JONÁS

1 Jeobá niʼthúu̱n ajngáa rígi̱ Jonás* a̱ʼdióo Amitái: 2 “Ayuʼ náa xuajin mba̱a̱ Nínive ga̱jma̱a̱ arathún xa̱bu̱ dí xuajin maguma gámbáa, numuu rí nda̱yo̱o̱ dí nuni nindxu̱u̱ ra̱májánʼ”.

3 Mú Jonás tándoo gáʼnimbo̱o̱ kaʼyoo Jeobá ikha jngóo niraʼwíí maʼga Tarsis, nigajtaa náa xuajin Jope ikhí nixkamaa mbá barco dí na̱jkha̱ náa Tarsis. Índo̱ niguámbóo niʼni numuu pasájiúu nitsimuu mu maʼga náa Tarsis gajmíi̱n bi̱ kajchún ikhí, mu xúʼko̱ xáʼnimbánuu rí Jeobá niʼthúu̱n.

4 Ikhú Jeobá niʼni rí maxnúu mbá ruʼwambiʼ náa lamáa,* ra̱ʼkhá tháán gakhi̱i̱ nixnúu giñámbíʼ rí asndu barco nigíʼ magudiri̱ga̱a̱. 5 Bi̱ nuruguambáá magún kuñu̱u̱n barco, ra̱ʼkhá tháán nimíñúún rí asndu mámbáa dí ikhiin nigíʼdi̱i̱ ninda̱ʼa̱a̱ dios ndrígu̱ún rí mambáñún ga̱jma̱a̱ nigíʼdi̱i̱ nidama̱ʼa̱ náa lamáa xúgíʼ rí kajti náa barco mu xáʼni ki̱wu̱n. Mú Jonás nijngúun náa awúu̱n barco ikhí nibóo̱ʼ ga̱jma̱a̱ mbá ndiyáá niʼgu. 6 Ikhú bi̱ naxná ikha náa barco ni̱jkha̱ gáʼthúu̱n: “¡Náá numuu rí nanuʼ!, ¡Atujxa̱a̱ʼ, aratháán dios ndrígáaʼ! Mbáa Dios bi̱ gajkhun magáwíinʼ a̱jkiu̱u̱n kaʼyulú mu xákáñulú”.

7 Ikhú nitamíjná: “Guriyalu suerte* mu mbuʼyáá tsáá gíʼdoo aʼkhúun náa gamiéjunʼ rígi̱”. Índo̱ niriya̱ʼ suerte, ndiyáá dí nindxu̱u̱ Jonás. 8 Ikhú nitháán: “Mbá péñu aratúxu̱, tsáá gíʼdoo aʼkhúun náa gamiéjunʼ dí ni̱ʼkha̱nú inulu rá. Dí ñajunʼ tani̱, náa edxa̱ʼ, náá xuajñanʼ, tsáa xa̱bi̱i̱ nindxa̱a̱ʼ”.

9 Ikhaa niriʼñúún: “Ni̱ndxu̱ʼ hebreo, ndayamajkhuu* Jeobá, Dios bi̱ niʼni mekhu, bi̱ niʼni lamáa ga̱jma̱a̱ ku̱ba̱ʼ”.

10 Ikhú xa̱bu̱ nimiñún itháan, ga̱jma̱a̱ nitháán: “Dí lá nitani̱ ján.” (Xa̱bu̱ ndiyáá má dí xtáa ragáyúu náa inuu Jeobá, numuu dí ikhaa má niʼtúún). 11 Ikhú nitháán: “Ndiéjunʼ gáʼyo̱o̱ʼ mu̱nia̱ʼxu̱ mu lamáa mawi̱ji̱i̱ rá.” Numuu dí lamáa ra̱ʼkhá tháán ejmangu̱u̱ʼ. 12 Ikhaa niʼthúún: “Guxujxúun gudamu̱ʼu̱u̱n náa lamáa mu xúʼko̱ lamáa mawi̱ji̱i̱, numuu dí nda̱yo̱o̱ dí ga̱jma̱a̱ numuʼ ni̱ʼkha̱nú giñán mbiʼ rígi̱”. 13 Mú xa̱bu̱ nini tsiakimíjna̱ magúun kuñuun barco náa rawunʼ iyaʼ; mú táʼngu̱u̱n, numuu dí lamáa ra̱ʼkhá tháán ejmangu̱u̱ʼ.

