GRAXE̱ 5

Ndiéjunʼ gáni á mu nutsijmún náa escuela xá.

NDÍJKHA GÍʼDOO NUMUU

Rí gátani ma̱ndoo maʼni itháan májánʼ o itháan ra̱májánʼ.

NDIÉJUNʼ GÁTANI IKHÁÁNʼ RÁ.

Atatsaʼwáminaʼ rígi̱: Thomas tsíyoo gáʼga̱a̱ náa escuela. Ni gájtsii. Ni imbo̱o̱ mbiʼi. Xúgíʼ rígi̱ nigi̱ʼdu̱u̱ nákha ajtsú igu̱nʼ, índo̱ compañeros ndrígóo nithúún xúgínʼ rí minduwaʼ ga̱jma̱a̱ numuu. Nda̱wa̱á nuxnáá mbaʼa mbiʼyuu. Nguáná tikhun nuni kiajúúnʼ nuraʼníí Thomas mu muxidi̱i̱ libros ndrígóo asndu xóo rí túni kiajúúnʼ. Ma̱ngaa nguáná mbáa nakudinguanʼ, índo̱ ikhaa natamáʼáan xúgínʼ nuni asndu xóo tséyáá. Ri̱xi̱ nini̱i̱ itháan gakhi̱i̱ índo̱ ninimiñíí Thomas náa Internet...

Á mu ikháánʼ ni̱ndxa̱ʼ Thomas, ndiéjunʼ gátani rá.

ATATSAʼWÁMINAʼ MBÉGU̱ʼ

Rígá mbá rí ma̱ndoo matani. Ma̱ndoo matambáyuminaʼ rí asndu xátanigawíínʼ nimbáa. Xú káʼnii rá.

XÁTRIʼÑÚN. Náa Biblia naʼthí: “Mbáa xa̱bu̱ skágunʼ naniñuʼ magajnúu xúgíʼ rí naku̱mu̱u̱, mú bi̱ najmañuu naʼngo̱o̱ naxpríguminaʼ” (Proverbios 29:11). Á mu ikháánʼ tsetayáaʼ xkujndu, tsetasngajma rí nakiʼnán, mbáa xúʼko̱ muniñaʼ bi̱ nurajmáán.
XÁTANIU̱U̱N XÓ MÁ NINIAʼ. Náa Biblia naʼthí: “Xurtanga̱a̱ muniu̱u̱n dí ra̱májánʼ bi̱ niniala dí raʼkhí” (Romanos 12:17). Rí magutrígáan mataniu̱u̱n xó má niniaʼ maʼni itháan mingíjyúuʼ xkujndu.
XÁTAʼYÁAʼ XKUJNDU. Náa Biblia naʼthí: “Bi̱ nandxa̱ʼwáminaʼ ndaʼyoo gamiéjunʼ ga̱jma̱a̱ narkaʼwuminaʼ” (Proverbios 22:3). Índo̱ nandoo, xádxúʼ náa kuwa bi̱ nuni xkujndu ga̱jma̱a̱ náa rígá gamíi.
ARATHÚN MBÁ RÍ NA̱NGUÁ GUÁʼTHI̱I̱N. Náa Biblia naʼthí: “Índo̱ xa̱bu̱ nariʼña ga̱jma̱a̱ májánʼ naʼni rí xákiʼníin” (Proverbios 15:1). Ma̱ndoo matriʼñúún ga̱jma̱a̱ ajngáa xnduʼwá. Mbá xkri̱da, á mu mbáa naʼtháanʼ rí mba̱a̱n, ma̱ndoo mataxtráʼíi̱n xpajpaaʼ ga̱jma̱a̱ matriʼñáá: “Gajkhun má, májánʼ gáʼni rí magujtaa mbá nguáthá kilo”.
AYUUʼ. Nora, bi̱ gíʼdoo 19 tsiguʼ, naʼthí: “Rí midxuuʼ ga̱jma̱a̱ xátriʼñún nasngájma rí natatsaʼwáá májánʼ edxa̱ʼ, rí tsimíñaʼ ga̱jma̱a̱ rí naʼngo̱o̱ a̱jkia̱nʼ, mbá rí tsíjmañún muni bi̱ nduyáaʼ xkujndu” (2 Timoteo 2:24).
GA̱KU̱MA̱ʼ XTAYAMINAʼ IKHÁÁNʼ. Jiáma bi̱ nduyáaʼ xkujndu nduyáá tsíin ni̱ndxu̱ún bi̱ nakumu̱ún rí na̱nguá guáʼdáá numún ga̱jma̱a̱ rí xumbayumíjná. Ikha jngó, mbaʼin ní xúnianʼ dí raʼkhí á mu ikháanʼ tsitatsiñaminaʼ.
ARATHÁN MBÁA. Mbáa ex profesora naxná xtágabu rígi̱: “Rí na̱tha̱ ikhúúnʼ nindxu̱u̱ rí bi̱ naguma gínáa maʼthí tsíin eni gínáa. Rúʼko̱ rí kaʼyoo muʼni, ga̱jma̱a̱ rúʼko̱ marikhoo rí xamínuʼ imba̱a̱”.

