SOFONÍAS
1 Rígi̱ nindxu̱u̱ ajngóo Jeobá rí nigruigú Sofonías,* a̱ʼdióo Cusí, a̱ʼdióo Guedalías, a̱ʼdióo Amarías, a̱ʼdióo Ezequías, nákhá mbiʼi rí nixtáa Josías a̱ʼdióo Amón, xóo rey náa Judá:
2 “Ma̱ni̱ gámbóʼ xúgíʼ dí rígá náa tsu̱du̱u̱ ku̱ba̱ʼ”, eʼthí Jeobá.
3 “Ma̱ni̱ gámbíin xa̱bu̱ ga̱jma̱a̱ xujkhúʼ.
Ma̱ni̱ gámbíin xujkhú xnaʼ bi̱ jngruigu̱u̱n mekhuíí ga̱jma̱a̱ e̱gi̱ʼ bi̱ kúwá náa lamáa,*
ma̱ni̱ gámbáa dí naʼni majngrádiinʼ* xa̱bu̱ xúʼko̱ má xa̱bu̱ ra̱míjíinʼ,
ma̱ni̱ gámbíin xa̱bu̱ numbaaʼ náa tsu̱du̱u̱ ku̱ba̱ʼ”, eʼthí Jeobá.
4 “Makruíya̱ʼ ñawúnʼ mu ma̱ni̱ ngínáa Judá,
ga̱jma̱a̱ ma̱ni̱ ngíníi xúgíinʼ xa̱bu̱ bi̱ kúwá náa Jerusalén,
ma̱ni̱ gámbáa náa mbaaʼ rígi̱ xúgíʼ rí xóó naguanúu ndrígóo Baal,
ma̱ngaa ma̱ni̱ rí xa̱bu̱ xármáʼáan a̱jkiu̱ún kuñún ndxajkiún dioses bi̱ ragájkhun xúʼko̱ má eʼwíinʼ ndxajkun,
5 xúʼko̱ má bi̱ nusmbati̱gu̱u̱n náa tsu̱du̱u̱ guʼwá náa inuu xúgíʼ dí rígá mekhuíí,
bi̱ nusmbati̱gu̱u̱n ga̱jma̱a̱ nuxna ajngún rí maguajún jmbu náa inuu Jeobá,
ikhú má nuxna ajngún rí maguajún jmbu náa inuu Malcam,
6 ma̱ngaa bi̱ niniña̱a̱nʼ ragún kidxuuʼ Jeobá
ga̱jma̱a̱ bi̱ tséyáaʼ Jeobá ni má tsénda̱ʼa̱a̱ ikha”.
7 Wíí gáʼni náa inuu Tátá Jeobá bi̱ itháán mba̱a̱, numuu rí mbiʼi ndrígóo Jeobá gíʼ mijngii.
Jeobá niʼni mújúunʼ mbá tsigijñaʼ, niʼni kaʼwíín bi̱ niʼthúún maguwáʼ.
8 “Mbiʼi rí Jeobá maxnájxi̱ tsigijñaʼ mandi̱ʼi̱ín cuenta príncipes,
e̱ji̱i̱n rey, xúʼko̱ má xúgíinʼ bi̱ kugíʼ xtíin rí nugíʼ náa i̱ʼwáʼ xuajin.
9 Mandi̱ʼi̱ín cuenta xúgíinʼ bi̱ natsimún náa mitsídánʼ* mbiʼi rúʼko̱,
bi̱ nuni̱ dí raʼkhí ga̱jma̱a̱ nuni̱ nduwaʼ náa goʼwóo patriún.
10 Mbiʼi rúʼko̱, eʼthí Jeobá.
Mawáán mbá aʼwá asndu náa Xkrugoo E̱gi̱ʼ,*
mbá xtambiyaʼ ngíná mawáán asndu náa Xuajin Nuxi̱ʼ
ga̱jma̱a̱ mawáán majmidá asndu náa bíjní.
11 Xa̱bu̱ xuajin Mactés,* gakuwáanʼla ngíná
numuu rí xúgíinʼ bi̱ nugujua̱ niguma gámbíin,*
xúgíinʼ bi̱ nugiewan plata niguma gámbíin.
12 Mbiʼi rúʼko̱ tsu̱ma̱á gángujmaa Jerusalén ga̱jma̱a̱ lámpara
mandi̱ʼi̱ín cuenta bi̱ nadxún má xóo kúwíin ga̱jma̱a̱ nuthi náa awúu̱n a̱jkiu̱ún:
‹Jeobá xáʼni nimbá rí májánʼ ni má nimbá dí ra̱májánʼ›.
