Ga̱ʼkhu̱ dí naraʼnuu mbáa índo̱ nakháñuu bi̱ nandoo kaʼyoo

Kostas naʼthí: “Itháán dí 39 tsiguʼ nixtáá ga̱jmu̱ʼ Sofíaa índo̱ ikhaa nikháñuu ga̱jma̱a̱ mbá nandii dí mba̱yu̱u̱ʼ tsiguʼ má e̱ʼkha̱ raʼñuu. Nimbayúʼ wéñuuʼ bi̱ nambájxuʼ gajmíʼ ga̱jma̱a̱ dí magúʼdoo má xúʼko̱ rí ma̱ni̱. Mbá tsiguʼ nixtáá gíná wéñuuʼ ma̱ngaa naxtiʼkhuu nángi eʼníí rí naku̱mu̱ʼ, rúʼko̱ naʼni mba̱yo̱o̱ dí ra̱ʼkhá tháán mingíjyúuʼ dí nigíʼnuu. Maski ajndu ninújngoo má ajtsú tsiguʼ rí nikháñuu, mú kaʼníí egawúnʼ ga̱jma̱a̱ numuu dí nirígá”.

Lá nikháñuu mbáa bi̱ xtayáá ikháán ráʼ. Á mu xúʼko̱, mbáa naku̱ma̱a̱ʼ xó má nikumu̱u̱ Kostas. Mbá dí maʼni gawáanʼ itháán nindxu̱u̱ dí makhañúu bi̱ ndiyáa, mbáa bi̱ xtáa náa guʼwáaʼ o bi̱ nambájxáaʼ májánʼ ga̱jma̱a̱ʼ. Xúʼko̱ má ethi mangiin bi̱ nunigajma̱a̱ ga̱jma̱a̱ numuu índo̱ nakháñuu mbáa. Mbá i̱yi̱i̱ʼ dí nigájnuu náa The American Journal of Psychiatry naʼthí: “Índo̱ mbáa nakháñuu nindxu̱u̱ gakhi̱i̱ ga̱jma̱a̱ ndajyúuʼ mba̱yu̱u̱ʼ ma̱ʼni̱i̱ a̱jkia̱a̱nʼ”. Mbáa bi̱ nagawúunʼ wéñuuʼ ga̱jma̱a̱ numuu dí nikháñuu mbáa bi̱ kaʼyoo maʼni dí marajximínáʼ: “Nguáthá mba̱yu̱u̱ʼ xóó gáku̱mu̱ʼ xígi̱ kaʼnii rá. Lá matanga̱án maxtáá tsímáá mbu̱júu̱ʼ ráʼ. Náá gáxkamaa rí ma̱ʼni̱i̱ a̱jkiu̱nʼ ráʼ”.

Náa i̱yi̱i̱ʼ ¡Awaxunʼ! rígi̱ maxtiʼña̱a̱ graxe̱ xóo rúʼko̱. Náa imbo̱o̱ʼ artículo maʼthí ga̱jma̱a̱ numuu tikhuu rí naʼni mingíjyúuʼ, dí mbáa ikháán xtaa ratraʼníí á mu ndiʼkhu̱ún nikháñuu mbáa bi̱ xtayáá. Náa i̱ʼwáʼ artículo mataxkamaa rí ma̱ndoo mambáyáaʼ mu maʼngo̱o̱ matani̱ ga̱jma̱a̱ʼ ga̱ʼkhu̱ rí xtaa ratraʼníí.

Nuguáʼthi̱i̱nxu dí i̱yi̱i̱ʼ rígi̱ mambáñún mu maʼni̱i̱ a̱jkiu̱ún xúgíinʼ bi̱ nagawúnʼ bi̱ ninimbáti̱ga̱a̱ mbáa bi̱ nandún kuyáá.