MIQUEAS
1 Rígi̱ nindxu̱u̱ ajngóo Jeobá rí nigruigú Miqueas* bi̱ na̱ʼkha̱ náa Moréset nákha mbiʼi rí nixtáa raʼtáñajunʼ Jotán, Acaz ga̱jma̱a̱ Ezequías xóo rey náa Judá, niwasngájmáá rí magíʼnuu Samaria ga̱jma̱a̱ Jerusalén:
2 “¡Gudxawíínla xa̱bu̱ bi̱ ku̱wa̱a̱nʼ náa xúgíʼ xuajin!
Ku̱ba̱ʼ, araxnátiʼñaminaʼ matadxawíín, xúʼko̱ má bi̱ kuwáanʼla ikhí.
Tátá Jeobá bi̱ itháán mba̱a̱ ganindxu̱u̱ testigo náa ikháanʼla,
Jeobá bi̱ xtáa náa goʼwóo rí mikaʼwu.
3 ¡Gu̱ya̱a̱! Jeobá xtáa ragájnuu náa xtáa,
magajtaa ga̱jma̱a̱ makujmbiri̱ga̱ kúbá dí rígá náa ku̱ba̱ʼ.
4 Kúbá majuiya̱a̱ʼ náa agoo rajkhúu
mata mawiʼtájngaa
xóo éjthi̱i̱n rí nakha náa aguʼ,
xóo iyaʼ índo̱ nagajtaa náa frájkoo.
5 Nirígá xúgíʼ rígi̱ numuu dí nikujximínáʼ Jacob,
ga̱jma̱a̱ numuu aʼkhá rí nikudaminaʼ goʼwóo Israel.
Tsáá gíʼdoo aʼkhúun rí nakuximinaʼ Jacob rá.
Lá raʼkháa Samaria ráʼ.
Tsáá lá gíʼdoo aʼkhúun dí náa Judá rígá mbaaʼ náa nduyamajkhún xándú xá.
Lá raʼkháa Jerusalén ráʼ.
6 Ma̱ni̱ dí Samaria mani̱ndxu̱u̱ xóo mbá ru̱tsu̱u̱ dí naguma gámbáa ga̱jma̱a̱ maʼni̱i̱ xaná,
maʼni̱i̱ mbá mbaaʼ náa miʼdu uva,
itsí rí nijmaa mu maguma ga̱jma̱a̱ mada̱ʼ náa mata
ga̱jma̱a̱ pa̱jnu gániʼñúunʼ rajkhúu.
7 Xúgíinʼ xándú bi̱ nigumawíin majmiguiin,
xúgíʼ regalo rí ikhaa nikhánáá índo̱ nigujuamínáʼ mikha̱a̱.
Ma̱ni̱ gámbíin xúgíinʼ xándú,
numuu rí nigímbíin ga̱jma̱a̱ rí nidaaʼ náa nigujuamínáʼ,
ga̱jma̱a̱ ikhaa má gájmúún eʼwíinʼ muni̱ numún bi̱ nugujuamíjna̱”.
8 Ikha jngóo mandxa̱ʼwa̱ ga̱jma̱a̱ mambi̱ya̱ʼ ngínúʼ,
i̱ndó rajkúʼ ga̱jma̱a̱ tsaʼtsúúnʼ gájngruigo̱ʼ.
Mandxa̱ʼwa̱ xó má nundxa̱ʼwa̱ chacal,*
maguwanʼ xó má nuni̱ avestruz.
9 Numuu rí nda̱a̱ xóo maguma thanáá náa nigawúunʼ,
ni̱jkha̱nú asndu náa Judá.
Gamiéjunʼ ni̱jkha̱nú asndu náa xkrugoo xuajñunʼ, asndu náa Jerusalén.
10 “Xútala náa Gat dí nirígá,
asndu xáʼkha̱ a̱jkia̱la mumbiyaʼla.
Náa Bet-Afrá gurmbíjximijna̱la̱ náa yujndaʼ.
11 Xa̱bu̱ bi̱ kuwáanʼ náa Safir ga̱tiyala ga̱jma̱a̱ tsaʼtsáanʼ gúʼguala.
Xa̱bu̱ bi̱ kúwá náa Zaanán na̱nguá nigájnún.
Bet-Ezel nindxu̱u̱ náa nitambáyuminaʼ mú rí xúgi̱ i̱ndó xtambiyaʼ ngíná rígá ikhí.
12 Numuu rí xa̱bu̱ Marot niguáʼthi̱i̱n marigá mbá rí májánʼ,
mú dí ra̱májánʼ nigajtaa náa Jeobá asndu náa xkrugoo Jerusalén.
13 Xa̱bu̱ bi̱ kuwáanʼ náa Lakís gurajmíin wáyú náa carro.
Ikháanʼ ni̱ni̱ rí wáxióo* Sion magíʼdu̱u̱ makiéʼkhun,
numuu rí mangáán* nitaxújximinaʼ xó má niʼni Israel.
14 Ikha jngóo ikháán maraxna̱a̱ regalo índo̱ gáʼga̱a̱ Moréset-Gat.
Xa̱bu̱ bi̱ kúwá náa Aczib nini̱ nduwiinʼ reyes bi̱ kúwá náa Israel.
15 Ikha jngóo ma̱ni̱ rí bi̱ nagruigú xuajin maʼga̱nú asndu náa ikháanʼla xa̱bu̱ bi̱ kuwáanʼ náa Maresá.
Gamajkhu rí majuixnáá Israel maʼga̱nú asndu náa Adulam.
