NEHEMÍAS

1 Rígi̱ nindxu̱u̱ ajngóo Nehemías* a̱ʼdióo Hacalías. Nákhá gu̱nʼ kislev,* tsiguʼ 20, ikhúún xtáá náa guʼwá ñajunʼ* dí rígá náa Susa. 2 Nákhá mbiʼi rúʼko̱, Hananí, mbáa bi̱ náa a̱ngui̱nʼ, ni̱ʼkha̱nú gajmíi̱n tikhuun xa̱bu̱ Judá, ikhú nirajxu̱u̱n ga̱jma̱a̱ numún judíos bi̱ xóó nikáwíin náa nijkha kiʼdiin ma̱ngaa numuu Jerusalén. 3 Ikhiin niriʼñuʼ: “Bi̱ naguanún náa xuajin bi̱ nikáwíin náa ni̱jkha̱ kiʼdiin, ra̱ʼkhá tháán majthi̱ʼ ga̱jma̱a̱ ngíná kúwá. Xtájtsí ndrígóo Jerusalén niguma gámbáa ga̱jma̱a̱ xkrugoo nikha̱a̱”.

4 Índo̱ nidxawuun rígi̱, niʼgúnʼ ga̱jma̱a̱ nigíʼdu̱u̱ nimbi̱ya̱ʼ. Nixtáá ngíná mba̱yu̱u̱ʼ mbiʼi, nirkuéyiminaʼ* ga̱jma̱a̱ nitakáñuu Dios bi̱ naʼtáñajunʼ mekhuíí. 5 Nitha̱: “Jeobá, Dios bi̱ naʼtáñajunʼ mekhuíí, Dios bi̱ mba̱a̱ ga̱jma̱a̱ gamíi bi̱ naʼnimbánuu dí nakudaminaʼ maʼni ga̱jma̱a̱ nasngájmúún ngajua rí tsétumuu* bi̱ nandún kuyáá ma̱ngaa bi̱ nunimbu̱u̱n kiʼtáñajunʼ ndrígóo, 6 Mbá péñu,* atagíʼ cháʼwaanʼ matadxawíín ga̱jma̱a̱ atiejxi̱ má xúʼko̱, atadxawíín dí xtáa raʼtájkháan xa̱bia̱a̱ʼ, dí xúgi̱ xtáá ratakáñáaʼ. Mbiʼíí mbruʼun natajkháan ga̱jma̱a̱ numún xa̱bia̱a̱ʼ bi̱ nindxu̱ún israelitas, na̱tha̱ aʼkhá dí nikudaminaʼ xuajñaanʼ Israel. Xó má ikhúún ga̱jma̱a̱ bi̱ kúwíin náa goʼwóo anu̱ʼ* nixuʼdámíjnáxu̱ aʼkhá. 7 Gajkhun dí ni̱ni̱ gachímijnáxu̱ ga̱jma̱a̱ nixuʼdámíjná aʼkhá náa ikháán numuu dí túnimbuxu̱ kiʼtáñajunʼ ndrígáaʼ ga̱jma̱a̱ ikha ma̱ngaa xtángoo dí niraxnáá xa̱bia̱a̱ʼ Moisés.

8 Mbá péñu, garmáʼáan a̱jkia̱a̱nʼ dí niratháán xa̱bia̱a̱ʼ Moisés: ‹Á mu ikháanʼ na̱nguá guajún jmbu náa inuʼ, ikhúún maxidiráʼáanʼ náa i̱ʼwáʼ xuajin. 9 Á mu natangáanʼla náa ikhúún ga̱jma̱a̱ nunimbala kiʼtáñajunʼ ndrígóʼ, tséʼniuu á mu najuidiráʼáanʼ asndu náa iwáá naguámbári̱go̱o̱ ku̱ba̱ʼ, asndu ikhí magímbáanʼla, maʼkháaʼ kaguáanʼ náa mbaaʼ rí ikhúún niraʼwi̱i̱ marigá mbiʼyuʼ›. 10 Ikhiin nindxu̱ún xa̱bia̱a̱ʼ ga̱jma̱a̱ xuajñaanʼ. Ikháán nitani̱ káwíin ga̱jma̱a̱ tsiaki̱i̱ ndrígáaʼ ma̱ngaa ñawáanʼ dí gíʼdoo tsiaki̱i̱. 11 Mbá péñu Jeobá, atagíʼ cháʼwaanʼ matadxun rí naʼtájkháan xa̱bia̱a̱ʼ ma̱ngaa rí nutajkháan xa̱bia̱a̱ʼ bi̱ namíñúún kuyáá mbiʼyaaʼ ga̱jma̱a̱ xúgíʼ a̱jkiu̱ún. Mbá péñu, atani̱ rí magajnúu májánʼ dí gáʼni xa̱bia̱a̱ʼ xúgi̱. Atani̱ dí rey magáwíinʼ a̱jkiu̱u̱n kaʼyoʼ”.

Nákhá ikhú, ikhúún nindxu̱ʼ copero ndrígóo rey.

2 Nákhá gu̱nʼ nisán,* tsiguʼ 20 rí xtáa raʼtáñajunʼ rey Artajerjes, niguwáʼ kuñu̱u̱n vino náa inuu rey. Xó má naguʼunʼ na̱ni̱ nigua̱jtúun vino ga̱jma̱a̱ niguxíñáʼ maga̱a̱n. Ikhúún nimbá miʼtsú tséxtáá ngíná náa inuu. 2 Ikha jngóo rey niʼthúnʼ: “Nda̱yo̱o̱ rí xtaa ngíná. Dí lá gíʼdaaʼ. Na̱nguá eʼniaaʼ nandii, mbáa rígá rí naʼniaʼ maraxtaa ngíná”. Ikhú ra̱ʼkhá tháán nimíñúʼ.

3 Ikhú ni̱thu̱u̱n rey: “¡Kámuu gáraxtaa rey! Xtáá ngíná numuu rí xuajin náa nijuaʼdi̱ín wajin xiʼñúnʼ niguma gámbáa ga̱jma̱a̱ xkrugoo nikha̱a̱”. 4 Rey nirajxu̱ʼ: “Ndiéjunʼ eyaaʼ matani̱ rá.” Mbá nacha̱ nitakáñuu Dios bi̱ naʼtáñajunʼ mekhuíí. 5 Ikhú niriʼñuu: “Á mu rey ndaʼyoo rí májánʼ ga̱jma̱a̱ naʼni a̱jkiu̱u̱n kaʼyoo xa̱bi̱i̱, ataxúʼmún maʼgá Judá náa xuajin rí nijuaʼdi̱ín wajin xiʼñúnʼ mu ma̱ni̱ májáanʼla”. 6 Ikhú rey gíʼ ga̱jma̱a̱ reina náa níjniúu, índo̱ niʼthúnʼ: “Nguáthá mba̱yu̱u̱ʼ gídxúʼ ga̱jma̱a̱ nguáná gídxa̱a̱ʼ rá.” Ikha jngóo rey ndiʼyoo dí májánʼ rí makungu̱u̱nʼ ga̱jma̱a̱ ikhúún ni̱thu̱u̱n mbiʼi rí xáxtáá.

7 Nda̱wa̱á ni̱thu̱u̱n rey: “Á mu rey ndaʼyoo rí májánʼ, rí maxnúʼ mbá i̱yi̱i̱ʼ dí na̱jkha̱ inún xa̱bu̱ ñajunʼ, bi̱ kúwá náa mbaaʼ dí rígá xígií náa narámaaʼ a̱jkha̱ʼ* náa mañu Éufrates,* mu muniñuʼ manújngoʼ asndu índo̱ gáʼgánú náa Judá. 8 Ma̱ngaa maxnúʼ mbá i̱yi̱i̱ʼ rí maʼga inuu Asaf, bi̱ nañewu̱u̱n Xaná ndrígóo Rey,* mu xúʼko̱ maxnúʼ ixi̱ rí ma̱ni̱ ga̱jma̱a̱ riejuun guʼwá náa makuwá soldado dí gíʼ mijngii náa Guʼwá,* ga̱jma̱a̱ náa xtájtsí rí kúgumaʼá náa xuajin ma̱ngaa náa guʼwá rí ikhúún maxtáá”. Numuu rí Dios ndrígóʼ bi̱ májáanʼ a̱jkiu̱u̱n* nixtáa ga̱jmá nindxu̱ʼ, ikha jngóo rey nixnúʼ i̱yi̱i̱ʼ rígi̱.

9 Nda̱wa̱á nijkhánú náa kúwá xa̱bu̱ ñajunʼ náa mbaaʼ dí rígá xígií náa narámaaʼ a̱jkha̱ʼ náa mañu Éufrates ga̱jma̱a̱ nixnu̱u̱n i̱yi̱i̱ʼ rí nixnúʼ rey. Ma̱ngaa rey nikuʼmiin bi̱ kuya̱ edxu̱u̱ náa soldado ga̱jma̱a̱ bi̱ kudrúwíin wáyú. 10 Índo̱ Sanbalat xa̱bu̱ horonita ga̱jma̱a̱ Tobías xa̱bu̱ ñajunʼ ammonita nidxawíín rígi̱, ra̱ʼkhá tháán nikiʼníin rí mbáa ni̱ʼkha̱ mu mambáñún xa̱bu̱ xuajin Israel.

11 Asndu náá ni̱ʼkhánú náa Jerusalén. Ajtsú mbiʼi nda̱wa̱á, 12 nigújxúunʼ mbruʼun gajmíʼ nguáthi̱i̱n xa̱bu̱ bi̱ ni̱jkhá gajmíʼ na̱nguá ni̱thu̱u̱n nimbáa rí Dios nikuʼmún* ma̱ni̱ náa Jerusalén. I̱ndó xujkhúʼ bi̱ ni̱jkhá ka̱ya̱a̱ nindxu̱u̱ bi̱ kagrúwáan ni̱jkhá. 13 Ikha jngóo nigájnuʼ mbruʼun náa Xkrugua dí gíʼ xígií náa Mata,* ninújngoʼ náa inuu Puzu ndrígóo a̱bu̱nʼ Mba̱a̱* ga̱jma̱a̱ nijkhánú náa Xkrugua náa rígá Ru̱tsu̱u̱ Idiʼ.* Ndi̱yo̱o̱ xóo niguanúu xtájtsí rí kúgumaʼá ga̱jma̱a̱ Jerusalén niguámbáa ga̱jma̱a̱ xkrugua ndrígóo nikha̱a̱ mbá kayuuʼ. 14 Nda̱wa̱á ni̱jkhá náa Xkrugua náa rígá Puzu* ga̱jma̱a̱ asndu náa Laguna ndrígóo Rey,* mú na̱nguá ma̱ja̱nʼ náa manújngoo xujkhúʼ bi̱ ikhúún kagrúwáan ni̱jkhá. 15 Maski má mbruʼun ni̱jkhá má xúʼko̱ xígií náa mata ga̱jma̱a̱ ni̱jkhá ra̱yo̱o̱ xtájtsí. Nda̱wa̱á nitangu̱ún, nita̱ʼa̱a̱ʼ náa Xkrugua dí gíʼ xígií náa Mata.

16 Xa̱bu̱ ñajunʼ bi̱ raguáʼdáá wéñuuʼ numún na̱nguá ndiyáá náá ni̱jkhá ni ma tséyáá ndiéjunʼ xtáá ra̱ni̱. Numuu rí xóó tsétúu̱n nditháan, ni má judíos ni má ndxajkun ni má bi̱ kuya̱ edxu̱u̱ ni má xa̱bu̱ ñajunʼ bi̱ raguáʼdáá wéñuuʼ numún ni má eʼwíinʼ bi̱ nuñajunʼ. 17 Nda̱wa̱á ni̱thu̱u̱n: “Ikháanʼ rí ndu̱ya̱a̱ rí ngíná wéñuuʼ kuwáanʼlu, Jerusalén niguma gámbáa ga̱jma̱a̱ xkrugoo nikha̱a̱. Guʼgua̱ gúʼni̱ májáanʼ xtájtsí ndrígóo Jerusalén ga̱jma̱a̱ guʼni gámbáa majthi̱ʼ rígi̱”. 18 Nda̱wa̱á ni̱thu̱u̱n xú káʼnii Dios ndrígóʼ bi̱ májáanʼ a̱jkiu̱u̱n nixtáa ga̱jma̱á nindxu̱ʼ ga̱jma̱a̱ ni̱thu̱u̱n rí niʼthúnʼ rey. Índo̱ nidxawíín rí ni̱thu̱u̱n ikhiin nithi: “¡Gugíʼdi̱i̱ má muñajunʼ!”. Mámbáa rí ikhiin nixnamíjná tsiaki̱i̱ muni̱ ñajunʼ rígi̱.

19 Índo̱ Sanbalat xa̱bu̱ horonita ga̱jma̱a̱ Tobías bi̱ kayá edxu̱u̱ náa ammonita ma̱ngaa Guésem bi̱ nindxu̱u̱ árabe nidxawíín rígi̱, nigíʼdi̱i̱ nitsijmáanʼxu̱ túyamajkuxu̱ ga̱jma̱a̱ nithuxu̱: “Ndiéjunʼ kuwáanʼla runi̱ rá. Lá nuxuxímíjná náa inuu rey ráʼ.” 20 Ikhúún niriʼñúún: “Dios bi̱ naʼtáñajunʼ mekhuíí maʼni rí magajnúu májánʼ ñajunʼ. Ikháanʼxu̱ bi̱ nindxu̱xu̱ xa̱bi̱i̱, mu̱ni̱ májáanʼxu̱ xtájtsí. Mu ikháanʼla nda̱a̱ rí kuaʼdáá náa Jerusalén, na̱nguá kuaʼdáá numala ni má nda̱a̱ rí ni̱ni̱la mu marmáʼáan a̱jkiu̱ún kuyala, mu xúʼko̱ mu̱tha̱ dí rígá rí kaʼyala”.

3 Eliasib ndxajkun bi̱ phú kayá edxu̱u̱ ga̱jma̱a̱ a̱ngui̱i̱n bi̱ nindxu̱ún ndxajkun nigíʼdi̱i̱ nini̱ májáanʼ Xkrugún Mugu̱.* Nini̱ ka̱ʼwi̱i̱ ga̱jma̱a̱ nixuda̱a̱ʼ xkrugua. Ma̱ngaa nini̱ ka̱ʼwi̱i̱ náa Guʼwá mitsídánʼ* ndrígóo Meá asndu náa Guʼwá mitsídánʼ ndrígóo Hananel. 2 Xa̱bu̱ Jericó nini̱ májáanʼ náa i̱mba̱ xíʼtóo xtájtsí. Zacur a̱ʼdióo Imrí niʼni májáanʼ náa i̱mba̱ xíʼtóo.

3 E̱ji̱i̱n Hasenaá nini̱ májáanʼ Xkrugoo E̱gi̱ʼ.* Nitsuajun ixi̱ náa maʼni riejuun ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. 4 Meremot, a̱ʼdióo Uriya, a̱ʼdióo Hacoz, niʼni májáanʼ náa i̱mba̱ xíʼtóo xtájtsí, Mesulam, a̱ʼdióo Berekías, a̱ʼdióo Mesezabel, niʼni májáanʼ náa i̱mba̱ xíʼtóo xtájtsí ga̱jma̱a̱ Sadoc a̱ʼdióo Baaná niʼni májáanʼ náa i̱mba̱ xíʼtóo xtájtsí. 5 Xa̱bu̱ tecoítas nini̱ májáanʼ náa i̱mba̱ xíʼtóo xtájtsí, mú xa̱bu̱ bi̱ guáʼdáá numún tágún gúñajunʼ numuu rí táʼndún majuiʼtañajúúnʼ.

6 Joiadá a̱ʼdióo Paséah ga̱jma̱a̱ Mesulam a̱ʼdióo Besodeya nini̱ májáanʼ Xkrugoo Xuajin Wayuu.* Nitsuajun ixi̱ náa maʼni riejuun ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. 7 Melatías bi̱ nindxu̱u̱ xa̱bu̱ gabaonita ga̱jma̱a̱ Jadón bi̱ nindxu̱u̱ xa̱bu̱ meronotita nini̱ májáanʼ náa i̱mba̱ xíʼtóo xtájtsí. Ikhiin nindxu̱ún xa̱bu̱ bi̱ naguwáʼ náa Gabaón ga̱jma̱a̱ náa Mizpá, bi̱ kaʼñún náa naʼtáñajunʼ xa̱bu̱ ñajunʼ bi̱ xtáa xígií náa mbaaʼ náa narámaaʼ a̱jkha̱ʼ* náa mañu Éufrates. 8 Uziel a̱ʼdióo Harhaya, nindxu̱u̱ mbáa bi̱ nañajunʼ ga̱jma̱a̱ oro, niʼni májáanʼ náa i̱mba̱ xíʼtóo xtájtsí. Ga̱jma̱a̱ Hananías, bi̱ naʼni mújúunʼ rí ndataun, niʼni májáanʼ náa i̱mba̱ xíʼtóo xtájtsí. Ikhiin nijmún itsí mu mugíʼ piso náa kamba̱a̱ náa Jerusalén asndu náa Xtájtsí rí Ma̱ja̱nʼ.* 9 Refayá a̱ʼdióo Hur niʼni májáanʼ náa i̱mba̱ xíʼtóo xtájtsí. Ikhaa nindxu̱u̱ príncipe náa mbá ta̱pa̱ mbayuuʼ Jerusalén. 10 Jedayá a̱ʼdióo Harumaf niʼni májáanʼ náa i̱mba̱ xíʼtóo xtájtsí, dí kri̱ga̱ náa inuu goʼwóo. Ga̱jma̱a̱ Hatús a̱ʼdióo Hasabneya niʼni májáanʼ náa i̱mba̱ xíʼtóo xtájtsí.

