MALAQUÍAS

1 Mbá ajngáa rí naʼthí Dios.

Jeobá najmiuu Malaquías* mu maʼthúún ajngáa rígi̱ xa̱bu̱ Israel:

2 “Nisngajmála rí nandoʼ ka̱ya̱la”, eʼthí Jeobá.

Mú ikháanʼ nu̱tala: “Xú káʼnii nitasngájma rí nandaaʼ xtayuxu rá.”

“Lá raʼkháa Esaú nindxu̱u̱ ndxájuu Jacob ráʼ. Eʼthí Jeobá. Ikhúún nindoʼ ka̱yo̱o̱ Jacob, 3 mú niwi̱yu̱ʼ ka̱yo̱o̱ Esaú. Ni̱ni̱ dí kúbá ndrígóo maguanáa ga̱jma̱a̱ niniʼñúuʼ dí náa mbayuuʼ rí nixna̱a̱ wajin xiʼñúuʼ maʼni̱i̱ ku̱ba̱ʼ mijxooʼ* mu makuwá chacal”.*

4 “Maski ajndu Edom* naʼthí: ‹Niguma gámbáanʼxu, mú magutangáanʼxu muni̱i̱ dí niguma gámbáa›, Jeobá bi̱ naʼtáñajúúnʼ ángeles naʼthí: ‹Ikhiin muni̱i̱, mú ikhúún ma̱ni̱ gámbáa, ga̱jma̱a̱ xa̱bu̱ muxna mbiʼíí “xuajin dí naʼni dí ra̱májánʼ” ma̱ngaa “xa̱bu̱ xuajin bi̱ Jeobá niʼni rí mumíniiʼ asndu kámuu”. 5 Ikháanʼ mina̱a̱ʼla mbu̱ya̱a̱ ga̱jma̱a̱ idala, ma̱ngaa mu̱tha̱: “Gaguma mba̱a̱ Jeobá náa mbá xúgíʼ mbayuuʼ Israel”›”.

6 “‹Ada̱ ndaʼyamajkuu anu̱u̱,* ga̱jma̱a̱ ñumbáá ndaʼyamajkuu patriúun. Ikha jngóo á mu ikhúún nindxu̱ʼ xa̱bu̱ nikhi̱i̱, náá rígá gamajkhu dí kaʼyoʼ magruígú rá. Ga̱jma̱a̱ á mu ikhúún nindxu̱ʼ patrón, ndíjkha rí tsémiñún kuyoʼ xá.› Xúʼko̱ e̱tha̱la, ikhúún Jeobá bi̱ natañájúúnʼ ángeles, ikháanʼla ndxajkun bi̱ tséyamajkuíí mbiʼyuʼ.

‹Mú ikháanʼ nu̱tala: “Xú káʼnii ninixu̱ dí túyamajkuííʼxu mbiʼyaaʼ rá.”›

7 ‹Índo̱ nuxnajxí ganitsu* dí nichúu náa najuixnájxi̱ tsigijñaʼ ndrígóʼ›.

‹Ga̱jma̱a̱ ikháanʼla nu̱ta̱: “Xú káʼnii ni̱ni̱ gachííxu mbiʼyaaʼ rá.”›

‹Nu̱tala “Tséyóoʼ má mbiʼyamajkuíí mésóo Jeobá”. 8 Índo̱ ikháanʼla nuxnajxíi mbáa xujkhúʼ bi̱ tsíkruigo̱o̱ xóo tsigijñaʼ, nu̱tala: “Na̱nguá má raʼkhí nindxu̱u̱”. Ga̱jma̱a̱ índo̱ nuxnajxíi mbáa xujkhúʼ bi̱ gúʼxíiʼ o naʼniuu nandii, nu̱tala: “Na̱nguá má raʼkhí nindxu̱u̱”›”.

“Mbá péñu,* araxniáá xa̱bu̱ ñajunʼ* ndrígáaʼ. Lá maʼdxuu a̱jkiu̱u̱n kaʼyaaʼ xáʼ. Lá magruiguíín májánʼ xáʼ.” Eʼthí Jeobá bi̱ naʼtáñajúúnʼ ángeles.

