EL CANTAR DE LOS CANTARES
1 Ajmúú mitsaanʼ* rí niʼni Salomón.
2 “Nandoʼ rí ikháán miʼtsu rawunʼ.
Ajngáa mitsaanʼ dí narathúnʼ nindxu̱u̱ itháan mitaun ki xóo vino.
3 Ra̱ʼkhá tháán ndataun aceitia̱a̱ʼ,
mbiʼyaaʼ nindxu̱u̱ xóo aceite dí natsuwarígú rí ndataun jxu̱u̱ʼ.
Ikha jngóo wa̱ʼxa̱ʼ* nandún kuyaaʼ.
4 ¡Rey ni̱ʼkha̱ kañún náa goʼwóo!
Ayu̱u̱ʼ jchún,* gugayúlú.
Gakuwáánʼlú gagi mbá nájmáánʼ.
Guʼtámíjná ga̱jma̱a̱ gagi xóo natasngájma rí nandaaʼ xtayoʼ. Guʼthá dí rígi̱ itháán mitaun ki xóo vino.
Tséʼñuxu má tsiánguá dí nandún kuyaaʼ wa̱ʼxa̱ʼ.
5 Wa̱ʼxa̱ʼ bi̱ kuwáanʼ náa Jerusalén, mitsiʼñún maski ajndu skuniúnʼ,
xóo guʼwá xtíin ndrígóo Quedar, xóo xtíin dí katrámúunʼ náa guʼwá xtíin ndrígóo Salomón.
6 Raʼkháa mu skuniúnʼ ikha jngóo ndu̱yo̱ʼ má xúʼko̱,
numuu rí a̱jkha̱ʼ nitsikhún ikha jngóo xígi̱ kaʼniún.
Jiámíi rudúʼ* nikiʼníin kuyoʼ,
niniñu̱ʼ mañewu̱u̱n náa kiʼdu uva,
mú tájmún gáñewu̱u̱n mbayuʼ náa kiʼdu uva ndrígóʼ.
7 Arathúnʼ, ikháán, bi̱ ra̱ʼkhá tháán eyoʼ ka̱yo̱o̱,
náá edxu̱ʼ xtiin mugia̱a̱ʼ muphiʼtsu rá.
Náá edxu̱ʼ xtiin rí mbuya̱a̱ jxu̱ún ta̱pha̱ mbiʼi xá.
Náá numuu rí ikhúún ndayóoʼ mani̱ndxu̱ʼ mbáa a̱ʼgu̱ bi̱ kúgoo inuu ga̱jma̱a̱ mbá xtíin*
náa majñu̱únʼ mugiu̱ún a̱ngia̱a̱nʼ rá.”
8 “Dxáʼgú tsíʼyáa, á mu na̱nguá tayáá,
ayuʼ náa kujmaa nigún mugu̱
ga̱jma̱a̱ ayuʼ xtiin e̱jín tsújtiáanʼ muphiʼtsu náa mijngii tri̱ga̱ guʼwá xtíin ndrígu̱ún baxtúu”.
9 “Ikháán dxáʼgú bi̱ nandoʼ ka̱ya̱a̱ʼ, nda̱yo̱o̱ rí nindxa̱a̱ʼ xóo mbáa yegua náa majñu̱u̱ʼ cárriu̱u̱ faraón.
10 Ra̱ʼkhá tháán mitsaanʼ cháwáaʼ kujmaa ga̱jma̱a̱ xábí,*
mitsaanʼ aphaaʼ kujmaa ga̱jma̱a̱ xábí.
11 Muʼnilú xábiáaʼ dí oro
mudramalu plata ikhí”.
12 “Índo̱ rey gíʼ náa mésóo rí nijndi,
perfumiuʼ* mitsaanʼ ndataun ejkha̱ jxu̱u̱ʼ.
13 Xa̱bu̱ bi̱ nandoʼ ka̱yo̱o̱ nindxu̱u̱ xóo mirra dí ndataun rí gíwánʼ náa mbá búxá,
dí ka̱ʼwa̱n má xúʼko̱ náa majñu̱u̱ʼ cháʼdúʼ kañiiʼ mbruʼun.
14 Bi̱ nandoʼ ka̱yo̱o̱ nindxu̱u̱ xóo mbá xtájxu̱u̱ riʼyu̱u̱ alheña rí ndataun
náa majñu̱u̱ʼ ixi̱ uva dí rígá náa En-Guedí”.
15 “¡Ra̱ʼkhá tháán mitsiʼñán, dxáʼgú bi̱ nandoʼ ka̱yo̱o̱!
¡Phú mitsiʼñán! Idaaʼ nindxu̱u̱ xóo iduu paloma”.
16 “¡Ikháán ma̱ngaa dxámá bi̱ nandoʼ ka̱yo̱o̱, ra̱ʼkhá tháán mitsiʼñán! ¡Ra̱ʼkhá tháán xtiamán!
Ra̱jxa̱ maxaʼ nindxu̱u̱ xiawulú,
17 ixi̱ cedro nindxu̱u̱ xaʼdo̱o̱ guʼwúlú,
ixi̱ enebros nindxu̱u̱ dí jngútámáʼ náa tsu̱du̱u̱.
2 “Nindxu̱ʼ mbá ri̱ʼi̱ azafrán rí wíji̱ náa xkua̱ dí rígá náa rawunʼ iyaʼ,
xóo mbá lirio náa mata”.*
2 Xóo mbá lirio náa majñu̱u̱ʼ tsuwanʼ,
xúʼko̱ nindxu̱u̱ dxáʼgú bi̱ nandoʼ ka̱yo̱o̱ náa majñu̱únʼ wa̱ʼxa̱ʼ”.*
3 “Xóo mbá ixi̱ manzana rí juáʼan náa majñuuʼ ixi̱ dí rígá náa xaxi̱,
xúʼko̱ nindxu̱u̱ dxámá bi̱ nandoʼ ka̱yo̱o̱ náa majñu̱únʼ jiámá.
