga̱jma̱a̱ ndxajkun Eleazar nindri̱gú oro dí nixna xa̱bu̱ bi̱ nutañajúúnʼ mbá mil soldado ga̱jma̱a̱ bi̱ nutañajúúnʼ mbá cien, nigún kudúún náa awúu̱n guʼwá xtíin mu xúʼko̱ xa̱bu̱ xuajin Israel marmáʼáan a̱jkiu̱ún dí Jeobá niʼni ga̱jma̱a̱ numún.

32 E̱ji̱i̱n Rubén ga̱jma̱a̱ e̱ji̱i̱n Gad niguáʼdiin mbaʼin wéñuuʼ xujkhúʼ. Ikhiin ndiyáá rí ku̱ba̱ʼ dí rígá náa Jazer ga̱jma̱a̱ dí rígá náa Galaad nindxu̱u̱ mbá májánʼ mbaaʼ náa murui̱ti̱i̱n xujkhúʼ. 2 Ikha jngóo e̱ji̱i̱n Gad ga̱jma̱a̱ e̱ji̱i̱n Rubén nigún gúyáá Moisés, ndxajkun Eleazar mangiin bi̱ kuya̱ edxu̱u̱ náa xuajin, nithúún: 3 “Atarot, Dibón, Jazer, Nimrá, Hesbón, Elealé, Sebam, Nebo ga̱jma̱a̱ Beón, 4 ku̱ba̱ʼ rí Jeobá nigruigú mu maxnún xa̱bu̱ Israel, nindxu̱u̱ mbá ku̱ba̱ʼ májánʼ náa mawíʼtún xujkhúʼ ga̱jma̱a̱ xa̱bia̱a̱ʼ guáʼdiin mbaʼin wéñuuʼ xujkhúʼ”. 5 Ga̱jma̱a̱ nithi xóó: “Á mu naʼni a̱jkia̱a̱nʼ xtayuxuʼ, araxnúxu̱ ku̱ba̱ʼ rígi̱ mu maʼni mbayuxu. Xátani̱ rí makidáanʼxu̱ náa mañu Jordán”.

6 Ikhú Moisés niʼthún e̱ji̱i̱n Gad ga̱jma̱a̱ e̱ji̱i̱n Rubén: “Lá i̱ndó a̱ngia̱nla magún náa guerra ga̱jma̱a̱ ikháanʼ maguanála gi̱i̱ ráʼ. 7 Náá numuu rí nuni majmáa a̱jkiu̱ún xa̱bu̱ Israel mu xakidi̱i̱n náa ku̱ba̱ʼ rí Jeobá gajkhun maxnún xá. 8 Rúʼko̱ rí nini ana̱la* índo̱ nikuʼnguíinʼ náa Cadés-Barnea mu mbuyáá ku̱ba̱ʼ. 9 Índo̱ nitsimún náa rígá mata* ndrígóo Escol ga̱jma̱a̱ ndiyáá ku̱ba̱ʼ, nini rí majmáa a̱jkiu̱ún xa̱bu̱ xuajin Israel mu xátu̱ʼu̱u̱n náa ku̱ba̱ʼ rí Jeobá niʼthí maxnún. 10 Mbiʼi rúʼko̱ Jeobá nikiʼnáa wéñuuʼ, ikha jngóo nixná ajngóo: 11 ‹Xa̱bekha bi̱ guaʼdáá 20 tsigúúnʼ o itháan bi̱ nigájnún náa Egipto xúyáá ku̱ba̱ʼ rí nitha maxnuu Abrahán, Isaac ga̱jma̱a̱ Jacob, numuu rí túnimbu̱u̱n ga̱jma̱a̱ xúgíʼ a̱jkiu̱ún, 12 i̱ndó Caleb a̱ʼdióo Jefuné bi̱ nindxu̱u̱ quenizita ga̱jma̱a̱ Josué a̱ʼdióo Nun, numuu rí ikhiin ninimbu̱u̱n kuyáá Jeobá ga̱jma̱a̱ xúgíʼ a̱jkiu̱ún›. 13 Ikha jngóo Jeobá nikiʼnáa kaʼñúún xa̱bu̱ Israel ga̱jma̱a̱ ikhaa niʼni rí magún ratuíʼíin náa ku̱ba̱ʼ mijxooʼ* mbá 40 tsiguʼ, asndu índo̱ niguámbíin xúgíinʼ bi̱ nini dí ra̱májánʼ náa inuu Jeobá. 14 Rí xúgi̱ ikháanʼla nuni ikháá má xóo nini ana̱la xóo e̱jñu̱ún xa̱bu̱ bi̱ nakiéʼkúun, rígi̱ naʼni rí Jeobá makiʼnáa itháan kaʼñúún xa̱bu̱ Israel. 15 Á mu ikháanʼla nuniʼñáá’ runi̱mbala ku̱ya̱a̱, ikhaa maniñala mbu̱júu̱ náa ku̱ba̱ʼ mijxooʼ ga̱jma̱a̱ ikháanʼla muni rí mambíin xúgíinʼ xa̱bu̱ xuajin”.