9 “Dí xúgi̱, mbá péñu, gutakáñíínla Dios, gunda̱ʼa̱a̱ rí maʼniulú dí májánʼ. Á mu ikháanʼla nuxnajxí tsigijñaʼ xóo rígi̱, lá magruiguáanʼ májánʼ tikuáanʼ dí ikháanʼ xáʼ.” Eʼthí Jeobá bi̱ naʼtáñajúúnʼ ángeles.

10 “Tsáá mbáa dí ikháanʼ maʼndoo marugua̱a̱ xkrugua* rá. Rí asndu xáʼndala mbaʼ muskamáá aguʼ dí grígu náa najuixnájxi̱ tsigijñaʼ ndrígóʼ. Tsédxuu a̱jkiu̱nʼ ka̱ya̱la, eʼthí Jeobá bi̱ naʼtáñajúúnʼ ángeles, ni má tsénigu̱ʼ nimbá tsigijñaʼ dí nuxnajxíla”.

11 “Náa nagájnuu a̱jkha̱ʼ* asndu náa narámaaʼ a̱jkha̱ʼ,* maguma mba̱a̱ mbiʼyuʼ náa majñu̱únʼ xa̱bu̱ xuajin. Asndu náá murkuníí tsigijñaʼ ga̱jma̱a̱ muxnajxi̱ tsigijñaʼ mu maguma mba̱a̱ mbiʼyuʼ, mani̱ndxu̱u̱ mbá regalo kaʼwu. Numuu rí mbiʼyuʼ maguma mba̱a̱ náa majñu̱únʼ xa̱bu̱ xuajin”, eʼthí Jeobá bi̱ naʼtáñajúúnʼ ángeles.

12 “Mú ikháanʼla nu̱tsijmá* índo̱ nu̱ta̱ ‹Mésóo Jeobá nindxu̱u̱ tsaga ga̱jma̱a̱ dí jngútámáʼ ikhí ragíʼdoo numuu›. 13 Ma̱ngaa nu̱tala ‹¡Néʼnguxu’ eʼni ñajunʼ rígi̱!› ga̱jma̱a̱ tsénigua̱la mbá xúgíʼ rí ndu̱ya̱a̱, eʼthí Jeobá bi̱ naʼtáñajúúnʼ ángeles. Ikháanʼla naguwaʼ kudiin xujkhúʼ bi̱ niguma kuʼwíinʼ, gúʼxíinʼ ga̱jma̱a̱ bi̱ naʼniún nandii. ¡Rígi̱ nindxu̱u̱ regalo dí naguwaʼ kudala! Lá magruígú dí naguwaʼ kudala ráʼ.” Eʼthí Jeobá.

14 “Gajuiʼtásríguíi xa̱bu̱ bi̱ naʼniminaʼ maʼni nduwaaʼ Dios, bi̱ gíʼdaa mbáa mugu̱ májáanʼ, mú naxná ajngóo ga̱jma̱a̱ naxnájxi̱i̱ náa Jeobá mbáa xujkhúʼ bi̱ na̱nguá májáanʼ. Numuu dí ikhúún nindxu̱ʼ mbáa Rey mba̱a̱, eʼthí Jeobá bi̱ naʼtáñajúúnʼ ángeles, ga̱jma̱a̱ mbiʼyuʼ maʼni rí mamiñún kuyoʼ xa̱bu̱ xuajin ga̱jma̱a̱ mbuyamajkhuʼ”.