Rí maxtáá ga̱jmu̱ʼ bi̱ nandoʼ ka̱yo̱o̱
nindxu̱u̱ asndu xóo miʼkhu mbóo xndúu ixi̱ dí ra̱ʼkhá tháán mitaun.
4 Ni̱jkha̱ kañún náa guʼwá dí rígá ndxa̱a̱*
ikhaa nisngájmúún xúgíinʼ rí i̱ndó ikhúún eyoo kaʼyoʼ.
5 Gu̱xnu̱ʼ uva nijndoʼ miʼkhu mu maʼni̱i̱ a̱jkiu̱nʼ,
gu̱xnu̱ʼ manzana mu mba̱ya̱a̱ tsiaki̱i̱,
numuu rí nikáwabúúnʼ dí ra̱ʼkhá tháán eyoʼ ka̱yo̱o̱ dxámá bugi̱.
6 Náa agoo edxu̱ʼ kraʼa ñawún xti̱yu̱u̱ʼ,
ga̱jma̱a̱ ñawún mújúu̱nʼ ndayárúʼúún.
7 Wa̱ʼxa̱ʼ bi̱ kuwáanʼ náa Jerusalén, gu̱xna̱ ajngála
ga̱jma̱a̱ numún gacela* ga̱jma̱a̱ aña̱ʼ bi̱ kúwá xanáá:
Xúxkajxi̱i̱ a̱jkiu̱nʼ maʼndoʼ ka̱yo̱o̱ mbáa bi̱ ikhúún tsénigu̱ʼ eʼni.
8 ¡Nadxawuun aʼwóo bi̱ nandoʼ ka̱yo̱o̱!
¡Gu̱ya̱a̱! A̱ʼkhu̱ e̱ʼkha̱
ratsimuu náa kúbá, asndu nakijxi̱i̱ e̱ʼkha̱ náa inuu bíjní.
9 Dxámá bi̱ nandoʼ ka̱yo̱o̱ nindxu̱u̱ xóo mbáa gacela, xóo mbáa aña̱ʼ bi̱ tsíʼyáa.
A̱ʼkhu̱ wíji̱, náa kidxuuʼ xtájtsí ndrígulú,
ndaʼyaraʼa náa ventana,
nayejxi̱ náa iñúuʼ rí tima.
10 Dxámá bi̱ nandoʼ ka̱yo̱o̱ naʼthúnʼ:
‹Atujxa̱a̱ʼ, dxáʼgú bi̱ nandoʼ ka̱yo̱o̱,
ayi̱ muʼgua dxáʼgú tsíʼyáa.
11 ¡Atayáá! Nijngoo ma rí migúwán.*
Ni̱jkha̱a̱ má ruʼwa, ni xáxnúu.
12 Nijmi̱di má ri̱ʼi̱ xanáá,
ni̱jkha̱nú má mbiʼi rí miʼdari̱gúu̱ inuu ixi̱ uva,
nawáán má eʼni ajmúú gúgu̱ náa mbayulú.
13 Na̱jkha̱ raʼgo̱o̱ má higo náa ixu̱u̱,
ndataun má riʼyu̱u̱ ixi̱ uva rí najmi̱di.
Atujxa̱a̱ʼ ga̱jma̱a̱ ayi̱ dxáʼgú bi̱ nandoʼ ka̱yo̱o̱.
Ayi̱ muʼgua, dxáʼgú tsíʼyáa.
14 Paloma tsiʼyáa, bi̱ xtáa náa tsíñu,
bi̱ xtáa náa iñúuʼ pátsí,
atatsíñúnʼ mba̱ya̱a̱ʼ ga̱jma̱a̱ madxun aʼwáaʼ,
numuu dí ra̱ʼkhá tháán mitsaanʼ* aʼwáaʼ ga̱jma̱a̱ mitsiʼñán›”.
15 “Gurugui̱i̱nla igi̱,
igi̱ majkhiinʼ bi̱ nuni̱ gámbáa ixi̱ uva,
numuu rí ixi̱ uva ndrígulú najmi̱di má riʼyu̱u̱”.
16 “Dxámá bi̱ nandoʼ ka̱yo̱o̱ nindxu̱u̱ ndrígióʼ, ikhúún nindxu̱ʼ ndrígióo ikhaa.
Ikhaa ndaʼñún mugiu̱u̱ náa majñu̱u̱ʼ rígá ri̱ʼi̱ lirio.
17 Nákha xóó tséxnúu giñánʼ rí mbiʼi* ga̱jma̱a̱ nákha xóó rígá ndájkua̱,
dxámá bi̱ nandoʼ ka̱yo̱o̱, gátanga̱án nacha̱,
xóo mbáa gacela o aña̱ʼ bi̱ mitsiʼyáa, bi̱ na̱ʼkha̱a̱ ragáyúu náa kúbá rí naʼni makuwáanʼlu wájíʼ.*
3 Índo̱ ka̱bo̱ʼ náa xiawuʼ rí mbruʼun,
nirmáʼáan a̱jkiu̱nʼ eʼni xa̱bu̱ bi̱ nandoʼ ka̱yo̱o̱.
Ndiʼyáaʼ mú na̱nguá nixka̱ma̱a̱.