16 Nda̱wa̱á, ikhiin nitangi̱ín náa ikhaa ga̱jma̱a̱ nitháán: “Atatsíñáánʼ mu̱nixu̱ gúláa xtájtsí náa makuwa xujkiúxu ga̱jma̱a̱ xuajin náa makuwíin e̱jñu̱xu. 17 Mu ikháanʼxu̱ muʼguáxu ruxmijná má xúʼko̱ náa inún israelitas asndu muʼguá kudiinxu̱ náa mba̱a̱ rí kaʼñúún. E̱jñu̱xu maguanún náa xuajin rí kúgumaʼá mu xúʼko̱ nda̱a̱ rí gúniúun xa̱bu̱ xuajin rígi̱. 18 Xátangaán náa guʼwúxu asndu índo̱ gúya̱a̱xu rí mámbáa israelitas nigruigú ku̱ba̱ʼ rí kaʼyoo makánúu. 19 Ikháanʼxu̱ xúndrigú ku̱ba̱ʼ gajmiúxu ikhiin náa i̱mba̱ ridoo Jordán ni ma rí itháan ñuʼún, numuu rí ikháanʼxu̱ nindríguxu̱ má náa i̱mba̱ ridoo mañu Jordán náa nagájnuu a̱jkha̱ʼ”.*

20 Moisés niriʼñún: “Á mu nu̱nila rígi̱, nurajtuunla ajua̱nʼ náa inuu Jeobá mu muxmíjnala, 21 á mu mámbáa rí ikháanʼ nurajtuun ajua̱nʼ ga̱jma̱a̱ nakidáanʼ náa i̱mba̱ ridoo mañu Jordán náa inuu Jeobá, índo̱ ikhaa naxkawíin xa̱bu̱ sia̱nʼ ndrígóo náa inuu, 22 asndu índo̱ Jeobá gágruigúu ku̱ba̱ʼ rígi̱, ikhú ikháanʼla ma̱ndoo matanganʼla ga̱jma̱a̱ ni xáguaʼdáá aʼkhála náa inuu Jeobá ma̱ngaa náa xa̱bu̱ Israel. Ku̱ba̱ʼ rígi̱ mani̱ndxu̱u̱ ndrígala ikháanʼ náa inuu Jeobá. 23 Á mu tseniila rígi̱, makiéʼkala náa inuu Jeobá ga̱jma̱a̱ mbaʼyóoʼ muni̱ numa̱a̱ aʼkhála. 24 Ikha jngóo muni̱ xuajin náa makuwá e̱jña̱la ga̱jma̱a̱ gúláa náa makuwá mugiala, mú gíʼmaa munimbaníí rí nixuʼdámíjná”.

25 E̱ji̱i̱n Gad ga̱jma̱a̱ e̱ji̱i̱n Rubén nitháán Moisés: “Xa̱bia̱a̱ʼ muni̱ xó má niʼtáñajunʼ tátiuxu̱. 26 E̱jñu̱xu, guʼyuxuʼ ga̱jma̱a̱ xúgíinʼ xujkiúxu bi̱ kraʼdiin maguanún ikhí, náa xuajin ndrígóo Galaad, 27 mú xa̱bia̱a̱ʼ makidiin, xúgíinʼ xa̱bekha bi̱ kuda ajua̱nʼ muxmijná náa guerra náa inuu Jeobá xó má niʼthí tátiuxu̱”.

28 Ikha jngóo Moisés nixnúu mbá kiʼtáñajunʼ ga̱jma̱a̱ numún ikhiin ndxajkun Eleazar, Josué a̱ʼdióo Nun ga̱jma̱a̱ bi̱ kuya̱ edxu̱u̱ náa goʼwóo anu̱ún náa xuajin majkhaʼ* ndrígóo Israel. 29 Moisés niʼthún: “Á mu e̱ji̱i̱n Gad ga̱jma̱a̱ e̱ji̱i̱n Rubén nakidiin gajmiála náa i̱mba̱ ridoo mañu Jordán, xúgíinʼ xa̱bekha bi̱ kuda ajua̱nʼ mu muxmijná náa inuu Jeobá, á mu niʼngala nindrígu ku̱ba̱ʼ ikhú muxnu̱u̱n ku̱ba̱ʼ ndrígóo Galaad mu maʼni ku̱bu̱únʼ. 30 Á mu ikhiin tsírajthun ajua̱nʼ ga̱jma̱a̱ tsíkidiin gajmiála makuwáanʼ má gajmiála náa ku̱ba̱ʼ ndrígóo Canáan”.

31 Ikhú e̱ji̱i̱n Gad ga̱jma̱a̱ e̱ji̱i̱n Rubén niriʼña: “Munimbánixu má rí Jeobá naʼtáñajúúnʼ xa̱bia̱a̱ʼ. 32 Ikháanʼxu̱ murajtúnxu ajua̱nʼ ga̱jma̱a̱ makidáanxu náa inuu Jeobá náa ku̱ba̱ʼ ndrígóo Canáan, mú ku̱ba̱ʼ rí makánuxu marigá má gi̱i̱ náa i̱mba̱ ridoo mañu Jordán”. 33 Ikha jngóo Moisés nixnúún ikhiin, e̱ji̱i̱n Gad, e̱ji̱i̱n Rubén ga̱jma̱a̱ mbá ta̱pha̱ xuajin chíʼgíiʼ* ndrígóo Manasés a̱ʼdióo José, náa naʼtáñajunʼ Sehón, rey ndrígu̱ún amorreos ga̱jma̱a̱ náa naʼtáñajunʼ Og, rey ndrígóo Basán, xóo muʼthá xúgíʼ mbayuuʼ xuajin dí rígá náa ku̱ba̱ʼ rúʼko̱ xúʼko̱ má xuajin rí rígá mijngii.

34 E̱ji̱i̱n Gad ni̱ni̱ májáanʼ xuajin Dibón, Atarot, Aroer, 35 Atrot-Sofán, Jazer, Jogbehá, 36 Bet-Nimrá ga̱jma̱a̱ Bet-Harán, xuajin rí kuguamaʼán ga̱jma̱a̱ ni̱ni̱ gúláa itsí náa makuwá mugiuún. 37 Ga̱jma̱a̱ e̱ji̱i̱n Rubén ni̱ni̱ májáanʼ xuajin Hesbón, Elealé, Quiryataim, 38 Nebo ga̱jma̱a̱ Baal-Meón, xuajin rí ikhiin niriʼkui̱i̱ mbiʼyuu, ga̱jma̱a̱ Sibmá. Ikhiin niriʼkui̱i̱ mbiʼyuu xuajin rí ni̱ni̱ májáanʼ.

