Graxe̱ rí nuni bi̱ nuraxnuu

Tsáá nindxu̱u̱ “a̱ʼgu̱” bi̱ naʼthí ga̱jma̱a̱ numuu náa Isaías 60:​1, ga̱jma̱a̱ ndiéjunʼ eyoo gáʼthúu̱n rí nitu̱jxu̱u̱, ma̱ngaa rí niʼthá ngawuuʼ aguʼ xá.

Náa Isaías 60:1 naʼthí: “Atujxa̱a̱ʼ a̱ʼgu̱, aratá ngáwíí aguʼ, numuu rí agiaaʼ ni̱ʼkha̱nú má. Agiuuʼ Jeobá rí mitsaanʼ nambiʼi náa ikháán”. Náa texto rígi̱ na̱ʼkha̱ raʼthí ga̱jma̱a̱ numuu “a̱ʼgu̱”, ikhaa nindxu̱u̱ Sion, xóo muʼthá, Jerusalén, xuajin mba̱a̱ rí niʼtáñajuunʼ Judá nákha ikhú (Isa. 60:14; 62:​1, 2).a Jerusalén nandoo gáʼthúu̱n mbá xúgíʼ xuajin Israel. Mú, nguáná ga̱jma̱a̱ xú káʼnii nitu̱jxu̱u̱ Jerusalén, ma̱ngaa nguáná nigíʼdu̱u̱ niʼthá ngawuuʼ aguʼ xá. Lá xtáa rambánuu xúgi̱ ajngáa dí niʼtáriyaʼ Isaías ráʼ. Guriʼña̱a̱ a̱jma̱ grajxe̱ rígi̱.

Nguáná ga̱jma̱a̱ xú káʼnii nitu̱jxu̱u̱ Jerusalén, ma̱ngaa nguáná nigíʼdu̱u̱ niʼthá ngawuuʼ aguʼ xá. Índo̱ judíos nikúwá náa Babilonia mbá 70 tsiguʼ. Nákha ikhú xuajin Jerusalén ga̱jma̱a̱ náa guʼwá dí nduyamajkuíí Dios nánguá májánʼ. Índo̱ xa̱bu̱ medos ga̱jma̱a̱ persas nitu̱ʼu̱u̱n náa Babilonia, xúgíinʼ israelitas bi̱ kúwá náa Babilonia niniñu̱u̱nʼ matangi̱ín náa Jerusalén ga̱jma̱a̱ mugíʼdi̱i̱ mbu̱júu̱ mbuyamajkuíí Jeobá xó má gíʼmaa (Esd. 1:​1-4). Nákha 537 tsiguʼ ginii, mbá nguéjmi̱i̱n judíos bi̱ niguájun jmbu bi̱ kúwá náa mbá 12 xuajin majkhaʼ, nitangiín náa Jerusalén (Is. 60:4). Nigíʼdi̱i̱ nixnajxi̱ tsigijñaʼ náa Jeobá, niniri̱ya̱a̱ʼ ndxa̱a̱ ga̱jma̱a̱ nini̱ májáanʼ guʼwá náa nduyamajkuíí Dios (Esd. 3:​1-4, 7-11; 6:​16-22). Ikhú mbu̱júu̱ aguʼ ndrígóo Dios nigíʼdu̱u̱ nixpíbínʼ náa Jerusalén, xóo muʼthá náa xuajñuu Dios, dí niguma májáanʼ. Ikhiin niguánú ninindxu̱ún xóo aguʼ náa eʼwíinʼ xa̱bu̱ xuajin bi̱ tséniʼniiʼ Dios.