2 Magújxu̱ mu maʼgá náa mbájndi xuajin,
náa kamba̱a̱ ga̱jma̱a̱ náa xuáá,
guniʼñúʼ mbaʼyáaʼ xa̱bu̱ bi̱ nandoʼ ka̱yo̱o̱.
Ndiʼyáaʼ mú na̱nguá nixka̱ma̱a̱.
3 Bi̱ nuyejngoo náa mbájndi xuajin ndiyoʼ.
Ikhú nirajxu̱u̱n: ‹Lá ndiya̱a̱ xa̱bu̱ bi̱ nandoʼ ka̱yo̱o̱ ráʼ.›
4 Asndu xóó tséjkháaʼ chíʼmbaʼ,
índo̱ nixka̱ma̱a̱ bi̱ nandoʼ ka̱yo̱o̱.
Ikhú nigutúwíin ga̱jma̱a̱ tániʼñúunʼ
asndu ni̱jkhá ka̱ya̱a̱ náa goʼwóo ru̱dúʼ,*
náa cuarto rí niʼniún ru̱dúʼ.
5 Wa̱ʼxa̱ʼ* bi̱ kuwáanʼ náa Jerusalén, gu̱xna̱ ajngála
ga̱jma̱a̱ numún gacela* ga̱jma̱a̱ aña̱ʼ bi̱ kúwá xanáá:
Xúxkajxi̱i̱ a̱jkiu̱nʼ maʼndoʼ ka̱yo̱o̱ mbáa bi̱ ikhúún tsénigu̱ʼ eʼni”.
6 “Ndiéjunʼ nindxu̱u̱ dí na̱ʼkha̱ náa ku̱ba̱ʼ mijxooʼ* rí nindxu̱u̱ xóo gúni,
rí ndataun mirra ga̱jma̱a̱ olíbano,
ma̱ngaa xúgíʼ e̱jnda̱ʼ rí ndataun ndrígóo mbáa xa̱bu̱ bi̱ nagujua̱ rá.”
7 “¡Guya̱a̱! Nindxu̱u̱ xíliu̱u̱ Salomón dí mitsaanʼ.*
Nurugua̱ma̱ʼa̱a̱n mbá 60 xa̱bu̱ xkujiinʼ,
nindxu̱ún soldados xkujiinʼ ndrígóo Israel,
8 xúgíinʼ ikhiin kuda espada,
xúgíinʼ kijmaratiin mu muxmijná,
mámbáa frájkha espada náa smídúu
mu majmúún muñewa̱a̱n ga̱jma̱a̱ rey rí mbruʼun”.
9 “Nindxu̱u̱ xíliu̱u̱ rey Salomón,
rí niguma ga̱jma̱a̱ ixi̱ dí rígá náa Líbano.
10 Ixu̱u̱ rí naʼni xkamijxoo niguma ga̱jma̱a̱ plata,
náa natájma tsu̱du̱u̱ nindxu̱u̱ oro.
náa nagrigu niguma ga̱jma̱a̱ mugu̱ miʼñuu,
wa̱ʼxa̱ʼ bi̱ kúwá náa Jerusalén
niniratáá ga̱jma̱a̱ xúgíʼ a̱jkiu̱ún”.
11 “Agajnála, wa̱ʼxa̱ʼ bi̱ kuwáanʼ náa Sion,
gu̱ya̱a̱la rey Salomón
ga̱jma̱a̱ corona dí ru̱dúu̱ niʼni ga̱jma̱a̱ ri̱ʼi̱
nákhá mbiʼi rí ninigúnʼ,
mbiʼi rí ikhaa nixtáa gagi”.
4 “¡Ra̱ʼkhá tháán mitsiʼñán, dxáʼgú bi̱ nandoʼ ka̱yo̱o̱!
¡Phú mitsiʼñán!
Idaaʼ nindxu̱u̱ xóo iduu paloma dí nakujmaa náa kidxuuʼ xtíin rí frájkha náa inaaʼ.
Xtátsianʼ nindxu̱u̱ xóo mbaʼin tsujthu̱nʼ
bi̱ naguwáanʼ raguájtaa náa kúbá ndrígóo Galaad.
2 Iñaaʼ nindxu̱u̱ xóo mugu̱ bi̱ ndiʼkhú nijuiʼdu̱u̱n
bi̱ ndiʼkhúú egájni̱ín náa nitsuwiin,
xúgíinʼ niguáʼdiin kuateʼ e̱jñu̱ún,
nimbáa tákháñúu a̱ʼdióo.
3 Rawaanʼ nindxu̱u̱ xóo gúmá dí maña̱ʼ xngeʼdi,
ra̱ʼkhá tháán mitsaanʼ* ajngáaʼ.
Xóo a̱jma̱ xuíʼtóo granada nindxu̱u̱ cháwáaʼ
dí nakujmaa náa kidxuuʼ xtíin rí frájkha náa inaaʼ.
4 Aphaaʼ nindxu̱u̱ xóo torre ndrígóo David,
niguma ga̱jma̱a̱ mbaʼa riyooʼ itsí,
ikhí nijngrigú mbá mil escudo,
xúgíʼ escudo rí nijndi ndrígu̱ún xa̱bu̱ bi̱ guáʼdáá tsiaki̱i̱.
5 Xóo a̱jmi̱i̱n e̱ji̱i̱n gacela* nindxu̱u̱ cháʼdáaʼ,
kuateʼ bi̱ nigiʼdiin mbáa gacela,
bi̱ naphiʼtsu náa majñu̱u̱ʼ ri̱ʼi̱ lirio”.
6 “Nákha xóó tséxnúu giñánʼ rí mbiʼi* ga̱jma̱a̱ nákha xóó rígá ndájkua̱,
maʼgá náa kúbá ndrígóo mirra
ga̱jma̱a̱ náa bíjní ndrígóo olíbano”.
