Rí mani̱ndxu̱ún xa̱bu̱ guabiinʼ

NDIÉJUNʼ EYOO GÁʼTHÚU̱N RÁ.

Bi̱ ni̱ndxu̱ún xa̱bu̱ guabiinʼ guáʼdáá gamajkhún. Tsénimbaʼumíjna̱ ni má tseguaʼti̱i̱n rí mbiʼyamajkún wéñuʼ. Rí phú nuni, naxmiéjunʼ kuñún eʼwíínʼ ga̱jma̱a̱ nandún rí eʼwíínʼ musngúún.

Tikhun xa̱bu̱ nundxa̱ʼwa̱míjna̱ rí á mu nanindxu̱ún xa̱bu̱ guabiinʼ nandoo gáʼthúu̱n rí namiñun, mú rí phú gajkhun, nindxu̱u̱ mbá rí nambáñun mbuyáá náa rí najngawi̱i̱n ga̱jma̱a̱ rí tséʼngu̱u̱n gúní.

NDÍJKHA GÍʼDOO NUMUU RÁ.

• Maʼni rí a̱ʼdiáaʼ magiʼdiin bi̱ mambáxu̱u̱ gajmíi̱n. Náa libro La epidemia del narcisismo naʼthí rí “xa̱bu̱ bi̱ ni̱ndxu̱ún guabiinʼ nutamijná gajmiún eʼwíínʼ” ga̱jma̱a̱ tséndxaʼwamíjna̱ i̱ndó ga̱jma̱a̱ numún ikhiin ma̱ngaa rí “tséʼniun mingíjyúuʼ mambaxúún gajmiún eʼwíínʼ”.

• Matani rí a̱ʼdiáaʼ maxtáa itháan májánʼ nda̱wa̱á. Rí majmañuu mani̱ndxu̱u̱ xa̱bu̱ guabaaʼ mambáyúu xúgi̱ ga̱jma̱a̱ nda̱wa̱á xóo índo̱ mbayáaʼ ñajunʼ. Doctor Leonard Sax niʼnirámáʼ: “Mbáa bi̱ niʼnimbamínáʼ wéñuʼ, bi̱ tséʼngo̱o̱ gáʼyoo rí xájmaa maʼni má xakánaa ñajunʼ índo̱ gánda̱ʼa̱, mú bi̱ nasngájma rí naʼdxawuun xúgíʼ rí naʼthúu̱n bi̱ naʼniuu graxe̱, mbáa ikhaa makánaa ñajunʼ”.a

XÚ KÁʼNII GÚSNGÚÚN MANI̱NDXU̱ÚN XA̱BU̱ GUABIINʼ XÁ.

Atambáñun mu xúni̱ mbaʼumíjna̱

IKHA RÍ NA̱ʼKHA̱ NÁA BIBLIA: “Á mu mbáa naku̱mu̱u̱ rí gíʼdoo numuu, mu nda̱a̱ rí nindxu̱u̱, xtáa raʼninduwaminaʼ” (Gálatas 6:3).

• Xárathu̱u̱n ajngáa nduwaʼ. “Xúgíʼ rí nanigua̱ʼ maʼngaaʼ matani”. “Maʼngaaʼ matani xúgíʼ rí nandaaʼ”. Ajngáa xóo rígi̱ nakujmaa rí naxkajxi̱i̱ maʼni itháan, mú nguáná tsembánuu rígi̱. Mbáa e̱jña̱ʼ makuwá itháan májánʼ á mu nuni rí kayáa muni ga̱jma̱a̱ nuni tsiakimijna muxkamaa.

• Arathún rí májánʼ eni. Rí maratha̱a̱n a̱ʼdiáaʼ rí nindxu̱u̱ bi̱ itháan májaanʼ tsembáyúu mani̱ndxu̱u̱ xa̱bu̱ guabaaʼ. Ataniminaʼ marathu̱u̱n rí naʼngu̱u̱n nuni.

• Atie̱wa̱a̱n xóo ejmúún e̱jña̱ʼ redes sociales. Nguáná xa̱bu̱ najmún redes sociales mu majmaʼnunʼ ga̱jma̱a̱ muni mbaʼumíjna̱ ga̱jma̱a̱ rí naʼngu̱u̱n nuni, rígi̱ tsimbríguii ga̱jma̱a̱ rí manindxa̱ʼ xa̱bu̱ guabaaʼ.

