LAMENTACIONES
א [álef]*
1 ¡Xúgi̱ kaʼnii naguanúu mbáwíí xuajin náa nikúwá mbaʼin xa̱bu̱!
¡Xuajin dí ra̱ʼkhá tháán nigiʼdoo numuu* niguanúu xóo mbáa a̱ʼgú xuáʼa̱!
¡Bi̱ ninindxu̱u̱ princesa náa xuajin majkhaʼ nixuʼmaa maʼni ñajunʼ gakhi̱i̱!
ב [bet]
2 Nambi̱ya̱ʼ ngínúu dí mbruʼun, náa inuu nagajtaa iyooʼ iduu.
Mbaʼin ñawiin gíʼdiin, mú nimbáa ndawa̱a̱ ikhí mu maʼni̱i̱ a̱jkiu̱u̱n.
Xúgíinʼ bi̱ nambájxu̱u̱ gajmíi̱n nini̱ nduwaaʼ, dí xúgi̱ nindxu̱ún xa̱bu̱ sia̱nʼ.
ג [guímel]
3 Nindxu̱u̱ ñumbáá ga̱jma̱a̱ namínúuʼ Judá náa ni̱jkha̱ kiʼyáa.
Mbaʼyóoʼ maxtáa náa majñu̱únʼ i̱ʼwáʼ xuajin, tséxkamaa náa mbayáa jxu̱u̱ʼ.
Xúgíinʼ bi̱ nuxkáá nixkamaa náa awúu̱n gamiéjunʼ rí xtáa.
ד [dálet]
4 Kambo̱o̱ Sion xtáa ngíná numuu rí nimbáa nánguá ejkha̱ ndxa̱a̱.
Xúgíʼ xkrugoo niguanáa, ndxajkiun nutsiná.
Waʼxiinʼ* kúwá ngíná, ikhaa namínúuʼ wéñuuʼ.
ה [he]
5 Dí xúgi̱ xa̱bu̱ sia̱nʼ ndrígóo nindxu̱ún bi̱ nutañajuíínʼ, ikhiin nda̱a̱ rí eʼni maxmiéjúúnʼ.
Jeobá niʼni dí ma̱ʼkha̱nú gamiéjunʼ rígi̱ ga̱jma̱a̱ numuu mbaʼa aʼkhá rí nikudaminaʼ.
Xa̱bu̱ sia̱nʼ nigún kudiin e̱ji̱i̱n.
ו [waw]
6 Wáxióo Sion nindáti̱go̱o̱ rí mitsiʼyá.
Príncipes ndrígóo nindxu̱ún xóo aña̱ʼ bi̱ na̱nguá exkamaa ra̱jxa̱,
néʼngu̱u̱n egún rágúu̱nʼ náa inún xa̱bu̱ sia̱nʼ.
ז [zayin]
7 Mbiʼi rí nimínúuʼ ga̱jma̱a̱ nándáa náa maxtáa, Jerusalén nirmáʼáan a̱jkiu̱u̱n.
Náa xúgíʼ rí gíʼdoo nákhá wajyúuʼ.
Índo̱ xa̱bi̱i̱ nijuixnájxi̱i̱n náa ñawúúnʼ xa̱bu̱ sia̱nʼ ga̱jma̱a̱ ikhaa nimbáa ndawa̱a̱ tsáa mambáyúu,
xa̱bu̱ sia̱nʼ ndrígóo ndiyáá ga̱jma̱a̱ ninduʼwajmaa rí nigíʼnuu.
ח [jet]
8 Jerusalén nikudaminaʼ mbá aʼkhá mbiiʼ.
Ikha jngóo nigua̱jta̱a̱ mbá rí xkawiʼ kayuuʼ.
Xúgíinʼ bi̱ nákhá ginii nduyamajkuíí dí xúgi̱ nánguá eñún gúyáá, numuu rí mbá tsaʼtsaaʼ ndiyáá.
Ikhaa mina̱a̱ʼ naguwanʼ ga̱jma̱a̱ narugoo inuu numuu rí nati̱yu̱u̱ʼ.
ט [tet]
9 Náa jnáwúun gíʼma rí mitsaga.
Ikhaa na̱nguá nindxa̱ʼwáminaʼ dí magíʼnuu nda̱wa̱á.
Gamíi ninindxu̱u̱ xóo nixpátríguíi, ndawa̱a̱ tsáa maʼni̱i̱ a̱jkiu̱u̱n.
Jeobá, atayáá xóo emínúuʼ, numuu rí xa̱bu̱ sia̱nʼ ra̱ʼkhá tháán eʼnimbamínáʼ.
י [yod]
10 Xa̱bu̱ sia̱nʼ ni̱jkha̱ kagu̱u̱ xúgíʼ rí gíʼdoo numuu dí ikhaa gíʼdoo.
Ikhaa ndiʼyoo xú kaʼnii xa̱bu̱ bi̱ i̱ʼwáʼ xuajin etu̱ʼu̱u̱n náa goʼwóo Dios dí mikaʼwu.
Xa̱bu̱ xuajin bi̱ nitani̱ gáʼdu̱u̱n matu̱ʼu̱u̱n náa nagimbíi̱n xa̱bia̱a̱ʼ.
כ [kaf]
11 Xúgíinʼ xa̱bi̱i̱ nutsiná, jngruigu̱u̱n ruyáʼ ganitsu.
Nixnajxi̱ xúgíʼ rí gíʼdoo numuu dí guáʼdáá mu muriʼkhu̱ ga̱jma̱a̱ dí mu̱phu̱, mu xúʼko̱ ma̱ndoo makáwíin.
Jeobá, atayáá xóo xtáá, niguanúʼ xóo mbáa a̱ʼgu̱* bi̱ nda̱a̱ rí ejmaa nditháan.
ל [lámed]
12 Xúgiáanʼ ikháanʼ bi̱ nanújngala náa kamba̱a̱, lá tséʼtúun kayuuʼ a̱jkia̱la ráʼ.
¡Guye̱jxi̱ ga̱jma̱a̱ gu̱ya̱a̱!
Lá rígá mbá ga̱ʼkhu̱ xóo rí ikhúún xtáá ramínúuʼ,
dí Jeobá niʼni mamínuuʼ náa mbiʼi rí nikásngañu̱u̱ʼ ráʼ.
מ [mem]
13 Ikhaa nikruígú aguʼ asndu mekhuíí mu matsikáa xúgíʼ itsuʼ.
Ikhaa nigíʼ amaʼ mu majngrádóoʼ rajkúʼ ga̱jma̱a̱ nitsudún rí maʼgáaʼ skidiʼ.
