ZACARÍAS

1 Náa migiñuʼ igu̱nʼ dí a̱jma̱ tsiguʼ rí xtáa raʼtáñajunʼ Darío, Zacarías* bi̱ nindxu̱u̱ profeta,* a̱ʼdióo Berekías, a̱ʼdióo Idó, nigruigú ajngóo Jeobá: 2 “Jeobá nikiʼnáa wéñuuʼ kaʼñún ana̱la.*

3 Arathún: ‹Rígi̱ rí naʼthí Jeobá bi̱ naʼtáñajúúnʼ ángeles: “‹Gatangáanʼla náa ikhúún, eʼthí Jeobá bi̱ naʼtáñajúúnʼ ángeles, ga̱jma̱a̱ ikhúún matangu̱ún náa ikháanʼla›, eʼthí Jeobá bi̱ naʼtáñajúúnʼ ángeles”›.

4 ‹Xánindxala xóo ana̱la, profeta bi̱ nikúwá nákha ginii nithúún: “Rígi̱ rí naʼthí Jeobá bi̱ naʼtáñajúúnʼ ángeles: ‹Mbá péñu,* guniʼñááʼ kambala rí xkawiʼ ga̱jma̱a̱ rí xkawiʼ eni̱la›”›.

‹Mú ikhiin na̱nguá nixnatiʼñamijná mudxawunʼ ni má túnimbu̱u̱n›, eʼthí Jeobá.

5 ‹Náá kúwá ana̱la xúgi̱ rá. Lá nikúwá asndu kámuu profeta rá’. 6 Lá ragájkhun rí niguáʼníí ana̱la, xóo ajngáa ga̱jma̱a̱ xtángoo rí nikuʼmíin muthi xa̱bi̱ʼ bi̱ nindxu̱ún profeta ráʼ.› Ikha jngóo ikhiin nitangiín náa ikhúún ga̱jma̱a̱ nithi: ‹Jeobá bi̱ naʼtáñajúúnʼ ángeles niʼniuxu̱ xó má nindxu̱xu̱ ga̱jma̱a̱ rí nunixu̱, xó má rí ikhaa niraʼwíí maʼni›”.

7 Mbiʼi 24 rí maʼni 11 igu̱nʼ, xóo muʼthá, gu̱nʼ sebat,* rí maʼni a̱jma̱ tsiguʼ rí xtáa raʼtáñajunʼ Darío, profeta Zacarías, a̱ʼdióo Berekías, a̱ʼdióo Idó, nigruigú ajngóo Jeobá. 8 “Rí mbruʼun rígá mbá rí niwasngájmuʼ. Ndi̱yo̱o̱ mbáa xa̱bu̱ bi̱ karíguii mbáa wáyú maña̱a̱ʼ ga̱jma̱a̱ wíí juáʼan náa majñu̱u̱ʼ ixi̱ mirtos dí rígá náa mata. Náa kidxuuʼ ikhaa wájun wáyú bi̱ mañi̱i̱ʼ ga̱jma̱a̱ bi̱ mañaxániiʼ ma̱ngaa bi̱ miʼxíin”.

9 Ikha jngóo nirajxu̱u̱: “Tátá, tsíin nindxu̱ún bugi̱ rá.”

Ángel bi̱ xtáa raʼtámíjná ga̱jma̱á nindxu̱ʼ niriʼñuʼ: “Masngajmiáanʼ tsíin nindxu̱ún”.

10 Ikhú xa̱bu̱ bi̱ juáʼan wíí náa majñu̱u̱ʼ ixi̱ mirtos niʼthí: “Bugi̱ nindxu̱ún bi̱ Jeobá nikuʼmiin mu magún náa tsu̱du̱u̱ ku̱ba̱ʼ”. 11 Ga̱jma̱a̱ ikhiin nitháán ángel ndrígióo Jeobá bi̱ juáʼan náa majñu̱u̱ʼ ixi̱ mirtos: “Ni̱jkuáxu náa tsu̱du̱u̱ ku̱ba̱ʼ ga̱jma̱a̱ náa xúgíʼ ku̱ba̱ʼ nda̱a̱ dí rígá, tsímáá kri̱ga̱”.

12 Ikha jngóo ángel ndrígióo Jeobá nirajxi̱: “Jeobá bi̱ naʼtáñajúúnʼ ángeles, asndu nguáná gágawíinʼ a̱jkia̱a̱nʼ xtayáá Jerusalén ga̱jma̱a̱ xuajin dí rígá náa Judá, rí ikháán nikiʼnán xtayáá náa mbá 70 tsiguʼ rígi̱ rá.”

13 Jeobá niriʼñuu ángel bi̱ xtáa raʼtámíjná ga̱jma̱á nindxu̱ʼ ga̱jma̱a̱ ajngáa májánʼ rí maʼni̱i̱ a̱jkiu̱lú. 14 Ikhú ángel bi̱ xtáa raʼtámíjná ga̱jma̱á nindxu̱ʼ niʼthúnʼ: “Aratá rígi̱: ‹Rígi̱ rí naʼthí Jeobá bi̱ naʼtáñajúúnʼ ángeles: “Mambáyúu Jerusalén ga̱jma̱a̱ Sion ga̱jma̱a̱ xúgíʼ a̱jkiu̱nʼ. 15 Nakiʼnún, ra̱ʼkhá tháán kiʼnún ka̱ñu̱u̱n xa̱bu̱ bi̱ kúwá náa i̱ʼwáʼ xuajin bi̱ kúwá tsímáá, numuu rí índo̱ wáa káyúuʼ kiʼnún, ikhiin nini̱ dí marigá itháán dí ra̱májánʼ”›.

16 Ikha jngóo rígi̱ rí naʼthí Jeobá: ‹“Matangu̱ún magáwíinʼ a̱jkiu̱nʼ ka̱yo̱o̱ Jerusalén, ga̱jma̱a̱ goʼwóʼ maguma ikhí, eʼthí Jeobá bi̱ naʼtáñajúúnʼ ángeles, ga̱jma̱a̱ mbá ñuñuu rí naxtagiéwan ga̱jma̱a̱ matíga̱ náa Jerusalén”›.

17 Aratá rígi̱ ma̱ngaa: ‹Rígi̱ rí naʼthí Jeobá bi̱ naʼtáñajúúnʼ ángeles: “Xuajin ndrígóʼ matanga̱a̱ magiʼdoo wéñuuʼ rí májánʼ ga̱jma̱a̱ Jeobá matanga̱a̱ maʼni̱i̱ a̱jkiu̱u̱n Sion ma̱ngaa maraʼwíí Jerusalén”›”.

18 Ikhú nikujxí edxu̱ʼ ga̱jma̱a̱ ndi̱yo̱o̱ a̱jkhu̱ chi̱ji̱ʼ. 19 Ikha jngóo nirajxu̱u̱ ángel bi̱ xtáa raʼtámíjná ga̱jma̱á nindxu̱ʼ: “Ndiéjunʼ eyoo gáʼthúu̱n chi̱ji̱ʼ rúʼko̱ rá.” Ikhaa niriʼñuʼ: “Nindxu̱u̱ chi̱ji̱ʼ rí nixídiríʼíin xa̱bu̱ Judá, Israel ga̱jma̱a̱ Jerusalén”.

20 Nda̱wa̱á Jeobá nisngájmiuʼ a̱jkhui̱i̱n bi̱ nuni̱ xúgíʼ enii ñajunʼ dí mitsaanʼ.* 21 Ikhúún nirajxu̱u̱: “Ndiéjunʼ guwáʼ guni̱ ikhiin xá.”

Ikhaa niriʼñuʼ: “Chi̱ji̱ʼ rígi̱ nindxu̱u̱ rí nixídiriʼiin xa̱bu̱ Judá rí asndu nimbáa táʼngo̱o̱ maʼni ga̱jma̱a̱. Bi̱ nuni̱ xúgíʼ enii ñajunʼ dí mitsaanʼ maguwáʼ gúni̱ miñún, mudaʼ mbayííʼ chijñúnʼ xa̱bu̱ xuajin bi̱ nixujxi̱ chijñúnʼ mu muni̱ ngínáa ku̱ba̱ʼ ndrígóo Judá ma̱ngaa muxidiriʼiin xa̱bi̱i̱”.

2 Nikujxí edxu̱ʼ ga̱jma̱a̱ ndi̱yo̱o̱ mbáa xa̱bu̱ bi̱ kayá mbá ñuñuu rí naxtágiewan ga̱jma̱a̱. 2 Ikha jngóo nirajxu̱u̱: “Náá edxu̱ʼ rá.”

