HABACUC
1 Profeta Habacuc* nijuiʼtháán dí marigá náa mbá rí niwasngájmáá:*
2 Jeobá, asndu nguáná xóó gáʼyóoʼ mandxa̱ʼwa̱ mu matambáyuʼ mu ikháán matadxawunʼ rá.
Asndu nguáná xóó gánda̱ʼa̱a̱ʼ matani̱ kríñu̱u̱nʼ náa dí ra̱májánʼ mu ikháán mataʼyáʼ dí matani̱ rá.
3 Náá numuu rí natatsíñúnʼ mba̱yo̱o̱ wéñuuʼ dí ra̱májánʼ rá.
Náá numuu rí naʼngo̱o̱ wéñuuʼ a̱jkia̱a̱nʼ eni̱ bi̱ nuni̱ ngíníin eʼwíinʼ rá.
Náá numuu rí nda̱yo̱o̱ dí naguma gámbáa ga̱jma̱a̱ narígá dí ra̱májánʼ rá.
Náá numuu dí narígá wéñuuʼ xkujndu ga̱jma̱a̱ na̱gi̱ʼdu̱u̱n xa̱bu̱ rá.
4 Ikha jngóo nimbáa tséʼnimbo̱o̱ rí naʼthí náa xtángoo
ga̱jma̱a̱ nimbá míʼtsú tséguma rí jmbu.
Xa̱bu̱ ra̱míjíinʼ nurugua̱mi̱ʼi̱i̱n xa̱bu̱ jmbiin,
ikha jngóo tséguma xó má kaʼyoo.
5 “¡Gu̱ñu̱u̱nla xa̱bu̱ xuajin ga̱jma̱a̱ guʼgíʼ e̱dxa̱laʼ!
Asndu ma̱ja̱nʼ rawanla gákuwáanʼ ruyejxi̱ ga̱jma̱a̱ tsiánguá gaʼniala,
numuu rí mbiʼi dí kuwáanʼ marigá
mbá rí xáʼkha̱ a̱jkia̱la mu̱nimbala maski má mutala.
6 Ma̱ni̱ rí maguajxú xa̱bu̱ caldeos,
mbá xuajin rí tségáwíinʼ a̱jkiu̱u̱n ga̱jma̱a̱ tséndxa̱ʼóo edxu̱u̱ rí maʼni.
Ikhiin nuni̱ gámbáa mba̱a̱ ku̱ba̱ʼ
mu xúʼko̱ mundrígú guʼwá dí raʼkháa guʼwún.
7 Xa̱bu̱ bugi̱ nuni̱ gamíi.
Ikhiin nundri̱ga̱ xtángoo ndrígún ga̱jma̱a̱ xóo mutañajunʼ.
Nagáñún wáyú bi̱ nagún gajmiún guerra,
wáñu̱ún naguwáʼ mitsínguánʼ.
Mbájmbu egún xó má eʼni bi̱yú bi̱ naguguaa xujkhúʼ mikhu̱u̱.
9 Xúgíinʼ naguwáʼ mu muni̱ dí raʼkhí.
Ni̱ndxu̱ún xóo giñánʼ dí na̱ʼkha̱ náa nagájnuu a̱jkha̱ʼ* índo̱ nagimbíi̱n,
ma̱ngaa bi̱ nurugui̱i̱n magún kudiin ra̱ʼkhá tháán mbaʼin xóo jui̱ʼi̱.
10 Nutsijmiin reyes,
nunduʼwajmiin xa̱bu̱ ñajunʼ mbaʼwi̱i̱n.
Tsémajkhún eʼni xtájtsí,
nugíʼ ku̱ba̱ʼ mu maʼni mitsídánʼ matu̱ʼu̱u̱n náa xuajin mudrigú.