16 Gurujtu tátsiala, gu̱da edxala ga̱jma̱a̱ numún e̱jña̱la bi̱ nandala kuñu̱u̱n.
Tsaʼtsaʼ edxala guniʼñááʼ xó má ndxáʼan,*
numuu rí nigajta káʼyala e̱jña̱la mu maʼga kiʼdiin”.
2 “¡Gíníinla bi̱ nuri̱ya̱ʼ awan muni̱ dí ra̱májánʼ,
nundxaʼwamíjna̱ xóo gúni̱ índo̱ jngútámíinʼ náa xiawu̱ún!
Awan dí niriyaʼ, nunimbáníí índo̱ najtsiri̱ga̱,
numuu rí ikhiin guáʼdáá tsiaki̱i̱ mu̱ni̱.
2 Nanigu̱u̱nʼ mbaaʼ ga̱jma̱a̱ nundrigú,
nanigu̱u̱nʼ guʼwá, naguanún ga̱jma̱a̱.
Nuninduwaaʼ mbáa xa̱bu̱ mu maguanún ga̱jma̱a̱ goʼwóo,
nurawí káyííʼ mbáa xa̱bu̱ rí nigruigúu.
3 Ikha jngóo rígi̱ nindxu̱u̱ rí naʼthí Jeobá:
‹Gu̱ya̱a̱, xtáá randxa̱ʼwa̱mínáʼ rí ma̱ʼkhá ka̱yo̱ʼ mbá gamiéjunʼ náa xúgíinʼ xa̱bu̱ bugi̱ náa nimbáa xáʼngo̱o̱ gákríyáaʼ.
Nimbáa ni xájngruigo̱o̱ raʼnimbamínáʼ numuu rí mani̱ndxu̱u̱ mbá mbiʼi dí marigá gamiéjunʼ.
4 Mbiʼi rúʼko̱ xa̱bu̱ muthi ga̱jma̱a̱ numala,
mumbi̱ya̱ʼ ngínún ga̱jma̱a̱ numuu rí niguáʼnííla.
Muthi: “¡Niguma gámbáanʼxu̱ʼ mbá kayuuʼ!
Dios nixnún eʼwíinʼ rí kaʼyuxu̱. ¡Nigájnú káʼyúxu!
Bi̱ tséyamajkuíí, nixnún mbayuxu”.
5 Ikha jngóo ní xáxtáa nimbáa bi̱ matíga ñuñuu rí naxtiéwan ga̱jma̱a̱,
bi̱ marui̱ʼta̱a̱ ku̱ba̱ʼ náa xuajñuu Jeobá.
6 Ikhiin nuthi, “¡Guniʼñáánʼ rutaráʼa!”.
“Xáʼyóoʼ mutaráʼa ga̱jma̱a̱ numuu rígi̱.
¡Ma̱jti̱ʼ xáʼngo̱o̱ gáxkamáanʼlú!”.
7 E̱ji̱i̱n Jacob, lá nidxawíín rí xa̱bu̱ jngruigu̱u̱n ruthi ráʼ.
“Lá nánguá eʼngo̱o̱ a̱jkiu̱u̱n Jeobá jngóo ráʼ.
Lá rígi̱ nindxu̱u̱ rí naʼni xáʼ.”
Ikháanʼ má ndu̱ya̱a̱ rí maniu̱u̱ rí májánʼ bi̱ naʼni xóo má kaʼyoo.
8 Ndiʼkúú kayuuʼ, rí xuajñunʼ má nikujximínáʼ xóo mbáa bi̱ sia̱nʼ ga̱jmu̱ʼ.
Ikháanʼ bi̱ asndu tsétiyala erígú káʼñúnʼ xtíñún kiejuunʼ
bi̱ mbóó a̱jkiu̱ún nanújngi̱ín náa ikháanʼla xóo bi̱ naguwáanʼ náa guerra.
9 Nuxkawíin gu̱ʼú xuajñunʼ náa guʼwún rí nanigu̱u̱nʼ makuwá,
mbájkhu erígú káʼñúnʼla e̱jñu̱ún rí ikhúún nini̱ tsajkurámíinʼ.
10 Guguájxu̱ ga̱jma̱a̱ gaʼguala, numuu rí náa mbaaʼ rígi̱ na̱nguá nindxu̱u̱ náa rí mbuya̱a̱ jxa̱la.
Naguma gámbáa numuu dí narígá rí mitsaga, ngíná nindxu̱u̱ xóo naguma gámbáa.
11 Á mu mbáa xa̱bu̱ jngruigo̱o̱ rayáʼ dí ragíʼdoo numuu,* naʼni nduwáanʼ ga̱jma̱a̱ naʼthála,
“Ikháán maraʼdáá mba̱ji̱nʼ vino ga̱jma̱a̱ iyaʼ najngaa”,
¡xa̱bu̱ buʼko̱ matandri̱guíi mu mani̱ndxu̱u̱ profeta ndrígáaʼ!
12 Gajkhun rí magímbi̱ín xúgíinʼ e̱ji̱i̱n Jacob,
xúʼko̱, magímbíin bi̱ naguanún náa Israel.
Magímbíin mu makuwá mbóó xóo mugu̱ náa mbá gúláa,
xóo mugu̱ bi̱ gíi̱nʼ náa rajxa̱,
ikhí mawán rí nundxa̱ʼwa̱ xa̱bu̱›.
13 Bi̱ gármbáʼtóo kamba̱a̱ maʼga̱ inún ikhiin,
murmbaʼtáá kamba̱a̱, manújngún náa xkrugua ga̱jma̱a̱ magajnún ikhí.