Ikhaa niriʼñuʼ: “Na̱jkhá gágiéwan Jerusalén mu mba̱yo̱o̱ nguáthá ma̱ja̱nʼ ga̱jma̱a̱ nguáthá mbaʼ”.

3 Ángel bi̱ xtáa raʼtámíjná ga̱jma̱á nindxu̱ʼ ni̱jkha̱a̱, ikhú ni̱ʼkha̱ i̱mba̱a̱ ángel gáraʼnuu. 4 Ikhú niʼthúunʼ: “Atagáyáaʼ ayuʼ gáratha̱a̱n dxámá buʼko̱: ‹“Jerusalén matanga̱a̱ makuwá xa̱bu̱, mani̱ndxu̱u̱ xóo mbaaʼ rí paʼtati̱ga̱* náa makuwá wéñuuʼ xa̱bu̱ ga̱jma̱a̱ xujkhúʼ. 5 Ikhúún, eʼthí Jeobá, maʼgánú mani̱ndxu̱ʼ xóo mbá aguʼ rí matujxu̱u̱ náa mbájndi xtáa ikhaa ga̱jma̱a̱ ikhúún maʼgánú mani̱ndxu̱ʼ bi̱ mbiʼyamajkuíí náa majñu̱u̱ʼ ikhaa”›”.

6 “¡Aguwa̱a̱ʼla! ¡Aguwa̱a̱ʼla! Gugayálá náa ku̱ba̱ʼ dí rígá náa norte”, eʼthí Jeobá.

“Numuu dí nixidiráʼáanʼla asndu náá”,* eʼthí Jeobá.

7 “¡Aya̱a̱ʼ Sion! Atani̱ kríyaminaʼ, ikháán bi̱ xtaa ga̱jma̱a̱ʼ wáxióo* Babilonia. 8 Numuu dí rígi̱ rí naʼthí Jeobá bi̱ naʼtáñajúúnʼ ángeles, bi̱ nda̱wa̱á dí nigruigú gamajkhu nikuʼmún maʼgá náa xuajin dí niguwi káyáaʼ rí xtaʼdáá: ‹Bi̱ naʼni ngínáán ikháán naʼni ngínáa xa̱biu̱u̱ iduʼ. 9 Dí xúgi̱ makujxí ñawúnʼ mu ma̱ni̱ ngíníi ikhiin, bi̱ ninindxu̱ún ñumbáá ndrígu̱ún murawíi káñúnʼ rí guáʼdáá›. Ikháanʼ gajkhun mbuya̱a̱ dí Jeobá bi̱ naʼtáñajúúnʼ ángeles nikuʼmún náa ikháanʼ.

10 Atatsaʼwá ga̱jma̱a̱ gagi wáxióo Sion, numuu rí na̱jkhá maʼgánú ga̱jma̱a̱ maxtáá ga̱jma̱á nindxa̱a̱ʼ, eʼthí Jeobá. 11 Mbiʼi rúʼko̱ mbaʼa xuajin magimbíin náa Jeobá, maguánú mani̱ndxu̱ún xuajñunʼ, ikhúún maxtáá náa majñu̱únʼ ikhiin”. Ikháán ma̱ta̱ya̱a̱ rí Jeobá bi̱ naʼtáñajúúnʼ ángeles nikuʼmún náa ikháán. 12 Jeobá magruigú Judá mu maʼni ndrígóo ikhaa náa mbaaʼ rí mikaʼwu ga̱jma̱a̱ maraʼwíi mbu̱júu̱ Jerusalén. 13 Xúgíinʼ xa̱bu̱* bi̱ kúwá náa tsu̱du̱u̱ ku̱ba̱ʼ wíí gáguájún náa inuu Jeobá, numuu dí asndu náa mikaʼwu dí ikhaa xtáa, ni̱ʼkha̱ mu ma’nimbánuu rí nikudaminaʼ maʼni.

3 Nisngájmiuʼ Josué, ndxajkun bi̱ phú kayá edxu̱u̱, bi̱ wíji̱ náa inuu ángel ndrígióo Jeobá ga̱jma̱a̱ náa ñawúunʼ mújúunʼ wíji̱ Gixa̱a̱* mu marikhoo. 2 Ikhú ángel ndrígióo Jeobá niʼthúu̱n Gixa̱a̱: “¡Jeobá gáxpríguáaʼ Gixa̱a̱! ¡Xúʼko̱, Jeobá gáxpríguáaʼ, bi̱ niraʼwíí Jerusalén! Lá raʼkháa xa̱bu̱ bugi̱ nindxu̱u̱ xóo mbá ixi̱ rí nixmátri̱ya̱a̱ʼ náa aguʼ xáʼ.”

3 Josué kagíʼ xtíin tsaga, wíji̱ náa inuu ángel. 4 Ángel niʼthúún bi̱ wájun náa inuu ikhaa: “Guríya̱a̱ʼ xtíñuu rí tsaga”. Nda̱wa̱á niʼthúu̱n ikhaa: “Atayáá, nirígúu rí nikiéʼkháanʼ, rí xúgi̱ mataʼgíʼ xtíin rí májánʼ”.

5 Ikha jngóo ni̱tha̱: “Gugrígula náa edxu̱u̱ xtíin kiejuunʼ dí kaʼwu”. Ikhú nigrigu xtíin rí kaʼwu náa edxu̱u̱ ma̱ngaa niguwa̱a̱nʼ xtíin, ángel ndrígióo Jeobá wíji̱ mijngii ikhí. 6 Ikhú ángel ndrígióo Jeobá niʼthúu̱n Josué: 7 “Rígi̱ rí naʼthí Jeobá bi̱ naʼtáñajúúnʼ ángeles: ‹Á mu najngrui̱ga̱a̱ʼ náa kambo̱ʼ ga̱jma̱a̱ natanimbaníí ñajunʼ rí kajkuáa ñawáanʼ náa inuʼ, mani̱ndxa̱a̱ʼ bi̱ maʼnimbánuu xkujndu náa goʼwóʼ ga̱jma̱a̱ matiewa̱a̱n rexo̱o̱ goʼwóʼ, maniʼñúuʼ rí ikháán ga̱jma̱a̱ bi̱ wájun gi̱i̱ matu̱ʼu̱u̱n náa xtáá›.

8 ‹Ikháán Josué, ndxajkun bi̱ phú kayá edxu̱u̱, mbá péñu,* atadxawíín ikháán gajmiáanʼ a̱ngia̱a̱nʼ bi̱ natri̱gi̱i̱n náa inaaʼ, numuu rí xa̱bu̱ bugi̱ nindxu̱ún xóo mbá tsinaʼ. ¡Gu̱ya̱a̱, ma̱ʼkhá ka̱ya̱a̱ xa̱bi̱ʼ bi̱ mbiʼyuu Rudiuuʼ iná! 9 ¡Gu̱ya̱a̱ itsí rí niʼgíʼ náa inuu Josué! I̱ndó itsí rúʼko̱ gíʼdoo mbá juwan iduu, ga̱jma̱a̱ marigá dí maniraʼmáʼ ikhí, eʼthí Jeobá bi̱ naʼtáñajúúnʼ ángeles, káaʼ mbóó mbiʼi gáʼgáaʼ ka̱gu̱ʼ aʼkhúun ku̱ba̱ʼ rúʼko̱›.

10 ‹Mbiʼi rúʼko̱, eʼthí Jeobá bi̱ naʼtáñajúúnʼ ángeles, mámbáa dí ikháanʼ maʼthúu̱n xa̱bu̱ bi̱ xtáa mijngii ga̱jma̱a̱ rí maʼga gági̱ʼi̱ ga̱jma̱a̱ náa agoo ixi̱ uva ga̱jma̱a̱ náa agoo ixi̱ higo ndrígóo›”.

4 Ángel bi̱ xtáa raʼtámíjná ga̱jma̱á nindxu̱ʼ nitanga̱a̱ ga̱jma̱a̱ nixkajñu̱ún xóo nuxkajui̱i̱ mbáa bi̱ naʼgu. 2 Ikhú nirajxu̱ʼ: “Ndiéjunʼ tayáá rá.”