13 Xúgíʼ rí guáʼdáá magajnú káñúnʼ ga̱jma̱a̱ guʼwún maguma gámbáa.
Muni̱ guʼwá mú xákúwá ikhí,
mudu uva mú xúwa̱a̱n vino.
14 ¡Mbiʼi mba̱a̱ ndrígóo Jeobá gíʼ mijngii!
¡Gíʼ mijngii ga̱jma̱a̱ na̱ʼkha̱ rajngiyuu nacha̱!
Aʼwóo mbiʼi ndrígóo Jeobá mani̱ndxu̱u̱ xóo mbá rí miʼkhu̱u̱n.
Mbiʼi rúʼko̱ asndu bi̱ itháán mixkujiinʼ mundxaʼwaská.
15 Mbiʼi rúʼko̱ mani̱ndxu̱u̱ mbá mbiʼi rí makiʼnáa Dios,
mbá mbiʼi rí xa̱bu̱ mumíni̱i̱ʼ ga̱jma̱a̱ marigá gamiéjunʼ,
mbá mbiʼi dí maxnúu ruʼwambiʼ ga̱jma̱a̱ maguma gámbáa,
mani̱ndxu̱u̱ mbá mbiʼi dí mikína mbiʼ,
mbá mbiʼi dí mata̱ʼa̱a̱ du̱u̱n ga̱jma̱a̱ rujmbaaʼ skuniʼ,
16 mbá mbiʼi dí mawán mundiyíí chi̱ji̱ʼ ga̱jma̱a̱ mundxa̱ʼwa̱ mu muxmijná
gajmiún xuajin rí kúgumaʼá ga̱jma̱a̱ torres rí mitsídánʼ dí wájun náa esquina.
17 Ma̱ni̱ rí xa̱bu̱ maxmiéjúúnʼ,
ga̱jma̱a̱ ikhiin majngruigu̱u̱n xóo xa̱bu̱ bi̱ tsékruigu̱u̱n,
numuu rí nixudami̱jna̱ aʼkhá náa Jeobá.
Eʼdiún magadíri̱ga̱ xóo yujndaʼ
ga̱jma̱a̱ chámbún xóo yuskha.
18 Ni má plata ni má oro dí guáʼdáá xáʼngo̱o̱ gáʼni káwíin mbiʼi rí gákasngañu̱u̱ʼ Jeobá,
numuu rí xóo nakiʼnáa nindxu̱u̱ xóo mbá aguʼ rí matsikáa xúgíʼ ku̱ba̱ʼ,
ra̱ʼkhá tháán gamíi xóo gáʼni gámbíin xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ”.
2 Gagimbáanʼla, xúʼko̱, gagimbáanʼla xúgiáanʼ,
xa̱bu̱ bi̱ nditháan tsétiyala.
2 Nákha xóó tsémbánuu xtángoo rí nigájnuu,
nákha xóó tsénújngoo mbiʼi, xóo náskha rí na̱jkha̱ kayóo giñánʼ,
nákha xóó tséʼkha̱ náa ikháanʼla rí nakásngañu̱u̱ʼ Jeobá,
nákha xóó tséʼkha̱ náa ikháanʼla mbiʼi rí makásngañu̱u̱ʼ Jeobá,
3 guʼyáaʼla Jeobá xúgiáanʼ ikháanʼla, xa̱bu̱ guabiinʼ bi̱ kúwáanʼ náa tsu̱du̱u̱ ku̱ba̱ʼ,
bi̱ nu̱nimbala xtángoo* ndrígóo dí nindxu̱u̱ jmbu.
Gunimíjna̱ mu̱ni̱ rí jmbu ga̱jma̱a̱ gusngajmá rí nindxa̱la xa̱bu̱ guabáanʼ.
Mbáa xúʼko̱ muxkamaa náa mumbáyúmíjná mbiʼi rí gákásngáñu̱u̱ʼ Jeobá.
4 Gaza mani̱ndxu̱u̱ mbá xuajin rí maguanáa
ga̱jma̱a̱ Asquelón maguaná jchíi,
xuájka̱ʼ gúxkriya̱a̱ʼ Asdod
ga̱jma̱a̱ Ecrón muruburiya̱a̱ʼ.
5 “¡Ngíníin lá bi̱ kúwá náa rawuunʼ lamáa* náa kúwá keretitas!
Ajngóo Jeobá na̱jkha̱ inala ikháanʼ.
Canaán, ku̱bu̱únʼ xa̱bu̱ filisteos, ma̱ni̱ gámbáan
nimbáa xa̱bu̱ xáguanúu náa ikháán.