39 E̱ji̱i̱n Makir a̱ʼdióo Manasés nigún náa Galaad ga̱jma̱a̱ nindrigú xuajin rúʼko̱, ma̱ngaa nixkawíin xa̱bu̱ amorreos bi̱ kúwá ikhí. 40 Ikha jngóo Moisés nixnúu Makir a̱ʼdióo Manasés ku̱ba̱ʼ ndrígóo Galaad ga̱jma̱a̱ ikhaa nixtáa ikhí. 41 Jaír a̱ʼdióo Manasés nigruigú kaʼñúnʼ xuajin majkhaʼ dí rígá náa xuajin Galaad ga̱jma̱a̱ nixna mbiʼyuu Havot-Jaír.* 42 Nóbah nijkha nirígú kaʼñúnʼ Quenat ma̱ngaa xuajin dí rígá mijngii ikhí ga̱jma̱a̱ nixna mbiʼyuu xó má mbiʼyuu ikhaa: Nóbah.

33 Xígi̱ kaʼnii nigún rágu̱u̱nʼ xa̱bu̱ xuajin Israel, índo̱ Moisés ga̱jma̱a̱ Aarón nixnún ikha, nigájnún mámbá nguéjmi̱i̱n náa ku̱ba̱ʼ ndrígóo Egipto. 2 Jeobá nixnúu awan Moisés dí maʼnirámáʼ náa mámbá dí nagájnún. Mbaaʼ rígi̱ nindxu̱u̱ náa niguáʼdi̱i̱ nigájnún. 3 Nigájnún náa Ramesés mbiʼi 15 rí timbá igu̱nʼ. Mbiʼi nda̱wa̱á dí nirígá Pascua, israelitas asndu tsémiñún egájnún* náa inún xúgíinʼ xa̱bu̱ egipcios. 4 Índo̱ xa̱bu̱ egipcios kúwá rudi̱ín e̱jín giʼniún bi̱ Jeobá nigudíin. Jeobá niʼni gíníin ga̱jma̱a̱ nindi̱ʼi̱i̱n cuenta xúgíinʼ dioses ndrígún.

5 Ikha jngóo israelitas nigájnún náa Ramesés ga̱jma̱a̱ nigún gagi̱ʼi̱i̱n náa Sucot. 6 Ikhú nigájnún náa Sucot nigún gagi̱ʼi̱i̱n náa Ezam, náa nagi̱ʼdu̱u̱ ku̱ba̱ʼ mijxooʼ.* 7 Nda̱wa̱á nigájnún náa Ezam, nigún mbá tuáʼáan ga̱jma̱a̱ nigún náa Pihahirot, asndu náa ma̱ndoo mbuyáá Baal-Zefón ga̱jma̱a̱ nigi̱ʼi̱i̱n náa inuu Migdol. 8 Nda̱wa̱á nigájnún náa Pihahirot, ninújngún náa tapo̱o̱ lamáa* ga̱jma̱a̱ nigún náa ku̱ba̱ʼ mijxooʼ. Nigún má xúʼko̱ mbá ajtsú mbiʼi náa ku̱ba̱ʼ mijxooʼ ndrígóo Ezam ga̱jma̱a̱ nigi̱ʼi̱i̱n náa Mará.

9 Ikhú nigájnún náa Mará ga̱jma̱a̱ niguáʼnú náa Elim. Náa Elim rígá mbá 12 iduu iyaʼ ga̱jma̱a̱ mbá 70 palmeras, ikha jngóo nigi̱ʼi̱i̱n ikhí. 10 Nda̱wa̱á nigájnún náa Elim ga̱jma̱a̱ nigún gagi̱ʼi̱i̱n náa mijngii lamáa Maña̱ʼ.* 11 Nda̱wa̱á nigájnún náa lamáa Maña̱ʼ ga̱jma̱a̱ nigún gagi̱ʼi̱i̱n náa ku̱ba̱ʼ ndrígóo Sin. 12 Ikhú nigájnún náa ku̱ba̱ʼ mijxooʼ ndrígóo Sin ga̱jma̱a̱ nigún gagi̱ʼi̱i̱n náa Dofcá. 13 Nda̱wa̱á nigájnún náa Dofcá ga̱jma̱a̱ nigún gagi̱ʼi̱i̱n náa Alús. 14 Nda̱wa̱á nigájnún náa Alús ga̱jma̱a̱ nigún gagi̱ʼi̱i̱n náa Refidim, náa nda̱a̱ iyaʼ mu̱wa̱a̱n xa̱bu̱. 15 Nda̱wa̱á nigájnún náa Refidim ga̱jma̱a̱ nigún gagi̱ʼi̱i̱n náa ku̱ba̱ʼ mijxooʼ ndrígóo Sinaí.

16 Nda̱wa̱á nigájnún náa ku̱ba̱ʼ mijxooʼ ndrígóo Sinaí ga̱jma̱a̱ nigún gagi̱ʼi̱i̱n náa Quibrot-Hataavá. 17 Ikhú nigájnún náa Quibrot-Hataavá ga̱jma̱a̱ nigún gagi̱ʼi̱i̱n náa Hazerot. 18 Nda̱wa̱á nigájnún náa Hazerot ga̱jma̱a̱ nigún gagi̱ʼi̱i̱n náa Ritmá. 19 Nda̱wa̱á nigájnún náa Ritmá ga̱jma̱a̱ nigún gagi̱ʼi̱i̱n náa Rimón-Pérez. 20 Ikhú nigájnún náa Rimón-Pérez ga̱jma̱a̱ nigún gagi̱ʼi̱i̱n náa Libná. 21 Nigájnun náa Libná ga̱jma̱a̱ nigún gagi̱ʼi̱i̱n náa Risá. 22 Nda̱wa̱á nigájnún náa Risá ga̱jma̱a̱ nigún gagi̱ʼi̱i̱n náa Quehelatá. 23 Ikhú nigájnún náa Quehelatá ga̱jma̱a̱ nigún gagi̱ʼi̱i̱n náa kúbá Séfer.