Ikhúún niriʼñuu: “Nda̱yo̱o̱ mbá candelabro rí niguma ga̱jma̱a̱ oro, náa tsu̱du̱u̱ grígu mbá xua̱a̱. Trámáʼ mbá juwan lámpara, xúʼko̱, mbá juwan, náa lámpara rí trámáʼ ikhí, gíʼdoo mbá juwan tubo. 3 Mijngii ikhí guájun a̱jma̱ ixi̱ olivo, mbá náa nijniun mújúunʼ xua̱a̱ ga̱jma̱a̱ i̱mba̱ náa níjniúu xti̱yu̱u̱ʼ”.

4 Nda̱wa̱á nirajxu̱u̱ ángel bi̱ xtáa raʼtámíjná ga̱jma̱á nindxu̱ʼ: “Tátá ndiéjunʼ eyoo gáʼthúu̱n rígi̱ rá.” 5 Ikhú ángel bi̱ xtáa raʼtámíjná ga̱jma̱á nindxu̱ʼ niʼthúnʼ: “Na̱nguá tayáá ndiéjuunʼ eyoo gáʼthúu̱n rígi̱ ráʼ.”

Ikhúún niriʼñuu, “na̱nguá tátá”.

6 Ikhú niʼthúnʼ: “Rígi̱ nindxu̱u̱ ajngóo Jeobá rí na̱jkha̱ inuu Zorobabel: ‹“Raʼkháa ga̱jma̱a̱ numún soldados ni má ga̱jma̱a̱ numuu tsiaki̱i̱, mani̱ndxu̱u̱ ga̱jma̱a̱ numuu espíritu ndrígóʼ”, eʼthí Jeobá bi̱ naʼtáñajúúnʼ ángeles. 7 Ikháán kúbá, tsáá nindxa̱a̱ʼ rá. Náa inuu Zorobabel mi̱dxu̱ʼnú mani̱ndxa̱a̱ʼ mbá xkua̱. Ikhaa magrígu iwáá itsí índo̱ xa̱bu̱ gúndxa̱ʼwa̱ “¡Phú mitsaanʼ!* ¡Phú mitsaanʼ!”›”.

8 Nigruígú mbu̱júu̱ ajngóo Jeobá, niʼthúnʼ: 9 “Mínaaʼ Zorobabel magíʼ rajkhúu guʼwá rígi̱ ga̱jma̱a̱ mínaaʼ má ikhaa maʼni gájxu̱u̱. Gajkhun rí mbuya̱a̱ dí Jeobá bi̱ naʼtáñajúúnʼ ángeles nikuʼmún náa ikháanʼla. 10 Lá xtáa mbáa bi̱ támajkhuu kaʼyoo mbiʼi nákhá nigíʼdu̱u̱ nirígá rí nakujmaa dí nda̱a̱ wéñuuʼ numuu ráʼ. Xa̱bu̱ makuwá gagi ga̱jma̱a̱ mbuyáá plomo* rí kayá Zorobabel. Rígi̱* nindxu̱u̱ iduu Jeobá dí xtáa rayejxi̱* náa xúgíʼ tsu̱du̱u̱ ku̱ba̱ʼ”.

11 Ikhú nirajxu̱u̱: “Ndiéjunʼ eyoo gáʼthúu̱n a̱jma̱ ixi̱ olivo rígi̱, mbá rí wíji̱ náa níjniú mújúunʼ ga̱jma̱a̱ i̱mba̱ rí wíji̱ náa níjniú xti̱yu̱u̱ʼ candelabro rá.” 12 Nda̱wa̱á nirajxu̱u̱ rí maʼni a̱jma̱ nuthu: “Ndiéjunʼ eyoo gáʼthúu̱n mbá xtáxu̱u̱ ñawúunʼ* olivo náa nagájnuu iyaʼ mojmoʼ náa a̱jma̱ tubo dí oro rá.”

13 Niʼthúnʼ: “Na̱nguá tayáá ndiéjuunʼ eyoo gáʼthúu̱n rígi̱ ráʼ.”

Ikhú ni̱thu̱u̱n, “na̱nguá tátá”.

14 Ikhaa niʼthúnʼ: “Bugi̱ nindxu̱ún a̱jmi̱i̱n bi̱ nijuaxtaʼwíin bi̱ guájun náa níjniúu Tátá bi̱ xtáa náa xúgíʼ tsu̱du̱u̱ ku̱ba̱ʼ”.

5 Nikujxíi mbu̱júu̱ edxu̱ʼ ga̱jma̱a̱ ndi̱yo̱o̱ mbá rollo rí na̱jkha̱ náa inuu giñánʼ. 2 Ángel nirajxu̱ʼ: “Ndiéjunʼ tayáá rá.”

Ikhúún niriʼñuu: “Nda̱yo̱o̱ mbá rollo rí na̱jkha̱ náa inuu giñánʼ, rí mbaʼ nindxu̱u̱ mijna gu̱wa̱ʼ metro,* rí ma̱ja̱nʼ nindxu̱u̱ a̱jkhu̱ metro”.*

3 Nda̱wa̱á niʼthúnʼ: “Ajngáa rí kiʼniraʼmáʼ náa rollo nindxu̱u̱ rí nijuiʼtátsrígú rí maʼga̱ roʼoo náa xúgíʼ tsu̱du̱u̱ ku̱ba̱ʼ numuu rí xúgíinʼ bi̱ nuni̱ kuʼwáʼ nda̱a̱ rí egíʼníí, xó má kiʼniraʼmáʼ náa mbá níʼkhóo rollo, ga̱jma̱a̱ xúgíinʼ bi̱ nuxna ajngún na̱nguá enimbáníí nda̱a̱ rí egíʼníí, xó má kiʼniraʼmáʼ náa i̱mba̱ níʼkhóo rollo. 4 ‹Nikuʼnguánʼ, eʼthí Jeobá bi̱ naʼtáñajúúnʼ ángeles, ga̱jma̱a̱ mato̱ʼo̱o̱ náa goʼwóo bi̱ naʼni kúwáʼ ga̱jma̱a̱ náa goʼwóo bi̱ najmuu mbiʼyuʼ mu maxná ajngóo mú na̱nguá eʼnimbánuu, maguanúu náa guʼwá rúʼko̱ mu maʼni gámbáa ixi̱ ga̱jma̱a̱ itsí›”.

5 Ikhú ángel bi̱ xtáa raʼtámíjná ga̱jma̱á nindxu̱ʼ ni̱ʼkha̱ kanuu ga̱jma̱a̱ niʼthúnʼ: “Mbá péñu,* ataxújxi̱ edxa̱a̱ʼ, atayáá ndiéjunʼ xtáa rakujmaa”.

6 Ikha jngóo nirajxu̱u̱: “Ndiéjunʼ nindxu̱u̱ rúʼko̱ rá.”

Ikhaa niriʼñuʼ: “Rí xtaa ratayáá nindxu̱u̱ mbá canasta rí nugiewan ga̱jma̱a̱”.* Ma̱ngaa niʼthí xóó: “Xúʼko̱ kaʼnii kiejxu̱u̱n xa̱bu̱ ra̱míjíinʼ bi̱ kúwá náa xúgíʼ tsu̱du̱u̱ ku̱ba̱ʼ”. 7 Ndi̱yo̱o̱ dí mbáa nikujxi̱ rí dijndi dí kúgoo ga̱jma̱a̱ canasta rí nindxu̱u̱ plomo* ga̱jma̱a̱ ikhí gíwánʼ mbáa a̱ʼgu̱. 8 Ikhaa niʼthí: “Rígi̱ nindxu̱u̱ rí Xkawiʼ”. Ikhú nikujmbama̱ʼa̱a̱n mbu̱júu̱ náa awúu̱n canasta rí nugiewan ga̱jma̱a̱, nda̱wa̱á nigrígúu jxa̱ʼ dí kúgoo ga̱jma̱a̱ rí nindxu̱u̱ plomo.

9 Ikhú nikujxí edxu̱ʼ ga̱jma̱a̱ ndi̱yo̱o̱ rí naguwáʼ kanuu a̱jmi̱i̱n gu̱ʼu̱ bi̱ jngruigu̱u̱n náa inuu giñánʼ. Guaʼdáá xpíjpiúún xóo xpíjpiúu cigüeña. Ga̱jma̱a̱ nixujxi̱ canasta nigún kuñu̱u̱n náa inuu giñánʼ.* 10 Ikhú nirajxu̱u̱ ángel bi̱ xtáa raʼtámíjná ga̱jma̱á nindxu̱ʼ: “Náá egún kuñu̱u̱n canasta rí naxtagiewan ga̱jma̱a̱ xá.”

