Lá natayáá má ráʼ.
Lá gajkhun nikuwa xa̱bu̱ nákha wajyúúʼ bi̱ nidu tsígáʼ dí ra̱májánʼ náa mbañúúnʼ eʼwíínʼ ráʼ.
Copia ndrígóo Digesto rí kaʼyoo Xa̱bu̱ Ñajunʼ Justiniano rí niguma tsiguʼ 1468 nindxu̱u̱ mbá i̱yi̱i̱ʼ náa naʼthí ga̱jma̱a̱ numuu xkujndu dí nirígá nákha wajyúúʼ.
NÁA Mateo 13:24-26, Jesús niʼthí: “Ri naʼtañajun tsi xta mikui, xo jaʼni mba xabo tsi naʼdu tsiga ri majan naʼ mbayu jaʼni-ne. Aun-ma ri nunu xabo, aʼkue niʼka xabo tsi guiʼdamineʼ gajma sianʼ, niʼduroʼo tsiga ri xkahuiʼ naʼ majñu trigo, aʼkue nika. Rido nijraʼan raxo trigo, nigu itsu, aʼkue nikujma ina ri xkahuiʼ iki manga”. Tikhun bi̱ nduyáá nakumu̱ún dí xkri̱da rígi̱ ragájkhun nindxu̱u̱. Mú tikhu i̱yi̱i̱ʼ dí nirígá náa Guʼwá Ñajunʼ Roma nákha wajyúúʼ nasngájma dí ma̱ndoo marigá rúʼko̱.
Xó má eʼthí mbá diccionario ndrígóo Biblia, xtángoo ndrígóo Roma nasngájma rí nindxu̱u̱ mbá delito rí mbáa xa̱bu̱ mata̱nga̱a̱ maʼniuu dí ra̱májánʼ imba̱a̱ índo̱ gáʼdu tsígáʼ dí ra̱májánʼ náa mbayuuʼ. Á mu ndiyóoʼ marigá xtángoo rígi̱, nindxu̱u̱ numuu rí nirígá. Mbáa xa̱bu̱ bi̱ ndaʼyoo xtángoo bi̱ mbiʼyuu Alastair Kerr naʼthí rí nákha tsiguʼ 533 nda̱wa̱á rí ni̱ʼkha̱ Cristo, Justiniano bi̱ niʼtáñajunʼ náa Roma niríyaʼ mbá i̱yi̱i̱ʼ rí najmaʼnuʼ xóo Digesto. I̱yi̱i̱ʼ rígi̱ nindxu̱u̱ mbaʼa enii xtángoo ndrígóo Roma náa na̱ʼkha̱ rí nithi bi̱ nduyáá xtángoo nákha tsiguʼ 100 ga̱jma̱a̱ 250 nda̱wa̱á rí nixtáa Cristo. Náa Digesto naʼthí ga̱jma̱a̱ numuu xa̱bu̱ bi̱ nijmañuu bi̱ nagumbiʼyuu Ulpiano, bi̱ niʼthí numuu mbáa bi̱ niʼdu tsígáʼ dí ra̱májánʼ náa mbayuuʼ imba̱a̱ ga̱jma̱a̱ niʼni gachúu rí niʼdu. Ma̱ngaa naʼthí rí bi̱ niʼdu kaʼyoo mixnáá mbújkha̱a̱ mu muni numa̱a̱ rí nini gachíí.
Xó má eʼyáá, rígi̱ nirígá náa mbayuuʼ Roma. Ma̱ngaa nasngájma rí xkri̱da rí nigíʼ Jesús gajkhun nirígá.