Rey ndrígu̱ún maʼga̱ ginii
ga̱jma̱a̱ Jeobá maxnún ikha xúgíinʼ”.
3 Ikhúún nitha̱: “Mbá péñu* gudxawíín bi̱ kuya̱ edxu̱u̱ náa goʼwóo Jacob,
ga̱jma̱a̱ ikháanʼla bi̱ nutañajúúnʼ xa̱bu̱ Israel.
Lá rakáʼyala muni̱ rí jmbu ráʼ.
2 Mú ikháanʼ nawi̱ya̱la kuya̱a̱ rí májánʼ ga̱jma̱a̱ nandala kuya̱a̱ dí ra̱májánʼ,
ga̱jma̱a̱ ikháanʼla nuriʼíí xtún xa̱bu̱ xuajñunʼ ga̱jma̱a̱ nundrígú xuñúnʼ i̱ndó i̱tsu̱ún guanúu.
3 Ma̱ngaa naphula xuñúúnʼ xa̱bu̱ xuajñunʼ,
nuriʼíí xtún,
nuxpígaʼ i̱tsu̱ún ga̱jma̱a̱ nurujkuinla,
xóo xuwiʼ ga̱jma̱a̱ itsu̱ rí na̱ʼga̱ náa daan.
4 Mbiʼi má rúʼko̱ munda̱ʼa̱a̱ Jeobá rí mambáñún,
mú ikhaa xáriʼñún.
Ikhú má, ikhaa markaʼwu inuu náa ikhiin
ga̱jma̱a̱ numuu dí ra̱májánʼ eni̱.
5 Rígi̱ rí naʼthí Jeobá ga̱jma̱a̱ numún profetas bi̱ nuni̱ dí magajnúriñu̱u̱ʼ xa̱bu̱ xuajñunʼ,
bi̱ nuthi ‹¡Rígá tsímáá!› índo̱ guáʼdáá rí naʼphu̱*
mú nuni̱ ratamijná muxmijná gajmiún bi̱ nda̱a̱ rí exnún mu̱phu̱:
6 ‹Ikháanʼ makuwáanʼla náa mikína, xáwasngájmala* nimbá,
náa ikháanʼla i̱ndó marigá mikína, xúni̱ xawan.
A̱jkha̱ʼ marámáaʼ náa profetas
ga̱jma̱a̱ rí mbiʼi mani̱ndxu̱u̱ mbruʼun náa ikhiin.
7 Xa̱bu̱ bi̱ nawasngájmún magajnúu gamajkhún,
ga̱jma̱a̱ xa̱bu̱ xawan, majmáa a̱jkiu̱ún.
Xúgíinʼ mbaʼyóoʼ muruguáá rawúúnʼ,*
numuu rí Dios xáriʼñún›”.
8 Mú ikhúún, núma̱aʼ má ga̱jma̱a̱ numuu espíritu ndrígóo Jeobá, gúʼdoʼ tsiaki̱i̱,
nambáyúʼ mu xámíñúʼ ma̱ni̱ rí jmbu,
mathu̱u̱n Jacob rí nakuximínáʼ ma̱ngaa aʼkhá rí nikudaminaʼ Israel.
9 Gudxawíín rígi̱ bi̱ kuya̱ edxu̱u̱ náa goʼwóo Jacob,
ga̱jma̱a̱ ikháanʼla bi̱ nutañajúúnʼ xa̱bu̱ Israel,
ikháanʼla bi̱ nuni̱ rí májánʼ mani̱ndxu̱u̱ ra̱májánʼ,
10 nuʼgíʼla Sion ga̱jma̱a̱ eʼdiún xa̱bu̱ ma̱ngaa nuni̱ dí raʼkhí mu muʼgíʼ Jerusalén.
11 Bi̱ kuya̱ edxu̱u̱ náa ikháanʼla nundrigú regalo mu mumbayíí mbáa xa̱bu̱ índo̱ nunimbaníí numuu,
ndxajkun bi̱ guáʼdiinla nudaaʼ mu musngáa
ga̱jma̱a̱ profeta bi̱ kúwá náa ikháanʼ nuruma mu muni̱ xawan.
Maski ajndu nuni̱ xígi̱ kaʼnii, numbayúmíjná náa Jeobá, nuthi:
“Lá na̱nguá xtáa Jeobá ga̱jma̱á nindxu̱lú ráʼ.
Xáʼkha̱ nimbá gamiéjunʼ náa ikháánʼlú”.
12 Ga̱jma̱a̱ numuu rí ikháanʼla nikiéʼkala,
Sion mani̱ndxu̱u̱ xóo mbá ku̱ba̱ʼ dí muxnáá xku̱bi̱,
Jerusalén mani̱ndxu̱u̱ xóo mbá ru̱tsu̱u̱ dí niguma gámbáa
náa kúbá dí grígu Guʼwá* mani̱ndxu̱u̱ xóo mbá bíjní náa rígá i̱ndó ixi̱.
4 Náa iwáá mbiʼi,
kúbá náa rígá goʼwóo Jeobá
mawi̱ji̱ gújkhúʼ ga̱jma̱a̱ manújngo̱ó náa inuu i̱ʼwáʼ kúbá,
mawi̱ji̱ mitsídánʼ náa inuu xúgíʼ bíjní,
ikhí magún xúgíinʼ xa̱bu̱.
2 Mbaʼin xa̱bu̱ magún ga̱jma̱a̱ muthi:
“Gu̱ʼgua̱, gu̱tsimulú náa kúbá ndrígóo Jeobá,
náa goʼwóo Dios ndrígóo Jacob.
