ECLESIASTÉS

1 Ajngáa rígi̱ niʼthí bi̱ nagímbíin xa̱bu̱, a̱ʼdióo David bi̱ nindxu̱u̱ rey náa Jerusalén.

 3 Ndiéjunʼ gáda̱a̱ʼ mbáa xa̱bu̱

dí nañajunʼ gakhi̱i̱ náa tsu̱du̱u̱ ku̱ba̱ʼ* rá.

 6 Giñánʼ na̱jkha̱ xígií náa sur ga̱jma̱a̱ nda̱wa̱á na̱jkha̱ xígií náa norte.

Najngutuáʼáan, tséwi̱ji̱i̱ rajngutuáʼáan... Giñánʼ najngutuáʼáan má xúʼko̱.

 7 Xúgíʼ mañu najkha̱a̱ náa lamáa,* mú lamáa tséjnííʼ.

Mañu natanga̱a̱ má náa nigájnuu mu xúʼko̱ mata̱nga̱a̱ magajnúu mbu̱júu̱.

10 Lá rígá mbá dí ma̱ndoo muʼthá “Rígi̱ dí nuxi̱ʼ ráʼ.”

Rúʼko̱ rígá má asndu nákha wajyúuʼ.

Rígá má asndu nákha xóó tségumáánʼ ikháánʼlú.

12 Ikhúún bi̱ nagímbíin xa̱bu̱, ninindxu̱ʼ rey ndrígóo Israel náa Jerusalén. 13 Niraʼwi̱i̱ majmuʼ ku̱ma̱ ndrígóʼ mu manigajma̱a̱ xúgíʼ rí niguma náa agoo mekhu..., ndiʼyáʼ mba̱yo̱o̱ ga̱jma̱a̱ numuu ñajunʼ dí naʼni majmáa a̱jkiu̱ún xa̱bu̱, rí Dios nixnúún ikhiin mu xúʼko̱ maguaʼdáá rí muni̱.

16 Ikhú ni̱thu̱u̱n a̱jkiu̱nʼ: “Atayáá, ni̱jkhánú nigúʼdoo wéñuuʼ ku̱ma̱, itháán ki xóo mbá xúgíinʼ bi̱ nikúwíin nákha ginii náa Jerusalén, a̱jkiu̱nʼ ni̱jkha̱nú nijmañuu ga̱jma̱a̱ nigiʼdoo ku̱ma̱”. 17 Ndiʼyáʼ majmañuʼ itháán ga̱jma̱a̱ xúʼko̱ má ma̱ngaa ndiʼyáʼ mba̱yo̱o̱ mbá xúgíʼ dí xóo eni̱ xa̱bu̱ skágunʼ, rúʼko̱ ma̱ngaa nindxu̱u̱ xóo dí maraxkháá giñánʼ.

2 Ikhú ni̱thu̱u̱n a̱jkiu̱nʼ: “Mba̱yo̱o̱ xú káʼnii nindxu̱u̱ dí matani̱ gagimina̱ʼ, mu mba̱yo̱o̱ ndiéjunʼ gáda̱a̱ʼ”. Mú nijkhánú ndi̱yo̱o̱ dí rúʼko̱ ma̱ngaa nindxu̱u̱ ndíí.

 2 Ni̱tha̱: “Nindxu̱u̱ skágunʼ dí matanduʼwa má xúʼko̱”.

Ga̱jma̱a̱ “ndiéjunʼ lá eyambáá dí matani̱ gagimina̱ʼ rá.”

3 Ndiʼyáʼ ma̱ni̱ gagimina̱ʼ ga̱jma̱a̱ vino, ga̱jma̱a̱ numuu dí najmañuʼ ndi̱yo̱o̱ awaán xóo ma̱ga̱nʼ, niʼgíminaʼ mbaʼyáʼ i̱ndó dí ma̱ni̱ gagimina̱ʼ ga̱jma̱a̱. Nindoʼ mba̱yo̱o̱ ndiéjunʼ dí nindxu̱u̱ itháan májánʼ rí xa̱bu̱ numbaaʼ ma̱ndoo muni̱ náa mbá nguáthá mbiʼi dí kúwá náa agoo mekhu. 4 Nigíʼdu̱u̱ ni̱ni̱ mbaʼa ñajunʼ mba̱ʼu̱. Ni̱ni̱ goʼwóʼ ga̱jma̱a̱ ni̱du ixi̱ uva ndrígóʼ. 5 Nigúʼdoo jardín* dí majkhaʼ ga̱jma̱a̱ dí mba̱ʼu̱, ga̱jma̱a̱ ikhí ni̱du xúgíʼ enii ixi̱ dí naxná xndú taun. 6 Ni̱ni̱ tanque náa ga̱jnu̱ʼ iyaʼ dí na̱gíyóoʼ ga̱jma̱a̱ ixi̱ dí na̱jkha̱ ra̱ja̱a̱ dí rígá náa xaxi̱. 7 Nigúʼdíin xa̱bi̱ʼ xa̱bekha ga̱jma̱a̱ gu̱ʼu̱ bi̱ ni̱mba̱yúʼ ga̱jma̱a̱ ikhiin niguánú niguáʼdiin e̱jñu̱ún náa goʼwóʼ, bi̱ mangiin ninindxu̱ún xa̱bi̱ʼ.* Ma̱ngaa nigúʼdíin mbaʼin xujkhúʼ, xedi̱ ga̱jma̱a̱ mugu̱, nigúʼdíin itháan mbaʼin ki xóo bi̱ niguáʼdiin bi̱ nikúwá nákha ikhúún xóó tséxtáá náa Jerusalén. 8 Ni̱gímbóó plata ga̱jma̱a̱ oro dí maʼni ndrígóʼ, dí gíʼdoo numuu rígi̱ i̱ndó ma̱ndoo muguáʼdáá reyes ga̱jma̱a̱ dí ma̱ndoo marigá náa i̱ʼwáʼ xuajin. Nigúʼdíin xa̱bekha ga̱jma̱a̱ gu̱ʼu̱ bi̱ nini̱ ajmúú náa ikhúún, ma̱ngaa nigúʼdoo rí naʼni maʼdxúún e̱jñu̱ún xa̱bu̱ numbaaʼ: Mbáa a̱ʼgu̱, xúʼko̱, ra̱ʼkhá tháán mbaʼin gu̱ʼu̱. 9 Ikha jngóo nijkhánú nigúʼdoo numuʼ, nigúʼdoo itháan numuʼ ki xóo mbá xúgíinʼ bi̱ nikúwá nákha ikhúún xóó tséxtáá náa Jerusalén. Ga̱jma̱a̱ nijmañuʼ má xúʼko̱.

10 Ni̱ni̱ mbá xúgíʼ rí nindoʼ.* Ni̱ni̱ maʼdxuu a̱jkiu̱nʼ ga̱jma̱a̱ mbá xúgíʼ rí nindoo. Ra̱ʼkhá tháán edxuu a̱jkiu̱nʼ ga̱jma̱a̱ numuu mbá xúgíʼ ñajunʼ gakhi̱i̱ dí ni̱ni̱, rúʼko̱ nindxu̱u̱ dí nida̱a̱ʼ ga̱jma̱a̱ numuu dí niñajunʼ gakhi̱i̱. 11 Mú índo̱ nindxa̱ʼwa̱mínáʼ náa mbá xúgíʼ ñajunʼ dí ni̱ni̱ ga̱jma̱a̱ ñawúnʼ, ma̱ngaa náa mbá xúgíʼ ñajunʼ gakhi̱i̱ dí ni̱ni̱, nijkhánú ndi̱yo̱o̱ dí xúgíʼ nindxu̱u̱ ndíí, nindxu̱u̱ xóo dí maraxkháá giñánʼ. Nda̱a̱ nimbá dí gíʼdoo numuu náa tsu̱du̱u̱ ku̱ba̱ʼ.*

12 Ikhú nigíʼdúu nindxa̱ʼwa̱mínáʼ náa dí najmañuʼ, ma̱ngaa náa mbá xúgíʼ rí nuni̱ xa̱bu̱ skágunʼ. (Ikha jngóo, ndiéjunʼ lá gándoo gáʼni mbáa xa̱bu̱ bi̱ gáriʼkuriya̱a̱ʼ rey rá. Maʼni i̱ndó má dí niguma). 13 Dí majmañaaʼ nindxu̱u̱ itháan májánʼ ki xóo dí mani̱ndxa̱a̱ʼ mbáa xa̱bu̱ skágunʼ, xó má aguʼ nindxu̱u̱ itháan májánʼ ki xóo dí mikína.

14 Mbáa xa̱bu̱ bi̱ najmañuu nindxu̱u̱ asndu xóo bi̱ kambaʼta iduu,* mú mbáa xa̱bu̱ skágunʼ nindxu̱u̱ asndu xóo jngruigo̱o̱ náa mikína. Nijkhánú nijmañuʼ dí mbá xúgíinʼ ikhiin mbóó má náa egúun. 15 Nda̱wa̱á ni̱thu̱u̱n a̱jkiu̱nʼ: “Dí nagíʼnuu xa̱bu̱ skágunʼ rúʼko̱ má gágíʼnuʼ mangúún”. Ndiéjunʼ lá nida̱a̱ʼ ga̱jma̱a̱ numuu dí nijmañuʼ wéñuuʼ rá. Ikha jngóo ni̱thu̱u̱n a̱jkiu̱nʼ: “Rúʼko̱ ma̱ngaa nindxu̱u̱ ndíí”. 16 Numuu dí ni má xa̱bu̱ bi̱ najmañuu ga̱jma̱a̱ xa̱bu̱ skágunʼ xármáʼáan a̱jkiu̱ún kuñúún asndu kámuu. Náa mbiʼi dí na̱ʼkha̱, xúgíinʼ mambumún kuñúún. Xa̱bu̱ bi̱ najmañuu makhañúu ikha̱á má xóo gákháñuu xa̱bu̱ skágunʼ.

