Jesús naʼni thana mbiʼi sábado

Bi̱ fariseos niwiñunʼ kuyáá Jesús ga̱jma̱a̱ ndiyáaʼ mbá numuu mu murtuwiin. Nithi rí Jesús ragíʼmaa maʼni thanún xa̱bu̱ rí mbiʼi sábado numuu rí nindxu̱u̱ mbá mbiʼi rí mbu̱ya̱a̱ xu̱únʼ. Mbá mbiʼi sábado, Jesús ndiʼyoo mbáa xa̱bu̱ bi̱ tsíyexi na̱nda̱ʼa̱ mbújkha̱a̱ náa calle. Ikha jngó niʼthúún xa̱bi̱i̱: “Gu̱ya̱a̱la xú káʼnii tsiakii ndrígóo Dios mambáyúu xa̱bu̱ bugi̱”. Ikhú Jesús nindáwoʼ iya ndawuuʼ ga̱jma̱a̱ ku̱ba̱ʼ. Nda̱wa̱á nixtájmuu náa iduu xa̱bu̱ ga̱jma̱a̱ niʼthúu̱n: “Ayuʼ ga̱jma̱a̱ arajñáa idaaʼ náa estanque ndrígóo Siloam”. Xa̱bu̱ niʼni xúʼko̱ kaʼnii, ga̱jma̱a̱ ikhú niyexi timbá aʼphu̱.

Xa̱bu̱ niguanún tsiánguá ga̱jma̱a̱ nithi: “Lá ragájkhun rí xa̱bu̱ bugi̱ bi̱ na̱nda̱ʼa̱ mbújkha̱a̱ ráʼ. O nindxu̱u̱ imba̱a̱ kayííʼ xóo ikhaa dxe̱ʼ.” Ikhaa niriʼñún: “Ikhúúnʼ ni̱ndxu̱ʼ xa̱bu̱ bi̱ tsíkruigo̱o̱ nigumaa”. Xa̱bu̱ niraxi̱i̱: “Mú náa numuu rí nakrui̱ga̱ʼ xúgi̱ rá.” Ikhaa niʼthún rí nigíʼnuu. Ikhú nigún ku̱ya̱a̱ mú maʼtámíjná gajmíi̱n fariseos.

Xa̱bu̱ bugi̱ niʼthún fariseos: “Jesús nixtájmuu ku̱ba̱ʼ náa iduʼ ga̱jma̱a̱ niʼthúnʼ rí majña̱a̱. Xúʼko̱ nini, ga̱jma̱a̱ rí xúgi̱ nandoo nayexi”. Fariseos nithi: “Á mu Jesús naʼni thanún xa̱bu̱ mbiʼi sábado, tsiakii ndrígóo tséʼkha̱ náa Dios”. Mú eʼwíínʼ nuthi: “Á mu tsiakii ndrígóo tséʼkha̱ náa Dios, náa numuu rí naʼngo̱o̱ naʼni thanún xa̱bu̱ bi̱ naʼniún nandii xá.”

Fariseos nindxa̱ʼwu̱u̱n aniu̱u̱n xa̱bu̱ bugi̱ maguwáʼ ga̱jma̱a̱ niraxu̱u̱n: “Náa numuu rí a̱ʼdiála xúgi̱ nandoo nayexi rá.” Aniu̱u̱n nimiñun numuu rí bi̱ fariseos nithi rí muxkriyaaʼ náa sinagoga asndu tsáa bi̱ gagiʼdoo fe náa Jesús. Ikha jngó niriʼña̱a̱: “Tséya̱a̱xu̱. Gura̱xi̱i̱ ikhaa”. Fariseos nini̱i̱ itháan graxe̱ xa̱bu̱ bugi̱, ga̱jma̱a̱ ikhaa niriʼñún: “Nithala xúgíʼ rí nda̱yo̱o̱. Náa numuu rí nuniu̱nʼ má xúʼko̱ graxe̱ rá.” Fariseos nikiʼníin wéñuʼ ga̱jma̱a̱ nixkriyaʼ ikhí.

Nda̱wa̱á dí nirígá rúʼko̱, Jesús ni̱jkha̱ gáʼyoo xa̱bu̱ bugi̱ ga̱jma̱a̱ niraxu̱u̱: “Lá xtaʼdáá fe náa Mesías rá.” Ikhú xa̱bu̱ niriʼña̱a̱: “Á mu nda̱yo̱o̱ tsáa nindxu̱u̱, magúʼdoo fe náa ikhaa”. Jesús niʼthúu̱n: “Ikhúúnʼ nindxu̱u̱ Mesías”. Lá ragájkhun dí Jesús ninindxu̱u̱ májánʼ a̱jkiu̱u̱n ga̱jma̱a̱ numuu xa̱bu̱ bi̱ tsíyexi ráʼ. Niʼni thanuu ga̱jma̱a̱ nimbáyúu mu magiʼdoo fe.