Gixa̱a̱ nagrui̱ga̱ tsáʼkhá náa inuu Jesús

Nda̱wa̱á rí Jesús nijngúun iyááʼ, xi̱ʼ kaʼwu ni̱jkha̱ kayáa náa ku̱ba̱ʼ mixooʼ. Nda̱a̱ rí ni̱ʼkhu̱ mbá 40 mbiʼi ikha jngó naxkidxu̱u̱ wéñuʼ. Ikhú ni̱ʼkha̱ Gixa̱a̱ gagrui̱ga̱ tsáʼkhá náa Jesús. Ginii niʼthí: “Á mu gajkhun rí ni̱ndxa̱ʼ A̱ʼdióo Dios, arathá rí itsí rígi̱ magutaxi̱i̱ pan”. Mú Jesús niriʼñuu rí naʼthí náa Santas Escrituras: “Kiʼniraʼmáʼ rí xa̱bu̱ raʼkháa i̱ndó nda̱ñúnʼ ganitsu mu makuwa. Ma̱ngaa nda̱ñúnʼ mudxawíín xúgíʼ rí naʼthí Jeobá”.

Gixa̱a̱ nixkaxi̱i̱ Jesús ga̱jma̱a̱ imbo̱o̱ tsáʼkhá: “Á mu gajkhun rí ni̱ndxa̱ʼ a̱ʼdióo Dios, akixi̱i̱n asndu náa rí itháan mitsídaanʼ náa templo. Kiʼniraʼmáʼ rí Dios makunguinʼ ángeles mu muni kríñanʼ”. Mú Jesús niʼthí mbu̱júu̱ ga̱jma̱a̱ ajngáa rí na̱ʼkha̱ náa Santas Escrituras: “Kiʼniraʼmáʼ dí ragíʼmaa madri̱ga̱ tsáʼkhá náa inuu Jeobá”.

Nda̱wa̱á kayuʼ, Satanás nisngájmuu xúgíʼ reinos ndrígóo numbaaʼ ga̱jma̱a̱ rí gíʼdoo wéñuʼ numuu ga̱jma̱a̱ gloria, ga̱jma̱a̱ niʼthúu̱n: “Maxna̱ʼ xúgíʼ reinos ga̱jma̱a̱ gloria á mu natayamajkhuʼ mbá miʼtsú”. Mú Jesús niriʼñuu: “¡Ayuʼ, Satanás! Kiʼniraʼmáʼ rí i̱ndó Jeobá gíʼmaa mbuʼyamajkuíí”.

Ikha jngó Gixa̱a̱ ni̱jkha̱a̱, ga̱jma̱a̱ niguwáʼ tikhun ángeles ga̱jma̱a̱ nixnáá ganitsu Jesús. Nda̱wa̱á rí nirígá rúʼko̱, Jesús nigíʼdu̱u̱ niʼtáraʼa ajngáa rí májánʼ ndrígóo Reino. Rúʼko̱ nindxu̱u̱ ñajunʼ rí Jeobá nixnángau maʼni náa tsu̱du̱u̱ ku̱ba̱ʼ. Xa̱bu̱ nanigu̱nʼ mudxawíín wéñuʼ rí Jesús naʼsngáa, ga̱jma̱a̱ nagún kidxuuʼ asndu náa má ejkha̱.