Lá natayáá má ráʼ.

Ndiéjunʼ eyóoʼ maʼni mbáa bi̱ nandoo maʼga ga̱jma̱a̱ barco nákha wajyúúʼ rá.

NÁKHA mbiʼi rí nixtáa Pablo, nda̱a̱ barco rí nañejunʼ mu maʼga kagui̱i̱n xa̱bu̱. Á mu mbáa xa̱bu̱ nandoo maʼga, ginii ndayóoʼ maraxi á mu barco rí na̱jkha̱ kagu̱u̱ rí naxtangujua̱ ma̱ndoo maʼga kayáa (Hech. 21:2, 3). Maski ajndu barco tséjkha̱ mbájmbu náa rí ikhaa nandoo maʼga, mú ikhaa ma̱ndoo magajta̱a̱ náa gáʼganúu barco ga̱jma̱a̱ mbayáaʼ imbo̱ʼ barco mu maʼga kayáa náa rí nandoo maʼga (Hech. 27:1-6).

Raʼkháa xúgíʼ gu̱nʼ nagájnún barco ga̱jma̱a̱ na̱nguá guaʼdáá mbá mbiʼi kiejunʼ mu magajnún. Bi̱ nagún ku̱ñu̱u̱n barco nunimbu̱u̱n mbaʼa dí narígá mu xágún náa lamáa, mbá xkri̱da, índo̱ nduyáá mbáa yu̱wa̱ʼ grígu randxaʼwá náa mbá barco ikhú tségúún. Bi̱ nagún náa lamáa nagájnún índo̱ naxnúu májánʼ giñánʼ mu xájyúuʼ gagún. Índo̱ xa̱bu̱ bi̱ na̱jkha̱ naxkamaa mbá barco rí maʼga ga̱jma̱a̱, maʼga kagu̱u̱ amuuʼ náa magajnúu barco ga̱jma̱a̱ magiʼthu̱u̱n asndu índo̱ gágajnúu barco.

Historiador Lionel Casson naʼthí: “Roma niʼni rí xa̱bu̱ bi̱ nagún xaʼñún mingíjyúuʼ mu muxkamaa mbá barco magún ga̱jma̱a̱. Náa naguájun barco gíʼ náa rawunʼ mañuu Tíber. Náa mijngii xuajen Ostia gíʼ mbá xuáá náa rígá oficinas. Mbaʼa rí ikhaa nindxu̱u̱ náa nuthi nguáná gagajnún barco: Xóo náa Narbona [rí xúgi̱ nindxu̱u̱ Francia], ga̱jma̱a̱ Cartago [rí xúgi̱ nindxu̱u̱ Túnez], [...] ga̱jma̱a̱ i̱ʼwáʼ. I̱ndó rí ndayóoʼ maʼni bi̱ maʼga, ndayóoʼ maʼga garaxi náa oficina á mu rígá barco rí magajnúu”.

Rí mi̱dxu̱ʼ ga̱jma̱a̱ barco xájyúuʼ gídxúʼ, mú gamíi nindxu̱u̱. Apóstol Pablo mbaʼa nuthu niguʼwi̱i̱ índo̱ ni̱jkha̱ raʼtáraʼa xóo misionero (2 Cor. 11:25).