11 Nagún xóo ejkha̱ giñánʼ ga̱jma̱a̱ nanújgún náa ku̱ba̱ʼ,
mú maguaʼdáá aʼkhúún
numuu rí nuthi dí náa dios ndrígu̱ún e̱ʼkha̱ tsiaki̱i̱ rí guáʼdáá”.*
12 Jeobá, lá na̱nguá xtaa asndu kámuu ráʼ.
Dios ndrígóʼ, bi̱ Kaʼwii, ikháán nditháan tsékáñáaʼ.*
Jeobá, ikháán nitandri̱gi̱i̱n mu muni̱ xó má kaʼyoo.
Ikháán bi̱ natiewu̱nʼ,* nitraʼwíin muni̱ ngínáanʼxu̱.
13 Idaaʼ ra̱ʼkhá tháán mikaʼwu mu mbaʼyoo dí ra̱májánʼ,
ga̱jma̱a̱ tséʼngo̱o̱ a̱jkia̱a̱nʼ eʼni dí raʼkhí.
Á mu xúʼko̱, náá numuu rí naʼngo̱o̱ a̱jkia̱a̱nʼ eni̱ bi̱ nuni̱ nduwaʼ
ga̱jma̱a̱ naguanáaʼ wíí índo̱ mbáa xa̱bu̱ ra̱májáanʼ naʼni ngínáa mbáa xa̱bu̱ bi̱ itháan májáanʼ ki xóo ikhaa xá.
14 Náá numuu rí natatsíñááʼ rí xa̱bu̱ muniu̱u̱n xóo e̱gi̱ʼ bi̱ kúwá náa lamáa,*
xóo xujkhúʼ bi̱ nuxmajtamijná* bi̱ ndawa̱a̱ tsáa maʼtáñajúúnʼ rá.
15 Ikhaa* naguguin ga̱jma̱a̱ amaʼ ma̱ngaa naxmájthiin.
Naguguin ga̱jma̱a̱ amaʼ dí naguwíin xúgíinʼ enii e̱gi̱ʼ,
naguwíin náa amaʼ dí naguguin ga̱jma̱a̱ e̱gi̱ʼ.
Ikha jngóo ra̱ʼkhá tháán edxuu.
16 Ikha jngóo naxnájxu̱u̱ tsigijñaʼ amuuʼ rí naguwíin xúgíinʼ enii e̱gi̱ʼ,
xúʼko̱ má naxnúu tsigijñaʼ amuuʼ rí naguwíin e̱gi̱ʼ,
núma̱aʼ má amaʼ rúʼko̱ ikhaa gíʼdoo wéñuuʼ ganitsu
ga̱jma̱a̱ ganitsu ndrígóo ra̱ʼkhá tháán miʼtsí.
17 Lá ikhaa maguwíin má xúʼko̱ e̱gi̱ʼ ga̱jma̱a̱ amuuʼ* xáʼ.
Lá xágáwíinʼ a̱jkiu̱u̱n rí magudíin má xúʼko̱ xa̱bu̱ xáʼ.
2 Magújun má xúʼko̱ náa kaʼyoʼ mayejngoo,
ga̱jma̱a̱ mafrúwan náa tsu̱du̱u̱ xtájtsí.
Maxtáá xawii mu mba̱yo̱o̱ ndiéjunʼ gáʼthúnʼ mu ma̱ta̱
ga̱jma̱a̱ ndiéjunʼ gáriʼña̱a̱ índo̱ gúxprigúʼ.
2 Ikhú Jeobá niriʼñuʼ:
“Ataniraʼmáʼ rí niwasngájmaaʼ,* kaʼwu gátaniraʼmáʼ náa tsu̱du̱u̱ mbá xajpa,
numuu dí xúʼko̱ bi̱ gaguxnuu gakhi̱i̱ xáʼñuu miʼskoo.
3 Numuu rí ndayóoʼ maʼga̱nú mbiʼi rí niwasngájmaaʼ,
nacha̱ má e̱ʼkha̱ mu mambanúu, raʼkháa nduwaʼ nindxu̱u̱.*
Maski ajndu ndajyúuʼ, ¡araxtaa xawii!*
Gajkhun mambanúu.
