Elisabet gíʼdaa mbáa ada̱

Mbáa ndxajkun bi̱ nagumbiʼyuu Zacarías ga̱jma̱a̱ a̱ʼgiu̱u̱ bi̱ mbiʼyuu, Elisabet, nikuwa mijngii náa Jerusalén. Ninújngoo má mbá 400 tsiguʼ asndu nákha niguma̱a̱ mbu̱júu̱ xtátsí ndrígóo Jerusalén. Zacarías ga̱jma̱a̱ Elisabet mba̱yu̱ʼ má eʼni rí ninigu̱nʼ, mu na̱nguá niguáʼdiin e̱ji̱n. Mbóo mbiʼi, índo̱ Zacarías xtáa raxnáxi incienso náa santuario ndrígóo templo, nikujmaa ángel Gabriel. Zacarías nimíñuu wéñuʼ, mú Gabriel niʼthúu̱n: “Xámiñaʼ. Na̱ʼkhá ka̱yo̱ʼ ajngáa májánʼ ndrígóo Jeobá. A̱ʼgia̱ʼ, Elisabet, magiʼdaa mbáa ada̱, ga̱jma̱a̱ magumbiʼyuu Juan. Jeobá niraʼwíí Juan mu maʼni mbá ñajunʼ kiejunʼ”. Zacarías niraxu̱u̱: “Xú káʼnii gáyóo á mu naratá rí gajkhun rá. Ikhúúnʼ ga̱jmu̱ʼ a̱ʼgiu̱ʼ guaniáanʼxu mu muguaʼdáaxu mbáa ada̱”. Gabriel niriʼñuu: “Dios nikungunʼ mu matha̱nʼ mbá ajngáa májánʼ. Mú numuu rí na̱nguá nitanimbaaʼ, ní xándoo maratha asndu índo̱ gagumaa a̱ʼdiáaʼ”.

Zacarías niguanúu náa santuario itháan mba̱yu̱ʼ. Índo̱ nigájna̱a̱, xa̱bu̱ kuwa raguáʼthi̱i̱n mu mbuyáá ndiéjunʼ nirígá. Mú Zacarías nánguá eʼthí, i̱ndó ñawúunʼ eʼni. Ikhú xa̱bu̱ niguánu ndiyáá rí ikhaa nigruigú mbá ajngóo Dios.

Nda̱wa̱á, Elisabet nigu ewáan ada̱ ga̱jma̱a̱ nigiʼdaa a̱ʼdióo, xó má niʼthí ángel. Bi̱ nambáxu̱u̱n gajmiún ga̱jma̱a̱ bi̱ kaʼñún Elisabet niguwáʼ mu muniʼniiʼ a̱ʼdióo ga̱jma̱a̱ nidxún wéñuʼ kuyáá. Elisabet niʼthí: “Magumbiʼyuu Juan”. Ikhiin nithán: “Nimbáa na̱nguá mbiʼyuu xúʼko̱ náa bi̱ xtañún. Itháan májánʼ gáʼni rí muxna mbiʼí Zacarías, xóo mbiʼyuu anu̱u̱”. Mú Zacarías niʼnirámáʼ: “Juan gagumbiʼyuu”. Ikhú, Zacarías nigriyaaʼ ajngóo. Rí nirígá ga̱jma̱a̱ numuu ada̱ nidxawíín náa xúgíʼ Judea, ga̱jma̱a̱ xa̱bu̱ niraximíjna̱: “Ndiéjunʼ gáʼni ada̱ bugi̱ índo̱ gája̱a̱ rá.”

Ikhú Zacarías nigruigú xi̱ʼ kaʼwu ga̱jma̱a̱ niʼtáriyaʼ ajngáa rígi̱: “¡Guʼni mba̱a̱ Jeobá! Ikhaa nikudaminaʼ náa Abrahán rí makunguanʼ mbáa bi̱ maʼni káwáanʼ, Mesías, mu maʼtsiwáanʼ. Ga̱jma̱a̱ Juan mani̱ndxu̱u̱ mbáa gaʼyee mu maʼni mújúnʼ kamba̱a̱ mu ma̱ʼkha̱ Mesías”.

Xúʼko̱ má kayuʼ nigíʼnuu mbáa bi̱ kaʼyoo Elisabet bi̱ nigumbiʼyuu María. Mbuʼyáá náa imbo̱o̱ capítulo.