11 Malkiya a̱ʼdióo Harim ga̱jma̱a̱ Hasub a̱ʼdióo Pahat-Moab nini̱ májáanʼ náa i̱mba̱ xíʼtóo xtájtsí, xúʼko̱ má Guʼwá mitsídánʼ náa rígá Horno.* 12 Náa i̱mba̱ xíʼtóo xtájtsí niʼni májáanʼ Salum a̱ʼdióo Halohés gajmíi̱n waʼxiinʼ. Ikhaa nindxu̱u̱ príncipe náa mbá ta̱pa̱ mbayuuʼ Jerusalén.

13 Hanún gajmíi̱n xa̱bu̱ Zanóah nini̱ májáanʼ Xkrugua dí gíʼ xígií náa Mata.* Nini̱ májáanʼ ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. Ma̱ngaa nini̱ májáanʼ mbá 445 metro* xtájtsí asndu náa Xkrugua náa rígá Ru̱tsu̱u̱ Idiʼ.* 14 Malkiya a̱ʼdióo Recab, bi̱ nindxu̱u̱ príncipe náa mbayuuʼ Bet-Hakerem, niʼni májáanʼ Xkrugua náa rígá Ru̱tsu̱u̱ Idiʼ. Niʼni májáanʼ ga̱jma̱a̱ nikuda̱a̱ʼ xkrugua ma̱ngaa ixi̱ mbi̱jua̱ rí magugua̱a̱ ga̱jma̱a̱.

15 Salún a̱ʼdióo Colhozé, bi̱ nindxu̱u̱ príncipe náa mbayuuʼ Mizpá, niʼni májáanʼ Xkrugua náa rígá Puzu.* Niʼni májáanʼ ma̱ngaa niʼni goʼwóo ga̱jma̱a̱ nikuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. Ma̱ngaa niʼni májáanʼ xtájtsí ndrígóo Laguna náa na̱jkha̱ kúʼwúun iyaʼ,* rí gíʼ xígií náa rígá Jardín* ndrígóo Rey, asndu náa Escalera rí nagajta̱a̱ náa Xuajñuu David.

16 Nehemías a̱ʼdióo Azbuc, bi̱ nindxu̱u̱ príncipe náa mbá ta̱pa̱ mbayuuʼ Bet-Zur, niʼni májáanʼ náa i̱mba̱ xíʼtóo xtájtsí, náa inuu rí Nijuiʼdi̱i̱ David* asndu náa tanque rí niguma ma̱ngaa asndu náa Guʼwún bi̱ guáʼdáá Tsiaki̱i̱.*

17 Levitas nini̱ májáanʼ náa i̱mba̱ xíʼtóo xtájtsí, bi̱ ndiyá edxu̱u̱ ikhí nindxu̱u̱ Rehúm a̱ʼdióo Baní, Hasabías, bi̱ nindxu̱u̱ príncipe náa mbá ta̱pa̱ mbayuuʼ Queilá, niʼni májáanʼ náa i̱mba̱ xíʼtóo xtájtsí ga̱jma̱a̱ numuu xuajñuu. 18 A̱ngiu̱ún ikhiin nini̱ májáanʼ náa i̱mba̱ xíʼtóo xtájtsí. Bi̱ ndiyá edxu̱u̱ ikhí nindxu̱u̱ Bavái a̱ʼdióo Henadad, bi̱ nindxu̱u̱ príncipe náa mbá ta̱pa̱ mbayuuʼ Queilá.

19 Náa i̱mba̱ níjniúu, Ézer a̱ʼdióo Jesúa, bi̱ nindxu̱u̱ príncipe náa Mizpá, niʼni májáanʼ náa i̱mba̱ xíʼtóo xtájtsí náa inuu rí naxtagijxi̱i̱ ajua̱nʼ, dí wíji̱ kayóo xtájtsí.

20 Ikhú, Baruc a̱ʼdióo Zabái niñajunʼ gakhi̱i̱ wéñuuʼ ga̱jma̱a̱ niʼni májáanʼ náa i̱mba̱ xíʼtóo xtájtsí, náa wíji̱ dí kayóo xtájtsí asndu náa riejuun goʼwóo Eliasib ndxajkun bi̱ phú kayá edxu̱u̱.

21 Ma̱ngaa Meremot, a̱ʼdióo Uriya, a̱ʼdióo Hacoz, niʼni májáanʼ i̱mba̱ xíʼtóo xtájtsí, náa riejuun goʼwóo Eliasib asndu náa nawámbárigo̱o̱ goʼwóo Eliasib.

22 Ndxajkun bi̱ kúwá náa mbayuuʼ Jordán nini̱ májáanʼ náa i̱mba̱ xíʼtóo xtájtsí. 23 Benjamín ga̱jma̱a̱ Hasub nini̱ májáanʼ náa i̱mba̱ xíʼtóo xtájtsí, dí kri̱ga̱ mijngii náa inuu guʼwún. Azarías, a̱ʼdióo Maaseya, a̱ʼdióo Ananíah, niʼni májáanʼ náa i̱mba̱ xíʼtóo, dí kri̱ga̱ mijngii náa goʼwóo. 24 Ga̱jma̱a̱ Binuí a̱ʼdióo Henadad niʼni májáanʼ náa i̱mba̱ xíʼtóo xtájtsí, náa nagi̱ʼdu̱u̱ goʼwóo Azarías asndu náa wíji̱ dí kayóo xtájtsí ma̱ngaa asndu náa eskíniu̱u̱.

25 Palal a̱ʼdióo Uzái niʼni májáanʼ náa i̱mba̱ xíʼtóo xtájtsí dí kri̱ga̱ náa inuu dí wíji̱ kayóo xtájtsí ga̱jma̱a̱ guʼwá mitsídánʼ rí na̱jkha̱ xígií náa Goʼwóo Rey,* dí gíʼ itháan rijma̱a̱ náa Rexo̱o̱ náa gíi̱nʼ bi̱ Nuñewa̱a̱n.* Pedaya a̱ʼdióo Parós niʼni májáanʼ náa i̱mba̱ xíʼtóo.

26 Xa̱bu̱ bi̱ nuñejunʼ náa guʼwá rí nduyamajkuíí Dios* bi̱ kúwíin náa Ofel nini̱ májáanʼ asndu náa inuu Xkrugua dí rígá Iyaʼ* náa xígií nagájnuu a̱jkha̱ʼ* náa guʼwá dí nakujmaa itháan mitsídánʼ.

27 Ikhú xa̱bu̱ tecoítas nini̱ májáanʼ náa i̱mba̱ xíʼtóo xtájtsí, náa inuu guʼwá mitsídánʼ dí nakujmaa itháan asndu náa xtájtsí ndrígóo Ofel.

28 Ndxajkun nini̱ májáanʼ náa i̱mba̱ xíʼtóo xtájtsí dí kri̱ga̱ itháan rijma̱a̱ náa Xkrugún Wáyú.* Mámbáa niñajunʼ náa inuu goʼwóo.

29 Sadoc a̱ʼdióo Imer niʼni májáanʼ náa i̱mba̱ xíʼtóo xtájtsí, dí kri̱ga̱ náa inuu goʼwóo.

Semaya a̱ʼdióo Secanías, bi̱ nañewu̱u̱n Xkrugua náa narámaaʼ a̱jkha̱ʼ,* niʼni májáanʼ náa i̱mba̱ xíʼtóo xtájtsí.

30 Ikhú, Hananías a̱ʼdióo Selemías ga̱jma̱a̱ Hanún, bi̱ maʼni majuiin e̱ji̱i̱n Zalaf, nini̱ májáanʼ náa i̱mba̱ xíʼtóo xtájtsí.

Mesulam a̱ʼdióo Berekías niʼni májáanʼ náa i̱mba̱ xíʼtóo xtájtsí, dí kri̱ga̱ náa inuu goʼwóo.

31 Ma̱ngaa Malkiya, bi̱ ma̱ngaa nindxu̱u̱ bi̱ nañajunʼ ga̱jma̱a̱ oro, niʼni májáanʼ náa i̱mba̱ xíʼtóo xtájtsí, dí na̱jkha̱ xígií náa guʼwún xa̱bu̱ bi̱ nuñajunʼ náa guʼwá rí nduyamajkuíí Dios* ma̱ngaa náa guʼwún bi̱ nugujua̱ náa inuu Xkrugua náa nduyáá á mu xúgíʼ rígá májánʼ* asndu náa cuarto dí grígu tsu̱du̱u̱ náa eskíniu̱u̱.

32 Xa̱bu̱ bi̱ nuñajunʼ ga̱jma̱a̱ oro ga̱jma̱a̱ bi̱ nugujua̱ nigíʼdi̱i̱ nini̱ májáanʼ xtájtsí asndu náa cuarto dí grígu náa eskíniu̱u̱ asndu náa Xkrugún Mugu̱.

4 Índo̱ Sanbalat niʼdxawuun rí kuwáanʼxu̱ runi̱i̱ xtájtsí tánigu̱u̱ʼ ga̱jma̱a̱ nikiʼnáa wéñuuʼ, tániñuuʼ ratsíjmiin judíos. 2 Ikhú niʼthí náa inún a̱ngui̱i̱n ga̱jma̱a̱ náa inún soldado bi̱ naguwáʼ náa Samaria: “Ndiéjunʼ eñún muni̱ judíos bugi̱ bi̱ nda̱a̱ rí ejmiin rá. Lá naku̱mu̱ún rí maʼngu̱u̱n i̱ndó ikhiin muni̱ ñajunʼ rígi̱ xáʼ. Lá muxnajxi̱ tsigijñaʼ ga̱jma̱a̱ mambún mbá mbiʼíí xáʼ. Lá naku̱mu̱ún rí ma̱ndoo xóó majmúún itsí rí tuáʼán náa ru̱tsu̱u̱ rí niguámbáa nikha̱a̱ ráʼ.”

3 Ikhú Tobías bi̱ nindxu̱u̱ xa̱bu̱ ammonita, bi̱ wíji̱ náa níjniúu, niʼthí: “Maʼngo̱o̱ má mbáa igi̱ gáʼni ngajxi̱i̱ xtájtsí dí kúwá runi̱i̱ á mu natsimuu ikhí”.

4 Ikhú nitajkháan: “Atadxawíín Dios ndrígóʼ, numuu rí nutsijmáanʼxu̱ ga̱jma̱a̱ nawiñu̱u̱nʼ ku̱yuxu̱. Atani̱ rí nutsijma matanga̱a̱ náa ikhiin.*

Atani̱ rí xáʼngu̱u̱n gúni̱ gajmiún xa̱bu̱ sia̱nʼ ndrígu̱ún ga̱jma̱a̱ maʼga kiʼdiin náa i̱mba̱ xuajin. 5 Xátani̱ jngudi̱i̱ rí nikiéʼkhúún ni má xátani̱ jngudi̱i̱ aʼkhá rí nini̱ náa inaaʼ, numuu rí ikhiin nitawéñúúnʼ bi̱ nuñejunʼ”.

6 Niñejunʼxu̱ má xúʼko̱ náa nini̱ májáanʼxu̱ xtájtsí, niruguamáʼánxu̱ xúgíʼ ga̱jma̱a̱ ninixu̱ mbá ta̱pha̱ rí mitsídánʼ. Ma̱ngaa xa̱bu̱ xuajin niñejunʼ ga̱jma̱a̱ xúgíʼ a̱jkiu̱ún náa ñajunʼ rígi̱.

7 Mú Sanbalat, Tobías, árabes, ammonitas ga̱jma̱a̱ xa̱bu̱ asdoditas nikásngañún wéñuuʼ índo̱ nidxawíín rí nu̱ni̱i̱xu̱ xtájtsí ndrígóo Jerusalén ma̱ngaa rí na̱jkha̱ ragido̱o̱ʼ ga̱jma̱a̱ rí na̱jkha̱ ragúguamáʼá. 8 Ikha jngóo xúgíinʼ niruwami̱jna̱ mu maguwáʼ guxmijná gajmiún Jerusalén ga̱jma̱a̱ muni̱ rí marigá xkujndu náa xuajin. 9 Ikhú nitákañííxu̱ Dios ndrígúxu̱ ga̱jma̱a̱ nindrigi̱i̱nxu̱ bi̱ muyejngoo mbiʼíí mbruʼun mu muñewuxu̱ náa ikhiin.

10 Mú kúwá tikhuun xa̱bu̱ Judá bi̱ nithi: “Bi̱ nuñajunʼ nánguá guáʼdáá tsiaki̱i̱ ga̱jma̱a̱ ra̱ʼkhá tháán mbaʼa itsí rí mbaʼyóoʼ mi̱ʼda̱ʼ. Nditháan má xáʼngulú gúʼni̱ májáanʼ xtájtsí”.

11 Xa̱bu̱ sia̱nʼ ndrígúxu̱ nithi: “Nákhá xóó tsédxawíín o xóó tséyulú, makuwáanʼlu náa majñu̱únʼ ikhiin ga̱jma̱a̱ muradíinʼlu mu xúʼko̱ muniña̱a̱ʼ ruñajunʼ”.

12 Índo̱ naguwáʼ judíos bi̱ kúwá mijngii náa kúwá xa̱bu̱ sia̱nʼ nuthuxu nángí eʼni:* “Xa̱bu̱ sia̱nʼ maguwáʼ náa xúgíʼ xuajin rí kúwáanʼxu mu muxmijná ga̱jma̱á nindxu̱xu̱”.

13 Ikha jngóo nigruigíin bi̱ nuyejngoo náa rí itháán mijmbaaʼ náa kidxuʼ xtájtsí ga̱jma̱a̱ náa nda̱a̱ rí mambáñún ma̱ngaa nigruigi̱i̱n mámbá nguéjmi̱i̱n. Kuda espadas, kudú* ga̱jma̱a̱ xkamídá. 14 Índo̱ ndi̱yo̱o̱ rí namíñúún wéñuuʼ, mbá nacha̱ ni̱jkhá gáthúu̱n bi̱ kuya̱ edxu̱u̱ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún ma̱ngaa xa̱bu̱ xuajin: “Xámiñalaʼ kuñu̱u̱n. Garmáʼáan a̱jkia̱la kuya̱a̱ Jeobá bi̱ mba̱a̱ ga̱jma̱a̱ gamíi, gúxmijná ga̱jma̱a̱ numún a̱ngia̱la, jiámiala, waʼxiala, guʼyala ga̱jma̱a̱ náa kúwáanʼlá”.

15 Índo̱ xa̱bu̱ sia̱nʼ gajmiúxu̱ nidxawíín rí ikháanʼxu̱ ndiya̱a̱ ndiéjunʼ nindúún muni̱ ga̱jma̱a̱ Dios bi̱ gajkhun niʼni rí xagájnuu májánʼ awan ndrígu̱ún. Nitangáanʼxu̱ niñajunʼ mu muni̱ xtájtsí. 16 Asndu nákha mbiʼi rúʼko̱, mbá ta̱phi̱i̱n xa̱bi̱ʼ nuñajunʼ náa nagu̱ma̱a̱ xtájtsí ga̱jma̱a̱ mbá ta̱phi̱i̱n kuda kudú, escudos, xkamídá ga̱jma̱a̱ ajua̱nʼ rí nañewu̱u̱n tsu̱xtu̱ún. Ga̱jma̱a̱ xúgíinʼ príncipes numbañún bi̱ naguwáʼ náa goʼwóo Judá, 17 bi̱ kúwá runi̱ májáanʼ xtájtsí, mbóó ñawúúnʼ eñajunʼ ga̱jma̱a̱, náa imbo̱o̱ ñawúúnʼ kuya̱ ajua̱nʼ. 18 Bi̱ nuñajunʼ kuya̱ mbá espada náa smídún índo̱ kúwá ruñajunʼ. Ga̱jma̱a̱ bi̱ ndayóoʼ mandiyuu chi̱ji̱ʼ wíji̱ náa níjniúʼ.

19 Ikhú ni̱thu̱u̱n bi̱ kuya̱ edxu̱u̱ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún ma̱ngaa xa̱bu̱ xuajin: “Ñajunʼ rí xtáa raguma nindxu̱u̱ mba̱a̱ wéñuuʼ, náa nagu̱ma̱a̱ xtájtsí na̱nguá ñajunʼxu mbóó, mámbáa kri̱ga̱a̱ rañajunʼ. 20 Ikha jngóo índo̱ gudxawíín aʼwóo chi̱ji̱ʼ, mugimbúmijnála xúgiáanʼ. Dios ndrígulú maxmína’ ga̱jma̱a̱ numulú”.

