NAHÚM
1 Rígi̱ nindxu̱u̱ rí nijuiʼtá rí magíʼnuu Nínive. Libro rígi̱ naʼthí rí niwasngájmáá* Nahúm* bi̱ na̱ʼkha̱ náa xuajin Elqós:
2 Jeobá nindxu̱u̱ mbáa Dios bi̱ na̱nda̱ʼa̱ rí mbiʼyamajkuíí i̱ndó ikhaa,
Jeobá naʼni rí mumíniiʼ bi̱ sia̱nʼ gajmíin.
Ikhaa tsémbumuu náa dí raʼkhí eni̱ ga̱jma̱a̱ nakásngañu̱ʼ kaʼñúún,
Jeobá maʼni ngíníi xa̱bu̱ sia̱nʼ.
3 Jeobá tsékiʼnáa nacha̱, ga̱jma̱a̱ gíʼdoo wéñuuʼ tsiaki̱i̱,
mú nimbáa xáwiji̱jtu̱u̱n Jeobá, maʼni ngíníi má tsiaki̱i̱ bi̱ guáʼdáá aʼkhúún.
Índo̱ na̱jkha̱, naxnúu giñánʼ rí naʼni gámbóo ga̱jma̱a̱ ruʼwambiʼ,
du̱u̱n nindxu̱u̱ asndu xóo yujndaʼ náa rajkhúu.
4 Naxprígúu lamáa* ga̱jma̱a̱ naʼni rí maʼni̱i̱ mijxooʼ,
naʼni rí mujndooʼ xúgíʼ mañu.
Iná maxaʼ dí rígá náa Basán ga̱jma̱a̱ náa Carmelo nujndooʼ
ga̱jma̱a̱ ri̱ʼi̱ dí rígá náa Líbano nujnduxtá.
5 Ga̱jma̱a̱ numuu ikhaa, kúbá naʼba̱a̱n
ga̱jma̱a̱ bíjní najuiya̱a̱ʼ.
Ku̱ba̱ʼ namíñuu náa inuu ikhaa,
xúʼko̱ má ku̱ba̱ʼ náa najma̱a̱ májánʼ rí najuiʼdu ga̱jma̱a̱ xúgíinʼ xa̱bu̱ bi̱ kúwá ikhí.
6 Tsáá gáʼngo̱o̱ gákríya̱a̱ʼ índo̱ gákiʼnaa xá.
Tsáá gáʼngo̱o̱ gáʼni índo̱ gákásngañu̱u̱ʼ xá.
Rí nakásngañu̱ʼ magadíriga̱ xóo aguʼ
asndu itsí mawiʼtájngaa gáʼni ikhaa.
7 Jeobá nindxu̱u̱ májáanʼ, xóo mbá náa murkaʼwumijná mbiʼi dí narígá gamiéjunʼ.
Ikhaa nañewu̱u̱n bi̱ nduyáʼ rí mumbayumíjná náa ikhaa.
8 Ikhaa maʼni rí magajnúu mbá yambo̱o̱ dí maʼni gámbóo mbá kayuuʼ náa xtáa ikhaa,*
rí mikína maʼga raxkhúún xa̱bu̱ sia̱nʼ ndrígóo.
9 Ndiéjunʼ awan eríyáʼ muni̱i̱la Jeobá rá.
Ikhaa maʼni gámbóo mbá kayuuʼ.
Gamiéjunʼ rígi̱ ni xátanga̱a̱ marigá mbu̱júu̱.
10 Numuu rí ikhiin nindxu̱ún xóo tsuwanʼ rí kambróʼoo,
xóo bi̱ najngi̱i̱n ga̱jma̱a̱ cerveza,*
mú ikhiin mikhiin xóo rajxa̱ nijndooʼ.
11 Náa ikháán magajnúu mbáa bi̱ naríyaʼ awan maʼniuu dí ra̱májánʼ Jeobá,
mbáa bi̱ naxná consejo rí tséjmaa.