2 “Dí xúgi̱, kiʼtáñajunʼ rígi̱ na̱jkha̱ náa inala ikháanʼ ndxajkun. 2 Á mu dí tsíyala gúdxawíín ga̱jma̱a̱ ndu̱ya̱a̱ dí ragíʼdoo numuu dí mu̱ni̱ mba̱a̱ mbiʼyuʼ, eʼthí Jeobá bi̱ naʼtáñajúúnʼ ángeles, matatsríguáanʼla, ma̱ni̱ dí naguma tsajkurámáanʼla maʼga̱nú mani̱ndxu̱u̱ dí najuiʼtátsrígú. Xúʼko̱, numuu dí na̱nguá ndi̱ya̱a̱ dí gíʼdoo numuu, ikha jngóo ni̱ni̱ dí naguma tsajkurámáanʼ maʼga̱nú mani̱ndxu̱u̱ dí najuiʼtátsrígú”.

3 “¡Gu̱ya̱a̱la! Ga̱jma̱a̱ numuu dí ni̱nila, ma̱ni̱ gámbáa* tsígáʼ dí nidula. Ma̱dajma ambá náa inala, ambúún xujkhúʼ bi̱ nuxnajxíinʼla xóo tsigijñaʼ náa ndxa̱a̱ ndrígala, ga̱jma̱a̱ ikháanʼla maʼga kiʼdáanʼla* náa nagadíi̱ ambá. 4 Ikhú gúya̱a̱la dí ikhúún ni̱xna̱la kiʼtáñajunʼ rígi̱ mu marigá má xúʼko̱ dí nimbánúʼ ga̱jmu̱ʼ Leví”, eʼthí Jeobá bi̱ naʼtáñajúúnʼ ángeles.

5 “Rí nimbánúʼ ga̱jmu̱ʼ ikhaa nindxu̱u̱ dí maxtáa ga̱jma̱a̱ dí maxtáa tsímáá, rí ni̱xnu̱u̱ mu xúʼko̱ mamiñúu kaʼyoʼ.* Ikhaa nimíñuu kaʼyoʼ, xúʼko̱, ikhaa nisngájma dí ra̱ʼkhá tháán ndiʼyamajkuu mbiʼyuʼ. 6 Xtángoo* rí gajkhun nirígá náa rawuunʼ ga̱jma̱a̱ nditháan táʼthí dí ra̱májánʼ. Nixtáá tsímáá ga̱jmu̱ʼ, ma̱ngaa niʼni dí májánʼ náa inuʼ ga̱jma̱a̱ niʼni dí mbaʼin matsíngu̱u̱nʼ náa kamba̱a̱ dí ra̱májánʼ. 7 Numuu dí mbáa ndxajkun gíʼmaa majmuu rawuunʼ mu maʼsngúún xa̱bu̱ ku̱ma̱ ndrígóo Dios, ga̱jma̱a̱ xa̱bu̱ gíʼmaa murajxi̱i̱ ga̱jma̱a̱ numuu xtángoo, numuu dí ikhaa nindxu̱u̱ bi̱ na̱jkha̱ kayóo ajngóo Jeobá bi̱ naʼtáñajúúnʼ ángeles.

8 Mú ikháanʼla má mina̱a̱ʼ ni̱ni̱ tsíngumijnála náa kamba̱a̱ rúʼko̱. Ga̱jma̱a̱ numala niʼni dí mbaʼin* xúnimbaníí xtángoo.* Ninújngurámala dí nimbánúʼ ga̱jmu̱ʼ Leví, eʼthí Jeobá bi̱ naʼtáñajúúnʼ ángeles. 9 Ikha jngóo ma̱ni̱ dí ni xáʼndúún gúyala ga̱jma̱a̱ maguma majtiáanʼla náa inún mbá xúgíinʼ xa̱bu̱ xuajin, numuu dí ikháanʼla na̱nguá nijngruigala náa kambo̱ʼ, na̱nguá ninimbaníí numún xúgíinʼ xa̱bu̱ xó má eʼthí náa xtángoo”.