21 Índo̱ ndiʼkhún ejtsíri̱ga nugíʼdi̱i̱xu̱ má nuñajunʼ asndu índo̱ nakujmiin a̱ʼgua̱a̱n rí wakíʼ, mbá ta̱phi̱i̱n nuñajunʼ ga̱jma̱a̱ mbá ta̱phi̱i̱n kuda kudú. 22 Ikhú ni̱thu̱u̱n xa̱bu̱ xuajin: “Mámbáa xa̱biya̱ ga̱jma̱a̱ bi̱ nambáyúu makuwá náa awúu̱n Jerusalén. Muyejngoo dí mbruʼun ga̱jma̱a̱ rí mbiʼi muñajunʼ”. 23 Ni má ikhúún ni má a̱ngui̱nʼ ni má bi̱ numbayúʼ ni má bi̱ nuyejngoo ga̱jma̱a̱ bi̱ nagún ki̱dxu̱ʼ, tsérawíi xtíñuxuʼ. Ga̱jma̱a̱ náa ñawún mújúnxuʼ kudáxu ajua̱nʼ.

5 Ikhú xa̱bekha bi̱ kúwá náa xuajin ga̱jma̱a̱ guʼñu̱ún nigíʼdi̱i̱ nindxa̱ʼwa̱ gakhi̱i̱ ga̱jma̱a̱ numún a̱ngiu̱ún bi̱ nindxu̱ún judíos. 2 Tikhuun rí ikhiin nuthi: “Kuáʼdíinʼxu e̱jñu̱xu̱, nindxu̱xu̱ mbaʼáanʼ. Ndayúxuʼ mbuʼyáʼ itháan ganitsu muphúxu, mu xúʼko̱ ma̱ndoo makuwáanʼxu̱”. 3 Eʼwíinʼ nuthi: “Nándáa wéñuuʼ ganitsu, mu mbuʼyáʼ ganitsu, ndayóoʼ rí muxnajxí mbayuxu ga̱jma̱a̱ mbaaʼ náa kiʼdu uva ndrígúxu̱ ma̱ngaa guʼwúxu”. 4 Ga̱jma̱a̱ eʼwíinʼ nithi: “Mu, mu̱ni̱ numááxu dí naʼthí rey, nutíʼñááxu mbújkha̱a̱ ga̱jma̱a̱ nuxnajxí mbayuxu ga̱jma̱a̱ mbaaʼ náa kiʼdu uva ndrígúxu̱. 5 Nindxu̱xu̱ kaníkháanʼ* ga̱jma̱a̱ e̱jñu̱xu̱ guáʼdáá numún xó má guáʼdáá numún e̱jñu̱ún ikhiin. Maski ajndu xúʼko̱ ndayóoʼ rí muxnajxíi̱n jiámiúxu, waʼxiuxu xóo ñumbáá. Tikhuun waʼxiuxu nindxu̱ún má ñumbáá. Nda̱a̱ nimbá dí ma̱ndoo mu̱nixu̱, numuu rí mbayuxu ga̱jma̱a̱ mbaaʼ náa kiʼdu uva ndrígúxu̱, eʼwíinʼ niʼni̱i̱ ndrígu̱ún”.

6 Índo̱ nidxawuun rí nindxa̱ʼwa̱ ga̱jma̱a̱ ajngáa rí nithi, ra̱ʼkhá tháán nikiʼnún. 7 Nda̱wa̱á dí nindxaʼwamínáʼ ga̱jma̱a̱ numuu xkujndu rígi̱, nikruígíin bi̱ kuya̱ edxu̱u̱ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún. Ni̱thu̱u̱n: “Xúgiáanʼ ikháanʼla nandala muruma̱a̱ inuu náa a̱ngia̱la”.

Ga̱jma̱a̱ nigímbíin xúgíinʼ ga̱jma̱a̱ numuu rí nini̱. 8 Ni̱thu̱u̱n: “Ni̱ni̱xu asndu xó má eʼngo̱o̱ mu mutsiwíin a̱ngiu̱xu̱ bi̱ nindxu̱ún judíos náa nixtagujui̱i̱n náa i̱ʼwáʼ xuajin, mu xúʼko̱ mu̱ni̱ káwíinxu. Rí xúgi̱ nandala magujui̱i̱nla mbu̱júu̱ a̱ngia̱la ga̱jma̱a̱ ikháanʼxu̱ mbaʼyóoʼ mutsiwíinxu ráʼ.” Índo̱ nidxawíín rígi̱ niguanún wíí numuu dí nánguá eyáá dí muthi. 9 Ni̱tha̱ xóó: “Dí kuwáanʼ runila nindxu̱u̱ raʼkhí. Lá ra̱ʼkháa ndayóoʼ mamiñulúʼ kuʼyáá Dios ndrígulú, mu xúʼko̱ xuajin dí kúwíin xa̱bu̱ sia̱nʼ ndrígúlú xútsijmáánʼlú ráʼ. 10 Ikhúún mínu̱u̱ʼ, gajmíʼ a̱ngui̱nʼ ga̱jma̱a̱ bi̱ numbayúʼ kuwáanʼ ruxnatíʼñún mbújkha̱a̱ ga̱jma̱a̱ ganitsu. Mbá péñu guniʼñááʼ ruxnatíʼña ga̱jma̱a̱ inuu. 11 Mbá péñu gurtanga̱a̱ mbaaʼ náa kiʼdu uva ga̱jma̱a̱ náa rígá olivos ga̱jma̱a̱ guʼwá. Ma̱ngaa gurtanga̱a̱ inuu mbújkha̱a̱ dí ikháanʼ niruma̱a̱,* xó má ganitsu, vino nuxi̱ʼ ga̱jma̱a̱ aceite dí ikháanʼ nixnatíʼña”.

12 Ikhiin niriʼña: “Murtanga̱a̱ xúgíʼ ga̱jma̱a̱ nimbá xúruma̱a̱xu̱. Mu̱nixu̱ xó ma niratá”. Ikha jngóo nindxa̱ʼwu̱u̱n ndxajkun ga̱jma̱a̱ ni̱ni̱ rí muxna ajngún bi̱ nikiéʼkhúún ma̱ngaa dí munimbaníí rí nixudamíjna̱ muni̱. 13 Ma̱ngaa nixprígu̱u̱ xtíñúʼ* rí kaʼgíʼ ga̱jma̱a̱ ni̱thu̱u̱n: “Xígi̱ kaʼnii gáʼni Dios bi̱ gajkhun ga̱jma̱a̱ nindxu̱u̱ xa̱bu̱ bi̱ tsénimbánuu rí nikudaminaʼ, ni xágiʼdoo goʼwóo ni má mbayuuʼ. Xígi̱ kaʼnii gágajta káyííʼ ga̱jma̱a̱ ni xágiʼdoo nimbá”. Índo̱ nidxawíín rúʼko̱, xúgíinʼ xa̱bu̱ xuajin nithi “¡Xúʼko̱ gáʼni!”.* Nda̱wa̱á nigíʼdi̱i̱ nini̱ mba̱a̱ Jeobá. Ga̱jma̱a̱ xa̱bu̱ xuajin nigíʼdi̱i̱ ninimbaníí rí nixudamíjna̱ muni̱.

14 Asndu mbiʼi dí rey nigiúunʼ mu matañájunʼ náa ku̱ba̱ʼ ndrígóo Judá nákha tsiguʼ 20 asndu tsiguʼ 32 dí naʼtáñajunʼ rey Artajerjes, 12 tsiguʼ mbá xúgíʼ, ni ikhúún ni a̱ngui̱nʼ na̱nguá niphúxu ganitsu dí kaʼyoo xa̱bu̱ ñajunʼ. 15 Mú mixtiʼkhu xóo ninindxu̱ún xa̱bu̱ ñajunʼ bi̱ nikúwá nákha ginii nini̱ ngíníi xa̱bu̱ ga̱jma̱a̱ nirumiin 40 siclos* ndrígóo plata mámbá gájtsi mu xúʼko̱ marigá ganitsu* ga̱jma̱a̱ vino. Mangiin bi̱ numbañún nini̱ ngíníi xa̱bu̱ xuajin. Mú ikhúún na̱nguá ni̱ni̱ rígi̱ numuu rí namíñuʼ ka̱yo̱o̱ Dios.

16 Ikhúún mínu̱u̱ʼ niñambáá náa niguma májáanʼ xtájtsí. Xúgíinʼ bi̱ numbayúʼ nikúwá ruñajunʼ ikhí ga̱jma̱a̱ na̱nguá nitsixu̱ nimbá mbaaʼ. 17 Náa mesoʼ nuphiʼtsu mbá 150 judíos ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún, xó má xa̱bu̱ bi̱ naguwáʼ gúyuxu náa i̱ʼwáʼ xuajin. 18 Xúgíʼ mbiʼi nuxiyáa mbáa xedi̱ mu miʼkhuu ga̱jma̱a̱ mbá majuiinʼ mugu̱ bi̱ mijíin mangiin xujkhúʼ xnaʼ ga̱jma̱a̱ mámbá gu̱wa̱ʼ mbiʼi nujxnuxu̱ vino dí mixtiʼkhu enii. Maski ajndu xúʼko̱ ikhúún tánda̱ʼa̱ ganitsu rí kaʼyoo xa̱bu̱ ñajunʼ, numuu rí xa̱bu̱ xuajin guáʼdáá mbaʼa ñajunʼ rí kaʼñún munimbaníí. 19 Dios ndrígóʼ, garmáʼáan a̱jkia̱a̱nʼ xta̱yo̱ʼ ga̱jma̱a̱ atani̱ tsajkurámúúnʼ náa xúgíʼ rí ni̱ni̱ ga̱jma̱a̱ numuu xuajin rígi̱.

6 Sanbalat, Tobías, Guésem bi̱ nindxu̱u̱ árabe ga̱jma̱a̱ eʼwíinʼ xa̱bu̱ sia̱nʼ ndrígúxu̱, nidxawíín dí ikhúún xtáá rani̱i̱ xtájtsí ga̱jma̱a̱ rí nigu̱ma̱a̱ má xúgíʼ, maski ajndu xóó tígo̱o̱ makuʼdáaʼ xkrugua. 2 Mbá nacha̱, Sanbalat ga̱jma̱a̱ Guésem nixuʼma ajngáa rígi̱ náa inuʼ: “Ayi̱, muríyaʼ mbá mbiʼi mu magimbáánʼ náa mbá xuajin dí rígá náa xkua̱ ndrígóo Onó”. Mú awan rí guáʼdáá nindxu̱u̱ dí nandún muniu̱ʼ dí ra̱májánʼ. 3 Ikhú nikuʼmíi̱n bi̱ magún kuñu̱u̱n ajngáa rígi̱: “Xtáá ra̱ni̱ mbá ñajunʼ dí gíʼdoo wéñuuʼ numuu nda̱a̱ xóo magájtáa gáyala. Xú kaʼnii gándoo gátsiji ñajunʼ i̱ndó mu maʼgá gáyala ikháanʼla rá.” 4 Ikhiin nixuʼma a̱jkhu̱ aʼphu̱ ikháá má ajngáa náa inuʼ, ga̱jma̱a̱ náa a̱jkhu̱ aʼphu̱ rígi̱ ikháá má dí niriʼñúún.

5 Ikhú Sanbalat nikuʼmaa bi̱ nambáyúu mu maʼthúnʼ ikháá má ajngáa dí maʼni witsu aʼphu̱ ga̱jma̱a̱ kayá mbá i̱yi̱i̱ʼ kambaʼta. 6 Náa i̱yi̱i̱ʼ naʼthí: “Náa majñu̱únʼ xa̱bu̱ xuajin nuthi ma̱ngaa Guésem naʼthí rí ikháán gajmiáanʼ judíos kuwáanʼ ruríyáʼ awan mu muxujxímíjná. Ikha jngóo kuwáanʼ ru̱ni̱ májáanʼ xtájtsí. Ma̱ngaa nuthi dí ikháán ma̱nindxa̱a̱ʼ rey ndrígu̱ún. 7 Ma̱ngaa nitandrigi̱i̱n profetas magún náa xúgíʼ Jerusalén kuñu̱u̱n ajngáa rígi̱ ga̱jma̱a̱ numaaʼ: ‹¡Judá gíʼdaa mbáa rey!›. Rígi̱ maʼga̱nú maʼdxaun rey, ikha jngóo ayi̱ muʼtámíjná ga̱jma̱a̱ numuu rígi̱”.

8 Ikhú niriʼñuu: “Minduwaʼ nindxu̱u̱ xúgíʼ dí naratá. I̱ndó nindxu̱u̱ dí naku̱ma̱a̱ʼ ikháán”.* 9 Ikhiin nugíʼ muni̱ miñunxu̱ má xúʼko̱ ga̱jma̱a̱ nuthi: “Ñawúúnʼ maʼgaaʼ ga̱jma̱a̱ xáʼngu̱u̱n gúni gájxi̱i̱ ñajunʼ”. Ikha jngóo Dios ndrígóʼ, atani̱ rí ñawúnʼ magiʼdoo tsiaki̱i̱.

10 Ikhú ni̱jkhá náa goʼwóo Semaya, a̱ʼdióo Delayá, a̱ʼdióo Mehetabel, índo̱ ikhaa xtáa ikhí. Ikhaa niʼthúnʼ: “Guríyaʼ mbóo mbiʼi muʼgua náa goʼwóo Dios bi̱ gajkhun, náa awúu̱n guʼwá rí nduyamajkuíí Dios ga̱jma̱a̱ muruʼguáalú riejun numuu rí maguwáʼ gúxiñáán. Mbruʼun máguwáʼ gúxiñáán”. 11 Mú ikhúún nitha̱: “Lá mbaʼyóoʼ magayúu mbáa xa̱bu̱ xóo ikhúún ráʼ. Lá ma̱ndoo rí mbáa xa̱bu̱ xó ikhúún mato̱ʼo̱o̱ náa guʼwá rí nduyamajkuíí Dios ga̱jma̱a̱ maxtáa xóó ráʼ. ¡Ikhúún xáto̱ʼo̱ʼ!”. 12 Ikhú nijkhánú ndi̱yo̱o̱ dí raʼkháa Dios nikuʼmaa. Tobías ga̱jma̱a̱ Sanbalat nini numáá mu maʼtáriyaʼ ajngáa rígi̱ ga̱jma̱a̱ numuʼ. 13 Nini̱ numáá mu maʼni míñúʼ ga̱jma̱a̱ maʼni rí makiéʼkúnʼ. Mu xúʼko̱ maguma gachíí mbiʼyuʼ ga̱jma̱a̱ muthi dí ra̱májánʼ ga̱jma̱a̱ numuʼ.

14 Dios ndrígóʼ, garmáʼáan a̱jkia̱a̱nʼ xtayáá Tobías ga̱jma̱a̱ Sanbalat, ma̱ngaa xúgíʼ rí niniuʼ. Garmáʼáan a̱jkia̱a̱nʼ xtayáá profetisa Noadías ga̱jma̱a̱ eʼwíinʼ profetas bi̱ mbaʼa nuthu ninimíjna̱ munimiñúʼ.

15 Ndijyúuʼ mbá 52 mbiʼi mu maguma̱a̱ xtájtsí, niwájxi̱i̱ náa mbiʼi 25 ñajuunʼ gu̱nʼ elul.*

16 Índo̱ xa̱bu̱ sia̱nʼ ndrígúxu̱ nidxawíín rígi̱ ga̱jma̱a̱ xa̱bu̱ bi̱ kúwá mijngii ndiyáá, xúgíinʼ niti̱ñu̱u̱ʼ* ga̱jma̱a̱ niguánú ndiyáá rí Dios ndrígúxu̱ nimbáyúxu̱ mu maguma ñajunʼ rígi̱. 17 Nákhá mbiʼi rúʼko̱ mbaʼin xa̱bu̱ bi̱ kuya̱ edxu̱u̱ náa Judá nuxuʼma i̱yi̱i̱ʼ náa inuu Tobías, ikhaa nariʼñún. 18 Mbaʼin náa Judá nixna ajngún rí mambajxúu̱n gajmiún Tobías, numuu rí nindxu̱u̱ nigiúunʼ Secanías a̱ʼdióo Ará, Jehohanán bi̱ nindxu̱u̱ a̱ʼdióo ndiyáa wáxióo Mesulam a̱ʼdióo Berekías. 19 Ikhiin nuthu̱nʼ má xúʼko̱ dí májánʼ ga̱jma̱a̱ numuu Tobías nda̱wa̱á nagúun gútháán rí ikhúún na̱tha̱. Ikhú, ikhaa nakuʼma i̱yi̱i̱ʼ mu maʼni míñúʼ.