Ikhaa masngájmulú kambo̱o̱,
ga̱jma̱a̱ ikháánʼlú majngruigulú náa kambo̱o̱”.
Numuu dí xtángoo* magajnúu náa Sion,
ga̱jma̱a̱ ajngóo Jeobá ma̱ʼkha̱ náa Jerusalén.
3 Ikhaa mani̱ndxu̱u̱ bi̱ maʼnimbánuu xkujndu ndrígu̱ún mbaʼin xa̱bu̱
ga̱jma̱a̱ maʼnimbánuu numún xa̱bu̱ bi̱ kúwá náa xuajin rí gíʼdoo itháan tsiaki̱i̱ dí rígá mitsínguánʼ.
Xa̱bu̱ xuajin ni xúxujxi̱ espada mu muxmijná ga̱jma̱a̱
ni má xájmañún muni̱ itháan guerra.
4 Mámbáa gági̱ʼi̱ náa agoo ixi̱ uva ndrígóo ga̱jma̱a̱ náa agoo ixi̱ higo,
ga̱jma̱a̱ nimbáa xáʼnimíñún,
numuu rí Jeobá bi̱ naʼtáñajúúnʼ ángeles niʼthí.*
5 Numuu rí xúgíinʼ xa̱bu̱ munimbu̱ún kuyáá mbiʼyuu* dios ndrígu̱ún,
mú ikháánʼlú muʼnimbulú kuʼyáá mbiʼyuu Jeobá Dios ndrígulú asndu kámuu.
6 “Mbiʼi rúʼko̱, eʼthí Jeobá,
magímbíin bi̱ nurajmbúunʼ
ga̱jma̱a̱ magímbíin bi̱ nijuidíríʼiin,
mbóó gajmiún bi̱ ni̱ni̱ gawúúnʼ.
7 Bi̱ nurajmbúunʼ ma̱ni̱ rí mani̱ndxu̱ún mbá nguéjmi̱i̱n,
ga̱jma̱a̱ bi̱ ni̱jkha̱ kiʼdiin mitsínguánʼ, ma̱ni̱ rí mani̱ndxu̱ún mbá xuajin rí gíʼdoo tsiaki̱i̱,
ga̱jma̱a̱ Jeobá maʼtáñajunʼ ikhiin náa kúbá Sion
nákha xúgi̱ ga̱jma̱a̱ asndu kámuu.
8 Ga̱jma̱a̱ ikháán, torre rí nañewu̱u̱n mugu̱,
bíjní chíʼgíiʼ* ndrígóo wáxióo* Sion,
matanga̱án maratañájunʼ xóo nákha ginii, xúʼko̱, matanga̱án,
náa kaʼyoo maʼtáñajunʼ wáxióo Jerusalén.
9 Náá numuu rí natatsaʼwá gakhi̱i̱ wéñuuʼ rá.
Lá nánguá xtaʼdaa rey
o nikháñuu bi̱ naxnáaʼ consejo
ikha jngóo natatsaʼwá rí naʼkhui̱i̱n xóo mbáa a̱ʼgu̱ bi̱ nagiʼdaa ada̱ ráʼ.
10 Atarngajtsíminaʼ wáxióo Sion ga̱jma̱a̱ numuu rí naʼkhui̱i̱n,
xóo mbáa a̱ʼgu̱ bi̱ xtáa ragiʼdaa a̱ʼdióo,
numuu rí xúgi̱ muxkriña̱a̱nʼ náa xuajin ga̱jma̱a̱ midxuʼ gáraxtaa náa xaná.
Midxuʼnú asndu náa Babilonia
ga̱jma̱a̱ ikhí maguma kríña̱a̱nʼ,
ikhí Jeobá maʼni kríña̱a̱nʼ náa ñawúúnʼ bi̱ sia̱nʼ gajmiáanʼ.
11 Ikha jngóo mbaʼin xa̱bu̱ bi̱ kúwá náa mbaʼa xuajin magimbíin muxmijná ga̱jma̱á nindxa̱a̱ʼ,
ikhiin muthi: ‹Gaguma tsagáá Sion,
guʼyáá xóo gáguma gámbáa›.
12 Ikhiin tséyáá rí endxaʼwámínaʼ Jeobá
ni má tsékru̱ʼu̱u̱n rí eyoo maʼni,
ikhaa magímbíin xóo ru̱tsu̱u̱ trigo náa naxtujtsi̱i̱ tsígáʼ.
13 Arajxu̱ ga̱jma̱a̱ ataxujmbi̱i̱ tsígáʼ wáxióo Sion,
numuu rí ma̱ni̱ rí chijya̱a̱ʼ maʼni̱i̱ hierro
ga̱jma̱a̱ tsájáaʼ mani̱ndxu̱u̱ cobre,
ikháán matani̱ gámbáa mbaʼa xuajin.
Xúgíʼ rí nudaaʼ ikhiin náa nuninduwaʼ maraxna̱a̱ Jeobá,
ga̱jma̱a̱ xúgíʼ rí guáʼdáá maraxnajxí náa Tátá bi̱ gajkhun bi̱ naʼtáñajunʼ náa xúgíʼ ku̱ba̱ʼ”.
5 “Rí xúgi̱ ikháanʼla nurujtumijná
xa̱bu̱ bi̱ kuwáanʼ náa xuajin
rí niruguama̱ʼa̱a̱n.