¡Xájyúuʼ má gáʼkha̱nú!
4 Atayáá bi̱ naʼnimbamínáʼ:
Náa a̱jkiu̱u̱n nda̱a̱ rí jmbu.
Mú xa̱bu̱ jmbii maxtáa numuu rí wíji̱ jmbu.*
5 Vino ma̱ndoo maʼni rí xa̱bu̱ xándxaʼwóo májánʼ edxu̱u̱,
bi̱ naʼnimbamínáʼ xáʼnimbánuu rí nandoo.
Ra̱ʼkhá tháán xki̱dxu̱u̱ xóo Iñá wajinʼ,* nditháan tségiʼmuu.
Nindxu̱u̱ asndu xóo rí nakháñulú.
Nagímbíin má xúʼko̱ xa̱bu̱
ga̱jma̱a̱ nagruigúu xúgíʼ xuajin.
6 Lá raʼkháa xúgíinʼ muthi proverbios, mutajma ga̱jma̱a̱ mutanumáá ikhaa xáʼ.
Muthi:
‹¡Ngínáa lá bi̱ nagímbóó dí raʼkháa ndrígóo ikhaa,
asndu náá mbiʼi gániñuuʼ raʼni xá.
Ga̱jma̱a̱ ra̱ʼkhá tháán eʼni gidxóó!
7 Lá raʼkháa nda̱a̱ tsu̱ma̱ gáguwáʼ bi̱ gíʼmáán inún ráʼ.
Mbajuiín, muxmajngañíín
ga̱jma̱a̱ murawí káyáaʼ xúgíʼ rí xtaʼdáá.
8 Numuu dí ikháán nitrawí káñúúnʼ rí guáʼdáá mbaʼa xuajin,
i̱ʼwáʼ xuajin murawí káyáaʼ rí ikháán xtaʼdáá,
numuu dí niradíin xa̱bu̱
ga̱jma̱a̱ nitani̱i̱ dí ra̱májánʼ ku̱ba̱ʼ,
xúʼko̱ má xuajin ga̱jma̱a̱ xa̱bu̱ bi̱ kúwá ikhí.
9 ¡Ngínáa lá bi̱ naʼni dí raʼkhí mu madaaʼ rí majmuu náa goʼwóo,
mu magrígu xújúunʼ náa mitsídánʼ
ga̱jma̱a̱ mu maʼni kríyamínáʼ náa gamiéjunʼ* rí wíji̱ magíʼnuu!
10 Awan dí nitrawíi, niriyaʼ gamajkuu guʼwáaʼ.
Índo̱ nitani̱ gámbáa mbaʼa xuajin, nitaxúdaminaʼ aʼkhá náa inaaʼ má ikháán.
11 Asndu náa xtájtsí mandxa̱ʼwá mbá itsí
ga̱jma̱a̱ asndu náa tsu̱du̱u̱ guʼwá mariʼñaaʼ mbá xaʼda̱a̱.
12 ¡Ngínáa lá bi̱ nagudíin xa̱bu̱ mu maʼni mbá xuajin
ga̱jma̱a̱ naʼni dí ra̱májánʼ mu magíʼ mbá xuajin!
13 ¡Atayáá! Lá raʼkháa Jeobá bi̱ naʼtáñajúúnʼ ángeles naʼni rí xa̱bu̱ xuajin muñajunʼ gakhi̱i̱
mu muxniʼtsíí mbajtsuunʼ ga̱jma̱a̱ rí xa̱bu̱ mbaʼ maʼni néʼngu̱u̱n xúʼkuíínʼ ráʼ.
15 ¡Ngínáa lá bi̱ naxnún rí muwa̱a̱n a̱ngui̱i̱n
náa kanda̱wo̱o̱ʼ rí nakásngañu̱u̱ʼ ga̱jma̱a̱ rí nakiʼnáa mu maʼni majngi̱i̱n
mu xúʼko̱ mbaʼyoo rí tsaʼtsiinʼ!