24 Nda̱wa̱á nigájnún náa kúbá Séfer ga̱jma̱a̱ nigún gagi̱ʼi̱i̱n náa Haradá. 25 Ikhú nigájnún náa Haradá ga̱jma̱a̱ nigún gagi̱ʼi̱i̱n náa Maquelot. 26 Nda̱wa̱á nigájnún náa Maquelot ga̱jma̱a̱ nigún gagi̱ʼi̱i̱n náa Táhat. 27 Nda̱wa̱á nigájnún náa Táhat ga̱jma̱a̱ nigún gagi̱ʼi̱i̱n náa Taré. 28 Ikhú nigájnún náa Taré ga̱jma̱a̱ nigún gagi̱ʼi̱i̱n náa Mitcá. 29 Nda̱wa̱á nigájnún Mitcá ga̱jma̱a̱ nigún gagi̱ʼi̱i̱n náa Hasmoná. 30 Nda̱wa̱á nigájnún náa Hasmoná ga̱jma̱a̱ nigún gagi̱ʼi̱i̱n náa Moserot. 31 Ikhú nigájnún náa Moserot ga̱jma̱a̱ nigún gagi̱ʼi̱i̱n náa Bene-Jaacán. 32 Nigájnún náa Bene-Jaacán ga̱jma̱a̱ nigún gagi̱ʼi̱i̱n náa Hor-Haguidgad. 33 Nda̱wa̱á nigájnún náa Hor-Haguidgad ga̱jma̱a̱ nigún gagi̱ʼi̱i̱n náa Jotbatá. 34 Nda̱wa̱á nigájnún náa Jotbatá ga̱jma̱a̱ nigún gagi̱ʼi̱i̱n náa Abroná. 35 Ikhú nigájnún náa Abroná ga̱jma̱a̱ nigún gagi̱ʼi̱i̱n náa Ezión-Guéber. 36 Nda̱wa̱á nigájnún náa Ezión-Guéber ga̱jma̱a̱ nigún gagi̱ʼi̱i̱n náa ku̱ba̱ʼ mijxooʼ ndrígóo Zin, xóo muʼthá, náa Cadés.

37 Nda̱wa̱á nigájnún náa Cadés ga̱jma̱a̱ nigún gagi̱ʼi̱i̱n náa kúbá Hor, náa ndawaa ndrígóo Edom. 38 Ndxajkun Aarón nitsimuu náa kúbá Hor xó má Jeobá niʼtáñajuunʼ ga̱jma̱a̱ ikhí nikháñúu índo̱ niʼni tsiguʼ 40, nda̱wa̱á dí israelitas nigájnún náa Egipto timbá mbiʼi rí witsu igu̱nʼ. 39 Aarón gíʼdoo 123 tsiguuʼ índo̱ nikháñúu náa kúbá Hor.

40 Ikhú rey ndrígóo Arad bi̱ nindxu̱u̱ cananeo bi̱ xtáa náa Négueb, náa ku̱ba̱ʼ ndrígóo Canaán, niʼdxawuun dí niguáʼnú israelitas.

41 Nda̱wa̱á ikhiin nigájnún náa kúbá Hor ga̱jma̱a̱ nigún gagi̱ʼi̱i̱n náa Zalmoná. 42 Nda̱wa̱á nigájnún náa Zalmoná ga̱jma̱a̱ nigún gagi̱ʼi̱i̱n náa Punón. 43 Nda̱wa̱á nigájnún náa Punón ga̱jma̱a̱ nigún gagi̱ʼi̱i̱n náa Obot. 44 Ikhú nigájnún náa Obot ga̱jma̱a̱ nigún gagi̱ʼi̱i̱n náa Iyé-Abarim náa ndawaa ndrígóo Moab. 45 Nda̱wa̱á nigájnún náa Iyim ga̱jma̱a̱ nigún gagi̱ʼi̱i̱n náa Dibón-Gad. 46 Nda̱wa̱á nigájnún náa Dibón-Gad ga̱jma̱a̱ nigún gagi̱ʼi̱i̱n náa Almón-Diblataim. 47 Ikhú nigájnún náa Almón-Diblataim ga̱jma̱a̱ nigún gagi̱ʼi̱i̱n náa kúbá Abarim, náa inuu Nebo. 48 Nda̱wa̱á kayuuʼ nigájnún náa kúbá Abarim ga̱jma̱a̱ nigún gagi̱ʼi̱i̱n náa xkua̱ mijxooʼ ndrígóo Moab, mijngii Jordán, inuu Jericó. 49 Nigi̱ʼi̱i̱n náa rawuunʼ Jordán náa Bet-Jesimot asndu náa Abel-Sitim, náa xkua̱ mijxooʼ ndrígóo Moab.

50 Jeobá niʼtáminaʼ ga̱jma̱a̱ Moisés náa xkua̱ mijxooʼ ndrígóo Moab, náa mijngii Jordán, inuu Jericó. Niʼthúu̱n: 51 “Aratámijná gajmiáanʼ israelitas ga̱jma̱a̱ arathún: ‹Manújngalá náa Jordán ga̱jma̱a̱ mata̱ʼa̱la náa ku̱ba̱ʼ ndrígóo Canaán. 52 Gíʼmaa muxkawíin xúgíinʼ xa̱bu̱ bi̱ kúwá náa ku̱ba̱ʼ rúʼko̱ ga̱jma̱a̱ mu̱ni̱ gámbáa xtiʼkhuu dí niguma ga̱jma̱a̱ itsí ma̱ngaa dí niguma ga̱jma̱a̱ ajua̱nʼ ma̱ngaa muxpígu̱u̱ náa xúgíʼ rí nduyamajkhún xándiu̱ún.* 53 Majmalaʼ ku̱ba̱ʼ mu makuwáanʼla ikhí, numuu rí gajkhun ma̱xna̱la ku̱ba̱ʼ rúʼko̱. 54 Gajmala suerte* mu muxpíʼtáa ku̱ba̱ʼ náa bi̱ kuñu̱u̱n. Mbaʼyóoʼ maraxnu̱u̱n itháan mba̱a̱ ku̱ba̱ʼ bi̱ itháan mbaʼin, mú matrígúu maʼni itháan chíʼgíiʼ* dí makánún bi̱ itháan nguéjmi̱i̱n. Xúgíinʼ makánún mbaaʼ xó má gágájnuu náa suerte. Gíʼmaa mudrigúu mbaaʼ xó má kaʼñúún mudrigúu xuajin majkhaʼ* ndrígún anu̱ún.