10 “Lá raʼkháa mbáwíí anu̱lú kuaʼdaa mbá xúgiáánʼ ráʼ. Lá raʼkháa mbáwíí Dios niʼniáánʼ mbá xúgiáánʼ ráʼ. Á mu dí xúʼko̱, náá numuu dí nu̱ʼni̱ nduwamijnálú ga̱jma̱a̱ nuʼnimíjna̱ dí ra̱májánʼ índo̱ nanújngurámulú dí nimbánúún wajin xiʼñúlú rá. 11 Judá na̱nguá niwi̱ji̱ jmbu. Nirígá mbá dí xkawiʼ náa Israel ga̱jma̱a̱ náa Jerusalén. Numuu dí Judá niʼni gachúu rí xóo mikaʼwii Jeobá, mbá dí ikhaa nandoo kaʼyoo, ikhaa ndiyáa mbáa wáxióo* dios bi̱ ragájkhun. 12 Jeobá maxíyáa asndu tsáá bi̱ gáʼni rígi̱, bi̱ xtáa náa guʼwá xtíin ndrígóo Jacob, tséʼniuu má asndu tsáa nindxu̱u̱,* maski ajndu maxnájxi̱ mbá tsigijñaʼ náa Jeobá bi̱ naʼtáñajúúnʼ ángeles”.

13 “Ikháanʼla nu̱ni̱ i̱mba̱ dí naʼni rí náa najuixnájxi̱ tsigijñaʼ ndrígóo Jeobá majnííʼ iya idún, dí numbi̱ya̱ʼ ga̱jma̱a̱ dí nutsiná, rúʼko̱ naʼni dí ikhaa xágruigú tsigijñaʼ ndrígala, ni má xánigu̱u̱ʼ nimbá tsigijñaʼ dí ikháanʼla nuxnajxí náa ikhaa. 14 Ikháanʼla nurajxi̱: ‹Náá numuu rá.› Numuu dí Jeobá ninindxu̱u̱ testigo náa ikháán ga̱jma̱a̱ náa a̱ʼgu̱ bi̱ ndiyáa nákha nindxa̱a̱ʼ dxámá, bi̱ ikháán nitani̱ nduwaaʼ, maski ajndu xtaa ga̱jma̱a̱ʼ, ga̱jma̱a̱ nindxu̱u̱ a̱ʼgu̱ bi̱ ndiyáa índo̱ nimbánaaʼ* ga̱jma̱a̱ʼ. 15 Mú kúwíin tikhuun náa ikháanʼla bi̱ na̱nguá nini̱ xígi̱ kaʼnii. Numuu dí ikhiin nandún muguáʼdiin e̱jñu̱ún bi̱ gajkhun nindxu̱ún xa̱bu̱ xuajñuu Dios.* Ikhiin nuni̱ xó má naxná ikhúún espíritu santo* ndrígóo Dios. Ikha jngóo guñewa̱a̱n rí nundxa̱ʼwa̱míjna̱ mu̱nila* ga̱jma̱a̱ xúni̱ nduwiinʼ gu̱ʼu̱ bi̱ ni̱diin nákha nindxa̱la jiámá. 16 Numuu dí rígi̱ dí naʼthí Jeobá, Dios ndrígóo Israel: “Ikhúún nawi̱yu̱ʼ eʼni xa̱biya̱ bi̱ naniña̱a̱nʼ a̱ʼgiu̱u̱ ga̱jma̱a̱ nawi̱yu̱ʼ ka̱yo̱o̱ bi̱ naʼni dí ra̱májánʼ”, eʼthí Jeobá bi̱ naʼtáñajúúnʼ ángeles. Guñewa̱a̱n rí nundxa̱ʼwa̱míjna̱ mu̱nila* ga̱jma̱a̱ xúni̱ nduwamijná.

17 Ikháanʼ nu̱ni̱ dí maʼni néʼngo̱o̱ Jeobá ga̱jma̱a̱ ajngáa dí nu̱tala. Mú ikháanʼla nu̱ta̱: ‹Xú káʼnii e̱ʼni̱ dí maʼni néʼngo̱o̱ xá.› Nu̱tala ‹Xúgíinʼ bi̱ nuni̱ dí ra̱májánʼ nindxu̱ún míjíinʼ náa iduu Jeobá ga̱jma̱a̱ naʼniún rí májánʼ›, o nu̱tala ‹Náá xtáa Dios bi̱ naʼni dí májánʼ rá.›”