16 Xátándrígú gamajkhu ga̱jma̱a̱ magajnúu gamajkuaʼ asndu magiʼmaaʼ.
Ikháán mangáán agi̱i̱n ga̱jma̱a̱ atasngájma rí na̱nguá nithu xtóo xuyuuʼ tsáʼkháanʼ.
Copa dí grígu náa ñawúunʼ mújúunʼ Jeobá maʼga̱nú náa ikháán
ga̱jma̱a̱ majthi̱ʼ maruguarámuuʼ gamajkhu rí natandrígú.
17 Dí xóo nitani̱ ngínáa Líbano xúʼko̱ má gáguma gínáán mangáán,
xó má nitani̱ gámbáa ga̱jma̱a̱ nitani̱ miñúún xujkhúʼ xúʼko̱ má gúxiñán xa̱bu̱ mangáán,
numuu rí niradíin xa̱bu̱
ga̱jma̱a̱ nitani̱i̱ dí ra̱májánʼ ku̱ba̱ʼ,
xúʼko̱ má xuajin ga̱jma̱a̱ xa̱bu̱ bi̱ kúwá ikhí.
18 Dí lá gájmaaʼ gáʼni mbáa xándú bi̱ nigumariya̱a̱ʼ,
á mu mbáa xa̱bu̱ú niʼniriya̱a̱ʼ xá.
Maski má, bi̱ niʼniwíin naku̱mu̱u̱ kaʼñún,
mú dioses bi̱ niʼnii nda̱a̱ rí ejmi̱i̱n ga̱jma̱a̱ tséthi.
Dí lá gájmaaʼ gáʼni mbáa xándú bi̱ niguma ga̱jma̱a̱ ajua̱nʼ ma̱ngaa mbáa bi̱ naʼsngáa rí nduwaʼ rá.
19 ¡Ngíníin lá bi̱ nutháán mbá xuíʼtóo ixi̱ “¡Arajxu̱nʼ!”,
o bi̱ nutháán mbá itsí rí na̱nguá eʼthí! “¡Arajxu̱nʼ! ¡Araxnúxu̱ ikha!”
¡Atayáá! Nuxtajmíin oro ga̱jma̱a̱ plata,
mú nditháan tséya xi̱ʼ.
20 Mú Jeobá nindxu̱u̱ mixtiʼkuii, ikhaa xtáa náa goʼwóo rí nindxu̱u̱ mikaʼwu.
¡Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ wíí gáguajún náa inuu!›”.
3 Rí niʼtájkháan profeta Habacuc, rí nindxu̱u̱ xóo mbá ajmúú ngíná:
2 Jeobá, nidxawuun rí nitani̱.
Jeobá, niguanúʼ tsiánguá ga̱jma̱a̱ rí nitani̱.
¡Náa xúgíʼ tsiguʼ* atani̱ mbu̱júu̱ rí mitsaanʼ!*
Náa xúgíʼ tsiguʼ atani̱ rí xa̱bu̱ muniʼnuuʼ rí natani̱.
Xámbumaaʼ rí magáwíinʼ a̱jkia̱a̱nʼ xtayuxuʼ índo̱ gákiʼnáá.*
3 Dios ni̱ʼkha̱ asndu Temán,
bi̱ Kaʼwii ni̱ʼkha̱ asndu náa kúbá Parán. (Sélah).*
Tsiaki̱i̱ ndrígóo nirugoo mekhu
náa ku̱ba̱ʼ nijnííʼ gamajkhu rí nuxnáá xa̱bu̱.
4 Rí nixpíbíinʼ ninindxu̱u̱ xóo aguʼ.
Náa ñawúunʼ nigájnuu a̱jma̱ aguʼ rí nixpíbínʼ,
náa rígá ngu̱ʼwa̱ tsiaki̱i̱ ndrígóo.