17 Nijkhánú niwi̱yu̱ʼ ka̱yo̱o̱ vida, numuu dí nijkhánú ndi̱yo̱o̱ dí mbá xúgíʼ dí naguma náa tsu̱du̱u̱ ku̱ba̱ʼ niʼni dí maxtáá ngíná, xúgíʼ nindxu̱u̱ ndíí, nindxu̱u̱ xóo dí maraxkháá giñánʼ. 18 Nijkhánú niwi̱yu̱ʼ ka̱yo̱o̱ mbá xúgíʼ ñajunʼ gakhi̱i̱ dí ni̱ni̱ náa tsu̱du̱u̱ ku̱ba̱ʼ, numuu dí mbá xúgíʼ rúʼko̱ maniʼñúuʼ náa ñawúunʼ i̱mba̱a̱ xa̱bu̱ bi̱ gáʼkha̱ nda̱wa̱á dí ikhúún. 19 Tsiánguá á mu xa̱bu̱ buʼko̱ mani̱ndxu̱u̱ mbáa bi̱ najmañuu o mbáa xa̱bu̱ skágunʼ. Tséʼniuu má xú kaʼnii gánindxu̱u̱, náa ñawúunʼ gáguanúu mbá xúgíʼ dí ikhúún niñejuunʼ ga̱jma̱a̱ tsiaki̱i̱ ndrígóʼ, ma̱ngaa náa rí ndiyóoʼ majmuʼ dí najmañuʼ mu magúʼdoo náa tsu̱du̱u̱ ku̱ba̱ʼ. Rúʼko̱ ma̱ngaa nindxu̱u̱ ndíí. 20 Nixtáá ngíná índo̱ nindxa̱ʼwa̱mínáʼ ga̱jma̱a̱ numuu ñajunʼ gakhi̱i̱ dí ni̱ni̱ náa tsu̱du̱u̱ ku̱ba̱ʼ. 21 Maski ajndu mbáa xa̱bu̱ mañajunʼ gakhi̱i̱ ga̱jma̱a̱ numuu dí najmañuu, dí gíʼdoo ku̱ma̱ ma̱ngaa dí najmaa naʼni, mbaʼyóoʼ dí maxnúu mbá xúgíʼ dí niñajuunʼ mbáa xa̱bu̱ bi̱ na̱nguá niñajunʼ gakhi̱i̱ mu makánúu. Rúʼko̱ ma̱ngaa nindxu̱u̱ ndíí ga̱jma̱a̱ ra̱ʼkhá tháán ngíná.

22 Ndiéjunʼ lá phú gáda̱a̱ʼ xa̱bu̱ bi̱ nañajunʼ gakhi̱i̱ wéñuuʼ, ga̱jma̱a̱ numuu dí ra̱ʼkhá tháán eyoo magiʼdoo, ikha jngóo naxka̱jxi̱i̱ʼ* dí mañajunʼ gakhi̱i̱ náa tsu̱du̱u̱ ku̱ba̱ʼ rá. 23 Ñajunʼ dí naʼni náa mbá xúgíʼ mbiʼi dí xtáa, naʼni dí magiʼdoo ga̱ʼkhu̱ ga̱jma̱a̱ majmáa a̱jkiu̱u̱n, ni má mbruʼun tséyáa jxu̱u̱ʼ a̱jkiu̱u̱n. Rúʼko̱ ma̱ngaa nindxu̱u̱ ndíí.

24 Nda̱a̱ i̱mba̱ dí itháan májánʼ ma̱ndoo maʼni mbáa xa̱bu̱ ki xóo dí makuiʼtsu, maga̱a̱n, ma̱ngaa dí maxtáa gagi ga̱jma̱a̱ numuu ñajunʼ gakhi̱i̱ dí naʼni. Nijkhánú ndi̱yo̱o̱ dí rígi̱ ma̱ngaa na̱ʼkha̱ náa Dios bi̱ gajkhun. 25 Numuu dí, tsáá lá ekuiʼtsu ga̱jma̱a̱ tsáá eʼga̱a̱n itháan májánʼ ki xóo ikhúún rá.

26 Mbáa xa̱bu̱ bi̱ naʼni dí maʼdxuu a̱jkiu̱u̱n Dios bi̱ gajkhun, ikhaa naʼni dí majmañuu, dí magiʼdoo ku̱ma̱ ga̱jma̱a̱ dí maxtáa gagi, mú mbáa xa̱bu̱ aʼkhá naxnúu ñajunʼ dí magímbóó ga̱jma̱a̱ dí magiʼdoo mu xúʼko̱ maxnúu xa̱bu̱ bi̱ naʼni dí maʼdxuu a̱jkiu̱u̱n Dios bi̱ gajkhun. Rúʼko̱ ma̱ngaa nindxu̱u̱ ndíí, nindxu̱u̱ xóo dí maraxkháá giñánʼ.

9 Ndiéjunʼ edaaʼ xa̱bu̱ bi̱ nañajunʼ ga̱jma̱a̱ xúgíʼ tsiaki̱i̱ rí naʼni rá. 10 Ndi̱yo̱o̱ ñajunʼ rí Dios nixnún e̱jñu̱ún xa̱bu̱ numbaaʼ mu muguáʼdáá rí muni̱. 11 Dios niʼni mbá xúgíʼ náa mbiʼi rí ndiyóoʼ maguma ga̱jma̱a̱ ra̱ʼkhá tháán mitsaanʼ* rí niʼni. Asndu nigíwánʼ náa a̱jkiu̱ún xa̱bu̱ numbaaʼ rí maʼndún makuwá kámuu mbiʼi, mú xa̱bu̱ numbaaʼ nditháan xáʼngu̱u̱n gákru̱ʼu̱u̱n kájxi̱* ñajunʼ rí Dios bi̱ gajkhun niʼni.

12 Ni̱jkhánú ndi̱yo̱o̱ rí nda̱a̱ nimbá dí itháan májánʼ dí ma̱ndoo muni̱ ikhiin, ki xóo rí makuwá gagi ga̱jma̱a̱ dí muni̱ rí májánʼ náa mbiʼi rí kúwá. 13 Ma̱ngaa rí xúgíinʼ gúpiʼtsu ga̱jma̱a̱ gu̱wa̱a̱n ma̱ngaa gakuwá gagi ga̱jma̱a̱ numuu ñajunʼ gakhi̱i̱ rí nuni̱. Rúʼko̱ nindxu̱u̱ mbá regalo dí na̱ʼkha̱ náa Dios.

14 Nijmañuʼ rí xúgíʼ dí naʼni Dios bi̱ gajkhun ndajyúuʼ asndu kámuu. Nda̱a̱ nimbá rí mbaʼyóoʼ magrigu̱u̱, ni má nda̱a̱ nimbá rí mbaʼyóoʼ magajta̱a̱. Xígi̱ kaʼnii niʼni Dios bi̱ gajkhun mu xúʼko̱ xa̱bu̱ mamiñún kuyáá.

15 Dí xtáa rarígá, nirígá má, ga̱jma̱a̱ dí marigá, nirígá má. Ga̱jma̱a̱ Dios bi̱ gajkhun maʼngo̱o̱ maʼni rí xa̱bu̱ numbaaʼ nandún ga̱jma̱a̱ rí nduyáʼ.*

16 Ma̱ngaa ndi̱yo̱o̱ rígi̱ náa tsu̱du̱u̱ ku̱ba̱ʼ,* ikhaa dí marigá dí májánʼ, narígá dí ra̱májánʼ, ga̱jma̱a̱ ikhaa dí marigá dí jmbu narígá dí ra̱májánʼ. 17 Ikha jngóo ni̱thu̱u̱n a̱jkiu̱nʼ: “Dios bi̱ gajkhun gánda̱ʼa̱a̱ cuenta xa̱bu̱ májáanʼ ga̱jma̱a̱ xúʼko̱ má xa̱bu̱ ra̱májáanʼ, numuu dí rígá mbá tiempo dí maguma mámbá ñajunʼ ga̱jma̱a̱ rígá mbá tiempo dí maguma rí ndayóoʼ maguma”.

18 Ma̱ngaa ni̱thu̱u̱n a̱jkiu̱nʼ rí Dios bi̱ gajkhun maniñúúnʼ e̱jñu̱ún xa̱bu̱ numbaaʼ dí muraʼníí ga̱ʼkhu̱ mu xúʼko̱ makujmaa xóo nindxu̱ún ga̱jma̱a̱ masngájmúún rí nindxu̱ún xóo xujkhúʼ, 19 numuu dí naguáʼníí xa̱bu̱ numbaaʼ ikháá má eguáʼníí xujkhúʼ ma̱ngaa. Xúgíinʼ ikhiin mbóó má náa egúun. Xó má ekáñuu mbáa xúʼko̱ má ekáñuu i̱mba̱a̱, mbá xúgíinʼ ikhiin mbrígúú xóo eya̱ xi̱ʼ.* Ikha jngóo xa̱biya̱ na̱nguá gíʼdoo itháan numuu ki xóo xujkhúʼ, numuu dí xúgíʼ nindxu̱u̱ ndíí. 20 Mbóó má náa egúun mbá xúgíinʼ. Xúgíinʼ naguwáʼ náa yujndaʼ ga̱jma̱a̱ xúgíinʼ nagúun náa yujndaʼ. 21 Tsiánguá á mu dí xi̱ʼ ndrígu̱ún xa̱bu̱ numbaaʼ natsima̱a̱ rijma̱a̱, ga̱jma̱a̱ á mu xi̱ʼ ndrígu̱ún xujkhúʼ nagajta̱a̱ mbayííʼ náa ku̱ba̱ʼ. 22 Nijkhánú ndi̱yo̱o̱ rí nda̱a̱ nimbá rí itháan májánʼ rí xa̱bu̱ maʼni ki xóo rí maxtáa gagi ga̱jma̱a̱ numuu ñajunʼ rí naʼni, numuu dí rúʼko̱ nindxu̱u̱ rí nadaaʼ. Numuu dí, tsáá lá gándoo maʼniuu mbaʼyoo dí gárigá nda̱wa̱á índo̱ ikhaa ni ndáwa̱a̱ xá.