3 “¡Gu̱ya̱a̱la! Makuʼmáa bi̱ najngrui̱go̱o̱ kagu̱u̱ ajngóʼ, ga̱jma̱a̱ ikhaa maʼni mújúunʼ kamba̱a̱ náa inuʼ. Nda̱a̱ tsu̱ma̱ gáʼkha̱ Tátá bi̱ gajkhun náa guʼwá rí nduyamajkuíí bi̱ ikháanʼ nduʼyáaʼla. Ga̱jma̱a̱ ma̱ʼkha̱ bi̱ najngrui̱go̱o̱ kagu̱u̱ ajngóʼ bi̱ nimbánúʼ ga̱jmu̱ʼ, bi̱ ikháanʼla nuguaʼthi̱i̱n ga̱jma̱a̱ gagi. ¡Gu̱ya̱a̱la! Gajkhun dí ma̱ʼkha̱”, eʼthí Jeobá bi̱ naʼtáñajúúnʼ ángeles.

2 “Mú, tsáá lá gáxtáa xawii mbiʼi rí gáʼkha̱ ga̱jma̱a̱ tsáá gáʼngo̱o̱ gáwi̱ji̱ índo̱ ikhaa gásngájmaminaʼ xá. Numuu rí ikhaa mani̱ndxu̱u̱ xóo aguʼ rí naʼni májáanʼ ajua̱nʼ ga̱jma̱a̱ xóo xábú rí nda̱ʼwu̱u̱ ga̱jma̱a̱ xtíin. 3 Ikhaa magi̱ʼi̱ xóo bi̱ naʼni májáanʼ ga̱jma̱a̱ naʼni kaʼwi̱i̱ plata, maʼni kaʼwi̱ín e̱ji̱i̱n Leví. Maʼni kaʼwi̱ín xóo eguma kaʼwi̱i̱ oro ga̱jma̱a̱ plata, ikhiin mani̱ndxu̱ún xa̱bu̱ míjíinʼ bi̱ muxnajxi̱ tsigijñaʼ náa Jeobá. 4 Tsigijñaʼ dí naxnájxi̱ Judá ga̱jma̱a̱ Jerusalén gajkhun dí nanigu̱u̱ʼ Jeobá, xó má ninigu̱u̱ʼ nákha wajyúuʼ.

5 Makuʼmáminaʼ náa ikháanʼla mu manimbánuu numala, ga̱jma̱a̱ maʼcho̱ʼ ma̱ta̱ rí mugíʼníí bi̱ nuni̱ xawan, bi̱ nuni̱ aʼkhá gajmiún eʼwíinʼ, bi̱ nuni̱ nduwaʼ índo̱ nuxna ajngún, bi̱ tséni̱ numi̱ín xó má kaʼyoo bi̱ numbañún, bi̱ tséni̱i̱ rí májánʼ a̱ʼgú xuáʼa ga̱jma̱a̱ a̱ʼdá wáʼa bi̱ ndawa̱a̱ anu̱u̱,* bi̱ tsíñún gúmbañún* xa̱bu̱ bi̱ naguwaáʼ. Xa̱bu̱ bugi̱ tsémíñún kuyoʼ”, eʼthí Jeobá bi̱ naʼtáñajúúnʼ ángeles.

6 “Ikhúún nindxu̱ʼ Jeobá ga̱jma̱a̱ tsíriʼkuminaʼ. Ikháanʼ nindxa̱la e̱ji̱i̱n Jacob ga̱jma̱a̱ xóó tséʼkha̱nú mbiʼi rí makhañála. 7 Asndu nákha mbiʼi rí nikúwíin wajin xiʼñála, ikháanʼla ninújngurámala ikha ndrígóʼ ga̱jma̱a̱ túnimbaníí. Gagutangáanʼla náa ikhúún, ga̱jma̱a̱ ikhúún magutangu̱ún náa ikháanʼla”, eʼthí Jeobá bi̱ naʼtáñajúúnʼ ángeles.