55 I̱ndó á mu na̱nguá exkawíin xa̱bu̱ buʼko̱, náa ku̱ba̱ʼ rúʼko̱, ikhiin mani̱ndxu̱ún xóo mbá náskha dí gídáʼ náa idala ga̱jma̱a̱ mani̱ndxu̱ún xóo mbá tsuwanʼ rí fráʼa náa tsuxta̱la ma̱ngaa muni̱ gínáanʼla náa ku̱ba̱ʼ dí makuwáanʼla. 56 Ma̱nia̱la rí nindxa̱ʼwa̱mínáʼ maniu̱u̱n ikhiin›”.

34 Jeobá nitanga̱a̱ niʼtámíjná ga̱jma̱a̱ Moisés, niʼthúu̱n: 2 “Arathún rígi̱ israelitas: ‹Índo̱ gáta̱ʼa̱la náa ku̱ba̱ʼ ndrígóo Canaán, ku̱ba̱ʼ rígi̱ nindxu̱u̱ ku̱ba̱ʼ dí mundrígúla, ku̱ba̱ʼ Canaán ga̱jma̱a̱ náa kri̱ga̱ ndawaa ndrígóo.

3 Náa mambátigo̱o̱ ndawaa xígií náa sur mani̱ndxu̱u̱ náa ku̱ba̱ʼ mijxooʼ* ndrígóo Zin, dí rígá náa i̱mba̱ ridoo Edom. Náa magi̱ʼdu̱u̱ ndawaa dí mambátigo̱o̱ náa sur mani̱ndxu̱u̱ náa nawámbári̱go̱o̱ rawuunʼ lamáa Miríná* xígií náa nagájnuu a̱jkha̱ʼ.* 4 Ndawaa matsimuu xígií náa Acrabim, manújngoo náa Zin maʼga̱nú náa sur ndrígóo Cadés-Barnea. Nda̱wa̱á manújngoo náa Hazar-Addar ga̱jma̱a̱ náa Azmón. 5 Náa Azmón matsimuu xígií mu maʼga náa mata* ndrígóo Egipto asndu maʼganúu náa lamáa.*

6 Náa mambátigo̱o̱ ndawaa xígií náa narámaaʼ a̱jkha̱ʼ* mani̱ndxu̱u̱ náa rawuunʼ lamáa Mba̱a̱. Ikhí gáʼni ndawaa xígií náa narámaaʼ a̱jkha̱ʼ.

7 Náa mambátigo̱o̱ ndawaa xígií náa norte. Mutígala náa lamáa Mba̱a̱ asndu náa kúbá Hor. 8 Asndu náa kúbá Hor maʼga má xúʼko̱ asndu náa Lebó-Hamat* manújngoo náa Zedad. 9 Maʼga má xúʼko̱, manújngoo náa Zifrón asndu maʼga̱nú náa Hazar-Enán. Ikhí gámbatigo̱o̱ ndawaa náa norte.

10 Ndawaa, mutígala xígií náa nagájnuu a̱jkha̱ʼ mani̱ndxu̱u̱ náa Hazar-Enán asndu náa Sefam. 11 Manújngoo xígií náa Sefam asndu náa Riblá, xígií náa nagájnuu a̱jkha̱ʼ náa Ain. Nda̱wa̱á magajtaa xígií náa kúbá dí rígá náa i̱mba̱ ridoo lamáa Kinéret.* 12 Ndawaa maʼga má xúʼko̱ asndu náa mañu Jordán mu maʼganúu asndu náa lamáa Miríná. Rígi̱ gánindxu̱u̱ ndawaa ndrígóo ku̱ba̱ʼ ndrígala›”.

13 Ikhú Moisés niʼtáñajúúnʼ rígi̱ israelitas: “Rígi̱ nindxu̱u̱ ku̱ba̱ʼ dí mundrígúla náa magajnúu suerte* mu mbu̱ya̱a̱ káʼnii gáwíʼtáa, xó má Jeobá niʼtáñajunʼ dí muda̱a̱ bi̱ i̱mbá mijna gu̱wa̱ʼ tikhu xuajin majkhaʼ.* 14 Numuu dí xuajin chíʼgíiʼ ndrígóo Rubén xó má bi̱ kúwá náa goʼwóo anu̱ún, xúʼko̱ má xuajin chíʼgíiʼ ndrígóo Gad xó má bi̱ kúwá náa goʼwóo anu̱ún ga̱jma̱a̱ mbá ta̱pha̱ xuajin chíʼgíiʼ ndrígóo Manasés nindrigúu má dí kaʼñún. 15 A̱jma̱ tikhu xuajin majkhaʼ rígi̱ nindrigúu má dí kaʼñún náa i̱mba̱ ridoo mañu Jordán xígií náa nagájnuu a̱jkha̱ʼ, mijngii Jericó, xígií náa najtsi”.

