ESTER

1 Rígi̱ nirígá nákha mbiʼi rí nixtáa rey Asuero,* Asuero bi̱ niʼtáñajuunʼ 127 xuajin, dí rígá náa India asndu náa Etiopía.* 2 Nákha mbiʼi rúʼko̱, rey Asuero gíʼdoo xíliu̱u̱* rí naʼtáñajunʼ náa guʼwá ñajunʼ* dí rígá náa Susa. 3 Índo̱ niʼni ajtsú tsiguʼ dí xtáa má raʼtáñajunʼ niʼni mbá ndxa̱a̱ náa makuwá xúgíinʼ príncipes ga̱jma̱a̱ xa̱bi̱i̱. Náa inuu ikhaa kúwá bi̱ nutañajúúnʼ soldado bi̱ kúwá náa Persia ga̱jma̱a̱ náa Media, xúʼko̱ má xa̱bu̱ ñajunʼ mbaʼwi̱i̱n ma̱ngaa príncipes bi̱ kúwá náa xuajin majkhaʼ. 4 Nda̱wa̱á rí nijngoo mba̱yu̱u̱ʼ mbiʼi, 180 mbiʼi rí mbá xúgíʼ, nisngájmúún xúgíʼ rí gíʼdoo ma̱ngaa xú káʼnii mitsaanʼ* náa ikhaa xtáa raʼtáñajunʼ, tsiaki̱i̱ rí gíʼdoo ma̱ngaa gamajkhu rí nakánáá. 5 Nda̱wa̱á rí nijngoo mbiʼi rígi̱, rey niʼniriya̱a̱ʼ i̱mba̱ ndxa̱a̱ náa rexo̱o̱ jardín dí rígá náa guʼwá ñajunʼ, mbá ndxa̱a̱ rí ndijyúuʼ mbá juwan mbiʼi náa makuwá xúgíinʼ bi̱ kúwá náa guʼwá ñajunʼ dí rígá náa Susa, xó má xa̱bu̱ bi̱ guáʼdáá numún, xúʼko̱ má bi̱ na̱nguá. 6 Náa jardín niguma ratháá ga̱jma̱a̱ cortina rí miʼxá ga̱jma̱a̱ dí azul, kaxtoʼóo ga̱jma̱a̱ ñuñuu rí niguma ga̱jma̱a̱ xtíin miʼxá ma̱ngaa mugu̱ rí miʼñuu, kaxtoʼóo náa anillo dí plata dí kaxtuʼwájma náa columna dí mármol.* Mbayííʼ niguma ga̱jma̱a̱ itsí dí maña̱ʼ skuniʼ, mármol miʼxá, perla ga̱jma̱a̱ mármol skuniʼ ma̱ngaa ikhí kuíji̱ xiyoo dí oro ga̱jma̱a̱ dí plata.

7 Nixnaraʼa vino ga̱jma̱a̱ copa dí oro mámbá copa nindxu̱u̱ mixtiʼkhu. Ra̱ʼkhá tháán mbaji̱ʼ vino rígá náa goʼwóo rey, mbaji̱ʼ wéñuuʼ dí i̱ndó rey ma̱ndoo maxná xúʼko̱ kaʼnii. 8 Náa mbiʼi rúʼko̱ nda̱a̱ mbá awan nguáthá mbaji̱ʼ gáʼyóoʼ muwa̱a̱n, ikhaa rúʼko̱ ikha rí ninimbáníí numuu dí rey gajmíi̱n xa̱bu̱ ñajunʼ bi̱ kúwá náa guʼwá ñajunʼ nimbánúún rí xa̱bu̱ ma̱ndoo muwa̱a̱n asndu nguáthá má eñún ikhiin.

9 Vasti, bi̱ nindxu̱u̱ reina, ma̱ngaa niʼni mbá ndxa̱a̱ náa makuwá gu̱ʼu̱ náa guʼwá ñajunʼ ndrígóo rey Asuero.

10 Índo̱ niʼni juwan mbiʼi, índo̱ a̱jkiu̱u̱n rey nadxuu má eʼni vino, ikhaa niʼtáminaʼ gajmíi̱n xa̱bi̱i̱, mbá juwiin xa̱bu̱ ñajunʼ bi̱ kúwá náa guʼwá ñajunʼ, bi̱ mbiʼñún Mehumán, Biztá, Harboná, Bigtá, Abagtá, Zetar ga̱jma̱a̱ Carcás, 11 niʼtáñajúúnʼ rí maguwáʼ kuya̱a̱ náa inuu ikhaa reina Vasti ga̱jma̱a̱ xtíin mitsaanʼ dí magri̱gu edxu̱u̱, mu xúʼko̱ masngájmúún xa̱bu̱ xuajin ga̱jma̱a̱ príncipes nguáthá mitsiʼyáa, numuu rí ikhaa nindxu̱u̱ mitsiʼyáa wéñuuʼ. 12 Mbaʼa nuthu reina Vasti táʼnimbo̱o̱ kaʼyoo kiʼtáñajunʼ rí nixná rey dí nitháán xa̱bu̱ ñajunʼ bi̱ kúwá náa guʼwá ñajunʼ. Ikha jngóo rey nikásngañu̱u̱ʼ kaʼyoo.

13 Ikhú rey nirajxu̱u̱n xa̱bu̱ bi̱ najmañún bi̱ nakru̱ʼu̱u̱n májánʼ xóo munimbáníí xkujndu.* (Xkujndu ndrígóo rey nunimbáníí xúgíinʼ xa̱bu̱ bi̱ najmañún xtángoo ga̱jma̱a̱ bi̱ nakru̱ʼu̱u̱n munimbáníí xkujndu. 14 Bi̱ nambájxu̱u̱n májánʼ gajmiún ikhaa nindxu̱u̱ Carsená, Setar, Admatá, Tarsis, Meres, Marsená ga̱jma̱a̱ Memucán, mbá juwiin príncipes bi̱ kúwá náa Persia ga̱jma̱a̱ náa Media bi̱ nagún gúyáá nángi eʼni rey, ikhiin guáʼdáá ñajunʼ rí itháán mba̱ʼu̱ náa naʼtáñajunʼ rey). 15 Rey nirajxu̱u̱n: “Xó má naʼthí náa xtángoo, ndiéjunʼ gíʼmaa magumaa reina Vasti numuu rí táʼnimbo̱o̱ dí xa̱bu̱ ñajunʼ nitháán bi̱ nikuʼmiin rey Asuero rá.”

16 Memucán niʼthí náa inuu rey ga̱jma̱a̱ náa inún príncipes: “Rí niʼni reina Vasti raʼkháa i̱ndó niʼni dí raʼkhí náa inuu rey, ma̱ngaa náa xúgíinʼ príncipes ga̱jma̱a̱ náa xa̱bu̱ xuajin bi̱ kúwá náa xuajin rí naʼtáñajunʼ rey Asuero. 17 Numuu rí índo̱ xúgíinʼ gu̱ʼu̱ bi̱ kuáʼdíin ajmbiu̱ún gudxawíín rí niʼni reina, ni xámajkhún kuñún ajmbiu̱ún ga̱jma̱a̱ muthi: ‹Rey Asuero nikuʼma ajngáa rí maguwáʼ kuya̱a̱ reina Vasti, mú ikhaa táʼnimbo̱o̱ kaʼyoo›. 18 Mbiʼi má xúgi̱, guʼñún xa̱bu̱ ñajunʼ bi̱ kúwá náa Persia ga̱jma̱a̱ náa Media mutamijná gajmiún ajmbiu̱ún bi̱ nindxu̱ún príncipes ndrígóo rey ga̱jma̱a̱ rúʼko̱ gáʼni rí gu̱ʼu̱ ni xámajkhún kuñún ajmbiu̱ún ga̱jma̱a̱ ikhiin makiʼníin kuñún. 19 Á mu rey ndaʼyoo rí májánʼ, garíyaʼ mbá xtángoo dí Vasti xátanga̱a̱ ma̱ʼkha̱ náa inuu rey Asuero ga̱jma̱a̱ xtángoo rígi̱, gágumaraʼmáʼ náa xtángoo dí rígá náa Persia ga̱jma̱a̱ náa Media rí xándoo majngudi̱i̱. Rey gayáaʼ i̱mba̱a̱ reina, mbáa a̱ʼgu̱ bi̱ itháán májáanʼ ki xóo ikhaa. 20 Mu xúʼko̱ índo̱ xtángoo ndrígóo rey gúdxawíín xúgíinʼ xa̱bu̱ bi̱ kúwá náa xuajin rí naʼtáñajunʼ, xúgíinʼ gu̱ʼu̱ mbuyamajkún ajmbiu̱ún, xó má xa̱bu̱ bi̱ guáʼdáá numún, xúʼko̱ má bi̱ na̱nguá”.

