Ganindxa̱a̱ʼ precursor

Rí muʼgímíjná meta rí muʼni itháan ñajuunʼ Jeobá mambáyúlú majmulú májánʼ tsiakii ndrígúlú ga̱jma̱a̱ mbiʼi rí xóó naguanúu náa numbaaʼ rígi̱ (1Co 9:26; Ef 5:15, 16). Índo̱ gúni̱ gájma̱a̱ mbá guʼwáanʼla, májánʼ gáʼni rí mutamíjnála ga̱jma̱a̱ numuu metas rí ma̱ndoo muʼgímíjnála náa tsiguʼ rí na̱ʼkha̱. Náa i̱yi̱i̱ʼ dí najmulú náa reunión rí kaʼyoo gu̱nʼ rígi̱ mataxkamaa mbaʼa artículo rí naʼthí ga̱jma̱a̱ numuu metas rí ma̱ndoo mataʼgíʼ matani̱ nda̱wa̱á rí niratakáñíí Jeobá (Snt 1:5).

Mbá xkri̱da, xúgíinʼ bi̱ kúwíin náa mbá guʼwíin ma̱ndoo muñambáá mu xúʼko̱ mbáa ma̱ndoo mani̱ndxu̱u̱ precursor regular. Á mu ikháán namíñáaʼ rí xánga̱a̱ʼ gátanimba̱níí hora ma̱ndoo maratamíjná ga̱jma̱a̱ʼ mbáa precursor bi̱ xtáa xó má xtaa ikháán (Pr 15:22). Mbáa ma̱ndoo matrajxi̱i̱ mbáa precursor índo̱ nuni̱ gájma̱a̱ mbá guʼwáanʼ, nda̱wa̱á atanirámáʼ mbiʼi ga̱jma̱a̱ hora rí xóo ikhaa naʼtáraʼa. Á mu ninindxa̱a̱ʼ precursor nákhá ginii, náá numuu rí tsénindxa̱a̱ʼ mbu̱júu̱ʼ rá. Mbáa xúgi̱ ma̱ndoo matani̱.

Lá xtáa mbáa bi̱ ma̱ndoo maʼni precursor auxiliar mbá guáthá igu̱nʼ náa guʼwáaʼ ráʼ. Á mu tséʼnga̱a̱ʼ wéñuʼ, ma̱ndoo marataráʼa ka mbá xngaa rí mbá mbiʼi. Á mu náa natiejunʼ o náa escuela tséniña̱a̱ʼ marataráʼa náa ta̱pha̱ xmáná, ma̱ndoo ma̱nindxa̱a̱ʼ precursor índo̱ naguanáaʼ vacación o matiejnáaʼ mámbá rí námbáa xmáná. Araxnííʼ náa mbá calendario gu̱nʼ rí nandaaʼ ma̱nindxa̱a̱ʼ precursor auxiliar ga̱jma̱a̱ ataniraʼmáʼ hora rí maʼndaaʼ matiejnáaʼ gárataráʼa (Pr 21:5).

NDA̱WA̱Á RÍ NITAYÁÁ VIDEO PRECURSOR, XÁMIÑALAʼ, ATRIʼÑA̱A̱ GRAXE̱ RÍGI̱:

• Xú kaʼnii Jeobá niñewu̱u̱n ndxájulú Aamand rá. Ndiéjuunʼ eʼsngúlú rígi̱ rá.