José nixuda̱ʼ guʼwá e̱jua̱nʼ

JOSÉ gíʼdoo 17 tsiguʼ índo̱ egún ku̱ya̱a̱ náa Egipto. Ikhí nugujua̱a̱ náa xa̱bu̱ bi̱ mbiʼyuu Potifar. Potifar nañajunʼ ga̱jma̱a̱ rey ndrígóo Egipto, bi̱ nutháán Faraón.

José nañajunʼ gakhi̱i̱ náa Potifar xa̱bu̱ bi̱ niʼtsi̱i̱. Ikha jngó, índo̱ José naʼni itháan nikhi̱i̱, Potifar naxnáxu̱u̱ xúgíʼ goʼwóo. Mú, náa numuu kraʼaa guʼwá e̱jua̱nʼ José rá. Ga̱jma̱a̱ numuu a̱ʼgiu̱u̱ Potifar.

Índo̱ José nikhi̱i̱ nanindxu̱u̱ mbáa xa̱bu̱ mitsiʼyáa wéñuʼ, ikha jngó a̱ʼgiu̱u̱ Potifar nandoo rí mabóóʼ ga̱jma̱a̱ José. Mú José tsíyoo numuu rí ndaʼyoo dí ra̱májánʼ gánindxu̱u̱ rúʼko̱. Mú a̱ʼgiu̱u̱ Potifar nakiʼnáa wéñuʼ. Ikha jngó, índo̱ ni̱ʼkha̱núu̱ ajmbio̱o̱, niʼni xtujtaa niʼthúu̱n: ‹¡Mixkawiʼ José nigíiʼ mabóóʼ ga̱jma̱á ni̱ndxu̱ʼ!›. Potifar naʼnimbo̱o̱ kaʼyoo a̱ʼgiu̱u̱, ikhú nakiʼnáa wéñuʼ ga̱jma̱a̱ José. Naʼni rí muxuda̱ʼ náa guʼwá e̱jua̱nʼ.

Xa̱bu̱ bi̱ kayá edxu̱u̱ náa guʼwá e̱jua̱nʼ nacha̱ ndiʼyoo rí José ni̱ndxu̱u̱ mbáa xa̱bu̱ májánʼ. Ikha jngó naʼni rí mayeʼga edxu̱u̱ náa xúgínʼ xa̱bu̱ bi̱ kuwa náa guʼwá e̱jua̱nʼ. Nda̱wa̱á Faraón nakiʼnáa ga̱jma̱a̱ xa̱bu̱ bi̱ naxnúu copa ga̱jma̱a̱ bi̱ naʼni pan, ma̱ngoo nikudiinʼ náa guʼwá e̱jua̱nʼ. Mbóo mbruʼun, mámbáa dí ikhiin nixnúún mbá xnuʼndaa kiejunʼ, mú tséyaa káʼnii eyoo gáʼthi. I̱mba̱ néjtsuu José naʼthí: ‹Gutunʼ xnuʼndaa ndrígalaʼ›. Ikhú Dios nambáyuu José, mu maʼthí ndiéjunʼ eyoo gáʼthi xnuʼndaa.

José niʼthúu̱n xa̱bu̱ bi̱ naxná copa: ‹Rí gáʼni ajtsú mbiʼi magajnáaʼ náa guʼwá e̱jua̱nʼ, ma̱ngoo maraxna̱a̱ copa Faraón mbu̱júu̱›. Ikha jngó José naʼthí xóó: ‹Índo̱ gágajnáʼ, arathan Faraón ga̱jma̱a̱ numuʼ, ma̱ngoo atambáyuuʼ magajnáaʼla gi̱i̱›. Mú José niʼthúu̱n bi̱ naʼni pan: ‹Rí gáʼni ajtsú mbiʼi Faraón marujturígú edxa̱ʼ›.

Rí niʼni ajtsú mbiʼi nirígá xóo má niʼthí José. Faraón nirujturígú edxu̱u̱ bi̱ naʼni pan. Mú bi̱ naxná copa nigájnáa náa guʼwá e̱jua̱nʼ ga̱jma̱a̱ nagíʼdu̱u̱ nañajunʼ mbu̱júu̱ náa rey. ¡Mú nambrumuu eʼni José! Na̱nguá niʼthúu̱n Faraón ga̱jma̱a̱ numuu ikhaa, ikhú naʼni rí José maguanúu náa guʼwá e̱jua̱nʼ.