4 Mbu̱júu̱ má niʼgíʼ ndi̱yo̱o̱ xú káʼnii xa̱bu̱ kúwá runi̱ ngíníi eʼwíinʼ asndu náá. Ndi̱yo̱o̱ xóo numbi̱ya̱ʼ bi̱ numíniiʼ ga̱jma̱a̱ ndawa̱a̱ nimbáa tsáa maʼni̱i̱ a̱jkiu̱ún. Bi̱ nuni̱ ngíníi guáʼdáá tsiaki̱i̱ ga̱jma̱a̱ ndawa̱a̱ tsáa maʼni̱i̱ a̱jkiu̱ún. 2 Ikha jngóo, nindxa̱ʼwa̱mínáʼ dí itháan má májánʼ dí makhañáaʼ ki xóo maraxtaa. 3 Ga̱jma̱a̱ itháan má májánʼ dí xágumáán ki xóo dí maraxtaa ga̱jma̱a̱ dí makhañáaʼ, numuu rí bi̱ xóó tséxtáa táʼyoo ñajunʼ dí naʼni majmáa a̱jkiu̱ún xa̱bu̱ numbaaʼ dí naguma náa tsu̱du̱u̱ ku̱ba̱ʼ.*

4 Ni̱jkhánú ndi̱yo̱o̱ ñajunʼ gakhi̱i̱ ga̱jma̱a̱ ñajunʼ májánʼ rí naʼni dí xa̱bu̱ maxiʼgúun kuyamijná, rúʼko̱ ma̱ngaa nindxu̱u̱ ndíí, nindxu̱u̱ xóo dí maraxkháá giñánʼ.

5 Xa̱bu̱ skágunʼ gíʼ kayaráʼaminaʼ ga̱jma̱a̱ xuyuuʼ na̱jkha̱ randujtsí.*

6 Itháan má májánʼ dí mbi̱ya̱a̱ jxa̱a̱ʼ mbá xngaa* ki xóo matiejunʼ wéñuuʼ,* rúʼko̱ ma̱ngaa nindxu̱u̱ xóo dí maraxkháá giñánʼ.

7 Ndi̱yo̱o̱ i̱mba̱ dí nindxu̱u̱ ndíí náa tsu̱du̱u̱ ku̱ba̱ʼ. 8 Mbáa xa̱bu̱ bi̱ xtáa mbáwíí, ndawa̱a̱ nimbáa tsáa maxtáa ga̱jma̱a̱, maski ajndu na̱nguá gíʼdaa nimbáa a̱ʼdióo ni má a̱ngui̱i̱n, xúgíʼ ñajunʼ gakhi̱i̱ rí naʼni tsértumuu, iduu nditháan tségiʼmuu dí nagua̱ʼa̱ magiʼdoo. Mbáa asndu tsérajximínáʼ: “Tsáá ga̱jma̱a̱ numuu eñajunʼ gakhi̱i̱ wéñuuʼ rá. Ga̱jma̱a̱ tsáá numuu eni̱ dí xágúʼdoo dí májánʼ rá.” Rígi̱ ma̱ngaa nindxu̱u̱ ndíí ga̱jma̱a̱ mbá ñajunʼ dí naʼni majmáa a̱jkia̱a̱nʼ.

9 Itháan má májánʼ dí a̱jmi̱i̱n xa̱bu̱ ki xóo mbáwíí, numuu dí xúʼko̱ nuda̱a̱ itháán mba̱a̱ ga̱jma̱a̱ numuu ñajunʼ gakhi̱i̱ dí nuni̱. 10 Numuu rí á mu mbáa naxpátri̱ga̱a̱, i̱mba̱a̱ ma̱ndoo makujxi̱i̱ ndxájuu. Mú, ndiéjunʼ lá gágíʼnuu bi̱ gáxpátri̱ga̱a̱ á mu ndawa̱a̱ tsáa mambáyúu rá.

11 Ga̱jma̱a̱ á mu mbá nájmi̱i̱n nubúúnʼ mbóó, nutsigamijnáán. Mú, xú káʼnii lá gágiga̱a̱ á mu mbáwíí xá. 12 Ma̱ngaa mbáa bi̱ jngruigo̱o̱ mbáwíí xáʼngo̱o̱ gáʼni gajmíi̱n bi̱ nuni̱ ngínáa, mú mbá nájmi̱i̱n maʼngu̱u̱n muni̱ gajmiún. Ga̱jma̱a̱ mbá ñuñuu dí ajtsú kambróʼoo, xútungaa mbá nacha̱.

13 Itháan má májánʼ mbáa a̱ʼdá ngínáa mú najmañuu, ki xóo mbáa rey nikhi̱i̱ bi̱ ni̱ndxu̱u̱ xa̱bu̱ skágunʼ ga̱jma̱a̱ tséniñaminaʼ magruigú consejo rí nuxnáá. 14 Numuu rí ikhaa* nigájnáa náa guʼwá ejua̱a̱nʼ mu mani̱ndxu̱u̱ rey, maski ajndu ngínáa nixtáa náa naʼtáñajunʼ rey nikhi̱i̱. 15 Nixtáá randxa̱ʼwáminaʼ ga̱jma̱a̱ numún mbá xúgíinʼ bi̱ nduya, bi̱ najngrui̱gu̱u̱n gi̱i̱ ñuʼún náa tsu̱du̱u̱ ku̱ba̱ʼ, ma̱ngaa rí naʼni dxámá bi̱ niriʼkuriya̱a̱ʼ bi̱ nixtáa raʼtáñajunʼ nákha ginii. 16 Maski ajndu ra̱ʼkhá tháán mbaʼin xa̱bu̱ bi̱ numbayíí, mú bi̱ gáguwáʼ nda̱wa̱á xáʼdxúún kuyáá. Rúʼko̱ ma̱ngaa nindxu̱u̱ ndíí, nindxu̱u̱ xóo dí maraxkháá giñánʼ.

5 Atie̱wa̱a̱n dí natani̱ índo̱ na̱dxu̱ʼ náa goʼwóo Dios bi̱ gajkhun, itháan májánʼ dí mi̱dxu̱ʼ ikhí mu matadxawíín ki xóo dí maraxnajxí mbá tsigijñaʼ xóo eni̱ xa̱bu̱ skágunʼ, numuu dí ikhiin tséyáá á mu dí kúwá runi̱ nindxu̱u̱ ra̱májánʼ.

2 Xáʼcháaʼ matambáʼtáá rawaanʼ, ni má xátaniʼñáánʼ dí a̱jkia̱a̱nʼ maʼniaaʼ marata̱ dí asndu xátatsaʼwamínáʼ náa inuu Dios bi̱ gajkhun. Numuu dí Dios bi̱ gajkhun xtáa mekhuíí, mú ikháán xtaa náa tsu̱du̱u̱ ku̱ba̱ʼ. Ikha jngóo xáʼyóoʼ marata̱ wéñuuʼ. 3 Numuu dí maxmiéjuanʼ maʼni dí mi̱nuʼ, ga̱jma̱a̱ mbáa xa̱bu̱ bi̱ naʼthí wéñuuʼ naʼni dí makujmaa xóo xa̱bu̱ skágunʼ. 4 Índo̱ gátaxuʼdaminaʼ mbá dí matani̱ náa Dios, nacha̱ gátanimbaníí, numuu dí ikhaa tsénigu̱u̱ʼ xóo eni̱ xa̱bu̱ skágunʼ. Dí gátaxuʼdaminaʼ matani̱, atanimbaníí. 5 Itháan má májánʼ dí xátaxuʼdaminaʼ matanimbaníí mbá á mu dí xátanimbaníí. 6 Xátaniʼñáánʼ dí rawaanʼ* maʼniaaʼ dí makiéʼkáan ni má xárata̱ náa inuu ángel* dí nijnga̱wa̱a̱n. Náá numuu matani̱ dí makiʼnáa Dios bi̱ gajkhun ga̱jma̱a̱ numuu ajngáa dí gárata, ga̱jma̱a̱ numuu rúʼko̱ gáʼni dí ikhaa maʼni gámbáa ñajunʼ dí nitani̱ ga̱jma̱a̱ ñawáanʼ rá. 7 Numuu dí xó má índo̱ mbáa xa̱bu̱ naxmiéjuunʼ wéñuuʼ, naʼni dí mi̱gu, xúʼko̱ má índo̱ mbáa naʼthí wéñuuʼ nda̱a̱ dí ejmaa rí naʼthí. Mú ikháán gamiñáaʼ xtayáá Dios bi̱ gajkhun.

8 Xáʼniaaʼ tsiánguá índo̱ gáta̱ya̱a̱ dí xa̱bu̱ nuni̱ mumíniiʼ xa̱bu̱ ngíníi, ga̱jma̱a̱ índo̱ gáta̱ya̱a̱ dí xa̱bu̱ nanújngurámúúnʼ xtángoo, tséni̱ dí májánʼ náa ku̱ba̱a̱ʼ. Xa̱bu̱ ñajunʼ buʼko̱ bi̱ nuni̱ dí ra̱májánʼ, kúwá xa̱bu̱ ñajunʼ bi̱ guáʼdáá ñajunʼ mba̱ʼu̱ bi̱ nduyáá dí ikhiin kúwá runi̱, ga̱jma̱a̱ kúwá xa̱bu̱ ñajunʼ bi̱ itháan mba̱ʼu̱u̱n bi̱ nduyáá dí ikhiin kúwá runi̱.