7 “Ra̱ʼkhá tháán mitsiʼñán, dxáʼgú bi̱ nandoʼ ka̱yo̱o̱,
ndaa nimbá dí ra̱májánʼ náa ikháán.
8 Ayi̱ ga̱jma̱á nindxu̱ʼ asndu náa Líbano, dxáʼgú bi̱ mba̱ya̱a̱,
ayi̱ ga̱jma̱á nindxu̱ʼ asndu náa Líbano.
Arajtaa asndu náa kúbá mitsídánʼ ndrígóo Amaná,
asndu náa inuu kúbá Senir, náa inuu kúbá Hermón,
asndu náa kúwá león, ga̱jma̱a̱ asndu náa rí kúwá indiiʼ mixtíin.*
9 Dxáʼgú bi̱ nandoʼ ka̱yo̱o̱, bi̱ mba̱ya̱a̱, nitríya káʼyuʼ a̱jkiu̱nʼ,
kááʼ má nda̱yo̱o̱ idaaʼ, natríyaʼ káʼyuʼ a̱jkiu̱nʼ,
kááʼ i̱ndó mba̱yo̱o̱ xábiáaʼ rí frájkha náa aphaaʼ.
10 ¡Ra̱ʼkhá tháán mitsaanʼ rí natasngájma dí nandaaʼ xtayoʼ, dxáʼgú bi̱ nandoʼ ka̱yo̱o̱, bi̱ mba̱ya̱a̱!
¡Itháan májánʼ nindxu̱u̱ rí natasngájma dí nandaaʼ xtayoʼ ki xóo vino!
¡Itháan ndataun perfumiaaʼ ki xóo aceite rí itháan májánʼ!
11 Dxáʼgú bi̱ mba̱ya̱a̱, náa rawaanʼ, nagájnuu jyááʼ dí rígá náa xtíya.
Nagájnuu yaʼdú ga̱jma̱a̱ jyááʼ náa agoo ra̱jwa̱a̱nʼ,
ga̱jma̱a̱ xóo rí ndataun xtíñaaʼ nindxu̱u̱ xóo rí ndataun Líbano.
12 Ndxájuʼ, dxáʼgú bi̱ mba̱ya̱a̱, nindxu̱u̱ xóo mbá jardín* rí kúgumaʼá,
mbá jardín rí kúgumaʼá, mbá iduu iyaʼ rí kúgoo.
13 Jardín ndrígáaʼ nindxu̱u̱* xóo mbá ku̱ba̱ʼ mitsaanʼ náa rígá wéñuuʼ ixi̱ granada,
ga̱jma̱a̱ xndú ixi̱ rí itháán májánʼ, ma̱ngaa riʼyu̱u̱ alheñas rí ndataun dí rígá mbóó ga̱jma̱a̱ nardo,
14 nardo ga̱jma̱a̱ azafrán, diin rí ndataun ga̱jma̱a̱ canela,
xúgíʼ enii ixi̱ ndrígóo olíbano, ma̱ngaa mirra ga̱jma̱a̱ áloes,*
xúʼko̱ má mbóó ga̱jma̱a̱ perfume rí ndataun.
15 Ikháán nindxa̱a̱ʼ mbá iduu iya’ dí rígá náa jardín,
mbá puzu náa rígá iyaʼ miʼtsí, ga̱jma̱a̱ iyaʼ mata rí nagajtaa asndu náa Líbano.
16 Gaxnúu giñánʼ rí na̱ʼkha̱ norte,
gaxnúu giñánʼ rí na̱ʼkha̱ sur.
Xáxnúu gakhi̱i̱ wéñuuʼ* náa jardín ndrígóʼ
mu xúʼko̱ maʼga̱ jxu̱u̱ʼ rí ndataun”.
“Dxámá bi̱ nandoʼ ka̱yo̱o̱ gato̱ʼo̱o̱ náa jardín ndrígóo
ga̱jma̱a̱ gi̱khu̱ xndúu ixi̱ rí itháán májánʼ”.
5 “Nito̱ʼo̱ʼ náa jardín* ndrígóʼ,
dxáʼgú bi̱ nandoʼ ka̱yo̱o̱, bi̱ mba̱ya̱a̱.
Nigujxíi mirra ga̱jma̱a̱ bálsamo* ndrígóʼ.
Nikhu xtíya ga̱jma̱a̱ jyááʼ rí gúʼdoo.
Niga̱nʼ vino ga̱jma̱a̱ yaʼdú ndrígóʼ”.
“¡Ikháanʼla bi̱ nandala kuyamijná, gupiʼtsula!
¡Gusngajmá rí nandala kuyamijná, ganindxu̱u̱ xóo muwa̱a̱nla vino asndu majngáanʼ!”.
2 “Ikhúún nagú, mú a̱jkiu̱nʼ tséʼgu.
¡Nidxawuun rí nandxaʼwóʼ dxámá bi̱ nandoʼ ka̱yo̱o̱!
‹¡Atarmbáʼtáá mato̱ʼo̱ʼ, dxáʼgú bi̱ nandoʼ ka̱yo̱o̱, bi̱ mba̱ya̱a̱,
paloma ndrígióʼ bi̱ mitsiʼyáa ga̱jma̱a̱ nda̱a̱ aʼkhúun!
Numuu dí edxu̱ʼ nimajan ga̱jma̱a̱ ya̱jma̱ʼ,
xtátsiunʼ niʼni jmañu̱u̱ʼ rí mbruʼun›.