12 Rígi̱ rí naʼthí Jeobá:
“Maski ma ikhiin kúwi̱i̱n májánʼ ga̱jma̱a̱ mbaʼin wéñuuʼ,
maski ajndu xúʼko̱, maguma gámbíin ga̱jma̱a̱ mandáti̱gi̱i̱n mbá kayuʼ.*
Ni̱ni̱ rí matamíniiʼ,* mú ni xáni̱ rí matamíniiʼ itháan.
13 Rí xúgi̱ maxpígaʼ yugo rí nita̱ma̱ʼ náa rexa̱a̱ʼ
ga̱jma̱a̱ maxkuʼtu cadena rí kaxtuʼwáaʼ ga̱jma̱a̱.
14 Jeobá nixná mbá kiʼtáñajunʼ dí magíʼnaaʼ:*
‹Mbiʼyaaʼ xájyúuʼ asndu kámuu.
Ma̱ni̱ gámbíin xándú, xúʼko̱ ma bi̱ nigumiin ga̱jma̱a̱ ajua̱nʼ bi̱ kúwá náa guʼwún dioses ndrígáaʼ.
Ma̱ni̱ iñáʼ náa majnguáanʼ índo̱ gákháñáaʼ, numuu rí nda̱a̱ numaaʼ›.
15 ¡Atayáá! Náa kúbá nakujmaa rajkhúu bi̱ na̱jkha̱ kayóo ajngáa rí májánʼ,*
bi̱ naʼthí dí rígá rí tsímáá.
Judá, ataniri̱ya̱a̱ʼ ndxa̱a̱ ndrígáaʼ ga̱jma̱a̱ atanimbáníí ajngáaʼ dí niraxná,
nimbáa bi̱ nda̱a̱ numuu xátanga̱a̱ manújngoo náa majña̱a̱ʼ ikháán.
Maguma gámbáa mbá kayuuʼ”.
2 Mbáa bi̱ naxídiríʼiin xa̱bu̱ nitsimuu mu maxmína̱ʼ ga̱jma̱á nindxa̱a̱ʼ.*
Guñewa̱a̱n xtájtsí.
Guyejngoo kamba̱a̱.
Gu̱ni̱ratamijná* mu muxmijná.
2 Numuu rí Jeobá martanga̱a̱ gamajkhu rí nigruigú Jacob,
xó má Israel,
numuu rí xa̱bu̱ sia̱nʼ ndrígu̱ún nini̱ gámbáa ku̱bu̱únʼ
ga̱jma̱a̱ nini̱ gachíí náa kiʼdu uva ndrígu̱ún.
3 Escudo ndrígu̱ún xa̱bu̱ xkujiinʼ kiʼnííʼ maña̱ʼ,
soldados kugíʼ xtíin maña̱ʼ xngeʼdi.
Hierro dí niguma ga̱jma̱a̱ carro rí nuxmijná naxpíbínʼ xóo aguʼ,
mbiʼi rí ikhaa naʼnirataminaʼ maxmína̱ʼ.
Najmaa kudú* dí enebro.
4 Carro rí nuxmijná ga̱jma̱a̱ ra̱ʼkhá tháán xkawiʼ gáyúu náa kamba̱a̱.
Nagáñun rijma̱a̱ kawáá náa xuáá.
Nambiʼiin xóo aguʼ ga̱jma̱a̱ naxpíbíinʼ xóo agiuuʼ a̱jkhu̱u̱n.*
5 Ikhaa magímbíin xa̱bu̱ ñajunʼ ndrígióo.
Ikhiin majngrádiinʼ índo̱ kúwá ragún.
Magáñún magún náa xtájtsí ndrígóo ikhaa,
ga̱jma̱a̱ ikhaa maʼni rí mawi̱ji̱ gújkhúʼ xtájtsí.
6 Xkrugoo mañu mambaʼtoo
ga̱jma̱a̱ guʼwá ñajunʼ mangajxi̱i̱.