9 Ma̱ngaa mbá xúgíinʼ ikhiin nuruiʼtami̱jna̱a̱ dí najma̱a̱ náa ku̱ba̱ʼ, asndu rey ma̱ngaa na̱ʼkhu̱ dí najma̱a̱ ikhí.

10 Bi̱ ra̱ʼkhá tháán eyoo magiʼdoo mbújkha̱a̱,* xágiʼmuu ga̱jma̱a̱ mbújkho̱o̱, ni má bi̱ ra̱ʼkhá tháán eyoo magiʼdoo, xágiʼmuu ga̱jma̱a̱ dí gáda̱a̱ʼ. Rúʼko̱ ma̱ngaa nindxu̱u̱ ndíí.

11 Índo̱ nda̱joo dí májánʼ, naʼni mbaʼin xa̱bu̱ bi̱ na̱ʼphu. Bi̱ ndrígóo kááʼ ndaʼyoo rí gíʼdoo, mú ndiéjunʼ lá i̱mba̱ gáda̱a̱ʼ xá.

12 Tsímáá eʼgu ñumbáá, tséʼniuu á mu chíʼgíiʼ* o mba̱a̱ e̱ʼkhu̱, mú xa̱bu̱ bi̱ ra̱ʼkhá tháán gíʼdoo tséniñuuʼ mi̱gu tsímáá dí gíʼdoo.

13 Nijkhánú ndi̱yo̱o̱ dí rígá mbá dí ra̱ʼkhá tháán ngíná náa tsu̱du̱u̱ ku̱ba̱ʼ:* Mbáa xa̱bu̱ nagímbóó dí magiʼdoo, mú rúʼko̱ maʼni dí xáxtáa májánʼ. 14 Ikhaa nandatígo̱o̱ mbá xúgíʼ rí gíʼdoo ga̱jma̱a̱ numuu mbá ñajunʼ dí tségájnuu májánʼ, ga̱jma̱a̱ índo̱ nagiʼdaa a̱ʼdióo ikhaa nándáa dí gíʼdoo.

15 Tsaʼtsaaʼ xa̱bu̱ nigájnuu náa xtíjyúu ru̱dúu̱,* ikha jngóo xó má ni̱ʼkha̱ xúʼko̱ má gáʼgáa. Xándoo mayéʼga̱a̱ nimbá ga̱jma̱a̱ numuu ñajunʼ gakhi̱i̱ dí niʼni.

16 Rígi̱ ma̱ngaa nindxu̱u̱ ngíná wéñuuʼ: Xó má ni̱ʼkha̱ xa̱bu̱, xúʼko̱ má gáʼgáa. Ndiéjunʼ gáda̱a̱ʼ bi̱ ra̱ʼkhá tháán gakhi̱i̱ eñajunʼ mu mbayáʼ dí ragíʼdoo numuu dí nindxu̱u̱ xóo na̱jkha̱ raxkoo giñánʼ rá. 17 Ma̱ngaa xúgíʼ mbiʼi nakuiʼtsu ngínúu dí nindxu̱u̱ asndu xóo xtáa náa mikína, najmáa a̱jkiu̱u̱n, naʼniuu nandii ga̱jma̱a̱ nakásngañu̱u̱ʼ.

18 Rígi̱ dí nijkhánú ndi̱yo̱o̱ dí nindxu̱u̱ máján’: Dí mbáa xa̱bu̱ makuiʼtsu, maga̱a̱n, ma̱ngaa dí maxtáa gagi ga̱jma̱a̱ numuu ñajunʼ gakhi̱i̱ dí naʼni náa tsu̱du̱u̱ ku̱ba̱ʼ náa kááʼ nguáthá mbiʼi dí Dios bi̱ gajkhun nixnúu maxtáa, rúʼko̱ nindxu̱u̱ dí ikhaa nada̱a̱ʼ. 19 Ma̱ngaa índo̱ Dios bi̱ gajkhun naʼni dí mbáa xa̱bu̱ magiʼdoo ga̱jma̱a̱ dí ma̱ndoo maʼdxuu ga̱jma̱a̱ numuu rúʼko̱, ikhaa gíʼmaa magruigú rígi̱ xóo dí mada̱a̱ʼ, ma̱ngaa dí maxtáa gagi ga̱jma̱a̱ numuu ñajunʼ gakhi̱i̱ dí naʼni. Rúʼko̱ nindxu̱u̱ mbá regalo dí na̱ʼkha̱ náa Dios. 20 Xándxaʼwáminaʼ ga̱jma̱a̱ numuu dí mbá xngaa xtáa, numuu dí Dios bi̱ gajkhun naxnúu dí maʼni maʼdxuu a̱jkiu̱u̱n.

6 Rígá i̱mba̱ dí ngíná rí ndi̱yo̱o̱ náa tsu̱du̱u̱ ku̱ba̱ʼ,* dí naguáʼníí mbaʼin xa̱bu̱: 2 Dios bi̱ gajkhun naxnúu mbáa xa̱bu̱ dí magiʼdoo, ma̱ngaa dí magruigú gamajkhu mu xáʼyóoʼ nimbá rí nagua̱ʼa̱ magiʼdoo, mú Dios bi̱ gajkhun tséxnúu dí ma̱ndoo maxtáa gagi ga̱jma̱a̱ dí gíʼdoo, maski ajndu mbáa xa̱bu̱ na̱ʼkha̱á ma̱ndoo maxtáa gagi ga̱jma̱a̱ rúʼko̱. Rúʼko̱ ma̱ngaa nindxu̱u̱ ndíí ga̱jma̱a̱ ra̱ʼkhá tháán ngíná. 3 Ma̱ndoo dí mbáa xa̱bu̱ mani̱ndxu̱u̱ anu̱ún e̱ji̱n mbá 100 nuthu, maxtáa mba̱yu̱u̱ʼ tsiguʼ asndu maʼga̱nú mikhi̱i̱. Mú á mu na̱nguá xtáa gagi ga̱jma̱a̱ dí májánʼ rí gíʼdoo nákhá xóó tséjkha̱a̱ náa iñá wajinʼ, ikhú ni̱tha̱, itháan májánʼ dí mbáa a̱ʼdá dxáñáʼ nikháñúu má egumaa ki xóo xa̱bu̱ buʼko̱. 4 Numuu rí ndíí má ni̱ʼkha̱ a̱ʼdá dxáñáʼ, kína ni̱jkha̱a̱ ga̱jma̱a̱ dí mikína nirúgoo mbiʼyuu. 5 Nditháan táʼyoo a̱jkha̱ʼ ni má nda̱a̱ rí ndiʼyoo, mú maski ajndu xúʼko̱ itháan má májánʼ ki xóo xa̱bu̱ buʼko̱. 6 Dí gámbáyáaʼ dí maraxtaa a̱jma̱ nuthu dí mil tsiguʼ á mu tsétayáá xú káʼnii dí maraxtaa gagi rá. Lá raʼkháa mbóó má náa egúun mbá xúgíinʼ ráʼ.

7 Mbá xúgíʼ ñajunʼ gakhi̱i̱ dí naʼni mbáa xa̱bu̱, naʼni mu maʼni majthíí jxa̱ʼ awúu̱n, mú maski ajndu xúʼko̱ tségiʼmuu dí nagua̱ʼa̱ mi̱khu̱. 8 Numuu dí, lá xtáa itháan májánʼ xa̱bu̱ bi̱ najmañuu ki xóo xa̱bu̱ skágunʼ ráʼ. O dí lá gámbáyúu mbáa xa̱bu̱ ngínáa rí mbaʼyoo xú káʼnii gáyáʼ rí ndayóoʼ maxtáa ga̱jma̱a̱* rá. 9 Itháan májánʼ dí maraxtaa gagi ga̱jma̱a̱ rí ndaʼyoo idaaʼ ki xóo majngruiga̱a̱ʼ gi̱i̱ ñuʼún ratayáʼ dí xáʼnga̱a̱ʼ gáraʼdáá. Rúʼko̱ ma̱ngaa nindxu̱u̱ ndíí, nindxu̱u̱ xóo dí maraxkháá giñánʼ.

10 Xúgíʼ dí rígá gíʼdoo má mbiʼyuu, ga̱jma̱a̱ nakujmaa má xú kaʼnii nindxu̱u̱ xa̱biya̱, ikhaa xándoo maxmína̱ʼ ga̱jma̱a̱ bi̱ gíʼdoo itháan tsiaki̱i̱ ki xóo ikhaa. 11 Índo̱ itháan eʼthí mbáa xa̱bu̱, itháan nda̱a̱ rí ejmaa dí eʼthí. Ndiéjunʼ lá gáda̱a̱ʼ xa̱bu̱ dí naʼthí wéñuuʼ rá. 12 Tsiánguá ndiéjunʼ dí itháan májánʼ dí ma̱ndoo maʼni mbáa xa̱bu̱, náa kááʼ nguáthá mbiʼi ndíí rí naxtáa dí nanújngoo mbá nacha̱ xóo ndájkua̱ rá. Numuu dí, tsáá gándoo maʼthúu̱n xa̱bu̱ dí gárígá náa tsu̱du̱u̱ ku̱ba̱ʼ índo̱ ikhaa ni ndawa̱a̱ rá.

7 Itháan má májánʼ dí maraʼdáá mbá májánʼ mbiʼyaaʼ, ki xóo mbá májánʼ aceite, ga̱jma̱a̱ itháan májánʼ mbiʼi rí makhañáaʼ ki xóo mbiʼi rí magumáán. 2 Itháan má májánʼ rí mi̱dxu̱ʼ náa guʼwá dí rígá xtambi̱ya̱ʼ ki xóo dí mi̱dxu̱ʼ náa guʼwá dí rígá ndxa̱a̱, numuu rí xúgíinʼ má xa̱bu̱ nakháñún, ikha jngóo bi̱ nduya gíʼmaa dí mundxa̱ʼwa̱míjna̱ ga̱jma̱a̱ numuu rígi̱.* 3 Itháan má májánʼ dí ngíná ki xóo xnduʼwá, numuu rí maraxtaa ngíná naʼni dí mani̱ndxa̱a̱ʼ itháan májáanʼ xa̱bu̱. 4 A̱jkiu̱u̱n xa̱bu̱ bi̱ najmañuu rígá náa guʼwá dí rígá xtambi̱ya̱ʼ, mú a̱jkiu̱u̱n xa̱bu̱ skágunʼ rígá náa guʼwá dí rígá gagi.