7 Índo̱ niguámbá nigu̱ma̱a̱ xtájtsí, nikuʼdáaʼ xkrugua. Nda̱wa̱á nigruígíi̱n bi̱ muñewa̱a̱n xkrugua, bi̱ muni̱ ajmúú ga̱jma̱a̱ levitas. 2 Nda̱wa̱á niʼgíiʼ giʼtioʼ Hananí mu mañewu̱u̱n Jerusalén ma̱ngaa Hananías, bi̱ kayá edxu̱u̱ náa kúwá soldado, numuu rí ikhaa nindxu̱u̱ mbáa xa̱bu̱ bi̱ ma̱ndoo maku̱ma̱a̱ʼ xtayáá ga̱jma̱a̱ bi̱ namíñuu kaʼyoo Dios bi̱ gajkhun, itháan ki xóo eʼwíinʼ. 3 Ikhú ni̱thu̱u̱n: “Xkrugoo Jerusalén ragíʼmaa mambaʼtoo nákhá xóó tséʼni̱ mijkha, bi̱ nuñewa̱a̱n xkrugua gíʼmaa murugua̱a̱ índo̱ nakína ga̱jma̱a̱ ixi̱ mbi̱jua̱. Xa̱bu̱ Jerusalén gúndrígi̱i̱n mu muñewa̱a̱n xkrugua, mámbáa náa kaʼyoo mañewu̱u̱n ga̱jma̱a̱ eʼwíinʼ náa mijngii guʼwún”. 4 Xuajin rígi̱ nindxu̱u̱ ma̱ja̱nʼ ga̱jma̱a̱ mba̱a̱, mú na̱nguá kúwá mbaʼin xa̱bu̱ ga̱jma̱a̱ guʼwá dí rígá xóó tséguma májáanʼ.

5 Ikhú Dios ndrígóʼ nixkajxu̱u̱n* mu magímbiin bi̱ kuya̱ edxu̱u̱ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún ma̱ngaa xa̱bu̱ xuajin mu maniraʼmáaʼ mbiʼñún xó má kúwá náa guʼwún. Ga̱jma̱a̱ nixkama̱a̱ mbá libro xó má ni̱jkha̱ ragumarámáʼ mbiʼñún bi̱ niguwáánʼ ginuu. Ikhí kiʼniraʼmáʼ mbiʼñún:

6 “Bugi̱ nindxu̱ún xa̱bu̱ xuajin bi̱ nigájni̱ín náa ni̱jkha̱ kiʼdiin, rey Nabucodonosor ndrígóo Babilonia nindxu̱u̱ bi̱ ni̱jkha̱ kagui̱i̱n. Nda̱wa̱á ikhiin nitangiín náa Jerusalén ga̱jma̱a̱ náa Judá, mámbáa nitanga̱a̱ náa xuajñuu. 7 Bi̱ kuya̱ edxu̱u̱ ninindxu̱u̱ Zorobabel, Jesúa, Nehemías, Azarías, Raamías, Nahamaní, Mardoqueo, Bilsán, Mispéret, Bigvái, Nehúm ga̱jma̱a̱ Baaná.

Xígi̱ mbaʼin xa̱bekha israelitas bi̱ nitangi̱i̱n: 8 E̱ji̱i̱n Parós ninindxu̱ún mbá 2,172, 9 e̱ji̱i̱n Sefatías ninindxu̱ún mbá 372, 10 e̱ji̱i̱n Ará ninindxu̱ún mbá 652, 11 e̱ji̱i̱n Pahat-Moab ninindxu̱ún mbá 2,818, bugi̱ niguwáʼ náa Jesúa ga̱jma̱a̱ náa Joab, 12 e̱ji̱i̱n Elam ninindxu̱ún mbá 1,254, 13 e̱ji̱i̱n Zatú ninindxu̱ún mbá 845, 14 e̱ji̱i̱n Zacái ninindxu̱ún mbá 760, 15 e̱ji̱i̱n Binuí ninindxu̱ún mbá 648, 16 e̱ji̱i̱n Bebái ninindxu̱ún mbá 628, 17 e̱ji̱i̱n Azgad ninindxu̱ún mbá 2,322, 18 e̱ji̱i̱n Adonicam ninindxu̱ún mbá 667, 19 e̱ji̱i̱n Bigvái ninindxu̱ún mbá 2,067, 20 e̱ji̱i̱n Adín ninindxu̱ún mbá 655, 21 e̱ji̱i̱n Ater, bi̱ naguwáʼ náa Ezequías ninindxu̱ún mbá 98, 22 e̱ji̱i̱n Hasum ninindxu̱ún mbá 328, 23 e̱ji̱i̱n Bezái ninindxu̱ún mbá 324, 24 e̱ji̱i̱n Harif ninindxu̱ún mbá 112, 25 e̱ji̱i̱n Gabaón ninindxu̱ún mbá 95, 26 xa̱bu̱ bi̱ naguwáʼ náa Belén ga̱jma̱a̱ Netofá ninindxu̱ún mbá 188, 27 xa̱bu̱ bi̱ naguwáʼ náa Anatot ninindxu̱ún mbá 128, 28 xa̱bu̱ bi̱ naguwáʼ náa Bet-Azmávet ninindxu̱ún mbá 42, 29 xa̱bu̱ bi̱ naguwáʼ náa Quiryat-Jearim, Kefirá ga̱jma̱a̱ Beerot ninindxu̱ún mbá 743, 30 xa̱bu̱ bi̱ naguwáʼ náa Ramá ga̱jma̱a̱ Gueba ninindxu̱ún mbá 621, 31 xa̱bu̱ bi̱ naguwáʼ náa Micmás ninindxu̱ún mbá 122, 32 xa̱bu̱ bi̱ naguwáʼ náa Betel ga̱jma̱a̱ Hai ninindxu̱ún mbá 123, 33 xa̱bu̱ bi̱ naguwáʼ náa imbo̱o̱ Nebo ninindxu̱ún mbá 52, 34 e̱ji̱i̱n i̱mba̱a̱ Elam ninindxu̱ún mbá 1,254, 35 e̱ji̱i̱n Harim ninindxu̱ún mbá 320, 36 e̱ji̱i̱n Jericó ninindxu̱ún mbá 345, 37 e̱ji̱i̱n Lod, Hadid ga̱jma̱a̱ Onó ninindxu̱ún mbá 721, 38 ga̱jma̱a̱ e̱ji̱i̱n Senaá ninindxu̱ún mbá 3,930.

39 Bugi̱ ninindxu̱ún ndxajkun, e̱ji̱i̱n Jedayá, bi̱ naguwáʼ náa Jesúa ninindxu̱ún mbá 973, 40 e̱ji̱i̱n Imer ninindxu̱ún mbá 1,052, 41 e̱ji̱i̱n Pasjur ninindxu̱ún mbá 1,247, 42 e̱ji̱i̱n Harim ninindxu̱ún mbá 1,017.

43 Bugi̱ ninindxu̱ún levitas, bi̱ naguwáʼ náa Jesúa ga̱jma̱a̱ bi̱ naguwáʼ náa goʼwóo Cadmiel e̱ji̱i̱n Hodevá, ninindxu̱ún mbá 74. 44 Bugi̱ ninindxu̱ún bi̱ nini̱ ajmúú, e̱ji̱i̱n Asaf ninindxu̱ún mbá 148. 45 Bugi̱ ninindxu̱ún e̱jñu̱ún bi̱ nuñewa̱a̱n xkrugua: E̱ji̱i̱n Salum, e̱ji̱i̱n Ater, e̱ji̱i̱n Talmón, e̱ji̱i̱n Acub, e̱ji̱i̱n Hatitá ga̱jma̱a̱ e̱ji̱i̱n Sobái, mbá xúgíinʼ ninindxu̱ún mbá 138.

46 Bugi̱ ninindxu̱ún bi̱ nuñajunʼ náa guʼwá rí nduyamajkuíí Dios:* E̱ji̱i̱n Ziha, e̱ji̱i̱n Hasufá, e̱ji̱i̱n Tabaot, 47 e̱ji̱i̱n Querós, e̱ji̱i̱n Sia, e̱ji̱i̱n Padón, 48 e̱ji̱i̱n Lebaná, e̱ji̱i̱n Hagabá, e̱ji̱i̱n Salmái, 49 e̱ji̱i̱n Hanán, e̱ji̱i̱n Guidel, e̱ji̱i̱n Gahar, 50 e̱ji̱i̱n Reayá, e̱ji̱i̱n Rezín, e̱ji̱i̱n Necodá, 51 e̱ji̱i̱n Gazam, e̱ji̱i̱n Uzá, e̱ji̱i̱n Paséah, 52 e̱ji̱i̱n Besái, e̱ji̱i̱n Meunim, e̱ji̱i̱n Nefusesim, 53 e̱ji̱i̱n Bacbuc, e̱ji̱i̱n Hacufá, e̱ji̱i̱n Harhur, 54 e̱ji̱i̱n Bazlit, e̱ji̱i̱n Mehidá, e̱ji̱i̱n Harsá, 55 e̱ji̱i̱n Barcos, e̱ji̱i̱n Sísara, e̱ji̱i̱n Témah, 56 e̱ji̱i̱n Nezías ga̱jma̱a̱ e̱ji̱i̱n Hatifá.

57 Bugi̱ ninindxu̱ún e̱jñu̱ún xa̱bi̱i̱ Salomón: E̱ji̱i̱n Sotái, e̱ji̱i̱n Soféret, e̱ji̱i̱n Peridá, 58 e̱ji̱i̱n Jaalá, e̱ji̱i̱n Darcón, e̱ji̱i̱n Guidel, 59 e̱ji̱i̱n Sefatías, e̱ji̱i̱n Hatil, e̱ji̱i̱n Pokéret-Hazebaim ga̱jma̱a̱ e̱ji̱i̱n Amón. 60 Mbá xúgíinʼ xa̱bu̱ bi̱ niñejunʼ náa guʼwá rí nduyamajkuíí Dios ga̱jma̱a̱ e̱jñu̱ún xa̱bi̱i̱ Salomón ninindxu̱ún mbá 392.

61 Bugi̱ ninindxu̱ún bi̱ niguwáʼ* náa Tel-Mélah, Tel-Harsá, Kerub, Adón ga̱jma̱a̱ Imer mú na̱nguá niʼngu̱u̱n gúsngajma dí anu̱ún nindxu̱ún israelitas o dí ikhí nigumiin: 62 E̱ji̱i̱n Delayá, e̱ji̱i̱n Tobías ga̱jma̱a̱ e̱ji̱i̱n Necodá ninindxu̱ún mbá 642. 63 E̱jñu̱ún ndxajkun: E̱ji̱i̱n Habaya, e̱ji̱i̱n Hacoz ga̱jma̱a̱ e̱ji̱i̱n Barzilái, bi̱ ndiyáa mbáa wáxióo* Barzilái xa̱bu̱ Galaad ga̱jma̱a̱ ndiyá mbiʼyuu xóo mbiʼñún bi̱ kúwá náa goʼwóo a̱ʼgiu̱u̱. 64 Bugi̱ ninindxu̱ún bi̱ ndiyáʼ musngajma náa eguwáʼ mú na̱nguá niʼngu̱u̱n gúxkamaa, ikhaa rúʼko̱ numuu dí túniñu̱u̱nʼ muñajunʼ xóo ndxajkun.* 65 Xa̱bu̱ ñajunʼ* niʼthúún dí xándoo mu̱phu̱ dí kaʼwu asndu índo̱ gáxtáa mbáa ndxajkun bi̱ majmaa marajxu̱u̱ Urim ga̱jma̱a̱ Tumim.*

66 Mbá xúgíinʼ ninindxu̱ún mbá 42,360 xa̱bu̱, 67 mú tágixnii xa̱bekha ga̱jma̱a̱ gu̱ʼu̱ bi̱ ninindxu̱ún ñumbáá ikhiin nindxu̱ún mbá 7,337, ma̱ngaa i̱mbá 245 xa̱bekha ga̱jma̱a̱ gu̱ʼu̱ bi̱ nuni̱ ajmúú. 68 Niguáʼdiin mbá 736 wáyú, 245 mula, 69 mbá 435 camellos ga̱jma̱a̱ 6,720 búrru.

70 Tikhuun bi̱ kuya̱ edxu̱u̱ náa mámbá guʼwíin xa̱bu̱, nixna rí majmaa náa ñajunʼ rí maguma, xa̱bu̱ ñajunʼ nixna mbá 1,000 dracma dí oro,* 50 xua̱a̱ ga̱jma̱a̱ 530 xtíin mbi̱jua̱ ndrígu̱ún ndxajkun. 71 Tikhuun bi̱ kuya̱ edxu̱u̱ náa mámbá guʼwíin xa̱bu̱, nixna rí majmaa náa ñajunʼ rí naguma, mbá xúgíʼ ninindxu̱u̱ 20,000 dracma dí oro ga̱jma̱a̱ 2,200 mina* dí plata. 72 Rí nixna xa̱bu̱ xuajin ninindxu̱u̱ 20,000 dracma dí oro, 2,000 mina dí plata ga̱jma̱a̱ 67 xtíin mbi̱jua̱ ndrígu̱ún ndxajkun.

73 Ndxajkun, levitas, bi̱ nuñewa̱a̱n xkrugua, bi̱ nuni̱ ajmúú, tikhuun xa̱bu̱ xuajin, bi̱ nuñajunʼ náa guʼwá rí nduyamajkuíí Dios, ga̱jma̱a̱ xúgíinʼ xa̱bu̱ xuajin Israel* nigúun gákuwá náa xuajñún, mú índo̱ niʼni juwan igu̱nʼ, israelitas kúwíin má náa xuajñún”.

8 Xúgíinʼ xa̱bu̱ xuajin nigimbíin náa xuáá ga̱jma̱a̱ mbá numuu náa inuu Xkrugua dí rígá Iyaʼ.* Nitháán Esdras bi̱ naʼtáriyaʼ náa kiʼnirámáʼ rí ma̱ʼkha̱ kayóo libro náa na̱ʼkha̱ Xtángoo ndrígóo Moisés, dí Jeobá nixnúu Israel. 2 Ikha jngóo timbá mbiʼi rí juwan igu̱nʼ, ndxajkun Esdras ni̱ʼkha̱ kayóo Xtángoo náa inún xa̱bekha ga̱jma̱a̱ gu̱ʼu̱ bi̱ nigimbíin, xúʼko̱ má náa xúgíinʼ bi̱ naʼngu̱u̱n nakru̱ʼu̱u̱n rí nudxawíín. 3 Nigíʼdu̱u̱ niguxnuu ga̱jma̱a̱ aʼwá gakhi̱i̱ náa xuáá dí rígá náa inuu Xkrugua dí rígá Iyaʼ. Miʼcha̱ nigíʼdu̱u̱ niguxnuu niguámbóo asndu tikhu mbiʼi náa inún xa̱bekha ga̱jma̱a̱ gu̱ʼu̱ ma̱ngaa xúgíinʼ bi̱ naʼngu̱u̱n má nakru̱ʼu̱u̱n rí nudxawíín. Xúgíinʼ nigíʼ edxu̱ún mudxawíín dí nigixnuu náa libro ndrígóo Xtángoo. 4 Esdras bi̱ naʼtáriyaʼ nifri̱gu náa ixi̱ rí nini̱ májáánʼ majmaa mbiʼi rúʼko̱, náa níjniú mújúunʼ wíji̱ Matitías, Sema, Anaya, Urías, Hilquías ga̱jma̱a̱ Maaseya ma̱ngaa náa níjniú xti̱yu̱u̱ʼ wíji̱ Pedaya, Misael, Malkiya, Hasum, Has-Badaná, Zacarías ga̱jma̱a̱ Mesulam.

5 Índo̱ Esdras nimbáʼtoo libro, xúgíinʼ xa̱bu̱ xuajin ndiyáá numuu rí mitsídánʼ náa frígu. Índo̱ nimbáʼtoo, xúgíinʼ xa̱bu̱ xuajin niwájun. 6 Ikhú Esdras niʼni mba̱a̱ Jeobá Dios bi̱ gajkhun, bi̱ mba̱a̱. Xúgíinʼ xa̱bu̱ xuajin nithi “¡Xúʼko̱ gáʼni! ¡Xúʼko̱ gáʼni!”* ga̱jma̱a̱ nixujxi̱ ñawúúnʼ. Nda̱wa̱á nismbati̱gu̱u̱n asndu mbayííʼ náa inuu Jeobá. 7 Bugi̱ nindxu̱ún levitas, Jesúa, Baní, Serebías, Jamín, Acub, Sabetái, Hodías, Maaseya, Quelitá, Azarías, Jozabad, Hanán ga̱jma̱a̱ Pelayá nithúún xa̱bu̱ xuajin bi̱ guájun rí naʼthí náa Xtángoo. 8 Niraxnuu má xúʼko̱ ga̱jma̱a̱ aʼwá gakhi̱i̱ libro náa na̱ʼkha̱ Xtángoo ndrígóo Dios bi̱ gajkhun, nithúún ndiéjunʼ eyoo gáʼthí. Xúʼko̱ nimbañúún xa̱bu̱ xuajin makru̱ʼu̱u̱n rí xtáa ragixnuu.

