Mbáa xa̱bu̱ bi̱ tsémiñuu kayuʼ

ÍNDO̱ nigi̱ʼdu̱u̱ nikuwa itháan xa̱bu̱ náa tsu̱du̱u̱ Ku̱ba̱ʼ, mbaʼin ni̱ni̱ dí ra̱májánʼ xóo Caín. Mú mbáa xa̱bu̱ ninindxu̱u̱ i̱mba̱ rútii. Ikhaa nigumbiʼyuu Enoc. Xa̱bu̱ bugi̱ tamiñuu kayuʼ. Xa̱bu̱ bi̱ kúwi̱i̱n mbajndi náa rawunʼ náa nixtáa ikhaa ninindxu̱ún ra̱míjínʼ, mú ikhaa naʼni ma xúʼko̱ ñajunʼ Dios.

Lá natayáá náa numuu rí xa̱bu̱ tsúʼko̱ ni̱ni̱ dí ra̱májánʼ ráʼ. Atatsaʼwáminaʼ rígi̱: Tsáa lá niʼni dí Adán ga̱jma̱a̱ Eva xúnimbu̱ún rí gáʼthi Dios ma̱ngaa mu̱phu̱ xndúu ixi̱ rí Dios niʼthún rí xúphu̱ rá. Mbáa ángel xkawiʼ. Náa Biblia naxná mbiʼyuu Satanás. Ma̱ngoo ikhaa nagíiʼ naʼni rí mbá xúgiáanʼ manindxalú xa̱bu̱ ra̱májánʼ.

Mbóo mbiʼi Jeobá Dios niʼni rí Enoc maʼthúún xa̱bu̱ ikhaa dí mudxawíín rúʼko̱ xánigunʼ. Rígi̱ niʼthún: ‹Mbóo mbiʼi Dios maʼnimbáti̱gi̱i̱n xúgínʼ xa̱bu̱ bi̱ ra̱míjínʼ›. Mbáa rígi̱ niʼni rí makiʼníin wéñuʼ xa̱bu̱. Mbáa asndu nigíiʼ muxiyáa Enoc. Ikha jngó, Enoc ragíʼmaa mamiñúu kayuʼ mu maʼthúún xa̱bu̱ rí wíji̱ maʼni Dios.

Dios tániñuʼ rí Enoc maxtáa mba̱yu̱u̱ʼ tsiguʼ náa tuapun xa̱bu̱ bi̱ ra̱míjínʼ. I̱ndó nixtáa 365 tsiguʼ. Náa numuu eʼthá rí “i̱ndó 365” tsiguʼ rá. Numuu rí ikhú xa̱bu̱ migujkuinʼ wéñuʼ ma̱ngaa nikuwa mba̱yu̱u̱ʼ tsiguʼ ki xóo xa̱bu̱ bi̱ kúwi̱i̱n xúgi̱. ¡Xúʼko̱ kaʼnii; Matusalén a̱ʼdióo Enoc nixtáa 969 tsiguʼ!

Nda̱wa̱á dí nikháñu Enoc, xa̱bu̱ ninindxu̱ún itháan xkawiinʼ. Náa Biblia naʼthí rí ‹xúgíʼ rí ikhiin nindxa̱ʼwa̱mijna̱ má xúʼko̱ ninindxu̱u̱ ra̱májánʼ, ga̱jma̱a̱ ni̱jkha̱nú nijnííʼ dí ra̱májánʼ wéñuʼ náa tsu̱du̱u̱ Ku̱ba̱›.

Lá natayáá náa numuu dí nirígá wéñuʼ xkujndu ikhú ráʼ. Numuu rí Satanás ninindxu̱u̱ bi̱ nigiʼdoo imbo̱o̱ nuxi̱ʼ numuu rí xú maʼga̱ kagu̱u̱n xa̱bu̱ muni̱ dí ra̱májánʼ. Mbuʼyáá ndiéjunʼ ninindxu̱u̱ rúʼko̱.