Rí muxprigúmíjná

NDIÉJUNʼ NINDXU̱U̱ RÁ.

Nindxu̱u̱ mbá cualidad rí nambáyulú índo̱:

• Naguaʼti̱i̱n mu muʼni rí nanigulúʼ.

• Rí muʼni gaʼduunʼ rí nandoo xuyulúʼ.

• Námbulú ñajunʼ rí tsénigulú muʼni.

• Nundxa̱ʼwa̱míjna̱ ga̱jma̱a̱ numún eʼwíínʼ.

NDÍJKHA GÍʼDOO NUMUU RÁ.

E̱ji̱n bi̱ nuxprigúmíjná maʼngu̱u̱n muraʼníí mbá tsáʼkhá maski ajndu nakujmaa mitsaan wéñuʼ. Mú e̱ji̱n bi̱ tsexprigúmíjná nuni rígi̱:

• Nagiʼdu̱u̱n.

• Nakuwa gíná.

• Nutsikha ndíí, najmún droga o naʼwa̱a̱n wéñuʼ iya najnga̱a̱.

• Tsephiʼtsu májánʼ.

Mbá i̱yi̱i̱ʼ niʼthí rí índo̱ e̱ji̱n nixprigúmíjná, índo̱ niʼni guanii na̱nguá niguáʼdáá wéñuʼ xkujndu ga̱jma̱a̱ numuu mbújkha̱a̱, nandii ga̱jma̱a̱ ninimbu̱ún náa xtángoo. Rí niʼthí náa i̱yi̱i̱ʼ rúʼko̱ niʼni rí Angela Duckworth, bi̱ naʼsngáa náa Universidad dí rígá náa Pensilvania, mandxaʼwáminaʼ rígi̱: “Rí majmañaaʼ mataxpríguminaʼ mambáyaaʼ nda̱wa̱á”.

XÚ KÁʼNII GÚʼSNGÚÚN MU MUXPRIGÚMÍJNÁ XÁ.

Gajmañaaʼ maratha na̱nguá ga̱jma̱a̱ xátriʼkhu̱u̱ dí niratá

IKHA RÍ NA̱ʼKHA̱ NÁA BIBLIA: “Á mu naratha xúʼko̱, gaʼni xúʼko̱, á mu na̱nguá, na̱nguá” (Mateo 5:37).

Nguáná e̱ji̱n majkhinʼ nuni sia̱nʼ, nguáná asndu náa inún eʼwíínʼ xa̱bu̱. Á mu xa̱bu̱ guanii nuriʼkhuíí rí nuthi, ada̱ najmañuu rí á mu naʼni sia̱nʼ makánáá rí nandoo.

Mú á mu xa̱bu̱ guanii nuthi rí na̱nguá ga̱jma̱a̱ tseriʼkuíí ajngúún, ada̱ najmañuu mbá ikha rí gíʼdoo wéñuʼ numuu: Xándoo maraʼdáá xúgíʼ rí nandaaʼ. Doctor David Walsh niʼnirámáʼ: “Xa̱bu̱ bi̱ nakru̱ʼu̱u̱n ikha rígi̱ nakuwa itháan tsímáá”. Ma̱ngaa niʼthí rí “tsimbáñun nditháan e̱jñu̱lú índo̱ nuʼsngúún rí numbaaʼ maxnún xúgíʼ rí nandún”.a

Rí maratha̱a̱n na̱nguá a̱ʼdiáaʼ xúgi̱, maʼni rí nda̱wa̱á ikhaa xáʼniuu miʼskhoo maʼthí na̱nguá ga̱jma̱a̱ numuu drogas, rí mabóoʼ ga̱jma̱a̱ mbáa nákha xóó tséyáa ga̱jma̱a̱ i̱ʼwáʼ dí ra̱májánʼ.

Arasngúún rí xúgíʼ rí gúni tséʼniuu á mu májánʼ o ra̱májánʼ marigá rí mudaaʼ

IKHA RÍ NA̱ʼKHA̱ NÁA BIBLIA: “Asndu ndiéjunʼ má rí xtáa raʼdu mbáa xa̱bu̱; rúʼko̱ má gáguxi̱i̱” (Gálatas 6:7).

A̱ʼdiáaʼ gíʼmaa majmañuu rí xúgíʼ rí gáʼni marigá rí magruigúu, ga̱jma̱a̱ á mu tsejmañuu maxpríguminaʼ maraʼnuu gaʼkhu. Mbá xkri̱da, á mu a̱ʼdiáaʼ nakiʼnáa wéñuʼ mámbá rí tsérígá xóo eyoo, xágiʼdiin bi̱ mambáxu̱u̱ gajmíi̱n. Mú á mu najmañuu naxpríguminaʼ o naʼdxuun rí nutháán, eʼwíínʼ maʼndún mambaxúún gajmiún. Atambáyii a̱ʼdiáaʼ rí á mu najmañuu naxpríguminaʼ, maxtáa itháan májánʼ nda̱wa̱á.

Atambáñun mbuyáá rí gíʼdoo itháan numuu

IKHA RÍ NA̱ʼKHA̱ NÁA BIBLIA: Gu̱ya̱a̱ “rí itháan gíʼdoo numuu” (Filipenses 1:10).

Rí maʼngaaʼ mataxpríguminaʼ tsíyoo gáʼthúu̱n rí i̱ndó matani gaʼduunʼ dí ra̱májánʼ, ma̱ngaa nandoo gáʼthúu̱n muʼni rí kaʼyoo, maski ajndu tsénigulú. A̱ʼdiáaʼ phú gíʼmaa majmañuu mbaʼyoo ndiéjunʼ phú itháan gíʼdoo numuu, ikha jngó atayáá rí maʼnimbánuu rí gíʼdoo itháan numuu. Mbá xkri̱da, rí mambóo tarea nákha xóó tséjkha̱ gáʼtsíin.

Araxná mbá májánʼ xkri̱da

IKHA RÍ NA̱ʼKHA̱ NÁA BIBLIA: “Ikhúúnʼ niʼgíʼ xkri̱da, rí xóo nini ga̱jma̱á nindxa̱la, xúʼko̱ má gíʼmaa munila mangáanʼ” (Juan 13:15).

E̱ji̱n nduyáá xú káʼnii eni anu̱ún índo̱ narígá mbá dí ra̱májánʼ, ikha jngó atasngájma rí mataxpríguminaʼ naʼni marigá rí májánʼ. Atraximínaʼ: “Ndiéjunʼ eni índo̱ a̱ʼdióoʼ naʼni makiʼnún rá. Lá nakiʼnún nacha̱ o naʼngo̱o̱ a̱jkiu̱nʼ dxe̱ʼ.”