Niʼni rí mani̱ndxu̱ʼ mbáa a̱ʼgu̱ bi̱ niguanáa.
Kañiiʼ mbiʼi naʼniuʼ nandii.
נ [nun]
14 Aʼkhá ndrígóʼ nixtuʼwájma xóo mbá yugo, ikhaa nindxu̱u̱ bi̱ niroʼóo.
Nita̱ma̱ʼ náa rexo̱ʼ, tsiaki̱i̱ ndrígóʼ niguámbá.
Jeobá nixnájxu̱u̱n náa ñawúúnʼ bi̱ ikhúún xáʼngo̱ʼ gáni̱ gajmíʼ.
ס [sámekh]
15 Jeobá niguwí káyúʼ xa̱bu̱ bi̱ itháan xkujiinʼ bi̱ kúwá náa ikhúún.
Nindxaʼwúún mbaʼin xa̱bu̱ mu muni̱ gámbíin jiámíʼ.
Jeobá nikujmbiriga̱a̱ wáxióo Judá bi̱ xóó tsébóoʼ ga̱jma̱a̱ xa̱bu̱ náa nuxujmbi̱i̱ uva.
ע [ayin]
16 Nambi̱ya̱ʼ ga̱jma̱a̱ numuu xúgíʼ rígi̱, nijnííʼ iyooʼ iduʼ.
Numuu rí xúgíinʼ bi̱ ma̱ndoo muni̱i̱ a̱jkiu̱nʼ ga̱jma̱a̱ muxna̱a̱ʼ tsiaki̱i̱ ndawi̱i̱n mijngii.
E̱ji̱nʼ kúwá ngíná numuu rí táʼngo̱ʼ gáni̱ ga̱jmu̱ʼ xa̱bu̱ sia̱nʼ.
פ [pe]
17 Sion nitsuáʼwíi ñawúunʼ, mú ndawa̱a̱ nimbáa tsáa maʼni̱i̱ a̱jkiu̱u̱n.
Jeobá niʼtáñajúúnʼ xúgíinʼ bi̱ kúwá mbájndi náa Jacob rí mani̱ndxu̱ún xa̱bu̱ sia̱nʼ.
Jerusalén nigua̱jta̱a̱ mbá dí xkawiʼ kayuuʼ náa ikhiin.
צ [sadé]
18 Jeobá nindxu̱u̱ jmbii, ikhúún nindxu̱ʼ bi̱ ninújngurámúunʼ kiʼtáñajunʼ ndrígóo.*
Xúgiáanʼ xa̱bu̱ xuajin, gudxawíín ga̱jma̱a̱ gu̱ya̱a̱ ga̱ʼkhu̱ dí xtáá ranújngoʼ.
Wa̱ʼxi̱nʼ ga̱jma̱a̱ jiámíʼ ni̱jkha̱ kiʼdiin.
ק [qof]
19 Nindxa̱ʼwu̱u̱n ñawinʼ, mú nini̱ nduwúúnʼ.
Náa xuajin, ndxajkiúnʼ ga̱jma̱a̱ xabuanii nikháñún
índo̱ kúwá ruyáʼ dí mu̱phu̱ mu ma̱ndoo makáwíin.
ר [resh]
20 Atayáá Jeobá, ikhúún ra̱ʼkhá tháán ejmúʼ.
Rí asndu na̱ʼkhu̱ awúnʼ.*
Na̱ʼkhu̱ awúu̱n a̱jkiu̱nʼ numuu rí tánimbo̱ʼ.
Rexa̱a̱ xa̱bu̱ nakháñún ga̱jma̱a̱ espada, xúʼko̱ má náa awúu̱n guʼwá, xa̱bu̱ nakháñún.
ש [shin]
21 Xa̱bu̱ nudxawíín xóo natsiná, mú ndawa̱a̱ nimbáa bi̱ maʼni̱i̱ a̱jkiu̱nʼ.
Xúgíinʼ xa̱bu̱ sia̱nʼ ndiyáá gamiéjunʼ dí ni̱ʼkha̱nú inuʼ.
Ga̱jma̱a̱ ra̱ʼkhá tháán edxúún, numuu rí ikháán nitani̱ dí ma̱ʼkha̱.
Mú matani̱ dí maʼga̱nú mbiʼi dí niratá, mbiʼi rí mangiin maguáʼníí xóo má ikhúún.
ת [taw]
22 Xúgíʼ dí raʼkhí nuni̱ gaʼganú náa ikháán ga̱jma̱a̱ atani̱ ngíníi,
xó má nitani̱ ngínún ikhúún ga̱jma̱a̱ numuu xúgíʼ aʼkhúnʼ.
Numuu dí ra̱ʼkhá tháán etsiná ga̱jma̱a̱ na̱ʼkhu̱ a̱jkiu̱nʼ.*
א [álef]
2 ¡Jeobá ra̱ʼkhá tháán ekásngáñu̱u̱ʼ kaʼyoo wáxióo Sion rí asndu narúguaruwi̱i̱n ga̱jma̱a̱ mbá du̱u̱n skuniʼ!
Xóo náa mekhu asndu náa ku̱ba̱ʼ nidatigú rí mitsaanʼ* dí gíʼdoo Israel.
Mbiʼi rí nikásngañu̱u̱ʼ, na̱nguá nirmáʼáan a̱jkiu̱u̱n kaʼyoo náa nasngutámáʼ rajkhúu.
ב [bet]
2 Jeobá tágáwíinʼ a̱jkiu̱u̱n rí niʼni gámbáa xúgíʼ goʼwóo Jacob.
Índo̱ nikásngañu̱u̱ʼ niʼni gámbáa náa nambayumináʼ wáxióo Judá.
Náa nutañajunʼ nidatiga̱ mbayííʼ ga̱jma̱a̱ niʼni tsagoo, xúʼko̱ má príncipes ndrígióo ikhaa.
ג [guímel]
3 Rí nikásngañu̱u̱ʼ wéñuuʼ niʼni gámbáa xúgíʼ tsiaki̱i̱* ndrígóo Israel.
Nánguá nimbáñún* índo̱ ni̱ʼkha̱ mijngii xa̱bu̱ sia̱nʼ,
ga̱jma̱a̱ náa Jacob ikhaa ninindxu̱u̱ xóo mbá aguʼ rí nitsikháa xúgíʼ dí rígá mbájndi ikhí.