11 Ikhaa niriʼña: “Náa ku̱ba̱ʼ ndrígóo Sinar* mu muni̱ goʼwóo a̱ʼgu̱ bugi̱, índo̱ gájxu̱u̱n guʼwá magún kuya̱a̱ ikhí náa kaʼyoo maxtáa”.

6 Nikujxíi edxu̱ʼ mbu̱júu̱ ga̱jma̱a̱ ndi̱yo̱o̱ a̱jkhu̱ carro rí nagájnuu náa a̱jma̱ kúbá ga̱jma̱a̱ kúbá rígi̱ nindxu̱u̱ cobre. 2 Timbá carro nuxmajtaa wáyú mañi̱i̱ʼ, raga̱jma̱ carro nuxmajtaa wáyú skuniiʼ. 3 Rí maʼni ajtsú carro nuxmajtaa wáyú miʼxíin, rí maʼni a̱jkhu̱ carro nuxmajtaa wáyú mixtíin ga̱jma̱a̱ bi̱ guáʼdáá mixtí mba̱ʼu̱.

4 Nirajxu̱u̱ ángel bi̱ xtáa raʼtámíjná ga̱jma̱á nindxu̱ʼ: “Tátá, tsíín nindxu̱ún bugi̱ rá.”

5 Ángel niriʼñuʼ: “Bugi̱ nindxu̱ún a̱jkhui̱i̱n ángeles* bi̱ kúwíin mekhuíí bi̱ nigájni̱ín nda̱wa̱á rí nixnajxi̱mijna̱ náa inuu Tátá bi̱ xtáa náa xúgíʼ tsu̱du̱u̱ ku̱ba̱ʼ. 6 Carro dí nuxmajtaa wáyú skuniiʼ na̱jkha̱ náa ku̱ba̱ʼ dí rígá náa norte, rí nuxmajtaa wáyú miʼxíin na̱jkha̱ itháán ñuʼún náa lamáa,* rí nuxmajtaa wáyú mixtíin na̱jkha̱ náa ku̱ba̱ʼ dí rígá náa sur. 7 Wáyú bi̱ guáʼdáá mixtí mba̱ʼu̱ ra̱ʼkhá tháán endúún magún náa xúgíʼ tsu̱du̱u̱ ku̱ba̱ʼ”. Ikhú niʼthí: “Gaʼguala náa xúgíʼ tsu̱du̱u̱ ku̱ba̱ʼ”. Ikhú nigájnún nigún náa xúgíʼ tsu̱du̱u̱ ku̱ba̱ʼ.

8 Ikhú nindxa̱ʼóʼ ga̱jma̱a̱ niʼthúnʼ: “Atayáá, bi̱ nagún náa ku̱ba̱ʼ dí rígá náa norte nini̱ dí espíritu ndrígóo Jeobá mbayáa jxu̱u̱ʼ ikhí”.

9 Nda̱wa̱á nigruígú mbu̱júu̱ ajngóo Jeobá, niʼthún’: 10 “Atandrigú rí Heldái, Tobiya ga̱jma̱a̱ Jedayá niguwáa̱nʼ kudúún rí nixna xa̱bu̱ náa xuajin rí ni̱jkha̱ kiʼdiin, mbiʼi má rúʼko̱ mbaʼyóoʼ mata̱ʼa̱a̱ʼ náa goʼwóo Josías a̱ʼdióo Sofonías mbóó gajmiáanʼ bi̱ niguwáa̱nʼ náa Babilonia. 11 Majmaa plata ga̱jma̱a̱ oro mu matani̱ mbá corona, nda̱wa̱á matagrígu náa edxu̱u̱ Josué a̱ʼdióo Jehozadac, ndxajkun bi̱ phú kayá edxu̱u̱. 12 Aratháán:

‹Rígi̱ dí naʼthí Jeobá bi̱ naʼtáñajúúnʼ ángeles: “Gi̱i̱ xtáa xa̱bu̱ bi̱ mbiʼyuu Rudiuuʼ iná. Asndu náa xtáa majmidi̱i̱, ikhaa maʼni guʼwá náa mbuyamajkuíí Jeobá. 13 Ikhaa nindxu̱u̱ bi̱ maʼni guʼwá náa mbuyamajkuíí Jeobá, ma̱ngaa magruigú gamajkhu. Magi̱ʼi̱ náa xíliu̱u̱* mu maʼtáñajunʼ mú ma̱ngaa mani̱ndxu̱u̱ ndxajkun, náa nájma̱ ñajunʼ rí magiʼdoo maʼni rí xa̱bu̱ makuwá tsímáá. 14 Corona maguanúu náa guʼwá rí nduyamajkuíí Jeobá mu marmáʼáan a̱jkiu̱ún kuyáá Hélem, Tobiya, Jedayá ga̱jma̱a̱ Hen a̱ʼdióo Sofonías. 15 Bi̱ kúwá mitsínguánʼ maguwáanʼ mu muñajunʼ náa maguma guʼwá náa mbuyamajkuíí Jeobá”. Ikháanʼ mbuya̱a̱ gajkhun rí Jeobá bi̱ naʼtáñajúúnʼ ángeles nikuʼmún náa ikháanʼla. I̱ndó mambanúu rígi̱ á mu nu̱nimbala aʼwóo Jeobá Dios ndrígala›”.

7 Índo̱ niʼni a̱jkhu̱ tsiguʼ dí xtáa má raʼtáñajunʼ rey Darío, Zacarías nigruigú ajngóo Jeobá náa a̱jkhu̱ mbiʼi rí maʼni mijna gu̱wa̱ʼ igu̱nʼ, xóo muʼthá, gu̱nʼ kislev.* 2 Xa̱bu̱ bi̱ kúwá náa Betel nixuʼmaa Sarézer ga̱jma̱a̱ Réguem-Mélec gajmiún xa̱biu̱ún mu mutakháñíí Jeobá rí mambáñún, 3 ga̱jma̱a̱ muthúún ndxajkun bi̱ kúwá náa goʼwóo Jeobá bi̱ naʼtáñajúúnʼ ángeles mangiin profetas:* “Lá mbaʼyóoʼ mambi̱ya̱ʼ ga̱jma̱a̱ maniʼñúuʼ rakuiʼtsú índo̱ gáʼni witsu igu̱nʼ xó má ni̱ʼkhá ra̱ni̱ mba̱yu̱u̱ʼ tsiguʼ ráʼ.”

4 Nigruígú mbu̱júu̱ ajngóo Jeobá bi̱ naʼtáñajúúnʼ ángeles. Niʼthúnʼ: 5 “Arathún xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ mangiin ndxajkun: ‹Náa mbá 70 tsiguʼ ikháanʼla nirkueyimijná* ga̱jma̱a̱ nikuwáanʼla ngíná índo̱ niʼni witsu igu̱nʼ ga̱jma̱a̱ índo̱ niʼni juwan igu̱nʼ, lá gajkhun ni̱ni̱ rígi̱ ga̱jma̱a̱ numuʼ ikhúún ráʼ. 6 Índo̱ nupiʼtsula ga̱jma̱a̱ nawanla, lá nundxaʼwamíjná ga̱jma̱a̱ numuʼ ráʼ. 7 Lá táʼyóoʼ mu̱ni̱mbala ajngóo Jeobá dí nithi profeta bi̱ nikúwá nákha wájyúuʼ ráʼ. Nákha Jerusalén ga̱jma̱a̱ xuajin dí rígá mijngii nikúwíin xa̱bu̱ ga̱jma̱a̱ nikúwá tsímáá, xúʼko̱ má nákha nikúwá xa̱bu̱ náa Négueb ga̱jma̱a̱ Sefelá›”.

8 Zacarías nigruigú mbu̱júu̱ ajngóo Jeobá: 9 “Rígi̱ rí naʼthí Jeobá bi̱ naʼtáñajúúnʼ ángeles: ‹Gunimbáníí numala xóo phú kaʼyoo, gagáwíinʼ a̱jkia̱la kuyamijná ga̱jma̱a̱ gusngajmá rí nandala kuyamijná.* 10 Xátani nduwaʼ mu matani̱ kuʼwááʼ a̱ʼgú xuáʼa ni má a̱ʼdá wáʼa ni má xa̱bu̱ bi̱ na̱ʼkha̱á ni má bi̱ migínáa, xútha̱a̱n a̱jkia̱la muni̱i̱ dí ra̱májánʼ mbáa›. 11 Mú ikhiin nini̱ gaʼduunʼ rí mudxawíín, nini̱ gújkhúʼ a̱jkiu̱ún, nitangañi̱ín xígií ga̱jma̱a̱ niruguáá cháʼwúún mu xúdxawíín. 12 A̱jkiu̱ún niʼni gújkhúʼ xóo mbá diamante* ga̱jma̱a̱ túnimbu̱u̱n xtángoo, ni má ajngóo Jeobá bi̱ naʼtáñajúúnʼ ángeles rí nikuʼma ga̱jma̱a̱ espíritu ndrígóo náa majñu̱únʼ profetas bi̱ nikúwá nákha ginii. Ikha jngóo Jeobá bi̱ naʼtáñajúúnʼ ángeles nikiʼnáa wéñuuʼ”.

