Graxe̱ rí nuni bi̱ nuraxnuu

Ndiéjunʼ dí nánguá má mba̱yu̱u̱ʼ magíwánʼ Jeobá “náa a̱jkiu̱ún” xa̱bu̱ ñajunʼ rá.

Náa Apocalipsis 17:​16, 17 naʼthí dí gárígá índo̱ gági̱ʼdu̱u̱ ga̱ʼkhu̱ rí majphú mba̱a̱: “Mbá gu̱wa̱ʼ chi̱ji̱ʼ rí nitayáá ma̱ngaa xujkhú xkawi̱i̱ʼ mawiñu̱u̱nʼ kuyáá a̱ʼgu̱ bi̱ nagujuamínáʼ, murigú káyííʼ xúgíʼ rí gíʼdoo ga̱jma̱a̱ muniña̱a̱ʼ tsaʼtsaaʼ. Mu̱phu̱ xuyuuʼ ga̱jma̱a̱ mutsikha̱a̱ náa aguʼ. Numuu rí Dios nigíwánʼ náa a̱jkiu̱ún dí munimbaníí dí ikhaa nandxaʼwámina’, xóo muʼthá, munimbaníí mbóó rí e̱ndxa̱ʼwa̱míjna̱ xúgíinʼ dí muxnáá tsiakii mu maʼtáñajunʼ xujkhú xkawi̱i̱ʼ”. Nákha ginii náa i̱yu̱lúʼ naʼthí dí Jeobá magíwánʼ “náa a̱jkiu̱ún” xa̱bu̱ ñajunʼ rí muni̱ gámbáa xúgíʼ religión dí nduwaʼ.

Mú ndi̱ya̱a̱xu̱ dí ndayóoʼ muriʼkhu̱u̱ xóo ekru̱ʼu̱lú. Dí Jeobá magíwánʼ “náa a̱jkiu̱ún” xa̱bu̱ ñajunʼ nindxu̱u̱ dí ikhiin “muxnáá tsiakii mu maʼtáñajunʼ xujkhú xkawi̱i̱ʼ”. Xú káʼnii gámbánúu ajngáa rígi̱ rá. Mu makru̱ʼu̱lú májánʼ guriʼña̱a̱ grajxe̱ rígi̱.

Tsíin nindxu̱ún bi̱ na̱ʼkha̱ raʼthí ga̱jma̱a̱ numún náa profecía rígi̱ rá. “A̱ʼgu̱ bi̱ nagujuamínáʼ”, bi̱ ma̱ngaa nagumbiʼyuu “Babilonia rí Mba̱a̱”, rí nandoo gáʼthúu̱n xúgíʼ religión dí nduwaʼ. “Xujkhú xkawi̱i̱ʼ mañaaʼ xngeʼdii”, nandoo gáʼthúu̱n organización dí nigi̱ʼdu̱u̱ nirígá nákha tsiguʼ 1919, mu náa xúgíʼ numbaaʼ marigá dí tsímáá ga̱jma̱a̱ nigumbiʼyuu Sociedad de Naciones, mú rí xúgi̱ najmaʼnuuʼ xóo Organización de las Naciones Unidas (Apoc. 17:​3-5). Ga̱jma̱a̱ “mbá gu̱wa̱ʼ chi̱ji̱ʼ” nandoo gáʼthúu̱n xúgíinʼ xa̱bu̱ ñajunʼ bi̱ numbayíí xujkhú xkawi̱i̱ʼ.

Xú káʼnii embájxu̱u̱ a̱ʼgu̱ bi̱ nagujuamínáʼ ga̱jma̱a̱ xujkhú xkawi̱i̱ʼ mañaaʼ xngeʼdii rá. A̱ʼgu̱ bi̱ nagujuamínáʼ “kríguii” mbáa xujkhú xkawi̱i̱ʼ mañaaʼ xngeʼdii, rígi̱ naʼni mbuʼyáá dí nambáyúu ga̱jma̱a̱ asndu naʼtáñajuunʼ xujkhúʼ mu maʼni rí nandoo ikhaa.