7 Nijuiʼthá má: Ikhaa niguma ma̱jti̱i̱ʼ
ga̱jma̱a̱ nagún kuya̱a̱, gu̱ʼú ñumbáá ndrígóo kúwá ngíná,
xóo ewán eni̱ paloma, xúʼko̱ ewán índo̱ nuxnáá tsu̱xtu̱ún.*
8 Asndu nákha ginii, Nínive nindxu̱u̱ xóo mbá tanque náa ka̱jnu̱ʼ mba̱ji̱nʼ iyaʼ,
mú rí xúgi̱ xa̱bu̱ nagájnún ragáñúún.
“¡Gugua̱ʼthi̱i̱nla! ¡Gugua̱ʼthi̱i̱nla!”.
Mú nimbáa tsétanga̱a̱ mayejxi̱ kidííʼ.
9 ¡Gurawíila plata! ¡Gurawíila oro!
Ra̱ʼkhá tháán mbaʼa rí nigujxi̱i̱.
Kajtíí xúgíʼ enii rí gíʼdoo numuu.
10 ¡Xuajin niguanáa jchíi, niguanáa ga̱jma̱a̱ niguma gámbáa!
Ra̱ʼkhá tháán emíñúún, naguáʼáan ragómiu̱ún ga̱jma̱a̱ itsu̱ tsagúúnʼ,
xúgíinʼ niʼni miʼxájtíinʼ.
11 Nándáa náa kúwá león, náa nuphiʼtsu león bi̱ gújkuíinʼ,*
náa nagájnuu león gajmíi̱n e̱ji̱i̱n,
náa nimbáa ndawa̱a̱ tsáa maʼni míñúún. Náá ni̱jkha̱ rá.
12 León naguguin mbaʼin xujkhú’ mu muphu̱u̱n e̱ji̱i̱n
ga̱jma̱a̱ nagudíin mbaʼin mu muphu̱u̱n leona.
Kajtíin má xúʼko̱ xujkhúʼ bi̱ naguguin náa iñúuʼ tsíñu rí kúwá.
Kajtíí xuíʼthún xujkhúʼ ikhí.
13 “¡Atayáá! Gi̱i̱ xtáá ikhúún mu ma̱ni̱ ngínáá”, eʼthí Jeobá bi̱ naʼtáñajúúnʼ ángeles.
“Matsikha̱a̱ mbá kayuuʼ carro rí natani̱ ga̱jma̱a̱ guerra,
magúdíin ga̱jma̱a̱ espada león bi̱ gújkuíinʼ bi̱ xtaʼdiin.
Ní xáradíin itháán xujkhúʼ náa ku̱ba̱ʼ,
nánguá matanga̱a̱ mawán aʼwún bi̱ nagún kuñu̱u̱n ajngáaʼ”.
3 ¡Ngínáala xuajin rí naxídíí wéñuuʼ eʼdi!
Ikhí rígá wéñuuʼ rí minduwaʼ ga̱jma̱a̱ naguma kuʼwáʼ.
¡Ikhaa nagudíin má xúʼko̱ bi̱ naʼkhu̱u̱n!
2 Nawáán cuarta ga̱jma̱a̱ aʼwóo llanta,
nakujmaa rí wáyú nagáñún ga̱jma̱a̱ carro na̱jkha̱ raki̱jxi̱i̱.
3 Xa̱bu̱ kudrúwíin wáyú, naxpíbínʼ espada ga̱jma̱a̱ kudú* rí kuda,
ra̱ʼkhá tháán mbaʼin xa̱bu̱ kuíji̱i̱n nikháñún...,
asndu xáʼnga̱a̱ʼ gáraxníin bi̱ nikháñún.
Ikhiin asndu najngrádiinʼ ga̱jma̱a̱ xuñúúnʼ xa̱bu̱ bi̱ nikháñún.
4 Nirígá rígi̱ numuu rí tséniñuuʼ ragujuamínáʼ a̱ʼgu̱ bi̱ nagujuamínáʼ,
tsiʼyáa, mitsaanʼ* eʼni ga̱jma̱a̱ ra̱ʼkhá tháán jma̱ñuu maʼni xawan,
nagujuamínáʼ mu ma̱ʼkha̱ kagui̱i̱n i̱ʼwáʼ xuajin ma̱ngaa najmuu xawan mu maʼniríjíinʼ ga̱jma̱a̱ xa̱bu̱.