Dí niʼtáriyaʼ Isaías ga̱jma̱a̱ numuu dí israelitas matangi̱ín mbuyamajkuíí Jeobá, na̱nguá ndijyúuʼ mba̱yu̱u̱ʼ náa Jerusalén. Numuu dí mbaʼin israelitas nánguá ninimbu̱u̱n kuyáá Jeobá (Neh. 13:27; Mal. 1:​6-8; 2:​13, 14; Mat. 15:​7-9). Ma̱ngaa nda̱wa̱á asndu táʼndún gúyáá Jesucristo bi̱ nindxu̱u̱ Mesías (Mat. 27:​1, 2). Nda̱wa̱á kayuuʼ nákhá tsiguʼ 70, xuajin Jerusalén ga̱jma̱a̱ guʼwá náa nduyamajkuíí Dios niguma gámbáa mbu̱júu̱ dí maʼni a̱jma̱ nuthu.

Jeobá niʼtáriyaʼ má dí xígi̱ gárígá (Dan. 9:​24-27). Rígi̱ naʼni mbuʼyáá dí Jeobá na̱nguá má nindoo dí náa Jerusalén dí rígá náa tsu̱du̱u̱ ku̱ba̱ʼ mambanúu mbá xúgíʼ dí nijuiʼtáriyaʼ náa Isaías capítulo 60.

Lá xtáa rambánuu xúgi̱ ajngáa dí niʼtáriyaʼ Isaías rá. Xúʼko̱, mú xúgi̱ naʼthí ga̱jma̱a̱ numuu “a̱ʼgu̱” dí nandoo gáʼthúu̱n: “Jerusalén dí rígá rijma̱a̱”. Ndiéjunʼ nindxu̱u̱ Jerusalén dí rígá rijma̱a̱ rá. Ikhaa nindxu̱u̱ xuajñuu Dios dí rígá mekhuíí. Apóstol Pablo niʼthí xígi̱ kaʼnii ga̱jma̱a̱ numuu a̱ʼgu̱ bugi̱: “Ikhaa nindxu̱u̱ rudulú” (Gál. 4:26). E̱ji̱i̱n a̱ʼgu̱ bugi̱ nindxu̱u̱ Jesús mangiin bi̱ 144,000 a̱ngiu̱lú bi̱ kaxtaʼwíin, ikhí ma̱ngaa xtáa Pablo, ikhiin nindxu̱ún bi̱ nixtaʼwíin makuwá mekhuíí. Bi̱ kaxtaʼwíin bugi̱ najmaʼniún xóo “xuajin kaʼwu” ga̱jma̱a̱ “Israel ndrígóo Dios” (1 Ped. 2:9; Gál. 6:16).

Xú káʼnii nitu̱jxu̱u̱ Jerusalén dí rígá rijma̱a̱ ga̱jma̱a̱ xú káʼnii niʼni dí mambiʼi agiuuʼ xá. Niʼni rígi̱ ga̱jma̱a̱ numún e̱ji̱i̱n bi̱ kaxtaʼwíin bi̱ kúwá náa tsu̱du̱u̱ ku̱ba̱ʼ. Guʼyáá xóo nikúwíin bi̱ kaxtaʼwíin bugi̱ mu xúʼko̱ muʼgua̱nú makru̱ʼu̱lú xóo nimbánuu dí nijuiʼtáriyaʼ náa Isaías capítulo 60.