13 “‹Xó má ikhiin túdxawíín índo̱ ikhúún nindxa̱ʼwu̱u̱n,* xúʼko̱ má mangúún tádxawun índo̱ ikhiin nindxa̱ʼo̱ʼ, eʼthí Jeobá bi̱ naʼtáñajúúnʼ ángeles. 14 Ga̱jma̱a̱ mbá giñámbiʼ nixidíʼríin náa xúgíʼ xuajin rí ikhiin na̱nguá eniʼnúuʼ nákha ginii, ga̱jma̱a̱ ku̱ba̱ʼ rí niniña̱a̱nʼ niguanáa, nimbáa na̱nguá enújngoo ikhí, numuu rí nini̱ dí ku̱ba̱ʼ mitsaanʼ* maguajta̱a̱ gamíi›”.

8 Nigruígú mbu̱júu̱ ajngóo Jeobá bi̱ naʼtáñajúúnʼ ángeles. Niʼthúnʼ: 2 “Rígi̱ dí naʼthí Jeobá bi̱ naʼtáñajúúnʼ ángeles: ‹Mambáyúu Sion ga̱jma̱a̱ xúgíʼ a̱jkiu̱nʼ, ga̱jma̱a̱ sia̱nʼ gáʼgá gámbáyúu›”.

3 “Rígi̱ dí naʼthí Jeobá: ‹Matanga̱án náa Sion ga̱jma̱a̱ maxtáá náa Jerusalén, Jerusalén magumbiʼyuu xuajin rí gajkhun, kúbá ndrígóo Jeobá bi̱ naʼtáñajúúnʼ ángeles magu̱ mbiʼyuu kúbá rí mikaʼwu›”.

4 “Rígi̱ dí naʼthí Jeobá bi̱ naʼtáñajúúnʼ ángeles: ‹Xa̱bekha ga̱jma̱a̱ gu̱ʼu̱ bi̱ guanii matangi̱ín matrigi̱i̱n náa xuáá ndrígóo Jerusalén, mámbáa gáyá ragótiu̱u̱ numuu rí guanii.* 5 Náa xuáá ndrígóo xuajin makuwá mbaʼin e̱ji̱n rutsíin›”.

6 “Rígi̱ dí naʼthí Jeobá bi̱ naʼtáñajúúnʼ ángeles: ‹Maski ajndu bi̱ xóó maguanún náa xuajin rígi̱ mbuyáá rí gakhi̱i̱ mambanúu rígi̱, lá maʼniuʼ gakhi̱i̱ mangúún ráʼ.› Eʼthí Jeobá bi̱ naʼtáñajúúnʼ ángeles”.

7 “Rígi̱ dí naʼthí Jeobá bi̱ naʼtáñajúúnʼ ángeles: ‹Ma̱ni̱ kríyaaʼ xuajñunʼ náa ku̱ba̱ʼ dí rígá náa nagájnuu a̱jkha̱ʼ* ga̱jma̱a̱ náa narámaaʼ a̱jkha̱ʼ.* 8 Maʼkháaʼ kagui̱i̱n mu makuwá náa Jerusalén, ikhiin mani̱ndxu̱ún xa̱bu̱ xuajñunʼ ga̱jma̱a̱ ikhúún mani̱ndxu̱ʼ Dios ndrígu̱ún bi̱ májánʼ a̱jkiu̱u̱n ga̱jma̱a̱ gajkuwiin›”.

9 “Rígi̱ dí naʼthí Jeobá bi̱ naʼtáñajúúnʼ ángeles: ‹Xámiñalaʼ, ikháanʼ bi̱ xúgi̱ nudxawíín ajngáa rí nuthi profetas,* ikháá má ajngáa rí nijuiʼthá nákhá mbiʼi rí nigi̱ʼi̱ rajkhúu goʼwóo Jeobá bi̱ naʼtáñajúúnʼ ángeles, mu maguma mbá guʼwá náa mbiʼyamajkuíí. 10 Numuu rí nákhá xóó tséʼkha̱nú mbiʼi rúʼko̱, tséjuiʼni numáá nimbáa xa̱bu̱ ni má xujkhúʼ, ga̱jma̱a̱ numún xa̱bu̱ sia̱nʼ gamíi rí majngruiga̱a̱ʼ, numuu rí ikhúún ni̱ni̱ rí xa̱bu̱ xámbájxu̱u̱n›.

11 ‹Mú xátangu̱ún maniu̱u̱ bi̱ xóó naguanún náa xuajin xó má ni̱ni̱ nákhá ginii, eʼthí Jeobá bi̱ naʼtáñajúúnʼ ángeles. 12 Numuu rí ikhiin mudu tsígáʼ rí ma̱ʼkha̱ kayóo rí tsímáá, ixi̱ uva maxná xndúu, náa ku̱ba̱ʼ ma̱jma̱a̱ rí majuiʼdu, náa mekhu magajtaa ya̱jma̱ʼ, bi̱ xóó gáguanún náa xuajin rígi̱ maxnu̱u̱ xúgíʼ rígi̱. 13 Ikháanʼla bi̱ kuwáanʼ náa goʼwóo Judá ga̱jma̱a̱ náa goʼwóo Israel, xó má xa̱bu̱ bi̱ kúwá náa i̱ʼwáʼ xuajin nitatsríguáanʼla, xúʼko̱ má maguma tsajkurámáanʼla numuu rí ikhúún ma̱ni̱ káwáanʼla. ¡Xámiñalaʼ! Gakhi̱i̱ a̱jkia̱la gúni›.

14 Numuu dí rígi̱ rí naʼthí Jeobá bi̱ naʼtáñajúúnʼ ángeles: ‹“Xó má niraʼwi̱i̱ makuʼmá mbá gamiéjunʼ inala ga̱jma̱a̱ tágáwíinʼ a̱jkiu̱nʼ, numuu rí wajin xiʼñála nini̱ rí makiʼnún, eʼthí Jeobá bi̱ naʼtáñajúúnʼ ángeles, 15 mú rí xúgi̱ niraʼwi̱i̱ maniu̱u̱ dí májánʼ Jerusalén ga̱jma̱a̱ bi̱ kúwá náa goʼwóo Judá. ¡Xámiñalaʼ!”›.

16 ‹Rígi̱ nindxu̱u̱ dí ikháanʼ gíʼmaa mu̱ni̱la: Mu̱tha̱ rí gajkhun índo̱ gútamíjnála ma̱ngaa índo̱ gúni̱ mbáníí xkujndu náa xkruguala, gu̱tha̱ rí gajkhun ga̱jma̱a̱ guni̱ dí marigá rí tsímáá. 17 Xúriyaʼ awan náa awúu̱n a̱jkia̱la mu munimíjna̱ dí raʼkhí, xúxna ajngála á mu tsénimbáníí,* numuu rí ikhúún nawi̱yu̱ʼ ka̱yo̱o̱ xúgíʼ rúʼko̱› eʼthí Jeobá”.

18 Mbu̱júu̱ nigruígú ajngóo Jeobá bi̱ naʼtáñajúúnʼ ángeles. Niʼthúnʼ: 19 “Rígi̱ dí naʼthí Jeobá bi̱ naʼtáñajúúnʼ ángeles: ‹Rí murkueyimijná* índo̱ gáʼni a̱jkhu̱ igu̱nʼ, xúʼko̱ má rí witsu igu̱nʼ, ma̱ngaa rí maʼni juwan igu̱nʼ ga̱jma̱a̱ rí maʼni gu̱wa̱ʼ igu̱nʼ, mbiʼi rúʼko̱ mani̱ndxu̱u̱ mbá mbiʼi rí makuwá gagi wéñuuʼ bi̱ kúwá náa goʼwóo Judá, mani̱ndxu̱u̱ mbiʼi dí marigá ndxa̱a̱ gagi. Ikha jngóo gaʼndala ku̱ya̱a̱ rí gajkhun ga̱jma̱a̱ dí tsímáá›.

