Xúgíinʼ xa̱bu̱ nandún mbuyáá xú káʼnii gákuwá nda̱wa̱á

Mbaʼiin wéñuuʼ nakumu̱ún dí xáʼga̱nú makuwíin xígi̱ kaʼnii nda̱wa̱á. Numuu dí tséyáá xú káʼnii gákúwíin gájtsíí. Nirígá rígi̱ ga̱jma̱a̱ numuu nandii dí mbiʼyuu COVID-19, mbaʼiin wéñuuʼ xa̱bu̱ nimíniiʼ ga̱jma̱a̱ numuu nandii rígi̱, xóo rí nánguá guáʼdáá mbújkha̱a̱ ga̱jma̱a̱ mbaʼiin nikháñún. Ikha jngóo nakumu̱ún rí xáʼga̱nú makuwíin tsímáá nda̱wa̱á.

Numuu dí kúwíin ga̱jma̱a̱ gamíi, mbaʼiin xa̱bu̱ nduyáʼ ndiéjunʼ dí gámbañún mu xúʼko̱ makuwíin májánʼ nda̱wa̱á. Mbaʼiin nakumu̱ún kuyáá tsiakii dí tsékujmaa, rí murajxi̱ numún xóo gákúwíin nda̱wa̱á o muríyaʼ suerte ndrígu̱ún. Mbaʼiin nakumu̱ún rí makánún xúgíʼ rí nda̱ñúunʼ á mu nagún escuela dí itháán mitsídánʼ ga̱jma̱a̱ á mu guáʼdáá mbújkha̱a̱. Eʼwíinʼ nundxa̱ʼwa̱míjna̱ mu maraxtaa májánʼ i̱ndó ndayóoʼ rí mani̱ndxa̱a̱ʼ májáanʼ xa̱bu̱.

Lá ma̱ndoo xúgíʼ rígi̱ maʼni dí ikháán maraxtaa tsímáá nda̱wa̱á xó má ikháán endaaʼ ráʼ. Mu ma̱ta̱ya̱a̱, atatsaʼwáminaʼ rígi̱:

• Náá ekumu̱ún xa̱bu̱ rí ma̱ndoo mbuyáá xóo gákúwíin nda̱wa̱á rá.

• Lá dí matanigajmaa̱ ma̱ngaa dí maraʼdáá mbújkha̱a̱ maʼni dí maraxtaa májánʼ nda̱wa̱á ráʼ.

• Lá dí manindxu̱lú májáanʼ xa̱bu̱ maʼni dí makuwáánʼ májánʼ nda̱wa̱á ráʼ.

• Náá gátaxkamaa ikha rí mambáyáaʼ mu maraxtaa májánʼ nda̱wa̱á rá.

I̱yi̱i̱ʼ rígi̱ mambáyáaʼ mu mataxkamaa xóo extiʼña̱a̱ graxe̱ rígi̱.