Mú ikháanʼla nu̱tala: “Xú káʼnii gágutangáanʼxu rá.”

8 “Lá ma̱ndoo mbáa xa̱bu̱ maʼni kúwóoʼ Dios ráʼ. Numuu dí ikháanʼla nu̱ni̱ kuʼwóʼ”.

Ga̱jma̱a̱ ikháanʼla nu̱tala: “Nguáná ni̱ni̱ kuʼwáaʼxu rá.”

“Náa mbá nguéjma̱ rí nu̱xna̱* ga̱jma̱a̱ náa tsigijñaʼ dí nuxnajxí. 9 Ikha jngóo, ikháanʼla najuiʼthá tsríguáanʼla, numuu dí kuwáanʼla ru̱ni̱ kuʼwóʼ. Xúʼko̱, xúgíinʼ xa̱bu̱ xuajin kúwá runi̱ rígi̱. 10 Aguwaʼ kudala náa naxtagijxi̱i̱ mbá nguéjma̱ xúgíʼ* dí kuaʼdáá dí kaʼyoʼ magruígú, mu marigá ganitsu náa goʼwóʼ. Mbá péñu, gu̱nila rígi̱ mu mbuya̱a̱ xóo gáni̱, eʼthí Jeobá bi̱ naʼtáñajúúnʼ ángeles, ga̱jma̱a̱ mbuya̱a̱ dí marmbáʼtoo xkrugoo mekhu ga̱jma̱a̱ maxidirámuuʼ náa ikháanʼla dí naguma tsajkurámáanʼ rí asndu xáʼyála nimbá”.

11 “Ga̱jma̱a̱ numala xániʼñúuʼ dí ewi̱* maʼni gámbáa dí nudu náa mbayala, ga̱jma̱a̱ ixi̱ uva dí kiʼdu náa mbayala maxná má xúʼko̱ xndúu”, eʼthí Jeobá bi̱ naʼtáñajúúnʼ ángeles.

12 “Xúgíinʼ xa̱bu̱ xuajin muthi dí kuwáanʼla gagi, numuu rí kubala maʼga̱nú mani̱ndxu̱u̱ mbá ku̱ba̱ʼ náa rígá gagi”, eʼthí Jeobá bi̱ naʼtáñajúúnʼ ángeles.

13 “Ikháanʼla ni̱tha̱ dí raʼkhí ga̱jma̱a̱ numuʼ”, eʼthí Jeobá.

Ga̱jma̱a̱ ikháanʼla nuriʼña: “Nguáná lá ni̱taxu dí raʼkhí ga̱jma̱a̱ numaaʼ rá.”

14 “Ikháanʼla nu̱ta̱: ‹Ndíí nindxu̱u̱ dí mu̱ʼni̱ ñajuunʼ Dios. Ndiéjunʼ lá nimbáyulúʼ dí niʼni mbáníí dí kaʼyulú náa ikhaa ga̱jma̱a̱ dí nijngruigulú ngíná náa inuu Jeobá bi̱ naʼtáñajúúnʼ ángeles rá. 15 Rí xúgi̱ nutaxu dí kúwá gagi bi̱ nuni̱ mbaʼumíjna̱. Ma̱ngaa bi̱ nuni̱ dí ra̱májánʼ nuni̱ xó má eñún ikhiin. Nugíʼ tsáʼkhá* náa Dios ma̱ngaa tsémíniiʼ ga̱jma̱a̱ numuu rí nuni̱›”.

16 Mbiʼi rúʼko̱, bi̱ namíñúún kuyáá Jeobá nigíʼdi̱i̱ nitamijná kaníkiin, mámbáa ga̱jma̱a̱ ndxájuu, ga̱jma̱a̱ Jeobá nigíʼ edxu̱u̱ maʼdxawún má xúʼko̱. Náa inuu Jeobá nigumaraʼmáʼ mbá libro mu marmáʼáan a̱jkiu̱u̱n kaʼñúún bi̱ namíñúún kuyáá, mangiin bi̱ nundxa̱ʼwa̱míjna̱* ga̱jma̱a̱ numuu mbiʼyuu.