ד [dálet]
4 Nixúmuu* xkamídá ndrígóo xóo mbáa xa̱bu̱ sia̱nʼ, ñawún mújúunʼ nixtáa xawii mu maxmína̱ʼ,
nigudíin má xúʼko̱ xúgíinʼ bi̱ nandún kuñún wéñuuʼ.
Ga̱jma̱a̱ náa guʼwá xtíin ndrígóo wáxióo Sion nisngátrámúuʼ rí nakásngañu̱u̱ʼ xóo mbá aguʼ.
ה [he]
5 Jeobá ni̱jkha̱nú ninindxu̱u̱ xóo mbáa xa̱bu̱ sia̱nʼ,
niʼni gámbáa Israel.
Niʼni gámbáa xúgíʼ xtájtsí ndrígóo,
niʼni gámbóo xúgíʼ náa numbayúmíjná.
Niʼni rí mbajoo tsingíná ga̱jma̱a̱ xtambi̱ya̱ʼ náa wáxióo Judá.
ו [waw]
6 Niʼni ngínáa guʼwá xtúguá xóo mbá guʼwá dí rígá náa jardín.*
Niʼni gámbáa ndxa̱a̱ dí narígá ikhí.
Jeobá niʼni rí náa Sion ni xágumariya̱a̱ʼ ndxa̱a̱ ni má sábado,
índo̱ nikásngañu̱u̱ʼ na̱nguá nimajkuu kaʼyoo rey ni má ndxajkun.
ז [zayin]
7 Jeobá nánguá nimajkuu náa nixnajxi̱ tsigijñaʼ,
nánguá nindoo gáʼyóoʼ guʼwá rí mikaʼwu náa nduyamajkuíí.
Nixnájxi̱ náa ñawúúnʼ xa̱bu̱ sia̱nʼ torres rí wájun jxa̱ʼ ga̱jma̱a̱ xtájtsí ndrígóo.
Nindxa̱ʼwa̱ náa goʼwóo Jeobá xóo mbiʼi rí naguma ndxa̱a̱.
ח [jet]
8 Jeobá niraʼwíí dí maʼni gámbáa xtájtsí ndrígóo wáxióo Sion.
Nirajngaa ñuñuu dí naxtiéwan ga̱jma̱a̱.
Na̱nguá niyéngaa kaníí ñawúunʼ rí naʼni gámbóo.
Naʼni dí xtájtsí ga̱jma̱a̱ dí nañewu̱u̱n xuajin makuwá ngíná,
mbá xúgíʼ nikáwabaaʼ.
ט [tet]
9 Xkrugoo niʼdu náa ku̱ba̱ʼ.
Ikhaa niʼni gámbóo ga̱jma̱a̱ nixpígu̱u̱ ixi̱ mbi̱jua̱ dí nagúguáa ga̱jma̱a̱.
Rey ga̱jma̱a̱ príncipes ndrígóo kúwá náa majñu̱únʼ i̱ʼwáʼ xuajin.
Nda̱a̱ xtángoo, ni má Jeobá nándáa rí esngájmúún profetas* ndrígóo.
י [yod]
10 Mbayííʼ tri̱gi̱i̱n wíí xabuanii bi̱ kúwá náa wáxióo Sion.
Nustra̱ma̱ʼ yujndaʼ edxu̱ún ga̱jma̱a̱ kugíʼ xtíin mi̱du̱.*
Wa̱ʼxa̱ʼ* bi̱ kúwá náa Jerusalén nixruigú edxu̱ún asndu mbayííʼ.
כ [kaf]
11 Asndu nagaaʼ iduʼ rí nambi̱ya̱ʼ wéñuuʼ.
Na̱ʼkhu̱ wéñuuʼ awúnʼ.*
Nagawúunʼ wéñuuʼ a̱jkiu̱nʼ* ga̱jma̱a̱ numuu rí nixpátríguíi wáxióo* xuajñunʼ,
ga̱jma̱a̱ numún e̱ji̱n, ma̱ngaa numún ejín dxáñáʼ bi̱ nakamíndún náa xuáá.
ל [lámed]
12 Tséniña̱a̱ʼ ruthúún rudún “Naxki̱dxu̱ʼ ga̱jma̱a̱ nakándawuʼ”*
nda̱wa̱á nakamíndún xóo bi̱ nagawúúnʼ náa xuáá ndrígóo xuajin,
índo̱ na̱jkha̱ rakháñún náa ñawúúnʼ ru̱du̱ún.
מ [mem]
13 Ndiéjunʼ gándoo gájmuʼ xóo xkri̱da mu ma̱ta̱ya̱a̱ rá.
Ndiéjunʼ gándoo gátháanʼ xóo nindxa̱a̱ʼ rá wáxióo Jerusalén.
Ndiéjunʼ gándoo gáni̱ mbríguíín ga̱jma̱a̱ mu maʼni̱i̱ a̱jkia̱a̱nʼ rá wáxióo Sion.
Xóo mba̱a̱ lamáa* xúʼko̱ mba̱a̱ gamiéjunʼ rí nitagíʼníí. Tsáá gándoo gáʼni̱i̱ a̱jkia̱a̱nʼ rá.
נ [nun]
14 Minduwaʼ nindxu̱u̱ dí niwasngájmún profetas ndrígia̱a̱ʼ ga̱jma̱a̱ nda̱a̱ dí ejmaa,
na̱nguá nithaanʼ pa̱jnu dí nikiéʼkháanʼ mu xúʼko̱ xáʼga̱ kiʼñáán,
rí nini̱, nithaanʼ má xúʼko̱ rí minduwaʼ dí niwasngájmún.
ס [sámekh]
15 Xúgíinʼ bi̱ ninújngún náa kamba̱a̱ asndu nudi̱i̱ ñawúúnʼ mu mutsijmáá.
Índo̱ nduyáá wáxióo Jerusalén, naʼniún tsiánguá ma̱ngaa nujuiyú ga̱jma̱a̱ nubajngaa edxu̱ún índo̱ nuthi:
“Lá xuajin rígi̱ rí nuthi ga̱jma̱a̱ numuu ‹ra̱ʼkhá tháán mitsaanʼ, naʼni dí makuwá gagi xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ ráʼ.›”
פ [pe]
16 Xúgíinʼ bi̱ sia̱nʼ gajmiáanʼ nithi ga̱jma̱a̱ numaaʼ.
Nujuiyú, naʼpuduun iñúúnʼ ga̱jma̱a̱ nuthi: “Ni̱ʼni̱ gámbáalú.
¡Rígi̱ nindxu̱u̱ mbiʼi rí ikháánʼlú kua̱ʼthi̱i̱n! ¡Ni̱ʼkha̱nú ga̱jma̱a̱ ndiʼyáálú!”.