Ga̱jma̱a̱ mbá xkuíyá nuxnáá inuu bi̱ naʼnimbánuu xkujndu náa Israel.
2 Ikháán, Belén Efrata,
nindxa̱a̱ʼ chíʼgíiʼ* wéñuuʼ náa majñu̱u̱ʼ i̱ʼwáʼ xuajin dí rígá náa Judá,
náa ikháán magajnúu mbáa bi̱ maʼtáñajunʼ náa Israel,
nigumaa nákha wajyúúʼ, asndu nákha kawáá mbiʼi.
3 Ikha jngóo ikhaa maniñala
asndu mbiʼi dí a̱ʼgu̱ magiʼdaa a̱ʼdióo bi̱ magu̱ ewáan.
A̱ngui̱i̱n bi̱ xóó naguanún matangi̱i̱n náa xuajin Israel.
4 Ikhaa mawi̱ji̱ ga̱jma̱a̱ mañewu̱u̱n xa̱bu̱ xuajñuu ga̱jma̱a̱ tsiaki̱i̱ ndrígóo Jeobá,
núma̱aʼ má ga̱jma̱a̱ numuu rí mbiʼyuu Jeobá Dios ndrígóo nindxu̱u̱ mba̱a̱.
Ga̱jma̱a̱ ikhiin xámíñún makuwá,
numuu rí ikhú, dí xóo mba̱a̱ nindxu̱u̱ mawánrígo̱o̱ asndu náa naguámbári̱go̱o̱ ku̱ba̱ʼ.
5 Ikhaa ma̱ʼkha̱ kayóo rí tsímáá.
Á mu bi̱ asirio gátu̱ʼu̱u̱n mundri̱gú xuajñulú ga̱jma̱a̱ nuni̱ gámbáa torre rí wájun gújkhúʼ,
muxuʼmíin magún náa ikhiin mbá juwiin baxtúu, xúʼko̱, mbá migiñiiʼ príncipes bi̱ kúwá náa numbaaʼ.
6 Ikhiin muxmijná* ga̱jma̱a̱ espada náa ku̱ba̱ʼ ndrígóo Asiria
asndu maguáʼnu náa ndawaa ndrígóo ku̱bo̱o̱ʼ Nemrod.
Ikhaa maʼni káwáanʼlu náa bi̱ asirio
índo̱ gátu̱ʼu̱u̱n náa ku̱bulú mundri̱gú ga̱jma̱a̱ muni̱ gámbáa mbayulú.
7 Bi̱ gáguanún náa Jacob náa majñu̱u̱ʼ mbaʼa xuajin
mani̱ndxu̱ún xóo xuájyaʼ dí nagajtaa náa Jeobá,
xóo ruʼwa gakhi̱i̱ rí naxnúu náa rígá iná maxaʼ,
bi̱ na̱nguá kua̱ʼthi̱i̱n nimbá náa mbáa xa̱bu̱ú
ní ma tsékumu̱ún kuñún e̱jñu̱ún xa̱bu̱.
8 Bi̱ gáguanún náa Jacob náa majñu̱u̱ʼ mbaʼa xuajin mba̱ʼu̱,
ma̱ngaa náa majñu̱únʼ mbaʼin xa̱bu̱,
xó má mbáa león bi̱ xtáa náa majñu̱únʼ xujkhúʼ xáná,
xóo mbáa león gújkuiiʼ* náa majñu̱únʼ mugu̱,
bi̱ nanújngoo, nagudíin ga̱jma̱a̱ narujkuiin.
Ndawa̱a̱ nimbáa bi̱ maʼni káwíin.
9 Mataxujxí ñawáanʼ numuu rí niʼnga̱a̱ʼ nitani̱ gajmiáanʼ xa̱bu̱ sia̱nʼ ndrígáaʼ,
ga̱jma̱a̱ xúgíinʼ xa̱bu̱ sia̱nʼ ndrígáaʼ maguma gámbíin”.
10 “Mbiʼi rúʼko̱, eʼthí Jeobá,
ma̱ni̱ gámbíin wáyáaʼ ga̱jma̱a̱ carro rí xtaʼdáá.
11 Ma̱ni̱ gámbáa xuajin dí rígá náa ku̱ba̱a̱ʼ
ga̱jma̱a̱ ma̱ni̱ gámbáa xúgíʼ xtájtsí ndrígáaʼ rí wájun gújkhúʼ.
12 Ma̱ni̱ gámbáa xawan rí natani̱,*
ga̱jma̱a̱ xáguanúu nimbáa bi̱ naʼni magia náa ikháán.
13 Ma̱ni̱ gámbíin xándú bi̱ kiʼniwíin, ga̱jma̱a̱ poste rí mitsúʼkháan* dí rígá náa majña̱a̱ʼ,
ní xátasmbatíga̱a̱ʼ náa inún bi̱ nitani̱wíin.
14 Maxmajuíi poste rí mitsúʼkháan dí rígá náa majña̱a̱ʼ
ga̱jma̱a̱ ma̱ni̱ gámbáa xuajñanʼ.
15 Makiʼnún ga̱jma̱a̱ makásngañu̱ʼ
índo̱ gáni̱ rí mumíniiʼ xa̱bu̱ bi̱ túnimbu̱u̱n”.
6 Mbá péñu,* gudxawíín dí naʼthí Jeobá.
Gatu̱jxa̱la̱, gaʼni inuu kúbá índo̱ gúxruíga̱ xkujndu ndrígala,
bíjní gaʼdxawun aʼwála.