9 Nehemías bi̱ nindxu̱u̱ xa̱bu̱ ñajunʼ* nakha ikhú ga̱jma̱a̱ Esdras bi̱ nindxu̱u̱ ndxajkun ma̱ngaa bi̱ naʼtáriyaʼ dí kiʼniraʼmáʼ mangiin levitas bi̱ nusngúún xa̱bu̱ nithúún xúgíinʼ xa̱bu̱ xuajin: “Xúgi̱ nindxu̱u̱ mbá mbiʼi mitsúʼkháan náa Jeobá Dios ndrígala, xúmbiyaʼ ni ma xágáwíinʼ a̱jkia̱la”. Numuu rí xúgíinʼ xa̱bu̱ xuajin kúwá rumbiyaʼ índo̱ xtáa ragixnuu dí naʼthí náa Xtángoo. 10 Ikhaa niʼthúún: “Gaʼgua̱la guphu ganitsu rí itháan májánʼ* ga̱jma̱a̱ gu̱wanla iyaʼ taun ma̱ngaa guxuʼmá ganitsu mu̱phu̱ bi̱ na̱nguá guáʼdáá, numuu rí mbiʼi xúgi̱ nindxu̱u̱ mbá mbiʼi mitsúʼkháan náa inuu Tátá ndrígulú, xákuwáanʼlá ngíná numuu rí gagi dí na̱ʼkha̱ náa Jeobá nindxu̱u̱ tsiaki̱i̱ ndrígala”. 11 Bi̱ nindxu̱ún levitas nini̱i̱ a̱jkiu̱ún xúgíinʼ xa̱bu̱ xuajin, nithúún: “Xúmbiyaʼla numuu rí xúgi̱ nindxu̱u̱ mbá mbiʼi mitsúʼkháan, xákuwáanʼlá ngíná”. 12 Ikhú xúgíinʼ xa̱bu̱ xuajin nigúun guphiʼtsu ga̱jma̱a̱ niʼwa̱a̱n, nixuʼmaa ganitsu náa eʼwíinʼ ga̱jma̱a̱ nikúwá gagi mbiʼi rúʼko̱, numuu rí nikru̱ʼu̱u̱n ajngáa rí nijuiʼsngúún.

13 Rí maʼni a̱jma̱ mbiʼi, bi̱ kuya̱ edxu̱u̱ náa mámbá guʼwíin xa̱bu̱ ga̱jma̱a̱ ndxajkun ma̱ngaa levitas ndi̱wi̱i̱n gajmiún Esdras bi̱ naʼtáriyaʼ náa kiʼnirámáʼ mu mikru̱ʼu̱u̱n itháán rí naʼthí náa Xtángoo. 14 Ikhú ndiyáá rí náa Xtángoo ndrígóo Jeobá rí nixnúu Moisés kiʼnirámáʼ rí bi̱ israelitas ndayóoʼ makuwá náa guʼwá xtúguá índo̱ xtáa rarígá ndxa̱a̱ dí maʼni juwan igu̱nʼ. 15 Ma̱ngaa naʼthúún rí magún náa xúgíʼ xuajin ga̱jma̱a̱ náa xúgíʼ Jerusalén, muthi: “Gaʼguala kúbá, gaguwa̱ʼ ku̱dala ñawúunʼ olivos rí maxaʼ, xti̱ʼkha̱, mirtos, palmeras ga̱jma̱a̱ i̱ʼwáʼ ixi̱ maxaʼ mu maguma guʼwá xtúguá, xó má naʼthí náa kiʼnirámáʼ”.

16 Ikha jngóo xa̱bu̱ nigájnún gúyáʼ ga̱jma̱a̱ niguwáa̱nʼ kudúún ñawúunʼ ixi̱, ikhú nini̱ guʼwá xtúguá náa tsu̱du̱u̱ guʼwún, náa rexu̱ún, náa rexo̱o̱ goʼwóo Dios bi̱ gajkhun, náa xuáá ndrígóo Xkrugua dí rígá Iyaʼ ga̱jma̱a̱ náa xuáá ndrígóo Xkrugoo Efraín.* 17 Xúgíinʼ bi̱ niguwa̱ánʼ náa ni̱jkha̱ kiʼdiin nini̱ guʼwá xtúguá ga̱jma̱a̱ nikúwá ikhí. Xúgíinʼ israelitas ra̱ʼkhá tháán gagi nikúwá numuu rí asndu mbiʼi rí nixtáa Josué a̱ʼdióo Nun asndu mbiʼi rígi̱, na̱nguá nigumariya̱a̱ʼ ndxa̱a̱ xígi̱ kaʼnii. 18 Ga̱jma̱a̱ nigixnuu libro náa na̱ʼkha̱ Xtángoo ndrígóo Dios bi̱ gajkhun xúgíʼ mbiʼi, timbá mbiʼi asndu náa iwáá mbiʼi. Ndxa̱a̱ ndijyúuʼ mbá juwan mbiʼi, índo̱ niʼni migiñuʼ mbiʼi ninindxu̱u̱ mbá mbiʼi kiejuunʼ ga̱jma̱a̱ nigimbíin, niguma xó má kaʼyoo maguma.

9 Israelitas nigimbíin índo̱ niʼni mbiʼi 24 ñajunʼ gu̱nʼ. Nigíʼdi̱i̱ nirkueyimijná* ga̱jma̱a̱ nigíʼ xtíin mi̱du̱* ma̱ngaa nigri̱gu má xúʼko̱ yujndaʼ náa edxu̱ún. 2 Ikhú xúgíinʼ bi̱ nindxu̱ún israelita nini̱ wájímíjná náa xúgíinʼ xa̱bu̱ bi̱ naguwaáʼ. Nda̱wa̱á niguájun ga̱jma̱a̱ nithi aʼkhá ndrígu̱ún ma̱ngaa rí nikiéʼkhúún anu̱ún. 3 Náa guájun niraxnuu gakhi̱i̱ libro náa na̱ʼkha̱ Xtángoo ndrígóo Jeobá Dios ndrígu̱ún mbá ajtsú hora.* Ga̱jma̱a̱ i̱mbá ajtsú hora nithi aʼkhá rí nixudamíjna̱ ga̱jma̱a̱ nismbati̱gu̱u̱n náa inuu Jeobá Dios ndrígu̱ún.

4 Jesúa, Baní, Cadmiel, Sebanías, Buní, Serebías, Baní ga̱jma̱a̱ Kenaní nitsimún náa nadraʼmíiʼ levitas, nitháán ga̱jma̱a̱ mbá aʼwá gakhi̱i̱ Jeobá Dios ndrígu̱ún. 5 Bi̱ nindxu̱ún levitas, Jesúa, Cadmiel, Baní, Hasabneya, Serebías, Hodías, Sebanías ga̱jma̱a̱ Petahías nithúún: “Gatujxa̱la ga̱jma̱a̱ gu̱ni̱ mba̱a̱ Jeobá Dios ndrígala asndu kámuu. Dios ndrígóʼ, gaguma mba̱a̱ mbiʼyaaʼ rí mitsaanʼ,* numuu rí mbiʼyaaʼ nindxu̱u̱ itháán mba̱a̱ ki xóo gamajkhu rí ma̱ndoo muxnaaʼ xa̱bu̱.

6 I̱ndó ikháán nindxa̱a̱ʼ Jeobá. Ikháán nitani̱ mekhu, xúʼko̱, asndu mekhu dí itháán mitsídánʼ ga̱jma̱a̱ xúgíʼ dí rígá ikhí.* Nitani̱ ku̱ba̱ʼ ga̱jma̱a̱ xúgíʼ dí rígá ikhí, lamáa ga̱jma̱a̱ xúgíʼ dí rígá ikhí. Ikháán natani̱ rí mbuya xúgíinʼ bi̱ kúwá. Xúgíʼ dí rígá mekhuíí nasmbáti̱go̱o̱ náa inaaʼ. 7 Ikháán nindxa̱a̱ʼ Jeobá, Dios bi̱ gajkhun. Ikháán nitraʼwíi Abrán, nitríyáaʼ náa Ur náa mbañúúnʼ xa̱bu̱ caldeos ga̱jma̱a̱ niraxná mbiʼíí Abrahán. 8 Numuu dí nitayáá rí mbóó a̱jkiu̱u̱n eʼni náa ikháán, ikha jngóo nimbánaaʼ ga̱jma̱a̱ʼ ikhaa ma̱ngaa e̱ji̱i̱n dí maraxnu̱u̱n ku̱ba̱ʼ ndrígu̱ún xa̱bu̱ cananeos, hititas, amorreos, perizitas, jebuseos ga̱jma̱a̱ guirgaseos. Ma̱ngaa nitanimbáníí rí nitaxúdaminaʼ, numuu rí nindxa̱a̱ʼ jmbii.

9 Ikha jngóo índo̱ nitayáá rí numíniiʼ wajin xiʼñúxu náa Egipto ga̱jma̱a̱ nitadxawíín rí nundxa̱ʼwa̱ dí mixtambáñún náa mijngii lamáa Maña̱ʼ,* 10 nitasngájma tsinaʼ ga̱jma̱a̱ nitani̱ milagros mu matani̱ rí mamínuuʼ faraón gajmíi̱n xa̱bi̱i̱ ga̱jma̱a̱ xúgíinʼ xa̱bu̱ bi̱ kúwá náa ku̱bo̱o̱ʼ, numuu rí nitayáá rí nini̱ ngíníi xa̱bu̱ xuajñaanʼ. Nitani̱ rí mbiʼyaaʼ marigá asndu mbiʼi xúgi̱. 11 Nitani̱ rí mawiʼtáa lamáa náa inún xa̱bia̱a̱ʼ ga̱jma̱a̱ ikhiin ninújngún náa ku̱ba̱ʼ mijxooʼ.* Nitadami̱ʼi̱i̱n bi̱ nagún ruxkúún náa itháán mi̱jnu̱ʼ lamáa, xó má mbá itsí rí nudama̱ʼa̱ náa naʼbajxu̱u̱ iyaʼ. 12 Dí mbiʼi naraxná ikhún xa̱bu̱ xuajñaanʼ ga̱jma̱a̱ mbá du̱u̱n rí nawi̱ji̱ ga̱jma̱a̱ rí mbruʼun mbá aguʼ dí nawi̱ji̱. Xígi̱ kaʼnii nitani̱ rí mambiʼi náa kamba̱a̱ rí mbaʼyóoʼ magún. 13 Nirajtaa náa kúbá Sinaí ga̱jma̱a̱ niratáminaʼ gajmiáanʼ ikhiin asndu náa mekhu. Nirathúún ndiéjunʼ gíʼmaa muni̱, niraxnún xtángoo dí gajkhun, ikha ga̱jma̱a̱ kiʼtáñajunʼ rí májánʼ. 14 Ma̱ngaa nirasngúún rí mbuyáá rí mitsúʼkháan nindxu̱u̱ sábado. Nijmiaaʼ xa̱bia̱a̱ʼ Moisés mu maraxnu̱u̱n kiʼtáñajunʼ, ikha ga̱jma̱a̱ xtángoo. 15 Índo̱ nixkidxu̱u̱n nitani̱ rí magajtaa asndu náa mekhuíí rí mu̱phu̱ ga̱jma̱a̱ índo̱ nikándawúnʼ nitani̱ rí magajnúu iyaʼ náa itsí mu muwa̱a̱n. Nirathúún dí matu̱ʼu̱u̱n gákúwá náa ku̱ba̱ʼ dí nimbánaaʼ* gajmiáanʼ maraxnu̱u̱n mu makuwá.

16 Mú wajin xiʼñúxu, ikhiin nini̱ mbaʼumíjna̱ ga̱jma̱a̱ nini̱ gújkhúʼ a̱jkiu̱ún,* túnimbu̱ún kiʼtáñajunʼ ndrígáaʼ. 17 Táʼndún gunimbu̱u̱n ga̱jma̱a̱ nimbumún milagro rí nitani̱ náa inún. Nini̱ rí maʼni gújkhúʼ a̱jkiu̱ún* ga̱jma̱a̱ nigi̱i̱ʼ mbáa bi̱ mbayá edxu̱u̱ mu maʼga̱a̱ kagui̱i̱n náa Egipto mu mani̱ndxu̱ún xóo ñumbáá. Mú ikháán nindxa̱a̱ʼ mbáa Dios bi̱ xtáa xawii maʼni mba̱a̱ a̱jkiu̱u̱n, bi̱ naʼngo̱o̱ a̱jkiu̱u̱n, bi̱ nagáwíinʼ a̱jkiu̱u̱n, bi̱ tsékiʼnáa nacha̱, bi̱ gíʼdoo ngajua rí tsétumuu.* Ikha jngóo na̱nguá nitatsíñúúnʼ. 18 Ikhiin nini̱i̱ mbáa a̱ʼdá xédí ga̱jma̱a̱ ajua̱nʼ ga̱jma̱a̱ nigíʼdi̱i̱ nithi: ‹Bigi̱ nindxu̱u̱ dios ndrígáaʼ bi̱ niríñáaʼ náa Egipto›. Nini̱ dí raʼkhí kayuuʼ, túyamajkuaaʼ. 19 Maski ajndu xúʼko̱, rí nagáwíinʼ a̱jkia̱a̱nʼ nindxu̱u̱ mba̱a̱ wéñuuʼ na̱nguá nitatsíñúúnʼ náa ku̱ba̱ʼ mijxooʼ. Rí mbiʼi, du̱u̱n na̱nguá nirájñu̱u̱nʼ náa ikhiin naxnún ikha náa kamba̱a̱ rí mbaʼyóoʼ magún ga̱jma̱a̱ rí mbruʼun naʼni rí mawi̱ji̱ mbá aguʼ rí mambiʼi má xúʼko̱ mu ma̱ndoo magún. 20 Niraxnún espíritu ndrígáaʼ mu makru̱ʼu̱u̱n. Na̱nguá nitani̱ gaʼduunʼ maraxnu̱u̱n maná ma̱ngaa niraxnún iyaʼ muwa̱a̱n índo̱ nikándawúnʼ. 21 Náa mbá 40 tsiguʼ nitaxníʼtsúún náa ku̱ba̱ʼ mijxooʼ. Na̱nguá ndiñúunʼ nimbá. Xtíñún na̱nguá niguuʼ ni má rajkúún na̱nguá niʼjuan.

22 Ikháán niraxnájxi̱i̱n reyes ga̱jma̱a̱ xa̱bu̱ xuajin náa ñawúúnʼ, mámbá chíʼgíiʼ* ku̱ba̱ʼ niraxnún. Ikha jngóo nindrigúu ku̱ba̱ʼ ndrígóo Sehón xóo muʼthá, ku̱ba̱ʼ ndrígóo rey Hesbón ga̱jma̱a̱ ku̱ba̱ʼ ndrígóo Og, rey ndrígóo Basán. 23 Ma̱ngaa nitani̱ rí e̱jñu̱ún maʼni mbaʼin xóo a̱ʼgua̱a̱n bi̱ kúwá mekhuíí. Nda̱wa̱á nidxu̱ʼ xtiin náa ku̱ba̱ʼ rí nitaxúdaminaʼ maraxnu̱u̱n wajin xiʼñúúnʼ, dí mudrigúu. 24 Ikha jngóo e̱jñu̱ún nindrígu ku̱ba̱ʼ ga̱jma̱a̱ nikúwá ikhí. Ikháán niraxnájxi̱i̱n náa ñawúúnʼ xa̱bu̱ cananeos, bi̱ kúwá náa ku̱ba̱ʼ rúʼko̱. Ga̱jma̱a̱ niraxnájxi̱i̱n náa ñawúúnʼ reyes ga̱jma̱a̱ náa xa̱bu̱ xuajin bi̱ kúwíin náa ku̱ba̱ʼ rúʼko̱, mu muniu̱u̱n xó má eñún ikhiin. 25 Nindri̱gú xuajin rí kúgumaʼá ga̱jma̱a̱ ku̱ba̱ʼ náa rí najma̱a̱ ganitsu ma̱ngaa niguanún ga̱jma̱a̱ guʼwá náa kajti xúgíʼ enii rí májánʼ ma̱ngaa iñáʼ rí kindii má ga̱jma̱a̱ mbaaʼ náa kiʼdu uva, olivo ma̱ngaa mbaʼa ixi̱ rí naxná xndúu. Ikha jngóo nipiʼtsu asndu nigiʼmún ga̱jma̱a̱ asndu niʼni mba̱ʼwi̱i̱n. Nini̱ gagimijná ga̱jma̱a̱ xúgíʼ rí niraxnún.

26 Ikhiin túnimbu̱u̱n, nixujximíjna̱ náa ikháán ga̱jma̱a̱ nini̱ gaʼduunʼ rí naʼthí náa Xtángoo ndrígáaʼ.* Niradíin profetas* ndrígáaʼ, bi̱ nithúún rí matangi̱i̱n náa ikháán. Nini̱ dí raʼkhí kayuuʼ, túyamajkuaaʼ. 27 Ikha jngóo nitani̱ rí xáʼngu̱u̱n guni̱ gajmiún xa̱bu̱ sia̱nʼ ndrígu̱ún, bi̱ nángi eʼni niniu̱u̱n rí mumíniiʼ. Mú índo̱ nuraʼníí xkujndu nundxa̱ʼwa̱ rí matambáñún ga̱jma̱a̱ ikháán natadxawún asndu náa mekhuíí. Numuu rí nagáwíinʼ a̱jkia̱a̱nʼ nindxu̱u̱ mba̱a̱ wéñuuʼ, nataxúnguíin bi̱ muni̱ káwíin náa ñawúúnʼ xa̱bu̱ sia̱nʼ ndrígu̱ún.