ע [ayin]
17 Jeobá niʼni marigá dí niʼthí, ikhaa niʼnimbánuu ajngóo,
dí ikhaa niʼtáñajunʼ marigá asndu nákhá wajyúuʼ.
Tágáwíinʼ a̱jkiu̱u̱n rí maʼni gámbáa.
Niniñuuʼ rí xa̱bu̱ sia̱nʼ ndrígáaʼ makuwá gagi ga̱jma̱a̱ numaaʼ, niʼni rí maʼni mba̱a̱ tsiaki̱i̱* ndrígu̱ún ikhiin.
צ [sadé]
18 Ikháán xtájtsí ndrígóo wáxióo Sion, xa̱bu̱ xuajin kúwá rundxaʼwa̱a̱ Jeobá.
Mbiʼí mbruʼun na̱jkha̱ má xúʼko̱ iyooʼ idún xóo mbá mañu.
Xáyáa jxa̱a̱ʼ, xátatsiʼñááʼ mbayáa jxu̱u̱ʼ idaaʼ.*
ק [qof]
19 ¡Arajxu̱! Atambi̱ya̱ʼ kañiiʼ mbruʼun.*
Atarmbáʼtáá a̱jkia̱a̱nʼ náa inuu Jeobá.
Ataxújxi̱ ñawáanʼ náa ikhaa ga̱jma̱a̱ numún e̱jña̱a̱ʼ,
bi̱ kúwá rakamíndún numuu rí naxkidxu̱u̱n náa gútrigo̱o̱ xúgíʼ kamba̱a̱.
ר [resh]
20 Jeobá, atayáá bi̱ nitani̱ ngínáa.
Lá mbaʼyóoʼ muphu̱u̱n má xúʼko̱ e̱jñu̱ún gu̱ʼu̱ bi̱ ikhiin má nini̱ mba̱ji̱i̱n ráʼ.
Lá mbaʼyóoʼ makhañún ndxajkun ga̱jma̱a̱ profetas náa guʼwá rí nduyamajkuíí Jeobá rí nindxu̱u̱ mikaʼwu ráʼ.
ש [shin]
21 Jiámá ga̱jma̱a̱ xabuanii bi̱ nikháñún mbaʼ kuíji̱ín náa kamba̱a̱.
Wa̱ʼxi̱nʼ ga̱jma̱a̱ jiámíʼ niradíin ga̱jma̱a̱ espada.
Ikháán má niradíin índo̱ nikásngaña̱a̱ʼ ga̱jma̱a̱ nánguá nigáwíinʼ a̱jkia̱a̱nʼ índo̱ niradíin.
ת [taw]
22 Asndu náá niratháán ma̱ʼkha̱ gamíi, xó mbá mbiʼi dí marigá ndxa̱a̱.
Mbiʼi rí nikásngañu̱u̱ʼ Jeobá nimbáa tákríya̱a̱ʼ,
xa̱bu̱ sia̱nʼ ndrígóʼ niʼni gámbíin e̱ji̱n bi̱ ikhúún nini̱i̱ ga̱jma̱a̱ ni̱ni̱ mba̱ji̱i̱n.
א [álef]
3 Nindxu̱ʼ bi̱ ndi̱yo̱o̱ xúgíʼ tsingíná rí Dios niʼni índo̱ nikásngañu̱u̱ʼ.
2 Ikhaa nixkriñu̱u̱nʼ ga̱jma̱a̱ niʼni rí majnguʼúnʼ náa mikína, raʼkháa náa nambiʼi aguʼ.
3 Xúgíʼ mbiʼi naxnúʼ ga̱jma̱a̱ ñawúunʼ.
ב [bet]
4 Niʼni rí maʼguuʼ xuyuʼ ga̱jma̱a̱ xtóʼ,
nixpígaʼ itsuʼ.
5 Niruguarúʼún ga̱jma̱a̱ náa mbájndi ikhúún nitsuajun thana mbiiʼ ga̱jma̱a̱ xkujndu.
6 Nitsu̱dún maxtáá náa mikína, xó má xa̱bu̱ bi̱ mba̱yu̱u̱ʼ mbiʼi má nikháñúu.
ג [guímel]
7 Niruguarúʼún náa mbá pared mu xúʼko̱ xákríñu̱u̱nʼ.
Niroʼóʼ ga̱jma̱a̱ cadena rí mikiwu̱n dí niguma ga̱jma̱a̱ cobre.
8 Índo̱ nandxa̱ʼwa̱ rí mixtambáyúʼ, ikhaa tséʼdxawunʼ rí natajkháan.
9 Ikhaa nirúgoo kambo̱ʼ ga̱jma̱a̱ itsí rí nithu,
niʼni rí kambo̱ʼ nánguá xóo mi̱dxu̱ʼ.
ד [dálet]
10 Ikhaa na̱gi̱ʼtu̱u̱n mu maxíñúu xóo eʼni mbáa oso, xóo eʼni mbáa león bi̱ gíwánʼ ngo̱ʼo̱o̱.
11 Nitsu̱dún magajnúʼ náa kamba̱a̱ ga̱jma̱a̱ nirujkiúún.*
Ma̱ngaa niniñati̱gu̱u̱n mbáwún.
12 Nixúmúu* xkamídóo ga̱jma̱a̱ ikhúún nindxu̱ʼ bi̱ nixnúʼ ga̱jma̱a̱ flecha.
ה [he]
13 Náa riñón ndrígóʼ nitsuaʼan flecha ndrígóo.
14 Ninindxu̱ʼ mbáa bi̱ nutsijmaa xúgíinʼ xa̱bu̱, mbá ajmúú rí nuni̱ kañiiʼ mbiʼi.
15 Niʼni majthíí dí miʼkhu̱u̱n náa ikhúún ga̱jma̱a̱ nixnúʼ má xúʼko̱ ma̱ga̱nʼ iná miʼkhu̱u̱n.*
ו [waw]
16 Ikhaa naxpigu iñuʼ ga̱jma̱a̱ jui̱ʼi̱,*
naʼni rí mamiñúʼ ga̱jma̱a̱ ma̱ʼgúnʼ náa idiʼ.