Mbáa dxámá tsímiñuu índo̱ xtáa náa inuu bi̱ naʼni gínáa — Rí xámiñaʼ maxnáʼ tsiakii numuu rí bi̱ nunianʼ dí raʼkhí namiñun.

LÁ NATAYÁÁ MÁ RÁʼ.

Raʼkháa i̱ndó rí muxnaʼ, bullying ma̱ngaa nandoo gáʼthúu̱n:

Muthi dí maʼni gawáanʼ. “Tsímbumuʼ nditháan rí nitanumuʼ ga̱jma̱a̱ ajngáa rí nijmún. Nini maku̱mu̱ʼ dí ragúʼdoo numuʼ ga̱jma̱a̱ rí tséjmún nditháan. Mbáa xagawúnʼ wéñuʼ á mu niniñaaʼ mbá iduʼ miʼñuu” (Celine, 20 tsiguʼ).
Tsíñún ku̱ya̱ʼ. “A̱ngui̱nʼ nánguá nindúún kuyoʼ. Á mu nakuʼmáminaʼ náa mesa ndrígu̱ún mu makuiʼtsu gajmíi̱nʼ, nuni makro̱ʼo̱ʼ rí nda̱a̱ náa maʼgúnʼ maski ajndu rígá. Xúgíʼ tsiguʼ nixtáá rambiyaʼ ga̱jma̱a̱ nikuiʼtsu mbáwun” (Haley, 18 tsiguʼ).
Nutsijma náa Internet. “Nakujmaa xóo ragájkhun, mu ma̱ndoo maʼni gachúu mbiʼyaaʼ, o asndu vida ndrígáʼ, i̱ndó á mu nataniraʼmáʼ nguáthá ajngáa náa computadora” (Daniel, 14 tsiguʼ).

**NGUÁTHÁ TAYÁÁ**
GAJKHUN O NA̱NGUÁ	NAXTIʼÑA̱A̱
1 Asndu nákha wajyúúʼ kuwa bi̱ nuni gíníi eʼwíínʼ.	1 Gajkhun. Mbá xkri̱da, náa Biblia naʼthí ga̱jma̱a̱ numún nefilim, mbiʼñún nandoo gáʼthúu̱n “bi̱ nuni gámbáa” o “bi̱ nuni rí eʼwíínʼ mafriguun” (Génesis 6:4).
2 Bullying na̱nguá mitsáʼkháan. Na̱nguá nindxu̱u̱ raʼkhí kayuʼ.	2 Ragájkhun. Mbaʼin jiáma ga̱jma̱a̱ wa̱ʼxa̱ʼ niradímíjná ga̱jma̱a̱ numuu bullying.
3 Itháan májánʼ maraxnamíjna ga̱jma̱ʼ bi̱ naʼni gínáán, mu ní xáʼniaʼ itháan.	3 Ragájkhun. Xa̱bu̱ bi̱ nuniulú dí raʼkhí itháan guáʼdáá tsiakii, ikha jngó nda̱a̱ numuu mataxuʼmá mu matambáyuminaʼ.
4 Á mu natayáá rí nuni̱i̱ dí raʼkhí mbáa, itháan májánʼ rí xárata nimbá.	4 Ragájkhun. Rí maguanáʼ wíí naʼni rí mangáán maraʼdáá aʼkhánʼ. Manindxa̱ʼ mbáa bi̱ naʼni xkujndu ga̱jma̱a̱ raʼkháa bi̱ maʼnimbánuu.
5 Mbaʼa nuthu bi̱ nuni gíníi eʼwíínʼ nuni asndu xóo rí tsímiñun mu murkaʼwu rí namíñun.	5 Gajkhun. Maski asndu tikhun nuniu̱u̱n dí raʼkhí eʼwíínʼ nakumu̱ún rí itháan guáʼdáá numún, mu mbaʼin namiñun ikha jngó nuni gíníi eʼwíínʼ mu makumún rí guaʼdáá numún.
6 Bi̱ nuni gíníi ma̱ndoo muriʼkhumijná.	6 Gajkhun. Bi̱ nuni gíníi eʼwíínʼ ma̱ndoo muriʼkhuíí rí nuni ga̱jma̱a̱ rí nundxa̱ʼwa̱míjna̱ á mu eʼwíínʼ numbañún.