5 Náa inuu ikhaa ejkha̱ nandii
xúʼko̱ má rí mijkha mbiʼ ejkha̱ ragi̱ʼi̱ kidííʼ.
6 Niwi̱ji̱ ga̱jma̱a̱ niʼbajngaa ku̱ba̱ʼ.
Índo̱ ikhaa niyejxi̱ xa̱bu̱ bi̱ kúwá náa ku̱ba̱ʼ niguíʼiin.
Kúbá dí rígá asndu nákha wajyúuʼ nijmiguriga̱a̱
ga̱jma̱a̱ bíjní dí rígá asndu nákha wajyúuʼ ningájxi̱i̱.
Kamba̱a̱ dí nirígá asndu nákha wajyúuʼ nindxu̱u̱ kambo̱o̱ ikhaa.
7 Ndi̱yo̱o̱ xkujndu náa guʼwá xtíin ndrígóo Cusán.
Xtíin rí niguma ga̱jma̱a̱ guʼwá xtíin dí rígá náa ku̱ba̱ʼ ndrígóo Madián niʼba̱a̱n.
8 Jeobá, lá ga̱jma̱a̱ numuu mañu,
dí ra̱ʼkhá tháán kasnga̱ña̱a̱ʼ ráʼ.
O nakásnga̱ña̱a̱ʼ xtayáá lamáa* ráʼ.
Numuu rí nindruwíin wáyáaʼ,
ga̱jma̱a̱ carriáaʼ niʼngo̱o̱ nidaaʼ.
9 Nitríyaʼ ga̱jma̱a̱ nitani̱ ratháá xkamídá ndrígáaʼ.
Xkuíyá* xtáa xawii mu maʼnimbánuu dí niraxná ajngáaʼ.* (Sélah).
Ikháán nitani̱ rí mawiʼtáa ku̱ba̱ʼ ga̱jma̱a̱ mañu.
10 Kúbá nirgajtsímíjná dí naʼkhui̱i̱n índo̱ ndiyaaʼ.
Mbá ruʼwa gakhi̱i̱ ninújngoo náa tsu̱du̱u̱ ku̱ba̱ʼ.
Asndu náa itháán mi̱jnu̱ʼ iyaʼ nindxa̱ʼwá.
Nikujxi̱ ñawúunʼ asndu mitsídánʼ.
11 A̱jkha̱ʼ ga̱jma̱a̱ gu̱nʼ niguanún mekhuíí náa má tri̱gi̱i̱n.
Flecha ndrígáaʼ nigájnuu xóo aguʼ.
Kudú* ndrígáaʼ nimbiʼi xóo índo̱ naxpíbínʼ.
12 Ra̱ʼkhá tháán kiʼnáán ninújngaaʼ náa ku̱ba̱ʼ.
Nitaxújmbiri̱gi̱i̱n xa̱bu̱ xuajin ga̱jma̱a̱ sia̱nʼ.
13 Nigájnaaʼ mu matani̱ kríya̱a̱ʼ xuajñaanʼ, mu matani̱ kríya̱a̱ʼ bi̱ nitraʼwíi.
Nitaxújmbiri̱ga̱a̱ bi̱ kayá edxu̱u̱ náa kúwá xa̱bu̱ xkawi̱i̱nʼ.
Nitani̱ gámbáa tsu̱du̱u̱* goʼwóo asndu náa nijxthun. (Sélah).
14 Ajua̱nʼ* ndrígu̱ún xa̱bu̱ bi̱ xkujiinʼ nitaxúdajngaa náa edxu̱ún
índo̱ nigájnún xóo mbá giñámbiʼ mu muni̱ ngínún.
Ra̱ʼkhá tháán edxún dí nundxaʼwamíjná rí nguʼwáá guni̱ gámbáa bi̱ namínuʼ.
15 Ninújngaaʼ náa lamáa gajmiáanʼ wáyáaʼ,
ninújngaaʼ náa iyaʼ mba̱a̱ rí naʼbajxu̱u̱.
