Nurtuwiin Jesús

Jesús gajmíi̱n apóstoles nigún náa kúbá rí mbiʼyuu Olivos ga̱jma̱a̱ ninújngún náa mata ndrígóo Cedrón. Inuu ma majtsi ga̱jma̱a̱ gíʼ dijndi gu̱nʼ. Índo̱ niguánu náa ixi̱ ri̱ʼi̱ ndrígóo Getsemaní, Jesús niʼthún: “Aguanála gi̱i̱ ga̱jma̱a̱ xúnuʼla”. Nda̱wa̱á, Jesús nitsíngunʼ náa ikhiin ga̱jma̱a̱ nismbátigo̱o̱. Nixmiéjunʼ wéñuʼ rí asndu niʼtákáñuu Jeobá: “Gaguma rí nandaʼ”. Ikhú Jeobá nikunguanʼ mbáa ángel mu maxnúu tsiakii. Nda̱wa̱á, Jesús nitanga̱a̱ gáʼñun náa kuwa ajtsíin apóstoles ndrígóo ga̱jma̱a̱ ndiʼyoo rí kuwa runuʼ. Ikha jngó niʼthún: “¡Guguaxunʼla! Raʼkháa mbiʼi muʼnuʼla. Ni̱jkha̱nú má mbiʼi rí mixnáxu̱u̱n náa ñawúunʼ xa̱bu̱ sia̱nʼ”.

Núkhu ni̱ʼkha̱nú Judás, gajmíi̱n mbaʼin xa̱bu̱ bi̱ kuda espadas ga̱jma̱a̱ ixi̱. Ndaʼyoo náa gaxkamaa Jesús numuu rí ni̱jkha̱ ga̱jma̱a̱ mangiin apóstoles mbaʼa nuthu náa ixi̱ ri̱ʼi̱. Judas niʼthún soldados rí ikhaa gásngajmaa tsáa nindxu̱u̱ Jesús. Ni̱jkha̱ mbájmbu náa Jeús ga̱jma̱a̱ niʼthúu̱n: “Xú káʼnii xtaa, Maestro”, ga̱jma̱a̱ ni̱ʼkhu̱ chítúʼ ndrígóo Jesús. Jesús niʼthúu̱n: “Judas, naraxnáxu̱u̱n ráʼ.”

Jesús ni̱jkha̱ kanuu ga̱jma̱a̱ niraxu̱u̱n xa̱bu̱: “Tsáa eʼyááʼ rá.” Ikhiin nithi: “Jesús Nazareno”. Ikha niriʼñún: “Ikhúúnʼ ni̱ndxu̱ʼ”. Ikhiin nigúun skidiʼ ga̱jma̱a̱ nixpátrigi̱i̱n mbayííʼ. Jesús niraxu̱u̱ mbu̱júu̱: “Tsáa eʼyáaʼ”. Ga̱jma̱a̱ ikhiin niriʼña mbu̱júu̱: “Jesús Nazareno”. Jesús niriʼñún: “Nitamala rí ikhúúnʼ má ni̱ndxu̱ʼ. Ikha jngó guniʼñúunʼ rí magúun xa̱bu̱ bugi̱”.

Índo̱ Pedro ndiʼyoo dí xtáa rarígá, ikhú niriyaʼ mbá espada ga̱jma̱a̱ nirígú cháʼun Malco, bi̱ ninindxu̱u̱ ñumbáá ndrígóo bi̱ ndiyá edxu̱u̱ náa ndxajkun. Mú Jesús nixkajma cháʼun ga̱jma̱a̱ niʼni thanuu. Ikhú Jesús niʼthúu̱n Pedro: “Atiexi̱i̱ espada ndrígáʼ. Numuu rí á mu nataxmínaʼ ga̱jma̱a̱ espada, makhañáʼ ga̱jma̱a̱ espada”. Soldados nirajtuwiin Jesús ga̱jma̱a̱ niruʼwa̱a̱ ñawúunʼ, ga̱jma̱a̱ apóstoles nigáñun. Nda̱wa̱á, xa̱bu̱, nigún ku̱ya̱a̱ Jesús mu mbaʼyoo Anás, bi̱ kayá edxu̱u̱ náa ndxajkun. Ikhaa niʼniuu graxe̱ Jesús ga̱jma̱a̱ nikuʼmaa náa goʼwóo ndxajkun, Caifás. Mú ndiéjunʼ nirígá ga̱jma̱a̱ numún apóstoles rá.