3 Niríyáʼ má xtíñúʼ.
Lá mbaʼyóoʼ matangu̱ún maʼgíiʼ mbu̱juáaʼ ráʼ.
Nijñáa má rajkúʼ.
Lá mbaʼyóoʼ ma̱ni̱ tsagoo mbu̱júu̱ ráʼ.
4 Dxámá bi̱ nandoʼ ka̱yo̱o̱, niríyaaʼ ñawúunʼ náa iñúuʼ xkrugua
ga̱jma̱a̱ ra̱ʼkhá tháán nikijxi̱i̱ a̱jkiu̱nʼ ga̱jma̱a̱ numuu ikhaa.
5 Nitujxu̱ʼ mu marmbáʼtoo xkrugua mato̱ʼo̱o̱ dxámá bi̱ nandoʼ ka̱yo̱o̱,
ñawúnʼ ga̱jma̱a̱ e̱ji̱i̱n ñawúnʼ nagadírígúu mirra,
mirra dí iyooʼ nagadírígúu
náa ñawúunʼ rí nagúguaa ga̱jma̱a̱.
6 Nirmbáʼtoo mato̱ʼo̱o̱ dxámá bi̱ nandoʼ ka̱yo̱o̱,
mú dxámá bi̱ nandoʼ ka̱yo̱o̱ ni̱jkha̱a̱ má.
Índo̱ ikhaa ni̱jkha̱a̱, asndu nigíʼ makámíndúʼ.
Ndiʼyáaʼ, mú na̱nguá nixkama̱a̱.
nindxa̱ʼo̱o̱, mú na̱nguá niriʼñuʼ.
7 Bi̱ nuyejngoo náa mbájndi xuajin ndiyoʼ.
Nixnuʼ ga̱jma̱a̱ nini̱ gawúnʼ.
Bi̱ nuyejngoo náa xtájtsí nixmatri̱gú xtíin rí kúgoo ga̱jma̱a̱ inuʼ.
8 Wa̱ʼxa̱ʼ* bi̱ kuwáanʼ náa Jerusalén, gu̱xna̱ ajngála:
Á mu nutsijníí dxámá bi̱ nandoʼ ka̱yo̱o̱,
gu̱tha̱a̱nla rí asndu néʼngo̱ʼ numuu dí ra̱ʼkhá tháán eyoʼ ka̱yo̱o̱”.
9 “Xú káʼnii wéñuuʼ nindxu̱u̱ dxámá bi̱ nandaaʼ xtayáá náa eʼwíinʼ rá.
Ikháán dxáʼgú bi̱ ra̱ʼkhá tháán mitsiʼyáa náa eʼwíinʼ gu̱ʼu̱.
Xú káʼnii wéñuuʼ nindxu̱u̱ dxámá bi̱ nandaaʼ xtayáá náa eʼwíinʼ rá.
Rí asndu matani̱ rí muxna ajngúxu̱ʼ xígi̱ kaʼnii rá.”
10 “Dxámá bi̱ nandoʼ ka̱yo̱o̱ ra̱ʼkhá tháán xtiemaa, maña̱jnii,
itháán mitsiʼyáa náa majñu̱únʼ bi̱ diez mil.
11 Edxu̱u̱ nindxu̱u̱ oro, oro dí ra̱ʼkhá tháán májánʼ.
Xtátsiu̱u̱n nindxu̱u̱ xóo inúu palmera* rí naʼba̱a̱n,
ra̱ʼkhá tháán skuniʼ xóo yu̱wa̱ʼ.
12 Iduu nindxu̱u̱ xóo paloma bi̱ gíʼ náa na̱jkha̱ iyaʼ,
nawan ga̱jma̱a̱ yáʼdú,
bi̱ nagrigu náa mijngii ka̱jnu̱ʼ iyaʼ.
13 Cháwúu nindxu̱u̱ xóo mbá jardín náa kiʼdu ináa ndataun,
mbá ru̱tsu̱u̱ ináa rí ndataun.
Rawuunʼ nindxu̱u̱ ri̱ʼi̱ lirio dí nagadírígúu mirra rí iyooʼ.
14 E̱ji̱i̱n ñawúunʼ nindxu̱u̱ oro dí kijma ratháá ga̱jma̱a̱ crisólito.
Awúu̱n nindxu̱u̱ xóo marfil* rí xngiyaʼ rí kaxtájmáá zafiros.
15 Xtiyuu nindxu̱u̱ xóo columna rí niguma ga̱jma̱a̱ mármol rí trámá’ náa tsu̱du̱u̱ oro rí itháán májánʼ.
Xóo kiejxu̱u̱ nindxu̱u̱ xóo Líbano, xóo cedros, ndawa̱a̱ imba̱a̱ xóo ikhaa.
16 Ra̱ʼkhá tháán miʼtsí rawuunʼ,
mitsaanʼ* xóo nindxu̱u̱.
Wa̱ʼxa̱ʼ bi̱ kúwáanʼ náa Jerusalén, xúʼko̱ kaʼnii dxámá bi̱ nandoʼ ka̱yo̱o̱”.
6 “Dxáʼgú bi̱ itháán mitsiʼyáa náa eʼwíinʼ gu̱ʼu̱,
náá ni̱jkha̱ dxámá bi̱ nandaaʼ xtayáá rá.
Xú kaʼnii kamba̱a̱ niguajthun ni̱jkha̱ xá.
Muʼguáxu̱ ga̱jma̱á nindxa̱a̱ʼ mu mbuʼyáaʼ”.
2 “Dxámá bi̱ nandoʼ ka̱yo̱o̱ nigajtaa náa jardín* ndrígóo,
náa rígá iná rí ndataun,
mu mbaʼñúún mugiu̱u̱ náa majñu̱u̱ʼ jardín
ma̱ngaa mu magujxi̱i̱ ri̱ʼi̱ lirio.