2 Kúbá, gudxawíín rí gíʼdoo makrui̱ga̱ Jeobá,
rajkhúu ku̱ba̱ʼ rí wájun gújkhúʼ gudxawíínla,
numuu rí Jeobá gíʼdoo mbá xkujndu ga̱jma̱a̱ xuajñuu,
gíʼdoo mbá rí makruiga̱ ga̱jma̱a̱ numuu Israel:
3 “Xuajñunʼ, ndiéjunʼ ni̱nia̱a̱ʼ ikhúún rá.
Dí lá ni̱ni̱ mu maʼni néʼnga̱a̱ʼ rá.
Atriʼñuʼ mbá péñu.
4 Numuu rí ikhúún niríña̱a̱ʼ náa ku̱ba̱ʼ ndrígóo Egipto,
ninikríña̱a̱ʼ náa ku̱ba̱ʼ rí ninindxa̱a̱ʼ ñumbáá,
nikuʼmáa maʼga inaaʼ Moisés, Aarón ga̱jma̱a̱ Míriam.
5 Xuajñunʼ, mbá péñu garmáʼáan a̱jkia̱a̱nʼ rí nigíʼ maʼni rey Balac náa Moab
ga̱jma̱a̱ dí niriʼñuu Balaam a̱ʼdióo Beor,
dí nirígá náa Sitim asndu náa Guilgal,
mu matatsiʼnúuʼ xúgíʼ rí májánʼ rí niʼni Jeobá”.
6 Ndiéjunʼla gáya̱ gáʼgá náa inuu Jeobá rá.
Ndiéjunʼla gásmbatígo̱ʼ ga̱jma̱a̱ náa inuu Dios bi̱ xtáa mitsídánʼ rá.
Lá maʼgá kagui̱i̱n xedi̱ bi̱ mbá tsigúúnʼ mu maxnajxíin,
xóo tsigijñaʼ rí mikarámáʼ ráʼ.
7 Lá maxtáa gagi Jeobá ga̱jma̱a̱ mbaʼin mugu̱ e̱jmba̱a̱ ráʼ.
Lá maxtáa gagi ga̱jma̱a̱ mba̱ji̱nʼ wéñuuʼ aceite xáʼ.
Lá maxnajxíi a̱ʼdá giʼniuʼ ga̱jma̱a̱ numuu rí nikujxímínaʼ ráʼ.
Lá maxnajxíi a̱ʼdióʼ ga̱jma̱a̱ numuu aʼkhúnʼ ráʼ.
8 Ikháanʼla xa̱bu̱ numbaaʼ, ikhaa naʼtála ndiéjunʼ rí nindxu̱u̱ májánʼ.
Ndiéjunʼ dí Jeobá gíʼthu̱u̱n mu̱nila ikháanʼ rá.
¡I̱ndó rí muni̱ xó má kaʼyoo,* maʼndala ku̱ya̱a̱ rí jmbu*
ga̱jma̱a̱ manindxala xa̱bu̱ guabáanʼ índo̱ gájngruigala gajmiála Dios ndrígala!
9 Aʼwóo Jeobá nawáán náa xuajin,
bi̱ guáʼdáá ku̱ma̱ rí májánʼ mamiñún kuyáá mbiʼyaaʼ.
Gu̱nimba̱la kuya̱a̱ xkuíyá ga̱jma̱a̱ bi̱ nigíʼ.
10 Lá kaʼníí rígá náa goʼwóo xa̱bu̱ xkawi̱i̱ʼ dí gíʼdoo numuu nidaaʼ índo̱ niʼni dí raʼkhí xáʼ.
Lá kaʼníí rígá ikhí efá* dí tségiewan májánʼ dí nindxu̱u̱ xkawiʼ ráʼ.
11 Lá ma̱ndoo mani̱ndxu̱ʼ mbáa xa̱bu̱ bi̱ nda̱a̱ aʼkhúun ga̱jma̱a̱ balanzas rí naʼni nduwaʼ,
ma̱ngaa mbá búxá náa gajti itsí rí tségiewan májánʼ ráʼ.
12 Numuu rí xa̱bu̱ bi̱ guáʼdáá, xkawiʼ a̱jkiu̱ún
ga̱jma̱a̱ xa̱bu̱ bi̱ kúwá ikhí nuthi rí minduwaʼ,
najmún rawúúnʼ ga̱jma̱a̱ rajúún mu muni̱ nduwaʼ.
13 “Ikha jngóo maxna̱a̱ʼ asndu ma̱ni̱ gawáanʼ,
ma̱ni̱ rí maguanáaʼ mbáwíín ga̱jma̱a̱ numuu aʼkháanʼ.
14 Matatsiʼtsu, mú xágiʼmaaʼ,
maxki̱dxa̱a̱ʼ má xúʼko̱.
Rí gáʼngo̱o̱ gárawíi, xídxúʼ xtaaʼ náa maxtagijxi̱i̱,
rí gídxúʼ xtaaʼ maxnajxí náa inuu espada.
15 Matadu, mú nimbá xárajxi̱i̱.
Mataxujmbíi aceitunas, mú xájmaaʼ aceite,
mataxujmbíi uva, mú xágíin vino.
16 Numuu rí ikháanʼ nunimbáníí kiʼtáñajunʼ ndrígóo Omrí ga̱jma̱a̱ nu̱ni̱ xúgíʼ rí nini̱ náa goʼwóo Acab,
ma̱ngaa nunimbáníí consejo ndrígu̱ún ikhiin.