20 Rígi̱ dí naʼthí Jeobá bi̱ naʼtáñajúúnʼ ángeles: ‹Maʼga̱nú mbiʼi rí xuajin ga̱jma̱a̱ xa̱bu̱ bi̱ kúwá náa mbaʼa xuajin maguwáʼ, 21 xa̱bu̱ bi̱ kúwá náa mbá xuajin magún ga̱jma̱a̱ muthúún bi̱ kúwá náa i̱mba̱ xuajin: “¡Guʼgua̱! Guʼgua̱ gúʼtakáñíí Jeobá rí mambáyulú ga̱jma̱a̱ guʼgua̱ gúʼyáaʼ Jeobá bi̱ naʼtáñajúúnʼ ángeles. Mangúún maʼgá”. 22 Mbaʼa xuajin, xúʼko̱ má xuajin rí gíʼdoo tsiaki̱i̱ maguwáʼ gúyáaʼ Jeobá bi̱ naʼtáñajúúnʼ ángeles náa Jerusalén ga̱jma̱a̱ mutakáñíín Jeobá rí mambáñún›.

23 Rígi̱ rí naʼthí Jeobá bi̱ naʼtáñajúúnʼ ángeles: ‹Mbiʼi rúʼko̱, gu̱wi̱i̱nʼ xa̱bu̱ bi̱ naguwáʼ náa mixtiʼkhu xuajin ga̱jma̱a̱ nuthi xúgíʼ enii ajngáa, murajthuun, xúʼko̱, murajthuun jxa̱ʼ rawuunʼ xtíñuu mbáa judío ga̱jma̱a̱ muthán: “Nanduxuʼ muʼguá ga̱jma̱á nindxa̱la, numuu rí nidxáwíínxu̱ rí Dios xtáa ga̱jma̱á nindxa̱la”›”.

9 Mbá rí nijuiʼthá:

 3 Tiro niʼni mbá xtájtsí.

 9 Wáxióo* Sion, gaʼdxaaʼ wéñuuʼ.

Atatsaʼwá ga̱jma̱a̱ gagi wáxióo Jerusalén.

¡Atayáá! Rey ndrígáaʼ na̱ʼkha̱ gáʼyaaʼ.

Maguma gámbáa xkamídá rí nuxmijná ga̱jma̱a̱.

12 Gatangáanʼla náa xtájtsí, ikháanʼla bi̱ ni̱jkha̱ kiʼdáanʼ bi̱ rígá mbaʼa rí kuaʼti̱i̱n.

Rí xúgi̱ natha̱nʼ:

‹Ikháán, a̱ʼgu̱, a̱jma̱ nuthu itháán gáni̱ tsajkurámáánʼ.

10 “Gunda̱ʼa̱a̱ ruʼwa Jeobá náa mbiʼi rí naxnáa ruʼwa nda̱wa̱á.

4 Rígi̱ rí naʼthí Jeobá Dios ndrígóʼ: ‹Atie̱wu̱u̱n mugu̱ bi̱ na̱jkha̱ kiʼdiin makhañún. 5 Bi̱ nutsi̱i̱n, nuradíin ga̱jma̱a̱ rígi̱ tséʼni maguaʼdáá aʼkhúún. Bi̱ nugujui̱i̱n nuthi: “Gaguma mba̱a̱ Jeobá numuu rí maʼgánú magúʼdoo wéñuuʼ”. Baxtúu bi̱ nuñewu̱u̱n na̱nguá egáwíinʼ a̱jkiu̱ún kuñún›.

6 ‹Numuu rí xátangu̱ún magáwíinʼ a̱jkiu̱nʼ ka̱ñu̱u̱n xa̱bu̱ xuajin, eʼthí Jeobá. Ikha jngóo ma̱ni̱ dí kanikhíín xa̱bu̱ mutañajumijná ga̱jma̱a̱ rey maʼtañájúúnʼ, muni̱ gámbáa ku̱ba̱ʼ ga̱jma̱a̱ nimbáa xáni̱ kríya̱a̱ʼ›”.

7 Nigíʼdu̱u̱ niñewu̱u̱n mugu̱ bi̱ na̱jkha̱ kiʼdiin makhañún, ni̱ni̱ ga̱jma̱a̱ numala ikháanʼ mugu̱ bi̱ kuwáanʼ ngíná. Ikha jngóo niguájtúun a̱jma̱ ragóti: Mbá nixna mbíʼyuu Májáanʼ a̱jkiu̱u̱n, i̱mba̱ nixna mbíʼyuu dí Naru̱wa̱a̱, ikhú nigíʼdu̱u̱ niñewu̱u̱n mugu̱. 8 Náa káaʼ mbá igu̱nʼ nixkúún ajtsíin baxtúu numuu rí nánguá eʼngo̱o̱ a̱jkiu̱nʼ eni̱, ikhiin mangiin nawiñu̱u̱nʼ kuyoʼ. 9 Ikha jngóo ni̱tha̱: “Ní xáña̱wu̱u̱n itháan. Bi̱ na̱jkha̱ rakháñuu, gakhañúu. Bi̱ kaʼyoo makhañúu, gakhañúu. Bi̱ xóó gáguanún, mámbáa gíkhu̱ xuyuuʼ ndxájuu”. 10 Ikhú niguájtúu̱n ragótiuʼ rí Májáanʼ a̱jkiu̱u̱n ga̱jma̱a̱ nixpígaʼ, xúʼko̱ ni̱ni̱ gámbáa rí nimbánúʼ gajmíʼ xúgíinʼ xa̱bu̱ xuajin. 11 Xúʼko̱ niguma gámbáa rí nimbánuu mbiʼi rúʼko̱, mugu̱ bi̱ kúwá ngíná bi̱ kúwá ruyoʼ ndiyáá rí nindxu̱u̱ ajngóo Jeobá.

12 Ikhú ni̱thu̱u̱n: “Á mu májánʼ e̱ya̱a̱la, gu̱ni̱ numuʼla, á mu na̱nguá, gaguanála ga̱jma̱a̱”. Ikhú nini̱ numuʼ* 30 mbújkha̱a̱ plata.

13 Nda̱wa̱á Jeobá niʼthúnʼ: “Atadama̱ʼa̱n náa gajti rí gíʼdoo numuu... mbújkha̱a̱ dí nixnuʼ rí nda̱a̱ kayuuʼ numuu”. Ikhú niguajtúun 30 mbújkha̱a̱ plata ga̱jma̱a̱ nidama̱ʼa̱a̱n náa kajti rí gíʼdoo numuu náa goʼwóo Jeobá.

14 Nda̱wa̱á nixpígaʼ rí maʼni raga̱jma̱ ragótiuʼ, dí Naru̱wa̱a̱, xúʼko̱ ni̱ni̱ rí Judá ga̱jma̱a̱ Israel ní xákúwá mbóó.

15 Jeobá niʼthúnʼ: “Dí xúgi̱ ada rí najmuu mbáa baxtúu bi̱ nda̱a̱ rí ejmaa. 16 Numuu rí maniʼñúuʼ dí magajnúu mbáa baxtúu náa xuajin. Xáñawu̱u̱n mugu̱ bi̱ na̱jkha̱ rakháñún, xáñíinʼ e̱jñu̱ún mugu̱ bi̱ nindáti̱gi̱i̱n ni má xáʼni thanún náa nigawúúnʼ ni má xáxniʼtsún bi̱ naʼngu̱u̱n má naguájun. Rí phú maʼni, mikhu̱u̱n mugu̱ bi̱ mbaʼwi̱i̱n. Magruigú tsújún.

17 ¡Gínáalá baxtiúʼ bi̱ nda̱a̱ dí ejmaa, bi̱ naniñúúnʼ mugu̱!

Mbá espada maʼni gawúunʼ ñawúunʼ ga̱jma̱a̱ iduu mújúunʼ.

