Visión ndrígóo Juan

Índo̱ apóstol Juan xtáa náa guʼwá e̱jua̱nʼ náa mbá mbaaʼ rí gíwanʼ náa tapo̱o̱ iyaʼ náa Patmos, Jesús nisngájmuu mbá 16 visión o xkri̱da rí xóo marigá nda̱wa̱á. Náa visión rúʼko̱, Juan ndiʼyoo xú káʼnii gaguma kaʼwi̱i̱ mbiʼyuu Jeobá, xú káʼnii gáʼkha̱ Reino ndrígóo ga̱jma̱a̱ xú káʼnii gáʼni rí nandoo náa tsu̱du̱u̱ ku̱ba̱ʼ xóo náa mekhu.

Náa mbá visión, Juan ndiʼyoo rí Jeobá gíʼ náa trono ndrígóo mekhuíí. Náa mbájndi trono kuwa mbá 24 xa̱bu̱ bi̱ kuya̱ edxu̱u̱. Kugíʼ xtíin miʼxá ga̱jma̱a̱ corona dí kiʼni ga̱jma̱a̱ oro. Náa trono nagájnuu aguʼ xóo rí naxpíbiʼ ga̱jma̱a̱ nawáán xóo índo̱ nurmidá a̱jkhu̱u̱n. Mbá 24 xa̱bu̱ bi̱ kuya̱ edxu̱u̱ nusmbati̱gu̱u̱n náa inuu Jeobá ga̱jma̱a̱ nuxnáá gamajkhu. Náa imbo̱o̱ visión, Juan ndaʼñún mbaʼin wéñuʼ xa̱bu̱, náa xúgíʼ xuajen mba̱ʼu̱, xuajen ma̱jkha̱ʼ, náa mbaʼa enii ajngáa, bi̱ nduyamajkuíí Jeobá. Aʼdá Múgú, bi̱ nindxu̱u̱ Jesús, nindxu̱u̱ báxtúu ndrígu̱ún ga̱jma̱a̱ naxnún ikha náa iyaʼ rí naxná vida. Nda̱wa̱á náa imbo̱o̱ visión Jesús nagi̱ʼdu̱u̱ naʼtáñajunʼ xóo rey náa mekhuíí gajmíi̱n mbá 24 xa̱bu̱ bi̱ kuya̱ edxu̱u̱. Náa imbo̱o̱ visión, Juan ndaʼyoo rí Jesús naxmínaʼ ga̱jma̱a̱ Xujkhú wéñiʼ, bi̱ nindxu̱u̱ Satanás, gajmíi̱n xa̱bu̱ wéñiʼ ndrígóo. Jesús naxkawíin náa mekhu ga̱jma̱a̱ nakruigúun náa tsu̱du̱u̱ ku̱ba̱ʼ.

Nda̱wa̱á, Juan ndaʼyoo mbá visión nagui̱i̱ ga̱jma̱a̱ numuu Aʼdá múgú gajmíi̱n mbá 144,000 bi̱ wájun náa kúbá rí mbiʼyuu Sión. Ma̱ngaa ndaʼyoo mbáa ángel bi̱ na̱jkha̱ náa xúgíʼ ku̱ba̱ʼ ga̱jma̱a̱ na̱jkha̱ raʼthí: “Guxna̱a̱ gamajkhu Dios ga̱jma̱a̱ guxna̱a̱ gloria”.

Náa imbo̱o̱ visión, ndaʼyoo guerra rí nagumbiʼyuu Armagedón. Náa guerra rúʼko̱, Jesús gajmíi̱n ejército ndrígio̱o̱ naʼngu̱u̱n nuni gajmiún numbaaʼ xkawiiʼ ndrígóo Satanás. Náa iwáá visión, Juan ndaʼyoo rí náa mekhu ga̱jma̱a̱ náa ku̱ba̱ʼ kuwa mbá kambáxu̱u̱n ga̱jma̱a̱ tsímáá xa̱bu̱. Ma̱ngaa ndaʼyoo xú káʼnii eguma gámbáa Satanás gajmíi̱n bi̱ nagún kidxuuʼ. Náa mekhu ga̱jma̱a̱ náa ku̱ba̱ʼ, xúgínʼ nduyáá rí mbiʼyuu Jeobá nindxu̱u̱ kaʼwu ga̱jma̱a̱ i̱ndó ikhaa eyamajkuíí.