5 Itháan má májánʼ dí matadxawíín dí naxpríguáaʼ mbáa xa̱bu̱ bi̱ najmañuu ki xóo rí matadxawíín ajmúú rí nuni̱ xa̱bu̱ skágunʼ. 6 Xóo nundu̱ʼwa̱ xa̱bu̱ skágunʼ nindxu̱u̱ xóo nawáán ekha tsuwanʼ dí jngutáʼa̱ náa agoo daan, rúʼko̱ ma̱ngaa nindxu̱u̱ ndíí. 7 Ga̱jma̱a̱ numuu dí naguma ngínáa mbáa xa̱bu̱ bi̱ najmañuu maʼga̱ kayáa maʼni xóo eʼni mbáa xa̱bu̱ skágunʼ, ga̱jma̱a̱ dí nundrigú regalo xa̱bu̱ naʼni gachúu a̱jkiu̱ún.

8 Itháan májánʼ dí índo̱ naguámbá mbá ki xóo índo̱ nagi̱ʼdu̱u̱. Itháan májánʼ rí maʼngo̱o̱ a̱jkia̱a̱nʼ ki xóo matanimbamínaʼ. 9 Xakiʼnán mbá nacha̱, numuu rí makiʼnáán rígá náa a̱jkiu̱ún xa̱bu̱ skágunʼ.*

10 Xárata: “Náá numuu rí mbiʼi dí nijngoo ninindxu̱u̱ itháan májánʼ ki xóo xúgi̱ rá.” Mbáa xa̱bu̱ bi̱ najmañuu tsérajximínaʼ rígi̱.

11 Índo̱ mbáa bi̱ najmañuu nagruigúu mbá herencia, rúʼko̱ nindxu̱u̱ májánʼ ga̱jma̱a̱ nambáñúún bi̱ nduyáá agiuuʼ a̱jkha̱ʼ.* 12 Numuu rí majmañaaʼ na̱ñe̱wa̱a̱nʼ, xó má mbújkha̱a̱ na̱ñe̱wa̱a̱nʼ. Mú rígi̱ dí nambáyaaʼ ku̱ma̱: Rí najmañuu mbáa xa̱bu̱, nambáyúu maxtáa mba̱yu̱u̱ʼ.

13 Atatsaʼwáminaʼ náa rí niʼniwíi Dios bi̱ gajkhun: Tsáá gándoo gáʼni jmbi̱i̱ dí ikhaa niguningaa xá. 14 Náa mbá mbiʼi májánʼ, ganindxa̱a̱ʼ májáanʼ xa̱bu̱ mangáán, mú náa mbiʼi dí rígá gamiéjunʼ, gármáʼáanʼ a̱jkia̱a̱nʼ dí Dios niniñuuʼ marigá mbiʼi májánʼ ga̱jma̱a̱ mbiʼi dí rígá gamiéjunʼ, mu xúʼko̱ xa̱bu̱ numbaaʼ xáʼngu̱u̱n gákru̱ʼu̱u̱n dí marigá nda̱wa̱á.

15 Náa mbiʼi ndíí rí xtáá, ndi̱yo̱o̱ xúgíʼ dí narígá: Dí nagíʼnuu mbáa xa̱bu̱ májáanʼ, maski ajndu naʼni dí májánʼ, mú tséjyúu má ekháñúu, ga̱jma̱a̱ mbáa xa̱bu̱ ra̱májáanʼ maski ajndu naʼni dí ra̱májánʼ naxtáa mba̱yu̱u̱ʼ.

16 Xátani̱ dí nindxa̱a̱ʼ mbáa xa̱bu̱ bi̱ ra̱ʼkhá tháán májáanʼ, ni má xátani̱ dí ra̱ʼkhá tháán ejmañaaʼ. Ndíjkha rí ikháán má gídxáʼ jcháaʼ rí maʼni matamíniiʼ rá. 17 Xánindxa̱a̱ʼ mbáa xa̱bu̱ ra̱májáanʼ kayuuʼ ni má mbáa xa̱bu̱ skágunʼ. Ndíjkha rí wapháá gákáñáanʼ rá. 18 Itháan májánʼ dí matanimba̱a̱ʼ mbá dí gájuiʼtámaʼáanʼ, mú xánujngurámáanʼ náa imbo̱o̱, numuu rí bi̱ namíñuu kaʼyoo Dios maʼnimbo̱o̱ mbá nájma̱.

19 Rí najmañuu mbáa xa̱bu̱ nagiʼdoo itháan tsiaki̱i̱ ki xóo mbá gu̱wi̱i̱nʼ xa̱bekha xkujiinʼ bi̱ kúwá náa xuajin. 20 Numuu rí náa tsu̱du̱u̱ ku̱ba̱ʼ ndawa̱a̱ nimbáa xa̱bu̱ májáanʼ bi̱ naʼni má xúʼko̱ rí májánʼ, ga̱jma̱a̱ nditháan tséʼni dí ra̱májánʼ.

21 Ma̱ngaa xátagídáʼ edxa̱a̱ʼ mámbá ajngáa dí nuthi xa̱bu̱, á mu natani̱, mbáa asndu matadxawíín dí gaʼthí xa̱bu̱ bi̱ nambáyaaʼ dí matagíʼníí mbá dí ra̱májánʼ.* 22 Numuu rí ikháán má natayáá májánʼ dí náa a̱jkia̱a̱nʼ mbaʼa nuthu nindaaʼ dí maguáʼníí dí ra̱májánʼ eʼwíinʼ.

23 Xúgíʼ rígi̱ ndi̱yo̱o̱ ga̱jma̱a̱ numuu rí najmañuʼ ga̱jma̱a̱ ni̱tha̱: “Mani̱ndxu̱ʼ mbáa xa̱bu̱ bi̱ najmañuu”. Mú táʼngo̱ʼ gáxkamaa. 24 Xa̱bu̱ xáʼngu̱u̱n gákru̱ʼu̱u̱n xúgíʼ, rígá tikhuu dí naʼni itháan gakhi̱i̱ makrua̱ʼa̱a̱ʼ. Tsáá lá gáʼngo̱o̱ gákro̱ʼo̱o̱ xúgíʼ rá. 25 Niʼgíʼ a̱jkiu̱nʼ mba̱yo̱o̱, maniʼnúuʼ ga̱jma̱a̱ mbaʼyáʼ ku̱ma̱, ma̱ngaa náá numuu dí rígá ga̱jma̱a̱ makro̱ʼo̱ʼ dí ra̱májánʼ dí nuni̱ xa̱bu̱ bi̱ tséndxa̱ʼwa̱a̱ májánʼ edxu̱ún ga̱jma̱a̱ mbá xúgíʼ dí ra̱májánʼ dí nuni̱ xa̱bu̱ skágunʼ. 26 Ikhú ni̱jkhánú ndi̱yo̱o̱ rígi̱: Mbáa a̱ʼgu̱ nindxu̱u̱ xóo amaʼ dí nurugui̱i̱n ga̱jma̱a̱ xujkhúʼ, itháan má xkawi̱i̱ʼ* ikhaa ki xóo dí makhañáaʼ, a̱jkiu̱u̱n nindxu̱u̱ xóo amaʼ dí nurugui̱i̱n ga̱jma̱a̱ e̱gi̱ʼ ga̱jma̱a̱ ñawúunʼ nindxu̱u̱ xóo cadenas. Xa̱bu̱ bi̱ naʼni maʼdxuu Dios bi̱ gajkhun maʼngo̱o̱ maʼni kríyaminaʼ náa ikhaa, mú bi̱ naʼni aʼkhá maxtugua̱a̱ gáʼni a̱ʼgu̱.

27 “¡Gu̱ya̱a̱la! Rígi̱ nindxu̱u̱ dí ni̱jkhánú ndi̱yo̱o̱, eʼthí bi̱ nagímbíin xa̱bu̱, ndiʼyáʼ mámbá mámbá mu makro̱ʼo̱ʼ xóo nindxu̱u̱. 28 Dí nixtáá raʼyáʼ táxkamaa. Náa majñu̱únʼ bi̱ mbá mil xa̱bu̱, nixkamaa kááʼ mbáwíí xa̱biya̱,* mú táxkamaa nimbáa a̱ʼgu̱. 29 I̱ndó rígi̱ dí ni̱jkhánú ndi̱yo̱o̱: Rí Dios bi̱ gajkhun míjíinʼ xa̱bu̱ niʼnii, mú ikhiin nini̱ xó má mbaʼa awan dí nirawíi”.

8 Tsáá i̱mba̱a̱ nindxu̱u̱ xóo bi̱ najmañuu rá. Tsáá i̱mba̱a̱ eʼninuuʼ xóo mambanúu mbá xkujndu rá. Mbáa xa̱bu̱ bi̱ najmañuu naxpíbínʼ inuu ga̱jma̱a̱ xóo mijkoo inuu naʼni̱i̱ xnduʼwá.

