1. Lá Dios gíʼdoo aʼkhúun rí numíniiʼ ráʼ.

Ndíjkha gíʼdoo numuu mbuʼyáá xóo extiʼña̱a̱ rá.

Mbaʼin xa̱bu̱ tsíñún gúyáá Dios numuu rí nakumu̱ún rí ikhaa gíʼdoo aʼkhúun rí numíniiʼ.

Atatsaʼwáminaʼ rígi̱

Mbaʼin bi̱ kuya̱ edxu̱u̱ náa guʼwá ndxajkun nusngáa rí Dios naʼni marigá tsingíná. Tikhun nuthi:

• Rí Dios naxná castigo índo̱ narígá gamiéjunʼ.

• Rí e̱ji̱n nakháñun numuu rí Dios ndayóoʼ mbáa ángel mekhuíí.

• Rí Dios nayambáá náa guerra.

Mú, á mu ndxajkun nusngáa rí nduwaʼ ga̱jma̱a̱ numuu Dios rá. Á mu Dios tsíniguuʼ rí nusngáa xá.

Rí naʼthí náa Biblia

Dios tséʼni mumíniiʼ

Rí maʼni mumíniiʼ xa̱bu̱ tsémbánii ga̱jma̱a̱ rí xóo nindxu̱u̱. Náa Biblia naʼthí ga̱jma̱a̱ numuu Dios:

“Xúgíʼ kambo̱o̱ nindxu̱u̱ xóo phú gíʼmaa. [...] Ikhaa naʼni xóo phú gíʼmaa ga̱jma̱a̱ jmbii” (DEUTERONOMIO 32:4).

“¡Dios gajkuwin xándoo maʼni dí ra̱májánʼ, ga̱jma̱a̱ ikhaa tsindxaʼwáminaʼ dí ra̱májánʼ!” (JOB 34:10).

“Bi̱ gíʼdoo xúgíʼ tsiakii tsérkaʼwu rí gajkhun” (JOB 34:12).

Dios tsíyoo gáʼyoo religión bi̱ nusngáa rí nduwaʼ ga̱jma̱a̱ numuu ikhaa

Mbá xkri̱da, tsíyoo gáʼyoo religión rí nusngáa rí Dios naʼni rí mumíniiʼ ga̱jma̱a̱ bi̱ nuyambáá náa guerra ma̱ngaa náa nuxmijná.

“Gaʼyee nutariyaʼ rí minduwaʼ ga̱jma̱a̱ mbiʼyuuʼ [Dios]. Ikhúúnʼ na̱nguá nikuʼmíin, ni má tátañájúúnʼ ni má táthu̱u̱n nimbá. Bi̱ kuwa rutariyaaʼ nuthi mbá visión nduwaʼ [...] ma̱ngaa nindxu̱u̱ nduwaʼ rí nagájnuu náa a̱jkiu̱ún” (JEREMÍAS 14:14).

Jesús táʼndoo gáʼyoo religión bi̱ nuni dí ra̱májánʼ

“Raʼkháa xúgínʼ bi̱ nuthu̱nʼ: ‹Tátá, Tátá›, matu̱ʼu̱u̱n náa reino dí rígá mekhuíí, i̱ndó bi̱ naʼni rí nandoo Anu̱ʼ bi̱ xtáa mekhuíí. Mbaʼin mutu̱nʼ mbiʼi rúʼko̱: ‹Tátá, Tátá, lá raʼkháa ga̱jma̱a̱ mbiʼyaaʼ nitaxu rí marigá nda̱wa̱á, ga̱jma̱a̱ mbiʼyaaʼ nixkawíin xa̱bu̱ wéñiʼ, ga̱jma̱a̱ mbiʼyaaʼ ninixu mbaʼa milagros ráʼ.› Ga̱jma̱a̱ ikhú mathu̱u̱n: ¡Nditháan tániʼniáanʼla! Aʼgua̱ kaníí, bi̱ nini dí ra̱májánʼ wéñuʼ” (MATEO 7:21-23).