17 Ikháán natani̱ rí xáxtáá tsímáá ga̱jma̱a̱ rí xármáʼáan a̱jkiu̱nʼ rí nindxu̱u̱ májánʼ.
18 Ikha jngóo na̱tha̱: “Nindáti̱ga̱ gamajkhu rí gúʼdoo ga̱jma̱a̱ rí gúʼthu̱u̱n náa Jeobá”.
ז [zayin]
19 Garmáʼáan a̱jkia̱a̱nʼ rí xtáá ngíná ga̱jma̱a̱ dí na̱nguá gúʼdoo náa maxtáá, garmáʼáan a̱jkia̱a̱nʼ eʼni iná miʼkhu̱u̱n ga̱jma̱a̱ thana rí mbi̱i̱ʼ.
20 Nda̱yo̱o̱ gajkhun rí marmáʼáan a̱jkia̱a̱nʼ ga̱jma̱a̱ marandutiga náa ikhúún.
21 Marmáʼáan a̱jkiu̱nʼ rígi̱. Ikha jngóo maʼngo̱o̱ a̱jkiu̱nʼ magúʼthu̱u̱n.
ח [jet]
22 Núma̱aʼ má ga̱jma̱a̱ numuu ngajua rí tsétumuu* ndrígóo Jeobá xóó tséguma gámbáanʼlu,
numuu rí nditháan tsétumuu rí nagáwíinʼ a̱jkiu̱u̱n kaʼyulú.
23 Mámbá miʼcha̱ nindxu̱u̱ nuxi̱ʼ, nindxa̱a̱ʼ bi̱ kaʼnii maku̱mu̱ʼ ka̱yo̱o̱ má xúʼko̱.
24 “Ikhúún ni̱tha̱, Jeobá nindxu̱u̱ bi̱ kaʼyoʼ, ikha jngóo maʼngo̱o̱ a̱jkiu̱nʼ magúʼthu̱u̱n”.
ט [tet]
25 Májáanʼ a̱jkiu̱u̱n Jeobá náa xa̱bu̱ bi̱ naku̱mu̱u̱ kaʼyoo, náa xa̱bu̱ bi̱ ndayáaʼ má xúʼko̱.
26 Májánʼ nindxu̱u̱ dí maʼnga̱a̱ʼ maraʼti̱i̱n dí Jeobá maʼni kríña̱a̱nʼ.
27 Májánʼ nindxu̱u̱ rí xa̱bu̱ magu̱ yugo nákha kaʼnii dxámá nindxu̱u̱.
י [yod]
28 Mbáwíí nagi̱ʼi̱ wíí índo̱ ikhaa* gágrígu eʼda tsu̱du̱u̱.
29 Gagíʼ inuu asndu maʼdu náa ku̱ba̱ʼ, mbáa rígá rí xóó ma̱ndoo magiʼthu̱u̱n.
30 Gagíʼ inuu magawúunʼ náa bi̱ naxnúu, gájuiʼthá wéñííʼ asndu maʼni néʼngo̱o̱.
כ [kaf]
31 Numuu rí Jeobá xániñulú asndu kámuu.
32 Maski ajndu niʼni rí marigá ga̱ʼkhu̱, mú ma̱ngaa masngájma rí nagáwíinʼ a̱jkiu̱u̱n ga̱jma̱a̱ numuu dí gíʼdoo ngajua rí tsétumuu.
33 Numuu rí ikhaa tsédxuu dí maʼni gawúúnʼ ga̱jma̱a̱ rí maʼni ngíníi e̱jñu̱ún xa̱bu̱.
ל [lámed]
34 Rí majnguprígi̱i̱n xúgíinʼ bi̱ kajchún náa guʼwá e̱jua̱nʼ bi̱ kúwá náa tsu̱du̱u̱ ku̱ba̱ʼ,
35 dí muni̱ gaʼduunʼ munimbaníí xó má kaʼyoo numuu xa̱bu̱ bi̱ xtáa náa inuu Dios bi̱ phú Mba̱a̱,
36 ga̱jma̱a̱ rí tsíñún gúnimbaníí xkujndu ndrígóo mbáa xa̱bu̱ bi̱ ni̱jkha̱ kruíga̱,
nindxu̱u̱ rí Jeobá tsénigu̱u̱ʼ.
מ [mem]
37 Tsáa gáʼngo̱o̱ gáʼnimbánuu ajngóo á mu dí raʼkháa Jeobá eʼtáñajunʼ marigá rá.
38 Náa rawuunʼ Dios bi̱ phú Mba̱a̱
na̱nguá egájnuu ajngáa dí ra̱májánʼ mbóó ga̱jma̱a̱ rí májánʼ.
39 Lá mbáa* ma̱ndoo maxiéʼká numuu rí nada̱a̱ʼ ga̱jma̱a̱ numuu aʼkhá rí nikudaminaʼ ráʼ.
נ [nun]
40 Gu̱ya̱a̱ májánʼ xóo nuʼnilú ga̱jma̱a̱ gutanga̱ánʼlú náa Jeobá.
41 Guxujxí ñawúnlú mekhuíí náa xtáa Dios, ma̱ngaa gu̱ʼtháán ga̱jma̱a̱ xúgíʼ a̱jkiu̱lú.
42 “Nixuʼdámíjnáxu̱ aʼkhá ga̱jma̱a̱ nixujximíjnáxu̱ ga̱jma̱a̱ ikháán na̱nguá nitani̱ mba̱a̱ a̱jkia̱a̱nʼ xtayuxu.
ס [sámekh]
43 Ga̱jma̱a̱ sia̱nʼ nitrikuxu̱ rí xúʼguá kanuu náa ikháán,
nidxu̱ʼ raxkuxu ga̱jma̱a̱ niradiáanʼxu rí asndu tágáwíinʼ a̱jkia̱a̱nʼ xtayuxu.
44 Mbá du̱u̱n nitagíʼ mu marikhoo dí xáʼga̱nú rí nutájkáanxu náa ikháán.
45 Natani̱ rí mani̱ndxu̱xuʼ xóo mbá náskha ga̱jma̱a̱ mbá rí nagadíí náa majñu̱únʼ i̱ʼwáʼ xuajin”.
פ [pe]
46 Xúgíinʼ xa̱bu̱ sia̱nʼ ndrígúxu̱ nuthi ga̱jma̱a̱ numuxu.
47 Nimíñuxuʼ ga̱jma̱a̱ kuwáanʼxu̱ náa tsáʼkhá, kuwáanʼxu̱ ndajkuáanʼxu ga̱jma̱a̱ niguma gámbáanʼxu̱.
48 Iyooʼ iduʼ nindxu̱u̱ xóo iya mata* ga̱jma̱a̱ numuu rí niguma gámbáa wáxióo xuajñunʼ.
ע [ayin]
49 Xáwi̱ji̱i̱ rambi̱ya̱ʼ iduʼ ga̱jma̱a̱ nditháan xáyáa jxu̱u̱ʼ,
50 asndu índo̱ Jeobá gáyejxi̱ asndu mekhuíí.