12 Mbá rí nijuiʼthá:

2 “Ma̱ni̱ rí Jerusalén mani̱ndxu̱u̱ mbá copa dí maʼbangañi̱i̱n xúgíinʼ xa̱bu̱ bi̱ kúwá náa xúgíʼ xuajin dí tri̱ga̱ mijngii, ma̱ngaa xa̱bu̱ sia̱nʼ muruguama̱ʼa̱a̱n Judá ga̱jma̱a̱ Jerusalén. 3 Mbiʼi rúʼko̱ ma̱ni̱ rí Jerusalén mani̱ndxu̱u̱ mbá itsí rí ki̱wu̱n náa xúgíʼ xuajin. Xúgíinʼ bi̱ gúxujxi̱ ra̱ʼkhá tháan gágawúúnʼ, ga̱jma̱a̱ xúgíʼ xuajin dí rígá náa tsu̱du̱u̱ ku̱ba̱ʼ magímbíin mu muxmijná gajmiún ikhaa. 4 Mbiʼi rúʼko̱, eʼthí Jeobá, ma̱ni̱ rí mamiñún xúgíinʼ wáyú ga̱jma̱a̱ ma̱ni̱ rí maguajta skágui̱i̱nʼ bi̱ kudrúwíin. Mañewu̱u̱n ma xúʼko̱ goʼwóo Judá, mú ma̱ni̱ rí xúgíinʼ wáyú bi̱ guáʼdiin xa̱bu̱ xuajin ni xákruigu̱u̱n. 5 Bi̱ kuya̱ edxu̱u̱ náa Judá muthi náa awúu̱n a̱jkiu̱ún: ‹Ikháanʼ nduʼyáálú rí xa̱bu̱ xuajin Jerusalén nindxu̱ún mbá tsiaki̱i̱ rí na̱ʼkha̱ náa Jeobá bi̱ naʼtáñajúúnʼ ángeles, Dios ndrígu̱ún›. 6 Mbiʼi rúʼko̱ ma̱ni̱ rí bi̱ kuya̱ edxu̱u̱ náa Judá mani̱ndxu̱ún xóo daan rí kajti chámbuʼ dí grígu náa majñuuʼ ixi̱ rí mi̱kha ga̱jma̱a̱ nindxu̱u̱ xóo ixi̱ rí grígu aguʼ náa majñuuʼ xtájxu̱u̱ʼ tsígáʼ rí kuíji̱ eniiʼ, muni̱ gámbáa xúgíʼ xuajin rí tri̱ga̱ mijngíí, dí rígá náa ñawún mújúúnʼ ga̱jma̱a̱ náa ñawún xtiñu̱ún ga̱jma̱a̱ xa̱bu̱ xuajin Jerusalén matangi̱ín makuwá náa xuajñún, náa Jerusalén.

7 Jeobá maʼni kríya̱a̱ʼ ginii guʼwá xtíin ndrígóo Judá, mu xúʼko̱ gamajkhu rí nagruigú goʼwóo David ga̱jma̱a̱ gamajkhu rí nundrígú xa̱bu̱ xuajin Jerusalén xánindxu̱u̱ itháan mba̱a̱ ki xóo rí nagruigú Judá. 8 Mbiʼi rúʼko̱ Jeobá nindxu̱u̱ bi̱ maxtáa mbájndi náa kúwá xa̱bu̱ Jerusalén mu mambáñún, mbiʼi rúʼko̱ bi̱ itháan wabaaʼ náa ikhiin mani̱ndxu̱u̱ xóo David, goʼwóo David, mani̱ndxu̱u̱ xóo Dios, xóo ángel ndrígióo Jeobá bi̱ na̱jkha̱ náa inún ikhiin. 9 Mbiʼi rúʼko̱, gajkhun rí ma̱ni̱ gámbáa xúgíʼ xuajin dí na̱ʼkha̱ gáxmináʼ ga̱jma̱a̱ Jerusalén.

10 Maxidirámuuʼ espíritu ndrígóʼ náa goʼwóo David xó má náa xa̱bu̱ Jerusalén ikhiin mutakáñuʼ, mbuyáá bi̱ nifraʼa ngayii ga̱jma̱a̱ makuwá ngíná, makuwá ngíná ga̱jma̱a̱ numuu ikhaa, xó má kúwá ngíná índo̱ nakháñuu mbáa ada̱ bi̱ mbáwíí, mumbi̱ya̱ʼ ga̱jma̱a̱ numuu ikhaa xó má numbi̱ya̱ʼ ga̱jma̱a̱ numuu mbáa a̱ʼdá giʼnii. 11 Mbiʼi rúʼko̱ ra̱ʼkhá tháan gámbi̱ya̱ʼ ngínúu Jerusalén xó má xtambiyaʼ dí narígá náa Hadadrimón náa xkua̱ Meguidó. 12 Xa̱bu̱ xuajin mumbi̱ya̱ʼ ngínún, mámbá guʼwíin xa̱bu̱, wájíʼ gúmbi̱ya̱ʼ: Xúgíinʼ bi̱ kúwá náa goʼwóo David mumbi̱ya̱ʼ ngínún, xa̱bekha ga̱jma̱a̱ gu̱ʼu̱ wájíʼ gúmbi̱ya̱ʼ, xúgíinʼ bi̱ kúwá náa goʼwóo Natán mumbi̱ya̱ʼ ngínún, xa̱bekha ga̱jma̱a̱ gu̱ʼu̱ wájíʼ gúmbi̱ya̱ʼ, 13 xúgíinʼ bi̱ kaʼñún náa goʼwóo Leví mumbi̱ya̱ʼ ngínún, xa̱bekha ga̱jma̱a̱ gu̱ʼu̱ wájíʼ gúmbi̱ya̱ʼ, xúgíinʼ bi̱ kaʼñún náa goʼwóo Simeí mumbi̱ya̱ʼ ngínún, xa̱bekha ga̱jma̱a̱ gu̱ʼu̱ wájíʼ gúmbi̱ya̱ʼ, 14 mámbá guʼwíin xa̱bu̱ bi̱ xóo gáguanún, wájíʼ gúmbi̱ya̱ʼ ngínún, ga̱jma̱a̱ wájíʼ gúmbi̱ya̱ʼ gu̱ʼu̱.

13 Mbiʼi rúʼko̱ mambaʼtoo mbá puzu mu xúʼko̱ bi̱ kúwá náa goʼwóo David ga̱jma̱a̱ xa̱bu̱ xuajin Jerusalén maguma kaʼwíín náa aʼkhá ga̱jma̱a̱ rí niguma tsagiin.

2 Mbiʼi rúʼko̱, eʼthí Jeobá bi̱ naʼtáñajúúnʼ ángeles, ma̱ni̱ jngudi̱i̱ náa xuajin mbiʼñún xándú, ga̱jma̱a̱ nimbáa xármáʼáan a̱jkiu̱u̱n kaʼyoo mbiʼñún, ma̱ni̱ gámbíin profeta náa xuajin ma̱ngaa bi̱ nuni̱ marigá rí tsaga náa Dios. 3 Á mu mbáa xa̱bu̱ natanga̱a̱ naʼtári̱ya̱ʼ, anu̱u̱ ga̱jma̱a̱ ru̱dúu̱,* bi̱ nini̱ rí maxtáa, muthán: ‹Ikháán xáraxtaa, numuu dí niratá rí minduwaʼ ga̱jma̱a̱ numuu mbiʼyuu Jeobá›. Anu̱u̱ ga̱jma̱a̱ ru̱dúu̱, bi̱ nini̱ rí maxtáa, muxkruaʼaa chílú ga̱jma̱a̱ numuu rí niʼtári̱ya̱ʼ.

4 Mbiʼi rúʼko̱, xúgíinʼ profeta mati̱ñu̱u̱nʼ mámbá rí gútari̱ya̱ʼ ga̱jma̱a̱ numuu rí niwasngájmún,* ni xúgíʼ xtíin* rí nugíʼ profeta mu muthi rí nduwaʼ. 5 Mambáa dí ikhiin maʼthí: ‹Na̱nguá nindxu̱ʼ profeta. Nindxu̱ʼ mbáa xa̱bu̱ bi̱ nañajuunʼ ku̱ba̱ʼ, numuu rí mbáa xa̱bu̱ niʼtsiu̱u̱n nákha nindxu̱ʼ dxámá›. 6 Á mu mbáa narajxu̱u̱ ‹Náá numuu rí tima tsínáʼ náa xpajpaaʼ* rá.› Mariʼña̱a̱ ‹Nixnuʼ náa guʼwún bi̱ nambájxu̱ʼ gajmínʼ›”.

Ikhúún ma̱ta̱ ‹Ikhiin nindxu̱ún xa̱bu̱ xuajñunʼ›

ga̱jma̱a̱ ikhiin muthi ‹Jeobá nindxu̱u̱ Dios ndrígúxu̱›”.