14 Ikhú nitakáñíí Jeobá: “¡Mbá péñu Jeobá xátatsiʼñáʼ makhañúxu ga̱jma̱a̱ numuu xa̱bu̱ bigi̱! Narígá rígi̱ numuu rí ikháán nandaaʼ Jeobá, ikha jngóo xátani rí maguaʼdáá aʼkhúxu náa makhañúu* xa̱bu̱ bi̱ nda̱a̱ aʼkhúun bigi̱”. 15 Nda̱wa̱á nixuxi̱i̱ Jonás nidama̱ʼa̱a̱n; ikhú lamáa niwi̱ji̱i̱. 16 Índo̱ xa̱bu̱ ndiyáá rígi̱ nimíñúún kuyáá Jeobá, nixnajxi̱ tsigijñaʼ gamajkhu náa inuu Jeobá ga̱jma̱a̱ nixná ajngún rí muni ñajuunʼ.

17 Jeobá nikuʼmaa mbáa e̱gi̱ʼ mba̱a̱ mu mikurajngiúunʼ Jonás ga̱jma̱a̱ ikhaa nixtáa ajtsú mbiʼi ga̱jma̱a̱ ajtsú mbruʼun náa awúu̱n e̱gi̱ʼ.

2 Ikhú Jonás niʼtákáñúu Jeobá Dios ndrígióo asndu náa awúun e̱gi̱ʼ, 2 niʼthúu̱n:

“Asndu ngíná a̱jkiu̱nʼ nindxa̱ʼwo̱o̱ Jeobá índo̱ nixtáá ramínúuʼ ga̱jma̱a̱ ikhaa niriʼñuʼ.

Asndu náa awúu̱n Iñá wajinʼ* nindxa̱ʼwa̱ rí mixtambáyúʼ.

Ikháán nitadxawunʼ.

Iyáʼ rí ikháán nitani̱ mambajxu̱u̱ nikujmbamu̱ʼu̱u̱n itháan.

 4 Ikhú nitha̱: ‹¡Ní ndáwu̱u̱n mijngiiʼ náa inaaʼ!

Xkáʼnii lá gatanga̱án mba̱yo̱o̱ mbu̱júu̱ guʼwáaʼ kaʼwu rá.›

Iná dí rígá náa awúu̱n iyaʼ nimbroʼoo edxu̱ʼ.

 6 Nirmúʼúún asndu nikawoʼ náa nagi̱ʼdu̱u̱ kúbá.

Nigíʼ marúguáa xkrugoo ku̱ba̱ʼ mu maruguarúʼúún asndu kámuu.

Jeobá Dios ndrígióʼ, ikháán nitríñu̱u̱ʼ náa iñá wajinʼ.

 7 Índo̱ na̱jkha̱ rámbáa jxuʼ, nirmáʼáan a̱jkiu̱nʼ ka̱ya̱a̱ʼ Jeobá.

Dí nitakáñáanʼ nitadxawunʼ, asndu náa guʼwáaʼ dí mikaʼwu.

 8 Bi̱ nduyamajkhún xándú bi̱ nda̱a̱ rí ejmi̱i̱n, nambumún kuyáá bi̱ nasngajmúún ngajua rí tsétumuu.*

 9 Mú ikhúún, ga̱jma̱a̱ xúgíʼ a̱jkiu̱nʼ maxnááʼ núma̱aʼ, maxnajxí tsigijñaʼ náa ikháán,

manimbánuu dí nikuʼdáminaʼ ma̱ni̱.

Jeobá, ikháán nindxa̱a̱ʼ bi̱ natani̱ kríñu̱u̱ʼ”.

10 Nda̱wa̱á, Jeobá niʼtáñajuunʼ e̱gi̱ʼ dí majxiri̱ya̱a̱ʼ Jonás náa ku̱ba̱ʼ mijxooʼ.

3 Ikhú Jeobá niʼthúu̱n mbu̱júu̱ Jonás: 2 “Ayuʼ náa xuajin mba̱a̱ Nínive mu marata̱ ajngáa rí ikhúúnʼ ma̱tha̱a̱nʼ”.

3 Ikhú Jonás niʼnimbo̱o̱ kaʼyoo Jeobá, nigájnuu ni̱jkha̱ náa Nínive. Xuajin Nínive raʼkhá tháán mba̱a̱,* dí mi̱dxu̱ʼ ga̱jma̱a̱ rajkuáaʼ ndajyúuʼ ajtsú mbiʼi dí maríñáaʼ náa xuajin. 4 Jonás nito̱ʼo̱o̱ náa xuajin, ni̱jkha̱ kúʼwúun mbá mbiʼi raʼthí: “Índo̱ gárámúunʼ 40 mbiʼi, Nínive mambáa”.