5 “¡Atayáá! Gi̱i̱ xtáá mu ma̱ni̱ ngínáán ikháán”,* eʼthí Jeobá bi̱ naʼtáñajúúnʼ ángeles.
“Makujxí jnáwáanʼ asndu náa inaaʼ,
ma̱ni̱ rí xa̱bu̱ bi̱ kúwá náa i̱ʼwáʼ xuajin mbuyáá rí tsaʼtsáánʼ,
ga̱jma̱a̱ xa̱bu̱ ñajunʼ mbuyáá xóo magajnúu gamajkuaaʼ.
6 Masngutámáanʼ náskha tsu̱da̱a̱ʼ
ma̱ni̱ rí xáraʼdáá numaaʼ,
ma̱ni̱ rí xa̱bu̱ mutsijmáánʼ ga̱jma̱a̱ rí gániáanʼ.
7 Asndu tsáá bi̱ gáʼyaaʼ magajnúu ragáyúu ga̱jma̱a̱ maʼthí:
‹¡Nínive niguma gámbáa!
Tsáá gágáwíinʼ a̱jkiu̱u̱n kaʼyoo xá.›
Náá gáxkamaa mbáa bi̱ maʼni̱i̱ a̱jkia̱a̱nʼ rá.
8 Lá naku̱ma̱a̱ʼ rí xtaʼdáá itháán tsiaki̱i̱ ki xóo No-Amón,* bi̱ nagi̱ʼi̱ náa na̱jkha̱ kúʼúun mañu Nilo ráʼ.
Náa nixtáa ikhaa mbájndi rígá iyaʼ,
náa lamáa* ni̱ʼkha̱ rí nigiʼdoo ga̱jma̱a̱ lamáa nindxu̱u̱ xtájtsí ndrígóo.
9 Etiopía ga̱jma̱a̱ Egipto nindxu̱u̱ náa ni̱ʼkha̱ tsiaki̱i̱ ndrígóo.
Put ga̱jma̱a̱ libios nindxu̱ún bi̱ numbayíí.
10 Maski ajndu xúʼko̱ ikhaa nijuaxkriya̱a̱ʼ,
ni̱jkha̱ kiʼyáa.
E̱ji̱i̱n ra̱ʼkhá tháán xkawiʼ niradíin náa xúgíʼ gútrigo̱o̱* kamba̱a̱.
Nirawíi suerte* mu mbuyáá tsíín gágún gajmiún xa̱bu̱ bi̱ nduyamajkhún,
niru̱ʼwu̱u̱n ga̱jma̱a̱ cadena xa̱bu̱ bi̱ guáʼdáá numún.
11 Ikháán mangáánʼ majnga̱a̱n,
mi̱dxu̱ʼ gátarkaʼwuminaʼ.
Mataʼyáʼ náa matambáyuminaʼ mu makríña̱a̱nʼ náa inún bi̱ sia̱nʼ gajmiáanʼ.
12 Xúgíʼ xtájtsí ndrígáaʼ nindxu̱u̱ xóo ixi̱ higo náa tima xndúu rí najma̱a̱ ginii kayuuʼ,
á mu nataba̱a̱n, majngutígú ga̱jma̱a̱ majngúun mbájmbu náa rawúúnʼ bi̱ nandún mu̱phu̱.
13 ¡Atayáá! Soldados ndrígiáaʼ xáguáʼdáá tsiaki̱i̱, mani̱ndxu̱ún xóo gu̱ʼu̱.
Xkrugoo xuajñaanʼ mambaʼtoo mu matu̱ʼu̱u̱n bi̱ sia̱nʼ gajmiáanʼ.
Aguʼ matsikáa ixi̱ mbi̱jua̱ rí nagúguáa ga̱jma̱a̱ xkrugoo xuajñaanʼ.
14 ¡Arajxi̱i̱ iyaʼ rí majmaaʼ índo̱ gúruguama̱ʼa̱a̱n!