51 Iduʼ naʼni mamínuuʼ ga̱jma̱a̱ numún xúgíinʼ wa̱ʼxa̱ʼ* bi̱ kúwá náa xuajñunʼ.
צ [sadé]
52 Xa̱bu̱ sia̱nʼ ndiñúunʼ murajtu̱wúún xóo mbáa ñu̱ʼu̱.
53 Nidamu̱ʼu̱u̱n náa iñáʼ mu munimíjna̱ muxiñún ga̱jma̱a̱ tséniña̱a̱ʼ ruxnuʼ ga̱jma̱a̱ itsí.
54 Nirmúʼúún náa iyaʼ ga̱jma̱a̱ ni̱tha̱: “¡Makhañúʼ rá!”.
ק [qof]
55 Asndu náa itháán mi̱jnu̱ʼ iñáʼ niríya̱ʼ mbiʼyaaʼ Jeobá.
56 Atadxawíín aʼwóʼ. Xátruguáá cháʼwáanʼ índo̱ nandxa̱ʼwa̱ rí matambáyuʼ mu maʼni̱i̱ a̱jkiu̱nʼ.
57 Ikháán ni̱dxa̱ʼnú mbiʼi rí nindxa̱ʼwa̱a̱ʼ, niratá: “Xámíñáaʼ”.
ר [resh]
58 Nitambáyúʼ náa xkujndu rí gúʼdoo Jeobá, nitani̱ kríñu̱u̱nʼ.
59 Jeobá, nitayáá xúgíʼ dí raʼkhí niniuʼ. Mbá péñu* atanimbaníí xó má kaʼyoo numuʼ.
60 Ikháán nitayáá xúgíʼ xóo nini̱ gínún ga̱jma̱a̱ xúgíʼ awan dí niriya̱ʼ ga̱jma̱a̱ numuʼ.
ש [sin o shin]
61 Jeobá nitadxawíín xúgíʼ rí nitawéñúnʼ, ga̱jma̱a̱ xúgíʼ awan dí niriya̱ʼ ga̱jma̱a̱ numuʼ.
62 Ikháán natadxawíín rí xúgíʼ mbiʼi xa̱bu̱ sia̱nʼ ndrígóʼ nutha̱ ngu̱ʼwa̱míjna̱ ga̱jma̱a̱ numuʼ.
63 ¡Atañún! ¡Tséʼniuu á mu tri̱gi̱i̱n o kuájun, nuni̱ ajmúú mu mutsijmún!
ת [taw]
64 Jeobá, ikháán maraxnu̱u̱n rí kaʼñúún ga̱jma̱a̱ numuu rí nini̱.
65 Ikháán matani̱ rí maʼni gújkhúʼ a̱jkiu̱ún, xúʼko̱ marata tsríguíin.
66 Índo̱ gákásnga̱ña̱a̱ʼ mi̱dxu̱ʼ raxkhúún ga̱jma̱a̱ matani̱ gámbíin náa agoo mekhu ndrígóo Jeobá.
א [álef]
4 ¡Oro rí itháan májánʼ nánguá xngiyaʼ!
¡Itsí dí rígá náa dí mikaʼwu mbaʼ kuíji̱í náa gutrigo̱o̱* xúgíʼ kamba̱a̱, itsí ndrígóo guʼwá rí mikaʼwu!
ב [bet]
2 E̱ji̱i̱n Sion bi̱ ra̱ʼkhá tháán endún kuñún bi̱ guáʼdáá numún xó má oro dí itháan májánʼ,
¡niguánú ndiñún xó mbá rayaʼ dí niguma ga̱jma̱a̱ ku̱ba̱ʼ,
ñajunʼ dí niʼni mbáa bi̱ naʼni daan!
ג [guímel]
3 Asndu chacal* nuxníxúún e̱jñu̱ún,
mú wáxióo xuajñunʼ niʼni xkawiʼ a̱jkiu̱u̱n, xóo avestruz bi̱ kúwá náa ku̱ba̱ʼ mijxooʼ.*
ד [dálet]
4 E̱ji̱n bi̱ kaʼníí nuxúúnʼ nakáʼma raju̱ún náa xákhúún numuu rí nakándawúúnʼ.
E̱ji̱n majkhiinʼ nunda̱ʼa̱ ganitsu, mú ndawa̱a̱ tsáá exnún rí mu̱phu̱.
ה [he]
5 Bi̱ nákha ginii nipiʼtsu mújúúnʼ rí xúgi̱ nakamíndúún náa kamba̱a̱ numuu rí naxkidxu̱u̱n.*
Bi̱ nigúwúúnʼ xtíin maña̱ʼ xngeʼdi índo̱ niganii rí xúgi̱ nubúúnʼ náa ru̱tsu̱u̱ náskha dí nikha.
ו [waw]
6 Rí xóo nimínúuʼ wáxióo xuajñunʼ nindxu̱u̱ itháan ki xóo rí nimínúuʼ Sodoma,
ga̱jma̱a̱ numuu aʼkhúun mbá nacha̱ niguma gámbáa, nimbáa tákruiya̱ʼ ñawúunʼ mu mambáyúu.
ז [zayin]
7 Nazareos bi̱ nikúwá ikhí nindxu̱ún itháan mikaʼwiin xóo idiʼ, itháán miʼxíin ki xóo yaʼdú.
Itháán mañi̱i̱ʼ ki xóo coral,* ninindxu̱ún xóo itsí zafiros rí niʼni̱i̱ xngiyaʼ.
ח [jet]
8 Rí xúgi̱ nakujmiin itháan skuniúnʼ ki xóo raguʼwá,
náa kamba̱a̱ nimbáa nánguá eʼniniúnʼ.
Xtóo xuñúnʼ nigaxtuma̱a̱ náa i̱tsu̱ún, nindxu̱ún xóo ixi̱ nijndooʼ.
ט [tet]
9 Itháan májánʼ nikháñún bi̱ niradíin ga̱jma̱a̱ espada ki xóo bi̱ nikháñún ga̱jma̱a̱ ewiʼ,
bi̱ mañu̱ú ejkha̱ rakháñún numuu rí xanáá nda̱a̱ ganitsu, nindxu̱ún xóo bi̱ nifraʼa jngañiin espada.
