Lá mangáán natatsaʼwáminaʼ dí raʼkhí xóo kiexu̱u̱n eʼwíinʼ ráʼ.

Xa̱bu̱ nundxaʼwamíjná dí raʼkhí ga̱jma̱a̱ numún bi̱ naguwáʼ imbo̱ʼ xuajen, bi̱ mixtiʼkhu color ndrígu̱ún, bi̱ nuthi i̱ʼwáʼ ajngáa, bi̱ nagún i̱mba̱ religión, bi̱ nindxúu̱n wa̱ʼxa̱ʼ o jiámá ma̱ngaa bi̱ guaʼdáá o raguáʼdáá mbújkha̱a̱. Tikhun nuthi dí raʼkhí ga̱jma̱a̱ numún eʼwíinʼ numuu rí xóo tsiguúnʼ, rí ninigajmaa, rí na̱nguá ejmiin gúni o xóo kiexu̱u̱n. Mú nakumu̱ún rí nánguá má endxaʼwamíjná dí raʼkhí ga̱jma̱a̱ numún.

Lá ma̱ndoo maʼni rí mangáán matatsaʼwamínáʼ dí raʼkhí xóo kiexu̱u̱n eʼwíinʼ ráʼ. Ra̱mingíjyúuʼ mbuʼyáá rí xúʼko̱ eni eʼwíinʼ xa̱bu̱, mú mbáa maʼni mingíjyúuʼ mbuʼyáá rí ikháanʼlu ma̱ngaa nuʼni xúʼko̱. Rí phú gajkhun xúgiáanʼ má nundxaʼwamíjná dí raʼkhí ga̱jma̱a̱ numún eʼwíinʼ. David Williams mbáa bi̱ najmañuu ndaʼyoo xóo embáxu̱u̱n xa̱bu̱ naʼthí rí índo̱ mbáa nandxa̱ʼwáminaʼ dí raʼkhí ga̱jma̱a̱ numún xa̱bu̱ bi̱ kúwá náa mbá xuajen, índo̱ ndaʼyoo mbáa bi̱ na̱ʼkha̱ náa xuajen rúʼko̱, “asndu tsékumu̱u̱ xóo eʼni mú na̱nguá eʼniuu ikháá xó má eʼwíinʼ”.

Mbá xkri̱da, Yovitsa mbáa bi̱ na̱ʼkha̱ náa Europa, náa kúwá mbá nguéjmi̱i̱n xa̱bu̱ bi̱ tsíñún gúñún. Ikhaa naʼthí: “Niku̱mu̱ʼ rí nimbáa dí ikhiin nindxu̱u̱ májáanʼ xa̱bu̱. Na̱nguá niku̱mu̱ʼ dí nindxaʼwamínaʼ dí raʼkhí ga̱jma̱a̱ numún. Ikhúún niku̱mu̱ʼ: ‹Gajkhun má nindxu̱u̱ xóo edxaʼwamínaʼ ga̱jma̱a̱ numún›”.

Mbaʼin Xa̱bu̱ Ñajunʼ nuni marigá xtángoo náa naʼthí dí gíʼmaa mbuñún ikháá xúgínʼ. Mú tséʼngu̱u̱n gúni gámbáa dí xáwiñu̱u̱n kuyamijná xa̱bu̱. Náá numuu rá. Numuu rí xtángoo rúʼko̱ i̱ndó nurikháá rí xóo nuni xa̱bu̱, mú raʼkháa dí xóo endxaʼwamíjna ga̱jma̱a̱ xóo ekumu̱ún. Rí mawiya̱a̱ʼ xtayáá mbáa nda̱ja̱a̱ náa ku̱ma̱ ndrígáʼ ga̱jma̱a̱ náa a̱jkia̱a̱nʼ. Lá niʼnga̱a̱ má ikháán nitríyaʼ náa a̱jkia̱nʼ rí matatsaʼwamínáʼ dí raʼkhí xóo kiexu̱u̱ mbáa rá. Ndiéjunʼ gámbáyaʼ rá.