21 Numuu dí rígi̱, ninigu̱u̱ʼ rey ga̱jma̱a̱ príncipes, ikhú rey niʼni xó má niʼthí Memucán. 22 Ikha jngóo nikuʼma i̱yi̱i̱ʼ náa xúgíʼ xuajin rí naʼtáñajunʼ náa mámbá xuajin ga̱jma̱a̱ ajngáa xó má nagumaraʼmáʼ ikhí ga̱jma̱a̱ náa mámbá xuajin náa ajngáa rí ikhiin nuthi, ikhí naʼtáñajúúnʼ xa̱bekha rí ikhiin mutañajunʼ náa guʼwún ga̱jma̱a̱ rí muthi ajngáa rí nuthi náa xuajñún ikhiin.

2 Nda̱wa̱á dí rúʼko̱, índo̱ niwi̱ji̱i̱ rakásnga̱ñu̱u̱ʼ rey Asuero, ikhaa nitanga̱a̱ nindxa̱ʼwáminaʼ rí niʼni Vasti ga̱jma̱a̱ dí niraʼwíí maʼni mu maʼni ngínáa. 2 Ikhú bi̱ numbayíí rey nitháán: “Guʼñíinʼ wa̱ʼxa̱ʼ* bi̱ xóó tsébúúnʼ gajmiún xa̱bekha ga̱jma̱a̱ mitsiʼñíin maʼni ndrígióo rey. 3 Rey gáraʼwíin xa̱bu̱ bi̱ kúwá náa xuajin rí naʼtáñajunʼ mu maguwáʼ kudiin xúgíinʼ wa̱ʼxa̱ʼ bi̱ xóó tsébúúnʼ gajmiún xa̱bekha ga̱jma̱a̱ mitsiʼñíin náa guʼwún gu̱ʼu̱ dí rígá náa guʼwá ñajunʼ* dí rígá náa Susa. Ga̱jma̱a̱ Hegái kajkuáa ñawúunʼ dí mañewu̱u̱n gu̱ʼu̱ buʼko̱, bi̱ nindxu̱u̱ eunuco* ndrígóo rey bi̱ nañewu̱u̱n gu̱ʼu̱ ga̱jma̱a̱ naʼni dí maʼni mitsiʼñíin itháán.* 4 Dxáʼgú bi̱ itháán gánigiu̱u̱ʼ rey mani̱ndxu̱u̱ reina, bi̱ mariʼkuriya̱a̱ʼ Vasti”. Rey ninigu̱u̱ʼ rí nitháán ga̱jma̱a̱ niʼthí dí xúʼko̱ má gáʼni.

5 Náa guʼwá ñajunʼ ndrígóo Susa xtáa mbáa judío bi̱ mbiʼyuu Mardoqueo, a̱ʼdióo Jaír, a̱ʼdióo Simeí, a̱ʼdióo Quis, bi̱ nindxu̱u̱ benjaminita, 6 ma̱ngaa ikhaa xtáa náa majñu̱únʼ xa̱bu̱ bi̱ nigájnún náa Jerusalén gajmiún rey Jeconías* bi̱ naʼtáñajunʼ náa Judá, bi̱ rey Nabucodonosor ndrígóo Babilonia ni̱jkha̱ kagui̱i̱n. 7 Mardoqueo nindxu̱u̱ prímiu̱u̱ Hadassá,* xóo muʼthá, Ester, numuu dí ikhaa nindxu̱u̱ a̱ʼdá wáʼa. Nindxu̱u̱ mbáa dxáʼgú bi̱ ra̱ʼkhá tháán mitsiʼyáa. Índo̱ nikháñuu anu̱u̱ ga̱jma̱a̱ ru̱dúu̱,* Mardoqueo niñewu̱u̱n xóo wáxióo. 8 Índo̱ nijuiʼyáá rí niʼtáñajunʼ rey ga̱jma̱a̱ xtángoo ndrígóo, ni̱jkha̱ kiʼdiin mbaʼin wa̱ʼxa̱ʼ náa guʼwá ñajunʼ dí rígá náa Susa ga̱jma̱a̱ nijuixniáá Hegái mu mañewu̱u̱n, numuu dí ikhaa nindxu̱u̱ bi̱ nañewu̱u̱n gu̱ʼu̱. Ma̱ngaa Ester nigún kuya̱a̱ náa goʼwóo rey ga̱jma̱a̱ nixniáá Hegái mu mañewu̱u̱n.

9 Hegái niʼni a̱jkiu̱u̱n kaʼyoo Ester ga̱jma̱a̱ nimbájxu̱u̱ ga̱jma̱a̱.* Ikhaa mínaaʼ niʼni dí maʼni itháán mitsiʼyáa ga̱jma̱a̱ xóo makuiʼtsu. Ma̱ngaa nixniúu mbá juwiin gu̱ʼu̱ bi̱ mumbayíí bi̱ kúwá náa goʼwóo rey. Nda̱wa̱á ni̱jkha̱ kayáa ikhaa gajmíi̱n gu̱ʼu̱ bi̱ numbayíí náa guʼwá rí itháán májánʼ náa guʼwún gu̱ʼu̱. 10 Ester na̱nguá niʼthí nimbá ga̱jma̱a̱ numuu xuajñuu ni má ga̱jma̱a̱ numún bi̱ kaʼñún, numuu rí Mardoqueo niʼthúu̱n rí xáʼthúu̱n nimbáa ga̱jma̱a̱ numuu rúʼko̱. 11 Xúgíʼ mbiʼi, Mardoqueo nanújngoo náa rexo̱o̱ guʼwún gu̱ʼu̱ mu mbaʼyoo xóo xtáa Ester ga̱jma̱a̱ rí xtáa ragíʼnuu.

12 Wa̱ʼxa̱ʼ nagún náa inuu rey Asuero xó má kaʼñún manújngún. Nákha xóó tségún mámbáa dí ikhiin mbaʼyóoʼ maʼni tsiʼyáminaʼ mbá 12 igu̱nʼ. Mbá majun igu̱nʼ nuxtajmamijná aceite ndrígóo mirra ga̱jma̱a̱ i̱mbá majun igu̱nʼ nuxtajmamijná aceite rí ndataun ga̱jma̱a̱ mbaʼa enii crema. 13 Nda̱wa̱á dí rúʼko̱, dxáʼgú xtáa xawii mu maʼga náa inuu rey. Índo̱ gágajnúu náa guʼwún gu̱ʼu̱ ga̱jma̱a̱ maʼga náa goʼwóo rey, ikhí ma̱ndoo manda̱ʼa̱ asndu ndiéjunʼ má dí eyoo ga̱jma̱a̱ makhánáá. 14 Índo̱ naʼkhíʼ ikhaa nato̱ʼo̱o̱ ga̱jma̱a̱ miʼcha̱ nagájnáa, nanújnga̱a̱ náa maʼni raga̱jma̱ guʼwún gu̱ʼu̱, bi̱ xtáa rañewu̱u̱n ikhí nindxu̱u̱ Saasgaz, bi̱ nindxu̱u̱ eunuco ndrígóo rey bi̱ nañewu̱u̱n gu̱ʼú ñawiin.* Ikhaa xátanga̱a̱ mato̱ʼo̱o̱ náa xtáa rey, i̱ndó á mu rey ninigiu̱u̱ʼ wéñuuʼ ga̱jma̱a̱ nandxa̱ʼóo ga̱jma̱a̱ mbiʼyuu dí maʼga.

15 Índo̱ Ester dxáʼgú bi̱ niñewu̱u̱n Mardoqueo, bi̱ nindxu̱u̱ a̱ʼdá giʼtio̱o̱ Abihail, anu̱u̱ dxáʼgú, ni̱jkha̱nú mbiʼi dí manújngoo náa inuu rey, ikhaa i̱ndó ninda̱ʼa̱ rí niʼthúu̱n manda̱ʼa̱ Hegái, bi̱ nindxu̱u̱ eunuco ndrígóo rey ga̱jma̱a̱ bi̱ nañewu̱u̱n gu̱ʼu̱. (Náa xúgíʼ mbiʼi rúʼko̱, Ester nimbájxu̱u̱ gajmíi̱n xúgíinʼ bi̱ ndaʼñún). 16 Nigún kuya̱a̱ Ester náa inuu rey Asuero náa guʼwá ñajunʼ índo̱ niʼni gu̱wa̱ʼ igu̱nʼ, xóo muʼthá, gu̱nʼ tebet,* dí maʼni juwan tsiguʼ dí xtáa raʼtáñajunʼ. 17 Rey nindoo kaʼyoo itháan Ester ki xóo xúgíinʼ eʼwíinʼ gu̱ʼu̱. Ikhaa ninigiu̱u̱ʼ kaʼyoo itháan ki xóo eʼwíinʼ wa̱ʼxa̱ʼ. Ikha jngóo, ikhaa nigrígu xtíin dí mitsaanʼ* náa edxu̱u̱ ga̱jma̱a̱ ni̱jkha̱nú ninindxu̱u̱ reina bi̱ niriʼkuriya̱a̱ʼ Vasti. 18 Rey niʼni mbá ndxa̱a̱, ndxo̱o̱ Ester náa nikúwá xúgíinʼ príncipes ga̱jma̱a̱ xa̱bi̱i̱. Ikhú ma̱ngaa niguwíin bi̱ kajchún náa guʼwá e̱jua̱nʼ ga̱jma̱a̱ ra̱ʼkhá tháán mbaʼa regalo nixná, dí i̱ndó rey ma̱ndoo maxná.