6 Náa rawuunʼ lamáa maʼni̱i̱ mbaaʼ náa rígá rajxa̱,
marigá puzu rí majmúún baxtúu ga̱jma̱a̱ gúláa dí itsí náa majchúún mugu̱.
7 Mbaaʼ rúʼko̱ maʼni mbañúúnʼ bi̱ gáguanún náa goʼwóo Judá.
Ikhí muphiʼtsu.
Índo̱ gáʼkhíʼ magúun gúbúúnʼ mu mbuya̱a̱ jxu̱ún náa goʼwóo Asquelón.
Numuu rí Jeobá Dios ndrígu̱ún mañewu̱u̱n ikhiin,
ga̱jma̱a̱ ma̱ʼkha̱a̱ kagui̱i̱n bi̱ ni̱jkha̱ kiʼdiin”.
8 “Nidxawuun xú káʼnii Moab natsíjma ga̱jma̱a̱ xú káʼnii ammonitas nutawéñííʼ xuajñunʼ,
ikhiin nitsijmaa xuajñunʼ ga̱jma̱a̱ nuni̱ mba̱ʼwu̱míjna̱ índo̱ nuthúún rí mundrígú mbañúúnʼ.
9 Xó má ikhúún xtáá ndaya, eʼthí Jeobá bi̱ naʼtáñajúúnʼ ángeles, Dios ndrígóo Israel,
Moab mani̱ndxu̱u̱ xóo Sodoma
ga̱jma̱a̱ xa̱bu̱ ammonitas mani̱ndxu̱ún xóo Gomorra,
náa i̱ndó tsuwanʼ gárígá, mbá ku̱ba̱ʼ dí i̱ndó idú marigá ga̱jma̱a̱ mbá mbaaʼ rí maguanáa kayuuʼ.
Xa̱bu̱ xuajñunʼ bi̱ xóó gáguanún murawí káñúúnʼ rí guáʼdáá,
ga̱jma̱a̱ bi̱ xóó gáguanún náa xuajñunʼ mundrígú káñúúnʼ mbañúúnʼ.
10 Rígi̱ rí maguáʼníí ga̱jma̱a̱ numuu rí nuni̱ mba̱ʼwu̱míjna̱,
numuu rí nitsijmiin ga̱jma̱a̱ nikumu̱ún rí guáʼdáá itháán numún ikhiin ki xóo xuajñuu Jeobá bi̱ naʼtáñajúúnʼ ángeles.
11 Jeobá maʼni míñúún ikhiin.
Maʼni gámbíin xúgíinʼ dioses bi̱ kúwá náa tsu̱du̱u̱ ku̱ba̱ʼ,
xúgíinʼ xa̱bu̱ bi̱ kúwá náa islas* musmbati̱gu̱u̱n náa ikhaa,
mámbáa asndu náa xtáa.
12 Ikháanʼla mangáanʼ xa̱bu̱ etíopes, makhañála ga̱jma̱a̱ espádóʼ.
13 Ikhaa makruíya̱ʼ ñawúunʼ xígií náa norte ga̱jma̱a̱ maʼni gámbáa Asiria.
Maʼni rí maguaná jchíi Nínive, maʼni̱i̱ xóo ku̱ba̱ʼ mijxooʼ.*
14 Náa majñu̱u̱ʼ ikhaa mubúúnʼ xúgíinʼ enii xujkhú xáná.*
Xó má pelícano ga̱jma̱a̱ endi tsuwanʼ* nunuʼ náa tsu̱du̱u̱ columna rí niguma gámbáa.
Mawán mbá aʼwá rí naʼni ajmúú náa ventana.
Náa riejun jngutiga xójóo rí niguma gámbáa.
Ikhaa maʼni rí xajpa dí cedro mbaʼyoo iyaʼ ga̱jma̱a̱ a̱jkha̱ʼ.
15 Rígi̱ nindxu̱u̱ xuajin rí naʼnimbamínáʼ,
náa awúu̱n a̱jkiu̱u̱n naʼthí: ‹Ikhúún gúʼdoʼ itháán numuʼ, ndáwa̱a̱ imba̱a̱ ki xóo ikhúún›.
¡Rí xúgi̱ ni̱jkha̱nú ninindxu̱u̱ mbá rí naʼni míñúún eʼwíinʼ,
mbá náa rí mbuya̱a̱ jxu̱ún xujkhú xáná!
Xúgíinʼ bi̱ gánújngún ikhí mujuiyú ga̱jma̱a̱ mubajngaa ñawúúnʼ”.