י [yod]
10 Gu̱ʼu̱ bi̱ nákha ginii nagáwíinʼ a̱jkiu̱ún niguánú nini̱ míjíinʼ e̱jñu̱ún muphu̱u̱n.
Rígi̱ ninindxu̱u̱ ganitsu ndrígu̱ún mbiʼi rí niguma gámbáa wáxióo xuajñunʼ.
כ [kaf]
11 Jeobá nisngájma rí nakiʼnáa,
nixídiri̱ga̱ dí nakásngañu̱u̱ʼ.
Niskámuu mbá aguʼ náa Sion dí natsikháa rajkúu.
ל [lámed]
12 Ni má reyes bi̱ kúwá náa tsu̱du̱u̱ ku̱ba̱ʼ ni má xa̱bu̱ xuajin tákumu̱ún,
rí xa̱bu̱ sia̱nʼ mato̱ʼo̱o̱ náa xkrugoo Jerusalén.
מ [mem]
13 Nirígá rígi̱ ga̱jma̱a̱ numuu aʼkhá rí nixudamíjna̱ profetas* ndrígu̱ún, ma̱ngaa rí nikiéʼkhúún ndxajkiún,
numuu rí nixidiri̱ga̱ eʼdiún bi̱ nda̱a̱ aʼkhúún náa majñuuʼ ikhaa.
נ [nun]
14 Nagún náa kamba̱a̱ xóo xa̱bu̱ bi̱ tsékruigu̱u̱n,
nini̱ tsagamijná ga̱jma̱a̱ eʼdi,
ikha jngóo nimbáa xándoo magugua xtíñún.
ס [sámekh]
15 “Nundxaʼwajmiin ¡Gaʼguala kaníí! ¡Mitsagáanʼlá! ¡Gaʼguala kaníí! ¡Akaníí! ¡Xúxkajmáanʼxu̱!”.
Mbaʼ jngruigu̱u̱n nándáa náa makuwá.
Xa̱bu̱ bi̱ kúwá náa i̱ʼwáʼ xuajin nithi: “Ikhiin xándoo maguanún gi̱i̱ ga̱jma̱a̱ nindxu̱lú.
פ [pe]
16 Mínaaʼ Jeobá niʼni rí majuidaríʼiin
ikhaa ní xáʼñúúnʼ májánʼ.
Xa̱bu̱ ní xúyamajkún ndxajkun ní má xúyamajkún xabuanii”.
ע [ayin]
17 Asndu kaʼníí egaaʼ iduxu dí ndiʼyáʼ rí maxtámbáyuxu̱, mú tágiʼdoo numuu.
Ndiʼyáʼxu̱ dí mixtámbáyuxu náa mbá xuajin dí xándoo maʼni káwáanʼxu.
צ [sadé]
18 Xa̱bu̱ sia̱nʼ ndrígúxu̱ nduñáanʼxuʼ muradiáanʼ, nánguá xóo muʼguá náa xuáá ndrígúxu̱.
Numuu rí mbiʼi ndrígúxu̱ ni̱ʼkha̱nú, mbiʼi ndrígúxu̱ niguámbá, ni̱ʼkha̱nú mbiʼi rí maguma gámbáanʼxu.
ק [qof]
19 Bi̱ nagún ruxkuxu, nigún itháán nacha̱ ki xóo bi̱yú bi̱ jngruigu̱u̱n rijma̱a̱.
Nigún ruxkuxu náa kúbá, niguáʼtuxu muradiáanʼ náa ku̱ba̱ʼ mijxooʼ.
ר [resh]
20 Bi̱ naxnúxu xi̱ʼ mu ma̱ndoo makuwáanʼxu̱, bi̱ Jeobá niraʼwíi, nixtugua̱a̱ ga̱jma̱a̱ nixuma̱a̱ʼ náa iñáʼ mba̱a̱ rí ikhiin guáʼdáá,
bi̱ ikháanʼ nutaxu ga̱jma̱a̱ numuu “Náa ndájkhoo makuwáanʼxu náa majñu̱únʼ i̱ʼwáʼ xuajin”.
ש [shin]
21 Gaʼdxaaʼ ga̱jma̱a̱ araxtaa gagi wáxióo Edom, bi̱ xtaa náa ku̱ba̱ʼ ndrígóo Uz.
Mú náa ikháán ma̱ngaa magún ku̱ñu̱u̱n copa, migi̱i̱n ga̱jma̱a̱ majnga̱a̱n ga̱jma̱a̱ mbá tsaʼtsáánʼ jngrui̱ga̱a̱ʼ gáʼni.
ת [taw]
22 Wáxióo Sion, niwi̱ji̱i̱ má rí naguma ngínáá ga̱jma̱a̱ numuu aʼkháanʼ.
Ikhaa ní xátanga̱a̱ maʼga̱ kañáán.
Mú rí xúgi̱, wáxióo Edom, ikhaa matanga̱a̱ mayejxu̱u̱ náa rí nikiéʼkháanʼ.
Masngájma pa̱jnu aʼkhá rí nitaxúdaminaʼ.
5 Jeobá, garmáʼáan a̱jkia̱a̱nʼ xóo rí nigíʼnuxu̱.
Ga̱jma̱a̱ atayáá xóo rí nagájnuu gamajkuxu̱.
2 Rí nindrígúxu nijuixnájxi̱ náa ñawúúnʼ bi̱ tséniʼniúnʼ, guʼwúxu nijuixnájxu̱u̱n xa̱bu̱ bi̱ naguwaáʼ.
3 Niguanúxu xóo e̱ji̱n bi̱ ndawa̱a̱ anu̱ún, ru̱dúxu̱ nindxu̱ún xóo gu̱ʼú xuáʼa.
4 Ndayóoʼ mu̱tsixu̱ iyaʼ ndrígúxu̱ mu muwáanʼxu xúʼko̱ má ixi̱ ma̱ngaa.
5 Bi̱ nagún ruxkuxu itháán má murtuwáanʼxu.
Néʼnguxu̱ ga̱jma̱a̱ na̱nguá eniña̱a̱ʼ maʼni̱i̱ a̱jkiu̱xu̱.
