Nagi̱ʼdu̱u̱ nakuwa xa̱bu̱ numbaaʼ

NDIÉJUNʼ lá rígá rí mixtiʼkhu náa inúu i̱yi̱i̱ʼ rí kiʼniriyaʼ rá. Xúʼko̱, xa̱bu̱ bi̱ natañún. Ikhaa ni̱ndxu̱u̱ timbáa xa̱biya̱ ga̱jma̱a̱ timbáa a̱ʼgu̱. Tsáa niʼnin xá. Mínaʼ má Dios. Lá natayáá káʼnii mbiʼyuu ikhaa xáʼ. Ikhaa mbiʼyuu Jeobá. Ma̱ngaa xa̱biya̱ ga̱jma̱a̱ a̱ʼgu̱ nigumbiʼyuu Adán ga̱jma̱a̱ Eva.

Jeobá Dios niʼnii Adán xúgi̱ kaʼnii: Ndiyá yujndoʼ ku̱ba̱ʼ mu maʼnii májánʼ wéñuʼ xa̱bu̱. Ikhú nindiyuu rakhóo xa̱biya̱ mu xúʼko̱ Adán mbayá xi̱ʼ maxtáa.

Dios nigiʼdoo mbá ñajunʼ maʼni Adán. Niʼthúu̱n rí maxná mbiʼñún xúgínʼ enii xujkhúʼ. Mbáa Adán niʼnigajmaa̱ xú nindxúu̱n xujkhúʼ mba̱yu̱u̱ʼ mbiʼi mu maxná mbiʼñún májánʼ xúgínʼ xujkhúʼ. Índo̱ Adán xtáa raʼni rígi̱, rígá rí nigíʼdu̱u̱ ndiʼyoo. Lá natayáá ndiéjunʼ ni̱ndxu̱u̱ rá.

Majmi̱i̱n xujkhúʼ nikúwi̱i̱n. Nikuwa elefante i̱ya̱ ga̱jma̱a̱ elefante a̱ʼgu̱, ga̱jma̱a̱ león i̱ya̱, león a̱ʼgu̱. Mú Adán na̱nguá gíʼdaa mbáa bi̱ maxtáa ga̱jma̱a̱. Ikha jngó, Jeobá niʼni rí migu kháñuu Adán, ikhú niríyaʼ náa níjniúu mbó itsu̱ tso̱xto̱o̱. Jeobá nijmuu itsu̱ tso̱xto̱o̱ rígi̱, mu maʼnii mbáa a̱ʼgu̱ bi̱ maʼga̱nú mani̱ndxu̱u̱ a̱ʼgiu̱u̱ Adán.

¡Ra̱ʼkhá tháán gagi xtáa Adán xúgi̱! ¡Ra̱ʼkhá tháán nidxuu Eva numuu rí mitsaan náa awúu̱n ixi̱ ri̱ʼi̱ rí maxtáa! Rí xúgi̱ ma̱ndoo muguaʼdiin e̱jñún ma̱ngaa makuwá xúgínʼ mbá tsímáá.

Jeobá nindoo rí Adán ga̱jma̱a̱ Eva makuwá kámuu mbiʼi. Nindoo rí xúgíʼ Ku̱ba̱ʼ mani̱ndxu̱u̱ mitsaan xóo náa awúu̱n ixi̱ ri̱ʼi̱ náa Edén. ¡Ra̱ʼkhá tháán nidxuu Adán ga̱jma̱a̱ Eva índo̱ nindxa̱ʼwa̱mijna̱ muni̱ rígi̱! Á mu ikháánʼ niraxtaa ikhú, lá manigua̱ʼ matiejuínʼ Ku̱ba̱ʼ mu maʼga̱nú maʼni xóo awúu̱n ixi̱ ri̱ʼi̱ ráʼ. Mú na̱nguá má ndijyúuʼ rí nikuwa gagi Adán ga̱jma̱a̱ Eva. Mbuʼyáá náa numuu.