3 ¡Gínáalá xuajin rí tséʼnimbo̱o̱, rí mitsaga ga̱jma̱a̱ naʼni ngíníin eʼwíinʼ!
2 Nimbáa táʼnimbo̱o̱ kaʼyoo ni má tagruigú rí mijuaxpríguíí.
Tákumu̱u̱ kaʼyoo Jeobá ni má táʼga kanuu náa Dios ndrígóo.
3 Náa majñuuʼ ikhaa príncipes ndrígióo nindxu̱ún xóo león bi̱ najmangu̱u̱nʼ.
Bi̱ nunimbáníí xkujndu nindxu̱ún xóo lobo* bi̱ nurugui̱i̱n xujkhúʼ dí mbruʼun,
asndu tséniña̱a̱ʼ nimbá itsu̱ mu̱phu̱ imbo̱o̱ mbiʼi.
4 Profetas ndrígióo nda̱a̱ gamajkhún, nindxu̱ún bi̱ nuni̱ nduwaʼ.
Ndxajkun ndrígióo nuni̱ tsagáá rí nindxu̱u̱ mikaʼwu,
ikhiin nanújngurámúúnʼ xtángoo.
5 Jeobá nindxu̱u̱ jmbii náa majñu̱u̱ʼ ikhaa, tséʼni nimbá dí ra̱májánʼ.
Mámbá miʼcha̱ naxnún xtángoo ndrígóo
xó má a̱jkha̱ʼ na̱ʼkha̱ mámbá mbiʼi.
Xa̱bu̱ bi̱ ra̱májáanʼ nditháan tséti̱yu̱u̱ʼ.
6 “Ni̱ni̱ gámbáa xuajin, torre ndrígóo rí wájun náa esquina niguma gámbáa.
Ni̱ni̱ gámbáa kamba̱a̱ mu nimbáa xánújngoo ikhí.
Xuajin ndrígóo niguma gámbáa, nimbáa xa̱bu̱ ní ndáwa̱a̱ ikhí.
7 Ikhúún ni̱thu̱u̱n xa̱bu̱ xuajin, ‹mbáa mamiñála kuyo̱ʼ ga̱jma̱a̱ mundrígú rí majuaxpríguála›,
mu xúʼko̱ xánda̱ʼa̱a̱ cuenta náa xúgíʼ aʼkhá ndrígala
ga̱jma̱a̱ xuajin ndrígala* xáguma gámbáa.
Mú ikhiin nindúún muni̱ xóó dí ra̱májánʼ.
8 ‹Ikha jngóo gaʼngo̱o̱ a̱jkia̱la muguaʼtu̱nʼ, eʼthí Jeobá,
mbiʼi rí ikhúún gátujxu̱ʼ mu magúwíi káyala* rí kuaʼdáá,
numuu rí xtángoo ndrígóʼ nindxu̱u̱ rí magímbíin xa̱bu̱ xuajin, maruwi̱i̱n xa̱bu̱ ñajunʼ,
mu xúʼko̱ maxídirámáʼ náa ikhiin dí nakiʼnún ma̱ngaa xúgíʼ rí nakásngañu̱ʼ.
Rí nakiʼnún nindxu̱u̱ xó mbá aguʼ rí matsikáa xúgíʼ ku̱ba̱ʼ.
9 Ikhú masngúún xúgíinʼ xa̱bu̱ mbá ajngáa mikaʼwu
mu xúʼko̱ xúgíinʼ ikhiin mugríga̱a̱ mbiʼyuu Jeobá
ga̱jma̱a̱ muni̱ ñajuunʼ mbá kambájxu̱u̱n›.
10 Asndu náa mbaaʼ dí rígá mañu ndrígóo Etiopía,
xa̱bu̱ xuajñunʼ bi̱ nutakáñúnʼ, bi̱ nijuidáríʼiin, maguwáʼ kuñu̱u̱n mbá regalo náa ikhúún.
11 Mbiʼi rúʼko̱ ní xágájnuu majkuaaʼ
ga̱jma̱a̱ numuu xúgíʼ rí nitani̱ mu matanimbamínáʼ náa ikhúún,
mú ikhú maguwíin náa majña̱a̱ʼ ikháán bi̱ nuni̱ mbaʼwumíjna̱,
ga̱jma̱a̱ nimbá míʼtsú ní xátangaán matanimbamínáʼ náa kúbá ndrígóʼ rí kaʼwu.
12 Náa majña̱a̱ʼ ikháán i̱ndó maniʼñúúnʼ xa̱bu̱ guabiinʼ bi̱ tséni mbaʼumíjna̱,
ga̱jma̱a̱ ikhiin mumbayumíjná náa mbiʼyuu Jeobá.