3 Dxámá bi̱ nandoʼ ka̱yo̱o̱ nindxu̱u̱ ndrígióʼ,
xúʼko̱ má mangúún, nindxu̱ʼ ndrígióo ikhaa.
Ikhaa ndaʼñún mugiu̱u̱ náa majñu̱u̱ʼ rígá ri̱ʼi̱ lirio”.
4 “Phú mitsiʼñán dxáʼgú bi̱ nandoʼ ka̱ya̱a̱ʼ, nindxa̱a̱ʼ xóo Tirzá,
nindxa̱a̱ʼ xóo Jerusalén mbá xuajin mitsaanʼ,*
nagui̱i̱ xóo nindxa̱a̱ʼ, xóo soldado bi̱ nigimbíin muxmijná.
5 Atatsiñáánʼ ratiejxu̱ʼ,
numuu rí idaaʼ naʼni dí maki̱jxi̱i̱ a̱jkiu̱nʼ.
Tátsia̱a̱nʼ nindxu̱u̱ xóo mbaʼin tsujthuunʼ
bi̱ naguájtha̱án náa kúbá ndrígóo Galaad.
6 Iñaa’ nindxu̱u̱ xóo mugu̱
bi̱ ndiʼkúú egájni̱ín náa nitsuwiin,
xúgíinʼ niguáʼdiin kuateʼ e̱jñu̱ún,
nimbáa tákháñúu a̱ʼdióo.
7 Xóo a̱jma̱ xuíʼtóo granada xúʼko̱ nindxu̱u̱ cháwáaʼ
dí nakujmaa náa kidxuuʼ xtíin dí frájkha náa inaaʼ.
9 Mbáwíí bi̱ nindxu̱u̱ paloma ndrígióʼ, mitsiʼyáa ga̱jma̱a̱ nda̱a̱ aʼkhúun.
Índo̱ wa̱ʼxa̱ʼ nduyáá, nuthi dí májánʼ ga̱jma̱a̱ numuu,
índo̱ nduyáá reina ga̱jma̱a̱ gu̱ʼú ñawinʼ nuxnáá gamajkhu.
10 ‹Tsáá nindxu̱u̱ buʼko̱ bi̱ nambiʼii* xóo índo̱ najtsi rá.
Ra̱ʼkhá tháán mitsiʼyáa xó má índo̱ nagi̱ʼi̱ nijndi gu̱nʼ,
mixngiyaaʼ xóo agiuuʼ a̱jkha̱ʼ,
ra̱ʼkhá tháán nagui̱i̱ xó má soldado bi̱ nagimbíi̱n muxmijná›”.
11 “Nigájtáa náa jardín dí rígá ixi̱ rí najma̱a̱ xndúu
mu mba̱yo̱o̱ á mu nirudíinʼ má ixi̱ náa mata,*
á mu nijmi̱di̱ má riʼyu̱u̱ ixi̱ uva,
ga̱jma̱a̱ á mu nijmi̱di̱ má riʼyu̱u̱ ixi̱ granada.
12 Ga̱jma̱a̱ numuu rí nindoʼ mba̱yo̱o̱ rígi̱,
asndu táyóo xóo nirígá
nijkhánú náa wájun carro ndrígóo rey ga̱jma̱a̱ náa wájun xa̱bi̱i̱”.
13 “¡Aya̱a̱ʼ sulamita, aya̱a̱ʼ!
¡Mbá péñu, atanga̱án
mu ma̱ndoo mbuya̱a̱ʼxu̱!”.
“Náá numuu rí ikháanʼ ndu̱ya̱a̱la sulamita rá.”
“¡Ikhaa nindxu̱u̱ xóo gitsiá ndrígu̱ún a̱jma̱ grupo xa̱bu̱!”.
Mitsaanʼ xtiyaaʼ, nindxu̱u̱ asndu xóo kijmaratáá,
ñajunʼ rí niʼni mbáa xa̱bu̱ bi̱ najmañuu.
2 Xóo mbá xua̱a̱ dijndi nindxu̱u̱ rumia̱a̱ʼ.
Nditháan xámúu vino ikhí.
Xó mbá ru̱tsu̱u̱ trigo kaʼnii awáanʼ
náa mbájndi rígá ri̱ʼi̱ lirio.
3 Xóo a̱jmi̱i̱n e̱ji̱i̱n gacela* nindxu̱u̱ cháʼdáaʼ,
kuateʼ bi̱ nigiʼdiin mbáa gacela.
4 Aphaaʼ nindxu̱u̱ xóo torre rí niguma ga̱jma̱a̱ marfil.*
Idaaʼ nindxu̱u̱ xóo iyaʼ ndrígóo Hesbón
dí rígá mijngii náa xkrugoo Bat-Rabim.
Rakháaʼ nindxu̱u̱ xóo torre dí rígá náa Líbano,
rí naʼni inuu xígií náa Damasco.
5 Ra̱ʼkhá tháán mitsaanʼ edxa̱a̱ʼ asndu xóo kúbá Carmelo kaʼnii,
xtátsianʼ dí xprígú wájííʼ* nindxu̱u̱ xóo mugu̱ miʼñuu.
Ra̱ʼkhá tháán nigu̱u̱ rey xú kaʼnii eʼba̱a̱n tátsiáanʼ eʼni giñánʼ.
6 Dxáʼgú bi̱ nandún kuyáá, ¡Ra̱ʼkhá tháán mitsiʼñán,
itháán mitsiʼñán ikháán ki xóo xúgíʼ dí mitsaanʼ rígá!