28 Índo̱ nakúwá májánʼ, na̱tangi̱ín nuni̱ dí ra̱májánʼ náa inaaʼ. Ikha jngóo ikháán nitatsíñúún’ náa ñawúúnʼ xa̱bu̱ sia̱nʼ ndrígu̱ún, bi̱ nuni̱ ngíníi. Ikhiin natangi̱ín nunda̱ʼa̱ rí matambáñún mbu̱júu̱, mámbá índo̱ nunda̱ʼa̱a̱ʼ, natadxawíín asndu mekhuíí ga̱jma̱a̱ natani̱ káwíin numuu rí nagáwíinʼ a̱jkia̱a̱nʼ nindxu̱u̱ mba̱a̱ wéñuuʼ. 29 Ikháán narathúún rí matangi̱i̱n munimbu̱u̱n Xtángoo ndrígáaʼ, mú ikhiin nixujximíjna̱ ga̱jma̱a̱ tsíñún gunimbu̱u̱n kiʼtáñajunʼ ndrígáaʼ. Nixudami̱jna̱ aʼkhá numuu rí túnimbu̱u̱n ikha ndrígáaʼ, dí naʼni makuwá bi̱ nunimbu̱u̱n. Ikhiin nini̱ gaʼduunʼ ga̱jma̱a̱ nini̱ gújkhúʼ a̱jkiu̱ún,* táʼndún gúdxawaanʼ. 30 Mba̱yu̱u̱ʼ tsiguʼ niʼngo̱o̱ a̱jkia̱a̱nʼ xtañún ga̱jma̱a̱ niraxnún espíritu profetas ndrígáaʼ mu muthúún, mú ikhiin táʼndún gúdxawíín. Ikhaa jngóo nitani̱ rí xáʼngu̱u̱n gúni̱ gajmiún xa̱bu̱ sia̱nʼ ndrígu̱ún bi̱ kúwíin náa ku̱ba̱ʼ rúʼko̱. 31 Numuu rí nagáwíinʼ a̱jkia̱a̱nʼ nindxu̱u̱ mba̱a̱ wéñuuʼ na̱nguá nitani̱ gámbíin ni má na̱nguá nitatsíñúúnʼ, numuu rí nindxa̱a̱ʼ mbáa Dios bi̱ naʼngo̱o̱ a̱jkiu̱u̱n ga̱jma̱a̱ bi̱ nagáwíinʼ a̱jkiu̱u̱n.

32 Rí xúgi̱ Dios ndrígúxu̱ nindxa̱a̱ʼ mbáa Dios bi̱ mba̱a̱ bi̱ gíʼdoo itháan tsiaki̱i̱ ga̱jma̱a̱ gamíi, ikháán natanimbaníí rí nataxúdaminaʼ ga̱jma̱a̱ nitasngájma ngajua rí tsétumuu, xáta̱ya̱a̱ rí asndu ragíʼdoo numuu dí nimíniiʼxu, reyes ndrígúxu̱, príncipes ndrígúxu̱, ndxajkun ndrígúxu̱, profetas ndrígúxu̱, wajin xiʼñúxu ga̱jma̱a̱ xúgíinʼ xa̱bu̱ xuajñaanʼ asndu mbiʼi dí reyes Asiria niʼtáñajunʼ asndu mbiʼi xúgi̱. 33 Ikháán nindxa̱a̱ʼ jmbii náa xúgíʼ rí niguáʼníí, numuu rí ikháán nitani̱ má xúʼko̱ rí jmbu. Ikháanʼ nindxu̱xu̱ bi̱ nini̱ dí raʼkhí. 34 Reyes ndrígúxu̱, príncipes ndrígúxu̱, ndxajkun ndrígúxu̱ ga̱jma̱a̱ wajin xiʼñúxu na̱nguá ninimbu̱u̱n Xtángoo ndrígáaʼ ga̱jma̱a̱ na̱nguá nidxawíín kiʼtáñajunʼ ga̱jma̱a̱ ikha rí ikháán niraxnún. 35 Índo̱ ikhiin nitañajunʼ, nini̱ gagimijná ga̱jma̱a̱ mbaʼa enii rí májánʼ dí niraxnún ma̱ngaa kúwá náa ku̱ba̱ʼ rí najma̱a̱ ganitsu dí ikháán niraxnájxu̱u̱n, mú ikhiin túni ñajunʼ ndrígáaʼ ga̱jma̱a̱ túniña̱a̱ʼ runi̱ dí ra̱májánʼ. 36 Rí xúgi̱ nindxu̱xu̱ ñumbáá. Xúʼko̱, nindxu̱xu̱ ñumbáá náa ku̱ba̱ʼ rí niraxnún wajin xiʼñúxu dí mu̱phu̱ rí najma̱a̱ ikhí ga̱jma̱a̱ xúgíʼ rí májánʼ dí rígá ikhí. 37 Ga̱jma̱a̱ numuu aʼkhá ndrígúxu̱, ikha jngóo xúgíʼ rí najma̱a̱ ikhí kaʼñún reyes bi̱ ikháán nitandrigi̱i̱n náa ikháanʼxu̱. Ikhiin nutañájunxu* asndu xó ma eñún ikhiin xúʼko̱ má eniu̱u̱n xujkiúxu̱. Kúwáanʼxu rumíniiʼ wéñuuʼ.

38 Ga̱jma̱a̱ numuu xúgíʼ rígi̱, kúwáanʼ rumbánumijnáxu ma̱ngaa nuniraʼmáʼ mu magiʼdoo numuu sello ndrígu̱ún príncipes ndrígúxu̱, levitas ga̱jma̱a̱ ndxajkun ndrígúxu̱”.

10 Bugi̱ nindxu̱ún bi̱ nixnáá sello mu xúʼko̱ magiʼdoo numuu náa rí nixudamíjna̱ muni̱:

9 Bugi̱ nindxu̱ún levitas: Jesúa a̱ʼdióo Azanías, Binuí mbáa bi̱ nindxu̱u̱ a̱ʼdióo Henadad, ma̱ngaa Cadmiel, 10 xúʼko̱ má a̱ngui̱i̱n bi̱ nindxu̱u̱, Sebanías, Hodías, Quelitá, Pelayá, Hanán, 11 Micá, Rehob, Hasabías, 12 Zacur, Serebías, Sebanías, 13 Hodías, Baní ga̱jma̱a̱ Beninú.

14 Bugi̱ nindxu̱ún bi̱ ndiya̱ edxu̱u̱ náa xuajin: Parós, Pahat-Moab, Elam, Zatú, Baní, 15 Buní, Azgad, Bebái, 16 Adonías, Bigvái, Adín, 17 Ater, Ezequías, Azur, 18 Hodías, Hasum, Bezái, 19 Harif, Anatot, Nebái, 20 Magpías, Mesulam, Hezir, 21 Mesezabel, Sadoc, Jadúa, 22 Pelatías, Hanán, Anaya, 23 Hosea, Hananías, Hasub, 24 Halohés, Pilhá, Sobec, 25 Rehúm, Hasabná, Maaseya, 26 Ahíya, Hanán, Anán, 27 Maluc, Harim ga̱jma̱a̱ Baaná.

28 Xúgíinʼ xa̱bu̱ xuajin, ndxajkun, levitas, bi̱ nuñewa̱a̱n xkrugua, bi̱ nuni̱ ajmúú, bi̱ nuñajunʼ náa guʼwá rí nduyamajkuíí Dios* ga̱jma̱a̱ xúgíinʼ bi̱ nini wajímijná náa xuajin dí rígá mijngii mu xúʼko̱ munimbáníí Xtángoo ndrígóo Dios bi̱ gajkhun, mbóó gajmiún guʼñún, jiámiu̱ún, waʼxiu̱únʼ ma̱ngaa asndu tsáa má bi̱ gíʼdoo ku̱ma̱ ga̱jma̱a̱ naʼngo̱o̱ nakro̱ʼo̱o̱,* 29 nini̱ xó má a̱ngiu̱ún, xa̱bu̱ bi̱ guáʼdáá numún. Nixna ajngún rí majngruigu̱u̱n xó má naʼthí náa Xtángoo ndrígóo Dios bi̱ gajkhun rí nikánáán Moisés xa̱bi̱i̱ Dios bi̱ gajkhun, á mu rí tsénimbáníí majuiʼthá tsríguíin. Ma̱ngaa nixna ajngún dí munimbáníí tsumáá xúgíʼ kiʼtáñajunʼ ma̱ngaa xtángoo ga̱jma̱a̱ ikha ndrígóo Jeobá bi̱ nindxu̱u̱ Tátá ndrígúlú. Nithi: 30 “Xúniʼñáánʼ dí waʼxiuxu̱ munuju̱nʼ gajmiún e̱jñu̱ún xa̱bu̱ bi̱ kúwá náa ku̱ba̱ʼ rígi̱ ni má xuniʼñááʼ dí jiámiuxu̱ munigu̱nʼ gajmiún wa̱ʼxiúnʼ.

31 Á mu xa̱bu̱ bi̱ kúwá náa i̱ʼwáʼ xuajin gáguwáʼ kudúún rí mugu̱jua̱ mbiʼi sábado tséʼniuu má ndiéjunʼ gáguwáʼ kudúún, ikháanʼxu̱ xútsixu̱ nimbá rí mbiʼi sábado ni má i̱mba̱ mbiʼi rí mitsúʼkháan. Ma̱ngaa xúrajxi̱i̱ dí gájma̱a̱ índo̱ gáʼni juwan tsiguʼ ga̱jma̱a̱ mu̱ni̱ ngúdi̱i̱xu̱ xúgíʼ gidxóó.

32 Ma̱ngaa nixuʼdámíjnáxu rí mámbá tsiguʼ mámbáa dí ikháanʼxu̱ maxná plata, mbá tercio ndrígóo siclo* mu majmaa náa goʼwóo Dios ndrígúxu̱, 33 xúʼko̱ má náa pan dí karngujxi̱,* xúʼko̱ má náa tsigijñaʼ rí tsígáʼ rí mixnájxi̱ mámbá gájtsi, xúʼko̱ má náa tsigijñaʼ dí nakarámáʼ dí najuixnájxi̱ sábado ma̱ngaa rí najuixnájxi̱ índo̱ nagi̱ʼi̱ gu̱nʼ rudiiʼ, ma̱ngaa náa ndxa̱a̱ dí magumari̱ya̱a̱ʼ, ma̱ngaa náa rí mikaʼwu, ma̱ngaa majmaa náa tsigijñaʼ ga̱jma̱a̱ numuu aʼkhá dí narígúu aʼkhúun Israel ma̱ngaa mu majmaa náa xúgíʼ ñajunʼ dí naguma náa goʼwóo Dios ndrígúlú.

34 Ma̱ngaa niríya̱xu̱ suerte* mu mbu̱ya̱a̱ náa mbiʼi rí mámbá tsiguʼ kaʼñún magún kudún ixi̱ náa goʼwóo Dios bi̱ mámbá guʼwíin ndxajkun, levitas ma̱ngaa xa̱bu̱ xuajin, mu mi̱kha náa nakarámáʼ tsigijñaʼ ndrígóo Jeobá Dios ndrígúlú, xó má kiʼnirámáʼ náa Xtángoo. 35 Ma̱ngaa mámbá tsiguʼ, muʼguá kudúxu náa goʼwóo Jeobá rí na̱jma̱a̱ ginii kayuuʼ náa nidúxu̱ ma̱ngaa xúgíʼ xndú taun dí najma̱a̱ ginii. 36 Xúʼko̱ má muʼguá kudiin e̱jín giʼniúxu̱ ma̱ngaa e̱jñu̱ún xujkiuxu̱ bi̱ nagumii ginii, xó má naʼthí náa Xtángoo, e̱jín giʼniún xédiuxu̱ xúʼko̱ má e̱jín gíʼniún mugiuxu̱. Xúgíʼ gúʼguá kuduxu̱ náa goʼwóo Dios ndrígúxu̱ náa kúwá ndxajkun bi̱ nuñajunʼ náa goʼwóo Dios ndrígúxu̱. 37 Muʼguá kuduxu̱ dí muxnu̱u̱xu̱ ndxajkun, dí majthi náa cuarto dí naxtagijxi̱i̱ náa goʼwóo Dios ndrígúxu̱, timbá harina dí nigájnaa dí kaʼníí gíʼdoo xtíxúu, xúgíʼ xndú taun, vino nuxi̱ʼ ga̱jma̱a̱ aceite. Muʼguá kudáxu mbá nguéjma̱* xúgíʼ dí najma̱a̱ náa mbayuxu̱ muxnu̱u̱xu̱ levitas, numuu rí ikhiin kaʼñún murajxi̱i̱ mbá nguéjma̱ xúgíʼ dí najma̱a̱ náa xúgíʼ xuajin dí najuiʼdu.

38 Ndxajkun bi̱ nindxu̱u̱ a̱ʼdióo Aarón, gíʼmaa maxtáa gajmíi̱n levitas índo̱ ikhiin gúrajxi̱i̱ mbá nguéjma̱ xúgíʼ dí gájma̱a̱. Náa mbá nguéjma̱ rúʼko̱, levitas mbaʼyóoʼ murawíi mbá nguéjma̱ muxna náa goʼwóo Dios ndrígúlú, náa cuarto rí naxtagijxi̱i̱. 39 Numuu dí israelitas ga̱jma̱a̱ e̱jñu̱ún levitas mbaʼyóoʼ magún kudúún rí nijma̱a̱ dí majuixná, vino nuxi̱ʼ ga̱jma̱a̱ aceite náa cuarto dí maxtagi̱jxi̱i̱. Ikhí, náa rígá dí najmaa náa mikaʼwu ma̱ngaa ikhí kúwá ndxajkun bi̱ nuñajunʼ, bi̱ nuñewa̱a̱n xkrugua ga̱jma̱a̱ bi̱ nuni̱ ajmúú. Muñewa̱nxu̱ má xúʼko̱ goʼwóo Dios ndrígúxu̱”.

11 Bi̱ nindxu̱ún príncipes náa xuajin kúwá náa Jerusalén. Ikhú xa̱bu̱ xuajin niri̱ya̱ʼ suerte* náa majñu̱únʼ xa̱bu̱, mu xúʼko̱ náa mbá gu̱wi̱i̱nʼ xa̱bu̱ magajnúu mbáa maʼga̱a̱ gáxtáa náa Jerusalén, náa xuajin kaʼwu ga̱jma̱a̱ bi̱ i̱mbá mijna gu̱wi̱i̱nʼ maguanún makuwá náa i̱ʼwáʼ xuajin. 2 Ikhú xa̱bu̱ xuajin nini̱ tsajkurámiinʼ xa̱bu̱ bi̱ nindúún maguáan ikhiín náa Jerusalén.

3 Rígi̱ nindxu̱u̱ lista náa na̱ʼkha̱ mbiʼñún bi̱ kuya̱ edxu̱ún náa xuajin majkhaʼ bi̱ kúwá náa Jerusalén. (Eʼwíinʼ israelitas, ndxajkun, levitas, bi̱ nuñajunʼ náa guʼwá rí nduyamajkuíí Dios* ga̱jma̱a̱ e̱jñu̱ún xa̱bi̱i̱ Salomón kúwá náa i̱ʼwáʼ xuajin ndrígóo Judá, mámbáa náa mbayuuʼ ga̱jma̱a̱ náa xuajñuu.

4 Ma̱ngaa náa Jerusalén kúwá tikhuun xa̱bu̱ bi̱ naguwáʼ náa Judá ga̱jma̱a̱ náa Benjamín). Bi̱ na̱ʼkha̱ náa Judá nindxu̱u̱ Ataya a̱ʼdióo Uzías, a̱ʼdióo Zacarías, a̱ʼdióo Amarías, a̱ʼdióo Sefatías, a̱ʼdióo Mahalalel, bi̱ na̱ʼkha̱ náa e̱ji̱i̱n Pérez, 5 ga̱jma̱a̱ Maaseya a̱ʼdióo Baruc, a̱ʼdióo Colhozé, a̱ʼdióo Hazaya, a̱ʼdióo Adaya, a̱ʼdióo Joiarib, a̱ʼdióo Zacarías, bi̱ na̱ʼkha̱ náa e̱ji̱i̱n selanita. 6 E̱ji̱i̱n Pérez bi̱ kúwá náa Jerusalén ninindxu̱ún mbá 468 xa̱bekha bi̱ tsémiñún.

7 Xa̱bu̱ bi̱ naguwáʼ náa Benjamín nindxu̱u̱ Salú a̱ʼdióo Mesulam, a̱ʼdióo Joed, a̱ʼdióo Pedaya, a̱ʼdióo Colaya, a̱ʼdióo Maaseya, a̱ʼdióo Itiel, a̱ʼdióo Jesayá, 8 ma̱ngaa ikhí xtáa Gabái ga̱jma̱a̱ Salái. Dí mbá xúgíinʼ ninindxu̱ún mbá 928. 9 Joel a̱ʼdióo Zicrí nindxu̱u̱ bi̱ kayá edxu̱u̱ náa ikhiin ga̱jma̱a̱ Judá a̱ʼdióo Hasenuá nindxu̱u̱ bi̱ maʼni raga̱jmi̱i̱n bi̱ kayá edxu̱u̱ náa xuajin.

