XÓO KUWÁANʼ BI̱ NI̱NDXU̱LÚ CRISTIANOS

I̱mba̱ nuxi̱ʼ xóo maʼni reunión rí narígá náa xmáná

Mbáa enero tsiguʼ 2018, reunión rí narígá náa xmáná masngájma notas rí niʼnigajmaa̱ ma̱ngaa xtiʼkhu ga̱jma̱a̱ videos rí nuʼnigajmaa náa Internet ndrígóo Traducción del Nuevo Mundo de las Santas Escrituras (nwtsty), rígá náa Internet, maski ajndu xóó nda̱a̱ náa ajngáaʼ. Rígi̱ maʼni rí majmañaaʼ itháan rí kaʼyoo reunión. Rí itháan gíʼdoo numuu, maʼni mi̱dxu̱ʼ kanuu itháán náa Jeobá.

NOTAS RÍ MUʼNIGAJMAA

Notas rí muʼnigajmaa nasngájma itháan xóo kaʼnii, náa nirígá ma̱ngaa ajngáa nigumaraʼmáʼ mbaʼa versículos ndrígóo Biblia.

Mateo 12:20

Mecha ndrígóo lino rí naʼni gúní: Lámparas rí nijmaa náa guʼwá nindxu̱u̱ mbá ndaan ku̱ba̱ʼ rí najniʼ aceite ndrígóo oliva. Aceite natsimuu náa mecha ga̱jma̱a̱ naʼni rí mambiʼi. Ajngáa griego rí nijuitájuii “mecha ndrígóo lino rí naʼni gúní” ma̱ngaa ma̱ndoo maʼni mecha rí nagájnuu gúní numuu rí naguánu xóo xámbiuʼ maski ajndu aguʼ niguíyuʼ. Xóo má niʼthí gaʼyee Isaías 42:3, Jesús magáwíinʼ a̱jkiu̱u̱n; ikhaa maxaʼni gawúnʼ itháan xa̱bu̱ gíníi.

Mateo 26:13

Rí phú gajkhun: Amén náa ajngáa griego, mú náa ajngáa hebreo nandoo gáʼthúu̱n “xúʼko̱ gáʼni” o “gajkhun”. Jesús nijmuu wéñuʼ ajngáa rígi̱ índo̱ niʼthí dí marigá nda̱wa̱á o rí nijuiʼtáriyaʼ. Xúʼko̱ nikujmaa dí ajngóo ninindxu̱u̱ gajkhun. Rí xóo nijmuu Jesús ajngáa “xúʼko̱ gáʼni” o “amén” nindxu̱u̱ kiejunʼ náa libro tsúʼkháan. Índo̱ nakujmaa a̱jma̱ nuthu ajngáa (amén amén), xóo má náa Evangelio ndrígóo Juan, ajngáa ndrígóo Jesús rígi̱ najuiʼtájuíi “phú gajkhun” (Jn 1:51).

XTIʼKHU GA̱JMA̱A̱ VIDEOS

Xtiʼkhu, xkri̱da, videos dí ragíʼdoo aʼwá ga̱jma̱a̱ videos rí maxnáʼ tsiakii rí nasngájma itháan rí na̱ʼkha̱ náa Biblia.

Betfagué, kúbá ndrígóo Olivos ga̱jma̱a̱ Jerusalén

Video rígi̱ nasngájma mbá kamba̱a̱ rí najkhanú náa Jerusalén rí naʼkha̱ xígií náa nagájnuu a̱jkha̱ʼ, asndu náa et-Tur —rí nakujmaa rí kaʼyoo Betfagué rí na̱ʼkha̱ náa Biblia— asndu náa rí itháán mitsídánʼ ndrígóo kúbá Olivos. Betania rígá xígií náa nagájnuu a̱jkha̱ʼ ndrígóo Betfagué, náa níjniúu kúbá Olivos rí nagájnuu a̱jkha̱ʼ. Índo̱ kuwa ragún Jerusalén, Jesús gajmíi̱n xa̱bi̱i̱ naguʼún nanújngún náa Betania rí mbruʼun. Dí mbiʼi xúgi̱ rígá náa xuajen el-Ázariyeh (El Éizariya), náa ajngáa árabe nandoo gaʼthí “Náa kaʼyoo Lázaro”. Nakujmaa rí Jesús niguanúu náa goʼwóo Marta, María ga̱jma̱a̱ Lázaro (Mt 21:17; Mr 11:11; Lu 21:37; Jn 11:1). Índo̱ Jesús ni̱jkha̱ náa guʼwún náa Jerusalén, mbáa ni̱jkha̱ náa kamba̱a̱ xóo rí nakujmaa náa video. Nákha 9 ñajunʼ nisán tsiguʼ 33, Jesús ninújngoo náa kúbá ndrígóo Olivos ga̱jma̱a̱ nito̱ʼo̱o̱ náa Jerusalén griguii mbáa aʼdá xtángidiʼ. Mbáa ni̱jkha̱ asndu xuajen Betfagué, xó má ejkha̱ kamba̱a̱ ndrígóo Jerusalén.

Kamba̱a̱ ndrígóo Betania asndu Betfagué
Betfagué
Kúbá ndrígóo Olivos
Xkua̱ ndrígóo Cedrón
Kúbá ndrígóo Templo

Mbá itsu̱ rajkhú fraʼa mbá clavo

Nindxu̱u̱ mbá xtiʼkhu ndrígóo itsu̱ rí fraʼa mbá clavo ndrígó hierro dí mbáʼ 11,5 centímetro (4,5 pulgadas). Rígi̱ nikujmaa nakha tsiguʼ 1968 náa norte ndrígóo Jerusalén ga̱jma̱a̱ nambánii rí nirígá náa Roma. Ma̱ngaa rígi̱ nasngájma rí nijmún clavo mu mudrajkiin xa̱bu̱ náa mbá poste ndrígóo ixi̱. Mbáa nindxu̱u̱ xóo rí nijmún soldados romanos mu murajkaa Jesús náa ixi̱. Nikujmaa náa iñuuʼ itsí náa najthi itsu̱ mbáa xa̱bu̱ nda̱wa̱á rí xuyuʼ nachúu. Rígi̱ nasngájma rí mbáa xa̱bu̱ bi̱ nurájkhaa ma̱ndoo mudii (Mt 27:35).