7 Mba̱ñi̱i̱nʼ xóo mbá palmera
cháʼdáaʼ nindxu̱u̱ xóo juáyúu dátiles.
8 Ni̱tha̱: ‹Matsimuʼ náa ixi̱ palmera
mu maguájtuun juáyúu náa jngrígú xndúu›.
Cháʼdáaʼ ganindxu̱u̱ xóo juáyúu uva,
xi̱ʼ dí gágájna̱a̱ náa rawaanʼ gánindxu̱u̱ xóo ndataun manzana,
9 ga̱jma̱a̱ rawaanʼ, xóo vino rí itháán májánʼ”.
“Nandoʼ rí dxámá bi̱ nandoʼ ka̱yo̱o̱ manigu̱u̱ʼ índo̱ gágáan,
nandoʼ rí asndu mitaun gagutraʼaa náa rawúúnʼ bi̱ nunuʼ.
10 Dxámá bi̱ nandoʼ ka̱yo̱o̱ nindxu̱u̱ ndrígióʼ,
i̱ndó ikhúún eni̱gu̱u̱ʼ eni̱.
11 Dxámá bi̱ nandoʼ ka̱yo̱o̱, ayi̱,
guʼgualú xanáá,
gaguanúlú náa majñu̱u̱ʼ xtáʼdu̱u̱ iná alheña.
12 Miʼcha̱ gúguajxu̱u̱nʼ muʼgualú náa mbaaʼ dí kiʼdu uva,
mu mbuʼyáá á mu nirudíinʼ má ixi̱ uva,
á mu nijmi̱di̱ má ri̱ʼi̱,
ga̱jma̱a̱ á mu nijmi̱di̱ má riʼyu̱u̱ granada.
Ikhí gásngajmáaʼ rí nandoʼ ka̱ya̱a̱ʼ.
13 Mitsaanʼ ndataun xóo ejkha̱ jxu̱u̱ʼ mandrágoras,
náa riejunlú guáʼdáá xúgíʼ enii xndú rí itháán májánʼ.
Rí xáwíí nigajtaa xúʼko̱ má rí nijndooʼ,
nigújxíi miʼtsu ikháán dxámá bi̱ nandoʼ ka̱yo̱o̱.
8 ¡Xóo ndxájuʼ lá nindxa̱a̱ʼ nu rá,
ga̱jma̱a̱ niraxáaʼ náa cháʼdúu ru̱dúʼ* nu rá!
Mu xúʼko̱ asndu náá má gáyáaʼ miʼkhu rawaanʼ
ga̱jma̱a̱ nimbáa xáwiyu̱u̱ʼ kaʼyoʼ.
2 Ikhúún maxna̱a̱ʼ ikha,
maʼgá ka̱ña̱a̱n náa goʼwóo ru̱dúʼ,
bi̱ mbaʼa rí niʼsngóʼ.
Ma̱xna̱a̱ʼ migi̱i̱n vino rí taun,
ga̱jma̱a̱ iyooʼ granada dí xáwíí nigajtaa.
3 Ñawún xti̱yu̱u̱ʼ matáʼa náa agoo edxu̱ʼ,
ga̱jma̱a̱ ñawún mújúu̱nʼ mbayárúʼúún.
4 Wa̱ʼxa̱ʼ* bi̱ kuwáanʼ náa Jerusalén, gu̱xna̱ ajngála:
Xúxkajxi̱i̱ a̱jkiu̱nʼ maʼndoʼ ka̱yo̱o̱ mbáa bi̱ ikhúún tsénigu̱ʼ eʼni”.
5 “Tsáa nindxu̱u̱ a̱ʼgu̱ bugi̱ bi̱ na̱ʼkha̱ ratsimuu náa ku̱ba̱ʼ mijxooʼ*
bi̱ kajngraʼmáaʼ náa xpajpoo dxámá bi̱ nandoo kaʼyoo rá.”
“Nixkajui̱ín náa agoo ixi̱ manzana.
Náa rudáaʼ nigiʼdán.
Ikhí nixnúu ga̱ʼkhu̱ índo̱ nigiʼdán.
6 Garmáʼáan a̱jkia̱a̱nʼ xta̱yo̱ʼ xóo mbá tsinaʼ dí gíʼma náa a̱jkia̱a̱nʼ
xóo mbá tsinaʼ dí gíʼma náa ñawáanʼ,
índo̱ a̱jmi̱i̱n xa̱bu̱ nandún kuyamijná gíʼdoo tsiaki̱i̱ xó má rí makañulú,
nindxu̱u̱ xó má Iñá wajinʼ* rí gíʼthu̱nlú.
Rí nandulúʼ kuʼyamijná nindxu̱u̱ xóo riʼyu̱u̱ aguʼ, riʼyu̱u̱ agiuʼ Jeobá.*
7 Asndu iyaʼ rí naʼbajxu̱u̱ xáʼngo̱o̱ gáʼni wíyúuʼ rí nandulú kuʼyamijná,
ní má mañu rí xkujyuʼ xáʼngo̱o̱ gáʼga kayóo.
Á mu mbáa xa̱bu̱ naxnájxi̱ xúgíʼ rí gíʼdoo náa goʼwóo mu maʼndún kuyáá,
xúgíʼ rígi̱ xáxtrigú”.*
8 “Gi̱ʼtiu̱xu bi̱ guáʼdaaxu̱ kaʼníí chíʼgíiʼ*
xóó tséʼni mba̱ʼu̱ cháʼdúu.
Dí lá gúʼni̱ gajmiúlú gi̱ʼtiu̱lú
mbiʼi rí gagúwáʼ gúnda̱ʼa̱a̱ mu manújúnʼ xá.”