17 “Ikhiin maguánú mani̱ndxu̱ún xa̱bu̱ xuajñunʼ, eʼthí Jeobá bi̱ naʼtáñajúúnʼ ángeles, mbiʼi rí ikhúún gáni̱ dí mani̱ndxu̱ún mbá xuajin kiejuunʼ.* Magáwíinʼ a̱jkiu̱nʼ ka̱ñu̱u̱n, xó má mbáa xa̱bu̱ nikhi̱i̱ nagáwíinʼ a̱jkiu̱u̱n kaʼyoo mbáa a̱ʼdióo bi̱ nambáyúu. 18 Ikháanʼla mbu̱júu̱ mbu̱ya̱a̱ xóo mixtiʼkuii mbáa xa̱bu̱ májáanʼ ga̱jma̱a̱ mbáa xa̱bu̱ ra̱májáanʼ, ma̱ngaa mbáa bi̱ naʼni ñajuunʼ Dios ga̱jma̱a̱ mbáa bi̱ tséʼni ñajuunʼ”.

4 “¡Gu̱ya̱a̱la!, na̱ʼkha̱ mbiʼi, mbiʼi rúʼko̱ mani̱ndxu̱u̱ mijkha xóo índo̱ nagigoo mbá horno, ikhí mbá xúgíinʼ bi̱ nuni̱ mbaʼumíjna̱ ga̱jma̱a̱ bi̱ nuni̱ dí ra̱májánʼ mani̱ndxu̱ún xóo iná nijndooʼ. Mbiʼi dí wíji̱ ma̱ʼkha̱ gajkhun dí matsikíin, xániñuuʼ nimbá ajmu̱u̱ ni má ñawúunʼ, eʼthí Jeobá bi̱ naʼtáñajúúnʼ ángeles. 2 Mú náa ikháanʼla, bi̱ nu̱ni̱ mba̱a̱* mbiʼyuʼ, a̱jkha̱ʼ bi̱ na̱ʼkha̱ kayóo rí májánʼ maxpíbíin náa ikháanʼla ga̱jma̱a̱ agiuuʼ* maʼni̱i̱ a̱jkia̱la. Ga̱jma̱a̱ ikháanʼ makijxa̱a̱nʼla xóo ekijxi̱i̱n e̱jín xédí bi̱ nuphiʼtsu májánʼ”.

3 “Ikháanʼla mujnguprígi̱i̱n xa̱bu̱ ra̱míjíinʼ, mbiʼi dí ikhúún gáni̱ dí mani̱ndxu̱ún xóo yujndaʼ náa agoo rajkuála”, eʼthí Jeobá bi̱ naʼtáñajúúnʼ ángeles.

4 “Garmáʼáan a̱jkia̱la Xtángoo ndrígóo xa̱bi̱ʼ Moisés, xó má kiʼtáñajunʼ ga̱jma̱a̱ dí na̱tha̱ maguma, dí ikhúún nixna̱ náa Horeb mu xúʼko̱ mbá xúgíinʼ xa̱bu̱ Israel munimbu̱ún.

5 ¡Gu̱ya̱a̱la! Nákha xóó tséʼkha̱ mbiʼi mba̱a̱ ga̱jma̱a̱ mbiʼi gamíi ndrígóo Jeobá, makuʼmáa náa ikháanʼla profeta* Elías. 6 Ikhaa maʼni dí a̱jkiu̱ún xabuanii matanga̱a̱ náa e̱jñu̱ún, ga̱jma̱a̱ a̱jkiu̱ún e̱ji̱n matanga̱a̱ náa anu̱ún,* mu xúʼko̱ ikhúún xáʼkhá gáni̱ gachúu ku̱ba̱ʼ ga̱jma̱a̱ xáni̱ gámbáa”.

(Gi̱i̱ eguámbá Escrituras Hebreoarameas ga̱jma̱a̱ nagi̱ʼdu̱u̱ Escrituras Griegas Cristianas).