AGEO

1 Índo̱ niʼni a̱jma̱ tsiguʼ dí xtáa má raʼtáñajunʼ rey Darío, timbá mbiʼi rí maʼni majun igu̱nʼ Zorobabel a̱ʼdióo Sealtiel, xa̱bu̱ ñajunʼ* náa Judá ga̱jma̱a̱ Josué a̱ʼdióo Jehozadac, ndxajkun bi̱ phú kayá edxu̱u̱, nindrigú ajngóo Jeobá rí niʼthún profeta* Ageo:*

2 “Rígi̱ dí naʼthí Jeobá bi̱ naʼtáñajúúnʼ ángeles: ‹Xa̱bu̱ xuajin bugi̱ nuthi: “Xóó tséjkha̱nú mbiʼi rí maguma̱a̱ goʼwóo Jeobá”›”.

3 Mbu̱júu̱ Jeobá niʼthúu̱n profeta Ageo maʼthí ajngáa rígi̱: 4 “Lá naku̱ma̱la rí xúgi̱ nindxu̱u̱ mbiʼi rí makuwáanʼ náa guʼwála rí mitsaanʼ* mú goʼwóʼ ikhúún xóo tséguma̱a̱ʼ ráʼ. 5 Gudxawíín, rígi̱ rí naʼthí Jeobá bi̱ naʼtáñajúúnʼ ángeles: ‹Gundxaʼwamíjna̱* májánʼ rí kuwáanʼ ru̱ni̱la̱. 6 Ikháanʼ ra̱ʼkhá tháán mba̱a̱ e̱dula, mú nguéjma̱ dí nurajxi̱i̱la. Nupiʼtsula mú tségiʼmala. Nawanla mú tségiʼmala. Nuʼgíʼ xtíin mú tségigáanʼla. Bi̱ nañajunʼ nambáyúu i̱mba̱a̱, nagujxi̱i̱ rí nadaaʼ náa búxá rí tima iñúuʼ›”.

7 “Rígi̱ dí naʼthí Jeobá bi̱ naʼtáñajúúnʼ ángeles: ‹Gundxaʼwamíjna̱ májánʼ rí kuwáanʼ ru̱ni̱la̱›.

8 ‹Gatsimala kúbá gaʼgua ku̱da̱la ixi̱ mu mu̱ni̱ goʼwóʼ, mu xúʼko̱ manigu̱ʼ ga̱jma̱a̱ magruígú gamajkhu›, eʼthí Jeobá”.

9 “‹Mba̱a̱ rí niguáʼthi̱i̱n mundrígú, mú nguéjma̱ nindrígúla. Índo̱ ni̱jkua̱a̱ʼ kudala náa guʼwála mbóó má nindiyuu ga̱jma̱a̱ niguámbá. Náá numuu rá. Eʼthí Jeobá bi̱ naʼtáñajúúnʼ ángeles. Numuu rí goʼwóʼ xóó tséguma̱a̱, mú xúgiáanʼ ikháanʼ i̱ndó naxmiéjuanla muñewa̱a̱n guʼwála. 10 Ikhaa rúʼko̱ numuu rí náa mekhu nánguá gajtaa ya̱jma̱ʼ ga̱jma̱a̱ ku̱ba̱ʼ nánguá ejma̱a̱ rí najuiʼdu. 11 Ikhúún ni̱ni̱ rí xáxnúu ruʼwa náá ku̱ba̱ʼ ni má náa kúbá, ikha jngóo nándáa tsígáʼ, vino nuxi̱ʼ, aceite, nándáa rí najma̱a̱ náa ku̱ba̱ʼ, ikháanʼ gajmiáanʼla xujkiáaʼla nimíniiʼ ga̱jma̱a̱ xúgíʼ ñajunʼ rí ni̱ni̱ nindxu̱u̱ ndíí›”.

12 Zorobabel a̱ʼdióo Sealtiel, Josué a̱ʼdióo Jehozadac ndxajkun bi̱ phú kayá edxu̱u̱ ga̱jma̱a̱ eʼwíinʼ xa̱bu̱ xuajin nidxawíín aʼwóo Jeobá Dios ndrígu̱ún xúʼko̱ má rí niʼthí profeta Ageo, numuu rí Jeobá Dios ndrígu̱ún nindxu̱u̱ bi̱ nikuʼmaa. Ikhú xa̱bu̱ xuajin nigíʼdi̱i̱ nisngajma rí namiñun kuyáá Jeobá.

13 Ikhú Ageo bi̱ Jeobá nikuʼmaa maʼga kayóo ajngáa, xó má ñajunʼ dí Jeobá nixnúu maʼni, niʼthúún xa̱bu̱ xuajin ajngáa rígi̱: “‹Ikhúún xtáá ga̱jma̱á nindxa̱la›, eʼthí Jeobá”.