19 Índo̱ wa̱ʼxa̱ʼ nigimbíi̱n dí maʼni a̱jma̱ nuthu, Mardoqueo gíʼ náa riejuun guʼwá ñajunʼ ndrígóo rey. 20 Ester na̱nguá niʼthí nimbá ga̱jma̱a̱ numún bi̱ kaʼñún ni má ga̱jma̱a̱ numuu xuajñuu, xó má Mardoqueo niʼtáñajunʼ maʼni. Ikhaa naʼnimbo̱o̱ má xúʼko̱ xó má índo̱ nixtáa rañewu̱u̱n.

21 Nákha mbiʼi rúʼko̱, índo̱ Mardoqueo gíʼ náa riejuun guʼwá ñajunʼ ndrígóo rey, Bigtán ga̱jma̱a̱ Teres a̱jmi̱i̱n xa̱bu̱ ñajunʼ bi̱ kúwá náa guʼwá ñajunʼ, bi̱ nuñajunʼ xóo bi̱ nuñewa̱a̱n xkrugua, nikiʼníin wéñuuʼ ga̱jma̱a̱ niriyaʼ awan dí muxíyáa rey Asuero. 22 Índo̱ Mardoqueo niʼdxawuun ga̱jma̱a̱ mbá nacha̱ niʼthúu̱n reina Ester, ga̱jma̱a̱ ikhaa niʼthúu̱n rey dí niʼthúu̱n Mardoqueo. 23 Ikhú ndiya̱ʼ mbuyáá á mu gajkhun nindxu̱u̱ ga̱jma̱a̱ niguánú ndiyáá dí xúʼko̱ kaʼnii nindxu̱u̱, ikha jngóo nájmi̱i̱n xa̱bu̱ nijngriguíin náa ixi̱. Rígi̱ nigumaraʼmáʼ náa inuu rey náa libro rí naxtagijxi̱i̱ rí narígá.

3 Nda̱wa̱á dí nirígá rígi̱, rey Asuero nixnúu mbá ñajunʼ Hamán a̱ʼdióo Hamedata bi̱ nindxu̱u̱ agaguita niʼni rí magiʼdoo numuu, nixnúu mbá ñajunʼ rí itháán mba̱a̱ ki xóo xúgíinʼ príncipes. 2 Xúgíinʼ xa̱bu̱ bi̱ kúwá náa guʼwá ñajunʼ bi̱ kúwá náa riejuun rí naʼtáñajunʼ rey nismbati̱gu̱u̱n asndu mbayííʼ náa inuu Hamán, numuu rí xúʼko̱ ma niʼtáñajunʼ rey. Mú Mardoqueo táʼndoo gásmbáti̱go̱o̱ náa inuu. 3 Ikha jngóo xa̱bu̱ bi̱ kúwá náa guʼwá ñajunʼ, náa riejuun rí naʼtáñajunʼ rey nitháán Mardoqueo: “Náá numuu rí tsíyááʼ gátanimbaaʼ dí niʼtáñajunʼ rey rá.” 4 Xúgíʼ mbiʼi ikháá má ethán, mú ikhaa na̱nguá eʼnimbo̱o̱ kaʼñún. Ikhú nitháán Hamán á mu xóó naʼngo̱o̱ a̱jkiu̱u̱n kaʼyoo Mardoqueo rí naʼni xúʼko̱. Numuu rí Mardoqueo má niʼthún rí ikhaa nindxu̱u̱ judío.

5 Ikha jngóo índo̱ Hamán ndiʼyoo rí Mardoqueo naʼni gaʼduunʼ rí masmbáti̱go̱o̱ náa inuu ikhaa, ra̱ʼkhá tháán nikásngañu̱u̱ʼ. 6 Numuu rí nitháán náá nindxu̱u̱ xuajñuu Mardoqueo, ikha jngóo ndiʼyoo rí ndaa numuu maxíyáa i̱ndó ikhaa. Hamán ndiyáʼ xú káʼnii maʼni gámbíin xúgíinʼ judíos bi̱ kúwá náa naʼtáñajunʼ rey Asuero, bi̱ ni̱ndxu̱ún xa̱bu̱ xuajñuu Mardoqueo.

7 Mu mbuyáá náá mbiʼi ga̱jma̱a̱ náá igu̱nʼ gáʼni, niriyaʼ suerte* náa inuu Hamán náa timbá igu̱nʼ, gu̱nʼ nisán,* rí naʼni ma 12 tsiguʼ rí naʼtáñajunʼ rey Asuero. Ga̱jma̱a̱ suerte nigájnuu náa 12 igu̱nʼ, xóo muʼthá, gu̱nʼ adar.* 8 Ikhú Hamán niʼthúu̱n rey Asuero: “Kúwíin xa̱bu̱ bi̱ naguwáʼ náa mbá xuajin bi̱ kúwá náa xúgíʼ xuajin rí naʼtáñajunʼ rey ga̱jma̱a̱ xtángoo ndrígu̱ún nindxu̱u̱ mixtiʼkhu ki xóo i̱ʼwáʼ xuajin. Ikhiin tsénimbu̱u̱n xtángoo ndrígóo rey, ikha jngóo rey xándoo maniñúúnʼ makuwá tsímáá. 9 Á mu rí májánʼ eʼyoo rey dí magumaraʼmáʼ mbá xtángoo rí maguma gámbíin xa̱bu̱ bugi̱. Ikhúún maxnu̱u̱n xa̱bu̱ ñajunʼ mbá 10,000 talento ndrígóo plata* mu majti̱i̱ náa kajti rí gíʼdoo numuu ndrígóo rey”.*

10 Ikhú rey niriyaʼ anillo rí gídáʼ náa ñawúunʼ rí naxnúu ga̱jma̱a̱ sello ga̱jma̱a̱ nixnúu Hamán, bi̱ nindxu̱u̱ xa̱bu̱ sia̱nʼ ndrígu̱ún judíos, a̱ʼdióo Hamedata bi̱ nindxu̱u̱ agaguita. 11 Ikhú rey niʼthúu̱n Hamán: “Plata nindxu̱u̱ ndrígáaʼ ga̱jma̱a̱ xa̱bu̱ xuajin kúwá náa ñawáanʼ. Atani̱ asndu ndiéjunʼ má gaʼndaaʼ”. 12 Ikha jngóo mbiʼi 13 rí timbá igu̱nʼ nijuatsaʼwúún secretarios ndrígóo rey. Mu muniraʼmáʼ xúgíʼ rí niʼtáñajunʼ Hamán mu maʼga inún sátrapas ndrígóo rey, xa̱bu̱ ñajunʼ bi̱ nutañajunʼ náa xuajin majkhaʼ ga̱jma̱a̱ príncipes bi̱ kúwá náa mámbá xuajin. Ga̱jma̱a̱ ajngáa xó má nagumaraʼmáʼ ikhí ga̱jma̱a̱ náa mámbá xuajin náa ajngáa rí ikhiin nuthi. Xúgíʼ nigumaraʼmáʼ náa mbiʼyuu rey Asuero nixnáá sello ga̱jma̱a̱ anillo ndrígóo rey.

13 Nda̱wa̱á nixuʼmiin xa̱bu̱ mu magún kudúún i̱yi̱i̱ʼ náa xúgíʼ xuajin rí naʼtáñajunʼ rey. Náa i̱yi̱i̱ʼ rúʼko̱ naʼthí rí muradíin ga̱jma̱a̱ muni̱ gámbíin xúgíinʼ judíos, jiámá, wa̱ʼxa̱ʼ,* xabuanii, gu̱ʼu̱ gajmiún e̱ji̱n náa mbóó mbiʼi, mbiʼi 13 índo̱ gaʼni 12 igu̱nʼ, xóo muʼthá, gu̱nʼ adar ga̱jma̱a̱ maguanún ga̱jma̱a̱ xúgíʼ rí guáʼdáá. 14 Náa mámbá xuajin mbaʼyóoʼ magajnúu mbá copia ndrígóo i̱yi̱i̱ʼ rígi̱ mu mani̱ndxu̱u̱ xóo mbá xtángoo ma̱ngaa majuiʼthúún xúgíinʼ xa̱bu̱ xuajin mu makuwá xawii mbiʼi rúʼko̱. 15 Mbá nacha̱ nigájnún bi̱ nigún ku̱ñu̱u̱n i̱yi̱i̱ʼ rígi̱ xó má niʼtáñajunʼ rey, xtángoo rígi̱ nijuiʼtáriyaʼ náa guʼwá ñajunʼ* dí rígá náa Susa. Nda̱wa̱á rey ga̱jma̱a̱ Hamán nitri̱gi̱i̱n niʼwa̱a̱n mú xa̱bu̱ bi̱ kúwá náa xuajin Susa na̱nguá eyáá ndiéjunʼ erígá.