10 Ga̱jma̱a̱ ndxajkun nindxu̱u̱ Jedayá a̱ʼdióo Joiarib, Jakín, 11 Seraya a̱ʼdióo Hilquías, a̱ʼdióo Mesulam, a̱ʼdióo Sadoc, a̱ʼdióo Merayot, a̱ʼdióo Ahitub, mbáa bi̱ kayá edxu̱u̱ náa goʼwóo Dios bi̱ gajkhun, 12 ga̱jma̱a̱ a̱ngiu̱ún bi̱ nuñajunʼ náa guʼwá rí nduyamajkuíí Dios. Dí mbá xúgíinʼ ninindxu̱ún mbá 822. Ma̱ngaa ikhí nixtáa Adaya a̱ʼdióo Jeroham, a̱ʼdióo Pelalías, a̱ʼdióo Amzí, a̱ʼdióo Zacarías, a̱ʼdióo Pasjur, a̱ʼdióo Malkiya, 13 ma̱ngaa a̱ngiu̱ún, bi̱ kuya̱ edxu̱u̱ náa mámbá guʼwíin xa̱bu̱. Dí mbá xúgíinʼ ninindxu̱ún mbá 242. Ma̱ngaa ikhí xtáa Amashái a̱ʼdióo Azarel, a̱ʼdióo Ahzái, a̱ʼdióo Mesilemot, a̱ʼdióo Imer, 14 ga̱jma̱a̱ a̱ngiu̱ún, bi̱ nindxu̱ún xa̱bu̱ bi̱ tsémiñún ga̱jma̱a̱ guáʼdáá tsiaki̱i̱. Dí mbá xúgíinʼ ninindxu̱ún mbá 128. Bi̱ kayá edxu̱u̱ náa ikhiin nindxu̱u̱ Zabdiel, bi̱ na̱ʼkha̱ náa mbá guʼwíin xa̱bu̱ bi̱ najmaʼniúúnʼ.

15 Bi̱ nindxu̱ún levitas nindxu̱u̱ Semaya a̱ʼdióo Hasub, a̱ʼdióo Azricam, a̱ʼdióo Hasabías, a̱ʼdióo Buní, 16 ma̱ngaa Sabetái ga̱jma̱a̱ Jozabad, bi̱ kuya̱ edxu̱ún náa levitas bi̱ kaʼñúún muñajunʼ náa rexo̱o̱ goʼwóo Dios bi̱ gajkhun. 17 Ga̱jma̱a̱ ikhí xtáa Matanías a̱ʼdióo Miqueas, a̱ʼdióo Zabdí, a̱ʼdióo Asaf, bi̱ kayá edxu̱u̱ náa nuni̱ ajmúú ga̱jma̱a̱ naʼni ajmúú índo̱ nutajkháan ga̱jma̱a̱ Bacbuquías nindxu̱u̱ bi̱ maʼni raga̱jmi̱i̱n náa a̱ngui̱i̱n, xó má Abdá a̱ʼdióo Samúa, a̱ʼdióo Galal, a̱ʼdióo Jedutún. 18 Levitas bi̱ kúwá náa xuajin kaʼwu dí mbá xúgíinʼ ninindxu̱ún mbá 284.

19 Bi̱ nuñewa̱a̱n xkrugua nindxu̱u̱ Acub, Talmón gajmíi̱n a̱ngui̱i̱n. Dí mbá xúgíinʼ ninindxu̱ún mbá 172.

20 Ga̱jma̱a̱ eʼwíinʼ israelitas, ndxajkun ga̱jma̱a̱ levitas bi̱ kúwá náa i̱ʼwáʼ xuajin ndrígóo Judá, mámbáa xtáa náa mbayuuʼ rí nigruigúu. 21 Bi̱ nuñajunʼ náa guʼwá rí nduyamajkuíí Dios kúwá náa Ofel. Ziha ga̱jma̱a̱ Guispá nindxu̱ún bi̱ nutañajúúnʼ bi̱ nuñajunʼ náa guʼwá rí nduyamajkuíí Dios.*

22 Bi̱ kayá edxu̱u̱ náa levitas bi̱ kúwá náa Jerusalén nindxu̱u̱ Uzí, a̱ʼdióo Baní, a̱ʼdióo Hasabías, a̱ʼdióo Matanías, a̱ʼdióo Micá, bi̱ na̱ʼkha̱ náa Asaf, bi̱ nuni̱ ajmúú. Ikhaa kaʼyoo ñajunʼ dí naguma náa goʼwóo Dios bi̱ gajkhun. 23 Rey niʼtáñajunʼ dí maxtiewu̱u̱n bi̱ nuni̱ ajmúú ga̱jma̱a̱ mixnún dí gáʼñúún’ mámbá mbiʼi. 24 Ga̱jma̱a̱ Petahías a̱ʼdióo Mesezabel, a̱ʼdióo Zérah, a̱ʼdióo Judá bi̱ naxnúu consejo rey* ga̱jma̱a̱ numún xa̱bu̱ xuajin.

25 Mú xuajin dí rígá ikhí ga̱jma̱a̱ mbayuuʼ, tikhuun xa̱bu̱ Judá bi̱ nikúwá náa Quiryat-Arbá ga̱jma̱a̱ xuajin dí tri̱ga̱ mijngii ikhí, náa Dibón ga̱jma̱a̱ xuajin dí tri̱ga̱ mijngii ikhí, náa Jecabzeel ga̱jma̱a̱ xuajin dí rígá ikhí, 26 náa Jesúa, náa Moladá, náa Bet-Pélet, 27 náa Hazar-Sual, náa Beer-Seba ga̱jma̱a̱ xuajin dí tri̱ga̱ mijngii ikhí, 28 náa Ziclag, náa Meconá ga̱jma̱a̱ xuajin dí tri̱ga̱ mijngii ikhí, 29 náa En-Rimón, náa Zorá, náa Jarmut, 30 náa Zanóah, náa Adulam ga̱jma̱a̱ xuajin dí rígá ikhí, náa Lakís ga̱jma̱a̱ mbayuuʼ, náa Azecá ga̱jma̱a̱ xuajin rí tri̱ga̱ mijngii ikhí. Nigi̱ʼi̱i̱n xígií náa ku̱ba̱ʼ dí na̱jkha̱ xígií náa Beer-Seba asndu náa mata* ndrígóo Hinón.

31 Xa̱bu̱ bi̱ naguwáʼ náa Benjamín kúwá náa Gueba, náa Micmash, náa Aya, náa Betel ga̱jma̱a̱ xuajin rí tri̱ga̱ mijngii ikhí, 32 náa Anatot, náa Nob, náa Ananíah, 33 náa Hazor, náa Ramá, náa Guitaim, 34 náa Hadid, náa Zeboím, náa Nebalat, 35 náa Lod ga̱jma̱a̱ náa Onó, náa mata ndrígu̱ún bi̱ nuni̱ xúgíʼ enii ñajunʼ dí mitsaanʼ.* 36 Tikhuun levitas bi̱ nini̱ wájimíjná bi̱ kúwá náa Judá nixuʼmiin magún gákuwá náa xuajin ndrígóo Benjamín.

12 Ndxajkun ga̱jma̱a̱ levitas bi̱ niguwáánʼ náa ni̱jkha̱ kiʼdiin gajmiún Zorobabel a̱ʼdióo Sealtiel ga̱jma̱a̱ Jesúa, nindxu̱u̱: Seraya, Jeremías, Esdras, 2 Amarías, Maluc, Hatús, 3 Secanías, Rehúm, Meremot, 4 Idó, Guinetói, Abías, 5 Mijamín, Maadías, Bilgá, 6 Semaya, Joiarib, Jedayá, 7 Salú, Amoc, Hilquías ga̱jma̱a̱ Jedayá. Bugi̱ nindxu̱ún bi̱ ndiya̱ edxu̱u̱ náa ndxajkun ma̱ngaa náa a̱ngiu̱ún nákha mbiʼi rí nixtáa Jesúa.

8 Bugi̱ ninindxu̱ún levitas, Jesúa, Binuí, Cadmiel, Serebías, Judá ga̱jma̱a̱ Matanías, bi̱ nixná ikha náa nini̱ ajmúú mbóó gajmiún a̱ngiu̱ún índo̱ nixna̱a̱ núma̱aʼ. 9 Bacbuquías ga̱jma̱a̱ Uní bi̱ nindxu̱ún a̱ngiu̱ún bi̱ guájun náa inún ikhiin nindxu̱ún bi̱ nuyejngoo* náa guʼwá rí nduyamajkuíí Dios. 10 Jesúa ninindxu̱u̱ anu̱u̱* Joiaquim, Joiaquim ninindxu̱u̱ anu̱u̱ Eliasib ga̱jma̱a̱ Eliasib ninindxu̱u̱ anu̱u̱ Joiadá. 11 Joiadá ninindxu̱u̱ anu̱u̱ Jonatán ga̱jma̱a̱ Jonatán ninindxu̱u̱ anu̱u̱ Jadúa.

12 Mbiʼi rí nixtáa Joiaquim, bugi̱ ninindxu̱ún ndxajkun bi̱ kuya̱ edxu̱u̱ náa mámbá guʼwíin xa̱bu̱: Náa goʼwóo Seraya ninindxu̱u̱ Meraya, náa goʼwóo Jeremías, Hananías, 13 náa goʼwóo Esdras, ninindxu̱u̱ Mesulam náa goʼwóo Amarías, Jehohanán, 14 náa goʼwóo Malukí, ninindxu̱u̱ Jonatán, náa goʼwóo Sebanías, José, 15 náa goʼwóo Harim, ninindxu̱u̱ Adná, náa goʼwóo Merayot, Helcái, 16 náa goʼwóo Idó, ninindxu̱u̱ Zacarías, náa goʼwóo Guinetón, Mesulam, 17 náa goʼwóo Abías, ninindxu̱u̱ Zicrí, náa goʼwóo Miniamín, ...* náa goʼwóo Moadías, Piltái, 18 náa goʼwóo Bilgá, ninindxu̱u̱ Samúa, náa goʼwóo Semaya, Jehonatán, 19 náa goʼwóo Joiarib, ninindxu̱u̱ Matenái, náa goʼwóo Jedayá, Uzí, 20 náa goʼwóo Salái, ninindxu̱u̱ Calái, náa goʼwóo Amoc, Éber, 21 náa goʼwóo Hilquías, ninindxu̱u̱ Hasabías ga̱jma̱a̱ náa goʼwóo Jedayá, Netanel.

22 Bi̱ kuya̱ edxu̱u̱ náa mámbá guʼwíin xa̱bu̱ bi̱ nindxu̱ún levitas, xó má ndxajkun, nigumaraʼmáʼ mbiʼñún nákha mbiʼi rí nixtáa Eliasib, Joiadá, Johanán ga̱jma̱a̱ Jadúa, xóo muʼthá asndu índo̱ niʼtáñajunʼ Darío xa̱bu̱ persa.

23 Levitas bi̱ kuya̱ edxu̱u̱ náa mámbá guʼwíin xa̱bu̱ bi̱ nigumaraʼmáʼ mbiʼñún náa libro rí naʼthí xóo ni̱ʼkha̱ rarígá, asndu mbiʼi rí nixtáa Johanán a̱ʼdióo Eliasib. 24 Bi̱ ndiya̱ edxu̱u̱ náa levitas nindxu̱u̱ Hasabías, Serebías ga̱jma̱a̱ Jesúa a̱ʼdióo Cadmiel. Ga̱jma̱a̱ a̱ngiu̱ún bi̱ nuyejngoo niguájun náa inún ikhiin mu muni̱ mba̱a̱ Dios ga̱jma̱a̱ nuxna̱a̱ núma̱aʼ xó má ikha rí nixná David xa̱bi̱i̱ Dios bi̱ gajkhun. 25 Matanías, Bacbuquías, Abdías, Mesulam, Talmón ga̱jma̱a̱ Acub bi̱ guájun náa xkrugua ruñewa̱a̱n cuarto náa naxtagijxi̱i̱ dí najmún rí gíʼ mijngíí náa xkrugoo guʼwá rí nduyamajkuíí Dios. 26 Ikhiin nini̱ ñajunʼ nákha mbiʼi rí nixtáa Joiaquim, a̱ʼdióo Jesúa, a̱ʼdióo Jozadac, nákha mbiʼi rí niʼtáñajunʼ Nehemías ma̱ngaa ndxajkun Esdras bi̱ naʼtáriyaʼ náa kiʼnirámáʼ.

27 Mu maguma ndxo̱o̱ xtájtsí dí rígá náa Jerusalén nigún gúñíinʼ levitas náa xúgíʼ xuajin rí kúwíin. Niguwáánʼ kudiin náa Jerusalén mu muni̱ ndxa̱a̱ ga̱jma̱a̱ gagi, muni̱ ajmúú mu muxna̱a̱ núma̱aʼ ga̱jma̱a̱ címbalos ma̱ngaa ajua̱nʼ rí gíʼdoo cuérdóo ga̱jma̱a̱ arpas. 28 Nigimbíin e̱jñu̱ún bi̱ nuni̱ ajmúú bi̱ naguwáʼ náa xúgíʼ mbaaʼ dí rígá náa mbájndi Jerusalén ga̱jma̱a̱ náa xuajin dí rígá ikhí náa naguwáʼ netofatitas, 29 náa Bet-Guilgal ga̱jma̱a̱ náa mbaaʼ dí rígá náa Gueba ma̱ngaa náa Azmávet, bi̱ nuni̱ ajmúú nindri̱ga̱ xuajin náa mbájndi Jerusalén. 30 Ndxajkun ga̱jma̱a̱ levitas nini̱ kaʼwumijnáa má ikhiin ma̱ngaa nini̱ kaʼwi̱i̱n xa̱bu̱ xuajin, xkrugua ga̱jma̱a̱ xtájtsí.

31 Ikhú ni̱ni̱ rí príncipes bi̱ kúwá náa Judá matsimún náa xtájtsí. Ma̱ngaa nigruígi̱i̱n a̱jma̱ grupo bi̱ nuni̱ ajmúú mú muxna̱a̱ núma̱aʼ ga̱jma̱a̱ a̱jma̱ grupo bi̱ magún kidxúúnʼ. Mbá grupo nigún xígií náa ñawún májánʼ ga̱jma̱a̱ nigún kruámúúnʼ náa xtájtsí xígií náa Xkrugua náa rígá Ru̱tsu̱u̱ Idiʼ.* 32 Hosaya ga̱jma̱a̱ mbá nguéjmi̱i̱n príncipes bi̱ kúwá náa Judá nigún náa kidxúúnʼ ikhiin, 33 ma̱ngaa Azarías, Esdras, Mesulam, 34 Judá, Benjamín, Semaya ga̱jma̱a̱ Jeremías. 35 Ma̱ngaa nagún gajmiún tikhuun e̱jñu̱ún ndxajkun bi̱ kuda trompetas: Zacarías, a̱ʼdióo Jonatán, a̱ʼdióo Semaya, a̱ʼdióo Matanías, a̱ʼdióo Micaya, a̱ʼdióo Zacur, a̱ʼdióo Asaf, 36 ma̱ngaa bi̱ nindxu̱ún a̱ngiu̱ún, Semaya, Azarel, Milalái, Guilalái, Maái, Netanel, Judá ga̱jma̱a̱ Hananí. Ikhiin kuda ajua̱nʼ rí nuni̱ ajmúú ga̱jma̱a̱, ajua̱nʼ ndrígóo David xa̱bi̱i̱ Dios bi̱ gajkhun. Ma̱ngaa Esdras bi̱ naʼtáriyaʼ náa kiʼnirámáʼ frígu ra̱jkha̱ ginii náa inún ikhiin. 37 Asndu náa Xkrugua náa rígá Puzu* asndu náa inuu rí natsimuu Escalera ndrígóo Xuajñuu David, nitsimún xígií náa kri̱ga̱ xtájtsí, nigún má xúʼko̱ itháan rijma̱a̱ náa kri̱ga̱ goʼwóo David asndu náa Xkrugua dí rígá Iyaʼ* xígií náa nagájnuu a̱jkha̱ʼ.*

38 Mbá grupo bi̱ muni̱ ajmúú bi̱ kaʼñún muxna̱a̱ núma̱aʼ nigún xígií náa i̱mba̱ níʼkhóo, ikhúún ni̱jkhá kidxu̱únʼ xígií náa tsu̱du̱u̱ xtájtsí gajmíʼ i̱mbá tapi̱i̱n xa̱bu̱. Ninújngún náa guʼwá mitsídánʼ dí rígá Hornos,* nigún má xúʼko̱ náa Xtájtsí dí Ma̱ja̱nʼ,* 39 ninújngún náa Xkrugoo Efraín* ga̱jma̱a̱ nigún má xúʼko̱ náa Xkrugoo Xuajin Wayuu* ma̱ngaa náa Xkrugoo E̱gi̱ʼ* ma̱ngaa náa Guʼwá mitsídánʼ* ndrígóo Hananel ga̱jma̱a̱ Guʼwá mitsídánʼ ndrígóo Meá. Nda̱wa̱á nigún náa Xkrugún Mugu̱* asndu niguáʼnu náa Xkrugún bi̱ Nuyejngoo,* ikhí niguájun.

