Ru’wambii’ asndu xú nikáwíín náa Egipto

I̱ndó migiñuʼ xa̱bu̱ nikáwíín náa Ruʼwambiiʼ, mú nda̱wa̱á ninindxu̱ún mbaʼin wéñuʼ. Ikhú, 352 tsiguʼ nda̱wa̱á rí nixnúu Ruʼwambiiʼ, nixtáa Abrahán. Najmañulúʼ xú káʼnii Dios niʼnimbánuu rí nikudaminaʼ índo̱ rí nixniúu Abrahán mbáa ada̱ bi̱ nigumbiʼyuu Isaac. Ikhú, mbáa a̱ʼdióo Isaac, ikhaa bi̱ Jacob bi̱ minaʼ ma Dios ndiyáaʼ.

Jacob nigiʼdiin mbaʼin e̱ji̱i̱n mbá 12 e̱ji̱i̱n jiama mangiin tikhun waʼxaʼ. Bi̱ 10 e̱ji̱i̱n Jacob niwiñunʼ kuyáá giʼtiún, José, ma̱ngaa nigujua̱a̱ mu mani̱ndxu̱u̱ esclavo náa xuajin Egipto. Nda̱wa̱á, José ni̱jkha̱nú ninindxu̱u̱ mbáa Xa̱bu̱ Ñajunʼ bi̱ gíʼdoo wéñuʼ numuu náa Egipto. Índo̱ nirígá mbá ewiʼ xkawiʼ, José ndiyáaʼ xú maʼñún a̱ngui̱i̱n mu mbaʼyoo á mu niriʼkumijnáa. Nda̱wa̱á xúgínʼ bi̱ kúwi̱i̱n náa goʼwóo Jacob, bi̱ israelitas, nigún makuwíin náa Egipto. Rígi̱ nirígá 290 tsiguʼ nda̱wa̱á rí nixtáa Abrahán.

Naʼni mbá 215 tsiguʼ rí israelitas nikúwi̱i̱n náa Egipto. Nda̱wa̱á rí nikháñu José, niguánu ninindxu̱ún esclavo. Nda̱wa̱á nixtáa Moisés, ma̱ngaa Dios nijmiu mu maʼnikáwíín israelitas náa Egipto. Rí mbá xúgi̱, naʼni mbá 857 tsiguʼ dí nirígá xúgíʼ náa maʼni NÍʼKHÓO 2.