4 Índo̱ Mardoqueo niʼdxawun xúgíʼ dí nirígá, nixkuʼtu xtíñuu ga̱jma̱a̱ nigíʼ xtíin mi̱du̱* ma̱ngaa nixtrámáʼ idiʼ edxu̱u̱. Ikhú nigájnuu náa xuajin randxaʼwá ngínúu. 2 I̱ndó ni̱jkha̱nú náa riejuun guʼwá ñajunʼ ndrígóo rey, numuu dí ikhí nimbáa xándoo manújngoo kagíʼ xtíin mi̱du̱. 3 Xó má rí na̱jkha̱nú xtángoo ndrígóo rey ga̱jma̱a̱ rí ikhaa niʼtáñajunʼ náa xúgíʼ xuajin majkhaʼ dí ikhaa naʼtáñajunʼ, bi̱ judíos nakúwá ngíná ga̱jma̱a̱ nurkueyimijná,* numbi̱ya̱ʼ ga̱jma̱a̱ nundxa̱ʼwa̱ numuu rí nagawúunʼ a̱jkiu̱ún. Mbaʼin nubúúnʼ náa xtíin mi̱du̱ ga̱jma̱a̱ náa idiʼ. 4 Índo̱ gu̱ʼú ñumbáá ga̱jma̱a̱ eunuco* bi̱ kúwá gajmiún reina Ester nitu̱ʼu̱u̱n ga̱jma̱a̱ nitháán xúgíʼ dí xtáa rarígá, ikhaa ra̱ʼkhá tháán nixmiéjuunʼ ga̱jma̱a̱ nikuʼma xtíin mu magúwúunʼ Mardoqueo mu xúʼko̱ maríya̱a̱ʼ xtíin mi̱du̱ dí kagíʼ. Mú ikhaa na̱nguá nigruigú. 5 Ikhú Ester nindxaʼóo Hatac, mbáa eunuco bi̱ rey nigíiʼ mu mambáyúu, niʼthúu̱n dí maʼga gárajxu̱u̱ Mardoqueo náá numuu rí xúʼko̱ eʼni ga̱jma̱a̱ ndiéjunʼ dí xtáa rarígá.

6 Ikha jngóo Hatac ni̱jkha̱ gáyáaʼ Mardoqueo náa xuáá dí rígá náa inuu xkrugoo guʼwá ñajunʼ ndrígóo rey. 7 Mardoqueo niʼthúu̱n xúgíʼ dí nirígá. Ma̱ngaa niʼthúu̱n nguáthá mba̱a̱ mbújkha̱a̱ rí Hamán niʼthí dí maxná mu majti náa najti dí gíʼdoo numuu ndrígóo rey mu xúʼko̱ maguma gámbíin judíos. 8 Ma̱ngaa nixnúu mbá copia ndrígóo xtángoo dí nigájnuu náa Susa, náa naʼtáñajunʼ dí maguma gámbíin judíos. Hatac ndayóoʼ masngájmuu ga̱jma̱a̱ maʼthúu̱n Ester rígi̱. Ma̱ngaa dí makuʼmaa maʼga náa inuu rey, mu xúʼko̱ ikhaa mina̱a̱ʼ maʼga gámbáñún xa̱bu̱ xuajñuu ga̱jma̱a̱ dí ma̱ndo̱ʼo̱o̱ rey dí magáwíinʼ a̱jkiu̱u̱n.

9 Hatac ni̱jkha̱a̱ náa xtáa Ester ga̱jma̱a̱ niʼthúu̱n xúgíʼ dí niʼthí Mardoqueo. 10 Ikhú Ester niʼtáñajuunʼ Hatac dí maʼthúu̱n rígi̱ Mardoqueo: 11 “Xúgíinʼ xa̱bi̱i̱ rey ga̱jma̱a̱ xa̱bu̱ bi̱ kúwá náa xuajin majkhaʼ dí ikhaa naʼtáñajunʼ, nduyáá dí rígá mbá xtángoo náa naʼthí dí magumaa xa̱biya̱ o a̱ʼgu̱ bi̱ gáʼga náa rexo̱o̱ goʼwóo rey dí rígá awúún á mu ikhaa na̱nguá nindxaʼóo: Mbaʼyóoʼ makhañúu. I̱ndó maguma mba̱a̱ a̱jkiu̱ún kuyáá á mu rey gákruiya̱ʼ ixi̱ ñajunʼ ndrígóo dí niguma ga̱jma̱a̱ oro. Xúgi̱ naʼni má 30 mbiʼi dí rey na̱nguá endxa̱ʼóʼ maʼgá”.

12 Índo̱ Mardoqueo niʼdxawun dí niʼthí Ester, 13 ikhú niriʼñuu: “Xáku̱ma̱a̱ʼ dí ga̱jma̱a̱ numuu dí xtaa náa guʼwá ñajunʼ ma̱ndoo makríñáaʼ ki xóo eʼwíinʼ judíos. 14 Á mu nda̱a̱ dí ratá xúgi̱, maxtáa má mbáa tsáa mambáñún ga̱jma̱a̱ maʼni káwíin judíos, mú ikháán ga̱jma̱a̱ bi̱ kúwá náa goʼwóo ana̱a̱ʼ* makhañún. Tséʼyáá, á mu nidxua̱ʼnú mani̱ndxa̱a̱ʼ reina mu matiambáá náa mbiʼi xóo rígi̱”.

15 Ikhú Ester niriʼñuu Mardoqueo: 16 “Ayuʼ ga̱jma̱a̱ atagímbíin xúgíinʼ judíos bi̱ kúwá náa Susa ga̱jma̱a̱ gurkuéyimijnála ga̱jma̱a̱ numuʼ. Xuphiʼtsu ni má xúwáan iyaʼ mbá ajtsú mbiʼi ga̱jma̱a̱ mbá ajtsú mbruʼun. Xúʼko̱ má gáni̱ ikhúún gajmíʼ gu̱ʼu̱ bi̱ numbayúʼ murkuéyimijnáxu. Maski má náa xtángoo naʼthí dí xándoo maʼgá náa inuu rey, mú maʼgá. Á mu mbaʼyóoʼ makhañúʼ, makhañúʼ má”. 17 Ikhú Mardoqueo ni̱jkha̱ ga̱jma̱a̱ niʼni xúgíʼ dí niʼtáñajuunʼ Ester.

5 Índo̱ niʼni ajtsú mbiʼi, Ester nigíʼ xtíin dí nagíʼ mbáa reina, ni̱jkha̱ náa rexo̱o̱ goʼwóo rey dí rígá awúu̱n, ikhí má niwi̱ji̱. Rey gíʼ náa xíliúu* náa guʼwá rí naʼtáñajunʼ rí naʼni jmbuu náa riejun. 2 Índo̱ rey ndiʼyoo reina Ester náa rexo̱o̱ goʼwóo, nidxuu ga̱jma̱a̱ nikrui̱ya̱ʼ náa ikhaa ixi̱ ñajunʼ dí niguma ga̱jma̱a̱ oro dí kayá. Ester ni̱ʼkha̱ kanuu ga̱jma̱a̱ nixkajma inuu ixi̱ ñajunʼ.

3 Ikhú rey niʼthúu̱n: “Ndiéjunʼ rígá reina Ester. Ndiéjunʼ rí nandaaʼ matando̱ʼo̱ʼ rá. Arathúnʼ ga̱jma̱a̱ ikhúún maxna̱a̱ʼ. ¡Tséʼniuu á mu natando̱ʼo̱ʼ mbá ta̱pha̱ mbaaʼ náa rí natañájunʼ!”. 4 Ester niriʼñuu: “Á mu májánʼ eʼyoo rey, manigu̱ʼ dí ma̱ʼkha̱ xúgi̱ náa ganitsu rí ni̱ni̱ mújúunʼ mi̱khu̱, ma̱ʼkha̱ ga̱jma̱a̱ Hamán”. 5 Ikhú rey niʼthún xa̱bi̱i̱: “Guta̱a̱nla Hamán rí ma̱ʼkha̱ má nacha̱, xó má ninda̱ʼa̱ Ester”. Ikha jngóo rey ga̱jma̱a̱ Hamán nigún guphiʼtsu náa ganitsu rí niʼni mújúunʼ Ester.