2 Ikhúún ni̱tha̱: “Atatsimba̱a̱ʼ dí naʼthí maguma rey, numuu dí niraxná ajngáaʼ náa Dios. 3 Xátsíngua̱a̱ʼ náa inuu. Xátambáyíí dí ra̱májánʼ, numuu dí ikhaa ma̱ndoo maʼni asndu ndiéjunʼ má eyoo, 4 numuu dí ajngóo rey ndayóoʼ dí mambanúu tsiaki̱i̱. Nimbáa xándoo matsíjmaa índo̱ gárajxu̱u̱ ‹Ndiéjunʼ xtaa ratani̱ rá.›”

5 Bi̱ gáʼnimbo̱o̱ xtángoo xámínúu ga̱jma̱a̱ numuu nimbá, ga̱jma̱a̱ a̱jkiu̱u̱n bi̱ najmañuu mbaʼyoo náá tiempo ga̱jma̱a̱ xóo gíʼmaa maguma. 6 Rígá mbá tiempo ga̱jma̱a̱ xóo gíʼmaa mambanúu mámbá xkujndu, numuu dí xkujndu ndrígu̱ún xa̱bu̱ ra̱ʼkhá tháán mbaʼa. 7 Nimbáa tséʼyoo ndiéjunʼ gárígá, tsáá gándoo maʼthí xú kaʼnii gárígá á mu tséʼyoo rá.

8 Xó má nimbáa xa̱bu̱ numbaaʼ xáʼngo̱o̱ gáʼtáñajuunʼ xi̱ʼ* ni má xáʼngo̱o̱ gárikoo, xúʼko̱ má nimbáa ragíʼdoo tsiaki̱i̱ marikhoo mbiʼi dí makhañúu. Xó má mbáa soldado xándoo maʼga̱a̱ índo̱ xtáa raxmína̱ʼ, xúʼko̱ má dí ra̱májánʼ xániñúún magáñún xa̱bu̱ bi̱ nuni̱* dí ra̱májánʼ.

9 Ndi̱yo̱o̱ mbá xúgíʼ rúʼko̱ ga̱jma̱a̱ nindxa̱ʼwa̱mínáʼ náa mbá xúgíʼ ñajunʼ dí naguma náa tsu̱du̱u̱ ku̱ba̱ʼ,* náa mbá xúgíʼ tiempo dí xa̱bu̱ numbaaʼ nutañajúúnʼ xa̱bu̱ numbaaʼ gajmiún ga̱jma̱a̱ rígi̱ naʼni dí mumíniiʼ. 10 Ga̱jma̱a̱ ndi̱yo̱o̱ xóo nijuiʼdi̱ín bi̱ ra̱míjíinʼ bi̱ naguʼwún natu̱ʼu̱u̱n náa dí mikaʼwu ga̱jma̱a̱ nagájnaán ikhí, mú xa̱bu̱ bi̱ kúwá náa xuajin dí ikhiin nini̱ dí ra̱májánʼ mbá nacha̱ nimbumún kuñún. Rúʼko̱ ma̱ngaa nindxu̱u̱ ndíí.

11 Numuu dí tséguma mbá nacha̱ rí nijuiʼthá magíʼnuu mbáa ga̱jma̱a̱ numuu dí ra̱májánʼ niʼni, ikha jngóo a̱jkiu̱ún xa̱bu̱ naʼni gújkhúʼ ga̱jma̱a̱ naxkajxi̱i̱n muni̱ itháan dí ra̱májánʼ. 12 Maski ajndu mbáa xa̱bu̱ aʼkhá naʼni dí ra̱májánʼ mbá 100 nuthu, mú xtáa mba̱yu̱u̱ʼ, nda̱yo̱o̱ dí xa̱bu̱ bi̱ namíñúún kuyáá Dios bi̱ gajkhun makuwá májánʼ, numuu dí namíñúún kuyáá. 13 Mú xa̱bu̱ ra̱májáanʼ xáʼga̱nú magruigúu dí májánʼ ni má xáʼngo̱o̱ maʼni dí maxtáa mba̱yu̱u̱ʼ, nindxu̱u̱ xóo mbá ndájkua̱ numuu rí tsémíñúu kaʼyoo Dios.

14 Náa tsu̱du̱u̱ ku̱ba̱ʼ narígá dí tséjmaa: Kúwá xa̱bu̱ míjíinʼ bi̱ nuniu̱u̱n asndu xóo nini̱ dí ra̱májánʼ ga̱jma̱a̱ kúwá xa̱bu̱ ra̱míjíinʼ bi̱ nuniu̱u̱n asndu xóo nini̱ rí májánʼ. Ikhúún na̱tha̱ dí rúʼko̱ ma̱ngaa nindxu̱u̱ ndíí.

15 Ni̱tha̱ rí májánʼ dí maraxtaa gagi, numuu rí náa tsu̱du̱u̱ ku̱ba̱ʼ nda̱a̱ dí itháan májánʼ dí ma̱ndoo maʼni xa̱bu̱ ki xóo dí makuiʼtsu, maga̱a̱n ga̱jma̱a̱ maʼdxuu, rígi̱ gíʼmaa maʼni índo̱ ikhaa xtáa rañejunʼ gakhi̱i̱ náa mbá xúgíʼ mbiʼi rí Dios bi̱ gajkhun nixnúu maxtáa náa tsu̱du̱u̱ ku̱ba̱ʼ.

16 Niraʼwi̱i̱ mbaʼyáʼ majmañuʼ itháan ga̱jma̱a̱ mba̱yo̱o̱ mbá xúgíʼ ñajunʼ dí naguma náa tsu̱du̱u̱ ku̱ba̱ʼ, asndu nirígá mbiʼi ga̱jma̱a̱ mbruʼun dí na̱nguá nigú.* 17 Ikhú nindxa̱ʼwa̱mínáʼ náa mbá xúgíʼ rí Dios bi̱ gajkhun niʼni, ga̱jma̱a̱ nijkhánú ndi̱yo̱o̱ dí xa̱bu̱ numbaaʼ xáʼngu̱u̱n gákru̱ʼu̱u̱n dí narígá náa tsu̱du̱u̱ ku̱ba̱ʼ. Maski ajndu mbáa xa̱bu̱ maʼniminaʼ mbaʼyoo, mú nditháan xákro̱ʼo̱o̱. Maski ajndu naku̱mu̱ún dí najmañún mu mbuyáá, mú xákru̱ʼu̱u̱n.

9 Ikha jngóo nindxa̱ʼwa̱mínáʼ tsu̱ma̱á ga̱jma̱a̱ numuu mbá xúgíʼ rúʼko̱, ga̱jma̱a̱ rígi̱ dí nijkhánú ndi̱yo̱o̱: Dí xa̱bu̱ májáanʼ ga̱jma̱a̱ xa̱bu̱ najmañuu, xó má ñajunʼ rí nuni̱ rígá náa ñawúunʼ Dios bi̱ gajkhun. Nda̱a̱ rí eyáá xa̱bu̱ ga̱jma̱a̱ numuu xóo nindúún kuyamijná ni má ga̱jma̱a̱ numuu xóo táʼndún kuyamijná dí nirígá nákha ikhiin xóó ndawi̱i̱n. 2 Xúgíinʼ mbóó má náa egúun: Xa̱bu̱ jmbii ga̱jma̱a̱ xa̱bu̱ ra̱májáanʼ, bi̱ májáanʼ, bi̱ kaʼwii ga̱jma̱a̱ bi̱ na̱nguá kaʼwii, bi̱ nuxnajxi̱ tsigijñaʼ ga̱jma̱a̱ bi̱ tséxnajxi̱ tsigijñaʼ. Xa̱bu̱ májáanʼ nindxu̱u̱ ikháá má xóo bi̱ nakudaminaʼ aʼkhá, bi̱ tséndxa̱ʼóo edxu̱u̱ índo̱ naxná ajngóo nindxu̱u̱ ikháá má xóo bi̱ naʼni tsu̱ma̱á índo̱ naxná ajngóo. 3 Rígi̱ dí ra̱ʼkhá tháán ngíná dí narígá náa tsu̱du̱u̱ ku̱ba̱ʼ:* Numuu dí mbóó má náa egúun xúgíinʼ, ikha jngóo náa a̱jkiu̱ún xa̱bu̱ numbaaʼ kajnííʼ dí ra̱májánʼ ga̱jma̱a̱ náa xúgíʼ mbiʼi dí nakúwá nundxa̱ʼwa̱míjna̱ xóo xa̱bu̱ skágunʼ, ikhú... ¡nakháñún!

4 Asndu tsáa bi̱ xtáa náa majñu̱únʼ bi̱ nduya, rígá mbá dí gíʼthu̱u̱n, numuu dí itháan májánʼ dí mbáa xu̱wánʼ ndaʼya ki xóo mbáa león bi̱ nikháñúu. 5 Numuu rí bi̱ nduya, nduyáá rí makhañún, mú bi̱ nikháñún nda̱a̱ kayuuʼ rí eyáá ni má na̱nguá edaaʼ, numuu dí xa̱bu̱ nánguá ermáʼáan a̱jkiu̱ún eni̱, nimbumún kuñún. 6 Ma̱ngaa nindátíga̱a̱ dí nandún kuñún eʼwíinʼ, dí tsíñún gúñún ga̱jma̱a̱ dí naxígu̱u̱n, nánguá eyambáá náa nimbá dí naguma náa tsu̱du̱u̱ ku̱ba̱ʼ.

7 Ayuʼ ga̱jma̱a̱ atsu ganitsu ndrígáaʼ ga̱jma̱a̱ gagi, nadxuu a̱jkia̱a̱nʼ gígíin vino ndrígáaʼ, numuu rí Dios bi̱ gajkhun nadxuu má ga̱jma̱a̱ numuu ñajunʼ dí natani̱. 8 Miʼxá má xúʼko̱ xtíñaaʼ gáʼni,* ga̱jma̱a̱ xátatsíʼñááʼ raraxnáá aceite edxa̱a̱ʼ. 9 Araxtaa gagi ga̱jma̱a̱ʼ a̱ʼgia̱a̱ʼ bi̱ ra̱ʼkhá tháán eyaaʼ xtayáá náa mbá xúgíʼ mbiʼi rí Dios nixnáaʼ náa tsu̱du̱u̱ ku̱ba̱ʼ, náa mbá xúgíʼ mbiʼi ndíí rí xtaa. Numuu dí rúʼko̱ dí nakhánáaʼ ga̱jma̱a̱ numuu ñajunʼ gakhi̱i̱ rí natani̱ náa tsu̱du̱u̱ ku̱ba̱ʼ. 10 Xúgíʼ dí gándoo matani̱ ga̱jma̱a̱ ñawáanʼ, atani̱ ga̱jma̱a̱ xúgíʼ tsiaki̱i̱ ndrígáaʼ, numuu rí nda̱a̱ ñajunʼ, nda̱a̱ awan, nda̱a̱ ku̱ma̱, ni má nda̱a̱ dí majmañaaʼ náa Iñá wajinʼ* náa rí nadxu̱u̱ʼ.