16 Jeobá niʼtámíjná mbu̱júu̱ ga̱jma̱a̱ Moisés, niʼthúu̱n: 17 “Rígi̱ mbiʼñún xa̱bu̱ bi̱ muxpiʼta̱a̱ ku̱ba̱ʼ mu̱dala náa maʼni mbayala, ndxajkun Eleazar ga̱jma̱a̱ Josué a̱ʼdióo Nun. 18 Ga̱jma̱a̱ ikháanʼla muraʼwi̱i̱ mámbáa bi̱ kayá edxu̱u̱ náa xuajin majkhaʼ mu maxpíʼtáa ku̱ba̱ʼ dí mundrígúu. 19 Xígi̱ kaʼnii mbiʼñún xa̱bu̱ buʼko̱: Náa xuajin chíʼgíiʼ ndrígóo Judá, mani̱ndxu̱u̱ Caleb a̱ʼdióo Jefuné, 20 náa xuajin chíʼgíiʼ ndrígóo Simeón, mani̱ndxu̱u̱ Semuel a̱ʼdióo Amihud, 21 náa xuajin chíʼgíiʼ ndrígóo Benjamín, mani̱ndxu̱u̱ Elidad a̱ʼdióo Kislón, 22 náa xuajin chíʼgíiʼ ndrígóo Dan, mani̱ndxu̱u̱ Buquí a̱ʼdióo Joglí, 23 náa e̱ji̱i̱n José: Náa xuajin chíʼgíiʼ ndrígóo Manasés, mani̱ndxu̱u̱ Haniel a̱ʼdióo Efod, 24 ga̱jma̱a̱ náa xuajin chíʼgíiʼ ndrígóo Efraín, mani̱ndxu̱u̱ Quemuel a̱ʼdióo Siftán, 25 náa xuajin chíʼgíiʼ ndrígóo Zabulón, mani̱ndxu̱u̱ Elizafán a̱ʼdióo Parnac, 26 náa xuajin chíʼgíiʼ ndrígóo Isacar, mani̱ndxu̱u̱ Paltiel a̱ʼdióo Azán, 27 náa xuajin chíʼgíiʼ ndrígóo Aser, mani̱ndxu̱u̱ Ahihud a̱ʼdióo Selomí, 28 ga̱jma̱a̱ náa xuajin chíʼgíiʼ ndrígóo Neftalí, mani̱ndxu̱u̱ Pedahel a̱ʼdióo Amihud”. 29 Xígi̱ kaʼnii mbiʼñún xa̱bu̱ bi̱ Jeobá niʼtáñajúúnʼ mu muxpi̱ʼta̱a̱ ku̱ba̱ʼ muda̱a̱ israelitas náa ku̱ba̱ʼ ndrígóo Canaán.

35 Jeobá niʼtáminaʼ má xúʼko̱ ga̱jma̱a̱ Moisés náa xkua̱ mijxooʼ* ndrígóo Moab, náa mijngii Jordán, inuu Jericó. Niʼthúu̱n: 2 “Arathún israelitas rí náa mbaaʼ dí mundrígúu, muxnúún xuajin náa makuwá bi̱ levitas. Ma̱ngaa mbaʼyóoʼ muxnún bi̱ levitas mbaaʼ náa rígá ra̱jxa̱ dí rígá náa mbájndi xuajin. 3 Ikhiin makuwá náa xuajin ga̱jma̱a̱ mbaaʼ náa rígá ra̱jxa̱ muphiʼtsu xediu̱ún ga̱jma̱a̱ xúgíinʼ xujkiún. 4 Mbaaʼ dí maraxnu̱u̱n levitas náa rígá ra̱jxa̱ mbaʼyóoʼ maʼni 445 metro* náa mbájndi xuajin, náa gi̱ʼdu̱u̱ xtájtsí asndu náa rexa̱a̱. 5 Gíʼmaa mugiéwan náa rexo̱o̱ xuajin mbá 890 metro* xígií náa nagájnuu a̱jkha̱ʼ,* 890 metro xígií náa sur, 890 metro xígií náa narámaaʼ a̱jkha̱ʼ* ga̱jma̱a̱ 890 metro xígií náa norte, xuajin maguanúu ta̱pha̱. Rígi̱ mani̱ndxu̱u̱ mbaaʼ dí marigá ra̱jxa̱ náa xuajñala.

6 Náa xuajin rí muxnu̱u̱n levitas, mbá majun mani̱ndxu̱u̱ xuajin náa mambáyuminaʼ á mu mbáa naxíyáa xa̱bu̱ ga̱jma̱a̱ nagáyútóʼóo ikhí, ma̱ngaa muxnu̱u̱nla̱ i̱mbá 42 xuajin. 7 Mbá 48 xuajin dí muxnu̱u̱n bi̱ levitas xúʼko̱ má mbaaʼ náa rígá ra̱jxa̱. 8 Xuajin dí muxnu̱u̱nla mani̱ndxu̱u̱ dí rígá náa mbaaʼ dí nikhánún israelitas. Bi̱ itháan mbaʼin mbaʼa má xuajin gúxna, bi̱ nguéjmi̱i̱n nguéjma̱ má xuajin gúxna. Mámbá xuajin majkhaʼ mbaʼyóoʼ muxnún tikhuu xuajñún bi̱ levitas xó má dí ikhiin mudrigúu”.

9 Jeobá niʼtámíjná má xúʼko̱ ga̱jma̱a̱ Moisés, niʼthúu̱n: 10 “Aratamíjná gajmiáanʼ israelitas, arathún: ‹Makidáanʼla náa i̱mba̱ ridoo mañu Jordán ga̱jma̱a̱ mata̱ʼa̱la náa ku̱ba̱ʼ ndrígóo Canaán. 11 Gíʼmaa muraʼwi̱i̱ xuajin rí xájyúuʼ muʼguala, mu majmaa xóo xuajin dí mu̱ni̱ káwúmijnála, ikhí ma̱ndoo magáyúu maʼga mbáa bi̱ táxíyáa kiejuunʼ ndxájuu. 12 Xuajin rígi̱ mambáyala mu̱ni̱ káwúmíjná náa ñawúunʼ bi̱ kaʼyoo maru̱ma̱a̱ eʼdiuu bi̱ nikháñuu, mu xúʼko̱ bi̱ nixíyáa xa̱bu̱ xákháñúu nákha xóó tsémbánuu numuu náa inún xa̱bu̱ xuajin.* 13 Náa mbá majun xuajin dí ma̱xnala majmaa mu mu̱ni̱ káwúmíjnála. 14 Muxnala ajtsú xuajin gi̱i̱ náa ridoo Jordán ga̱jma̱a̱ ajtsú xuajin náa ku̱ba̱ʼ ndrígóo Canaán mu majmaa xóo xuajin dí mu̱ni̱ káwúmíjnála. 15 Mbá majun xuajin rígi̱ muni̱ káwúmíjná israelitas, xa̱bu̱ bi̱ naguwaáʼ ga̱jma̱a̱ xa̱bu̱ bi̱ nanújngún bi̱ kúwá náa majñu̱únʼ ikhiin, asndu tsáa bi̱ táxíyáa kiejuunʼ mbáa magáyúu maʼga ikhí.