6 Índo̱ kúwá raʼwa̱a̱n vino,* rey niʼthúu̱n Ester: “Ndiéjunʼ eyaaʼ rá. Arathúnʼ ga̱jma̱a̱ ikhúún maxna̱a̱ʼ. Ndiéjunʼ dí nandaaʼ matando̱ʼo̱ʼ. ¡Tséʼniuu á mu natando̱ʼo̱ʼ mbá ta̱pha̱ mbaaʼ náa rí natañájunʼ, ikhúún maxna̱a̱ʼ!”. 7 Ester niriʼñuu: “Rígi̱ dí nandoʼ: 8 Á mu rey naʼni a̱jkiu̱u̱n kaʼyoʼ ga̱jma̱a̱ á mu ndaʼyoo rí májánʼ maxnúʼ rí gándo̱ʼo̱o̱, nandoʼ dí rey ma̱ʼkha̱ gájtsíí náa i̱mba̱ ganitsu dí ma̱ni̱ mújúunʼ, ma̱ʼkha̱ ga̱jma̱a̱ Hamán. Gájtsíí gáthúu̱n rey dí nandoʼ ma̱ndo̱ʼo̱o̱”.

9 Mbiʼi rúʼko̱, Hamán ra̱ʼkhá tháán nadxuu a̱jkiu̱u̱n nigájnáa. Mú índo̱ ndiʼyoo Mardoqueo náa xkrugua ndrígóo guʼwá ñajunʼ náa naʼtáñajunʼ rey ga̱jma̱a̱ ndiʼyoo rí na̱nguá etujxu̱u̱ ni má na̱nguá eguáʼaan náa inuu, Hamán ra̱ʼkhá tháán nikásngañu̱u̱ʼ kaʼyoo. 10 Mú nda̱a̱ dí niʼthúu̱n ga̱jma̱a̱ ni̱jkha̱a̱ goʼwóo. Nda̱wa̱á nikuʼma ajngáa dí maguwáʼ bi̱ nambájxu̱u̱ gajmíi̱n, ma̱ngaa a̱ʼgiu̱u̱ bi̱ mbiʼyuu Zeres. 11 Hamán nigíʼdúu niʼnimbamínáʼ ga̱jma̱a̱ numuu xúgíʼ rí gíʼdoo, ga̱jma̱a̱ numún xúgíinʼ e̱ji̱i̱n bi̱ gíʼdiin, ma̱ngaa xú kaʼnii rey nixnúu mbá ñajunʼ dí itháan mba̱a̱ ki xóo xúgíinʼ príncipes ga̱jma̱a̱ xa̱bi̱i̱ rey.

12 Hamán ma̱ngaa niʼthí: “Reina Ester i̱ndó ikhúún niʼthúnʼ dí maʼgá gákuiʼtsu gajmuʼ rey náa ganitsu dí ikhaa niʼni mújúunʼ. Ma̱ngaa niʼthúnʼ rí maʼgá gájtsíí mbu̱júu̱ náa i̱mba̱ ganitsu dí maʼni mújúunʼ, mu maxtáá mangúún náa maxtáa ga̱jma̱a̱ rey. 13 Mú nimbá dí rígi̱ tséʼni maʼdxuʼ, índo̱ nda̱yo̱o̱ Mardoqueo xa̱bu̱ judío bi̱ gíʼ náa xkrugua ndrígóo guʼwá ñajunʼ náa naʼtáñajunʼ rey”. 14 Ikhú a̱ʼgiu̱u̱ bi̱ mbiʼyuu Zeres ga̱jma̱a̱ xúgíinʼ bi̱ nambájxu̱u̱ gajmíi̱n nitháán: “Aratáñajunʼ dí mutsiji mbá ixi̱ rí 22 metro* rí mbaʼ. Ga̱jma̱a̱ gájtsíí gátanda̱ʼa̱a̱ rey dí marájkhaa Mardoqueo ikhí. Nda̱wa̱á ayuʼ gátatsiʼtsu ga̱jma̱a̱ʼ rey”. Hamán ninigu̱u̱ʼ rí nitháán ga̱jma̱a̱ niʼtáñajunʼ rí mutsiji ixi̱.

6 Mbruʼun rúʼko̱, rey tándoo gígu.* Ikha jngóo niʼtáñajunʼ dí maguwáʼ kuñu̱u̱n libro náa kiʼnirámáʼ xúgíʼ dí nirígá mu muraxnuu náa inuu. 2 Ikhí kiʼnirámáʼ dí nikruiga̱ Mardoqueo ga̱jma̱a̱ numuu Bigtana ga̱jma̱a̱ Teres, a̱jmi̱i̱n xa̱bu̱ ñajunʼ bi̱ kúwá náa guʼwá ñajunʼ bi̱ nuñewa̱a̱n xkrugua, bi̱ niri̱ya̱ʼ awan dí muxiyáa rey Asuero. 3 Ikhú rey niʼthí: “Ndiéjunʼ gamajkhu nigrui̱gú ga̱jma̱a̱ ndiéjunʼ nikhánáá Mardoqueo dí xígi̱ niʼni rá.” Ikhú xa̱bi̱i̱ nitháán: “Nda̱a̱ rí nigrui̱gú”.

4 Nda̱wa̱á rey nirajxi̱: “Tsáá xtáa rexa̱a̱ rá.” Hamán nindxu̱u̱ bi̱ nito̱ʼo̱o̱ náa rexo̱o̱ goʼwóo rey. Nindoo manda̱ʼa̱ dí murajkhaa Mardoqueo náa ixi̱ rí niʼtáñajunʼ mutsiji. 5 Ikha jngóo bi̱ numbayíí rey niriʼñáán: “Hamán nindxu̱u̱ bi̱ xtáa rexa̱a̱”. Ikhú rey niʼthún: “Gutha̱a̱n mato̱ʼo̱o̱”.

6 Índo̱ Hamán nito̱ʼo̱o̱, rey niʼthúu̱n: “Ndiéjunʼ gándoo gágumaa xa̱bu̱ bi̱ rey nandoo maxnúu gamajkhu rá.” Hamán nindxa̱ʼwáminaʼ:* “Tsáá i̱mba̱a̱ gáxnúu gamajkhu rey á mu raʼkháa ikhúún rá.” 7 Ikhú Hamán niʼthúu̱n: “Á mu rey nandoo maxnúu gamajkhu mbáa, 8 gaguwáʼ kuñu̱u̱n xtíin kiejuunʼ dí nagíʼ rey ga̱jma̱a̱ mbáa wáyú bi̱ nagriguii rey, magri̱gu mbá diadema dí kiejuunʼ náa edxu̱u̱ wáyú. 9 Mámbáa príncipes ndrígóo rey bi̱ itháan gíʼdoo numuu bi̱ kajkuáa ñawúunʼ mbaʼyoo xóo ma̱ʼkha̱ xtíin ga̱jma̱a̱ wáyú. Mbaʼyóoʼ maguwa̱a̱n xtíin xa̱bu̱ bi̱ rey nandoo maxnúu gamajkhu, ma̱ngaa magún kuya̱a̱ ga̱jma̱a̱ wáyú náa xuáá ndrígóo xuajin. Ikhú, gíʼmaa miʼtá náa inuu: ‹¡Xígi̱ kaʼnii egumaa xa̱bu̱ bi̱ rey nandoo maxnúu gamajkhu!›”. 10 Ikhú rey niʼtáñajuunʼ Hamán: “¡Nacha̱! Ayuʼ gátaʼyáʼ xtíin ga̱jma̱a̱ ayuʼ gíyáa wáyú. Xúgíʼ rúʼko̱ gátani̱i̱ Mardoqueo, xa̱bu̱ judío bi̱ gíʼ náa riejuun guʼwá ñajunʼ. Atani̱ xúgíʼ xó má niratá”.

11 Hamán ni̱jkha̱ gáyáʼ xtíin ga̱jma̱a̱ ni̱jkha̱ gáyáa wáyú, nigúwáanʼ xtíin Mardoqueo, ni̱jkha̱ kayáa náa xuáá ndrígóo xuajin ga̱jma̱a̱ wáyú, náa inuu ikhaa niʼthí: “¡Xígi̱ kaʼnii egumaa xa̱bu̱ bi̱ rey nandoo maxnúu gamajkhu!”. 12 Nda̱wa̱á dí nirígá rígi̱, Mardoqueo nitanga̱a̱ náa riejuun guʼwá ñajunʼ ndrígóo rey. Mú, Hamán mbá nacha̱ ni̱jkha̱a̱ náa goʼwóo, ni̱jkha̱a̱ ngíná ga̱jma̱a̱ nirugoo edxu̱u̱. 13 Hamán niʼthúu̱n a̱ʼgiu̱u̱ bi̱ mbiʼyuu Zeres ga̱jma̱a̱ xúgíinʼ bi̱ nambájxu̱u̱ gajmíi̱n xúgíʼ rí nigíʼnuu. Ikhú, bi̱ nixnáá consejo ga̱jma̱a̱ a̱ʼgiu̱u̱ bi̱ mbiʼyuu Zeres nitháán: “Á mu ga̱jma̱a̱ numuu Mardoqueo naʼni dí magajnúu majkuaaʼ, ikhaa nindxu̱u̱ mbáa judío, xáʼnga̱a̱ʼ gátani̱ ga̱jma̱a̱ʼ, a̱ʼkuíí má gámbáan”.