13 Bi̱ gáguanún náa Israel ni xúni̱ itháan dí ra̱májánʼ,
ni má xájmúún raju̱ún mu muni̱ nduwiinʼ eʼwíinʼ.
Muphiʼtsu ga̱jma̱a̱ mubúúnʼ mu muda̱a̱ jxu̱únʼ, nimbáa xáʼnimíñún”.
14 ¡Atatsaʼwá numuu rí nadxaanʼ wáxióo* Sion!
¡Atatsaʼwá numuu rí niʼnga̱a̱ʼ nitadaaʼ Israel!
¡Gaʼdxaaʼ, araxtaa gagi ga̱jma̱a̱ xúgíʼ a̱jkia̱a̱nʼ wáxióo Jerusalén!
15 Jeobá nirígúu náa ikháán rí wíji̱ magíʼnáaʼ.
Niʼni rí matsíngu̱u̱nʼ bi̱ sia̱nʼ ga̱jma̱a̱ʼ.
Rey ndrígóo Israel, nindxu̱u̱ Jeobá, xtáa náa majña̱a̱ʼ.
Nimbá míʼtsú ní xámíñáaʼ xtayáá gamiéjunʼ.
16 Mbiʼi rúʼko̱ majuiʼtáán Jerusalén:
“Xámíñáaʼ Sion.
Xájmáan a̱jkia̱a̱nʼ.
17 Jeobá Dios ndrígáaʼ maxtáa náa majña̱a̱ʼ.
Xóo mbáa xa̱bu̱ xkujiiʼ bi̱ maʼni kríña̱a̱nʼ.
Maʼdxuu kaʼyaaʼ ga̱jma̱a̱ maxtáa gagi.
Maxtáa tsímáá numuu rí nandoo kaʼyaaʼ.
Maʼdxuu kaʼyaaʼ ga̱jma̱a̱ mandxa̱ʼwá rí xtáa gagi.
18 Magímbíin bi̱ kúwá ngíná bi̱ tákúwá náa ndxa̱a̱ʼ,
numuu rí mitsínguánʼ náa ni̱jkha̱ kiʼdiin, náa xa̱bu̱ nutsijmiin.
19 ¡Atayáá! Mbiʼi rúʼko̱ ma̱ni̱ ngíníin bi̱ nuni̱ gínáán,
ma̱ni̱ káwíin bi̱ narajmbúúnʼ
magímbíin bi̱ nijuidíríʼiin.
Ma̱ni̱ rí mundrigú gamajkhu ga̱jma̱a̱ majmaʼniúnʼ
náa xúgíʼ mbaaʼ rí nigájnuu gamajkhún.
20 Náa mbiʼi rúʼko̱ matangu̱ún kaguáanʼla,
mbiʼi rúʼko̱ magímbáanʼla.
Numuu rí ma̱ni̱ dí majmaʼniáanʼla ga̱jma̱a̱ mundrígú gamajkhu náa xúgíʼ xuajin dí rígá náa ku̱ba̱ʼ,
ikháán má gáta̱ya̱a̱ xóo gáʼkha̱a̱ʼ kagui̱i̱n xa̱bia̱a̱ʼ bi̱ ni̱jkha̱ kiʼdiin”, eʼthí Jeobá.
Rí nandoo gáʼthúu̱n ‹Jeobá nirkaʼwu›.
O “mar”.
Mbáa nindxu̱u̱ rí nuni̱ ga̱jma̱a̱ rí najmún mu mbuyamajkhúún xándú.
Mbáa nandoo gáʼthúun plataforma náa grígú xíliu̱u̱ rey.
O “Puerta del Pescado”.
Mbáa nindxu̱u̱ mbá xuajin dí rígá náa Jerusalén dí gíʼ mijngii náa Xkrugoo E̱gi̱ʼ.
Náa ajngáa hebreo naʼthí, “maʼni wíñúú”.
Náa ajngáa hebreo naʼthí, “rí niʼthí marigá”.
O “mar”.
O “ku̱ba̱ʼ rí tuáʼán náa tapo̱o̱ iyaʼ”.
O “desierto”.
Náa ajngáa hebreo naʼthí, “xúgíinʼ xujkhúʼ bi̱ kúwíin náa xuajin rúʼko̱”.
O “puercoespín”.
Xujkhúʼ bugi̱ ni̱ndxu̱ún xóo iña̱ʼ mú itháan mbaʼwi̱i̱n.
Náa ajngáa hebreo naʼthí, “náa kuwáanʼla”.
O mbáa “xóo testigo”.
O “a̱ʼdée dxáʼgú”.