9 “Á mu ikhaa nindxu̱u̱ mbá xtájtsí,
muruguamaʼán náa tsu̱du̱u̱ ikhaa ga̱jma̱a̱ plata,
á mu ikhaa nindxu̱u̱ mbá xkrugua,
muruʼguáalú jxa̱ʼ ga̱jma̱a̱ xa̱jpa dí cedro”.
10 “Ikhúún nindxu̱ʼ mbá xtájtsí
ga̱jma̱a̱ cháʼdúʼ nindxu̱u̱ xóo torre.
Dxámá bi̱ nandoʼ ka̱yo̱o̱ ni̱jkha̱nú ndiʼyoo
rí ikhúún xtáá raʼyáʼ rí tsímáá.
11 Náa Baal-Hamón Salomón gíʼdoo mbá mbaaʼ náa kiʼdu uva.
Niniñúúnʼ xa̱bu̱ mu muñewa̱a̱n.
Mámbáa rí ikhiin muxnáa mil mbújkha̱a̱ plata ga̱jma̱a̱ numuu rí nijma̱a̱.
12 Ikháán Salomón kaʼyaaʼ matandrígúu mil mbújkha̱a̱ plata,
doscientos gáguanún ga̱jma̱a̱ bi̱ nuñewa̱a̱n mbaaʼ.
Mú ikhúún kúʼdoo mbayuʼ rí kiʼdu uva náa i̱ndó ikhúún kaʼyoʼ.
13 Ikháán bi̱ xtaa náa jardín,*
a̱ngia̱a̱nʼ kúwá xawii mu mudxawíín aʼwáaʼ.
Atatsíñuʼ madxun mangúún”.
14 “Ga̱ʼcha̱a̱ʼ dxámá bi̱ nandoʼ ka̱yo̱o̱,
atagáyáaʼ nacha̱ xóo mbáa gacela,*
xóo mbáa aña̱ʼ,
náa inuu kúbá dí rígá iná ndataun”.
O “nagui̱i̱”.
O “i̱jín go̱ʼo̱”.
Náa ajngáa hebreo naʼthí, “ataxmájthúún”.
O “náneʼ”.
O “xtíin dí nuruguáá ga̱jma̱a̱ inún índo̱ nakúwá ngíná”.
O mbáa “náa majñu̱u̱ʼ lásiáaʼ”.
Náa ajngáa hebreo naʼthí, “nardo”.
O “bóo”.
O “i̱jín go̱ʼo̱”.
Náa ajngáa hebreo naʼthí, “guʼwá náa rígá vino”.
Nindxu̱ún aña̱ʼ bi̱ nagáñún itháan nacha̱.
O “mbiʼi rí naxnúu ruʼwa”.
O “nagui̱i̱”.
Náa ajngáa hebreo naʼthí, “ndaya jxu̱u̱ʼ mbiʼi”.
O mbáa “kúbá rí nawiʼtháa”. O “kúbá ndrígóo Beter”.
O “náneʼ”.
O “i̱jín go̱ʼo̱”.
Nindxu̱u̱ mbáa aña̱ʼ bi̱ nagáyúu itháan nacha̱.
O “desierto”.
O “nagui̱i̱”.
O “nagui̱i̱”.
Nindxu̱u̱ mbáa aña̱ʼ bi̱ nagáyúu itháan nacha̱.
Náa ajngáa hebreo naʼthí, “ndaya jxu̱u̱ʼ mbiʼi”.
O “leopardo”.
O “ixi̱ ri̱ʼi̱”.
O mbáa “xuyaaʼ nindxu̱u̱”.
Xúʼko̱ mbiʼyuu mbá ixi̱ rí naxná wájyooʼ ga̱jma̱a̱ aceite dí najmún xa̱bu̱ nákhá wajyúuʼ mu muni̱ rí ndataun.
Náa ajngáa hebreo naʼthí, “gayá jxu̱u̱ʼ”.
O “ixi̱ ri̱ʼi̱”.
Atayáá glosario, bálsamo.
O “i̱jín go̱ʼo̱”.
O mbáa “juáyuu dátiles”.
Rígi̱ na̱ʼkha̱ náa iñúúnʼ dí miʼxá elefante ga̱jma̱a̱ eʼwíinʼ xujkhúʼ.
O “nagui̱i̱”.
O “ixi̱ ri̱ʼi̱”.
O “nagui̱i̱”.
Atayáá glosario, a̱ʼgú ñawuun.
O “i̱jín go̱ʼo̱”.
O “nánée”.
Náa ajngáa hebreo naʼthí, “nda̱a̱ aʼkhúun”.
Náa ajngáa hebreo naʼthí, “nayejxi̱ri̱gú mbayííʼ”.
O “bóo”.
O “nagui̱i̱”.
O “chádáaʼ”.
Nindxu̱u̱ mbáa aña̱ʼ bi̱ nagáyúu itháan nacha̱.
Rígi̱ na̱ʼkha̱ náa iñúúnʼ dí miʼxá elefante ga̱jma̱a̱ eʼwíinʼ xujkhúʼ.
Náa ajngáa hebreo naʼthí, “edxa̱a̱ʼ”.
O “náneʼ”.
O “i̱jín go̱ʼo̱”.
O “desierto”.
Náa ajngáa hebreo naʼthí, “Seol”. Atayáá glosario, Iñá wajinʼ.
Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
O mbáa “ikhaa xáʼndún guyáá”.
O “lajuíin”.
O “ixi̱ ri̱ʼi̱”.
Nindxu̱u̱ mbáa aña̱ʼ bi̱ nagáyúu itháan nacha̱.