6 Nuxruíyaʼ ñawúnxu xígií náa Egipto ga̱jma̱a̱ náa Asiria mu mbuʼyáʼ ganitsu rí muphúxu.
7 Wajin xiʼñúxu bi̱ nixudamíjna̱ aʼkhá ndáwi̱i̱n má, mú ikháanʼxu̱ ndayóoʼ maʼnguxu̱ ga̱jma̱a̱ aʼkhá rí nixudamíjna̱.
8 Rí xúgi̱ ñumbáá nindxu̱ún bi̱ nutañajunxu̱, ndawa̱a̱ nimbáa bi̱ maʼni káwáanʼxu náa ñawúúnʼ.
9 Asndu gamíi makañúxu ga̱jma̱a̱ espada dí rígá náa ku̱ba̱ʼ mijxooʼ* índo̱ nagúwáaʼxu kudúxu ganitsu rí muphúxu.
10 Ga̱jma̱a̱ numuu rí naxkidxu̱xu̱ naxnúxu mijkha, naʼni rí xuyuxu̱ maʼni mijkha xóo mbá horno.
11 Guʼñu̱ún xa̱bu̱ bi̱ kúwá náa Sion nitsijmiin, xúʼko̱ má wa̱ʼxa̱ʼ* bi̱ xóó tsébúúnʼ gajmiún xa̱bu̱ bi̱ kúwá náa xuajin Judá.
12 Príncipes nijngri̱guíin ga̱jma̱a̱ ñawúúnʼ ma̱ngaa túyamajkún xabuanii.
13 Jiámá nagún ragúun kudúún tsi̱nu̱* ga̱jma̱a̱ e̱ji̱n najngrádíinʼ ga̱jma̱a̱ najnguti̱gi̱i̱n numuu rí mikiwu̱n ixi̱ rí kuda.
14 Xabuanii nánguá tri̱gi̱i̱n náa riejuun xuajin ní má jiámá nánguá edi̱i̱ ajmúú.
15 Nándáa gagi náa awúu̱n a̱jkiu̱xu̱ ga̱jma̱a̱ gitsiá ndrígúxu̱ nigua̱jta̱a̱ tsingíná.
16 Nixpátrígú corona dí grígu náa edxu̱xu̱ʼ. ¡Gínáanʼla ikháanʼxu̱, numuu rí nixuʼdámíjnáxu̱ aʼkhá!
17 Ikhaa rúʼko̱ numuu rí a̱jkiu̱xu̱ naʼniuu nandii,
gidiʼ eyejxi̱xu̱ ga̱jma̱a̱ numuu xúgíʼ rígi̱.
18 Ga̱jma̱a̱ numuu rí niguanáa kúbá Sion. Rí xúgi̱ igi̱ jngruigu̱u̱n ikhí.
19 Mú ikháán Jeobá, maraʼwún má xúʼko̱ náa xília̱a̱ʼ* asndu kámuu.
Xília̱a̱ʼ mbajyúuʼ asndu kámuu.
20 Náá numuu rí nimbumaaʼ xtayuxuʼ mbá kaʼyuuʼ ga̱jma̱a̱ nitatsíñúnʼxu mba̱yu̱u̱ʼ mbiʼi rá.
21 Ayu̱u̱ʼ xtáanʼxu náa ikháán mbu̱júu̱ Jeobá, ikháanʼxu̱ nacha̱ má gútangáanʼxu̱.
Atani̱ rí mbiʼi ndrígúxu̱ mani̱ndxu̱u̱ xóo nákha ginii.
22 Mú ikháán nánguá eyaaʼ gátadríguáanʼxu̱ mbá kaʼyuuʼ.
Kaʼníí nakásnga̱ña̱a̱ʼ e̱nixu̱.
Náa capítulo 1 asndu 4 nindxu̱u̱ ajmúú ngíná, nijuiʼniraʼmáʼ xó má e̱ʼkha̱ ajngáa náa abecedario hebreo.
O “náa nikúwá mbaʼin xa̱bu̱”.
Náa ajngáa hebreo naʼthí, “waʼxiinʼ bi̱ xóó tsébúúnʼ gajmiún xa̱bu̱”.
Gi̱i̱ naʼthí rí Jerusulén nindxu̱u̱ xóo mbáa a̱ʼgu̱.
Náa ajngáa hebreo naʼthí, “rawuunʼ”.
Náa ajngáa hebreo naʼthí, “chámboʼ”.
Náa ajngáa hebreo naʼthí, “a̱jkiu̱nʼ naʼniuu nandii”.
O “nagui̱i̱”.
Náa ajngáa hebreo naʼthí, “xúgíʼ chi̱ji̱ʼ”.
Náa ajngáa hebreo naʼthí, “niyengaa ñawún mújúunʼ”.
Náa ajngáa hebreo naʼthí, “nikujmbi̱i̱”.
O “ixi̱ ri̱ʼi̱”.
O “gaʼyee, bi̱ nuthi dí marigá”.
Atayáá glosario, xtíin mi̱du̱.
O “i̱jín go̱ʼo̱”.
Náa ajngáa hebreo naʼthí, “chámboʼ”.
Náa ajngáa hebreo naʼthí, “xkígóʼ nijuiyariga̱ mbayííʼ”.
Ajngáa mitsaanʼ rígi̱ naʼni mbríguii xóo mbáa xa̱bu̱, mbáa nandoo gáʼthúu̱n ga̱jma̱a̱ numuu tsingíná rí magáwíinʼ a̱jkiu̱ún kuyáá.
Náa ajngáa hebreo naʼthí, “Náá rígá tsígáʼ ga̱jma̱a̱ vino rá.”
O “mar”.
Náa ajngáa hebreo naʼthí, “chi̱ji̱ʼ”.
Náa ajngáa hebreo naʼthí, “wáxióo idaaʼ”.
Náa ajngáa hebreo naʼthí, “tikhu nduʼun”.
O mbáa “niniñuʼ xóo mbá ku̱ba̱ʼ rí nuxnáá xku̱bi”.
Náa ajngáa hebreo naʼthí, “nikujmbi̱i̱”.
Atayáá glosario, ajenjo.
O “grava”.
Atayáá glosario, ngajua rí tsétumuu.
Xóo muʼthá, Jeobá.
Náa ajngáa hebreo naʼthí, “xa̱bu̱ ndaʼya”.
O “bóo”.
O “i̱jín go̱ʼo̱”.
O “ataniu̱ʼ mbá rí májánʼ”.
Náa ajngáa hebreo naʼthí, “náa edxu̱u̱”.
Xujkhúʼ bi̱ xóo xu̱wánʼ kaʼniún bi̱ najmangu̱u̱nʼ.
O “desierto”.
Náa ajngáa hebreo naʼthí, “nándáa rí guáʼdáá”.
Rígi̱ nindxu̱u̱ itsí mitsaanʼ dí rígá náa lamáa.
O “gaʼyee, bi̱ nuthi dí marigá”.
O “desierto”.
O “i̱jín go̱ʼo̱”.
Atayáá glosario, itsí mba̱a̱.
O “trono ndrígáaʼ”.