Xú káʼnii escuela rígá náa ma̱ndoo magún bi̱ nindxu̱ún precursor rá.

Rí najuiʼsngúún ga̱jma̱a̱ numuu Dios nakujmaa itháan náa xa̱bu̱ bi̱ nutaraʼa numuu Jeobá. Escuela rí kiejunʼ kiʼni mu magún ikhí bi̱ nutaraʼa má xúʼko̱ náa mámbá guʼwá ga̱jma̱a̱ nandún ‹muni májánʼ ñajunʼ rí guáʼdáá› (2 Timoteo 4:5).

Náa Nawaʼsngúún itháan bi̱ ñajúnʼ Precursor. Índo̱ rámáʼ mbá tsiguʼ rí nindxu̱u̱ precursor, ikhaa na̱jkha̱ mbá majun mbiʼi náa mbóo Guʼwá Nagimbáanʼ mu musngáá. Rí phú nambáñun precursores escuela rígi̱ rí muxuʼmamijná itháan náa Jeobá, rí muni májánʼ xúgíʼ ñajunʼ rí guáʼdáá ga̱jma̱a̱ rí xúniñaʼ runi ñajunʼ rí gajkuáa ñawúnʼ.

Náa Najuiʼsngúún bi̱ Nutaraʼa numuu Reino. Escuela rígi̱ ndajyúuʼ a̱jma̱ igu̱nʼ kiʼni mu majuiʼsngúún precursores bi̱ mba̱yu̱ʼ má kuwa rutaraʼa ga̱jma̱a̱ bi̱ asndu muniñaʼ xuajñún mu magún imba̱ níʼkhá náa ndayóoʼ. Mbaʼin dí ikhiin nuthi: “¡Gi̱jyooʼ xtáá! Ataxúngunʼ ikhúúnʼ”. Nuni xóo niʼni Jesucristo, bi̱ niʼtáraʼa itháan májanʼ náa tsu̱du̱u̱ ku̱ba̱ʼ (Isaias 6:8; Juan 7:29). Rí magún gakuwa imba̱ níʼkhá xuajin mbaʼyóoʼ maguʼwún makuwá ga̱jma̱a̱ i̱ndó rí guáʼdáá. Maguʼwún makuwá xóo kuwa xa̱bu̱ náa xuajin rúʼko̱, á mu rí mijkha o miguwan o mixtiʼkhu rí eʼphu̱. Mbáa asndu mbaʼyóo majmañún muthi imbo̱o̱ ajngáa. Escuela nambáñun a̱ngia̱xo xa̱bekha bi̱ xóó tsinigunʼ ga̱jma̱a̱ a̱ngia̱xo gu̱ʼu̱ bi̱ xóó tsínuju̱nʼ ga̱jma̱a̱ bi̱ nidamijná má, bi̱ guáʼdáá 23 asndu 65 tsigúnʼ, mu muni xóo rí nandoo Dios ga̱jma̱a̱ majmañún muni itháan ñajunʼ Jeobá ga̱jma̱a̱ xuajñún.

Náa Galaad ndrígóo Watchtower náa nawaʼsngúún ga̱jma̱a̱ numuu Biblia. Náa ajngáa hebreo, “Galaad” nandoo gáʼthi mbá nduʼ itsí rí nasngájma dí nirígá. Asndu nákha nigi̱ʼdu̱u̱ nirígá escuela rí nagumbiʼyuu Galaad nakhi tsiguʼ 1943. Naʼni itháan rí mbá 8,000 bi̱ ninigajmaa náa escuela rígi̱ nixunguinʼ xóo misioneros mu mutaraʼa “asjndo naʼ ndambarigo raun numba” ga̱jma̱a̱ ñajunʼ rí kuwa runi na̱jkha̱ rajoo wéñuʼ (Hechos 13:47) Índo̱ timbíi̱n bi̱ ninigajmaa náa escuela rúʼko̱ niguánu náa xuajin Perú, nda̱a̱ nimbá congregación náa xuajin rúʼko̱. Rí xúgi̱ rígá itháan rí 1,000. Índo̱ niguánu misioneros náa xuajin Japón, asndu tséʼni gu̱wi̱nʼ bi̱ nutaraʼa numuu Jeobá nákha ikhú. Rí xúgi̱ kuwa itháan rí mbá 200,000. Náa escuela rígi̱ ndajyúuʼ mbá witsu igu̱nʼ ma̱ngaa nunigajmaa káxi̱ Ajngá rawunʼ Dios. Bi̱ nuni ñajunʼ xóo precursores especiales o misioneros, bi̱ nuñajunʼ náa sucursal o bi̱ nindxu̱ún circuito, najuiʼthún a̱ngiu̱lú bugi̱ rí magún náa curso rígi̱ náa nunigajmaa wéñuʼ mu mandoo mumbañún a̱ngiu̱lú bi̱ kuwa náa xúgíʼ tsu̱du̱u̱ numbaaʼ.

• Náa numuu rígá Náa Nawaʼsngúún itháan bi̱ ñajúnʼ Precursor rá.

• Tsíin gándoo gágun Náa najuiʼsngúún bi̱ Nutaraʼa numuu Reino rá.