16 Á mu mbáa naxnúu ndxájuu ga̱jma̱a̱ mbá ajua̱nʼ rí asndu naxíyáa, ikhaa nindxu̱u̱ mbáa bi̱ nagudíin xa̱bu̱. Mbaʼyóoʼ makhañúu. 17 Á mu naxnúu ga̱jma̱a̱ mbá itsí rí kaʼnii maxíyáa ga̱jma̱a̱, xa̱bu̱ bi̱ nagawúunʼ nakháñuu, ikhaa nindxu̱u̱ mbáa bi̱ nagudíin xa̱bu̱. Mbaʼyóoʼ makhañúu. 18 Á mu naxnúu ga̱jma̱a̱ mbá ixi̱ rí kaʼnii maxíyáa ga̱jma̱a̱, xa̱bu̱ bi̱ nagawúunʼ nakháñuu, ikhaa nindxu̱u̱ mbáa bi̱ nagudíin xa̱bu̱. Mbaʼyóoʼ makhañúu.

19 Bi̱ kaʼyoo maru̱ma̱a̱ eʼdiuu bi̱ nikháñuu, maxíyáa índo̱ gaxkamaa bi̱ nixíyáa bi̱ kaʼyoo. 20 Á mu mbáa xa̱bu̱ nakháñuu numuu rí mbáa bi̱ nakiʼnáa kaʼyoo nirmajngua̱a̱nʼ o rígá mbá rí nixnúu ga̱jma̱a̱ índo̱ nagiʼtu̱u̱n maxnúu, 21 á mu nakháñuu numuu rí mbáa bi̱ nakiʼnáa kaʼyoo nixnúu ga̱jma̱a̱ puñete asndu naxíyáa, xa̱bu̱ bi̱ nixnúu mbaʼyóoʼ makhañúu. Nindxu̱u̱ mbáa bi̱ nagudíin xa̱bu̱. Bi̱ kaʼyoo maru̱ma̱a̱ eʼdiuu bi̱ nikháñuu, maxíyáa ikhaa índo̱ gáxkamaa.

22 Á mu mbáa maski má táʼni kiejuunʼ ni má tsíkiʼnáa kaʼyoo nirmajngua̱a̱nʼ mbáa xa̱bu̱ o nidaʼ mbá rí nixnúu ga̱jma̱a̱ maski má tági̱ʼthu̱u̱n maxnúu, 23 á mu mbáa asndu táʼyoo xóo niʼni rí maxpatrámáʼ mbá itsí náa edxu̱u̱ mbáa xa̱bu̱ maski ajndu na̱nguá kiʼnáa kaʼyoo ni má tséyáʼ rí maʼni gawúunʼ ga̱jma̱a̱ xa̱bu̱ nakháñuu, 24 ikhú xa̱bu̱ xuajin gíʼmaa munimbáníí numuu bi̱ niʼni gawúunʼ mbáa ga̱jma̱a̱ bi̱ kaʼyoo maru̱ma̱a̱ eʼdiuu bi̱ nikháñuu xó má ikha dí gíʼmaa maguma. 25 Xa̱bu̱ xuajin mbaʼyóoʼ muni kríyaaʼ bi̱ nixíyáa xa̱bu̱ náa ñawúunʼ bi̱ kaʼyoo maru̱ma̱a̱ eʼdiuu bi̱ nikháñuu ga̱jma̱a̱ magúun kuya̱a̱ náa xuajin dí naʼni kríyamínáʼ náa nigáyútoʼoo, ikhaa mbaʼyóoʼ maxtáa ikhí asndu índo̱ gákáñúu ndxajkun bi̱ phú kayá edxu̱u̱, bi̱ nixtiyáaʼ ga̱jma̱a̱ aceite dí mikaʼwu.

26 Á mu bi̱ nixíyáa xa̱bu̱ nagájnuu náa kri̱ga̱ ndawaa ndrígóo xuajin dí maʼni kríyamínáʼ náa nigáyutoʼoo 27 ga̱jma̱a̱ bi̱ kaʼyoo maru̱ma̱a̱ eʼdiuu bi̱ nikháñuu naxkamaa náa ndawaa ndrígóo xuajin dí naʼni kríyamínáʼ ga̱jma̱a̱ naxíyáa, bi̱ kaʼyoo maru̱ma̱a̱ eʼdiuu bi̱ nikháñuu ragíʼdoo aʼkhúun. 28 Numuu rí bi̱ nixíyáa xa̱bu̱ gíʼmaa maxtáa náa xuajin rí naʼni kríyamínáʼ asndu índo̱ gákháñuu ndxajkun bi̱ phú kayá edxu̱u̱. Mú nda̱wa̱á dí gákháñuu ndxajkun bi̱ phú kayá edxu̱u̱, ikhaa ma̱ndoo matanga̱a̱ náa mbayuuʼ. 29 Ikha rígi̱ mani̱ndxu̱u̱ mbá kiʼtáñajuunʼ rí munimbaníí á mu narígá xígi̱ kaʼnii asndu náa má gákuwáanʼ, xúʼko̱ má e̱jña̱la bi̱ maguwáʼ rakúwá nda̱wa̱á.

