Dxáʼgú ga̱jma̱a̱ bi̱ najmañuu naxmínaʼ

Náa ku̱ba̱ʼ ndrígóo Siria, nixtáa mbáa dxáʼgú israelita bi̱ nixtáa tsínguáanʼ wéñuʼ náa goʼwóo ga̱jma̱a̱ náa a̱ngui̱i̱n. Ejército ndrígóo sirio nigún ku̱ya̱a̱, ga̱jma̱a̱ rí xúgi̱ xtáa rañajunʼ náa a̱ʼgiu̱u̱ mbáa bi̱ kayá edxu̱u̱ náa ejército bi̱ nigumbiʼyuu Naamán. Dxáʼgú ndaʼyámajkuu Jeobá maski ajndu xa̱bu̱ náa xtáa tséyamajkuíí.

Naamán gíʼdoo mbá nandii mbiiʼ náa xuyuʼ ga̱jma̱a̱ na̱ʼkhu̱ wéñuʼ. Dxáʼgú nindoo mambáyúu, ikha jngó niʼthúu̱n a̱ʼgiu̱u̱ Naamán: “Naniʼnííʼ mbáa bi̱ ma̱ndoo maʼni thanuu ajmbiaʼ. Náa Israel xtáa mbáa gaʼyee ndrígóo Jeobá bi̱ nagumbiʼyuu Eliseo. Ikhaa ma̱ndoo maʼni thanuu”.

A̱ʼgiu̱u̱ Naamán niʼthí xúgíʼ rí niʼthúu̱n dxáʼgú. Naamán nindoo maʼni asndu ndiéjunʼ mu maguma thanáá, ikha jngó ni̱jkha̱ náa Israel náa goʼwóo Eliseo. Naamán nikumu̱u̱ rí Eliseo magruiguíi xóo mbáa xa̱bu̱ bi̱ gíʼdo wéñuʼ numuu. Mú Eliseo tagajnuu mu maʼtámijna ga̱jma̱a̱, nikunguanʼ bi̱ nambáyúu mu maraxi̱i̱ ga̱jma̱a̱ maʼthúu̱n: “Ayuʼ ga̱jma̱a̱ gajnguáanʼ juwan aʼphu̱ náa mañu Jordán. Ikhú gaguma thanaʼ”.

Naamán tániguʼ kayuʼ rúʼko̱ ga̱jma̱a̱ niʼthí: “Niku̱mu̱ʼ rí gaʼyee bugi̱ maʼni thanuʼ ga̱jma̱a̱ maʼthúu̱n Dios ndrígóo ga̱jma̱a̱ maʼba̱a̱n ñawúunʼ gi̱i̱ ñuʼú. Mú i̱ndó niʼthúunʼ rí maʼgá náa mañu dí rígá náa Israel. Kuaʼdááxu mañu rí itháan májánʼ náa Siria. Náa numuu rí xándoo maʼgá náa mañu rúʼko̱ rá.” Naamán nikiʼnáa wéñuʼ ga̱jma̱a̱ ni̱jkha̱a̱.

Xa̱bi̱i̱ Naamán nimbayíí mandxa̱ʼóo májánʼ edxu̱u̱. Nitháán: “Lá xátani asndu ndiéjunʼ mu maguma thanaʼ ráʼ. Rí niʼtháanʼ matani gaʼyee na̱nguá nindxu̱u̱ mingíjyúuʼ. Náa numuu rí tsítani rá.” Naamán niʼdxuun, ikha jngó ni̱jkha̱ náa mañu Jordán ga̱jma̱a̱ nijngúun iyááʼ mbá juwan nuthu. Índo̱ niʼni juwan nuthu, Naamán niguma thanáá. Nixtáa gagi wéñuʼ ga̱jma̱a̱ nitanga̱a̱ náa Eliseo mu maxnáa núma̱aʼ. Niʼthúu̱n: “Rí xúgi̱ nda̱yo̱o̱ rí Jeobá Dios nindxu̱u̱ gajkhun”. índo̱ Naamán nitanga̱a̱ náa goʼwóo niguma má thanáá. Xú káʼnii niʼni a̱jkiu̱u̱n dxáʼgú israelita índo̱ ndiʼyoo Naamán rá.