14 Índo̱ kaʼníí xtáa raʼtámíjná gajmíi̱n, niguáʼnú xa̱bu̱ ñajunʼ ndrígóo rey ga̱jma̱a̱ mbá nacha̱ nigún kuya̱a̱ Hamán náa ganitsu dí niʼni mújúunʼ Ester.

7 Ikhú, rey ga̱jma̱a̱ Hamán niguánú náa niʼni mújúunʼ ganitsu reina Ester. 2 Rí maʼni raga̱jma̱ mbiʼi, índo̱ kúwá raʼwa̱a̱n vino,* rey nirajxu̱u̱ mbu̱júu̱ Ester: “Ndiéjunʼ eyáaʼ reina Ester. Arathúnʼ ga̱jma̱a̱ ikhúún maxna̱a̱ʼ. Ndiéjunʼ rí nandaaʼ matando̱ʼo̱ʼ rá. ¡Tséʼniuu á mú natando̱ʼo̱ʼ mbá ta̱pha̱ mbaaʼ náa rí natañájunʼ, ikhúún maxna̱a̱ʼ!”. 3 Reina Ester niriʼñuu: “Tátá rey á mu naʼni a̱jkia̱a̱nʼ xtayoʼ ga̱jma̱a̱ á mu natayáá rí májánʼ maraxnu̱ʼ dí na̱nda̱ʼa̱a̱ʼ natakáñaaʼ rí matani̱ kríñu̱u̱nʼ gajmíʼ xa̱bu̱ xuajñunʼ. 4 Numuu rí ikhúún gajmíʼ xa̱bu̱ xuajñunʼ nixtagujuáanʼxu mu muradiáanʼxu ga̱jma̱a̱ munigámbáanʼxu. Á mu rí i̱ndó nixtagujuáanʼxu xóo ñumbáá, ikhúún ndaa má rí gátha. Mú xáʼyóoʼ marigá tsingíná rígi̱ numuu rí maʼni gachúu mbiʼyuu rey”.

5 Ikha jngóo rey Asuero nirajxu̱u̱ reina Ester: “¡Tsáá nindxu̱u̱ bi̱ niʼni rígi̱ rá.! ¡Náá xtáa xá.!” 6 Ester niriʼñuu: “Hamán nindxu̱u̱ xa̱bu̱ sia̱nʼ bugi̱ ga̱jma̱a̱ bi̱ xkawi̱ʼ a̱jkiu̱u̱n”.

Hamán ra̱ʼkhá tháán nimíñuu kaʼyoo rey ga̱jma̱a̱ reina. 7 Ikhú rey nitu̱jxu̱u̱ niwi̱ji̱ nikásnga̱ñu̱u̱ʼ nigájnuu náa kúwá raʼwa̱a̱n vino ga̱jma̱a̱ ni̱jkha̱ náa jardín* ndrígóo guʼwá ñajunʼ. Numuu rí Hamán ndiʼyoo dí rey niraʼwíí mbá dí ra̱májánʼ maʼniuu, nitu̱jxu̱u̱ mu ma̱ndo̱ʼo̱o̱ reina rí maʼni mba̱a̱ a̱jkiu̱u̱n kaʼyoo. 8 Índo̱ rey nitanga̱a̱ rí ni̱jkha̱ náa jardín ndrígóo guʼwá ñajunʼ náa kúwá raʼwa̱a̱n vino, ndiʼyoo rí Hamán nikataʼmáanʼ náa xiyoo dí grígu Ester. Ikhú niʼthí xígu: “¡Lá xa̱bu̱ bugi̱ xóó nandoo maguguaa ga̱jma̱a̱ tsiaki̱i̱ reina náa goʼwóʼ ráʼ.!” Índo̱ rey niʼthí rígi̱, ikhú niruguáá inuu Hamán. 9 Harboná, mbáa bi̱ nindxu̱u̱ xa̱bu̱ ñajunʼ bi̱ xtáa náa guʼwá ñajunʼ niʼthí: “Hamán ma̱ngaa nitsiji mbá ixi̱ náa marájkhaa Mardoqueo, bi̱ niʼni kríya̱a̱ʼ rey dí nikruiga. Ixi̱ rígi̱ rígá náa goʼwóo Hamán gíʼdoo 22 metro* rí mbaʼ”. Rey niʼtáñajunʼ: “Gurajkhaa má ikhaa ikhí”. 10 Ikha jngóo nira̱jkhaa Hamán náa ixi̱ rí nitsiji mu marájkhaa Mardoqueo. Ikhú rey niniñuuʼ rakásnga̱ñu̱u̱ʼ.

8 Nákha mbiʼi rúʼko̱, rey Asuero nixnájxu̱u̱ reina Ester xúgíʼ dí gíʼdoo Hamán, bi̱ nindxu̱u̱ xa̱bu̱ sia̱nʼ ndrígu̱ún judíos. Ga̱jma̱a̱ Mardoqueo nixnáximinaʼ náa inuu rey, numuu dí Ester niʼthí rí ikhaa nindxu̱u̱ prímiu̱u̱. 2 Ikhú rey niriyaʼ anillo rí naxnúu ga̱jma̱a̱ sello dí niríya káʼyuuʼ Hamán ga̱jma̱a̱ nixnúu Mardoqueo, ma̱ngaa Ester nigíiʼ Mardoqueo mu mañewu̱u̱n xúgíʼ dí ninindxu̱u̱ ndrígóo Hamán.

3 Ma̱ngaa, Ester nitanga̱a̱ niʼtámíjná ga̱jma̱a̱ rey. Nismbáti̱go̱o̱ náa rajkhúu ga̱jma̱a̱ xtambi̱ya̱ʼ, niʼtákáñuu rí maʼni májáanʼ xúgíʼ dí niʼni marigá Hamán bi̱ nindxu̱u̱ agaguita ga̱jma̱a̱ dí ni xágiʼdoo numuu awan dí niríyaʼ ga̱jma̱a̱ numún judíos. 4 Ikha jngóo rey nikrui̱ya̱ʼ ixi̱ ñajunʼ rí niguma ga̱jma̱a̱ oro náa Ester ga̱jma̱a̱ ikhaa nitujxu̱u̱ ga̱jma̱a̱ niwi̱ji̱ náa inuu rey. 5 Ikhú Ester niʼthúu̱n: “Á mu rey ndaʼyoo rí májánʼ nindxu̱u̱ ga̱jma̱a̱ á mu naʼni a̱jkiu̱u̱n kaʼyoʼ ma̱ngaa á mu ndaʼyoo dí májánʼ nindxu̱u̱ rí maguma ga̱jma̱a̱ á mu nanigu̱u̱ʼ e̱ni̱, gagumaraʼmáʼ mbá kiʼtáñajunʼ náa maʼthí dí ni xágiʼdoo numuu i̱yi̱i̱ʼ dí niʼnirámáʼ Hamán bi̱ xkawiiʼ a̱jkiu̱u̱n a̱ʼdióo Hamedata bi̱ nindxu̱u̱ agaguita, dí niʼnirámáʼ rí maguma gámbíin bi̱ nindxu̱ún judíos náa xúgíʼ xuajin rí naʼtáñajunʼ rey. 6 Xú káʼnii gáʼngo̱ʼ gáyoo tsingíná rí mugíʼníín xa̱bu̱ xuajñunʼ rá. Ga̱jma̱a̱ xú káʼnii gáʼngo̱ʼ gáyoo dí muradíin bi̱ ka̱ñu̱u̱n xá.”

7 Ikha jngóo rey Asuero niʼthúu̱n reina Ester ga̱jma̱a̱ Mardoqueo bi̱ nindxu̱u̱ judío: “Gudxawíín, nixnajxúu má Ester xúgíʼ dí nigiʼdoo Hamán ga̱jma̱a̱ nitañájunʼ rí murajkhaa náa ixi̱ numuu dí niríyaʼ awan* dí maʼni gámbíin bi̱ nindxu̱ún judíos. 8 Rí xúgi̱, gajmala mbiʼyuu rey mu muniraʼmáʼ dí májánʼ má gúya̱a̱la ikháanʼ ga̱jma̱a̱ numún judíos, gu̱xna̱a̱ sello ga̱jma̱a̱ anillo rí najmuu rey mu maxnúu sello, numuu rí xándoo majngudi̱i̱ mbá rí nigumaraʼmáʼ ga̱jma̱a̱ nambiʼyuu rey ma̱ngaa dí nixnúu sello ga̱jma̱a̱ anillo ndrígóo”.