Ikha jngóo ma̱ni̱ rí manindxa̱a̱ʼ mbá gamíi náa eʼwíinʼ
ga̱jma̱a̱ xa̱bu̱ xuajin mani̱ndxu̱ún náa mujuiyú,
ma̱ngaa ikháanʼla mbaʼyóoʼ rí maʼngo̱o̱ a̱jkia̱la rí mawiñu̱u̱nʼ kuyala xa̱bu̱ bi̱ kúwá náa i̱ʼwáʼ xuajin”.
7 ¡Ngínula ikhúún! Nindxu̱ʼ xó mbáa bi̱,
nda̱wa̱á rí nixtagijxi̱i̱ xndú taun rí najma̱a̱ ruʼphu
ga̱jma̱a̱ nda̱wa̱á rí nigajta̱a̱ uva,
na̱nguá nixkamaa nimbá juáyúu uva mi̱khu̱
ni má nimbá higo dí ra̱ʼkhá tháán nandoo mi̱khu̱.
2 Ndáwa̱a̱ náa tsu̱du̱u̱ ku̱ba̱ʼ xa̱bu̱ bi̱ naʼni xó má kaʼyoo,
náa majñu̱únʼ xa̱bu̱ ndawa̱a̱ nimbáa bi̱ nindxu̱u̱ jmbii.
Xúgíinʼ nubú ngu̱ʼwu̱u̱n mu muradíin a̱ngiu̱ún.
Mámbáa nagíʼ tsáʼkhá mu magujtuwiin ndxájuu.
3 Ñawúúnʼ ra̱ʼkhá tháán jma̱ñuun maʼni dí ra̱májánʼ,
príncipe ra̱ʼkhá tháán mbaʼa rí e̱nda̱ʼa̱,
bi̱ naʼni mbánúu xkujndu na̱nda̱ʼa̱ rí madaaʼ,
xa̱bu̱ bi̱ gíʼdoo numuu naʼthí rí nandoo maʼni,
xúgíinʼ nuxujximíjna̱.
4 Bi̱ itháán najmañuu náa ikhiin nindxu̱u̱ xóo tsuwanʼ,
bi̱ itháan jmbii náa ikhiin nindxu̱u̱ itháan mixkawi̱i̱ʼ xóo gúláa rí tsuwanʼ.
Mú maʼga̱nú mbiʼi rí nithi bi̱ nuyejngoo bi̱ ikháán nitandri̱gi̱i̱n, mbiʼi rí mixtanda̱ʼa̱a̱ cuenta.
Ikhú ni xúyáá rí muni̱.
5 Xákúma̱a̱ʼ xtayáá xa̱bu̱ numbaaʼ ga̱jma̱a̱ʼ
ni má xáku̱ma̱a̱ʼ xtayáá bi̱ itháán nambájxa̱a̱ʼ ga̱jma̱a̱ʼ.
Tsumáála dí naratháán bi̱ jcháraʼaa.
6 Numuu rí dxámá mawi̱yu̱u̱ʼ kaʼyoo anu̱u̱,*
dxáʼgú magiʼdoo xkujndu ga̱jma̱a̱ ru̱dúu̱*
guʼgúúnʼ magiʼdoo xkujndu ga̱jma̱a̱ dxa̱giu̱u̱,
xa̱bu̱ sia̱nʼ ndrígóo mbáa, mani̱ndxu̱ún xa̱bu̱ bi̱ kúwá náa goʼwóo.
7 Mú ikhúún maxtáá xawii má xúʼko̱ náa Jeobá.
Maʼngo̱o̱ a̱jkiu̱nʼ magúʼthu̱u̱n má xúʼko̱ náa Dios bi̱ maʼni kríñu̱u̱nʼ.
Dios ndrígóʼ maʼdxawunʼ.
8 Xa̱bu̱ sia̱nʼ ndrígóʼ, xáʼdxuu a̱jkia̱a̱nʼ e̱ni̱.
Maski má nixpátrigu̱u̱n, mú matujxi̱i̱ʼ,
maski má xtáá náa mikína, Jeobá mani̱ndxu̱u̱ agiuʼ.
9 Maʼngo̱ʼ índo̱ gákiʼnáa Jeobá,
numuu rí nikiéʼkhúnʼ náa ikhaa
asndu índo̱ ikhaa gáʼnimbánuu numuʼ ga̱jma̱a̱ magumún xó má kaʼyoo.
Ikhaa ma̱ʼkha̱a̱ kañún náa rígá aguʼ,
ikhúún mba̱yo̱o̱ xóo gáʼni rí nindxu̱u̱ jmbu.
10 Xa̱bu̱ sia̱nʼ ndrígóʼ mbaʼyoo rígi̱,
magajnúu gamajkuu bi̱ niʼthúnʼ
“Náá xtáa Jeobá Dios ndrígáaʼ rá.”
Ikhúún mínu̱u̱ʼ mba̱yo̱o̱.
Ikhú ikhaa mujngapri̱ga̱a̱ xóo ku̱ba̱ʼ rakha náa kamba̱a̱.
11 Mani̱ndxu̱u̱ mbá mbiʼi rí matani̱i̱ xtájtsí ndrígáaʼ,
mbiʼi rúʼko̱ maʼni̱i̱ mba̱a̱ mbayaaʼ.*
12 Mbiʼi rúʼko̱ maguwáʼ náa ikháán
bi̱ kúwá asndu náa Asiria ga̱jma̱a̱ náa xuajin ndrígóo Egipto,
náa Egipto asndu náa mañu Éufrates,
náa lamáa* asndu náa i̱mba̱ lamáa náa kúbá asndu náa i̱mba̱ kúbá.