14 Ikha jngóo Jeobá nixkajxi̱i̱* Zorobabel a̱ʼdióo Sealtiel, xa̱bu̱ ñajunʼ náa Judá, xúʼko̱ má Josué a̱ʼdióo Jehozadac ndxajkun bi̱ phú kayá edxu̱u̱ ma̱ngaa eʼwíinʼ xa̱bu̱ xuajin. Nigún ga̱jma̱a̱ nigíʼdi̱i̱ niñejunʼ náa goʼwóo Jeobá bi̱ naʼtáñajúúnʼ ángeles, Dios ndrígu̱ún. 15 Rígi̱ nirígá mbiʼi 24 rí maʼni majun igu̱nʼ rí maʼni a̱jma̱ tsiguʼ dí xtáa raʼtáñajunʼ rey Darío.

2 Mbiʼi 21 rí juwan igu̱nʼ profeta* Ageo nigruigú ajngóo Jeobá rígi̱: 2 “Mbá péñu,* atra̱jxi̱ Zorobabel a̱ʼdióo Sealtiel, xa̱bu̱ ñajunʼ* náa Judá, xúʼko̱ má Josué a̱ʼdióo Jehozadac, ndxajkun bi̱ phú kayá edxu̱u̱ ga̱jma̱a̱ xa̱bu̱ xuajin bi̱ xóó naguanún: 3 ‹Tsáá guanúu xóó náa ikháanʼla bi̱ ndiʼyoo xóo mitsaanʼ* guʼwá rígi̱ nákha ginii rá. Xú káʼnii e̱ya̱a̱ xúgi̱ rá. Lá ragájkhun rí nánguá mbríguii xóo nákha ginii ráʼ.›

4 ‹Rí xúgi̱ gakhi̱i̱ a̱jkia̱a̱nʼ gátani̱ Zorobabel, eʼthí Jeobá, gakhi̱i̱ a̱jkia̱a̱nʼ gátani̱ Josué a̱ʼdióo Jehozadac, ndxajkun bi̱ phú kayá edxu̱u̱›.

‹Gakhi̱i̱ a̱jkia̱la guni̱ xúgiáanʼ ikháanʼla xa̱bu̱ bi̱ kuwáanʼla náa ku̱ba̱ʼ rígi̱, eʼthí Jeobá, ga̱jma̱a̱ guñajunʼla›.

‹Numuu rí ikhúún xtáá ga̱jma̱á nindxa̱la, eʼthí Jeobá bi̱ naʼtáñajúúnʼ ángeles. 5 Gármáʼáanʼ a̱jkia̱la rí nikuʼdáminaʼ ma̱ni̱ ga̱jma̱á numala índo̱ nigájnala náa Egipto, espíritu ndrígóʼ xóó rígá náa ikháanʼla.* Xámiñalaʼ›”.

6 “Numuu dí rígi̱ rí naʼthí Jeobá bi̱ naʼtáñajúúnʼ ángeles: ‹Nánguá má eyóoʼ mba̱yu̱u̱ʼ, imbóó nuthu itháan, ma̱bajngaa mekhu ga̱jma̱a̱ ku̱ba̱ʼ, lamáa* ga̱jma̱a̱ ku̱ba̱ʼ mijxooʼ›.

7 ‹Ma̱bajngaa xúgíʼ xuajin, ga̱jma̱a̱ rí gíʼdoo numuu náa xúgíʼ xuajin mato̱ʼo̱o̱ náa guʼwá rígi̱, ikhúún ma̱ni̱ rí magruigú gamajkhu›, eʼthí Jeobá bi̱ naʼtáñajúúnʼ ángeles.

8 ‹Plata ga̱jma̱a̱ oro nindxu̱u̱ ndrígóʼ›, eʼthí Jeobá bi̱ naʼtáñajúúnʼ ángeles.

9 ‹Gamajkhu rí magruigú guʼwá rígi̱ mani̱ndxu̱u̱ itháán mba̱a̱ ki xóo rí nigruigú nákha ginii›, eʼthí Jeobá bi̱ naʼtáñajúúnʼ ángeles.

‹Ma̱ni̱ rí náa mbaaʼ rígi̱ marigá tsímáá›, eʼthí Jeobá bi̱ naʼtáñajúúnʼ ángeles”.

10 Mbiʼi 24 rí mijna gu̱wa̱ʼ igu̱nʼ, índo̱ niʼni a̱jma̱ tsiguʼ rí xtáa má naʼtáñajunʼ Darío, profeta Ageo nigruigú ajngóo Jeobá: 11 “Rígi̱ dí naʼthí Jeobá bi̱ naʼtáñajúúnʼ ángeles: ‹Mbá péñu, atrajxu̱u̱n ndxajkun ga̱jma̱a̱ numuu xtángoo: 12 “Á mu mbáa xa̱bu̱ kayá xuyuuʼ tsigijñaʼ náa awúu̱n xtíñuu ga̱jma̱a̱ nangájma xtíñuu náa pan, ganitsu, vino, aceite o asndu káʼnii má ganitsu, lá mani̱ndxu̱u̱ mikaʼwu ráʼ.”›”

Ndxajkun niriʼña: “¡Na̱nguá!”.