9 Índo̱ niʼni mbiʼi 23 dí ajtsú igu̱nʼ, xóo muʼthá, gu̱nʼ siván,* nigimbíin secretarios ndrígóo rey. Ikhiin niniraʼmáʼ xúgíʼ dí Mardoqueo niʼtañajúnʼ judíos, xó má sátrapas, xa̱bu̱ ñajunʼ ga̱jma̱a̱ príncipes bi̱ nutañajunʼ náa xuajin majkhaʼ dí rígá náa India asndu náa Etiopía, 127 xuajin. Nigumaraʼmáʼ náa mámbá xuajin xó má nagumaraʼmáʼ náa ajngún ga̱jma̱a̱ mámbá xuajin náa ajngáa rí ikhiin nuthi. Ma̱ngaa niniraʼmáʼ náa inún judíos xó má ajngáa rí ikhiin nuthi.

10 Mardoqueo niʼnirámáʼ i̱yi̱i̱ʼ ga̱jma̱a̱ mbiʼyuu rey Asuero ma̱ngaa nixnúu sello ga̱jma̱a̱ anillo ndrígóo rey. Nda̱wa̱á nikuʼmiin xa̱bu̱ bi̱ nagún ku̱ñu̱u̱n ajngáa bi̱ kúdrúwíin wáyú bi̱ nagáñún nacha̱ bi̱ gíʼdiin rey. 11 Náa i̱yi̱i̱ʼ rúʼko̱, rey naxnún permiso xúgíinʼ judíos bi̱ kúwá náa i̱ʼwáʼ xuajin rí ma̱ndoo muruwamíjna̱ ga̱jma̱a̱ mumbáyúmíjna̱, muradíin ga̱jma̱a̱ muni̱ gámbíin xa̱bu̱ bi̱ gátujxu̱u̱n muni̱ ngíníi tséʼniuu má náa xuajin eguwáʼ, xúʼko̱ má gu̱ʼu̱ ga̱jma̱a̱ e̱ji̱n ma̱ngaa mundrígú rí guáʼdáá. 12 Mbóó mbiʼi gaguma mbáníí awan rígi̱, náa xúgíʼ xuajin rí naʼtáñajunʼ rey Asuero, mbiʼi 13 rí maʼni 12 igu̱nʼ, xóo muʼthá, gu̱nʼ adar.* 13 Ajngáa rí naʼthí náa i̱yi̱i̱ʼ rúʼko̱, mbaʼyóoʼ mani̱ndxu̱u̱ xóo mbá xtángoo náa xúgíʼ xuajin. Ma̱ngaa mbaʼyóoʼ majuiʼthá náa xúgíʼ xuajin, mu xúʼko̱ bi̱ nindxu̱ún judíos makuwá xawii mbiʼi rúʼko̱, mu muxmijná gajmiún xa̱bu̱ sia̱nʼ ndrígu̱ún. 14 Ikha jngóo xó má niʼtáñajunʼ rey, bi̱ nagún ku̱ñu̱u̱n ajngáa nigájnún mbá nacha̱ ragáñúún gajmiún wáyú bi̱ gíʼdiin rey. Ma̱ngaa xtángoo rígi̱ nijmaʼnuuʼ náa guʼwá ñajunʼ* dí rígá náa Susa.

15 Índo̱ Mardoqueo nigájna̱a̱ náa inuu rey, kagíʼ xtíin rí kiejuunʼ dí color azul ga̱jma̱a̱ miʼxá ma̱ngaa i̱mba̱ xtíin rí niguma ga̱jma̱a̱ mugu̱ rí miʼñuu dí itháán májánʼ ga̱jma̱a̱ náa edxu̱u̱ grígu mbá corona dí oro rí mba̱a̱. Xa̱bu̱ xuajin bi̱ kúwá náa Susa nindxa̱ʼwa̱ ga̱jma̱a̱ gagi. 16 Xa̱bu̱ judíos niʼni̱i̱ a̱jkiu̱ún,* nikúwá gagi ga̱jma̱a̱ ndiyamajkhún. 17 Xúgíʼ xuajin asndu náá e̱jkha̱nú xtángoo ndrígóo rey, judíos nakúwá gagi ga̱jma̱a̱ nuni̱ ndxa̱a̱ ma̱ngaa nuphiʼtsu. Ga̱jma̱a̱ eʼwíinʼ bi̱ naguwáʼ náa i̱ʼwáʼ xuajin nurtajximíjnáá judíos numuu rí nimíñúún kuñún.

9 Mbiʼi 13 dí maʼni 12 igu̱nʼ, xóo muʼthá, gu̱nʼ adar,* nindxu̱u̱ mbiʼi dí mambanúu rí niʼtáñajunʼ rey ga̱jma̱a̱ xtángoo ndrígóo. Xa̱bu̱ sia̱nʼ ndrígu̱ún judíos niguáʼthi̱i̱n dí muni̱ gámbíin mbiʼi rúʼko̱, mú na̱nguá nirígá rúʼko̱, judíos nindxu̱ún bi̱ nini̱ gámbíin xa̱bu̱ sia̱nʼ ndrígu̱ún. 2 Judíos nigimbíin náa xuajñún náa xúgíʼ xuajin dí rígá náa naʼtáñajunʼ rey Asuero mu xúʼko̱ muni̱ gajmiún bi̱ nandún muni̱ ngíníi. Numuu rí xa̱bu̱ bi̱ kúwá náa xúgíʼ xuajin nimíñúún kuñún judíos, ikha jngóo na̱nguá niʼngu̱u̱n gúni̱ gajmiún. 3 Ma̱ngaa, xúgíinʼ príncipes bi̱ nutañajunʼ náa xuajin majkhaʼ, sátrapas, ma̱ngaa xa̱bu̱ ñajunʼ* ma̱ngaa bi̱ kaʼñún munimbáníí xkujndu ndrígóo rey, nimbañún judíos numuu rí nimíñúún kuyáá Mardoqueo. 4 Ikhaa nigruigú mba̱a̱ ñajunʼ náa goʼwóo rey. Mardoqueo ni̱jkha̱ rajmaʼniiʼ itháan náa xúgíʼ xuajin numuu dí ñajunʼ rí kajkuáa ñawúunʼ ni̱jkha̱ raʼni itháán mba̱a̱.

5 Judíos nixmijná gajmiún xa̱bu̱ sia̱nʼ, niradíin ga̱jma̱a̱ espada, xúgíinʼ nini̱ gámbíin. Nini̱ asndu ndiéjunʼ má nindúún gajmiún bi̱ nawiñu̱u̱nʼ kuñún. 6 Náa guʼwá ñajunʼ* dí rígá náa Susa, judíos niradíin mbá 500 xa̱bekha. 7 Ma̱ngaa nixiyáa Parsandatá, Dalfón, Aspatá, 8 Poratá, Adalía, Aridatá, 9 Parmastá, Arisái, Aridái ga̱jma̱a̱ Vaizata. 10 Bugi̱ nindxu̱ún mbá gu̱wi̱i̱nʼ e̱ji̱i̱n Hamán a̱ʼdióo Hamedata, bi̱ nindxu̱u̱ xa̱bu̱ sia̱nʼ ndrígu̱ún judíos. Mú judíos na̱nguá niguanún ga̱jma̱a̱ dí guáʼdáá nda̱wa̱á dí niradíin.

11 Mbiʼi rúʼko̱ nitháán rey nguáthi̱i̱n nikháñún náa guʼwá ñajunʼ dí rígá náa Susa.

12 Rey niʼthúu̱n reina Ester: “Á mu náa guʼwá ñajunʼ dí rígá náa Susa judíos niradíin mbá 500 xa̱bekha ga̱jma̱a̱ mbá gu̱wi̱i̱nʼ e̱ji̱i̱n Hamán, nguáthi̱i̱n lá xa̱bu̱ túradíin náa i̱ʼwáʼ xuajin dí naʼtáñajunʼ rey xá. Dí xúgi̱ rá. Ndiéjunʼ itháan eyaaʼ, arathúnʼ ga̱jma̱a̱ ikhúún maxna̱a̱ʼ, ndiéjunʼ dí itháan nandaaʼ matando̱ʼo̱ʼ. Ikhúún maxna̱a̱ʼ”. 13 Ester niriʼñuu: “Á mu rey ndaʼyoo dí májánʼ nindxu̱u̱, na̱ndo̱ʼo̱o̱ dí gájtsíí maniñúúnʼ xa̱bu̱ judíos bi̱ kúwá náa Susa muni̱ ikháá xó má xtángoo niniñúúnʼ muni̱ xúgi̱. Ma̱ngaa na̱ndo̱ʼo̱o̱ dí mbá gu̱wi̱i̱nʼ e̱ji̱i̱n Hamán bi̱ nikháñún majngriguíin náa ixi̱”. 14 Ikhú rey niʼtáñajunʼ dí maguma xúʼko̱ kaʼnii. Nigájnuu mbá xtángoo náa Susa dí xúʼko̱ gárígá ma̱ngaa mbá gu̱wi̱i̱nʼ e̱ji̱i̱n Hamán nijngriguíin náa ixi̱.