13 Xuajin maguanáa ga̱jma̱a̱ numuu aʼkhúún xa̱bu̱ bi̱ kúwá ikhí,
rígi̱ gánindxu̱u̱ dí muda̱a̱ʼ ga̱jma̱a̱ numuu rí nini̱.
14 Atie̱wu̱u̱n xa̱bu̱ xuajñaanʼ ga̱jma̱a̱ xkuíyáaʼ, mugia̱a̱ʼ bi̱ kaʼyaaʼ,
bi̱ nikúwá ndajkuíín náa xaxi̱, náa majñu̱u̱ʼ mbá huerta.
Guphiʼtsu náa Basán ga̱jma̱a̱ náa Galaad xó má nákhá wajyúuʼ.
15 “Xó má nákhá nitagájnaaʼ náa ku̱ba̱ʼ ndrígóo Egipto,
masngajmúún xa̱bu̱ xuajñaanʼ rí mitsaanʼ.*
16 Xa̱bu̱ bi̱ kúwá náa i̱ʼwáʼ xuajin mbuyáá rígi̱ ga̱jma̱a̱ mati̱ñu̱u̱nʼ maski má ikhiin guáʼdáá tsiaki̱i̱.
Muruguáá rawúúnʼ ga̱jma̱a̱ ñawúúnʼ,
cháʼwúún magugóo.
17 Mu̱phu̱* yujndaʼ xó má a̱bu̱nʼ,
xó má xujkhúʼ bi̱ nuxmajtamijná* asndu naguíʼiin gágajnún náa kúwá.
Ra̱ʼkhá tháán gámíñún índo̱ gágún kanuu náa Jeobá Dios ndrígúlú,
mamiñún kuyaaʼ ikháán”.
18 Lá xtáa i̱mba̱a̱ Dios xóo ikháán,
bi̱ naʼni mba̱a̱ a̱jkiu̱u̱n kaʼyoo aʼkhá ga̱jma̱a̱ nanújngurámúunʼ aʼkhúún xa̱bi̱i̱ bi̱ xóó naguanún ráʼ.
Tsékasngañu̱u̱ʼ asndu kámuu,
numuu rí naʼni maʼdxuu a̱jkiu̱u̱n, nindxu̱u̱ ngajua rí tsétumuu.*
19 Ikhaa matanga̱a̱ magáwíinʼ a̱jkiu̱u̱n e̱nixu̱, maʼngo̱o̱ maʼni ga̱jma̱a̱ rí nikiéʼkuxuʼ.
Ikháán matadama̱ʼa̱n aʼkhúxu̱ asndu náa itháán mi̱jnu̱ʼ lamáa.
20 Matasngajmáá rí nandaaʼ xtayáá Jacob,
matasngajmáá ngajua rí tsétumuu Abrahán,
xó má niraxná ajngáa náa wajin xiʼñúxu nákhá wajyúuʼ.
Xóo nagumaraʼmáʼ ga̱jma̱a̱ nguáthá ajngáa mbiʼyuu Miguel náa ajngáa hebreo (rí nandoo gáʼthúu̱n ‹tsáá nindxu̱u̱ xóo Dios rá.›) o Micaya (rí nandoo gáʼthúu̱n ‹tsáá nindxu̱u̱ xóo Jeobá rá.›)
Xujkhúʼ bi̱ xóo xu̱wánʼ kaʼniún bi̱ najmangu̱u̱nʼ.
O “a̱ʼdée dxáʼgú”.
Mbáa nindxu̱u̱ wáxióo Sion.
Náa ajngáa hebreo ma̱ngaa nandoo gáʼthúun biyú.
Náa ajngáa hebreo naʼthí, “na̱jkha̱ kidxuuʼ giñánʼ”.
O “Guni̱ mbá rí májánʼ”.
Náa ajngáa hebreo naʼthí, “naʼphu̱xpa̱ ga̱jma̱a̱ iñúúnʼ”.
O “visión”.
O “muruguáá stawúúnʼ”.
O “náa bíjní dí grígu guʼwá rí nduyamajkuíí Dios”.
O “ikha”.
Náa ajngáa hebreo naʼthí, “rejóo arado”.
O “lanza”.
Náa ajngáa hebreo naʼthí, “rawuunʼ Jeobá bi̱ naʼtáñajúúnʼ ángeles”.
Náa ajngáa hebreo naʼthí, “majngruigu̱u̱n náa”.
O “lajuíin”.
O “a̱ʼdée dxáʼgú”.
O “lajuíin”.
O “muñewu̱u̱n”.
O “león bi̱ gíʼdoo xtátsiu̱u̱n náa aphuu”.
Náa ajngáa hebreo naʼthí, “xawan rí naʼni ñawáanʼ”.
Atayáá glosario, poste rí mitsúʼkháan.
O “Guni̱ mbá rí májánʼ”.
O “xúraʼwíin xa̱bu̱”.
O “mbóó a̱jkia̱a̱n gátani̱ índo̱ gáʼndaaʼ xtayáá mbáa”. Náa ajngáa hebreo naʼthí, “gaʼndaaʼ xtayáá ngajua rí tsétumuu”.
Atayáá glosario, efá.
O “tátée”.
O “nánée”.
O mbáa “kiʼtáñajunʼ marigá mitsínguánʼ”.
O “mar”.
O “nagui̱i̱”.
Náa ajngáa hebreo naʼthí, “Muxtííʼ”.
O “bi̱ nubañimi̱jna̱, nagamidun”.
Atayáá glosario, ngajua rí tsétumuu.