14 “¡Atayáá! Na̱ʼkha̱ mbiʼi, mbá mbiʼi rí kaʼyoo Jeobá, náa majña̱a̱ʼ ikháán* murui̱ʼta̱a̱ rí xtaʼdáá xóo mbá rí nirawíi. 2 Magímbíin xúgíinʼ xa̱bu̱ xuajin mu muxmíjná gajmiún Jerusalén, mundri̱gú xuajin, murawíi dí rígá náa guʼwá ga̱jma̱a̱ mutsijmiin gu̱ʼu̱. Mbá ta̱phi̱i̱n xa̱bu̱ xuajin maʼga̱ kiʼdiin, mú bi̱ gáguanún náa xuajin xáguma gámbíin náa xuajin.

3 Jeobá magajnúu gáxminaʼ gajmíi̱n xuajin rúʼko̱ xó má índo̱ ikhaa naxmínaʼ náa mbiʼi dí narígá guerra. 4 Mbiʼi rúʼko̱ rajkhúu maguajún náa kúbá Olivo, dí gíʼ xígií náa inuu Jerusalén, náa nagájnuu a̱jkha̱ʼ* ga̱jma̱a̱ kúbá Olivo mawiʼtájngaa tu̱mba̱a̱, xígií náa nagájnuu a̱jkha̱ʼ ga̱jma̱a̱ náa narámaaʼ a̱jkha̱ʼ,* náa tumba̱a̱ maʼga̱nú mani̱ndxu̱u̱ mbá mata* mba̱a̱, mbá ta̱pha̱ kúbá maguanúu xígií náa norte ga̱jma̱a̱ i̱mba̱ ta̱pha̱ maguanúu xígií náa sur. 5 Ikháanʼ magayála náa mata dí rígá náa majñu̱u̱ʼ kúbá rí kaʼyoʼ, numuu rí mata dí rígá náa majñu̱u̱ʼ kúbá maʼganú asndu náa Azel. Mbaʼyóoʼ magayála xó má nigayála índo̱ niʼxma náa mbiʼi rí nixtáa raʼtáñajunʼ rey Uzías náa Judá. Ga̱jma̱a̱ Jeobá Dios ndrígóʼ ma̱ʼkha̱ gajmíi̱n xúgíinʼ bi̱ kaʼwiin.

6 Mbiʼi rúʼko̱ ní xárígá nimbá aguʼ rí mitsaanʼ:* Dí rígá, ní xáʼba̱a̱n.* 7 Mbiʼi rúʼko̱ maʼga̱nú majmaʼnuuʼ xóo mbiʼi ndrígóo Jeobá. Xárígá mbiʼi ni má mbruʼun, índo̱ ndiʼkhún ejkha̱ rakína marigá aguʼ. 8 Mbiʼi rúʼko̱ magayúu iyaʼ rí ndaʼya asndu náa Jerusalén: Mbá ta̱pha̱ maʼga̱ xígií náa lamáa* náa nagájnuu a̱jkha̱ʼ* ga̱jma̱a̱ i̱mba̱ ta̱pha̱ maʼga̱ xígií náa lamáa náa narámaaʼ a̱jkha̱ʼ.* Marigá rígi̱ náa mbiʼi ruʼphu ga̱jma̱a̱ náa mbiʼi rí naʼni migúwán. 9 Jeobá mani̱ndxu̱u̱ Rey náa xúgíʼ tsu̱du̱u̱ ku̱ba̱ʼ. Mbiʼi rúʼko̱ i̱ndó Jeobá mbiʼyamajkuíí ga̱jma̱a̱ i̱ndó mbiʼyuu ikhaa maguma mba̱a̱.

10 Xúgíʼ xuajin, náa Gueba asndu náa Rimón, xígií náa sur ndrígóo Jerusalén, mani̱ndxu̱u̱ xóo Arabá ga̱jma̱a̱ Jerusalén maʼni mba̱a̱ ma̱ngaa makuwá xa̱bu̱ ikhí, náa Xkrugoo Benjamín* asndu náa gíʼ Timbá Xkrugua,* náa Xkrugua dí gíʼ náa Esquina* asndu náa Guʼwá mitsídánʼ* ndrígóo Hananel ga̱jma̱a̱ asndu náa nuduunʼ vino ndrígóo rey. 11 Makuwá xa̱bu̱ ikhí ga̱jma̱a̱ nimbá míʼtsú ni xátanga̱a̱ maguma wájíʼ mu maguma gámbáa ga̱jma̱a̱ xa̱bu̱ bi̱ makuwá náa Jerusalén makuwá tsímáá.

12 Rígi̱ nindxu̱u̱ gamiéjunʼ rí Jeobá makuʼma inún xúgíinʼ xa̱bu̱ xuajin bi̱ nixmijná gajmiún Jerusalén: Xuñúnʼ mi̱ga asndu nákhíí xóó wájun, idún mi̱ga asndu náa traʼa̱ ga̱jma̱a̱ rajúún mi̱ga náa awúu̱n rawúúnʼ.

13 Mbiʼi rúʼko̱ Jeobá maʼni rí mamiñún kuyamijná, mámbáa máguajtuun ñawúunʼ xa̱bu̱ numbaaʼ ga̱jma̱a̱, ma̱ngaa maxnúu xa̱bu̱ numbaaʼ ga̱jma̱a̱. 14 Judá ma̱ngaa maxtáa raxmína̱ʼ mijngii náa Jerusalén, ga̱jma̱a̱ murawíi dí rígá náa xúgíʼ xuajin dí tri̱ga̱ mijngii: Oro, plata ga̱jma̱a̱ mbaʼa xtíin.

15 Ma̱ngaa ma̱ʼkha̱ mbá gamiéjunʼ xóo rígi̱ náa inún wáyú, mula, camellos, búrru ga̱jma̱a̱ xúgíinʼ xujkhúʼ bi̱ kúwá náa gíi̱nʼ.

16 Bi̱ naguanún náa xúgíʼ xuajin bi̱ nigún guxmijná gajmiún Jerusalén matsimún mámbá tsiguʼ gusmbati̱gu̱u̱n náa inuu Rey, Jeobá bi̱ naʼtáñajúúnʼ ángeles, ga̱jma̱a̱ muniriya̱a̱ʼ Ndxo̱o̱ guʼwá xtúguá.* 17 Á mu mbáa xa̱bu̱ bi̱ xtáa náa xuajin dí rígá náa tsu̱du̱u̱ ku̱ba̱ʼ tsétsimuu náa Jerusalén gásmbáti̱go̱o̱ náa inuu Rey, Jeobá bi̱ naʼtáñajúúnʼ ángeles, maʼni rí xáxnúu ruʼwa náa ikhiin. 18 Á mu xa̱bu̱ bi̱ kúwá náa Egipto tsétsimún ga̱jma̱a̱ tsétu̱ʼu̱u̱n ikhí, xáxnúu ruʼwa ikhí ma̱ngaa. Dí mugíʼníí mudrigú mbá gamiéjunʼ dí Jeobá maʼni ngíníin ga̱jma̱a̱ xa̱bu̱ xuajin bi̱ xátsimún gúniri̱ya̱a̱ʼ Ndxo̱o̱ guʼwá xtúguá. 19 Rígi̱ ganindxu̱u̱ rí mamínuuʼ Egipto ga̱jma̱a̱ numuu aʼkhá ndrígóo ma̱ngaa aʼkhá ndrígu̱ún xúgíinʼ xa̱bu̱ xuajin bi̱ xátsimún gúniri̱ya̱a̱ʼ Ndxo̱o̱ guʼwá xtúguá.

20 Mbiʼi rúʼko̱ ajngáa rí ‹¡Mikaʼwu kaʼyoo Jeobá!› magumaraʼmáʼ náa campana rí jngrígú náa wáyú. Ga̱jma̱a̱ daan dí rígá náa goʼwóo Jeobá mani̱ndxu̱u̱ xóo xua̱a̱ náa inuu rí nakarámáʼ tsigijñaʼ. 21 Xúgíʼ daan dí rígá náa Jerusalén ga̱jma̱a̱ náa Judá mani̱ndxu̱u̱ mikaʼwu ga̱jma̱a̱ rí kaʼyoo Jeobá bi̱ naʼtáñajúúnʼ ángeles, ga̱jma̱a̱ xúgíinʼ bi̱ kúwá ruxnajxi̱ tsigijñaʼ matu̱ʼu̱u̱n ga̱jma̱a̱ majmúún mu mbujíi ga̱jma̱a̱. Mbiʼi rúʼko̱ ni xákúwá itháan cananeos náa goʼwóo Jeobá bi̱ naʼtáñajúúnʼ ángeles”.