Guʼsngáa dí gajkhun

Índo̱ gaʼni gu̱nʼ septiembre, I̱yi̱i̱ʼ dí najmulú náa Reunión magiʼdoo imbo̱ʼ nuxi̱ʼ presentación, rí mayéʼga edxu̱u̱ “Guʼsngáa dí gajkhun”. Nandulúʼ magajnúriyooʼ dí gajkhun ga̱jma̱a̱ numuu Biblia índo̱ gúʼni mbá graxe̱ ga̱jma̱a̱ majmulúʼ mbá texto ndrígóo Biblia.

Á mu nduʼyáa rí xa̱bu̱ nanigu̱u̱ʼ maʼdxun, ma̱ndoo muʼniratáá a̱jkiu̱u̱n mú matangáanʼ guʼyáá, ma̱ndoo muniʼñáaʼ mbá i̱yi̱i̱ʼ o musngajmá mbá video dí na̱ʼkha̱ náa jw.org. Gatangáan wapháá mú muʼtámíjná gajmiúlú dí niguanúu. Dí nuxi̱ʼ rí xóo mixnáxi ga̱jma̱a̱ bi̱ manújngún gúxna discurso majmúún dí na̱ʼkha̱ raʼthí náa capítulos ndrígóo libro What Can the Bible Teach Us?, nindxu̱u̱ mbá versión ndrígóo libro Dí naʼsngáa náa Biblia dí kagu̱ ajngáa dí ra̱mingíjyúuʼ makruaʼaʼ. Á mu xóo nda̱a̱ libro rígi̱ náa ajngáa xtílóo, majmaa libro Ndiéjunʼ phú eʼsngáa náa Biblia rá. Náa kagu̱ mbaʼa rí ma̱ndoo maratamíjná ga̱jma̱ʼ xa̱bu̱ índo̱ gátangaán gáta̱ya̱a̱ o marasngáa i̱ndó ga̱jma̱a̱ Biblia.

Rígá mbóó kamba̱a̱ dí na̱jkha̱ kañán maraxtaa kámuu mbiʼi (Mt 7:13, 14). Numuu rí xa̱bu̱ bi̱ nuʼtámíjná gajmiúlú mixtiʼkhu creencias ndrígu̱ún ga̱jma̱a̱ mixtiʼkhu náa guwáʼ, gíʼmaa muʼsngúún dí gajkhun ga̱jma̱a̱ numuu Biblia xóo rí manigu̱nʼ ikhiin (1Ti 2:4). Índo̱ gáʼga rajmañulú mbaʼa enii rí na̱ʼkha̱ raʼthí náa Biblia ga̱jma̱a̱ gajmulú itháan májánʼ ‹ajngáa dí gajkhun›, manigulúʼ muʼsngáa itháan ga̱jma̱a̱ mbaʼin xa̱bu̱ gudxawíín índo̱ gúʼsngúún rí gajkhun (2Ti 2:15).