Atani̱ májáanʼ xtájtsí ndrígáaʼ mu maguajún gújkhúʼ.
Gajnguáanʼ náa gaʼchaʼ atajngápáʼán ikhí,
arajtun rí marawíi ga̱jma̱a̱ tabique.
15 Ikhí aguʼ matsikháán.
Espada maxíñáan.
Mu̱pha̱a̱ xóo eni̱ tsíʼbu* bi̱ xóó nda̱a̱ xniúúʼ.
¡Gaʼni mbaʼáanla xóo tsíʼbu bi̱ xóó nda̱a̱ xniúúʼ!
¡Xúʼko̱, gaʼni mbaʼáanʼla xóo tsíʼbu!
16 Ra̱ʼkhá tháán mbaʼin bi̱ nugujua̱ xtaʼdiin, itháán ki xóo a̱ʼgua̱a̱n bi̱ tri̱gi̱i̱n mekhuíí.
Tsíʼbu bi̱ xóó nda̱a̱ xniunʼ niriʼkhu̱u̱ xtóo ga̱jma̱a̱ ni̱jkha̱.
17 Xa̱bia̱a̱ʼ bi̱ nuyejngoo nindxu̱ún xóo tsíʼbu,
xa̱bia̱a̱ʼ bi̱ nutañajúúnʼ soldados nindxu̱ún xóo tsíʼbu bi̱ mbaʼin.
Náa mbiʼi rí naʼni migúwán natrámiin náa tsu̱du̱u̱ gúláa rí niguma ga̱jma̱a̱ itsí,
mú índo̱ nambiʼii a̱jkha̱ʼ nagún ga̱jma̱a̱ xniúúnʼ
ga̱jma̱a̱ nimbáa tséʼyoo náa egún.
18 Nunuʼ baxtúu bi̱ xtaʼdiin, rey ndrígóo Asiria,
xa̱bia̱a̱ʼ bi̱ guáʼdáá numún kúwá náa guʼwún.
Xa̱bu̱ xuajñaanʼ nijuidáríʼiin náa kúbá
ndawa̱a̱ nimbáa tsáa magímbíin.
19 Xáʼngo̱o̱ gáʼni̱i̱ a̱jkia̱a̱nʼ ga̱jma̱a̱ gamiéjunʼ rí matagíʼníín.
Ní xáʼni̱i̱ náa nigawáanʼ.
Xúgíinʼ bi̱ gúdxawíín ga̱jma̱a̱ numaaʼ muxnáá ñawúúnʼ,
lá xtáa mbáa bi̱ támínúuʼ ga̱jma̱a̱ numuu xúgíʼ rí xkawiʼ nitani̱ ráʼ.”
O “visión”.
Rí nandoo gáʼthúu̱n ‹bi̱ naʼni̱i̱ a̱jkiu̱úṉ›.
O “mar”.
Xóo muʼthá, Nínive.
O “cerveza dí niguma ga̱jma̱a̱ trigo”.
O mbáa “ikhaa manújngoo náa majñu̱únʼ”.
Xóo muʼthá, Judá.
Xóo muʼthá, Asiria.
O “ajngáa rí nuxi̱ʼ”.
Xóo muʼthá, Nínive.
Náa ajngáa hebreo naʼthí, “Gu̱ni̱ gújkhúʼ itsu̱ tsaguala”.
O “lanza”.
O “bi̱gu̱”.
Náa ajngáa hebreo naʼthí, “a̱jkiu̱ún”.
O “león bi̱ guáʼdáá xtátsiu̱ún náa aphúún”.
O “lanza”.
O “nagui̱i̱”.
Xóo muʼthá, Nínive.
Xóo muʼthá, Tebas.
O “mar”.
Náa ajngáa hebreo naʼthí, “edxu̱u̱”.
Atayáá glosario, nuri̱ya̱ʼ suerte.
O “aʼbu”. Náa ajngáa hebreo naʼthí, “langosta”. Atayáá glosario, tsíʼbu.