10 Índo̱ Dios bi̱ gajkhun ndiʼyoo dí nini̱, dí niniña̱a̱ʼ runi̱ dí ra̱májánʼ, ikhú nitanga̱a̱ a̱jkiu̱u̱n dí niʼthí maʼni gajmíi̱n, ikha jngóo táʼni gámbíin.

4 Ikhaa rúʼko̱ niʼni ma’kiʼnáa wéñuuʼ Jonás. 2 Ikhaa jngóo niʼtákáñuu Jeobá: “Lá raʼkháa rígi̱ nimíñu’ marigá nákha nixtáá náa goʼwóʼ rá Jeobá. Ikhaa rúʼko̱ numuu dí nigayúʼ nijkhá Tarsis; numuu rí nda̱yo̱o̱ má dí ikháán nindxa̱a̱ʼ mbáa Dios bi̱ naʼngo̱o̱ a̱jkiu̱u̱n, bi̱ nagáwíinʼ a̱jkiu̱u̱n, tsékiʼnáán nacha̱ ga̱jma̱a̱ xtaʼdáá ngajua rí tsétumuu* ma̱ngaa dí naʼni ngíná a̱jkia̱a̱nʼ índo̱ narígá gamiéjunʼ. 3 Mbá péñu Jeobá, ataxíñúun mbá kayuuʼ, numuu rí itháán májánʼ makhañúʼ ki xóo maxtáá”.

4 Jeobá nirajxu̱u̱: “Lá naku̱ma̱a̱ʼ rí májánʼ dí makiʼnáá wéñuuʼ ráʼ.”

5 Ikhú Jonás nigájna̱a̱ náa xuajin ni̱jkha̱ gági̱ʼi̱ náa xígií nagájnuu a̱jkha̱ʼ. Ikhí niʼni mújúunʼ náa magi̱ʼi̱ ga̱jma̱a̱ ni̱gi̱da̱ʼ náa xkamixoo mu mbaʼyoo ndiéjunʼ gágíʼnuu xuajin. 6 Jeobá Dios niʼni dí makráʼáan yówóo̱ʼ ru̱jtu̱ mu maruʼwáminaaʼ náa gídáʼ Jonás, mu xúʼko̱ maʼni mijxoo mu xáminuuʼ wéñuuʼ. Jonás ra̱ʼkhá tháán nidxuu dí nikráʼáan yówóo̱ʼ ru̱jtu̱.

7 Mú índo̱ nijtsiri̱ga̱ dí imbo̱ʼ mbiʼi, Dios bi̱ gajkhun niʼni dí mbáa ñu̱u̱* mi̱khu̱ yówóo̱ʼ ru̱jtu̱, ikhú yúwáʼ nijndooʼ. 8 Índo̱ nimbiʼiti̱ga̱ a̱jkha̱ʼ, Dios ma̱ngaa niʼni rí maxnúu mbá giñánxooʼ dí na̱ʼkha̱ xígií náa nagájnuu a̱jkha̱ʼ, ra̱ʼkhá tháán mijkha niʼni dí asndu nagíʼ makamínduu Jonás. Ikha jngóo na̱nda̱ʼa̱ má xúʼko̱ rí makhañúu. Naʼthí: “Itháán májánʼ makhañúʼ ki xóo maxtáá”.

9 Ikhú Dios nirajxu̱u̱ Jonás: “Lá rígá mbá numuu dí makasgáñáaʼ wéñuuʼ ga̱jma̱a̱ numuu rí nijndooʼ yówóo̱ʼ ru̱jtu̱ ráʼ.”

Ikhaa niriʼñuu: “Rígá láʼ tá, ra̱ʼkhá tháán kasngáñu̱ʼ rí asndu nandoʼ makhañúʼ”. 10 Mú Jeobá niʼthúu̱n: “Ikháán nagáwíinʼ a̱jkia̱a̱nʼ eʼni yówóo̱ʼ ru̱jtu̱ dí na̱nguá nitiejwíínʼ ni má tátani makráʼáan, káʼ mbá mbruʼún ndi̱ja̱a̱ ga̱jma̱a̱ káʼ mbá mbruʼún nikháñuu”. 11 Lá xáʼyóoʼ magáwíinʼ a̱jkiu̱nʼ ikhúún ka̱yo̱o̱ xuajin mba̱a̱ Nínive, náa kúwá itháán dí 120,000 xa̱bu̱ ga̱jma̱a̱ mbaʼin xujkiún bi̱ asndu tséyáá dí nindxu̱u̱ májánʼ ga̱jma̱a̱ dí ra̱májánʼ rá’.