30 Asndu tsáa bi̱ gáxíyáa mbáa xa̱bu̱ gíʼmaa makhañúu, á mu kúwá bi̱ ndiyáá rí gíʼdoo aʼkhúun, mú nimbáa xa̱bu̱ xándoo makhañúu á mu kááʼ mbáwíí xtáa bi̱ ndiʼyoo. 31 Xáʼyóoʼ mundrígúla dí maʼtsíríyamina̱a̱ʼ mbáa bi̱ nixíyáa xa̱bu̱ bi̱ kaʼyoo makhañúu, numuu rí ndayóoʼ makhañúu tsiaki̱i̱. 32 Xúʼko̱ má xándoo mundrígúla dí maʼtsíríyamina̱a̱ʼ mbáa xa̱bu̱ bi̱ nigáyutoʼoo náa xuajin dí maʼni kríyamínáʼ mu xúʼko̱ ma̱ndoo matanga̱a̱ náa ku̱bo̱ʼ, á mu xóó tsékháñuu ndxajkun bi̱ phú kayá edxu̱u̱.

33 Xáʼyóoʼ muni̱ gachííla ku̱ba̱ʼ náa kuwáanʼ, numuu rí eʼdi naʼni gachúu ku̱ba̱ʼ, xándoo maguma kaʼwi̱i̱ eʼdi rí nigadíí á mu tségadíí eʼdiuu xa̱bu̱ bi̱ nixíyáa. 34 Xáʼyóoʼ muni̱ gachííla ku̱ba̱ʼ náa kuwáanʼla, náa ikhúún xtáá, numuu rí ikhúún Jeobá xtáá náa majñu̱únʼ xa̱bu̱ xuajin Israel›”.

36 Bi̱ kuya̱ edxu̱u̱ náa mámbá guʼwún e̱ji̱i̱n Galaad, a̱ʼdióo Makir, a̱ʼdióo Manasés, bi̱ naguwáʼ náa guʼwún e̱ji̱i̱n José, nigún kanuu ga̱jma̱a̱ nitamijná gajmiún Moisés ma̱ngaa bi̱ kuya̱ edxu̱u̱ náa israelitas. 2 Nithi: “Jeobá nikuʼmáá ikháán tátá Moisés mu maraxníín ku̱ba̱ʼ xó má gágájnuu náa suerte* rí mudrigúu israelitas, Jeobá nikuʼmáá ikháán mu maraxnu̱u̱n mbaaʼ dí kaʼyoo ndxájuxu̱ Zelofehad mu makánún waʼxiinʼ. 3 Á mu ikhiin nunuju̱n’ gajmiún xa̱bekha bi̱ kúwá náa i̱mba̱ xuajin majkhaʼ* ndrígóo Israel, dí mudrigúu gu̱ʼu̱ bugi̱ maniñuuʼ ranindxu̱u̱ ndrígún anu̱xu̱,* maʼni ndrígóo xuajin chíʼgíiʼ* náa ikhiin gúnuju̱nʼ, maniñuuʼ ranindxu̱u̱ rí kaʼyuxu̱ ikháanʼ. 4 Índo̱ gáʼganú tsiguʼ dí maguma káwíin náa Israel, rí nindrigúu gu̱ʼu̱ bugi̱ maʼga̱a̱ xígií náa xuajin majkhaʼ náa ikhiin ninuju̱nʼ, rí nida̱a̱ ni xáʼni dí kaʼyoo xuajin chíʼgíiʼ ndrígóo anu̱xu̱”.

5 Xó má Jeobá niʼtáñajunʼ Moisés, xúʼko̱ má niʼtáñajúúnʼ israelitas: “Gajkhun nindxu̱u̱ rí nuthi bi̱ naguwáʼ náa xuajin majkhaʼ ndrígún e̱ji̱i̱n José. 6 Rígi̱ rí niʼtáñajunʼ Jeobá ga̱jma̱a̱ numún waʼxiinʼ Zelofehad: ‹Ikhiin ma̱ndoo mudiin asndu tsíin má eñún ikhiin bi̱ naguwáʼ náa xuajin chíʼgíiʼ ndrígún anu̱ún. 7 Nimbá rí nindrigúu israelitas xándoo manújnga̱a̱ náa imbo̱o̱ xuajin chíʼgíiʼ, numuu rí israelitas gíʼmaa muguaʼdáá dí nindrigúu náa xuajin chíʼgíiʼ ndrígún wajin xiʼñúúnʼ. 8 Xúgíinʼ wa̱ʼxa̱ʼ* bi̱ nindrigúu rí guáʼdáá náa xuajin majkhaʼ ndrígóo Israel, mbaʼyóoʼ mbuya̱a̱ i̱ndó bi̱ na̱ʼkha̱ náa xuajin chíʼgíiʼ ndrígóo anu̱ún, mu xúʼko̱ israelitas muguáʼdáá dí nikhánún náa wajin xiʼñúúnʼ. 9 Nimbá rí nindrigúu xándoo manújnga̱a̱ náa i̱mba̱ xuajin chíʼgíiʼ, numuu rí mámbá xuajin majkhaʼ ndrígóo Israel gíʼmaa magiʼdoo rí nikhánúu›”.

10 Waʼxiinʼ Zelofehad nini xó má Jeobá niʼtáñajunʼ Moisés. 11 Xó má, Mahlá, Tirzá, Hoglá, Milcá ga̱jma̱a̱ Noá, waʼxiinʼ Zelofehad, nidiin e̱jñu̱ún a̱ngui̱i̱n anu̱ún. 12 Niguánú ninindxu̱ún guʼñu̱ún xa̱bekha bi̱ naguwáʼ náa goʼwóo Manasés a̱ʼdióo José mu xúʼko̱ rí nindrigúu maguanúu náa xuajin chíʼgíiʼ ndrígóo anu̱ún.

13 Rígi̱ nindxu̱u̱ kiʼtáñajunʼ ga̱jma̱a̱ xtángoo dí Jeobá nixnúu Moisés mu maxnún israelitas náa xkua̱ mijxooʼ ndrígóo Moab, náa mijngii Jordán, inuu Jericó.