40 Nda̱wa̱á nájma̱ grupo bi̱ nuni̱ ajmúú ga̱jma̱a̱ bi̱ kaʼñúún muxna̱a̱ núma̱aʼ niguájun náa inuu goʼwóo Dios bi̱ gajkhun. Ma̱ngaa nigúju̱n gajmíʼ bi̱ mbá nguéjmi̱i̱n xa̱bu̱ ñajunʼ bi̱ raguáʼdáá wéñuuʼ numún bi̱ kúwá ga̱jma̱á nindxu̱ʼ, 41 bi̱ nindxu̱ún ndxajkun, Eliaquim, Maaseya, Miniamín, Micaya, Elioenái, Zacarías ga̱jma̱a̱ Hananías, bi̱ kuda trompeta, 42 xó má Maaseya, Semaya, Eleazar, Uzí, Jehohanán, Malkiya, Elam ga̱jma̱a̱ Ézer. Ma̱ngaa bi̱ nuni̱ ajmúú gakhi̱i̱ xó má bi̱ naxnún ikha nindxu̱u̱ Izrahías.

43 Nákha mbiʼi rúʼko̱ nixnajxi̱ mbaʼa wéñuuʼ tsigijñaʼ ga̱jma̱a̱ nikúwá gagi, Dios bi̱ gajkhun niʼni dí makuwá gagi. Gu̱ʼu̱ gajmiún e̱ji̱n mangiin nikúwá gagi. Ra̱ʼkhá tháán nirígá gagi náa Jerusalén rí asndu mitsínguánʼ ewáán.

44 Mbiʼi rúʼko̱ nindrigi̱i̱n bi̱ muñewa̱a̱n náa naxtagijxi̱i̱ rí nijuixná ga̱jma̱a̱ rí najma̱a̱ ginii ma̱ngaa mbá nguéjma̱* rí nijuixná. Ikhí gíʼmaa mixtagijxi̱i̱ rí najma̱a̱ náa mbaaʼ dí rígá náa xuajin, xó má eʼthí náa Xtángoo, rí kaʼñúún ndxajkun ga̱jma̱a̱ levitas. Xúgíinʼ xa̱bu̱ Judá nikúwá tsímáá ga̱jma̱a̱ numún ndxajkun ma̱ngaa levitas bi̱ kúwá ruñajunʼ. 45 Ikhiin nigi̱ʼdi̱i̱ ninimbaníí ñajunʼ náa Dios ndrígu̱ún ga̱jma̱a̱ rí kaʼñúún muni̱ kaʼwumijnáa, ikháá xó má nini̱ bi̱ nuni̱ ajmúú ga̱jma̱a̱ bi̱ nuñewa̱a̱n xkrugua, xó má ikha dí nixná David ma̱ngaa Salomón bi̱ nindxu̱u̱ a̱ʼdióo. 46 Numuu rí nákhá ginii, mbiʼi rí nixtáa David ga̱jma̱a̱ Asaf, kúwá bi̱ nuxnún ikha bi̱ nuni̱ ajmúú ma̱ngaa ajmúú rí nuni̱ mba̱a̱ Dios ga̱jma̱a̱ rí nuxna̱a̱ núma̱aʼ. 47 Mbiʼi rí nixtáa Zorobabel ga̱jma̱a̱ mbiʼi rí nixtáa Nehemías, xúgíinʼ xa̱bu̱ Israel nuxnún rí kaʼñúún bi̱ nuni̱ ajmúú ga̱jma̱a̱ bi̱ nuñewa̱a̱n xkrugua, xó má rí ndañúunʼ mámbá mbiʼi. Ma̱ngaa nuxnún mbá nguéjma̱ dí kaʼñúún levitas ga̱jma̱a̱ levitas nuxnún mbá nguéjma̱ rí kaʼñúún bi̱ naguwáʼ náa Aarón.

13 Mbiʼi rúʼko̱ nigixnuu xtángoo ndrígóo Moisés mudxawíín xa̱bu̱ xuajin. Ikhí nidxawíín rí xáʼyóoʼ makuwá ammonitas ni má moabitas náa kúwá xa̱bu̱ bi̱ nduyamajkuíí Dios bi̱ gajkhun, 2 numuu rí ikhiin na̱nguá nindriguíin israelitas ni má túxnún ganitsu* ni má iyaʼ. Rí phú nini̱, nini̱ numáá Balaam mu maʼtátsríguíinʼ. Mú Dios ndrígúlú niʼni dí maguma tsajkurámíinʼ raʼkháa dí majuiʼthá tsríguíin. 3 Índo̱ xa̱bu̱ xuajin nidxawíín rí naʼthí náa Xtángoo, nini̱ wájíinʼ xa̱bu̱ Israel náa xúgíinʼ xa̱bu̱ bi̱ naguwaáʼ.

4 Nákhá ginii, ndxajkun bi̱ kajkuáa ñawúunʼ cuarto náa naxtagijxi̱i̱ dí najmún dí rígá náa goʼwóo Dios ndrígúlú nindxu̱u̱ Eliasib, bi̱ kaʼyoo Tobías. 5 Eliasib nixnúu Tobías mbá cuarto mba̱a̱. Ikhí nákhá ginii naxtagijxi̱i̱ tsigijñaʼ rí tsígáʼ, olíbano, xúgíʼ dí najmaa ga̱jma̱a̱ mbá nguéjma̱* xúgíʼ dí najma̱a̱ náa najuiʼdu, vino nuxi̱ʼ ga̱jma̱a̱ aceite rí kaʼñún bi̱ levitas, bi̱ nuni̱ ajmúú ga̱jma̱a̱ bi̱ nuñewa̱a̱n xkrugua. Ikhí ma̱ngaa naxtagijxi̱i̱ xúgíʼ rí nakánún ndxajkun.

6 Náa xúgíʼ mbiʼi rúʼko̱ ikhúún na̱nguá nixtáá náa Jerusalén, numuu rí nákhá tsiguʼ 32 dí xtáa raʼtáñajunʼ rey Artajerjes náa Babilonia ikhúún nitangu̱ún náa xtáa ikhaa. Mú nguáthá mba̱yu̱u̱ʼ mbiʼi nda̱wa̱á nindo̱ʼo̱o̱ permiso rey dí magajnúʼ. 7 Ikhú nitanga̱án náa Jerusalén ga̱jma̱a̱ ndi̱yo̱o̱ dí xkawiʼ rí niʼni Eliasib niʼni rígi̱ mu maʼni a̱jkiu̱u̱n kaʼyoo Tobías, nixnúu mbá cuarto náa naxtagijxi̱i̱ rí najmún dí rígá náa rexo̱o̱ goʼwóo Dios bi̱ gajkhun. 8 Rígi̱ niʼni dí makiʼnún wéñuuʼ, ikha jngóo nidajuíi rexa̱a̱ trástiúu Tobías dí kajti náa cuarto. 9 Nda̱wa̱á nitañájunʼ rí muni̱ kaʼwi̱i̱ cuarto náa naxtagijxi̱i̱ dí najmún ma̱ngaa nigruáʼáa ikhí dí najmaa náa goʼwóo Dios bi̱ gajkhun, xúʼko̱ má tsigijñaʼ dí tsígáʼ ga̱jma̱a̱ olíbano.

10 Ma̱ngaa nidxawuun dí levitas na̱nguá endrigú dí kaʼñún makánún. Ikhaa rúʼko̱ numuu dí levitas ga̱jma̱a̱ bi̱ nuni̱ ajmúú ndiyóoʼ maʼga̱a̱ mámbáa náa mbayuuʼ. 11 Ikha jngóo ni̱ri̱ñún xa̱bu̱ ñajunʼ bi̱ raguáʼdáá wéñuuʼ numún ga̱jma̱a̱ ni̱thu̱u̱n: “Náá numuu dí niniʼñáánʼ maguanáa goʼwóo Dios bi̱ gajkhun rá.” Nda̱wa̱á nigímbíin xúgíinʼ bi̱ nigúun mu matangi̱i̱n muni̱ ñajunʼ rí guáʼdáá. 12 Xúgíinʼ xa̱bu̱ Judá nigún kudúún mbá nguéjma̱ rí nijma̱a̱ náa nidu, vino nuxi̱ʼ ga̱jma̱a̱ aceite náa cuarto rí naxtagijxi̱i̱ dí najmún. 13 Ikhú niʼgíiʼ ndxajkun Selemías ma̱ngaa Sadoc bi̱ naʼtáriyaʼ náa kiʼnirámáʼ ga̱jma̱a̱ Pedaya mbáa bi̱ nindxu̱u̱ levita, nirajkuáa náa ñawúúnʼ ikhiin cuarto náa naxtagijxi̱i̱ dí najmún. Bi̱ mambáñúún ikhiin nindxu̱u̱ Hanán, a̱ʼdióo Zacur, a̱ʼdióo Matanías. Xúgíinʼ ikhiin nindxu̱ún xa̱bu̱ bi̱ kaʼnii maku̱ma̱a̱ʼ xtañún. Ikhiin kaʼñúún rí muxnún a̱ngiu̱ún xó má kaʼyoo makánáán mámbáa.

14 Dios ndrígóʼ, garmáʼáan a̱jkia̱a̱nʼ e̱ni̱ ma̱ngaa xúgíʼ dí ni̱ni̱ náa xkujndu rígi̱. Xámbumaaʼ xóo nisngajmá ngajua rí tsétumuu* náa guʼwáaʼ ma̱ngaa náa ñajunʼ dí naguma ikhí.

15 Nákha mbiʼi rúʼko̱ ndi̱yo̱o̱ rí kúwá xa̱bu̱ bi̱ nuxujmbi̱i̱ uva rí mbiʼi sábado, xúʼko̱ má nurajxi̱i̱ rí nijma̱a̱ náa nidu, nuxieʼdún búrru ga̱jma̱a̱ naguwáʼ kudúún náa Jerusalén vino, uva, higo ga̱jma̱a̱ xúgíʼ enii rí najma̱a̱, naguwáʼ kudúún mbiʼi sábado. Ikha jngóo ni̱thu̱u̱n rí muniña̱a̱ʼ raguwáʼ rugujua̱ mbiʼi rúʼko̱.* 16 Ma̱ngaa bi̱ nindxu̱ún tirios bi̱ kúwá náa xuajin naguwáʼ kudiin e̱gi̱ʼ ma̱ngaa xúgíʼ enii dí nugujua̱ ga̱jma̱a̱ nugu̱ju̱u̱n xa̱bu̱ Judá rí mbiʼi sábado náa Jerusalén. 17 Ikha jngóo ni̱ri̱ñún xa̱bu̱ bi̱ kuya̱ edxu̱u̱ náa Judá ga̱jma̱a̱ ni̱thu̱u̱n: “Náa numuu rí ni̱nila dí xkawiʼ kayuʼ rígi̱ dí nini̱ tsagáá mbiʼi sábado rá. 18 Lá raʼkháa rúʼko̱ rí nini̱ wajin xiʼñála ráʼ. Ikha jngóo Dios nikuʼma xúgíʼ enii gamiéjunʼ náa ikháanʼlu ga̱jma̱a̱ náa xuajin. Ga̱jma̱a̱ rí xúgi̱ ikháanʼla nu̱ni̱ tsagáá sábado. Nandala rí Dios makiʼnáa itháán kaʼyoo Israel ráʼ.”

19 Ikha jngóo índo̱ ndájkua nigíʼdu̱u̱ nirugoo xkrugoo Jerusalén, nákha xóó tséʼni mbiʼi sábado, nitañájunʼ rí maguguáa xkrugua ga̱jma̱a̱ rí xámbaʼtoo asndu índo̱ gámbáa mbiʼi sábado. Ma̱ngaa nigruígi̱i̱n tikhuun bi̱ numbayúʼ muñewa̱a̱n xkrugua, mu xúʼko̱ nimbáa xáʼkha̱ kagu̱u̱ rí magu̱jua̱ sábado. 20 Bi̱ naguwáʼ kudúún xúgíʼ enii dí mugu̱jua̱, niguanún rexa̱a̱, tátu̱ʼu̱u̱n náa Jerusalén mbá mbruʼun o a̱jma̱ mbruʼun. 21 Ikhú ni̱thu̱u̱n: “Ndiéjunʼ eni̱la gi̱i̱ rá. Á mu natangáanʼ naguanála mbruʼun náa inuu xtájtsí, maxkawáanʼla”. Asndu nákha ikhú niniña̱a̱nʼ raguwáʼ mbiʼi sábado.

22 Ma̱ngaa ni̱thu̱u̱n levitas rí nángí eʼni mbaʼyóoʼ muni̱ kaʼwumijnáá ma̱ngaa rí muyejngoo náa xkrugua mu xúʼko̱ mbiʼi sábado mani̱ndxu̱u̱ kaʼwu. Dios ndrígóʼ, garmáʼáan a̱jkia̱a̱nʼ ga̱jma̱a̱ numuu rígi̱, xámbumaaʼ xtayoʼ. Ikháán rí xtaʼdáá ngajua rí tsétumuu, agáwíinʼ a̱jkia̱a̱nʼ xtayoʼ.

23 Ma̱ngaa ndi̱yo̱o̱ rí nákha mbiʼi rúʼko̱ tikhuun judíos nidiin* gu̱ʼú asdoditas, ammonitas ga̱jma̱a̱ moabitas. 24 Mbá tapi̱i̱n e̱jñu̱ún nuthi asdodeo ga̱jma̱a̱ i̱mbá tapi̱i̱n nuthi ajngáa rí nuthi náa i̱ʼwáʼ xuajin, nimbáa rí ikhiin tséʼthí ajngáa rí nuthi xa̱bu̱ judíos. 25 Ikha jngóo ni̱ri̱ñún judíos buʼko̱ ga̱jma̱a̱ nitha̱ tsríguíin, tikhuun rí ikhiin ni̱xnu̱u̱ ga̱jma̱a̱ nirubu xtásiúún* niniu̱u̱n rí muxná ajngún náa Dios. Ni̱thu̱u̱n: “Xúniʼñáánʼ rí waʼxiala munuju̱nʼ gajmiún jiámiu̱ún ni má jiámíala munigu̱nʼ gajmiún waʼxiu̱únʼ ni má ikháanʼ xuniʼgúún gajmiála ikhiin. 26 Lá raʼkháa ga̱jma̱a̱ numuu rúʼko̱ dí nikudaminaʼ aʼkhá rey Salomón ndrígóo Israel ráʼ. Ndawa̱a̱ imba̱a̱ rey xóo ikhaa náa i̱ʼwáʼ xuajin. Dios ndrígóo nandoo kaʼyoo, ikha jngóo niʼni rí mani̱ndxu̱u̱ rey náa xúgíʼ Israel. Maski ajndu xúʼko̱, ikhaa nikudaminaʼ aʼkhá ga̱jma̱a̱ numún gu̱ʼwi̱i̱ bi̱ naguwáʼ náa i̱ʼwáʼ xuajin. 27 Na̱nguá eyoo gánimboʼ rí ikháanʼla nixuʼdámíjná mbá aʼkhá xkawiʼ wéñuuʼ xóo rígi̱. Náa numuu rí táguajún jmbu náa Dios, nidiinla gu̱ʼu̱ bi̱ naguwáʼ náa i̱ʼwáʼ xuajin rá.”

28 Mbáa a̱ʼdióo Joiadá, a̱ʼdióo Eliasib bi̱ phú kayá edxu̱u̱ náa ndxajkun nindxu̱u̱ nigiúunʼ Sanbalat bi̱ horonita. Ikha rúʼko̱ numuu jngóo nixkoo.

29 Dios ndrígóʼ, garmáʼáan a̱jkia̱a̱nʼ xtañún numuu rí niriya̱ʼ gamajkhún ndxajkun ga̱jma̱a̱ nini̱ tsagáá rí nimbánúún muni̱ ndxajkun gajmiún levitas.

30 Ikhúún ni̱ni̱ kaʼwi̱i̱n xa̱bu̱ xuajin náa xúgíʼ rí mitsaga dí narígá náa i̱ʼwáʼ xuajin ga̱jma̱a̱ niríya̱ʼ awan rí ndxajkun ga̱jma̱a̱ levitas muni̱ ñajunʼ rí kaʼñúún. 31 Ma̱ngaa niríya̱ʼ awan xóo maguwáʼ kudúún ixi̱ náa mbiʼi rí kaʼñún ma̱ngaa xúgíʼ rí najma̱a̱ ginii.

Dios ndrígóʼ garmáʼáan a̱jkia̱a̱nʼ xtayoʼ ga̱jma̱a̱ atani̱ tsajkurámúúnʼ.