• Atambáñun e̱jña̱ʼ mu munda̱ʼa̱ rí maguma mba̱a̱ a̱jkiu̱ún kuñún. Índo̱ a̱ʼdiáaʼ gakiéʼkúun, atambáyii mu mbaʼyoo rí niʼni.

Arasngúún muxna̱a̱ núma̱aʼ

IKHA RÍ NA̱ʼKHA̱ NÁA BIBLIA: “Gusngajmá rí nuxna̱a̱ núma̱aʼ” (Colosenses 3:15).

• Ga̱jma̱a̱ numuu xúgíʼ rí niguma. E̱ji̱n gíʼmaa mbuyamajkuíí dí rígá ga̱jma̱a̱ mbuyáá rí ndayúlú mu makuwáanʼ xóó. Mbá xkri̱da, á mu nda̱a̱ giñánʼ, iyaʼ o ganitsu makhañúlú. Ajngáa xóo rígi̱ maʼni rí ikhiin mbuyamajkuíí ma̱ngaa muxna̱a̱ núma̱aʼ ga̱jma̱a̱ numuu xúgíʼ rí naʼgui̱i̱ rí niguma.

• Ga̱jma̱a̱ numuu rí xóo xa̱bu̱ ni̱ndxu̱ún eʼwíínʼ. Atasngájmáá a̱ʼdiáaʼ rí eʼwíínʼ guáʼdáá itháan numún ki xóo ikhaa ga̱jma̱a̱ xaxígúu rí xóo xa̱bu̱ ni̱ndxu̱ún. Itháan májánʼ majmañuu xóo ni̱ndxu̱ún ikhiin.

• Arasngúún muxna̱a̱ núma̱aʼ. Arasngúún e̱jña̱ʼ muxna̱a̱ núma̱aʼ raʼkháa i̱ndó ga̱jma̱a̱ ajngáa gíʼmaa magajnúu asndu náa a̱jkiu̱ún. Rí muxna̱a̱ núma̱aʼ gíʼdoo numuu mu mani̱ndxu̱ún xa̱bu̱ guabiinʼ.

Arasngúún rí gíʼdoo numuu mumbañún eʼwíínʼ

IKHA RÍ NA̱ʼKHA̱ NÁA BIBLIA: “Gani̱ndxa̱la xa̱bu̱ guabaaʼ, gu̱ya̱a̱ rí eʼwíínʼ itháan guáʼdáá numún ki xóo ikháanʼla, xaxmiéjuanla kuyamíjna̱ i̱ndó ga̱jma̱a̱ numala ikháanʼ, ma̱ngaa gíʼmaa maxmiéjuanla ku̱ñu̱u̱n eʼwíínʼ” (Filipenses 2:3, 4).

• Atandu̱ʼu̱u̱n e̱jña̱ʼ rí muyambáá ga̱jma̱a̱ ñajunʼ dí rígá guʼwáá. Rí xátatsiʼñáʼ mañajunʼ a̱ʼdiáaʼ náa guʼwáaʼ asndu xóo naratháán: “Ikháán xándoo matani rígi̱ numuu rí xtaʼdáá wéñuʼ numaaʼ”. Ginii gíʼmaa mayambáá náa guʼwá, nda̱wa̱á ma̱ndoo maʼtsíin. Atasngájmaa xóo embáñun wéñuʼ eʼwíínʼ índo̱ ikhaa naʼni rí kaʼyoo ga̱jma̱a̱ maʼndún kuyáá ma̱ngaa mbuyamajkuíí.

• Atambáñun mbuyáá rí gíʼdoo wéñuʼ numuu mumbañún eʼwíínʼ. Rí maxmiéjúnʼ kuñún eʼwíínʼ nayambáá mu mandxa̱ʼóo májánʼ edxu̱u̱ a̱ʼdiáaʼ. Ikha jngó, gu̱ya̱a̱ tsáa eyóoʼ mixtambáyii ga̱jma̱a̱ xú káʼnii a̱ʼdiáaʼ gándoo gámbáyúu. Aratháán rí májánʼ eʼni ga̱jma̱a̱ araxnáá tsiakii índo̱ nambáñun eʼwíínʼ.