13 Ikhú Ageo nirajxu̱u̱n: “Á mu mbáa xa̱bu̱ niguma tsagaa numuu rí niguguaa mbáa bi̱ nikháñuu índo̱ gágugua xúgíʼ rígi̱, lá mani̱ndxu̱u̱ mitsaga ráʼ.”

Ndxajkun niriʼña: “Mani̱ndxu̱u̱ mitsaga”.

14 Ikha jngóo Ageo niʼthí: “‹Xúʼko̱ nindxu̱ún xa̱bu̱ bugi̱, xúʼko̱ nindxu̱u̱ xuajin rígi̱ náa inuʼ, eʼthí Jeobá ga̱jma̱a̱ xúʼko̱ nindxu̱u̱ xúgíʼ rí nuni̱ ga̱jma̱a̱ ñawúúnʼ. Xúgíʼ rí nuxnajxi̱ ikhí nindxu̱u̱ mitsaga›.

15 ‹Mú rí xúgi̱, mbá péñu, asndu mbiʼi rígi̱ ga̱jma̱a̱ mbiʼi rí ma̱ʼkha̱ nda̱wa̱á gundxaʼwamíjna̱la májánʼ ga̱jma̱a̱ numuu rígi̱: Nákha xóo tségíʼdi̱i̱ munila guʼwá náa nduyamajkuíí Jeobá, 16 ndiéjunʼ erígá rá. Índo̱ mbáa na̱jkha̱ náa gíʼ ru̱tsu̱u̱ tsígáʼ nagi̱ʼthu̱u̱n rí makánúu mbá 20 gúxta̱a̱, i̱ndó nakánúu gu̱wa̱ʼ gúxta̱a̱, índo̱ mbáa na̱jkha̱ náa ka̱jnu̱ʼ vino gíʼthu̱u̱n rí makánúu mbá 50 rayaʼ vino, i̱ndó 20 ekánúu. 17 Ni̱ni̱ ngínáa xúgíʼ rí nini̱ ga̱jma̱a̱ ñawúúnʼ nikuʼnguánʼ mbá giñán jxooʼ, e̱wi ga̱jma̱a̱ eʼtsí, mú nimbáa tátanga̱a̱ náa ikhúún›, eʼthí Jeobá.

18 ‹Mbá péñu, gundxaʼwamíjna̱la májánʼ ga̱jma̱a̱ numuu mbiʼi rígi̱ ma̱ngaa mbiʼi rí ma̱ʼkha̱ nda̱wa̱á, mbiʼi 24 dí mijna gu̱wa̱ʼ igu̱nʼ, mbiʼi rí nigíʼdi̱i̱ nitsiji rajkhúu guʼwá náa nduyamajkuíí Jeobá, gundxaʼwamíjna̱la májánʼ ga̱jma̱a̱ numuu rígi̱. 19 Lá xóó naguanúu tsígáʼ náa naxtagijxi̱i̱ ráʼ. Ixi̱ uva, ixi̱ higo, granada ga̱jma̱a̱ olivo... xóó tséxná xndúu, lá raʼkháa xúʼko̱ ráʼ. Asndu mbiʼi rígi̱ ma̱ni̱ tsajkurámáanʼla›”.

20 Mbiʼi 24 ñajunʼ gu̱nʼ, Ageo nigruigú ajngóo Jeobá rí maʼni a̱jma̱ aʼphu̱. Ikhaa niʼthí: 21 “Aratháán Zorobabel, xa̱bu̱ ñajunʼ náa Judá: ‹Ma̱bajngaa mekhu ga̱jma̱a̱ ku̱ba̱ʼ. 22 Ma̱ni̱ gámbáa xílí* náa natrigi̱i̱n nutañajunʼ ma̱ngaa ma̱ni̱ gámbáa tsiaki̱i̱ ndrígu̱ún xa̱bu̱ ñajunʼ bi̱ kúwá náa i̱ʼwáʼ xuajin. Ma̱ni̱ gámbáa carro ga̱jma̱a̱ bi̱ nagún kuñu̱u̱n xúʼko̱ má ma̱ni̱ gámbíin wáyú mangiin bi̱ kudrúwíin majngutíguíin, kaníkiin guradímíjná ga̱jma̱a̱ espada›”.

23 “‹Mbiʼi rúʼko̱, eʼthí Jeobá bi̱ naʼtáñajúúnʼ ángeles, ikháán Zorobabel a̱ʼdióo Sealtiel, ma̱ni̱ rí mani̱ndxa̱a̱ʼ xa̱bi̱ʼ, eʼthí Jeobá, ma̱ni̱ rí mani̱ndxa̱a̱ʼ xóo mbá anillo rí nuxnáá ga̱jma̱a̱ sello, numuu rí ikháán nindxa̱a̱ʼ bi̱ ikhúún niraʼwi̱i̱›, eʼthí Jeobá bi̱ naʼtáñajúúnʼ ángeles”.