A̱ngiu̱lú bi̱ kaxtaʼwíin ndiyóoʼ dí magajníín náa mikína, numuu dí ikhiin kúwá ikhí asndu nákha raga̱jma̱ siglo, índo̱ xa̱bu̱ bi̱ tsíñún gúyáá Dios nigíʼdi̱i̱ nisngáa dí nduwaʼ nda̱wa̱á dí nikháñún apóstoles (Mat. 13:​37-43). Ikhiin nikúwá náa Babilonia xuajin dí Mba̱a̱, dí nandoo gáʼthúu̱n mbá xúgíʼ religión nduwaʼ. Ikhiin nikúwá má xúʼko̱ ikhí asndu ‹índo̱ nirtumuu mbiʼi› xóo muʼthá índo̱ nigi̱ʼdu̱u̱ tsiguʼ 1914 (Mat. 13:​39, 40). Nda̱wa̱á nákha tsiguʼ 1919, mbá nacha̱ a̱ngiu̱lú nigíʼdi̱i̱ nimbiʼi a̱ngiu̱ún. Xú káʼnii nirígá rá. Nirígá rígi̱ índo̱ ikhiin nigi̱ʼdi̱i̱ nitaraʼa kájxi̱.b Asndu nákha ikhú mbaʼin xa̱bu̱ bi̱ kúwá náa mbaʼa xuajin nigi̱ʼdi̱i̱ nigún náa aguʼ rúʼko̱, asndu nigún mangiin bi̱ xóó naguanún bi̱ kúwá náa Israel ndrígóo Dios, bi̱ mangiin nindxu̱ún “reyes” bi̱ naʼthí ga̱jma̱a̱ numún náa Isaías 60:3 (Apoc. 5:​9, 10).

Inu má a̱ngiu̱lú bi̱ kaxtaʼwíin muni̱ dí mambiʼi agiuuʼ Jeobá. Índo̱ ikhiin ni xákúwá náa tsu̱du̱u̱ ku̱ba̱ʼ, numuu dí ikhiin maguánú mani̱ndxu̱ún “Jerusalén dí nuxi̱ʼ”, xóo muʼthá, a̱ʼgu̱ bi̱ mbayáa Cristo, ikhiin nindxu̱ún bi̱ mbá 144,000 bi̱ nindxu̱ún reyes ga̱jma̱a̱ ndxajkun (Apoc. 14:1; 21:​1, 2, 24; 22:​3-5).

Jerusalén dí nuxi̱ʼ magiʼdoo numuu índo̱ gámbánúu dí naʼthí náa Isaías 60:1 (atayáá ma̱ngaa Isaías 60:​1, 3, 5, 11, 19, 20 ga̱jma̱a̱ Apocalipsis 21:​2, 9-11, 22-26). Xó má xuajin Jerusalén dí nirígá nákha wajyúuʼ niʼtáñajuunʼ xuajin Israel, xúʼko̱ má Jerusalén dí nuxi̱ʼ, xóo muʼthá Cristo gajmíi̱n bi̱ kaxtaʼwíin mutañajunʼ náa numbaaʼ nuxi̱ʼ. Ndiéjunʼ lá eyoo gáʼthí índo̱ náa Apocalipsis naʼthí rí Jerusalén dí nuxi̱ʼ “nagajtaa mekhuíí asndu náa xtáa Dios” rá. Nandoo gáʼthí dí bi̱ kaxtaʼwíin muñewu̱u̱n xa̱bu̱ bi̱ kúwá náa tsu̱du̱u̱ Ku̱ba̱ʼ. Náa Biblia naʼthí dí xa̱bu̱ jmbiin bi̱ kúwá náa mbaʼa xuajin “magún ga̱jma̱a̱ numuu agiuuʼ” Jerusalén dí nuxi̱ʼ, rúʼko̱ gáʼni dí ikhiin ma̱ndoo makuwá náa ku̱ba̱ʼ mitsaanʼ ga̱jma̱a̱ ni xánindxu̱ún xa̱bu̱ aʼkhá ma̱ngaa ni xákháñún (Apoc. 21:​3, 4, 24). Ga̱jma̱a̱ numuu rígi̱ maʼga̱nú “mbiʼi rí Dios maʼni májáanʼ xúgíʼ” xó má niʼtáriyaʼ Isaías ga̱jma̱a̱ eʼwíinʼ profetas (Hech. 3:21). Nigi̱ʼdu̱u̱ niguma májáanʼ xúgíʼ rígi̱ índo̱ Cristo ni̱jkha̱nú ninindxu̱u̱ Rey ga̱jma̱a̱ mambá raguma rígi̱ índo̱ gájngoo mil tsiguʼ.