11 Rígá i̱mba̱ rí ndi̱yo̱o̱ náa tsu̱du̱u̱ ku̱ba̱ʼ: Bi̱ nagáñún nacha̱ nguáná tséʼngu̱u̱n náa nagáñún, ma̱ngaa bi̱ guáʼdáá tsiaki̱i̱ nguáná tséʼngu̱u̱n náa nuxmijná, xa̱bu̱ bi̱ najmañún nguáná raguáʼdáá ganitsu, bi̱ lístíin nguáná raguáʼdáá mbújkha̱a̱, nguáná tségájnuu májánʼ dí nuni̱ bi̱ guáʼdáá ku̱ma̱, numuu rí mbá xúgíinʼ nugíʼníí mbá dí tséguáʼthi̱i̱n, náa mbá mbiʼi dí tséguáʼthi̱i̱n. 12 Numuu rí xa̱bu̱ tséʼyoo nguáná gátumuu mbiʼyuu.* Xó má e̱gi̱ʼ naxtugui̱i̱n ga̱jma̱a̱ amaʼ, ma̱ngaa xó má ñu̱ʼu̱ naxtugui̱i̱n ga̱jma̱a̱ tsáʼkhá, e̱jñu̱ún xa̱bu̱ numbaaʼ naxtugui̱i̱n náa mbá gamiéjunʼ índo̱ nda̱a̱ tsu̱ma̱ e̱ʼkha̱nú.

13 Ma̱ngaa ndi̱yo̱o̱ náa tsu̱du̱u̱ ku̱ba̱ʼ mbá xkri̱da dí naʼngo̱o̱ naʼni rí najmañaaʼ, dí niʼni maguánúʼ tsiánguá. 14 Rígá mbá xuajin chíʼgíiʼ* náa kááʼ nguáthi̱ín xa̱bu̱ kúwá. Ga̱jma̱a̱ mbáa rey bi̱ gíʼdoo tsiaki̱i̱ ni̱jkha̱ mu maxmína̱ʼ náa xuajin rúʼko̱, nikujxi̱ mbá xtájtsí mitsídánʼ mu maruguamaʼáan ga̱jma̱a̱. 15 Ikhí xtáa mbáa xa̱bu̱ ngínáa mú najmañuu, ikhaa niʼni kríya̱a̱ʼ xuajin ga̱jma̱a̱ numuu rí najmañuu. Mú nda̱wa̱á nimbáa tármáʼáan a̱jkiu̱u̱n kaʼyoo xa̱bu̱ ngínáa buʼko̱. 16 Ikhú nitamínáʼ: “Itháan májánʼ dí majmañaaʼ ki xóo maraʼdáá tsiaki̱i̱, maski ajndu xúʼko̱, dí najmañuu xa̱bu̱ ngínáa tsémajkhún ga̱jma̱a̱ tsédxawíín ajngáa dí naʼthí”.

17 Itháan májánʼ dí matadxawíín ajngáa wabaʼ dí naʼthí xa̱bu̱ bi̱ najmañuu, ki xóo matadxawíín dí nandxa̱ʼwá bi̱ naʼtáñajúúnʼ xa̱bu̱ skágunʼ.

18 Dí majmañaaʼ nindxu̱u̱ itháan májánʼ ki xóo ajua̱nʼ dí nuxmijná ga̱jma̱a̱, mú kááʼ mbáwíí xa̱bu̱ aʼkhá ma̱ndoo maʼni gámbóo mbaʼa dí májánʼ.

10 Xó má ñu̱ju̱n bi̱ nikháñún naʼni rí aceite dí ndataun maʼchúu ga̱jma̱a̱ maʼni ndajtsún, ga̱jma̱a̱ xúʼko̱ má kayuuʼ mbá chíʼgíiʼ* dí skágunʼ maʼni gachúu mbiʼyuu mbáa bi̱ najmaʼniiʼ rí najmañuu ga̱jma̱a̱ rí nduyamajkuíí.

2 A̱jkiu̱u̱n xa̱bu̱ bi̱ najmañuu na̱jkha̱ kayáa náa kamba̱a̱ rí gíʼmaa* maʼga̱, mú a̱jkiu̱u̱n xa̱bu̱ bi̱ skágunʼ na̱jkha̱ kayáa náa kamba̱a̱ dí ragíʼmaa* maʼga̱. 3 Tséʼniuu má náá kamba̱a̱ gájngruigo̱o̱, xa̱bu̱ skágunʼ tséndxa̱ʼóo májánʼ edxu̱u̱,* ga̱jma̱a̱ naʼni rí xúgíinʼ mbuyáá dí nindxu̱u̱ mbáa skágunʼ.

4 Á mu mbáa xa̱bu̱ ñajunʼ nakásngañu̱u̱ʼ* kaʼyaaʼ, xátatsiʼñááʼ náa xtaa, numuu rí xákásngañaaʼ ma̱ndoo maʼni rí xáʼni mba̱a̱ aʼkhá.

5 Rígá mbá dí ngíná dí ndi̱yo̱o̱ náa tsu̱du̱u̱ ku̱ba̱ʼ,* dí raʼkhí dí nuni̱ bi̱ guáʼdáá mbá ñajunʼ. 6 Bi̱ skágunʼ nuxnún ñajunʼ dí itháán mba̱ʼu̱ muni̱, mú xa̱bu̱ bi̱ najmiin* nuni̱ ñajunʼ, ikhiin guáʼdáá má xúʼko̱ ñajunʼ dí rambáʼu.

7 Ndi̱ñu̱u̱n ñumbáá dí kudrámiún wáyú, mú príncipe nagún ga̱jma̱a̱ rajkúún xóo egún ñumbáá.

8 Bi̱ naʼni mbá iñáʼ, gamíi maxpátuaʼáan ikhí ga̱jma̱a̱ bi̱ naʼni mbá iñúuʼ xtájtsí gamíi mikhu̱u̱ a̱bu̱nʼ ikhí.

9 Bi̱ naguwíi itsí gamíi maʼni gawúminaʼ ga̱jma̱a̱ bi̱ nakuíʼthá ixi̱ gamíi maʼni gawúminaʼ.*

10 Á mu hacha nánguá xíníʼ ga̱jma̱a̱ ndawa̱a̱ tsáa eʼnu̱u̱, mbaʼyóoʼ matani̱ tsiakimínáʼ. Mú rí majmañaaʼ mambáyáaʼ mu magajnúu májánʼ rí gátani̱.

11 Á mu dí a̱bu̱nʼ naʼkhu̱u̱ wapháá xa̱bu̱ bi̱ naʼtsiaanʼ, nda̱a̱ má rí ejmaa dí najmañuu xa̱bu̱ bi̱ naʼtsiaanʼ.

12 Rí naʼthí xa̱bu̱ bi̱ najmañuu, naʼni rí maʼdxuu a̱jkiu̱ún kuyáá, mú rí nuthi xa̱bu̱ skágunʼ naʼni rí muguáʼdáá gamiéjunʼ: 13 Timbá ajngáa rí nagájnuu náa rawúúnʼ nindxu̱u̱ skágunʼ ga̱jma̱a̱ xúʼko̱ má iwáá ma̱ngaa, ga̱jma̱a̱ na̱ʼkha̱ kagu̱u̱ gamiéjunʼ. 14 Maski ajndu xúʼko̱, xa̱bu̱ skágunʼ tséniñuuʼ raʼthí.

Xa̱bu̱ tséʼyoo ndiéjunʼ gárígá, tsáá lá ma̱ndoo maʼthúu̱n ndiéjunʼ gárígá índo̱ ikhaa ndáwáa xá.

15 Ñajunʼ gakhi̱i̱ rí naʼni bi̱ tséndxa̱ʼóo edxu̱u̱ naʼni rí maʼni néʼngo̱o̱, numuu rí asndu tséʼyoo xóo maʼga̱nú náa mbá xuajin.

16 ¡Phú ngíná kúwá xa̱bu̱ xuajin índo̱ rey ndrígu̱ún nindxu̱u̱ mbáa dxámá ga̱jma̱a̱ príncipe ndrígu̱ún nugíʼdi̱i̱ nuni̱ ndxa̱a̱ asndu nákha miʼcha̱! 17 ¡Ra̱ʼkhá tháán gagi kúwá xa̱bu̱ xuajin índo̱ rey ndrígu̱ún nindxu̱u̱ a̱ʼdióo xa̱bu̱ bi̱ gíʼdoo mbá ñajunʼ mba̱a̱ ga̱jma̱a̱ príncipe ndrígóo nuphiʼtsu náa hora dí kaʼyoo mu muda̱a̱ tsiaki̱i̱, raʼkháa dí majngi̱i̱n!

18 Ga̱jma̱a̱ numuu tsiska, ixi̱ mbi̱jua̱ rí jngútámáʼ náa guʼwá najngutígú, ga̱jma̱a̱ numuu rí mbáa nda̱a̱ dí eʼni, ikha jngóo naʼkho̱o̱ʼ guʼwá.