15 Ikhú xa̱bu̱ judíos bi̱ kúwá náa Susa nitangiín nigimbíin náa mbiʼi 14 ñajunʼ gu̱nʼ adar ga̱jma̱a̱ niradíin i̱mbá 300 xa̱bekha náa Susa. Mú na̱nguá niguanún ga̱jma̱a̱ rí guáʼdáá.

16 Xúʼko̱ má judíos bi̱ kúwá náa xúgíʼ xuajin dí naʼtáñajunʼ rey, mangiin nigimbíin mumbayúmijná. Niradíin mbá 75,000 xa̱bu̱ sia̱nʼ ga̱jma̱a̱ xúʼko̱ nikáwíin náa xa̱bu̱ bi̱ nawiñu̱u̱nʼ kuñún, mú na̱nguá niguanún ga̱jma̱a̱ rí guáʼdáá. 17 Rígi̱ nirígá 13 ñajunʼ gu̱nʼ adar. Mú mbiʼi 14 ndiya̱a̱ jxu̱únʼ ga̱jma̱a̱ ninindxu̱u̱ mbá mbiʼi rí nipiʼtsu ga̱jma̱a̱ nikúwá gagi.

18 Judíos bi̱ kúwá náa Susa nigimbíin mbiʼi 13 ga̱jma̱a̱ 14 mu mumbayumíjná. Mú mbiʼi 15 ndiya̱a̱ jxu̱únʼ ga̱jma̱a̱ ninindxu̱u̱ mbá mbiʼi rí nipiʼtsu ga̱jma̱a̱ nikúwá gagi. 19 Mú eʼwíinʼ judíos bi̱ kúwá náa i̱ʼwáʼ xuajin mbiʼi 14 ñajunʼ gu̱nʼ adar nipiʼtsu ga̱jma̱a̱ nikúwá gagi. Ninindxu̱u̱ mbá mbiʼi dí nini̱ ndxa̱a̱ ga̱jma̱a̱ nixnamijná ganitsu.

20 Mardoqueo niʼnirámáʼ xúgíʼ dí nirígá ga̱jma̱a̱ nikuʼma i̱yi̱i̱ʼ náa inún xúgíinʼ judíos bi̱ kúwá náa xúgíʼ xuajin dí naʼtáñajunʼ rey Asuero, xó má dí rígá mijngii ga̱jma̱a̱ dí rígá mitsínguánʼ. 21 Niʼtáñajúúnʼ dí xúgíʼ tsiguʼ muni̱ ndxo̱o̱ mbiʼi 14 ga̱jma̱a̱ 15 ñajunʼ gu̱nʼ adar, 22 numuu rí mbiʼi rúʼko̱ xa̱bu̱ judíos ndiya̱a̱ jxu̱ún náa xa̱bu̱ sia̱nʼ ndrígu̱ún. Dí nagawúunʼ a̱jkiu̱ún nigua̱jta̱a̱ gagi náa gu̱nʼ rúʼko̱, mbiʼi dí kúwá ngíná nigua̱jta̱a̱ mbá mbiʼi dí muniriya̱a̱ʼ ndxa̱a̱. Ndiyóoʼ dí muniriya̱a̱ʼ ndxa̱a̱ mbiʼi rúʼko̱ ga̱jma̱a̱ ganitsu ma̱ngaa dí makuwá gagi, ma̱ngaa ndiyóoʼ dí muxnamijná ganitsu ma̱ngaa muxnún regalos bi̱ ngíníi.

23 Bi̱ judíos nindúún má rí muniriya̱a̱ʼ ndxa̱a̱ dí niguáʼdi̱i̱ ma nini̱ ga̱jma̱a̱ nini̱ dí Mardoqueo niʼnirámáʼ. 24 Numuu rí Hamán a̱ʼdióo Hamedata xa̱bu̱ agaguita, xa̱bu̱ sia̱nʼ ndrígu̱ún xúgíinʼ judíos, niríyaʼ awan rí maʼni gámbíin judíos ga̱jma̱a̱ niríyaʼ suerte* mu maʼni rí mamiñún ga̱jma̱a̱ maʼni gámbíin. 25 Mú índo̱ Ester ni̱jkha̱ náa inuu rey, ikhú rey niʼnirámáʼ kiʼtáñajunʼ rígi̱: “Awan raʼkhí dí niriyaʼ ga̱jma̱a̱ numún judíos gátanga̱a̱ ma náa ikhaa”.* Ikhú nira̱jkhaa Hamán gajmíi̱n e̱ji̱i̱n náa ixi̱. 26 Ndxa̱a̱ rúʼko̱ nigumbiʼyuu Purim, xóo muʼthá, suerte.* Ga̱jma̱a̱ numuu rí Mardoqueo niʼnirámáʼ náa i̱yi̱i̱ʼ ma̱ngaa rí ikhiin ndiyáá ga̱jma̱a̱ rí niguáʼníí, 27 judíos nixudamíjna̱ rí ikhiin, e̱jñu̱ún ga̱jma̱a̱ xúgíinʼ xa̱bu̱ bi̱ gákúwíin gajmiún muniriya̱a̱ʼ ndxa̱a̱ náa a̱jma̱ mbiʼi rúʼko̱, muni̱ xó má kiʼniraʼmáʼ maguma mbiʼi rúʼko̱ náa xúgíʼ tsiguʼ, náa mbiʼi rí kaʼyoo. 28 Xúgíinʼ bi̱ mámbá guʼwíin ma̱ngaa e̱jñu̱ún bi̱ maguwáʼ nda̱wa̱á, marmáʼáan a̱jkiu̱ún ga̱jma̱a̱ muniriya̱a̱ʼ ndxa̱a̱ rúʼko̱ náa xúgíʼ xuajin rí kúwíin. Judíos xúniña̱a̱n runiriya̱a̱ʼ ndxa̱a̱ Purim ga̱jma̱a̱ e̱jñu̱ún xámbumún rí muniriya̱a̱ʼ má xúʼko̱ ndxa̱a̱.

29 Nda̱wa̱á reina Ester, wáxióo* Abihail ga̱jma̱a̱ Mardoqueo xa̱bu̱ judío nijmún ñajunʼ rí guáʼdáá, mu muniraʼmáʼ dí maʼni raga̱jma̱ i̱yi̱i̱ʼ rí naʼthí ga̱jma̱a̱ numuu Purim. 30 Ikhaa nikuʼma i̱yi̱i̱ʼ náa xúgíinʼ judíos bi̱ kúwá náa 127 xuajin náa naʼtáñajunʼ Asuero náa kiʼnirámáʼ ajngáa rí gajkhun ga̱jma̱a̱ ajngáa rí májánʼ, 31 mu muthún mbu̱júu̱ rí mbaʼyóoʼ muniriya̱a̱ʼ ndxa̱a̱ Purim náa mbiʼi rí kaʼyoo, xó má Mardoqueo xa̱bu̱ judío ga̱jma̱a̱ reina Ester niʼtáñajúúnʼ ma̱ngaa xó má ikhiin nixna ajngún muni̱, ikhiin gajmiún e̱jñu̱ún. Ma̱ngaa ikhú mbaʼyóoʼ murkueyimijná* ga̱jma̱a̱ munda̱ʼa̱a̱ Dios rí mambáñún. 32 Rí niʼtáñajunʼ Ester nisngájma rí gajkhun nindxu̱u̱ dí mbaʼyóoʼ maguma ndxa̱a̱ Purim ga̱jma̱a̱ nigumaraʼmáʼ náa mbá libro.

10 Rey Asuero niʼthí rí maxtiejunʼ gakhi̱i̱ náa xúgíʼ xuajin rí naʼtáñajunʼ, xó má náa ku̱ba̱ʼ xúʼko̱ má náa islas* dí rígá náa lamáa.*

2 Libro náa kiʼniraʼmáʼ dí naʼthí ga̱jma̱a̱ numún reyes bi̱ kúwá náa Media ga̱jma̱a̱ Persia nigumaraʼmáʼ xúgíʼ ñajunʼ mba̱ʼu̱, ga̱jma̱a̱ náa nikujmaa tsiaki̱i̱ ndrígóo ma̱ngaa nigumarámáʼ kuduun xú kaʼnii rey niʼni mba̱a̱ Mardoqueo. 3 Xa̱bu̱ bi̱ itháán nigiʼdoo numuu nda̱wa̱á dí rey Asuero ninindxu̱u̱ Mardoqueo xa̱bu̱ judío, ikhaa ninindxu̱u̱ itháán mba̱a̱ náa majñu̱únʼ judíos ga̱jma̱a̱ xúgíinʼ xa̱bu̱ xuajñuu ndiyamajkuíí. Niñejunʼ má xúʼko̱ mu makuwá májánʼ xa̱bu̱ xuajñuu ga̱jma̱a̱ ndiyáʼ xóo makuwá májánʼ* xúgíinʼ e̱jñu̱ún ikhiin.