16 Nidxawuun ajngáa asndu niʼni̱i̱ chíʼgíiʼ* awúnʼ dí nimíñúʼ,
índo̱ nidxuun, ikhú rawunʼ niguáʼaan.
Nigíʼdúu ni̱ʼga̱ itsuʼ,
xtiyuʼ nigíʼdúu niguáʼaan.
Mú ikhúún maʼngo̱ʼ magúʼthu̱u̱n mbiʼi rí ma̱ʼkha̱nú gamiéjunʼ,
numuu dí rúʼko̱ ma̱ʼkha̱ mugíʼníí xa̱bu̱ bi̱ nuni̱ gínáanʼxu̱.
17 Maski ajndu xájmidi riʼyu̱u̱ ixi̱ higo
ga̱jma̱a̱ ixi̱ uva xáxná xndúu,
tséʼniuu ma á mu nda̱a̱ aceitunas maxtagijxi̱i̱
ma̱ngaa rí xanáá xájmaa ganitsu,
maski má mugu̱ ni ndawi̱i̱n náa gúláa
ga̱jma̱a̱ ndawi̱i̱n xedi̱ náa gúlu̱ún,
18 tséʼniuu á mu xígi̱ gárígá, maʼdxuʼ má xúʼko̱ núma̱aʼ má Jeobá,
maxtáá gagi, núma̱aʼ má Dios bi̱ niʼni kríñu̱u̱nʼ.
19 Tátá Jeobá bi̱ itháán mba̱a̱ ni̱ndxu̱u̱ bi̱ naxnúʼ tsiaki̱i̱,
ikhaa maʼni dí rajkúʼ mani̱ndxu̱u̱ xóo rajkhúu mbáa aña̱ʼ e̱ʼgú
ga̱jma̱a̱ maʼni rí majngapríga náa mbaaʼ rí mitsídánʼ.
Rí na̱jkha̱ inuu bi̱ kayá edxu̱u̱ náa ajmúú, mu majmúún ga̱jma̱a̱ a̱ju̱nʼ rí gíʼdoo cuérdóo.
Mbáa nandoo gáʼthúu̱n ‹mbayaráʼáán›.
O “visión”.
O “leopardo”.
Xujkhúʼ bugi̱ ni̱ndxu̱u̱ xóo iña̱ʼ mú itháan mba̱a̱.
O “este”.
O mbáa “numuu rí tsiaki̱i̱ rí guáʼdáá nindxu̱u̱ dios ndrígu̱ún”.
O mbáa “ikháánʼlú xákáñúlú”.
Náa ajngáa hebreo naʼthí, “Itsí ndrígóʼ”.
O “mar”.
O “bi̱ nubañimi̱jna̱, nagamidun”.
Xóo muʼthá, caldeos bi̱ nindxu̱ún xa̱bu̱ sia̱nʼ.
O mbáa “mariyaʼ espádóo”.
O “visión”.
Náa ajngáa hebreo naʼthí, “nditháan xáʼthi nduwaʼ”.
O “araʼthi̱i̱n má xúʼko̱”.
O mbáa “ga̱jma̱a̱ numuu fe rí gíʼdoo”.
Náa ajngáa hebreo naʼthí, “Seol”. Atayáá glosario, Iñá wajinʼ.
Náa ajngáa hebreo naʼthí, “náa xngáñuuʼ gamiéjunʼ”.
O “nagui̱i̱”.
O “mar”.
O mbáa “Náa tiempo ndrígu̱lúʼ”.
O “nagui̱i̱”.
O “índo̱ xa̱bu̱ nánguá eyáá rí muni̱”.
Atayáá glosario, Sélah.
O “mar”.
O mbáa “Flecha”.
O mbáa “Najui’thá rí nixna ajngún muni̱ xuajin majkhaʼ”.
O “Lanza”.
Náa ajngáa hebreo naʼthí, “rexo̱o̱”.
Náa ajngáa hebreo naʼthí, “Xkuíñu̱ún”.
O “lajuíin”.