19 Ganitsu naguma májáánʼ mu maʼni rí makuwá gagi, ga̱jma̱a̱ vino mu maʼni rí maʼdxúún, mú mbújkha̱a̱ najmaa mu mi̱ʼtsi̱ xúgíʼ rí ndayóoʼ.

20 Xárata̱ tsríguíi rey ni má xáʼkha̱ náa a̱jkia̱a̱nʼ* dí maratatsríguíi, ga̱jma̱a̱ xárata̱ tsríguíi mbáa xa̱bu̱ bi̱ gíʼdoo índo̱ xtaa mbáwíín náa guʼwáaʼ, numuu rí mbáa ñu̱ʼu̱* ma̱ndoo maʼga̱ kayóo aʼwáaʼ* o mbáa a̱ʼdá ñúʼún ma̱ndoo maʼthí dí niratá.

11 Atrajkuáa* ganitsu ndrígáaʼ náa iyaʼ, ga̱jma̱a̱ índo̱ gánújngoo mbiʼi mataxkama̱a̱ mbu̱júu̱. 2 Araxnún dí xtaʼdáá mbá juwiin o asndu mbá migiñiiʼ, numuu dí tsétayáá xú kaʼnii gamiéjunʼ gárígá náa tsu̱du̱u̱ ku̱ba̱ʼ.

3 Á mu skuniʼ du̱u̱n, maxnúu ruʼwa náa tsu̱du̱u̱ ku̱ba̱ʼ, ga̱jma̱a̱ á mu mbá ixi̱ naxpátri̱ga̱ xígií náa sur o xígií náa norte, náa má gáxpátri̱ga̱ ikhí má gáwanúu.

4 Bi̱ nayejxu̱u̱ giñánʼ xáʼdu, ga̱jma̱a̱ bi̱ nayejxu̱u̱ du̱u̱n nda̱a̱ dí gágujxi̱i̱.

5 Xó má na̱nguá etayáá xi̱ʼ* rí naʼni mba̱ja̱a̱ itsu̱u̱ ada̱ bi̱ kua̱ʼa̱a̱n náa awúu̱n ru̱dúu̱,* xúʼko̱ má na̱nguá etayáá ñajunʼ dí naʼni Dios bi̱ gajkhun, bi̱ naʼni mbá xúgíʼ dí rígá.

6 Atadu tsígáaʼ dí miʼcha̱ ga̱jma̱a̱ xáyáa jxu̱u̱ʼ ñawáanʼ asndu índo̱ gáʼni wakíʼ, numuu dí tsétayáá ndiéjunʼ gágájnuu májánʼ, á mu dí nitadu miʼcha̱ o wakíʼ, o mbá nájma̱ má gágájnuu májánʼ.

7 Aguʼ naʼni dí maʼdxuu a̱jkia̱a̱nʼ, ga̱jma̱a̱ ra̱ʼkhá tháán mitsaanʼ* dí mbáa xa̱bu̱ mbaʼyoo a̱jkha̱ʼ. 8 Á mu mbáa xa̱bu̱ xtáa mba̱yu̱u̱ʼ tsiguʼ, gaʼdxuu náa mbá xúgíʼ mbiʼi rúʼko̱ dí xtáa. Mú garmáʼáan a̱jkiu̱u̱n dí marigá itháan mbiʼi dí maxtáa ngíná, xúgíʼ dí wíji̱ ma̱ʼkha̱ nindxu̱u̱ ndíí.

9 Dxámá, dxáʼgú, araxtaa gagi xúgi̱ dí kaʼníí dxámá, dxáʼgú nindxa̱a̱ʼ, gaʼdxuu a̱jkia̱a̱nʼ. Ayuʼ náa a̱jkia̱a̱nʼ naʼtháanʼ mi̱dxu̱ʼ ga̱jma̱a̱ ayuʼ má náa gáʼga kañáán idaaʼ. Mú nandoʼ ma̱ta̱ya̱a̱ dí Dios bi̱ gajkhun manda̱ʼa̱a̱ʼ cuenta ga̱jma̱a̱ numuu xúgíʼ rúʼko̱. 10 Ikha jngóo atríya̱a̱ʼ náa a̱jkia̱a̱nʼ dí naʼni maxmiéjuanʼ, ga̱jma̱a̱ atani̱ matsíngu̱u̱nʼ náa xuyaaʼ dí naʼni gachúu, numuu dí raʼkháa xúgíʼ tiempo gánindxa̱a̱ʼ dxámá, dxáʼgú, tsiaki̱i̱ rí xtaʼdáá manújngoo.

12 Garmáʼáan a̱jkia̱a̱nʼ eʼni bi̱ phú Mba̱a̱ bi̱ niʼníí, xúgi̱ dí kaʼníí nindxa̱a̱ʼ dxámá, dxáʼgú, nákha xóó tséʼkha̱nú gamiéjunʼ ga̱jma̱a̱ nákha xóó tséʼkha̱nú tsiguʼ dí marata̱: “Nánguá edxuu a̱jkiu̱nʼ maxtáá”. 2 Nákha agiuuʼ a̱jkha̱ʼ, gu̱nʼ ga̱jma̱a̱ a̱ʼgua̱a̱n xóó tséʼni kíníi, ma̱ngaa nákha xóó tséʼkha̱a̱ du̱u̱n mu maxnúu mbu̱júu̱ ruʼwa,* 3 índo̱ bi̱ nuñewa̱a̱n guʼwá maguíʼiin, índo̱ xa̱bu̱ xkujiinʼ ma̱ʼkha̱ ndijtsu̱ún, índo̱ gu̱ʼu̱ muniña̱a̱ʼ runu numuu dí nánguá mbaʼin, ga̱jma̱a̱ índo̱ gu̱ʼu̱ bi̱ nuyejxiri̱ya̱ʼ náa ventana mbuyáá dí mikína, 4 índo̱ xkrugua dí tima náa calle gágúguáa, índo̱ aʼwóo molino wabaʼ gáwán, índo̱ mbáa gájui̱i̱ ga̱jma̱a̱ dí naʼni ajmúú ñu̱ʼu̱, ga̱jma̱a̱ índo̱ mbá xúgíinʼ gu̱ʼu̱ bi̱ nuni̱ ajmúú wabaʼ gáwán aʼwún, 5 índo̱ mbáa gámíñúu gáʼni dí mitsídánʼ ga̱jma̱a̱ marigá gamíi náa calle, índo̱ almendro gájmi̱di̱ riʼyu̱u̱, índo̱ tsíʼbu* gáxmájtaminaʼ ga̱jma̱a̱ índo̱ xndú alcaparra gájmídá, numuu rí xa̱bu̱ najkha̱a̱ goʼwóo náa maxtáa mba̱yu̱u̱ʼ ga̱jma̱a̱ bi̱ kúwá ngíná jngruigu̱u̱n náa calle, 6 nákha xóó tsétu ñuñuu dí plata, nákha xóó tséwiʼthá xua̱a̱ dí oro, nákha xóó tséwiʼthá daan rayaʼ náa mijngii rígá iyaʼ, ga̱jma̱a̱ nákha xóó tséjmigaʼ rueda dí nagájnuu ga̱jma̱a̱ iyaʼ náa puzu. 7 Ikhú yujndaʼ natanga̱a̱ náa ku̱ba̱ʼ, náa má rígá nákha ginii, tsiaki̱i̱ dí naʼni maxtáa natanga̱a̱ náa Dios bi̱ gajkhun bi̱ nixnúu.

8 “¡Rí nda̱a̱ numuu mbá kayuuʼ!, eʼthí bi̱ nagímbíin xa̱bu̱. ¡Xúgíʼ nindxu̱u̱ ndíí!”.

9 Bi̱ nagímbíin xa̱bu̱ raʼkháa i̱ndó najmañuu, ma̱ngaa naʼsngúún xa̱bu̱ xuajin dí najmañuu, nindxa̱ʼwáminaʼ ga̱jma̱a̱ ndiyáʼ mbaʼyoo májánʼ mu magujxi̱i̱ mbaʼa proverbios. 10 Bi̱ nagímbíin xa̱bu̱ nigíminaʼ maxkamaa ajngáa rí mitsaanʼ,* ga̱jma̱a̱ dí maʼnirámáʼ mbájmbu ajngáa dí gajkhun.

11 Ajngáa rí nuthi xa̱bu̱ bi̱ najmañún nindxu̱u̱ xóo ixi̱ kúdú,* ga̱jma̱a̱ ajngáa dí nurajxi̱i̱ nindxu̱u̱ xóo clavo dí juádáʼ jxa̱ʼ, ajngáa dí nuthi ni̱ʼkha̱ náa mbáwíí baxtúu. 12 A̱ʼdióʼ, tsu̱ma̱á gátani̱ ga̱jma̱a̱ i̱mba̱ consejo dí gúxnaaʼ, numuu dí ñajunʼ dí mataniraʼmáʼ mbaʼa libro tsétumuu, ga̱jma̱a̱ asndu tsáá bi̱ i̱ndó rúʼko̱ eʼni, maʼni néʼngo̱o̱.

13 Nda̱wa̱á dí nitadxawíín xúgíʼ dí ni̱tha̱, rígi̱ dí itháan gíʼdoo numuu dí gíʼmaa marmáʼáan a̱jkia̱a̱nʼ: Gamiñáaʼ* xtayáá Dios bi̱ gajkhun ga̱jma̱a̱ atatsimba̱a̱ʼ kiʼtáñajunʼ ndrígóo, numuu dí mbá xúgíʼ rúʼko̱ gíʼmaa maʼni xa̱bu̱. 14 Numuu rí Dios bi̱ gajkhun mandi̱ʼi̱i̱n cuenta xa̱bu̱ ga̱jma̱a̱ numuu xúgíʼ rí nuni̱, ma̱ngaa asndu mbá xúgíʼ dí rígá ngu̱ʼwa̱, mu mbaʼyoo á mu májánʼ o ra̱májánʼ.