Ndiéjunʼ gágíʼnuu a̱ʼgu̱ bi̱ nagujuamínáʼ rá. Xujkhú xkawi̱i̱ʼ ga̱jma̱a̱ gu̱wa̱ʼ chi̱ji̱ʼ bi̱ numbayíí “mawiñu̱u̱nʼ kuyáá a̱ʼgu̱ bi̱ nagujuamínáʼ”. Murigú káyííʼ xúgíʼ rí gíʼdoo ga̱jma̱a̱ musngajmúún xúgíinʼ dí ra̱májánʼ dí naʼni. Munimbáníí rí Jeobá niʼthí marigá: Maguma gámbáa mbá kayuuʼ (Apoc. 17:1; 18:8). Xúʼko̱ gáguma gámbáa xúgíʼ religión rí nduwaʼ. Mú, nákha xóó tsérígá rúʼko̱, Jeobá maʼni dí xa̱bu̱ ñajunʼ muni̱ mbá rí nditháan xóó tsérígá.

Ndiéjunʼ gáʼni Jeobá dí muni̱ xa̱bu̱ ñajunʼ rá. Xó má ndiʼyáá magíwánʼ “náa a̱jkiu̱ún” xa̱bu̱ ñajunʼ bi̱ nandoo gáʼthúu̱n gu̱wa̱ʼ chi̱ji̱ʼ “dí ikhaa nandxaʼwámina’”. Maʼni rí “muxnáá tsiaki̱i̱ ga̱jma̱a̱ rí maʼtáñajunʼ xujkhú xkawi̱i̱ʼ” mañaaʼ xngeʼdii, xóo muʼthá, muxnáá rí maʼtáñajunʼ Naciones Unidas (Apoc. 17:13). Atatsaʼwáminaʼ ndiéjunʼ eyoo gáʼthúu̱n rígi̱. Rígi̱ eyoo gáʼthúu̱n dí raʼkháa ikhiin gúndxaʼwa̱míjna̱ muxnáá tsiaki̱i̱ rí guáʼdáá mu maʼtáñajunʼ xujkhú xkawi̱i̱ʼ. Numuu dí Jeobá nindxu̱u̱ bi̱ magíwánʼ náa a̱jkiu̱ún mu muni̱ rígi̱ (Prov. 21:1; atani̱ mbríguii ga̱jma̱a̱ Isaías 44:28). Lá mañu mañuu gárígá rígi̱ ráʼ. Na̱nguá, mbá nacha̱ gárígá. Ikhú índo̱ gákánáá tsiaki̱i̱ mu maʼtáñajunʼ, xujkhú xkawi̱i̱ʼ bi̱ nandoo gáʼthúu̱n Naciones Unidas maʼnimbánuu rí Jeobá nandoo ga̱jma̱a̱ maʼni gámbóo xúgíʼ religión rí minduwaʼ asndu kámuu.

Ndiéjunʼ kuaʼti̱i̱n marigá nda̱wa̱á rá. Xáxmiéjunlú mbuʼyáá á mu rígá noticia dí nasngájma rí mañu mañuu xa̱bu̱ ñajunʼ mumbayíí Naciones Unidas. Gíʼmaa muguaʼthi̱i̱n dí mbá nacha̱ Jeobá magíwánʼ náa a̱jkiu̱ún xa̱bu̱ ñajunʼ dí muxnáá tsiaki̱i̱ mu maʼtáñajunʼ xujkhúʼ xkawi̱i̱ʼ. Índo̱ gárígá rígi̱ guʼyáálú dí inu má magi̱ʼdu̱u̱ ga̱ʼkhu̱ rí majphú mba̱a̱. Ikha jngóo, “gakuwáanʼlu xawii ga̱jma̱a̱ gundxaʼwamíjna̱ má xúʼko̱ rí májánʼ”, ¡numuu rí mbá nacha̱ gáxti̱ʼkhu̱u̱ xóo kuwáánʼlú! (1 Tes. 5:6).